هنا

[ملكةه]

البارت 11
همس .. خلصت دوامي ورجعت للبيت ..بيت اختي هاله هي وزوجهه اخذوني ببيتهم لان ابويه من تمرض بسببي وبسبب اختي امي كامت تأذيني وتحملنه مسؤوليه وگعة ابويه ولان جلنار ببيت رجلهه مستته فالضرب والكتل والاهانه كولهه صارت براسي ..
امي من بعد وكعة ابويه هي الي استلمت زمام السيطرة على امور البيت كولهه وامي عدهه نوع من القساوة مو مثل ابويه صح يضرب بس بي حنيه ..
حته رادت تبطلني من دوامي بس هاله ماقبلت وزوجهه هو الي حجه ويه امي ياله قبلت ياخذوني فترة يمهم بين متهدأ الاوضاع ..
البيت هدوء دخلت جانت الساعه قريب الاربعه ..
جهال اختي ببيت اهلي لان جايين من دوامهم وصاير حادث حمزة واني مموجوده بالبيت فذابين اطفالهم ببيت اهلي ورايحين للمستشفى ..
راسي صاير هالكبرة ..تعبانه وجوعانه ..رحت بدلت ملابسي وصبيت لروحي غده وكعدت اتغدة ع مهل ..
آكل بس اشبع بطن مو واهس ولا بالي يم الاكل اصلا ..
احس واهسي بالحياة راح ..احس كولشي حلو بيه ماات ..
صرت مثل شجرة بفصل الخريف اوراقهه تصفر وتوكع ..
كلما توكع ورقه من هالشجرة الي تمثلني ينسلب شي مني ..امل او روح او قلب او ضحكه او راحة بال ..
اشياء هواي ..ماكدر احجي عنهه ولامسموحلي احجي بيهه خانكتني ..
كون الگالي شخص غريب واسولفله كوول الي بگلبي افرغ كولشي ويروح لحال سبيله لايعيرني ولايرزلني ولايحكم عليه حكم مسبق ولاينظرلي بنظرة مو حلوة بس يسمع ويروح ..
كملت اكلي وطبيت لغرفتي الي هي غرفة اطفال اختي ونمتلي ساعه ..
كعدت ع صوت احد بالغرفه ..
حسنين ابن اختي الجبير .. صف خامس ابتدائي ..
هلو خاله ..
هاحبيبي اجيتو ؟
اي بس ماما ..بابا وصلنه ورجع ..
هاا ..
كمت من فراشي طلعت غسلت وجهي ورحت بم هاله الي جانت مبدله وطالعه من غرفتهه ..
ها هاله الله يساعدج ..
هلو بيج حبي ..
بشري شصار ع الولد ..صحى ؟
لا والله عفته بعد فاقد الوعي والطبيب يكول لازم يبقه تحت المراقبه خاف عنده نزيف داخلي ..
اي الله يشفيه ..اصبلج غده ؟
لا متغديه من قبل لا اطلع ..
هاا لعد اسويلج جاي ..
اي والله ياربت تسوين عليه فضل .
اي هسه تتدللين .
رحت سويتلهه جاي دقايق وصار جاهز صبيتلهه كوب الهه والي واجيت جبته الهه ..
تشرب وتسولف ..
امه خطيه هم وكعت ضغطهه مرتفع ومشكل وياهه بدايه جلطه وهاي ولدهه الكبار والرجال الجبير حاروا بين امهم واخوهم الصغير ..
اي الله يگومهم بالسلامه ..
.................... 1
علي .. وصلت للمستشفى نفسهه الي طوني عنوانهه وكالولي اخويه حمزة مسوي حادث بيهه ..
حرت بين امي الي تخربطت عليه وبين اخويه المسوي حادث وماعرف عدل ولا ميت ..
بالف ياعلي ياله وصلت للمستشفى وكبل دخلت امي للطوارئ صاعد ضغطهه الا شويه جان شكلت وياهه جلطه لحكت عليهه اخذوهه مني بسرعه وتلاحكولهه بادويه وفحوصات ومغذي ينزلون ضغطهه ..
ظليت يمهه واني الوج اريد اوصل للاستعلامات اسال عن حالة اخويه ..
جنت كاعد يم امي بين ميخلص المغذي وتستقر حالته دگ تلفوني ..
وخرت البرده دا اطلع ارد ع تلفوني بمكان بعيد حته لا ازعج امي شفت همس گبالي ..
تقاجأت ..
هاي اول مرة اشوفهه بعد ذيج الليله ..
احساسي .. ماعرف احس بالذنب
تجاهه ..اكثر وحده انظلمت .. جلنار بقت يمي ومحد داسلهه ع طرف ..حته عقوبتهه ضربتهه مرة ريحت كلبي منهه بس عنادهه وضحلي عقوبتهه مو بالضرب بس همس اتبعوا هالاسلوب وياهه ضرب واهانه وطرد ورادوا يبطلوهه من دوامهه لوما يتدخل ضرغام وهاله اختهه الجبيرة ..
اكثر شي اذاهن تجاهلهن وطردهن من بيت اهلهن هو هذا يمكن اقسى عقوبه الهن ..هنا البنيه تحس نفسهه عاريه بلاستر بلاسند بلا ظهر مستباحه ..مسلوبه حقوق واراده ..شي يكسر اكبر راس ..
نظرات عيونهه تحجي عتب واحراج واستعطاف ..
لحظات وصحيت من الي جنت افكر بي من سكت مبايلي من دگته الاولى ورجع دگ مرة ثانيه ..
هي اطتني ظهرهه وطلعت واني رديت ع فوني ..
