هنا

[ملكةه]

البارت 30
همس .. رجعنه من شهر عسلنه هو بالحقيقه اسبوعين مو شهر ..
استقبلونه اهل حمزة احلا استقبال ..
وع شرفنه جانوا مسوين عشه .. كعدنه كوليتنه سوة سوالف وضحك وحمزة يسولفلهم ع سفرتنه ..
شويه وانسحبت النسوان للمطبخ وحمزة گلي لحگي البنات ساعديهن اذا متعبانه ..
واني جنت الطريق كوله بالطيارة نايمه فاكيد متعبانه ..
غرفتي فوگ .. صعدت بدلت ملابسي ونزلت للمطبخ ساعدتهم ..
جلنار سلمت عليه وباركتلي حالهه حال الغريبه .. بعدين شفتهه صعدت بعد مانزلت ..
خالتي گامت تفور وتغلي ع هاي دگة جلنار ..
سألت علي وين زوجتك ليش مانزلت گاللهه علي يمه البنيه تعبانه الحمل مأذيهه فكي ياخه عنهه مو البنات يمج يكفن ويوفن ..
انسدت السالفه بوقتهه بس اشوف خالتي تدردم بسكوت وايه تسكت بيهه ..
....
جلنار .. اليوم عطله فما گعدت الصبح من وقت ..
جانت ساعه ثمانيه ونص تقريبا ..
علي بعده بسابع نومه ..
عفته نايم وگمت غسلت ونزلت ..
اني مو من النوع الي البس حجاب من حمويني بس لبسي زين مستور بس بدون حجاب ..
نزلت لكيت همس وحمزة وخالتي ..
الظاهر همس مسويه الريوگ وگاعدين يتريكون ..
گلت .. صباح الخير ..
حمزة ..اهلا صباح النور ..
همس .. صباح النور ..
خالتي ردت ب هلا ..
حمزة .. سلامتج گال علاوي مالج خلگ ..
ابتسمت ..الله يسلمك .. اي والله ظهري يأذيني ..
خالتي تباوعلي بطرف عينهه وعبالك منتظرة اللحظه المناسبه الي تنهد بيهه عليه واني هم منتظرة هاللحظه ..
اجتي ايه صبحت علينه وبعدين حاجتني ..
ها جلنار سلامتج حبي علاوي كال مريضه ..
لا اليوم احسن الحمدلله ..
شفتهم كولهم گاعدين ولمتهم حلوة گلت اصعد اكعد علي ينزل يتريك ويانه ع واهس هاللمه ..
كمت دا اريد اروح ..
خالتي .. ها تريكتي وراح تتصنگرين فوگ بغرفتج اييي طبعا تعودتي اكو من يسوي الشغل بدالج ..
زفرت بدون ما التفت الهه بس حسيت انو استهضمت ..
اللهم طولج ياروح .. استغفر الله .. كلتهه بگلبي ..
لاخاله اصعد اگعد علاوي حته يتريك .. لاتخافين شغلي محد يسويه غيري ..
خليت وصعدت ..
همس .. من شفت خالتي هيج تحجي وتعامل جلنار ومحد ردهه معناهه هذا الاسلوب الطبيعي مالتهه ويه جلنار ..
عرفت هذا عذاب اختي الحقيقي .. انقهرت عليهه .. فشلتهه كدامنه رزلتهه عبالك طفله مو مرة ابنهه ..
تخوفت حيل من مرة عمي .. والي يخوفني اكثر سكوت حمزة لو اني مريت بهيج موقف ..
يمكن علي اهون لان يحب جلنار ويمكن موقف من المواقف يدافع عن جلنار لو امه تجاوزت حدهه ..
بس اني لو مريت بهيج موقف ياترى حمزة حيدافعلي ..
ورة دقايق نزلت جلنار ووياهه علي مبتسمين ويسولفون ..
ظليت اراقب خالتي .. مختنكه من جلنار تباوعلهم بطرف عينهه وتاكل ..
هاي شمسويتلهه جلنار علمود هلگد حاقده عليهه ..
عمي هم گعد وصارت جَمعه حلوة وگعدنه كوليتنه نتريك سوة ..
خلصنه اكل .. الولد وعمي راحوا بالحديقه ..
جلنار بلشت تشيل الريوك ترجع الاكل بالثلاجه وتغسل المواعين ..
خالتي حجت ..
من اليوم يتقسم الشغل بينج وبين اختج ..
سكتت اني وجلنار هم ساكته ..
بعدين تذكرت حمزة گلي نروح لاهلي نسلم عليهم لان بابا متصل عليه ..
كتلهه .. خالة اليوم اني اروح لاهلي ..
هاا بلشت رحمة الله .. ماشبعتي ونسه وتفرفر ..صارلج اسبوعين نايمه بحضن رجلج ..
انصدمت من اسلوب خالتي البيئه ..
هالعائله شكد ماواصلين بشهايدهم واسلوبهم الراقي بس امهم ابد بعيده كل البعد عنهم بالاسلوب صدووك بيئه ينطبق عليهه المثل من الهوش للماكنتوش ..
ماحجيت شي .. الكلمه بالاخير لحمزة .. ميهمني كلامهه ..
شافتني سكتت ..سألتني ..
شوكت ترحين ؟
من ورة الظهر ..
اهاا زين .. تعرفين تطبخين مو ؟
اي خاله اعرف ..
طبخ الغده عليج .. اختج البرنسيسه كلما تطبخ شي متاكل تكول ماطول هي طابخته تذبه .. مدري شنو هالدلال هذا .. ويركض ابني يجيبلهه الاكل الجاهز علمود تعلف زين ..
اوووووع شنو هالمصطلحات ..گلتهه بگلبي .. كل هذا متحملته جلنار واني وهاله من نسولف بجلنار نكول محظوظه ولفت علي جوة ابطهه ..
طلعت لفة علي جوة الابط متكفي يراد فد عقد لسان من سحارة معدله لخالتي تكف بلا لسانهه عنه ..
صار خاله تدللين ..
المواعين وتنظيف المطبخ لزمته جلنار واني بلشت بالطبخ وآيه عليهه التنظيف ..
نشتغل واحنه ساكتين ..
خالتي طلعت بالحديقه يم ولدهه ..
كلمن التهت بشغلهه ..
فترة وكملت وصعدت لغرفتي سبحت لان بيه ريحه طبخ طتعت من الحمام لكيت حمزة بالغرفه ..
هلاوو ..
جان بيده المبايل ..
رفع راسه باوعلي بس مو اي نظرة هيج عيونه جيكتني من فوك ليجوة ابتسم ورد عليه ..
هلاو حياتي ..
ونصه عيونه ع المبايل ..
اجيت جبت مشطي وكعدت امشط يمه ..
اشتاقيتلج حياتي ..
ذب المبايل وسحبني من ايدي .. ذبيت المشط وهو تمدد ومن سحبني صرت فوكاه ..
التقت عيونه .. ابتسمت .. عيوني نزلت ع شفايفه وصعدت لعيونه .. اشتاقيت ابوسه ..
تنهدت ..
سلامتج

سلامتج حبيبي .. ع شنو هالتنهيده ..
عليك .. مشتاقتلك اني هم ..
امممممم ..شو ممبين ..
وشلون لازم يبين ..
صارلج ساعه تباوعين ع شفتي شوكت تحنين ..
ههههههه ..
نصيت عليه بسته من شفته ..
ظلينه نسولف بهمس وظليت العب بمقدمه شعرة الگذله شعرة اسود ليل ناعم سرح ومرجعه ليورة وظليت اخربطله بي وهو يسولف ..
تدرين مرات واحنه بفراشنه .. اشوف بعيونج كلام عمرج مراح تكدرين تكولينه الي ..
كلام زين لو موزين ؟
لا طبعا زين اصلا كلام يخبل ..
وليش هيج متأكد مراح اگدر اگوله ..
لان نستحين والكلاك هذا جرئ ..
يعني شنو من كلام مثلا .. انطيني جمله ..
مثلا اشوف بعيونج تحبيني ..
اممممم بس اني اكولك احبك ..
اي بس قليل كولش تكوليهه .. لعد اخذي هاي الجمله .. بعيونج اشوف شوگ ورغبه .. شعور حلو من اشوف كولشي بيج يريدني ..
اوووووف اسكت ..
هااا مو حجيناهه ..
هههههههه اي اخجل شسويلك ..
يمه فديت الخجول اني .. اموت ع ربج ..
واني بعد احبك ..
جوعاان ..
الاكل ديتهدر فد نص ساعه ونص الغده ..
لالا جوعااان افتهمي ..
ضحكت افتهمت عليه ردت اكوم اشرد ..
لزمني من خصري حوطه بايديه ..
ويييين ؟
توني سبحت ..
ههههه بعد احسن ..
خليهه ورة الغده ..
هسه وورة الغده .. تأمرين وتتدللين ..
ههههههه مو هيج قصدي ..
لعد تريدين اكثر ؟؟
حمزة !!
عيونه وگلبه وروحه ..
مراح اخلص اليوم يعني ..
لااليوم ولا باجر ولا بعد ميت سنه تخلصين مني ..
حضنته حييييل ...
عصرته .. هو استغرب من تصرفي ..والاغرب جان سؤالي ..
هم يجي يوم وتعوفني ؟؟
هم اكو سبب يخليك تعوفني ؟؟
شنو هالحجي حبيبي ليش هيج تحجين ..
بدون سبب .. سميهه لحظه خبال ..
امممم اوك ..
تعالي اخبلج اكثر ..
گلبني وصار فوگايه ......
......
ورة ساعه صاحونه ع الغده البنات صابات غده ومجهزات كولشي تغدينه بهدوء ..
غسلت المواعين ورتبت المطبخ وصعدت لغرفتي ..
سمعت صوت جلنار عالي بس ماتسمعت يعني مافتهمت شنو جانت تحجي وعلي يهدي بيهه ..
صار عندي فضول اعرف شصاير ..
رأسا انفتحت باب غرفتهم وطلع علي صار بوجهي ..

ظليت اباوعله واريد احجي بس ماعرف شأحجي ..
اخير شي نطقت ..
شبيهه جلنار .. خوماتخربطت ؟؟
لالا مابيهه شي ..
صفن عليه ..
كلي .. هم حجيتي لحمزة شي ؟
شي مثل شنو ؟
ذاك الموضوع ..
كل عقلك تسأل .. يعني لو حاجيتله .. لو ملمحتله بس بالموضوع برأيك يبقيني ع ذمته مثلا ...
سمعت صوت طكطكه بالحمام ..
لزمت كلبي ..
طلع بوجهي حمزة ..
ظليت صافنه بوجهه .. يمكن سمع.. بس احنه محجينه شي ..
هاحبيبي شعدج هنا تردين تسبحين ..
لالا سمعت صوت جلنار عالي وصدفه طلع علي وردت استفسر منه شبيهه جلنار عبالي هم تخربطت ..
اهاا زين ..
علي نزل ..
تمنيت الحگه واعرف شصاير بس ماردت حمزة يشك بشي لان احتمال هو سمع شي بس ماعنده تفسير للي سمعه ..
طبيت للغرفه تمددت تعبانه ع فراشي ..
وبالي سرحان بشنو صاير اريد اعرف ..
تمدد يمي حمزة ..
شبيج ..
مابيه شي ..
وجهج مخطوف لونه صاير شي ؟
لاحبيبي مصاير بس تعبانه شويه ..
ارتاحي لعد ..
شوكت نروح لاهلي ..
خليني انام ساعه وگعديني نبدل ونروح ..
ماشي ..

[ملكةه]

صدوك نمنه ساعه وكعدنه بدلنه ورحنه لبيت اهلي ..جنت متصله ع هاله ومطيتهه خبر راح اجي لبيت اهلي لذلك لكيتهه موجوده هناك ..
تسالمنه وباركولنه وحملوني هدايا وفلوس وواجبات من كرايبنه وكالوا الاسبوع الجاي عزيمتنه ..احنه وعيالي معزومين يم اهلي الجمعه الجايه ..
ماطولنه للعشه ..
المغرب طلعنه .. افترينه واخذنه عشه ورجعنه للبيت ..
حمزة نزل غراضنه اقصد الهدايا ..وصعدهن للغرفه وخالتي تباوع ماحجت شي صعدت بدلت ونزلت جهزت سفرة العشا ويه البنات ..
گعدنه كلنه تعشينه ..
غسلنه مواعين ونظفنه المطبخ وكلمن صعد لغرفته ..
.......
الجمعه الوراهه رحنه لعزيمه اهلي اني وحمزة وعيالي عمي وخالتي وآيه بس هالمرة مااجوي حمويني الكبار حيدر وحسين بس علي وجلنار اجوي ويانه ..
تغدينه وتونسنه ورجعنه ..
علاقة علي واخويه حسام متوترة ..
اصلا طول ما احنه موجودين ببيت اهلي علي متنرفز لان هو منع جلنار تروح لبيت اهلهه من لمن حسام ضربهه ورادت تفقد طفلهه .. حته بزواجي مااجتي راحت رأسا للقاعه حالهه حال الغريبه بس هالمرة عمي اجبر علي ياخذ مرته ويجي ويانه لبيت اهلي ويتسالمون هو وحسام وفعلا هذا الي صار بس ثنينهن ع اعصابهم تحس الجو متكهرب بيناتهم ..
ايام حلوة مرت علينه واحنه سويه .. يوم بعد يوم احب حمزة اكثر وهو هم ممقصر عليه ..
كولشي بحياتي حلو عدا وجود خالتي الي دائما تحاول تغثني وتدوس بالحجي .. بس اني اغلس واسكت ماديرلهه بال لذلك مثل الملت مني واني من نوع ماحب المشاكل دائما احرص اي شي تريده اسويه بدون نقاش بس الجزء الاكبر من اسلوب خالتي وطبعهه متحملته جلنار لان جلنار ترادد ومتسكت وهاي خالتي من وحده تراددهه تزيد عليهه
..
مرتاحه بدوامي لان تزوجت خلصت من الخفر والتأخير و
تكملة بارت 30