اخويه حسين ديخبرني انو هو وحيدر والوالد صاروا بالمستشفى وطمني ع حمزة ..عايش ..بس بالعنايه المركزة تحت المراقبه لان لسه مصاحي ..
سديته منه حمدت ربي اخويه عايش ..
رجعت لامي ..نايمه متدري بالدنيه ..وصيت عليهه الممرضه ودفعت فلوس يديرون بالهم عليهه ورحت اشوف حمزة ..
وصلت لقسم العنايه المركزة ..
ميسمحون لاي واحد بالدخول لان مرضى محتاجين هدوء ..

شفته من الشباك الزجاجي ..
اخواني ثنينهم موجودين وابويه كاعد وضرغام وهاله ..
التفتت سلمت ..سألوني ع امي كتلهم زينه عفتهه نايمه حطولهه محلول ملحي ينزل ضغطهه ..
كتلهم وين مكانهه وراحولهه ..
شويه وضرغام وزوجته ترخصوا يطلعون ..ضرغام يوصل زوجته للبيت لان اطفاله من الظهر يم بيت جدهم ومدارس عدهم باجر ..
كتله معذور وكالي يرجعلي بالليل ..
راحوا ..
اتصلت ع آيه لكيتهه متصله هواي ومافاتح عليهه خط ..
خابرتهه طمنتهه ع امي وع حمزة .. كتلهه تدير بالهه ع نفسهه و، تكمله بارت 11
وع جلنار ويقفلن الباب ..
ماعرف اليوم ابات هنا لو ارجع للبيت زين لو بتت منو يبقى يمهن بالليل بنات وحدهن بالبيت لازم ابويه يرجع للبيت ميبات هنا زين شيقنعه ..
واكف وصافن وحسبه تجيبني وحسبه توديني ..تفكيرات كوومه وراسي يوجعني كاعد من الفجر ومنايم الظهر ..
كعدت ع الكرسي ..تجيت راسي ع الحايط غمضت عيوني ..
ماحسيت بشي ..يمكن نمت واني كاعد من الهبطه والركض والتعب ..
ماعرف شكد مر من الوقت بس حسيت واحد دغني ..
اخويه حيدوري ..
كعدني كال صحى حمزة ..ايييي الحمدلله ..
كمت ع حيلي ..باوعت من الجامه صاير دنيا المغرب ..
اخواني واكفين برة الغرفه مال الانعاش والطبيب جوة ديفحص حمزة وديشوفه يستجيب لو لا ..
سالت ابويه وين ..جاوبوني بعده يم امي ..وهي شلون صارت ..صارت زينه هسه ديجيبهه ويجي لان خبروهم حمزة استعاد وعيه ..
طلع الطبيب ..ع وجهه نظرة ابتسامه مريحه ..طمنه .. الحمدلله حمزة بخير عدا كسر ايده وكتفه ..نزيف داخلي ماكو ..
شويه وينقلوا لغرفه خاصه ماكو داعي للانعاش بعد ..
اجتي امي ساندهه ابويه تحمدنالهه بالسلامه ..
طبت هي وابويه شافوا حمزة واتطمنوا عليه ..
ورة نص ساعه حمزة طلعوه لغرفه خاصه ..
جان تعبان ووجهه بي جروح وخدوش ومورم من الضربه ..
جابوا عشه ماتعشيت رحت كعدت بعيد ..جنت تعبان كولش ..
اخويه حيدوري كالي ارجع واحنه الليله نبات يم حمزة ماكلت لاء ..
اخذت امي بالكوة لان مقبلت ترجع بس لان مريضه مخليناهه تبات ويه حمزة ..
حيدر وحسين بقوا يباتون بالمستشفى واني اخذت امي وابويه رجعت للبيت ..
وصلنه البيت جان هدوء بس ايه بغرفتهه وطلعتلنه تسأل عن حمزة وتلگت امي سندتهه ودخلتهه لغرفتهه ساعدتهه تبدل ملابسهه وتحاول تنام وتستراح وابويه كذلك ..
اني صعدت لغرفتي .. لكيت جلنار نايمه ..
ماسويت صوت طبيت سبحت وطلعت لبست ملابسي بالغرفه ..
طفيت الضوة وذبيت جسمي ع الجربايه حيييل منهك ..
حاولت انام بس جوعان ممتعشي ومن اجوع ماكدر انام بس يمكن من التعب غمضت عيوني وغفيت ..
جلنار ..
ظلينه اني وايه وحيدنه بالبيت لليل علي ماقبل لا اني ولا ايه نروح للمستشفى وكل شويه ايه تتصل وتطمئن ع حمزة وع وضع خالتي ..
صار الليل قريب الساعه 10وشويه تقريبا سمعت صوتهم جوة ..
ذبيت ملازمي رغم ماجنت مخلصه ماده ..وعندي امتحان وبديت اقرة متاخر وماكو واهس وهو منين يجي الواهس بعد الي صار اليوم بالبيت انكلب كلاب خطيه حمزة ميستاهل صح قليل يتواجد هنا بالبيت بس هالاوقات القليله ماشفت منه غير كل خير اجتماعي وضحوك وحباب ..
صفطت ملازمي وسويت روحي نايمه ..سوايته بيه الصبح مانسيتهه اله ..
دخل للغرفه باوع ع جهتي نايمه ..مسويه روحي نايمه ومتغطايه ومخليه مجال قليل اباوع منه شديسوي ..
لان شافني نايمه مراد يطلع صوت ..دخل سبح وطلع بالشورت الداخلي ..
شكد ميستحي ولو هو متعود هيج ..غمضت عيوني ماريد اشوف ..
لبس ..شويه وطفه الضوة ..واجه نام بفراشه دقايق ونفسه انتظم ..
حاولت انام ..مو بس ممكمله مادة الامتحان همين جوعانه متعشيت مسوينه عشة ..
تحركت ع كيفي ..اخذت ملزمتي وتسحبت من فراشي ونزلت جوة ..
فتحت ضوة الهول هدوء البيت كولهه نايمه ..
كعدت اقرة ..
مرت ساعه ..جعت كولش ..
رحت للمطبخ فتحت الضوة ..
شسوي شسوي ..فتحت الثلاجه ..
اكو تمن ومركه مضمومات من الظهر ..مو مال هسه اطلع مركه فاصوليا بنص الليل اكلهه ..
فتحت الفريزر اكو بورك مثلثات ..اييييي احبه ..اشتهيته ووياه زلاطه وطرشي ..يم يم حبييييت ..جنت احجي بداخلي .. نفسي مفتوحه ع الاكل ..
طلعت البورك سديت باب الفريزر شفت راس طلعلي من ورة الفريزر جفلت ..
لزمت كلبي .. رجعت ليورة
الله الله اسم الله شبيج ..
رفعت راسي ..هذا علي ..
خزرته ..
ع كيفج شنو شفتي جني ..
بعدهي ايدي ع كلبي وكلبي دكاته تقرة الف دكه من الخرعه ..
سديت باب الثلاجه ووخرت عنه ..
احس من الرجفه الصارت بيه رجليه بعد متشيلني من صدوك انهبطت ..
شسوين هنا بهالليل ؟
مارديت عليه ..
رحت طلعت الطاوة ..
مو احجي وياج ..
ظليت مطيته ظهري ..
دارني من جتفي بعصبيه اله ..بحركه مفاجئه ..

جان يحجي بصوت ناصي بس بعصبيه ويكز ع اسنانه ..
زعلج خليه بغرفتج بس هنانه من احاجيج بكل احترام تجاوبيني ماشتغل عندج اني ..
خاف عبالج حلوة واحبج وانزل راسي الج علمود حاجتي لا والخلقج من هاللحظه اذا يظل اسلوبج هيج وياي تحرمين عليه مرة واني منا وهيج اعرف شلون اتصرف وياج ..
مو ناقص بعد زعطوطه ..ومو بحالج افتهمتي؟
هد جتفي بعصبيه ودفعني ليورة ..
راح كعد ع ميز الطعام ..يتنفس بقوة ..صوت زفيرة عالي ..
ينفخ الزفير من خشمه بقوة وكانه ديدخن ويذب نفس الدخان بحرگه ..
وعضلات فكه بارزه تصعد وتنزل ..
اذا دتسوين عشه احسبي حسابي وياج ..
گالهه بصيغه امر ..
التفتت بديت اگلي بالبورك .. سويت زلاطه طلعت طرشي وخبر حميته ..
حطيت الاكل ع الميز ..مو وكت زعل ميته من الجوع كعدت اكل بهدوء وهو همين ..
الحمدلله شبعت وهو كام يغسل ..غسلت مواعين ورجعت كولشي لمكانه ..
كلمه وحده ..كالي ..چاي ..
كمت سويتله جاي كعد يشربه واني رحت للهول رجعت اقرة ..
هو كام غسل كلاصه وطفه ضوة المطبخ واجه وكف بباب الهول باوعلي ..
مارفعت راسي اله ..ظليت اقرة او تحججت بقرايتي والا فهو نظراته تربكني ماتخليني اركز ..
ظل واكف شويه .. بعدين صعد فوك لغرفته ..
ارتاحيت شويه تحررت من تاثير نظراته ..
ظليت اقرة للساعه ب 1
قفلت بعد ماستوعب ..
صعدت لغرفتي ..
لكيته بعده كاعد ..فاتح نت ..
طبيت طفيت الضوة ونمت ع الجربايه طيته ظهري ونمت ماحسيت بعد ..
ثاني يوم الصبح كالعاده گعدت ب 6نزلت حضرت ريوك وبلشت احضر بالغده خالتي كعدت مالهه خلك تحجي وعمي موجود ..
الظاهر يريدون يطلعون للمستشفى بس يتريكون وايه كاعده وتساعدني وعلي همين كعد ..
كوليتنه تريكنه ..
علي كاللهم راح تروحون للمستشفى ؟
عمي جاوبه اي ..حته اخوانك يرجعون خطيه البارحه عايفين بيوتهم وبايتين يم حمزة ..
كال لعمي .. بس اوصل البنات يقصد عليه وع ايه ..
بس اوصل البنات للكليه والحگم ..
عمي كاله ماكو داعي تجي كمل دوامك واتغدة وتعال ع راحتك ..
لايابه وصيت يسوول وصيت يسوولي اجازة لتشيل هم ..
ع راحتك يابه ..
كملت تركيب وفضينه سفرة الريوك وصعدنه نبدل وعلي سبقني ونزل جوة ينتظرني ..
خلصنه سوة اني وايه ونزلنه ..
علي جان قافل ضايج يمكن علمود اخوه ويمكن من ورايه ..
وصلنه للكليه والتفت عليه كالي من تخلصين محاضرات روحي ع ايه واتصلوا عليه حته اجي عليكم ..
هزيت راسي اي وعفته ورحت لقاعتي ..
شفته طلع واني فتت اخذت محاضراتي ..
بنهايه الدوام دكيت عليه رفضني ..
دزلي مسج ..ربع ساعه واجي روحي يم ايه ..
دزيتله اوك ..
رحت لايه ..