حمزة يطلع الصبح للمكتب نروح سوة هو يوديني للدوام ومناك هو يروح لمكتبه واني ارجع وحدي لان هو ب1وحده ونص بالبيت يتغده ويرتاح ويرجع العصر للمكتب ولليل ومرات ميطلع العصر نبقه سوة بالغرفه لو نطلع لان عنده عمال بالمكتب يعتمد عليهم وفاهمين الشغل ..
اليوم اخذت اجازة وظليت وحدي بالبيت طبخت عادي ونظفت وسويت كيكه وزينتهه بالكريمه مالتهه ..
وضميتهه بثلاجتي فوگ ..
اتصلت ع حمزة طلبت منه اليوم ميروح للمكتب العصر ..
گالي خير شصاير گتله مفاجأة ..
لح عليه يريد يعرف شكو ماكتله ..
اجه من دوامه استقبلته وبوسته وصبيتله غده وتغديت وياه ..
وهو بعده يسألني اليوم شكو شنو هالدلال هذا ..
كتله العصر تعرف مو هسه ..
جنت اعرف اليوم خالتي تاخذ آيه وتروح لبيت اختهه من بعد الغده لان باجر جمعه يباتون هناك ومناك الخوات وبنات الخالات يطلعون سوة ونسه وكذا ..
عفته ينام الظهريه وحظرت الغرفه وهو نايم ..
جبت الكيكه وخليت بيهه شمعه وحده ورتبت الغرفه ظلمتهه وفتحت شموع معطرة ..
لبست سيت نوم ابيض فوگاه روب ماكدر لسه استحي من ملابس النوم الفاضحه ..
من گعد حمزة من النوم عباله صاير الليل ..
گتله لاحبيبي اني ظلمت الغرفه ..
كالي شنو هالجو الرومانسي الحلو ..
نشرة اضويه صغيرة داير مداير الغرفه كل ركن لون وينفتحت بالتتالي يعني بين كل شويه وشويه يصير ركن مضئ ويطفن البقيه وباقي الغرفه مابيهه بس ضوة الشموع المعطرة ..
شنو هالريحه الطيبه ..
تعاليلي خلي اشوفج ..
تقربت عليه جان لسه بفراشه والنوم بعيونه بس كاعد ع حيله ..
هاي شنو حبيبي شلابسه ..
فرك عيونه ..
معقوله ..خاف دا احلم ..
ههههههه ..
جنت لابسه سيت النوم الابيض الي هو اختاريلياه بالعقد ومالبسته وحطته الي هاله بجنطتي علمود البسه اول ليله بالفندق وهم مالبسته بس اليوم لبسته ومن لبسته وياه روب طويل والروب فتحاته يوصلن لافخاذي ..
تقربت منه ..گعدني بحضنه ..
حوطت رگبته بايديه ..
ماصار وكت تكوليلي شنو مناسبه كل هذه التحضيرات ؟
اممممم قبطنه شهر ع زواجنه ..
ضحك حييل ..
كل شهر وانت حبيبي ..
لزم خدي ورگبتي بايده قرب شفتي من شفته وباسني ..
شهر ميكفيني .. عمر ميكفيني وياج ..
كل عام وانتي حبيبتي ..
ربي يحفظك الي ..
ياعمري انتي ..
گوم نطفي الشمعه ونگص الكيكه ..
گمت من حضنه وسحبته من ايده گومته ..
حضنته وطفينه شمعتنه سوة .. گصينه الكيكه واكلنه ..
غزل وحب وغرام وسوالف وضحك وشقى وصار الليل وحمزة مخلاني انزل ..
عيشني ليله من احلا ليالي عمري ..
....... 8
جلنار .. اخويه حسام قرر يطلگ نرجس هذا العرفته من عزمونه اهلي اخر مرة ..
وماكدرت احجي وياه لان علي موجود ..
جنت اريد اقنعه يغير قرارة لان نرجس تعرف الي صار واحتمال اذا طلگهه تفضحنه ..
همس لحد هسه متدري بهاي الاخبار ويمكن تدري وساكته بس ماعرف شمنتظرة لو ممفكرة بنرجس ممكن شتسوي بينه لو تطلگت هاي فد وحده حاقده وحسوده .. يعني مثل ماهيه انخرب بيتهه تخربلنه بيوتنه همين .. عليه وع اعدائي ..

[ملكةه]

البارت 31
بعد مرور شهرين ..

همس .. مر ع زواجنه 3اشهر .. حياتي حلوة ويه حمزة اريد خاطره ومداريته وهو ميكسرلي خاطر ويتمنالي الرضا ارضى ..
الي مكدرني فقط خالتي واسلوبهه .. شكد جنت اسكت بس بعد ماتحمل اسلوبهه لان گامت تشكي لحمزة من تقصيري يعني اني موظفه صاحبة دوام وجنت ادافع عن نفسي كدام حمزة ومرات المشكله قبل لاتلتقي بي امه لان اكثر المرات تهول المشكله وتكبرهه او تتبلى عليه واكثر المرات جلنار تدافعلي وهي تتصدى للعركه ويه خالتي لان هي بعد تعلمت وحته ترادد ..
جنت افرح من اشوف جلنار تدافعلي .. اي الدم يحن والاظفر ميطلع من اللحم بس بقه اسلوبي بارد وياهه مجرد سلام وسؤال وجوابه ..
حمزة وايه جانوا دائما يسألوني انتن مو خوات ليش هالبرود بعلاقتج ويه اختج فجان جوابس دائما انو احنه من زمان بعيدات لان شخصياتنه مختلفه ومن احنه صغار جنه رويسيه لان نفس العمر فدائما اكو تنافس بيناتنه .. 2
بس حمزة جان ابد ميسمح لهل خلافات تسوي جفاء وفجوة بيناتنه لان يعرف امه غلطانه ..
رغم ما اني بكل مشكله الح عليه انو الحل الوحيد نأجر ونطلع بيت وحدنه لان هو لايطي بيه كدام امه ولايطي بامه كدامي ..
اعرف هو هم بين نارين بس اني تعبت وفوگ كل هذا تضايقني علمود الحمل لان اختي حملت بسرعه وهو اني كل الفترة الي تزوجت بيهه 3اشهر بس ..
بالاخير حمزة فعلا رضخ .. من شاف امه متنردع واخوه اصلا ديبني وقريبا يطلع وهو عاصر الفترة الي عاشن بيهه زوجات اخوانه ويه والدته وكل الجناين شردن واستقرن بعيد وكل واحد من اخوانه من طلع من بعدهه ماسمعنه فد يوم صايرة مشكله جبيرة بينه وبين زوجته لذلك عرف انو. سبب المشاكل امه مو احد ثاني لذلك استسلم لطلبي انو نأجر بس هو گالي ماريد أأجر .. يريد يشتري حتلو شقه بس فلوسه مقصرة وحجه ويه ابوه يساعده بدون علم امه ..
نوعا ما ارتاحيت گلت ميخالف اتحمل هالشكم شهر مدام حمزة هاهيه اقتنع انو الحل الوحيد هو نستقل ونطلع أمنت ..
بس بقه قلبي مقبوض ماعرف من شنو .. احساس انو شي موزين راح يصير .. عيني ترف دائما واني اخاف من رفتهه هو صح رفة العين تعب وقلة نوم بس اني مجربتهه فالهه موزين عليه .. 9
جلنار ..
شهرين واني اقنع بحسام انو ميطلگ نرجس لان عدهه شي ضدنه ومراح تسكت ..
شبعت منه انواع الغلط والرزايل بس ماسكتت ..لان مراح يتضرر احد غير همس اذا انفضح سرنه لان علي زوجي يدري ..
جنت اسولف لعلي كل الي يصير بيني وبين حسام وهو ميقبل اتواجد ويه حسام وحدي لان حسام عصبي ايده والضرب واني وصلت بحملي ل 5اشهر بس كولشي لخاطر همس الي لحد الان مو داريه بالي ديصير من وراهه ..
الي ديصير انو نرجس اتصلت عليه واكدتلي شكوكي ..
هددتني تفضح سرنه لو تطلكت لان اهلهه ضاغطين عليهه علمود متتطلگ وهي هم متريد تتطلگ وحسام معند ميريدهه بعد مرة اله ..

حته حاولت اقنعه انو خلاص بقيهه ع ذمتك ولاتتقربلهه واتزوج عليهه اي بنيه تعجبك ..
اقتنع نوعا ما بس المقابل جان انو يطلب ايد آيه ..
هنا علي تخبل وتعاركوا عركه جبيرة شلون حسام يتجرأ يباوع لآيه ..
علي جان وياه كل الحق بهاي العركه انو شلون يفكر بس مجرد تفكير انو حسام يحقله يطلب ايد آيه منه يعني حسام مزوج وع وجه طلاك وع خلاف دوم ويه علي هاي من غير عصبيه حسام الي متنحمل واخلاقه واسلوبه الزفت ..
اني الي آيه مو اختي فكرت اول مسمعت حسام يطلب آيه من علي ليش شنو الناقصهه آيه وتقبل بهيج واحد اني استحيفت ايه تصير من نصيب حسام ..
حسام ابد مجانت عينه من آيه بس هيج راد يذل علي بهل طلب ..
اخويه بمثل حقارته مشايفه ..
ابويه تعارك ويه حسام من سمع هالكلام رأسا تدخل كولشي ولا علي .. علي بعين ابويه الزلمه المعدل الي وگفله وگفه ببناته محد يوگفهه ..
نوعا ما اقتنع حسام بعد ضغط من ابويه انو يرجع نرجس لذمته ويلغي سالفه الطلاگ لخاطر خواته مينفضحن كدام عيالهن بس طلب منه يأجر بيت وياخذهه ويطلع لان محد يطيق وجودهه بالبيت ..
وهم عود فترة ويتزوج عليهه ..
بهل فترة بيت عمي حيل ضايقونه يوميه هادين ع ابويه .. ابنك يأما يطلگ يأما يرجع بتنه ..
واجاهم الرد من ابويه انو فترة ونجي نرجع البنيه عمي ابو نرجس اعترض ليش فترة ليش مو هسه ابويه رد انو دندورله ع بيت .. خلي يطلع بمرته بيت وحدهم افضل ..
فرحوا وسكتوا ورضينه نرجس واكثر حته تسكت .. 7
ظاهريا المشكله انحلت وگدرنه نسكت حلگ نرجس بعد ماحسام صرف نظر عن الطلاگ وهذا الي هي جانت رايدته ..
بس المضموم شنو ...؟

[ملكةه]

البارت 32
عدنه مثل عراقي يگول ابو طبع اسأل ع سلامته ..
الحقد والحسد والعين الفارغه هاي امراض نفسيه ربي يجيرنه منهه اكو ناس متخذتهه غايه بهالحياة وهذا الحال ينطبق تماما ع نرجس ..
يعني مراح تتطلگ واكو مشروع خلال فترة بسيطه تطلع بيت وحدهه يعني تخلص من العيال والشغل الزايد وتتفرغ لزوجهه بس هذا الكلام ميصرفلهه متريد هيج ..
فسرت تصرف بيت عمهه انو يريدون يعزلوهه حته متتورج ع سوالف بناتهم المكسرة ..
وتفكيرهه جان مراح يرتاحلهه بال الا اذا تهدم زواج همس وجلنار ..
مريضه نفسيا صار عدهه هوس بحياة جلنار وهمس شلون مرتاحات وشلون ازواجهن مدلليهن ومداريهن ..
الغيره استحوذت عليهه تلبستهه وعمتهه .. 5
دبرت رقم جديد من زوج اختهه وحصلت رقم حمزة ودزتله مسج مكتوب بي ..

اكو سر بين زوجتك واخوك علي .. اخوك لاعب بشرفك وانت نايم ورجليك بالشمس .. 13

بالطرف الثاني جانت الساعه قريب التسعه بالليل من استلم حمزة الرساله ..
قراهه جان وحده بالغرفه همس جانت جوة تغسل مواعين العشه ..
صاح بصوت رج البيت ..
همسسسسس ..
همس .. سمعت صوت حمزة وهو ديصيحني .. جنت اشتغل بس مو نداء عادي لا صوته عالي وبعصبيه خوفني ..
ايه جانت دتنظف الكاونتر باوعتلي كالتلي روحيله خاف شو شصاير اني اكمل عنج ..
غسلت اديه وتنشفت بملابسي ..
صعدتله ..
وهو بعده يصيح ..
ولج همسسس ..
حته علي جان بالغرفه مالته طلع يستفسر شبيه حمزة هيج يصيح باسمي هاي اول مرة يسويهه ..
صار وجهه بوجهي من طلع من غرفته سألني شكو .. شبيه حمزة .. جاوبته مااعرف هسه اشوفه ..
اول مادخلت لكيته يفتر بالغرفه عيونه حمر عصبي ..
خفت منه .. اول مرة هيج اشوفه ..
کتله .. خيرك حبيبي ليش تصيح شصاير ..
جان لازم مبايله ..
جرني من ايدي حيل توجعت بس محجيت خوفي غالب ع الموقف ..
حط مبايله بوجهي گالي ..
هذا الرقم تعرفيه ؟
صفنت عليه .. دماغي فرغ .. اني مو من النوع الاحفظ ارقام رغم يكولون عندي ذاكرة تصويريه بس بذاك الموقف حتلو حافزتلي رقم واحد هم انساه كد ماجنت خايفه بذيج اللحظات من حمزة ومن المجهول ..
صفنت ع الرقم گتله ..لا ماعرفه ..
وين مبايلج ..
هياته ..
دااخذه من ع الميز جرة من ايدي ..
دک الرقم الي بجهازة بجهازي طلع رقم غريب ممسيف ..
گعد ع الجربايه مثل الي ديفكر بشي مثل الي جان متأكد من شي وطلع مو صحيح مثل الي ديشك بشي بس ميعرف شنوة ..
ظليت واكفه .. رغم صيف بس احس عظامي تطكط مو برد لا خوف برجفه ..
تقويت وسألته ..
شصاير حمزة ترة دتخوفني ..
جان ضام وجهه بايديه بعدين كام يفرك بوجهه احمر دم صاير من الاعصاب حته شرايين ايديه بارزات مبينات وعنده شريان قاسم گصته هم بارز ..
رفع راسه وعيونه عليه ..
شنو الي بينج وبين اخويه ؟
فتحت عيوني ع وسعهن ..
نزلت دموعي لا اراديا ..
حمزة انت شدتحجي .. تشك بيه ..
شنو هالرساله ..
مد ايده بالمبايل وظليت اقرة جايته رساله من هذا الرقم الممخزون عندي ..
عيوني جانت تطفر فوك الكلمات الدموع منعتني اقرة امسح بيهن واشوف .. سر .. شرف ..علي .. المي من من جوة رجليك ..
دموعي تصب .. عدت الرساله هواي خلال ثواني ..
حجيت برجفه ..
تشك بيه من ورة رساله ؟
جانت عيوني تعاتبه ..
صرخ عليه بألم ..
ليش تبجين لعد ..
صرخت بوجع گلبي ..
شلون تشك بيه .. شنو البدر مني وخلاك تصدگ رساله ..
ابد مااجه ع بالي انو موضوع الرسالع هو الي صار ذيج الليله رغم مذكور اسم علي بالرساله بس الاعرفه انو الموضوع انسد ويه نرجس وحسام مراح يطلگهه لذلك مراح تحجي ..
صرخ .. عليييييي ..
علي اصلا جان خارج غرفته بس بعده فوك يمكن من شافني طبيت للغرفه بقه فوگ من بعدماجانت نيته ينزل وسمع صوت حمزة عالي بقه فضول راد يعرف حمزة شبيه هيج عصبي ..
علييييي ..
دك الباب علي ميكدر يدخل لان اني ع طول بكامل حجابي كدامه ..
كام حمزة فتح الباب طلعت بوجهه جلنار وعلي لهناك بعيد عن الباب جلنار طبت للغرفه اجتي ناحيتي عيونهه خايفه وتسألني شكو شصاير واني بس دموعي تحجي ..
علي توجه لاخوه كاله .. شبيك شصاير ليش هلگد صوتك عالي ..
حمزة جرة من ياخته وطببه للغرفه ..
علي رأسا تعصب ولزم ايد حمزة الي لزم بيهه ياخته ..
حزت بنفسه لان علي هو الاخ الجبير ..
شبيك ولك تخبلت .. نسيت نفسك لو شنو ..
اخوك الجبير اني شويه احترم ..
احترم ؟؟
ضحك باستهزاء حمزة ومد ايده بوجه علي گاله فسرلي هالكلام هذا ..
قرا علي الرساله ..
فتح عيونه ممصدك ..
وانت مصدگ هالكلام ..؟
ظلوا الاخوان واحد يباوع بعيون الثاني ..
علي تلازم ويه حمزة من ياخته ..
انت مصدگ هالكلام ؟
جلنار راحت لعلي تهديه ..
وتريد تفاكك بين الاخوان واكثر شي رادت تهدأ علي وتبعده عن حمزة ..
جنت اني بس اباوع بالعيون وابجي ..
دموعي تصب متبطل وخايفه وليش هيج حمزة يشك بيه ..
جنت ارجف مو بس اخاف بلحظه طخت ببالي نرجس غدرت بيه نرجس هي الي دزت الرساله ..
ازداد

ازدادت عندي الرجفه عبالك واكفه ودا اتحاسب بيوم القيامه يمكن لا اكيد الامر اهول من هذا الموقف يوم القيامه بس اني هيج شبهته كد ماجنت خايفه ..
جنت احس بهاللحظات الي دتمر دااموت .. ضغط نفسي فوگ طاقتي .. دكات كلبي تشيلني وتركعني ..
جنت اتمنه بلحظتهه حمزة يلزم مسدس ويفرغه براسي تا ارتاح من الي بيه ..
صرخت ..
علي گوله كافي والله مدا اتحمل وخلي شيسوي خلي يسوي ..
صد عليه علي صاح بوجهي ..
همسسسسس !! انلصمي ..
هنا حمزة تخبل ..
عاف علي وتوجه لهمس لزمهه من شعرهه ..
احجججججي .. شصاير احججججي ..
بنت الكلب شمصخمه ..
كامت تبجي جلنار .. وتحجي .. مو هي والله مو هي .. اني .. كوله مني .. اني قنعتهه هيج تسوي ..
ظل حمزة لازمني من شعري وصافن ع جلنار الي انهارت بجي بس هو كولشي ممفتهم مصدوم ومشدوه لعد لو سمع الي صار ذيج الليله شيسوي ..
بذاك اليوم خالتي صاعد ضغطهه ماخذه الفاليوم ونايمه من المغرب بس ايه بالبيت ومن صعدت تشوف شكو لان سمعت صوت اخوانهه عالي طردهه علي وسد الباب ..
كعد اخوه ع الجربايه ونوة يحجيله الي صار ..
حجاله علي كولشي وكلما يريد يكوم ع همس يكتلهه يلزمه ويمنعه ..
هواي اسئله تدور ببال حمزة .
كام يصيح .. انت شلون باقي ويه هاي .. يقصد ع جلنار .. انت گ...د .. انت شنو من مله وين رجولتك ..
وشلون تخليني اخطب هالساقطه الثانيه .. شلووون .. اخ ياالله ..
اخوه ماكدرله فاض بي اخير شي كام ع همس جنزهه كتل .. شبعهه غلط وفشار ..
هذا مو حمزة .. هذا الوحش الي بداخله طلع ..
شلون مبقيهه ع ذمتك .. ولك احجي شبيك شمسويتلك ..شلازمه عليك ..
انجب ملازمه عليه شي ..
علي يحاول يهدي بي بس للحظات وبسبب كلام حمزة وتعييرة لاخوه برجولته وشلون مبقي جلنار ع ذمته لسه نسه علي السبب الي خلاه يسكت ويستر هالاختين رغم فضاعه فعلتهم عبالك ممقتنع او يمكن گلبه مقتنع بالمبررات والاسباب بس عقله ممقتنع ..
اخير شي علي صرخ بوجهه كاله .. احبهه ..وسترت عليهه ..
باوع بعيون اخوه وگله مثل الي ديأمرة او ديجبرة ..
وانت هم راح تستر ع بنت العالم ..
لااا غلطان .. ماتستر ع ساقطات اني ..
باوعلي جنت متكومه بالكاع من ضربه ..
من صبح باجر متبقين ع ذمتي ..
دفرني وتفل عليه ..
اني لهنا وخلصت وياي .. جمدت دموعي .. ماعدت ابجي .. ماعدت ارجف .. ماعدت اشعر .. ماعدت احس وماعدت اسمع .. صارت وشه باذني وحسيت ببروده بس مفقدت وعيي ..
تصدكون ابتسمت .. رجعلي سمعي الي اختفه لحظات ورجع ..
ابتسمت لان جزء كولش صغير مني ارتاح جبل الهم الي جان ع ظهري انزاح .. شعور الذنب فجأة اختفه وراح ..
فعلا رب العالمين كال .. عسى ان تكرهوا شيئا فهو خير لكم ..
وعاني بدفرة ثانيه ..
گومي لمي غراضج وولي لاهلج .. وجهج ماريد اشوفه بعد ..
باوعتله بابتسامه .. همست .. رحم الله والديك ..
فعلا هم وانزاح .. المفروض هي هاي البدايه الجديده الي بحياتي مو زواجي من حمزة هو البدايه الجديده ..بس اني سمعتلهم
اني جنت افتهم من فكرت لازم اكول لحمزة ع كولشي قبل زواجي منه وهو يقرر مصيرحياتنه نكمل لو ننفصل .. اني فكرت هيج من قبل .. بس ليش سمعتلهم .. دوم اسمع كلام الناس ودوم اوكع ومن اوكع والكه الي نصحني اول الي يلوم ..
صارت عيني لجلنار .. لساتهه تبجي .. لزمت جتف علي مثل الي تستعطفه او تترجاه بس هو دفع ايدهه متكدر وضايج مطايق روحه ..
حمزة شويه هدأ ..
باوع لاخوه سأله .. شفت جسمهه ؟؟..
علي باوعله بصدمه ..

علي باوعله بصدمه ..
بستهه ..؟؟
شسويتلهه بعد ..
انجب كااافي ..
لمحت دموع حمزة ..
صرخ .. ربييييي شمسوي عندك .. ردتهه منك هيج تطينياهه ..
بجيت ع حمزة .. انقهرت عليه ..
سحلت روحي لي يمه ..
جريت ايده اريد ابوسهه ..
جرهه مني بقوة ..
دفرني ..
وخري نگسه .. حقيرة ..وخري ..
رجعت تقربت يمه باوعتله ..
اذا يرضيك اكتلني خلاص .. طلقه براسي وارتاح .. محد يحبسك ولا يسويلك شي .. واذا ع اهلي كوللهم لگيتهه ويه واحد ..
ضربني ع وجهي ..
لزمني من فجي وعصرة ..
لو اريد اكتلچ ماانتظر اذن منج ..
بس انتي نگسه وماوصخ ايدي بيج ..
ليش لساتج هنا .. امشي ولي لاهلج ..
گمت صدوگ طلعت جنطه وفتحت الكنتور حطيت ملابس .. الي توكع عليه عيني اشيله هو وتعلاكته واحطه بجنطتي ..
لبست عبايه اسلاميه ولفيت شالي ..
جلنار جانت تبجي وتراقبني بعيونهه وبس صوت بجيهه ينسمع بالغرفه وصوت طگطكتي ..
باوعت لمبايلي بعيد .. عفته ..
حمزة طرد جلنار من غرفته ..
كاللهه .. ماريد اشوف وجهج كدامي .. اطلعي من غرفتي ..
جرت نفسهه وطلعت راحت لغرفتهه ..
نظرة وحده بس القيتهه ع غرفتي وحيطانهه وغراضهه .. هنه بس 3اشهر عشت بيج .. شهدتي ع كولشي صار بيناتنه .. وخليج شاهده هسه همين ..
ودعتج .. انتي والي ساكنج .. بأمانة الله واهل البيت ..
قبل لا اطلع .. حمزة اخذ سويجه .. گالي اوگفي ..
جنت لازمه جنطتي اسحل بيهه دا اريد اطلع من الغرفه
انتي طالگ .. 17
تكمله بارت 32

وكفت مشدوهه .. بهتت ..ماتوقعت .. صح گالي باجر ماابقه ع ذمته بس متوقعت بهالسرعه هاي يبيع ..
اذن محبني .. علي حته من تعير برجولته كال احبهه وسترت عليهه مگدرت افضحهه واني اعرف مصيرهه راح تنقتل ..
دمعه وحده بس نزلت مني ..
كررتهه عليه .. هاهيه رحم الله والديك ..
اخذ سويجه ونزل گدامي ..
علي صارح عليه ..
وين مولي ..؟
ميخصك وين اروح ..
نزل علي وراه ..
ذاك يركض وهذا يركض .. وصلت اني للباب الخارجي شفت حمزة شاحط السيارة وطالع بيهه مملحگ عليه علي ..
التفتلي انتي وين رايحه ..
لاهلي .. بعد وين اروح ..
مسحت دمعه غافلتني ونزلت ع السريع ..
انتظري اني اوصلج .. دنيا ليل ..
هه .. ضحكت باستهزاء ..
شيريد يصير بعد اكثر من الي صار ..
حجيتهه بيأس ..
اذا تريد تسوي عليه فضل اجرلي سيارة تكسي ..
امشي ..
مشى وياي لراس الشارع ..كلما تجي سيارة ويشوف سايقهه شاب يصرف نظر عن تأجيرة .. الى ان اجه رجال جبير بالعمر ..
أجرة وصعدني وياه ووصاه عليه ودفعله الكروة ورحت وياه .. 16
طول الطريق عيني ع ساعة السيارة ..
ب 11الا ربع ..
هيج وكت البارحه جان حمزة بحضني طفينه الشمعه الثالثه يعني 3اشهر مكملين سوة ..
ابتسمت بالم .. احس داخلي فارغ .. مدا احس بشي غير الفراغ واللامبالاة ..
اصلا مدا احس بشي .. حته الم ضرب ماكو رغم لمحت اثار ضرب ع خدي وايدي من لبست عبايتي الاسلاميه ..
ذبني التكسي بباب بيت اهلي ..
دگيت الباب ودخلت ....

[ملكةه]

البارت 33
همس .. يمكن الساعه 11بالليل .. دكيت باب بيت اهلي من بعد ماوصلني التكسي لهنا ..
فتحلي حسام الباب ..
باوعلي من فوگ ليجوة ..
ها ولج شصاير ..
ظليت اباوع عليه ..
مارديت عليه .. بس گتله ..
اريد افوت وخر شويه ..
جنت ميته كل روح مابيه .. فراغ رهيب داخلي ..وكأنه كل احاسيسي ماتت بلحظه وحده ..
امي جانت واگفه بباب المطبخ اول مشافتني ضربت ع صدرهه ..
يايمه خيرج شجابج تالي الليل ..
متريديني اجي ..
لايوم مو هيجي ..
شافتني اسحل بجنطتي ..
خيرج جايه هيج وكت .. رجلج مااجه وياج ..
لايمه اجيت وحدي ..
وصلت الهه بوستهه وحضنتهه ووخرت ماظلت دموع بعيني ..
ركزت امي بوجهي التعبان المضروب ..
تعاركتوا .. ضربج ..
سكتت مجاوبت ..
سحبت جنطتي ودخلت ..
لكيت ابويه كاعد بالهول ..
من شافني گام ..
ها بابا شلونك ..
هلا بابا .. شكو شصاير وجايه هيج وكت ..
باوع ع جنطتي ..
گتله .. حمزة طلگني ..
امي شهگت وضربت ع صدرهه .. يايمه .. ياستار ليش هيجي ..
كامت تبجي امي وتولول ..
اسكتي يامرة خلي نفتهم ..
حسام واكف بباب الهول يريد يسمع مني شكو وشصاير بس بوجهه نظرة واحد متشفي ..
اي ليش لا يمكن هو هم قشمرنه من كال ماطلگهه ويمكن متفق ويه نرجس ع سوايتهه..
سرحت افكر ليش حسام هيج يباوعلي .. ليش ماحس بي اخويه ..
بابه احجي ليش طلگج ..
عرف بكولشي .. ماتحمل وطلگني ..
منو گاله ..؟
وصلته رساله من رقم غريب ..
ماتذكر باقي التفاصيل ..
جريت جنطتي اريد اصعد فوك لغرفتي ..
يابه وين رايحه تعاي احجي شلون عرف ..
بابا والله تعبانه .. اريد ارتاح ..
سكت بابا عني ..
روحي ارتاحي يابه روحي ..
صعدت فوك لغرفتي ويايه جنطتي اسحل بيهه ع الدرج ..
ابويه صاح ع حسام ..
امشي ساعد اختك .. اخذ منهه الجنطه وصعدهه ..
التفتت ع بابا گتله .. ماكو داعي ..
وكملت طريقي ..
فتحت باب الغرفه وطبيت قفلت الباب وراي اعرف راح تجي امي تضايقني بأسئلتهه لان مترتاح الا تعرف التفاصيل هاي متقبل غلط ..
هنا راحتي .. ذبيت روحي ع الجربايه مفكرت بشي بس مرتاحه ..
حطيت راسي ع المخده وماعندي اي تفكير باي شي محدد ولا عندي ندم بس الم بگلبي .. يوجعني گلبي من حمزة ..
بالفعل دقايق وصعدت امي حاولت تفتح الباب مانفتحت اني قافلتهه ..
يوم عوفيني بحالي ..
تعبانه واريد انام ..
زين متعشايه ؟
اي يمه تعشيت ليظل بالج ..
الله يخليج بس عوفيني بحالي ..
صار يمه صار .. واختج شصار عليهه ..
كلت بكلبي .. عرج ميطبهه ..
جاوبت امي .. مبيهه شي امي زوجهه ويدري وسامحهه شيصير بيهه قابل ..
لاتخافين عليهه ..
امي سكتت ماحجت شي وشويه وسمعت خطواتهه تبتعد ..
غمضت عيوني ونمت محسيت بشي بعد ..
ثاني يوم الصبح محد مگعدني .. عندي دوام بس مرحت وحتلو كاعده ماجنت اكدر اروح ..
الليل كوله جسمي يون عليه عبالك جانت اوجاعي والامي خدرانه وصحت ..
كلما انگلب ع جهه يأذيني جزء من جسمي من ورة ضرب البارحه .. احس عظامي مكسرة ..
باوعت للساعه المعلگه ع الحايط ب 10ونص .. حييل شكد نمت ومحد مكعدني ..
كمت من فراشي بتعب .. كعدت ع حيلي راسي دايخ الدنيا تفتر بيه ..
جوعانه ومتكسرة ..
كمت وسحلت بروحي .. فتحت باب الغرفه ع قفلته من البارحه ..
نزلت الدرج ..
للبيت هدوء اعرف حسام هيج وكت هسه بدوامه وابويه طالع تقاعد المفروض موجود وامي ماعرف لوبالمطبخ لو دوامهه صبحي ..
سمعت طكطكه گدور بالمطبخ عرفتهه امي يعني دوامهه مسائي مو صباحي ..
اتجهت للمطبخ ..
صباح الخير ماما ..
التفتت عليه امي ..
صباح النوم يوم ..
هابشري شلون صرتي ..
باوعتلهه وبدون اي مشاعر جاوبتهه ..
تحت رحمة الله ..
شعجب خليتيني نايمه لهذا الوقت ..
ماخليتج يمه شكد دكيت عليج باب الغرفه مرديتي عرفتج تعبانه ..
لا والله ولاسمعتج ..
سودة عليه ..
حته دوامي مماخذة اجازة ومداومت ..
خابري وحده من البنات تاخذلج اجازة ..
اي هو هم هيجي ..
راح اسويلج ريوك .. اكيد جوعانه ..
اي والله يوم ..
لعد بابا وين ..؟
خابروه وطلع ..
هاا ..
بهاللحظه دخل بابا البيت جنت كاعده اريد احط لگمه بحلكي لان اثناء ماچنت احجي ويه امي حضرت اليه جبن وسويته لفه بصمونه وامي حمتلي الچاي وصبيت ..
الله يساعدك بابا ..
السلام عليكم .. هلا بنيتي ..
امي .. وعليكم السلام الله يساعدك ابو محمد ..شبيك شو تلهث ..
گمت جبت لابويه گلاص مي ..اخذه من ايدي شربه ..
صاير شي بابا ؟
اي والله بابا صاير ..
خير ياستار شكو ؟
علي هسه خابرني .. حمزة مسوي حادث من البارحه بالليل ومجانوا يعرفون عنه شي ..