جانت هي هم مخلصه محاضرات ودتنتظرني كعدنه سويه شويه ودك علي ع ايه ..
خابرهه كللهه نروحله للكراج ..
رحناله ..
سلمت ايه .. اني ماسلمت .. صح معذورة بس ميمنع اسلم بنظرة او اشيل ايدي بس ماسويتهه وايه مانتبهت ..
صعدت ايه بالصدر واني ليورة وظلت تسولف ويه عليه ع وضع حمزة وسالته ع امهه وهو يطمنهه ..
اني جنت كاعده ليورة ومكاني ورة السايق ..
جنت تعبااانه ونعسانه ..
حطيت راسي ع الجامه .. احس روحي مسلوبه صايرة ادوخ من الطريق ..
اهم مابحديث ايه وعلي عرفت انو خالتي بالمستشفى يعني من ارجع ما الكاهه ..
قررت اول ما ارجع انام لان علي بس يوصلنه يرجع ..
صدوك وصلنه وراح للمستشفى واني كبل لغرفتي بدلت ملابسي وبوجهي ع فراشي ..
بس حطيت راسي نمت محسيت بشي بعد ..
همس .. كالعاده اجيت لدوامي .. وصتني هالة ادير بالي ع عيال اختي واشوف شمحتاج مريضهم مجامله يعني ..
اول ماوقعت وبصمت للدخول استلمت شغلي بمكاني المعتاد ..
اجه الطبيب المناوب لازم اكون تحت ايده من يمر ع المرضى ..
بالممر وصلنه لمرضى الجناح الخاص لان عيال اختي حجزوا لابنهم غرفه خاصه فالعنايه والاهتمام بهذوله المرضى يصير اكثر ..
دخل الطبيب جنت وياه واهل المريض داير مدايرة اني سلمت ع امهم اعرفهه وع الوهم والولد بس كلت السلام عليكم لان ماعرفهم ..علي مجان وياهم ..
حمزة جان كاعد ..
بس دخل الطبيب طلعوا همه من بعد ماطمنهم ع وضعيه حمزة الصحيه ..
الطبيب فحصه ضغط نبض النظر والاستجابه للضوة وحركه بؤبؤ العين ..
الكسور يرادلهه ع الاقل 3اسابيع او شهر ياله تلتئم اما الجروح والخدوش الي بالوجه اسبوع او عشرة ايام تروح .
المفروض اداويله جروح وجهه مجرد تعقيم وتغيير ضماد لجبينه عنده جرح مخيط بهالمكان ..
جنت اشتغل وهو عيونه مني احسه مستغرب ..يمكن مستغرب الشبه البيني وبين جلنار ..
يمكن ميعرف او ممستوعب انو جلنار عدهه اخت توأم الي هي اني ..
ظليت اشتغل بهدوء وهو عيونه مانزلهه مني ..
تضايقت من نظراته ..
باوعتله واني دا افتح ضماد جرح جبينه ..
اذا مستغرب الشبه بيني وبين زوجة اخوك فاكولك اني اختهه التوأم ..
فتح عيونه ع وسعهن ..
اي والله صح عدهه توأم ..شلون فاتتني هاي ..
مصار شي ..
جاوبته ببرود واني اعقم الجرح ..
عقد حواجبه ع اكثر ديتألم ..
ايدج عافيه ..
ابتسمت ..بسرعه مسحت الابتسامه من وجهي ..متأذي ويكولي ايدج عافيه .. اجت ببالي الكلمه المنتشرة ع نطاق بين الشباب والبنات ..زااحف ..
نظراته بقت مركزة ع وجهي تتفحصني ..
يعني هو جان عذرة يباوعلي لان مشبه عليه هسه عرف اني منو بعد شنو هالنظرات الجريئه ..
جنت بحكم احتكاكي اقترب من وجهه حته اعقم جروحه ..وهو جان ينفخ الزفير حار يلفح وجهي ..
بس ابد مرفعت عيني بعينه ..
خلصت شغلي وضربته ابرة بالكانوله ..
سالني لشوكت راح اظل هنا ..؟
ماعرف اسأل الطبيب ..
خلصت شغلي وطلعت ..
من طلعت شفت علي جاي ببدايه الممر ..شافني ..عرفني ..صار المشي مالته بطئ من بعد ماجان يمشي بهمه ..
قويت نفسي وماباوعتله ..كلت ماغير طريقي لازم اواجه ..
اذا يسلم ارد السلام اذا ماسلم عادي اني هم ماسلم ..
وصل لي يمي گال ..صباح الخير همس ..
صباح النور ..
وگفت ..
باوعتله وكأنه نظراتي تكوله كولشي انتهى مابقه بگلبي اثر الك ..ماريد يبقه هالارتباك بيناتنه كلما نلتقي ..ماريد احد يحس اكو شي بيناتنه ..هه ..كلامي يضحك ..هو اصلا مجان اكو شي بيناتنه ..اني بس الي جنت احبه ..وجنت ماضي راح وانتهى ..
شلونج همس ؟
بخير الحمدلله ..
ظل ساكت وواكف ..
الطبيب هستوة طلع من يم اخوك ..
اي وشلونه ؟
الحمدلله ماكو نزيف داخلي بس كسور شهر ويصير زين .. عقمتله جروح وجهه وطيته علاجه وهسه ع اكثر نام لان علاجه منوم ..
اهاا عاشت ايدج ..
تدلل .. من رخصتك عندي شغل ..
مرخوصه ..
عفته ورحت ..
مشيت بثقه ..ابتسمت لنفسي .. حسيت نفسي انتصرت باول مواجهه بيني وبين علي من بعد ماوعدت نفسي انو الي صار ماضي وراح ولازم حياتي تستمر واني استاهل الاحسن ..