امي لطمت ع صدرهه ..
ياا عزا العزاني ..
بالنسبه اليه من كالي ابويه ع الخبر محسيت بشي .. كل احساس جوايه ميت ..
بارده .. انتبهوا عليه .. ماعلقت ولاحجيت شي كمللت لفتي بهدوء واني استمع لحديثهم ..
امي .. وهسه شلون صار الولد ؟
ماعرف هو هسه ابدل واروح اشوفه ..
امي .. وانتي يمه متروحين تشوفين زوجج ممدد
ممدد بالمستشفى ..
لايمه مو زوجي .. طلگني ..
حتلو يمه بلحظه عصبيه هذا الشي صار ..
يوم الله يخليج لاتبررين شي من غير شي اني مناقصه اعذار وتحليلات .. الحمدلله ع كل حال ..
ابويه ابد ماحجه ولا علق ع كلامي .. بس جان صافن عليه من احجي .. لاول مرة احس من نظراتي يفهمني ..
بابا .. اسمعيني ..احنه اهل ونسابه وبهيج موقف نعوف مشاكلنه وخلافاتنه ع صفحه ونوكف ويه العالم بمحنتهه وانتي گدام العالم زوجته ..
ليش تفتحين العين عليج وتخلين العالم تظل تلوم بيج ويكولون مو بنت اصل واذا بيناتكم مشكله زوجج فوک كل مشكله ..
بابا دا اكولك طلگني وميريد يشوف وجهي ..
بابا سوي الواجب .. والواجب انو تروحين وتسوين الواجب ويه زوجج كدام اهله وكدام الناس ..
امي .. همه اهله يدرون بسبب العركه ؟
هو بس علي وجلنار خالتي جانت ماخذه فاليوم ونايمه وايه صعدت دتشوف شكو طردوهه ..
اي زين الحمدلله ..
يله بابا خلصي ريوگج وگومي بدلي نروح للمستشفى ..
ابو محمد علي شگالك وضع الولد شلونه ؟
يكول رضوض عنده وكسر بضلعين ..
ابويه قرر وحاولت ابرر واحجي بس مشفت اكو فايده للعناد واني تعبت ..
بابا الله يخليك لتجبرني ..
مجابرج بابا هذا واجب عليج انو متعوفين زوجج بظرف مثل هذا ..
وزوجي الي تكول عليه ميريدني ولايريد يشوف وجهي ..
بدون عناد همس وروحي بدلي يله منتظرج ..
خلصت لفتي ودخل والدي يبدل ومن لاجارة سحبت نفسي لغرفتي وقبلهه غسلت وجهي ودخلت بدلت ونزلت لكيت ابويه منتظرني بالهول ..
يله ..
طلعنه اخذنه تكسي للمستشفى ..
وصلنه دخلنه للمستشفى.. ابويه سأل موظف الاستعلامات .. اطاهم اسم المريض ودلونه عليه ..
مشينه للمكان .. اكيد ع الخاص غرفه بنهايه ممر ..
گلبي انقبض مو خوف بس ماريد اتواجد بمكان محد يريدني بي ..
من بعيد شفت عمي وخالتي ..
تقربت من ابويه الي جان ديمشي اسرع مني حس عليه هو عرفني ممرتاحه ..
خفف مشي صار يمشي ويايه ..
وصلنه يمهم ..
سلمنه .. السلام عليكم ..عمي وخالتي ردوا السلام .. خالتي من ورة خشمهه سلامهه مو طايقتني ..
علي واكف بعيد لهناك اجه سلم ووكف ع صفحه ..
ظل ابويه يتحمدله لحمزة بالسلامه ويسأل ع صحته ووضعه وعمي يجاوب ونظرات خالتي كولهه بخزر اليه ..
الظاهر همه يعرفون صايرة بيناتنه مشكله واني رايحه زعلانه لاهلي لان محد حجه ولا احد سأل عن موضوع ليش توني ياله دريت بحادث زوجي وتوني ياله اجيت اشوفه ..
ابتعد علي وبعدهه اختفه ماعرف وين راح ..
عمي گلي فوتي شوفي زوجج ..
باوعت لبابا بعيونه اشرلي اطاني الاذن اروح ..
دخلت للغرفه ..
شفته متمدد ع سرير نفر واحد صدرة ملفلف بلفاف وراسه همين ..
گلبي رف عليه ..
نايم ومن يتحرك يون .. كسر الاضلاع مو سهل المه ..
دموعي لا اراديا نزلت ..
تقربت منه .. ارتاحيت لان جان نايم .. ماردته يشوفني ولايعرف اني اجيت اشوفه ..جنت خايفه من ردة فعله تجاهي لان هومنعني اراويه وجهي ..
تقربت منه .. بسته بگصته ..
فتح عيونه رجعت ليورة .. متفاجأة شويه ..
شجابج هنا ..؟
عاقج حواجبه وخازرني ..
اجيت اشوفك .. اطمن عليك ..
هه !!
ضحك باستهزاء ..
قصدج تتشمتين بيه ..
ابتسمت بالم لسانه منشار وتفكيرة بيه .. اااخ..ذبيت حسرة ..دنكت ورفعت راسي گتله ..
ليش شنو تحس روحك ظلمتني والله عاقبك واني جايه اتشمت بيك ؟
ظلمتج ؟؟
اني لسه ماخذت حقي منج .. من لعبتج الوصخه وياي من عرامتج من صورتج الملائكيه البريئه الي رسمتيلياهه ومن تمثيلج الي ... شال ايديه اثنينهن وصفگ بتعب وبونه لان تحرك شويه وميصير يتحرك فاتأذه ..
الي برافووو فعلا اديتي دور الشريفه باتقان ..
دنكت .. نزلت دمعتي .. رجعت رفعت راسي ..
شرايد مني هسه ؟
طلگتج .. منو سمحلج تتواجدين هنا ..
بس كدام الناس وكدام اهلك ..
اهااا ..واني هم بس اطلع من المستشفى اخلي طلاكج كدام الناس وكدام اهلي ..
ظليت اباوع بعيونه .. مادري شنو جنت ادور بعيونه ..
بلعت ريك وهو كمل ..
لتخافين راح استر عليج ومو لخاطرج لخاطر اخويه وطفله الجاي بالطريق بس حسابج يمي .
مافتهمت قصد كلامه شنو حسابج يمي شيريد يسوي يعني ..
سكتت ..طلعي برة ..
بدون ماانطق بولا حرف طلعت من الغرفه .. ابويه وعمي مجانوا موجودين بس خالتي ..
من شفتهه تأفأفت ودي اشرد ..

انهدت عليه ..
انتي منو كلج تجين .. كل الي صار بابني من وراج ..
ردت اهديهه واسكتهه بس جانت تزيد وصوتهه يعلى ..واني جنت مستحيه وخجلانه لان الجاي والرايح كام يباوع ويظل واكف يتفرج عليهه وهي ترزل بيه ..
ع شنو تعاركتو .. وشلون تطلعون بنص الليل لاهلج بت اوادم انتي اهلج ماحاسبوج ماكلولج ليش جايه بنص الليل ..
كمت اسمع صوت ابنهه يصيح .. لان صوتهه جان عالي لمت علينه الناس ..
يمه .. ي.ووم ..
گتلهه حمزة ديصيحج ..
عافتني وطبت سمعته يرزل بيهه لان فضحتنه تتعارك وياي وصوتهه عالي بنص المستشفى گللهه هذا هم البيت وصوتج واصل لسابع جار يمه اريد ارتاح يطوني
مسكن حته انام وارتاح شويه مو حته اسمع صياحج يدگ براسي وياهو الجاي والرايح تتعاركين وياه ..
ممتعاركه ويه الجاي والرايح .. تعاركت ويه مرتك .. هالخبيثه الصفرة .. مو طردتهه لاهلهه شعدهه بعد جايه شرايده ..
يمه لخاااطر الله ارحميني ..
اي يمه اي سكتت نام انت نام وارتاح ..
استغليت فرصه انشغال خالتي عني ورحت ادور ع بابا ..
لكيته هو وعمي يم الاستعلامات كاعد يحجون اول ماتقربت باوعلي عمي ..
عرفت عنده حجي وياي ..
سألني ابويه ..
ها بابا تطمنتي عليه ؟
اي بابا ..
وجهلي عمي الكلام ..
يابه شنو الي صار بيناتكم البارحه ؟
باوعت لابويه وبلعت ريگي عرفت انو ع الاكثر جانوا يحجون بهذا الموضوع ..
جاوبته .. مشكله ..
اي اعرف مشكله .. بس اطيني التفاصيل حته اكدر احلهه .. يابه ترة حمزة عاقل ومصارلكم هواي متزوجين ..
ابوج يكول بنص الليل اجتني .. طاردهه زوجهه وحماهه موصلهه .. شنو الي صار وخله حمزة هيج يتصرف ..
هي صارت مشكله وعلي تدخل وتلازم وياه حمزة ومن بعدهه طردني واخذ سويجه وطلع ..
سكت عني عمي عرفني دااتهرب من تفاصيل المشكله الصارت ..
ترخص وتركنه وراح ..
مشيت ويه ابويه دنطلع بوجهنه صار حيدر وحسين حمويني الكبار سلمت عليهم وسلموا ع ابويه وظلوا يباوعولي باستغراب بعد ماعفتهم وطلعت ويه ابويه ..
من بعد هذا الموقف صار المايدري يدري وحتلو محد دقق بالتفاصيل انو ليش راجعه ويه ابويه او ليش بهيج ظرف ممتواجده ويه رجلي اكو سارة ام الاخبار اذاعه مونتي كارلو هي الي تذيع الخبر وتتفنن بي هي ماصدگت تخلص مني ..
گلت لبابا .. بابا بعد رجاءا لاتجبرني اجي لهنا ..
هو باوعلي جانت عيوني مدمعه ورجع دنگ يمكن افتهم انو احد اذاني بالكلام لو حمزة لو امه ..
اخذنه تكسي رجعنه للبيت دخلنه لكيناه فارغ امي راحت للدوام مالتهه مسائي وبابا طب لغرفته تمدد شويه ..
صعدت لغرفتي سبحت وبدلت ونزلت جان وكت غده ..
دكيت الباب ع بابا كتله .. جوعان بابا اصبلك غدا جاوبني لا بس تعبان ورادينام واكعده من يحي حسام نتغده سوة ..
گتله اوك ورجعت صعدت فوك لغرفتي ..
ظليت افكر بكلام حمزة ..تأذيت منه بس هم اكو شعور راحه .. كولشي يهون ماطول هو عرف والهم انزاح وبعد ماكو اسرار وتأنيب ضمير ماكو هذا يكفيني ..
دقايق ونمت ..

[ملكةه]

بارت 34
حمزة ..شنو الي اكدر احجيه .. بليله من الليالي وصلتني رساله من رقم غريب الرساله تخص زوجتي واخويه ..
تكولون ليش صدگت رساله من رقم غريب وتكولون وين ثقتك بزوجتك ..
عاشرت همس يمكن شهر بس او اكثر شويه قبل زواجنه .. اكتشفتهه عجينه رقيقه هشه شخصيتهه مرنه يعني شلون ماتريدهه تصيرلك هالشي ريحني لان معناتهه مطيعه مو عنيده هادئه بس هدوئهه مخيف غامض وكأنه تخفي شي عني وتحاول تبلغني شي وفجأه تتراجع ..
واخر فترة بقت تلح نطلع بيت وحد كلت يمكن خافت من امي من شافت مشاكلهه ويه اختهه وقنعتهه بالعكس وسدينه الموضوع بس استغربت علي هم فتح نفس الموضوع وياي وبلش يقنعني انو اخذ همس واطلع بيت وحدنه اريحلي وابردلي راس ..
تفاجأت ليش بنفس الفترة انفتح نفس الموضوع من الطرفين ..
تزوجنه .. وهمس صح خجوله بس مرحه وحته مرات تنسى تلبس حجاب كدام اخواني الكبار حيدر وحسين بس كدام علي الحجاب كامل و دائما تحاول متتواجد بالمكان الهو موجود بي واذا هي موجوده ودخل هي تلكالهه عذر وتطلع من المكان ..
شكم مرة تكررت اطلع من الحمام او اكون بغرفتي وهي متدري بوجودي بالغرفه وتحجي ويه علي بكلام ممفهوم تفسيرة عندي ..
مو من حقي اتذمر ولا اشك لان ماعندي شك بحبهه الي اشوف لهفتهه وشوگهه اليه من عيونهه بس شكم مرة من اسألهه عن كلامهه ويه علي تخترع قصه تختلف تماما عن الكلام الممفهوم الي سمعته عبالك بينهم شفرات والغاز .. ليش تكذب ؟؟
كذبهه والربط بالرساله ووساويس الشيطان خلتني انجن واني اقرا الرساله ..
ليش وشلون .. من حجالي علي .. حسيت نفسي ببركه من القذارة .. ماتحملت اتخيل مو اسمع كلام علي ..
ماحجالي تفاصيل او يمكن احتراما لما تبقى من خوتنه رفض يحجيلي التفاصيل ..
بس المستنقع الي جان بي عقلي .. الصدمه والاحراج والشعور بالعدر وانو انضحك عليك من اقرب الناس الك اخوك وزوجتك هو الي خلاني اجنز همس من الكتل وماطفت النار البصدري ..
هو يحجي واني اتخيل ..
اني اضرب وعقلي يتخيل واقسي واضرب اقوى وهي ساكته حته اخ مكالت .. مطيتني حق ضربهه فاهمتني ومستسلمتلي حته من طلكتهه كالتلي رحم الله والديك .. حجتهه بتنهيده راحه .. يعني شنو مجانت تحبني .. جانت تمثل عليه .. صرت بدوامه ..
ماعرف ماعرف ..
جلنار اختيار اخويه الخاطئ بس هاي حياته وقراراته وهو حر بيهه وممسموحلي اتدخل بس هم ماسكتت غلطت عليه وحجيت كل الي بخاطري تلازمت وياه بس هو سكتني ..
گالي يحبهه وستر عليهه وسامحهه ومثله اني لازم اسوي ..
ثرت ورفضت واستحقرته .. استحقرت ضعفه كدام حبه ..
صح الي يحب يضحي بس الا الكرامه .. كرامتي ثم حبي ..هذا عندي قانون وشي لايعلى عليه ..
من بعدهه طلكت همس .. تندمت ع تسرعي .. اسوأ قرار اتخذته بلحظة غضب ..
ردت بس رد اعتبار لكرامتي الي داست عليهه همس يوم جذبت عليه لگلبي الي حبهه وكسرته ..
بس من طلكتهه ماشفت بعيونهه انتصاري ولا رد الاعتبارالجنت ابحث عنهه ولاجبر لجرح گلبي ..
شفت قوتهه .. قوة تحير رغم الظاهر ضعف الشخصيه بس همس ابد مو ضعيفه شخصيه .. العنده هيج طاقه صبر مو ضعيف .. الي يعطي بدون كلل او ملل وبدون مقابل هذا جباار مو ضعيف شخصيه ..
بليلتهه حرگت گلبي حرگ اي تصرف اي كلام ادفاع عن نفسهه مدافعت ومتكلمت ومتصرفت رد فعل .. وصل بيهه تريد تبوس ايدي علمود اخلي طلقه براسهه لان بجيت .. هه انقهرت عليه .. كرهت ضعفي كدامهه اخذت سويج سيارتي وطلعت حركتي بيهه من بعد ماطلكت همس وطردتهه لاهلهه ..
مشيت سرعه والشوارع فارغه الى ان صعدت ع الجزرة الوسطيه وانضربت سيارتي بعمود كهرباء ومحسيت بشي بعد .. 7
الفجر حسيت ع صوت يمي اعرفه .. صوت امي فتحت عيوني يعني عايش مامتت ..
تطمنوا عليه وعرفت عندي ارتجاج بالمخ وكسر ضلعين ومخليني ع المسكنات لان الم كسر ضلوعي مينحمل ..
والمسكنات نفسهه الا بتأثيرهه ياله انام ..