[ملكةه]

البارت 12
همس .. بقه حمزة بالمستشفى تقريبا 4او 5ايام باليوم الثاني اني جنت خفر وبنفس اليوم علي جان دورة يبات ويه اخوه بالمستشفى لان قبلهه بليله اخوانه الكبار حيدر وحسين همه الي باتوا ويه حمزة ..
فهواي مواقف جمعتني بعلي ..بس موقف عن موقف شعوري تجاهه جان ديموت ويتلاشى شوي شوي وجنت احس بالقوة بداخلي رغم الالم الي يعصر قلبي ..
ماستسلمت ولانقاديت ورة مشاعري وخليت عقلي هو الي يقودني ويتحكم بكولشي يخص علي من لقاءاتي بي لطريقه كلامي وياه لشعوري تجاهه ..
ما انكر الشعور مؤلم لان شوفته كل مرة وكانه احط ملح ع الجرح .. لكن شوي شوي ديهون ويقل ..
ذيج الليله الجنت بيهه خفر يمكن جانت من اصعب الليالي المريت بيهه وهي جانت نقطه التحول بحياتي ..
جان كلامي ويه علي عادي واحاول ما انطخ بي او اتواجد وياه الا بحضور حمزة لان دائما المواقف الي جمعتنه بغرفه حمزة ..
اما حمزة فهذا بحث اخر ..ذب ميانه وياي لان اني اخت زوجة اخوه ومن انطيه العلاج او اغيرله المحلول الملحي او الكانوله عينه ابد ميشيلهه عني ..
احس يريد ياكلني بنظراته ..
صح اجتماعي ورغم الحادث ضحوك يحشش ويه امه واخوانه وكرايبهم الي اجوه يزوروه ووجهه بشوش بس احس نظراته اليه بيهه وقاحه وصلافه بس مو جرأة ..
دائما يريد يفتح وياي موضوع بس وجود علي يضايقه ويمكن يستحي منه لان اني اخت زوجته ..
اني خليت نفسي ع وضع التغليس والاستغباء حته نظراته ماباوعله ابج ولا اشيل عيني اله ولا احسسه انو اني منتبهه عليه ديباوعلي ..
شعور بالخوف تملكني .. احساس انو احتمال يصير شي من ناحيه حمزة تجاهي ..
الفكرة بحد ذاتهه رعبتني ..
مرّ يومي بخير وسلامه وخلصت دوامي ولان خفر ظليت لثاني يوم الصبح ..
الصبح بصمت وطلعت للبيت ..بيت اختي ..
واستمرت ايام دوامي واني مجبورة اتواجد يم المريض بسب علاقة العائلتين حته. هالة وضرغام ماعافوا حمزة ..
اصلا مجانت غرفه مريض جانت فندق من كثر الزيارات كرايب واصدقاء شباب وتخشيش وضحك بصوت عالي كل شويه يجي ابو الامن ينبههم .
هاي من غير جنت باحتكاك مستمر ويه عائله حمزة خاصه ام حمزة الي شلون اني اموت عليهه من ايام الخطوبه .. اقصد خطوبه اختي وهي مو طايقتني ..اقصد مو طايقه اختي بس من شافتني دايرة. بالي ع ابنهه شويه لانت وتحسن اسلوبهه وهمين تعرفت ع زوجات ولدهم حيدر وحسين سما وبراء كولش حبابات جانن هنه عليهن الاكل لان حمزة ميحب اكل المطاعم ويكره اكل المستشفى فجانن يطبخن اكل صحي حسب تعليمات الطبيب ..
باليوم الخامس طلع حمزة .. خلصنه ..بالنسبه الي عبالك هم وانزاح لان 5ايام جنت بضغط نفسي شلون اتصرف وشلون احجي ..متقيده حيل ..
بس جلنار ابد ماشفتها ..مااجتي للمستشفى ..
جلنار ..
5ايام علي لاهي عني باخوه حمزة ..ماخذ اجازة من دوامه ع كد ما يوصلني اني وايه للكليه ويروح للمستشفى والظهر هو يرجعنه ومرات يتغده ويانه ويرجع للمستشفى ..
وع 3ليالي عافني وحدي ..هو بات ويه اخوه بالمستشفى ..
من اول ليله بتت وحدي بيهه بالغرفه خفت ماكدرت انام ممتعوده وحدي ..
فاول ليله ظيت اتكلب وماكدرت انام للفجر بحيث ثاني يوم الصبح سحلت روحي سحل للدوام وثاني ليله همين هيج صار وياي وعيوني من اكعود الصبح منفخات مورمات علي عباله باجيه ..
لح عليه شبيج .. كتله دا اخاف وحدي بالغرفه ..مدا اكدر انام وهيج عيوني من قله النوم ..
ضحك هو براحه ماعرف شنو افتهم من كلامي بعدين كلي يعني ..ارق عندج لو خوف لان اول مرة اعوفج تنامين وحدج بالغرفه ..
اني فهمت قصده وماردته يفرح ..
فكتله ..لا ارق ..
لعد ليش مانزلتي يم ايه تنامين ..
استحيت كلت خاف نايمه واكعدهه خطيه ..
بنفس اليوم وداني علي للطبيب ..مراجعه روتينيه للطبيب نفسه الوداني اله ذيج المرة وسولفله علي ع الارق صارلي 3ليالي اني هيج ..
فاطاني دوة منوم بس بالليل علمود يساعدني انام ورجعنه ..
ومن طلع حمزة من المستشفى اضطريت اهمل دراستي ..من ورة الخطار كرايب واصدقاء وتعب وعزايم ع سلامة حمزة ..
تعب مو طبيعي ..
بحيث يجي الليل اصعد لغرفتي ساعه 9اكول اخذلي ساعتين قرايه احسن من ماكو من افتح المحاضرات انام عليهن من التعب واكعود ثاني يوم الصبح اسحل بروحي سحل من الفراش ..
مر اسبوع وبدت الزيارات والرجل تخف علينه شويه ارتاحينه نوعا ما ورجعت لدراستي ..
حمزة تحسن هواااي بس بقه كتفه وايده يمكن فد اسبوعين او اكثر ويوخرون الجبس مالتهن ..
مسويلنه جو بالبيت بالشقه والضحك والتحشيش وتقربت اكثر منه وعلاقتي بي صارت اخويه حلوة بحيث صار هو اقرب حمويني اليه وعمرة مقارب لعمري يمكن اكبر مني بسنتين او 3 ..
حته حيدر وحسين مثل طبع حمزة ومن ينجمعون تلاثتهم يصير الضحك بفلس وعلي هم ينكت ويضحك بس مو حشاش مثلهم همه حدث ولاحرج ..
وعلي بالنسبه الهم شويه عقده وميتحاجه ..بس اني ماشوفه هيج اشوف طبعه حلو سلس وسهل التعامل رغم خبييث..
تكمله البارت 12

ويحاول يفرض نفسه وسيطرته عليه حتلو بالقوة ..
مرات يضوجونه ويسألوني شلون متحملته ..اني بعدني ماكدر انطق بس بكلبي اكول لااا مو لهاي الدرجه شويه ينجرع .. بس هو لان موبيدي اجاوب وماكدر احجي يضوج يمكن ميحب احد يقلد عليه او يستصغرني مع العلم همه والله متعاطفين ويه حالتي ومداريني وابد ممحسسيني اني بيه شي نقص بس يبقى الشعور بالنقص بداخلي وبداخل علي ..
اتمنه اطيب وارجع احجي ..تعبت من هذا الشعور وتعبت من نظرة الشفقه الي اشوفهه بعيون الناس عدا عمتي الي بعدهي تتقصد تذلني بعدم نطقي من غير نظرة الاستحقار الاشوفهه بعيونهه وكانه اني مو كد مقامهم العالي ..العالي بس الله ..
حاولت اقرة بعد الغده .. رحت للحديقه كعدت ع المرجوحه مكاني المفضل ..
ظليت اقرة للمغرب ..دخلت غرفتي ظلمه عبالي علي نايم بعده ..
فتحت الضوة لكيت الغرفه فارغه ملكيت احد تذكرت هو يروح لمكتبه العصر ..
قريت شويه بغرفتي وانتظرت الصلاة تصير حته اصلي وانزل اسوي العشه فد مرة ..
وهذا بالترتيب الي صار ..
وكت العشه اجه علي ..دخل وكعد يتعشه ويانه بملابسه ..
خالتي الحمدلله مموجوده رايحه لبيت اختهه هاي عادة ابد متبطل منهه وحمزة صبيناله عشه من وكت علمود علاجه وفات لغرفته من زمان ..
عمي مسافر كالعاده ممتواجد ..
ظلينه بس اني وايه وهسه انضم علي النه ..
جنه ناكل بهدوء ..بس العيون تحجي ..كلما اصد صدفه الكاه يباوعلي ..
نظراته جانت عاديه عبالك تعبان او موضوع شاغل باله ..
يعني جان يباوع وياكل بس باله لايمي ولايم الاكل هيج استنتجت ..
الايام الفاتت كولهه اتبع وياي اسلوب التجاهل ..
صار مينطخ بيه ابد داخل الغرفه ..الضحك والشقه بس كدام اهله ومن نصعد لغرفتنه يذبهه سايلنت واني اصلا من كاعي سايلنت ..
آيه فد استكان جاي ..
اني جنت مكمله عشه گمت حطيت الجاي ع النار ..حضرت الاستكانات والتفاصيل هاي ..
بين ميصير الجاي كامت ايه غسلت المواعين واني نظفت الكاونتر وعلي جان مركز ديكلب بمبايله ماعرف شبي اليوم ..
قدمتله الجاي وصعدت لغرفتي اكمل دراستي وحطيت ببالي ب 10هيج انزل اسوي غده باجر علمود ترضه عليه مرة عمي ..!!!
دخلت غرفتي ..
صح تلفوني موجود عندي بس ع طول مشمور ع ميز التواليت ماتقربله ومن اتقربله بحضور علي .. مو هو هيج راد بس اني هيج اسوي لان حتلو تزوجته غصب عني بس يبقه زوجي وماريد يشك بيه علي مجرد شك انو ممكن اخونه ..مهما يكون شي اهون من شي ..
اهلي منقطع اتصالي بيهم ..امي مرات تتصل ع علي تتطمن علينه وع اوضاعنه واخبارنه بصورة عامه .
بس متريد تحجي وياي واني همين خايفه من المواجهه بعد الي سويته ..بس تبقه امي اشتاقلهه ..
تواصلي مستمرويه هاله وهي الي تطمني ع اهلي اما همس فعلاقتي بيهه منقطعه تماما ..
دائما اسأل عنهه واحاول اتصل بيهه بس مترد تكولي هاله مشغوله تعبانه نايمه دوام ..هيج مجرد اعذار ..اني اعرف همس رافضه تحجي وياي وتتهرب مني بس الى متى ..