[ملكةه]

البارت 35
حمزة ..
حسيت ع ايد حنينه تلزم وجهي ونفس دافي يلفح وجهي .. دمعه وحيده حارة نزلت ع خدي .. محد غيرهه .. همس .. بس هي تبعث هالطاقه الغريبه بروحي ..بس هي الي تأثر هيج تاثير باحساسي بلمسه وحده من اصابيعهه ..
لمسه ايدهه عافيتي بس السوته ... اوووف يانار گلبي المطفت حته وهي جوة اديه من شبعتهه كتل وماعفتهه لان اكتفيت او بردت ناري لا عفتهه لان تعبت ..
فتحت عيوني شفت وجهه التعبان .. عيونهه الذبلانه بجي او سهر ماعرف .. هي ابتعدت بخوف ..
موال طويل بدا .. وجهتلهه كلام قاسي وهي تقابلني بالبرود والهدوء جنت اتمناهه تجاوبني ترد رد ميعجبني ورغم المي وصعوبه حركتي لاگوم افرهه فرمن شعرهه ..
ابتعدت وطلعت بهدوء متقبله كولشي مني بوسع صدر بعد ماطردتهه وبرة استلمتهه امي الظاهر محد جان موجود لذلك استفردت بيهه ..
مجنت اسمع لهمس صوت بس صوت امي .. جنت ابتسم بداخلي هاي بس امي دوا هالتوم صح متعرف شي عن الموضوع بس مستلمه همس وجلنار دوسه ونص ..
من بده يعلى صوت امي واحنه بمستشفى واتخيلت منظر همس هسه صح مترد بس الدموع تجري عشرة عشرة فصحت ع امي وظليت اراددهه الى ان سكتت واختفى ظل همس من باب غرفتي .. عرفتهه راحت ..
مرت ايام واني بالمستشفى اخواني يتناوبون ع السهر والبيتوته يمي ..
عدا علي الي رفضت اشوفه او احجي وياه طول هاي الفترة ..
جنت ماكدر اتحرك بصعوبه الحركه ممنوعه عني علمود ضلوعي عدا الروحه للتواليت الباقي كوله ممنوع ..
اسبوع وسمحلي الطبيب اطلع من المستشفى ..
رفضت اروح لبيت اهلي لان هناك علي ماريد اتواجد وياه بمكان واحد بالاضافه لجلنار الي وجهه يذكرني بناس ..
ابويه ماقبل .. لعد وين تروح سألني .. ومنو يداريك انت للتواليت متكدر تروح وحدك ومرتك طاردهه لاهلهه ومتقبل احد يتدخل يصلح بيناتكم ولاتقبل نرجعهه تداريك ..گُلي شنو مشكلتك ويه البنيه ..
ظليت اصيح لحد يتدخل الشغله بيني وبينهه لحد يدخل روحه وخلي يكون بعلمكم اني بس اكوم ع حيلي اروح اطلگهه متبقه ع ذمتي بعد ولحد يتدخل ..
اول واكثر واحد فرح بهالخبر هي امي وابويه صار عصبي اكثر من سمع كلامي هذا وامي تهدي بي واخواني كذلك بس امي من جانبهه هالشي تريده ويمكن حتشجعني عليه واني كولش زين اعرف ليش ..
جان ابويه يحجي وعصبي لان هاي الايام الفاتت كولش تعبته بعنادي ..
ابويه بس هو الوحيد الي يعرف اني صارت عندي شقه اشتريتهه وهو ساعدني اسدد بقيه فلوسهه وگتله اروح اسكن بيهه ماريد ارجع للبيت ماقبل .. هو جان مساندني لان يعرفني عاقل وماتصرف تصرفات طايشه ورغم ما شكم مرة سألني شنو الي صار بينك وبين زوجتك بس كل مرة ارفض احجي وهو يحترم رغبتي بس بنفس الوقت عرف الشغله جبيرة وجان ينصحني انو همس بنت اوادم وحبابه ومهما كبر غلطهه لاتبيع العشرة ولاتبيع هيج زوجه بهيج خامه يقصد ادميه وحبابه رجعهه وخليهه ع ذمتك وجافيهه او اهجرهه حته تعرف غلطهه وتتوب تسويه بعد ولا تلتجأ للطلاگ عسى ولعل القرب والاهتمام والمداراة الي هو باعز الحاجه اله يخلي قلبه يلين ويسامح او ربما وجود طفل يخلق سبب جديد للاستمرار بهذا الزواج ..
ابد ماقبل ابويه انفصل ولا افكر بهالموضوع .. بس ابويه ميعرف السبب الحقيقي بمشكلتنه لذلك نفسيتي وكرامتي ممتقبله الهجر حل .. شفت الانفصال هو احسن حل لحالتنه ..
كلام ابويه صح .. احتاج مداراة .. كومتي وكعدتي صعبه حته نومي الا ع المسكن ..واني اريد اوكف ع رجليه شعلي صارله اسبوع متوقف صح مكتبي بيد عمالي وابويه ع راسهم بس همين مو بحرصي لذلك الروحه هسه لشقتي تصرف خطأ خاصه انو شقتي حته اثاث ممأثثهه عود جانت هاي هديه لهمس انهي بيهه معاناتهه ويه امي .. هه !!
طلعت من المستشفى للبيت .. بيت اهلي .. واطوني اهلي غرفتهم الجوة صح اعرف بنفسي ضايقتهم او هيج اني حسبتهه بس كلت فترة وتعدي بين ما اوكف ع رجليه ..
كدامهم تحججت انو ماكدر اصعد درج بسبب ضلوعي بس اني مجنت اريد اشوف علي ولا زوجته وفوك غرفتهم تصير كبال غرفتي ولا جنت اريد عيني تصير ع اي غرض يخص همس .. ماريد انهار ماريد اضعف واشتاق لوحده متستاهل حبي ..
استقريت بغرفه اهلي بالطابق الارضي وامي وايه قايمات بالواجب .. اكل وشرب وحمام ومداراة واسبوع لاخ مر واني حابس نفسي بالغرفه ماريد اشوفهم حتلو صدفه وحته اكلي اطلب من ايه تجيبلياه للغرفه ماريد اكعود وياهم ..
صرت احسن صح الالم بعده بس حركتي احسن بس ببطئ المفروض ماااذي صدري ولو هو الشهيق يأذيني بس احسن بهواي من اول ايام ..
بهالاسبوع اتفقت ويه صديقي يوسف هم مهندس بس ميشتغل وياي بالمكتب لا بغير مكتب بس هم تابع لشغل ابويه اتفقت وياه ياثثلي بيتي .. الشقه .. كولشي من افضله وجان يدزلي صور واني اختار ع ذوقي واحنه ولد سوك ونعرف الاسعار والماركات وشنو افضل ماركه لكل جهاز ولكل قطعه اثاث لذلك مجنه ننغلب بهيج سوالف لان هذا شغلنه ..
مرن اسبوعين
تكمله بارت 35

مرن اسبوعين ثانيات ..
مر شهر ع الحادثه مالتي .. تحسنت بس بقه الالم من اتحرك زايد ..خاصه من ادوس ع نفسي بالشغل وهذا حالي اكثر ايامي جنت اتقصد هيج اسوي اذب حيلي ع الشغل حته ارجع للبيت تعبان وانام فورا .. حته مسكن ماحتاج علمود انام .. اهرب من جروحي الي تنفتح بالليل .. الامي الساكنه وتتهيج بمجرد ذكرى الهه تمر ع بالي لو شمه عطر الهه يتذكرهه عقلي واني اصلا مناسيهه ..
اخر مرة شفتهه قبل شهر من اجتني للمستشفى ..
كملت تجهيز شقتي وانتقلت الهه بدون مااخذ اي شي من غرفتي عدا ملابسي وعطوراتي واغراض شخصيه ثانيه وقفلت الغرفه بالمفتاح وهاي جانت المرة الوحيده الي تجرأت و دخلت بيهه غرفتي من بعد ذيج الليله ..
ابويه ماعارضني من طلعت اسكن بشقه لوحدي بس امي انصدمت وتفاجأت شلون مشتري شقه ومأثثهه وهي متدري بس الي خلاهه تقبل وترضخ بالاخير انو اني ساكن بيهه لوحدي مو ويه همس بس اكو مقابل لرضاهه رجعت فتحت وياي موضوع بنات خالتي وهالمرة ماحددتلي وحدي رادتني اني اختار اي وحده بيهن ع ذوقي كالتلي بس اشر واختار كرهت منطقهه وبنفس الوقت جانت تشجعني اطلگ همس بس اكيد طبعا تشجيعهه هذا مو كدام ابويه ..
اما موضوع طلاك همس بالعائله بعد مانفتح نهائيا .. يمكن والدي خلاني ع راحتي اسكن لوحدي لان عباله سمعت كلامه وصرفت نظر عن موضوع الانفصال بس اني جنت مقرر بس مأجل الموضوع لحد ما استقر واوكف ع حيلي من جديد ..
وبهاي الفترة اقربائنه من اجوي يتحمدولي بالسلامه كولهه سألت ع همس وين ونكوللهم امهه مريضه وهي تداريهه بس خالاتي جانن يعرفن اني وياهه ع خلاف والبنيه عد اهلهه لذلك كثرت زياراتهن هنه وبناتهن واعرف هذا توجيه من امي لذلك اعتزلت واعتكفت داخل غرفتي بعدين انشغلت بشغلي الي رجعتله ومن بعدهه انتقلت لشقتي بعد ماكمل تجهيزهه وتأثيثهه ع اتم وجه ..
انقطعت علاقتي بعلي نهائيا ومن جنت بالمستشفى منعته يزورني ومنعته يحجي وياي واذا شافني بطريق خلي يغير طريقه هو وزوجته مالي دخل بيهم وشكد حاولوا اهلي خاصة اخواني يعرفون شنو الي صاير بيناتنه حته يحاولون يصلحون الوضع بس رفضت احجي شي ورفضت اي طرف يتدخل ..
جنت بحالة فورة غضب من همس ومن علي وحته من نفسي وكل واحد خليتله عقوبه .. علي عقوبته التجاهل شطبته من حياتي وهمس اطلگهه وخلص وهم تنطشب من حياتي ..
اما نفسي فبعد همس عني جان بعد ذاته عذاب اليه شكد مااتصنع القوة شكد ما اريد اصبر مستحيل فد ليله عدت عليه من هذا الشهر الفات بدون مااحط راسي ع المخده واتذكر حضنهه عطرهه دلالهه اليه مانسيت تفاصيلهه قلبي رافض ينسى وكلما تتهيج عليه المواجع باغنيه هي تحبهه بمقطع منهه يمسني بعطر بشي هي جانت تحبه اكل شرب فلم مسلسل اعلان جمله .. الذكريات الهي بيهه ملاحقتني مثل ظلي وكلما زاد وضاق عليه الخناق كلما دفنت نفسي بشغلي اكثر من قبل بس الجرح بعده جبييير ..
حتلو احبهه واعشقهه بس بعد الي عرفته مااتقبلهه .. ماكدر .. مااكدر اتقبلهه ..التفكير بتفاصيل هالموضوع ضرب من الجنون .. تفكيري لوحده يروح .. باسهه حضنهه شاف جسمهه رغم علي گال ماصار اي شي من هالكلام بينهم مجرد ما صاروا وحيدهم بغرفة الفندق همس انهارت خوف من الحرام او المصير المجهول وتأنيب الضمير متحملت كل هالضغط اعترفتله رأسا ..
قرار الانفصال ماتركته واليوم رحت رفعت قضيه طلاگ ... 13
همس .. مر شهر ع گعدتي ببيت اهلي انعزلت عن الكل حته عن هاله الي هي اقرب وحده الي ..
اكعود الصبح اسوي ريوك اتريك واطلع لدوامي ارجع الگه الغده جاهز امه طابخته اتغده واغسل مواعيني واصعد انام واكعد العصر انظف واصلي واسوي العشه وارجع لغرفتي ..
لا احجي ويه احد ولا اختلط ويه خطار .. منعزله تماما لوحدي .. حته حسام تغير وياي صح هواي يصخرني بس بدون مغثه وغلط وهو هم هادئ ومنعزل وبرجعتي دگ رجل انو ميريد نرجس ولايقبل يرجعهه لان هاي بعد انعرفت انو نرجس هي الي دزت الرساله لحمزة حتلو الرقم مو الهه واصلا بعدين عرفنه من خلال علي انو الرقم لزوج اخت نرجس خط جديد ماخوذ باسمه ومستمسكاته يعني يمكن حته الولد ميدري ماخوذ خط باسمه بس حسام مامشى بمعامله الطلاگ يعني مثل الي بقاهه معلكه لان اذا طلگهه هو راح تاخذ حقوقهه مقدم ومؤخر ونفقه لذلك فضل تبقى هيج ..
يمكن ورة زواجي بفترة جان اكو بوادر انو ترجع العلاقه ويه جلنار خاصه من جانت تدافعلي من خالتي تعاركني بس هسه لا انقطعت السبل نهائيا ..
حته من تجي مااطلع ولا اريد اشوفهه اقفل بابي ع نفسي واكعود واسكت واول ماگعدت ببيت اهلي جابتلي مبايلي البقيته بغرفتي وعلي حاول يحجي وياي عن حمزة اني رفضت ..
حمزة يمكن فكر مثل اخويه حسام .. يمكن هاي العقوبه الي جان يحجي عنهه انو يبقيني معلگه لان صار شهر مطلگني بس ما اجتني ورقه طلاگي الرسميه ومحد من اهلي فتح هالموضوع وياي ولا احد من عيالي اجه يستفسر او يحاول يصلح الوضع بيناتنه ويرجعو

يحاولون ع الاقل يفتهمون شنو سبب الخلاف ..
واهلي كذلك مااتصلوا .. محد ضغط عليه ..
مرات اسمع عن مشاكل بين علي وجلنار بسبب امه وجلنار تعبانه كولش بحملهه وخالتهه معايفتهه بحالهه تريد شغل منهه وهاي تريد تجي ترتاح شكم يوم ببيت اهلي وعلي ميقبل وبيتهم لسه مخلصان ..
اي معلومات عن حمزة ماعندي غير انو طلع من المستشفى ومن بعد اخر مرة شفته بيهه بالمستشفى بعد ماشفته ..
صرت احب العزله والنوم .. سمنت شويه هههههه وكرشت .. كل الي يشوفني يكولي مرتاحه ع فراگ حمزة جان سالچ سل ..
اكره يوم الجمعه والسبت لان اخواني وزوجاتهم واطفالهم وخواتي يجون يلتمون يمنه ع الغده واني ماحب الهوسه ويعني شغل اضافي وصايرة اتعب بسرعه ..
بس علي من هذيج الليله وبعد مادخل لبيت اهلي بس مجرد يوصل جلنار ويسلم من الباب ويروح يمكن محرج يمكن خجلان من اهلي المهم بعد مادخل بيت اهلي ..
اول يوم بالاسبوع يعني يوم احد جنت مبدله اريد اروح للدوام اندكت الباب ..
اني فتحت ..
دازين موظف من المحكه بيده تبليغ اليه .. بعد يومين جلسه المحكمه .. حمزة رافع قضيه طلاگ .. ولازم احضر الجلسه بحضور محامي تعينه المحكمه اليه او اني اوكل محامي ..
استلمت التبليغ ووقعت ؟؟؟؟؟

[ملكةه]

للحكاية بقية
انتضروني

[ملكةه]