المفروض اني اتهرب منهه ع الي سويته بيهه وع الموقف الحطيتهه بي ..دا احاول اعتذر منهه بس مدتطيني فرصه ..
هي اخذت العقوبه اضعاف اضعاف من ابويه عني وعنهه لان اني بعيده ..
يمكن وجودي ويه علي ع الرغم من كل الي سواه بيه ارحم لان وضعهه وصلت بي الحاله انو ابويه بعد ميستقبلهه بالبيت فاخذتهه هاله لبيتهه حته تبعدهه من بطش ايد ابويه ..
مستواي الدراسي ديتنازل ..مالي واهس اقرة كرهت الحقوق ويراد وقت طويل ادرس لان يحتاج درخ واني ماعندي هلكد وقت ....
علي وجوده يشوشلي تفكيري .. يفقدني تركيزي ..
اكره قربه وبنفس الوقت بُعده يحسسني بعدم الامان لان امه كلامهه سم معايفتني بحالي ومرات من تحجي وعلي موجود هو يردهه ومرات ثانيه يسكت ويظل يتأفأف ومرات يكولي اصعدي فوك ومن اصعد يرزلني ع تقصيري بالشغل او باي شي ثاني امي مقصرة بي ..
صار 4اسابيع ع زواجي ..
تقريبا شهر يعني ..
علاقتي باهلي منقطعه ..روتيني نفسه ..بيت شغل دراسه ودوام ..
حالتي كما هي متحسنت ولا رجعلي النطق رغم راجعت الدكتور مرة ثانيه ونفس الكلام ..
خالتي زادت بالمغثه والكلام ..صارت تصيحلي الخرسه ..
علي دوم اعصاب لان مدا اتحسن ..
الظاهر الي بيه حالة نفسيه لاني من النوع الكتوم يعني من انغث من احد لو اضوج ما احجي ولا ابجي فالكتمان اذاني فقدت النطق ..
من اخذني علي للطبيب اكد ع هذا الكلام انو هاي طبيعتي والي صاير صدمه نفسيه تعرضت الهه واستجابه جسمي وعقلي لهل صدمه هو فقدان النطق ..
وكالي اطول ياله استعيد نطقي وحته التحسن يصير ببطئ ..
علي ماقتنع بكلامه واخذني لطبيب ثاني ماتغير شي نفس كلام الدكتور الاول ..
يمكن لهذا جان عصبي او يمكن الاحراجات الي اتعرض الهه بالبيت من امه او بالجامعة خلته عصبي او يمكن شعورة بالذنب يخليه هيج يتصرف ..
صار يعتني بيه يطلعني يغيرلي جو بس اني استسلمت ..
صرت الخرسه ..انكساري واضح ..

[ملكةه]

البارت 13
ثاني يوم الصبح كعدت ..اكو شي بداخلي قلق وخوف واشتياق كل هالمشاعر للاهلي ..خوف من المواجهه واشتياق الهم ..
نزلت حضرت الريوك .. البيت جان كوله نايم وعلي هم ..جهزته وصعدت اگعد علي ..
ندهته .. گعد ..باوعلي ..كتبتله .. صباح الخير گوم تريك ..
رد عليه ..هلا ..
وهز راسه ..اي هسه جاي ..
بس يحجي بثكل من ورة خشمه ..عرفته زعلان او شايل عليه من كلامي وياه البارحه ..
نزلت وهو كام غسل ونزل ورايه ..
گعدنه نتريك ..كالي ..
هسه بس تخلصين ريوك تكومين تبدلين ..نروح لاهلج قبل اهلي حته تشبعين منهم علمود نرجع سوة لان اهلي يتأخرون ياله يروحون للعزيمه ..
هزيت راسي اي وفرحت ..
كملت الريوك وبقيته لان محد متريك ..
صعدت ابدل وعلي صعد وراي ..كملنه طلعنه ..تلاكينه ويه امه حاچاهه بأتفاقنه وافقت ..ركبنه السيارة ورحنه للاهلي ..
الطريق كوله اقرة ايات متوترة ..خايفه ..
وصلنه ..نزلنه ..دكيت الباب وابتعدت ..حس علي بخوفي .. صرت وراه ..التفتلي .. باوعلي نظرة مطمئنه ولزم ايدي ..
تگاودنه ..فتح اخويه حسام الباب ..
استقبلنه ..سلم سلام حار ع علي وعليه همين ..جانت ابتسامتي خجوله وبخوف مثل واحد مسوي مكسورة ويعرف بنفسه راح يتعاقب وحان وقت حسابه ..
مانطقت ولاحرف واصلا وين اكدر ..
فهمه علي انو اني مريضه وماكدر اسولف ..
مثل الضاج عليه وانقهر حضني مرة ثانيه بشفقه وحنيه طبطب ع ظهري تطييب خاطر يعني ..
دخلنه استقبلتنه امي ماستحملت هديت ايد علي وسرّعت خطواتي عليهه وهي تهلي وتمرحب بعلي ..وصلت الهه حضنتهه ماحضنتني ..
بجيت بحضنهه تقرب منعدنه علي باس راس امي ..
كاللهه ..خاله صغيرة وغلطت .. بصوت ناصي لان حسام لساته جان واكف يم باب المطبخ ..
بجت امي ..
اخويه حسام كال .. هاي شنو يمعودين شو صار بيهه بچي ..
رد عليه علي گاله ..مو خطيه صار شهر ممتشاوفات مشتاقات وكذا ..
ضحكوا ودخلوا ..
بس دخلوا دفعتني امي وتفلت بوجهي وكفختني بغمه ..
انصدمت عبالي رضت عليه .. صوفرت .. بكلبي كلت اذا ردة فعل امي هيج لعد ابويه شلون .. ظليت صافنه ..