البارت 36
همس .. اجاني تبليغ من المحكمه .. وقعت عليه .. استلمته .. افترت الدنيا بيه .. مدري الشمس مدري الخبر انسطر راسي وصارت وشه باذاناتي .. يعني صارت صدوك .. يعني نفذ كلامه حمزة ..
دموعي الهه ولوحدهه نزلت ..
راح الموظف بس من شدهتي فاتحه باب البيت وواكفه والورقه بيدي اقراهه وارجع اعيد بيهه .. اعيد اقرة اسمه الثلاثي .. ممستوعبه ..
ابويه طلع ديشوف منو بالباب شافني واكفه ودموعي تجري وبيدي الورقه ..
شكو بابا منو اجه ..
باوعتله مديت ايدي طيته ورقه التبليغ ..
هو عين ع الورقه وعين ع دموعي ..
حضني من جتفي ومشاني جوة للبيت ..
هاهيه بابا هذا امر ربج .. ليش تبجين .. خلي يطلك مو تكولين مرتاحه هيج ..
هزيت راسي اي بس انعصرن دمعتين الم مطلعن من عيوني طلعن من کلبي الي صرخ بلحظتهه احبه اريده ليش هيج سوة بيه ليش مسامحني يمكن من عافني شهر بدون مينفذ وعده انو يطلكني يمكن صار عندي امل انو يسامحني ..
احد مأذيج احد مسمعج حجايه ؟؟
لا بابا ..
خلص وكلي امرج لالله وكافي بجي ..
امي جانت بس صافنه افتهمت وماسألتني اي شي ..
كومي غسلي بابا خلي ااوديج لدوامج بطريقي ..
رحت غسلت وبالي كوله يم هذا الموضوع ..
وصلني بابا لدوامي .. مااخذت ايدي شغل ومن شدهتي خفت أأذيلي مريض خليت البنات هنه يفترن ع المرضى واني كعدت ع الباصات للناس الجايه تدخل للطبيب او تاخذ دوة ..
اخر ساعتين اخذت زمنيه وطلعت من الدوام وبنيتي بعد ماارجع ..
بوجهي للبيت .. دخلت لكيت بابا راجع وماما رايحه للدوام دوامهه مسائي واخويه الجبير محمد موجود..
سلمت عليه ..
هاهموسه شلونج ..
زينه الحمدلله .. انت شلونك .. زينه شلونهه احمد واشرف شلونهم ..
بخير بخير .. شويه ويجون ..امهم راح تجيبهم من مدارسهم وبوجهم لهنا ..
زينه زوجه محمد وتصير بنت عمتي واحمد واشرف ولد اخويه ..
هلا بيهم ..
عرفت ابويه هو الي متصل ع محمد يجي علمود باجر يروح ويانه للمحكمه .. ياربي صعبه .. حته الطبه للمحكمه اشوفهه صعبه ..
من معارفه محمد دبرلنه محامي والاصح المحامي يصير ابن عمتي اخو زينه زوجته واسمه عصام اكبر مني ب 4سنوات ..
سمعت منهم هذا الكلام الي تعمدوا يحجوه كدامي ومن بعدهه صعدت لغرفتي ابدل ملابسي وتمددت شويه بين ميصير وقت الاذان حته اصلي وانزل احضر الغده وبلكي زينه وجهال اخويه الكاهم جايين حته فد مرة نتغده سوة ..
بهالفترة سويت فيس .. صح من زمان عندي نت بس مجان عندي فيس وتواصلت بي ويه ايه .. ايه هي الوحيده من اهل حمزة معافتني وجنت حاسه انو هي تعرف شي قصدي عن سبب مشكلتنه وشكد لحت عليه اسولف الهه بس اني محجيت شي ..
مجنت اسمحلهه تجيب طاري حمزة او اخبارة بس جانت تسولفلي ع الكليه ووضعهه هناك شويه ونسده ونروح ..
بيومهه لكيتهه مراسلتني بس محاجيتهه والبارحه هم مجنت محاجيتهه لان بيتنه جان هوسه هاله بايته يمنه ومن راحت ظليت انظف وراهه ولفيت كبه وبورك للعشوات مال ايام الاسبوع لان عشانه دائما نواشف ..
صار الاذان مكدرت انام رغم تعبانه ونعسانه كمت صليت ونزلت احمي الاكل واحضر حضورات وفاكهه وزلاطه ولبن ..
شويه واجتي زينه وولد اخويه وكحين وترسوا البيت حس وهوسه ..
سلمت عليهم وبوستهم ..
هذا اشرف الصغير ابو لسان يكولي عمه صايرة حلوة ودبدوبه كرصت خدوده ابو لسان ..
کلي انتي هم صار عندج خدود ..
ضحكت من سوالفه ..
اجتي زينه ساعدتني نحضر سفرة الغده واجه حسام وصبينه الغده وكوليتنه تغدينه سوة ..
خلصنه حطيت الجاي ع النار والتهيت اغسل مواعين ..
جنت اسمعهم يحجون بموضوعي .. حسام مجان يدري كلوله وزينه هم جانت يمهم وجانت اصلا تدري يمكن من اخويه ويمكن من اخوهه المحامي الي لزم قضيتي واتفقوا راح نروح باجر اني وابويه ومحمد اخويه والمحامي للمحكمه ..
للعصر اجتي هاله هي وجهالهه وزوجهه وضرغام حاول يصبرني ببعض الكلمات .. الله يعوضج بالاحسن منه ان شاء الله .. ومن هالكلام الي يجبر الخاطر ويطيبه ..
كلتهه مرة واكولهه مرة ثانيه علي كسر خاطري وحمزة جبره فاي كلام بعد ميفيد ..
تعشينه كوليتنه سوة بيت اخويه ماراحوا هم ظلوا ع العشه ويه بيت اختي ..
هالة حاولت تطلعني من جو اليأس والكآبه الاني بيهه هي وزينه ..
جنت لابسه دشداشه فانيله ضيگه جوة العبايه الاسلاميه المفتوحه كالتلي هاله ..
وج عيني شو مكرشه اول تالي هموسه عمرج ماسمنتي ..
ضحكت كتلهه وين اكو ..
نبت زينه .. اي عيني مرتاحه ع فراك حمزاوي .. شنو جان ماخذ عافيتج ..
ضحكت بالم من جابت طاري حمزة ..
حاولت ابلع بطني متنبلع الكرش الصغيرون بي نوع من الصلابه .. خفت بيني وبين نفسي ..
انتبهت عليه هاله ..
شبيج ..
مابيه شي ..
لعد شبي وجهج انكلب فجأه مو هستوج جنتي تضحكين .. ترة دنشاقه وياج والله لا مكرشه ولابطيخ اصلا حليانه يلوگلج من تربربين ..
هههههه
ضحكت وبداخلي الف اه وحسرة وهم جديد .. خوف من الي شاكه بي يطلع صحيح

تعشينه سوة وورة العشه كلمن راح لبيته وقبلهه اتفقنه باجر من الصبح يمر علينه محمد ياخذنه للمحكمه بسيارته ..
ليلي بيومهه مانمته يمكن لحد الفجر بجي ساعات وتفكير ساعات ماعرف شأريد وماعرف شأدعي ساعه اكول احبه واريده وانظلمت واريده يسامحني وساعه اكول مترهم نكمل سوة حتلو احبه راح يظل يعيرني بالي صار طول عمري ..
وجه الفجر نمت من التعب ..
الصبح الساعه 7 امي كعدتني علمود اتريك وابدل واروح ويه ابويه ..
كعدت غسلت وجهي وبدلت راسآ .. گلبي جان مقبوض وعيوني مورمه منايمه زين .. احس روحي باختبار صعب .. مو بس صعبه دخلتي للمحكمه اكو رهبه بداخلي .. مثل الي موديهه لمصير هي تعرف شنو هذا المصير ومتريد تروح بس مجبورة تروح ..
اي والله ماريد اروح حيل مختنكه ..
لبست بنطرون وفوكاه فستان للركبه لبسي الاعتيادي بس لان سمنانه بي صاير بي ضيگ ع جسمي شويه ..
نزلت واني جابرة نفسي ..
صباح الخير ..
سلمت ع امي وابويه وحسام الي جانوا كاعدين يتريكون ..
كعدت اريد اتريك ماكدرت الزم شي .. كمت ..
ليش گمتي يمه .. اكليلج لكمه تسندين روحج بيهه ..
ماريد يوم ماشتهي ..
سوده عليه .. 18
كمت واني اشوف عيون ابويه واخويه عليه حاسين بيه واني ماكدر احجي شي ..
حسام راح لدوامه وسمعنه محمد دگ هورن طلعناله اني وبابا سلمنه وانطلقنه للمحكمه ..
بگلبي رهبة المكان .. رهبة القاضي .. نظرات الاتهام بعيون الناس ..
هالضغط النفسي متحملته جنت كوة لازمه نفسي دموعي مترقرقه بعيوني بس ارمش تنزل ومن تنزل بسرعه امسحهه وتنزل غيرهه امشي ورة بابا مدنگه ..
شفنه المحامي واكف يم باب القاعه الي راح ندخل الهه وموجود بيهه القاضي ..
تقربنه سلمنه .. عصام ابن عمتي صح بس مو ذيج العلاقه وياه عدا السلام ..
اخذني ع صفحه من بعد ماسلم وسلامه اريحي وشقه وضحك ويه محمد اخويه شافنه كولنه متكأبين ووجوهنه مكلوبه وراد شويه يغير نفسيتنه ..
جان واكف وياي يسألني عن شنو الي اريده ..من حقوقي لان حمزة هو الي راح يطلگ فمن حقي اتمتع بكل حقوقي نفقه والمتقدم والمتأخر .. بالي مو يمه مو هذا الاريده شيفيدني المقدم والمؤخر صح جنت اجاوبه كلما يسأل بس عيني ع الباب لسه مالمحت حمزة لسه ما اجه ..
ابويه تعب من الوكفه وكعد ع كرسي جان ع بعد امتار من عدنه ومحمد راح يجيبلي بطل مي ..
حسيت نفسي تلعب حارة الدنيا كولش واني ممتريكه ابد ماستحملت الحر حسيت كل شويه اريد اوكع كوة لازمه نفسي ..
بهاللحظه بالذات دخل حمزة هو وياه رجال جبير بالعمر .. مو عمي ع الاكثر محاميه ..
اول مارفعت راسي وشفته صارت عيني بعينه .. وجه نظرة لعصام الي جان واكف يمي ويحجي ونظرة اليه ..
هي نظرة هي خزرة ..
اجه اخويه محمد جابلي مي رأسا اخذته فتحته وشربت ..
لابت روحي ..وماتحملت مشيت ركض للحمام اخويه محمد لحكني فهمته بعد ماكدر اريد اتقيأ اخذني للحمامات دلاني عليهه وطبيت ..
تقيأت .. بس معدتي فارغه فمو دا اتقيأ عبالك دا تطلع روحي ..
بجيت بحرگه ع حظي .. غسلت وكملت بسرعه لان خاف يصيحون اسمي حته ادخل للقاضي طلعت لكيت اخويه بعده ينتظرني بباب الحمامات رحت وياه ودموعي لوحيدهه تتساقط وامسحهه ..
اول ماوصلت حاجاني عصام من شاف عيوني حمر گالي لنتقهرين هو الي خسرج متعرفين الله شكاتبلج يمكن الاحلا والافضل الج بعده ماجاي وانتي بعدج صغيرة والحياة كدامج لاتخلين طموحج وسعادتج
وغايتج تتعلق برجال ..
جان يحجي واني مدنگه اهز براسي ..
تمام ؟؟
رفعت راسي ابتسمت ابتسامه خفيفه صارت عيني بعين حمزة ضايج وبوجهه خزرة ماعرف اليه لو هو هيج ..المفروض يفرح هو رادهه وراح يخلص مني ليش هالتجهم وعقجة الوجه بعد ..
رجعت دنكت ..
صاحوا اسمي واسمه واسماء محامينه ودخلنه للقاعه .. صدوك رهبه .. القاضي والناس .. استحيت مثل الي مسويه جريمه .. صعب عليه هالموقف ..
تقربنه من القاضي .. رجال خمسيني لابس نظارات طبيه .. قرة اوراقنه .. كل شويه ينصي ع الاوراق ويشيل راسه يباوعلي ..
صاح اسمي واسم حمزة ..
گمنه وضفنه ..
سأل حمزة .. تريد تطلق زوجتك ..
اي نعم سيدي ..
سأله القاضي .. شكد صارلكم متزوجين ..
جاوبه حمزة .. اربع اشهر ..
رفعله حاجبه القاضي ..
وهاي الفترة برأيك كافيه حته تقرر تنهي زواج وتكسر بخت بنيه ..
دنك حمزة ..
جنت ابجي اني من اول ما بلش القاضي يسأل حمزة ..
حجه بمتمته ..
سيدي ممتفاهمين ..
شنو سبب عدم التفاهم .. طيني اسباب ..
سكت حمزة ..
مقايمه بواجبهه كزوجه تجاهك ..
لا سيدي مو هيج ..
ابتسم القاضي مثل الي ديسأل السؤال وممقتنع بي ..
متعرف تطبخ ..
متعرف تنظف ..
حمزة يهز براسه لا ..
اضاف القاضي .. وحته هاي مو اسباب كافيه للطلاق .. هي ممجبورة تطبخ وتخدم مو من واجباتهه ومع هذا بناتنه يدخلن لبيت الرجال كاملات مكملات ..
التفت عليه ..
ليش تبجين بابا ..

وقع وختم القاضي .. وكال طلب الطلاق مرفوض وحولنه ع المرشده الاجتماعيه الي هي مختصه بحالات الاصلاح بين الازواج ..
اذا هالحل جاب نتيجه تسقط قضيه الطلاق واذا لاماكو فايده وماحلوا مشاكلهم وخلافاتهم ترجع تصعد قضيه طلاقهم للقاضي ..
هذا الي فهمنياه المحامي ..من بعد مامسحت دموعي وكتلهم يعني شنو ..
طلعنه من قاعه المحكمه بوجهنه للمصلحه الاجتماعيه وطلبوني فقط اني وحمزة ..
جنت حرفيا ارجف ..
دخلنه اني وحمزة لمكتب المصلح الاجتماعي والشرطي الي جان بالباب سد الباب علينه وماسمح لاحد بالدخول ..
ظلينه وحيدنه .. مجانت موجوده ..
رحت كعدت وهو همين كعد كبالي ..
جنت احاول اتهرب من عيونه الي جانت تتفحصني ..
رأسا حجه ..
شنو هذا لبسج ومنو هذا الجنتي واكفه تتمضحكين وياه ؟
صدمني سؤاله .. باوعت لروحي ..
عقدت حواجبي .. شبي لبسي .. ومنو هذا الجنت اتمضحك وياه .. اتذكرت المحامي ابن عمتي عصام .. جانت مجرد ابتسامه مجامله ..
محجيت شي ولا رديت ..
دخلت المصلحه الاجتماعيه سلمت علينه مرة اربعينيه من بعد السلام كلام ودود واسلوب حلو تستدرجنه بالحجي وكل شويه توجه سؤال لطرف منعدنه ونجاوب .. بلحظات قليله زرعت بيه ثقه ..
عرفت بينه نريد نتطلك وحمزة هو المشتكي معناهه هو الي رافع قضيه الطلاق ..
شكد صارلكم مزوجين ..
4اشهر ..
شلون هيج بهالسرعه قررت تنفصل عنهه ..
بيناتنه مشاكل ..
وهاي المشاكل مالهه حل ؟
مالهه حل ..
شلون عرفت .. شلون قررت بهالسرعه .. غير تكعدون سوة تفكرون وتتناقشون وتحلون مشاكلكم .. ترة الزواج تنازلات وتضحيه من الطرفين مو بس من الزوجه ..
ست احنه اتفقنه ..
اهااا ع شنو اتفقتوا ماما ؟
ع الانفصال ..
التفتت عليه لكت دموعي تجري ..
ليش تبجين ماما .. انتي راضيه تتطلكين ؟
رجعت باوعتله ..
هذا وجه وحده تريد تتطلگ ؟
انت جاوبني ..
شنو الي ماله حل بيناتكم ؟
مقصرة وياك بحقوقك ؟
هز راسه لا ..
مانعتك عن التمتع بيهه ؟
لا ..
لازم عليهه شي موزين لاسامح الله ؟
لا ..
سيئه الفاظ سيئة اخلاق وياك ؟تتجاوز عليك ..
لالا ..
لعد هي لعبه جاي تريد تطلگ ..
سكت ..بعدين كال .. ممتفاهمين ست ..
بشنو ممتفاهمين ..
سكت مجاوب .. كل شويه يباوعلي .. يريدني اسانده يريدني احجي واكوللهه اي ممتفاهمين واني هم اريد اتطلگ بس سكتت محجيت ..
جنت امسح بدموعي وتنزل غيرهن واشهك بهدوء ..
خابرهه مطلوبه بقضيه بغرفه القاضي استأذنت وطلعت وكالت تفاهموا بلكي تتصافون ..
اول ماطلعت الباحثه صك ع سنونه وحاجاني ..
انتي ليش متحجين متكولين اريد اتطلك منه ليش متسانديني من اكول للمرة ممتفاهمين ..
ليييش .. تسألني ليش .. لان احبك .. اي احبك وماريد اتطلك منك ..
كمت ابجي بحرگه ..
غلطه .. غلطه وحده وراح اظل طول عمري ادفع ثم

جان يباوعلي بهدوء ببرود ..
هاي بعدج تتمسكنين ..
مسحت دموعي .. هواي ذليت نفسي الك ..
ترة اني الي اعترفتلك بكولشي .. مو علي .. مو جلنار .. اني الي اعترفت الك .. اني الي ماكدرت ابني سعادتي وحياتي وياك بكذبه وردت من قبل زواجنه اصارحك واتركلك القرار نكمل لو كلمن يشوف طريقه بس اختي واخوك ماقبلوا ..
شنو فرقك عن علي ..
كمت اصيح لان تلفت اعصابي منه .. صرت ابجي بحركه واحجي بألم ..
شنو فرقك عن علي .. علي يحب جلنار ومن عرف سامحهه وكمل حياته وياهه وانت تحبني ومن عرفت اجيت هنا تبهذلني بالمحاكم علمود تطلگني .. تريد تطلگني روح طلگ محد لازمك .. لهنا وخلصت وياك ..لهنا وهاي هيه .. كافي ذله لناس متستاهل ..
اني ماستاهل ؟
ايي اييييي .. وهسه تأكدت انت متستاهل ورسالة نرجس جانت رحمه من رب العالمين اليه .. عرفت حقيقتك .. تحبني ع اساس وكتلت روحك .. هه !! حبيش ..
جنت واكفه واصيح .. فجأه افترت الدنيا بيه ودخت لان بدون ريوك وحارة الدنيا ..
رأسا گعدت ع الكرسي ..
شبيج ..
معليك ..
شربت مي ..
هدأت من برة بس داخلي يغلي .. روحي تنزف وگلبي هم ينزف ..
مجاوبتيني .. منو هذا الجان واكف وياج وتضحكيله ؟
باوعتله .. استصغرته .. جاي يطلكني ومطببني بنص الزلم وبهذله المحكمه شنو يغار ..
منا وهيج اي شي يخصني ميخصك ..
باوعت بعيونه من حجيت هالكلام ..
لساتج ع ذمتي فأحترمي شويه ..
اكرهك .. اكرهك .. سمعتهه لو اعيدهه .. اكرهك ..
جنت حيل منفعله وهو باوعلي بصدمه .. مشدوه من ردة فعلي يمكن قويه ممتوقع هالشي مني ..
ظل يباوعلي وهو كاعد بمكانه ع كرسيه كدامي ..
لحظات ودخلت المصلحه الاجتماعيه ..
ها ماحليتوهه بيناتكم ..؟
باوعتلي .. هزيت راسي بقوة .. لا ..
وهو هم سكت ماحجه ..
كتبت بورقه انو ماصار حل او تفاهم بين الطرفين وكتبت ورقه ثانيه وختمتهه كالت هاي تسلموهه للقاضي ..
اني سألتهه .. هسه شراح يصير ؟
ماما اطيتكم فرصه تتفاهمون بلكي تتفقون وتحلوهه بيناتكم بهدوء وما تراهمتوا بالاحرى ماحاولتوا .. انتوا بايعين ليش اتعب نفسي وياكم ..
كلت بكلبي .. هو بايع ..
كملت
تكمله بارت 36 5
الباحثه كلامهه ..
راح ترجع تصعد اوراقكم للقاضي ..
يعني شنو تصعد اوراقنه ..
ماماتي يعني دعوى الطلاق الي زوجج رفعهه عليج راح ترجع تصعد اوراقهه للقاضي وهو يشوف الاجراء المناسب واسباب الطلاق قد يطلقكم بجلسه وحده او تصير ع عدة جلسات ..
شكرا ست ..
اهلا ..
ترخصنه وطلعنه ..
حمزة بعد ابد ماحجه وياي ..
بس من طلعت لكيت ابويه واخويه والمحامي جانوا منتظريني بالباب ..
سألني بابا شصار ..
طيته الورقه الي طتنياهه الباحثه ونفس النسخه عد حمزة وثالثه صعدت للقاضي ..
اخذهه المحامي من ابويه وافتهم السالفه شنو وسولفت لبابا شصار جوة بس مسولفتله شصار بيني وبين حمزة ..
حمزة ظل واكف بعيد ويه المحامي مالته جانوا يحجون ويتناقشون ..
رجع المحامي مالتنه دخل للقاضي ومحامي حمزة هم دخل ..
شويه وطلعوا حددوا جلسه ثانيه واخذنه تاريخهه وطلعنه للبيت ..
اخويه وصلني اني وبابا للبيت واخذ وياه عصام اخو زوجته لبيتهم عزموه يمهم يمكن ..
حمزة .. بنفس اليوم ابويه اجه للمكتب تعارك وياي لان عباله صرفت نظر عن سالفه الطلاك وماعرف منين سمع اليوم جانت جلسه طلاكي من همس بس الظاهر الي خبرة بهذا الموضوع مجان يعرف باقي التفاصيل ..
من بعدهه خليت واحد من الولد العمال المعتمد عليهم يلزمولي المكتب ..
رجعت للشقه اخذت جواز سفري وشكم قطعه ملابس واغراض شخصيه وفيزت لتركيا ..
قفلت الشقه وبوجهي للمطار .. حجزت .. اقرب طيارة بعد اربع ساعات قضيت هالاربع ساعات بالمطار بين نوم وتفكير بالي صار اليوم بالمحكمه وبهمس الي شفتهه اليوم متغيرة .. اسلوب ولبس وشخصيه .. ردودهه فاجئتني .. جرأتهه .. سمنانه .. حليانه عدا العيون الذبلانه والخشم الاحمر من کد مابجت .. لايگلهه فراگي .. لو هذا المحامي الي يريد ياكلهه بعيونه وهي واكفه تتمضحك وياه .. هه .. ماصدگت تخلص من حمزة .. دنعل عشيرة حمزة ع هل الحظ الطايح مدري بيا چيحه ..
غفيت واني هاي افكاري ..

[ملكةه]

البارت 37
حمزة .. سافرت لتركيا .. هروب .. اي هربت .. من جهه ابويه اول ماعرف بالمحكمة وطلاگي من همس اجه تعارك وياي وغضب عليه واني عمري وحياتي ممزعله ولاكاسرله كلمه وهو واثق بيه بكل خطوة يعرفني عاقل ورزن وكل تصرف اتصرفه بمكانه ومن جهه ثانيه كلام همس حاصرني .. حسيت روحي ظالمهه وبنفس الوقت ظلمتني من ظمت عليه .. حسيت روحي ضايع بين كذبهه وحبهه وحبي الهه .. ماعندي شك ولو واحد بالميه بحب همس اليه ومن شفت المحامي واكف يمهه اليوم نار وحرگتني واني جاي اطلکهه عود .. وحته من سألتهه عنه جاوبتني جواب زاد النار الي بصدري ..
كلامهه اليوم ضيعني .. لو ماشعور الذنب الي جان ياكل بروحهه اكل مجانت حجتلي جان بقيت ع عمايه وحته من حاولت تحجي علي صاح بيهه مجان اله نيه يصارحني بهيج موضوع ..
شلون ماأمن بيهه .. روحهه بيدي هسه وفضلت تصير روحهه بيدي ولا عذاب الضمير ..
اكو مواقف وتجارب تبين معدن الانسان واني صرت باختبار عرفت منو ناسي وعرفت شنو معدن همس الي اختاريتهه شريكه حياتي ..
تهربت حته افكر .. ابتعد اهدأ وماريد اصطدم باي احد وافكر براحتي ..
الجلسه الثانيه مال المحكمه تحدد وقتهه خابرني المحامي كالي بعد اسبوعين واني مناوي ارجع ولا ناوي احضر الجلسه ..
امي يوميه تتصل عليه وتقنعني اطلك همس واخذ وحده من بنات خالاتي نفس الموال نفس الاسطوانه المشخوطه ..
ايه هم تخابرني .. اعرف هي صديقه لهمس وع تواصل دائم وياهه ومرات ابوگ لسانهه واسألهه عن اخبار همس ..
اخواني كذلك ابو علي حسين وحيدر ابو كرار دائما يتصلون ويلحون عليه اعقل وارجع زوجتي واصالح ابويه والتفت لشغلي كافي صارله فترة بيد العمال صح همه يمرون يجيكون الحسابات بس العامل يبقى عامل مو صاحب الحلال ولا يصير احرص من صاحب الحلال ع. حلاله ..
جنت مرتاح نوعا ما وهم راجعت طبيب علمود صدري واضلاعي الي تضررت ..
صح خف الالم هواي بس ماراح ومرات اذا دايس ع نفسي بالشغل خاصه الصعده والنزله والتعب الجسدي يصل عليه باليل خاصة اذا الجو بارد وماكدر انام مرات بدون مسكن ..
همس ..
من بعد يوم المحكمه ثاني يوم رجعت لدوامي من بعد ماجنت مجازة يومين ..
حته اقرب صديقاتي الي وياي بالمستشفى مگتلهن عن طلاگي ..
تحددت الجلسه الثانيه بعد اسبوعين من الجلسه الاولى وهم اني وابويه والمحامي واخويه محمد اخذنه للمحكمه وبيومهه حمزة ماحضر المحامي مالته كال مسافر تركيا للعلاج وقدم للقاضي تقرير طبي عن حالته الصحيه وحالة اضلاعه وتأجلت الدعوة لغير يوم وبلغوا محامينه بالتاريخ المضبوط للجلسه ..
حالات الدوخه والتقيأ تكررن عندي اكثر من مرة ..
سولفت لصديقتي افنان كالتلي يحظي ليش ماحللتي انتي مو مزوجه خاف حامل ..
وفعلا بنفس اليوم حللت .. طلعت صدوك حامل وحملي اكثر من شهرين .. 3
فرحت حيييل .. ابد مفكرت هذا الطفل وسيله رجوعي لحمزة بالعكس خفت من هالنقطه خفت خاف انجبر ع شي اني مااريده ..
بس شعوري الغالب هو الفرح .. شكد احب الاطفال .. جهال هاله اختي تربيتهم جانت ع ايدي تلاثتهم .. ولحد هسه من اروح يمهم اني الاداري واني الاوكل واني الاقري واني الابدل الهم ..
فرحتي ماوسعتهه الدنيا ..
رجعت للبيت جان لازم احجي لاحد هالخبر واشاركه فرحتي ..
من رجعت للبيت بيومهه مبين عليه فرحانه بس ماگلت لاحد غير هاله اتصلت عليهه وگتلهه بهذا الخبر فرحتلي كيفت راح تصير خالة ..
طلبت منهه متكول لاحد الى ان تفض شغلة المحكمه بيني وبين حمزة اريد اشوف تاليته شنو هاي صار جلستين ميحضر ومحاميه يكول بعده ديتعالج بتركيا ..
هاي صار مرتين الجلسه تتأجل يعني هاي صارت ثالث مرة اطب للمحكمه ..
وماردت اهلي يعرفون بالموضوع قبل لا يطلكني حمزة حته لايجبروني ارجعله ولو همه حته بهاي الحاله ميكدرون يسوون شي لان هو الي يريد يطلگ ..
مر شهر واكثر وحملي بدة يبين ..
للمحكمه بعد مارحت ماحددوا بعد جلسه كال القاضي انو من يخلص المشتكي الي هو حمزة علاج ويرجع من تركيا يتم تحديد جلسه جديده ..
لان كثرة تأجيل الجلسات وعدم حظور المشتكي مع بقاء اصرار الزوجه ع اكمال دعوى الاطلاق ممكن يحكمهه القاضي بطلاق غيابي بس هو القاضي ميريد هيج لان مطلع ع اسباب طلبهم للانفصال والاسباب الي كدامه مو مقنعه لذلك ديطيهم وكت بلكي يتفاهمون بلكي طرف ثالث يتدخل ويصلح بيناتهم ..
خاب ظن همس .. قضيه الطلاك ظلت معلقه ..
هي من بعد ذاك اليوم بالمحكمه اول جلسه وطلعت كل الكلام الي جانت كاتمته بكلبهه ارتاحت .. بوكتهه كالتله لهنا وخلصت وياك وفعلا جانت تعنيهه واقتنعت ان الجاي احلا هي تستاهل كل خير ورب العالمين مراح يعوفهه وعسى ان تكرهوا شيئا فهو خير لكم ..
بدت بطنهه تكبر واضطرت تكول لامهه ومنهه طش الخبر انو همس حامل .. عليهه 4اشهر ..
امهه فرحتلهه ولمحتلهه ع شغله انو بالشرع ميجوز طلاگ الا تذب حملهه يعني الا من تجيب .. معناهه قضيه طلاکهه ا

انذبت ع الشحن .. رغم تضايقت من هذا الموضوع بس مانكسرت فرحتي بخبر حملي ..
استمريت بدوامي .. تغيرت نفسيتي صرت اضحك واتشاقه مرحه .. صار عندي امل صار عندي شي بحياتي حلو انتظرة واتطلعله بفارغ الصبر طفل قطعه مني من روحي يفرحني ويسندني بكبرتي باجر عگبه من اكبر ..
وبحجة القضيه وتقاصيلهه جان عصام ابن عمتي دائما يجي للبيت بوجود ابويه واخويه طبعا وصادفت شكم مرة يجييني للمستشفى بنهايه الدوام يوصلني للبيت بحجة جنت مار منا او تخربطت واجيت اجيك روحي ..
جنت حاسه بنظراته اكو شي اله غايه بس مستغربه بنفس الوقت شنو ميشوف بطني ..
وهو المحامي بقضيتي يعني يعرف اني لسه ع ذمة رجال ثاني ..
اتصالي ويه ايه مستمر .. جنت انطلق بالكلام وياهه .. وحته عن عصام وجياته اليه للمستشفى حاجيتلهه بس اعرفه عاقل ورزن ومتطلع منه العيبه بس سالفة حملي متدري بيهه ..
تقصدت احجي بموضوع عصام كدام ايه وبنفس الوقت ماكتلهه ع حملي لان اعرفهه ع اتصال ويه حمزة الي صارله شهرين بتركيا شارد ههههههه لذلك تقصدت .. اي ردتهه تحرگله دمه بعصام خلي يعرف ان الله حق والدنيا مواكفه عليه وبعدني منفصلت رسمي عنه والف من يتمناني ..
اني ع منو اقشمر .. بعدني احن اله بس هالتصرف وهالعصام صار رد لكرامتي .. انتقامي البارد من حمزة ..
فد يوم عصريه اني وهاله رحت مراجعه للطبيبه قريب السوگ اكو هواي طبيبات واني طبيبتي هناك وحده منعدهن وجان اشوف جلنار وآيه ..
جلنار بطنهه واصله لخشمهه كولشي بيهه مورم وتعبانه كولش جايه هم مراجعه لطبيبتهه وجانت بنهايه الشهر السابع من حملهه ..
علي جايلهن .. وهاله خلت عصام يوصلنه ..
هذا الحجي اني خلصت مراجعتي وتأكدت من سلامة الطفل ونبضه وطلعت تلگتني هاله واكفه ويه جلنار وآيه ..
سلمت سلام عادي بوجود جلنار بس آيه لا مااكدر اسلم عليهه سلام عادي تباوسنه وتحاضنه وتفاجأت من شكلي سمنانه ومتغيرة ضحكت هاله گلتلهه وحامل ..
اختفت الابتسامه من وجه آيه باوعتلي بعتب عود ليش ماگتيلي .. ضحكت ودنگت .. كتلهه نتفاهم بعدين .. عاد هنا هي فرحتلي وباركتلي وخلت ايدهه ع بطني ..
يتحرك النونو ..
لسه بعده .. منا وهيج يبدي ان شاء الله ..
جلنار من کد تعبهه مو طايقه روحهه وصاير بيهه زلال وكولش تعبانه هي جانت تدري بحملي لان كل اسبوع هي يم اهلي بس هاله منبهه عليهه متكول لعيالهه ..
هسه ايه عرفت يعني اول واحد راح تصير بحلگه السالفه همه حمزة وخالتي ..
ظلينه نتمشه ونسولف ..
كلت لايه لاتكولين لاحد عفيه بين متخلص قضيه الطلاگ ..
آيه .. لاعيني تعذريني .. ماريد اخويه يطلكج وابويه تعارك ويه حمزة ذيج العركه الجبيرة علمودج ومن يومهه حمزة شارد لتركياصارله شهرين عايف شغله هسه اول ماارجع منا اكول لابويه حته هذا سبب قوي يخلي حمزة ينجبر يرجعج ..
بس اني ماريد ارجعله ..
مو هو بكيفج .. بابا اعقلي شويه صار عدكم طفل شنو ذنبه يربى بدون اب .. بعدين اذا ع امي ومشاكل امي ترة حمزة مشتري شقه وكاعد بيهه وحده ..
ظليت صافنه شو اني مادري بهذا الحجي ..
سكتت محجيت شي ..
ظلينه نتمشه لحد ماوصلنه لسيارة عصام جان ينتظرنه ..
سلم الولد من شافنه اجينه وعرفناه ع آيه ..
ايه صدت عنهم وغمزتلي ..
وج منو هذا الصاك ؟
هههههههه هذا ابن عمتي المحامي الي لازم قضيتي ..
لاتكوليلي عصام ..
ههههههههههههههههه ..
مي بارد ونزل ع گلبي عرفت حمزة مسولفلهه عليه ..
وج منين تعرفين عصام ..
هاا لاهيج هستوة الولد عرف عن نفسه وكال اسمه عصام ..
هااا اييي ..
جلنار ملتهيه تسولف ويه هاله وماتعبت نفسهه ولاحاولت تحجي وياي لان تدري بيه لابستهه ..
ها نوصلكم ويانه ..
لاعيني علي ينتظرنه ..
هاا خوش ..
آيه وجلنار راحن يتمشن لسيارة علي واني وهالة صعدنه ويه عصام وصلنه للبيت ..
ورة يومين جانت نهايه دوامي طلعت لكيت عصام ينتظرني ..
طبعا هاي مو اول مرة لذلك ماستغربت ..
بعد السلام صعدت وياه يوصلني للبيت ..
بالسيارة حاجاني عصام ..
همس انتي بنت خالي وتعرفين امي ماعدهه غيري وزينه ..
(زينه هي مرة اخويه محمد تصير بنت عمتي واخت عصام )
وزينه الحمدلله مزوجه ومستقرة ببيتهه ومرتاحه ..
جنت اهز براسي او اجاوب اي واي اريد اعرف شنو تاليه هالاسطوانه ..
يعني ماباقي بس اني وامي دتلح عليه علمود اتزوج واني مو رافض فكرة الزواج بس جنت ماريد ادور زواجه والسلام ..

يعني ادور بنيه عاقله وفاهمه مو زعطوطه واني هم مو صغير عمري 25سنه ..
اي ..
الى ان شفتج گبالي ..
مافهمت ..
يعني اذا هسه اخذت موافقه مبدئيه منج احجي ويه خالي علمود اخطبج ..
ضحكت باستغراب ..
اتعجب عليك يعني عصام لو ما انت لازم قضيه طلاقي ..
يعني شنو ..
يعني شلون تفتح ويايه موضوع زواج واني لسه ع ذمة رجال ثاني ..
عادي عندي هواي معارف من باجر نروح نحدد الجلسه الجايه وتتطلكين غيابي ..
صفنت عليه .. هذا حيل رايح زايد بالتفكير شنو 9
شنو الي صار واوحاله انو اني مباحه اله يفكر بيه كزوجة ..
ضجت حيل .. يعني اني اعامله ع اساس ابن عمتي وبس وكولشي باحترام ورسميه وحته من اخليه يوصلني فهم لان هو ابن عمتي فقط لاغير ..
عصام خويه دتشوف بطني .. ترة هذا مو كرش اني حامل ..
انصدم هو فتح عيونه ع وسعهن ..
اي نعم اني حامل من زوجي بعد ماله داعي تفتح هيج موضوع ..
اعتذر والله مجنت اعرف ..
سكتت .. كتله .. اني اترخص ماكدربعد اخليك توصلني ..
هو ظل صافن مشدوه ومن صدمته ماحاجاني ولا جلب بيه من كتله راح انزل ..
سلمت ونزلت وهو باله ابد مو يمي ..
طلعت من الگراج مال المستشفى ليبرة اريد اخذ تكسي للبيت مابيه اصعد كيات لان يلعبون بيه لعب بالطسه تطلع روحي ..
حمزة .. ع طول ايه تتواصل وياي واني هم مقاطع تواصلي وياهه لان دائما تحجيلي اخبار عن همس ..
بيومهه بالليل هواي اتصلت عليه ع الماسنجر اني مجنت فاتح من وكت ..
بس رجعت من برة وشفت مكالماتهه اخترعت كلت اكيد صاير شي مو زين ..
راسا اتصلت عليهه ردت ..
ها آيه خيرج ..
هواي متصله عليه خو ماكو شي ..
ضحكت .. لاقلبي ماكو شي ..
ابويه صايرله شي امي ..
ثنينهم بخير لايظل بالك ..
لعد شبيج ميت مرة متصله عليه وگعتي گلبي ..
سلامة گلبك حمزاوي بس اريد البشارة ..
يابشارة ..
دكول الج البشارة .. حته اكولك ..
يله الج البشارة ..
شما اطلب وشمااريد ؟
هسه هي غير تحجي .. دفضيني ..
هموسه حامل ..
سكتت .. صدمة .. ممتوقع ..
ها حمزاوي وين رحت .. ترة ماكلت انت حامل كلت مرتك حامل ..
متأكده ؟
طبعا متاكده ..
شلون يعني هي گلتلج ..
لا والله بس اليوم اني وجلنار رحنه عدهه مراجعه لطبيبتهه وهناك شفت همس وهاله طالعات من غير طبيبه وشفت همس وكرشهه الصغيروني ..
هاله ذبن الحجايه عاد هنا عاتبت همس لان مكالتلي وظلت تتعذر مني تعرفني اول مااسمع بهالخبر راح اكولك ..
صفنت .. يعني همس جانت تدري بروحهه حامل ..
اي طبعا تدري .. اصلا جانت جايه مراجعه مو تحليل ..
سكتت .. اني جنت ناوي ارجع هاليومين وبعد

تأكدت من قراري وهم قررت ارجع ..
ايوته حبيبي .. اني هاليومين راجع ..
اييييي واخيرا هلا بيك تنور ..
ختمت الاتصال وياهه بفرح ع ضوجه .. فرحان لان همس حامل وضجت لان ضمت عني الموضوع ومو بس عني عن عائلتي همين حته لحد يوصلي خبر يمكن رادت تخلص سالفة طلاكنه فد مرة ..
يعني لهل درجه وصلت بيهه تريد تخلص مني ..
اني راجع ومقرر اسحب دعوى الطلاگ واجت عدله حمل همس .. الطفل هذا سبب حته ارجعهه وكافي مشاكل ..
ثاني يوم حجزت وطيارتي بنفس اليوم ورجعت لبغداد ..
ماكلت لاحد بس ايه جانت تعرف برجعتي واكيد مخبرة اهلي بس اني مرحت لبيت اهلي تحفظت ع تصرفي هذا ..
الجروح بعدهي ماطابت ومو حاب اشوف علي لو جلنار كدامي ..
لذلك رحت من المطار بوجهي لشقتي ..
رأسا نمت ..
ثاني يوم كعدت الصبح تريكت وبوجهي ع مكتبي وشغلي ..
جيكت كولشي الوصولات والحسابات كولشي مضبوط ..
اخواني اجوي سلموا عليه ودفعوني اروح اصالح ابويه واني اصلا جنت مقرر هيج ..
وصدوك رحت ع ابويه للمكتب وصالحته ووعدته اسحب دعوى الطلاگ واليوم ارجع همس لبيتي ..
بوسني وحضني ولسانه يلهج بدعوات التوفيق اليه واني محتاج دعواته ..
خلصت شغلي ورحت لبيت عمي ابو همس ..
خجلان ومستحي من وگفتي بوجههم بالمحكمه ..
دخلت سلمت وخالتي تهلي وتمرحب بيه وعمي شايل بخاطرة عليه بس اني بوسته واعتذرت منه وفهمته مو بيدي الي صار انصدمت من عرفت وهاي جانت ردة فعلي وردت ابتعد علمود افكر زين بقراري لان عاشرت همس وماالگه مثلهه ومن قبل لا اعرف بحملهه جنت ناوي ارجعهه بس هي بعد صارت هيج والطفل صار سبب اضافي حته ارجعهه ..
الرجال رحب وفرح وكال ماعنده مانع بس لازم اقنع همس لان هالمرة هي الي مصرة ع الطلاق ..
الظاهر مفتوح الموضوع سابقا بينه وبين بنته خاصة من جانت تتأجل الجلسات لعدم حضوري وعارف رأي بنته بهالموضوع ..
كتله اذا ع همس سهله اني اقنعهه ..
سألته لعمي همس وين گالي بدوامهه بنفس المستشفى گتله احتمال امر عليهه من اخلص شغلي فخاف تتأخر لايظل بالك كال صار يابه صار الله يسهلك ..
شفت الفرح بعيونه يمكن حته اكثر مني .. 8
جلبوا بيه ع الغده ماقبلت ترخصت وطلعت ..
جان عندي بعد شغل بالمكتب لازم اخلصه وهمين عندي مشواار صغير لازم الحگ اسويه قبل لايفوت وقته ..
رحت لمكتبي خلصت شغلاتي وبوجهي للمستشفى
..
دافوت ع شارع المستشفى شفت سيارة بيهه واحد شايف شكله من قبلل ..
ظليت صافن هذا منو .. هذا منو .. تذكرته المحامي الي لزم قضيه همس ..
گمت افور .. شعده هنا ..
داسوق بعدني ببدايه الفرع وشفت همس تريد تطلع لراس الشارع ..
مدنكه وتمشي من الشمس مايعه ومغمضه عيونهه شويه ..
دگيت هورن انتبهتلي بس الشمس بعيونهه ماركزت بوجهي عبالك دكيتلهه هورن حته توخر عن طريق السيارة ..
الي صار عرضتلهه بسيارتي ..
اخترعت .. هاي شبيك اعمى ...
تكمله بارت 37 3
اجيت تسحگني ..
باوعتلي زين حطت عينهه بعيني ..
ابتسمت ..
فتحت الجامه مال الكرسي الامامي يم السايق لان هي الجانت قريبه عليهه ..
حمزة !!
شعدك جاي ؟؟
هاي بدل هلو شلونك ..
مابيناتنه سلام ولاكلام ..
لعد شنو بيناتنه ..
محاكم .. لونسيت ..
مانسيت .. اصعدي ..
عافتني ومشت ظليت امشي بطئ بالسيارة بمحاذاتهه ..
اصعدي نتفاهم ..
روح ماكو شي نتفاهم عليه ..
همس لاتعصبيني اصعدي خليني اوصلج ومنهه نحجي ..
خلص الكلام بيناتنه .. ع شنو نحجي ..
همس مو دا احجي وياج .. همس منا الناس اصعدي ..
وهي ولايمي ولا عبالك دا احاجيهه

السيارة تمشي بطئ بمحاذاتهه وصارت العين علينه وهي بعدهي معانده متقبل تصعد ..
اخير شي وگفت السيارة ونزلت جريتهه من ايدهه فتحت باب السيارة وطببتهه بالصدر وسديت الباب ..
انداريت لجهه السايق فتحت الباب صعدت وسديتهه ورايه ..
جانت مكتفه ايديهه وتباوع بغضب وتنفخ زفير بقوة ...
شكو جاي هسه وع شنو نحجي .. صارلك شهرين بتركيا مرتاحه و خلصانه منك شكو رجعت ..
ابتسمت ..
شنو حاسبتلي شوكت ارجع ..
حاسبه ايام سعادتي وراحتي ببعدي عنك ..
اهااا هيجي يعني ..
ماردت ولاباوعتلي اصلا ..
تذكرت المحامي ..
احاجيج .. هذا محاميج شفته بسيارته طلع من المستشفى جان جاي عليج ؟؟
سكتت مجاوبتني .. تباوع ليكدام بغضب ..
مو دا احاجيج ؟؟
شرايد ..
سألتج جاوبيني ..
اي جان جاي علمودي ..
تعصبت .. هي هي .. وشيريد الافندي ..
اجه يخطبني ..
شنووو ..
احترگ جد جدي وهي تجاوبني ببرود ..
اي شنو شنو ..
وانتي شجاوبتيه ..
شجاوبته يعني .. غير اتطلگ واخلص من الي عندي ياله اتزوج ..
شبيت للستار ..
وج همسسسس همسسسس .. بعدج ع ذمتي ومحضرة رجل حته تتطلگين منا تتزوجين منا ..
محضرة رجل شنو .. اني شكو .. غير هو اجه خطبني ..
علساس اوديهه لبيت اهلهه نتغده سوة واستعين بعمي يساعدني يقنعهه ترجعلي بس بعد الكلام الي سمعته هسه لاااا غيرت رأيي وغيرت طريقي ..
سكتت عنهه وهي هم سكتت ..
ورة شويه كالتلي ..
هذا مو طريق بيت اهلي .. انت وين ماخذني ..
التفتت عليهه بابتسامه ..
لبيتنه ..
يابيت هذا ..
مو بيت اهلي لتخافين .. اشتريت شقه وراح نروحلهه هسه ..
حمزة رجعني لاهلي ماريد اروح وياك ..
استأذنت من والدج احجي وياج واقنعج ترجعيلي وهو كيف ..
حتلو استأذنت اني ممواقفه ارجعلك ..
ميهم ..
ادري هو غصب ..
اي غصب ..
رجعني حمزة ..
ماحجيت ولا رديت عليهه ..
ترة اذب روحي من الباب رجعني ..
قفلت البيبان مال السيارة وماهتميت لكلامهه ..
كملت طريقي لبيتنه واني نوعا ما مرتاح وهي هم ايست وسكتت بعد ماحجت ..
خلت راسهه ع الجامه وغمضت عيونهه ..