غلطت عليه هواي غلط واخير شي ختمتهه ب .. اهمداج وغمت نفسهه .. واهمده هالبطن الشالتج ..
بس مو صوجج صوجنه احنه دللناج وخليناج ع راحتج واخير شي استهترتي ونزلتي راسنه وسودتي وجوهنه ..
علي ابن اوادم ستر عليج وع اختج ..متستاهلينه مدري شلون بقاج ع ذمته ..بس شحجي وشكول حظ ادبسز ..اكيد حظج كاعد ..
الماكلتهه اختج الثوله الغبيه صارت مكفخه ومداس لابوج الى ان شردتهه لبيت اختج ضرغام الله يطيه العافيه تدخل واخذهه لبيتهم ..
وهذاك ابن عمج النزلتي راسنه علموده خطب صارله اسبوعين خطب بنت خالته وطلع يحبهه يالعوبه يالمضحك ..
امه تتباهه بابنهه وبنت اختهه شلون زوج لايكين شلون صخام وعزة بعينج وعين اختج ..
عيوني غوشت رجليه صارت خيوط ماعاد تحملني لزمت الحايط صرت اشوف نجوم والدنيا سوده ماشوف شي ..
افترت الدنيا بيه .. گلبي .. سجينه ودجوهه بي .. آآآخ ..كفخات ..معقوله ..كعدت بالكاع ..غمتني امي وطبت ..
طلعتلي هاله جانت جايه لبيت اهلي علمود العزيمه وهم تساعد امي ..
طلعتلي كومتني وبوستني وغسلتلي وجهي واديه وشربتني مي ..
دخلت المطبخ شفت همس كاعده رغم من بدايه دخولنه للبيت واحنه واكفين بالطارمه جنت اشوف وحده تشبه هيئتهه كاعده بالمطبخ فكلت هي همس ماكو غيرهه بس هي ابد ما اجتي لي يمي ومن طبيت رفعت راسهه باوعتلي وبعيونهه نظرة عبالك متشفايه بيه ..
بعدين عافت المطبخ وطلعت ..
الظاهر صدوك الي صار كوله تمثيل كدام علي وكدام عيالي ..لان همس اجتني ورة السبعه مالتي لبيت عيالي ويه هاله بس ماشوفتني هذا الوجه ..
هنا ..اليوم ..هالساعه وقت الحساب والوقت مو دائما كفيل بالنسيان الحساب لسه باوله ..
مرات لابد من المواجهه وتفريغ كل الي بداخلك تجاه هذاك الشخص حته تبدي تتقبل الي صار وتسامح ..اي نسامح علمود نرتاح بس احنه مو اطفال علمود ننسه الي صار وبحكم احنه كبار يمكن نحقد ونكيد ويمكن ماعرف شنسوي اكثر بعد ..
كالتلي هاله ..
مارجعلج صوتج ..؟
هزيت راسي ..لا ..
دفوتي حبيبه فوتي سلمي ع ابويه واستسمحي منه بلكي من يشوفج هيج مريضه ومتكدرين تحجين ينكسر خاطرة عليج ونفتك ونخلص من المصايب ..
اخر 3كلمات كالتهه هاله بنفاذ صبر ..
فتت للاستقبال .. رحت بخطوات متردده سلمت ع ابويه بسته بخده بدون كلام حسيت ببروده تجاهي ..
عيوني تباوعله بخوف ومتأمله منه رحمه وحنيه وعطف عليه ..
هو يباوعلي بعتب شكله تعبان .. دمعت عيوني ..تمنيت اكدر احجي واتعذر منه الف مرة ولا هالنظرة الي بعيونه ..خيبت امله وخنت ثقته بيه .. شكد كرهت روحي بهاللحظه ..
سلمت ع بقيه اخواني جانوا موجودين محمد وبسام ..
طبيت للهول سلمت ع نسوان اخوتي واطفالهن .. نرجس زوجة حسام جانت راجعه وسلامهه ثكيل وياي ..
ماهتميت شلي غرض بيهه ..
امي جرتني ع صفحه .......

أعرف ..جنت مغرورة وعنيده يمكن بعد بيه عناد بس غروري راح وخشمي العالي هم راح ويه نطقي ..
صرت اگوم واگعود وكلمه الخرسه متنزل من لسان خالتي ..ابنيلهه انو ما اهتم ..بس الى متى اتحمل ..يمكن هاي بحد ذاتهه عقوبه عادله لذنبي ..
يمكن هاي العقوبه الي جان يتوعدلي بيهه علي ..
صرت اتمنه الموت اليوم قبل باجر ولا هاي الذله ..
الدفتر والقلم صار رفيقي ماكدر بدونهم ع طول بيدي ..
علي من بعد ذيج المرة ابد بعد ماتقربلي بس ميقبل انام بغير مكان غير سريرنه ..
مرات اگعود الصبح الگاه حاضني بحجه نايم وميدري بروحه ..
ولان عصبي اتجنبه دائما .. بس من اعانده يبوسني ..
باي مكان يعجبه ..
هاي عقوبته لعنادي ..ماعرف شنو الهدف منهه بس من بعد اول ليله ماستخدم الضرب وياي ابد ..
يمكن كملنه شهر ع زواجنه او هيج شي ..
جنت ببلكونة غرفتي ..هناك احب دائما اگعود والجو بده يدفه وحلو بدايه شهر الثالث ..
دخل علي للغرفه صاحني ..
بس يعرف اني بالبلكونه دائما ..يضيعني يلگاني هناك .. اجاني ..
هلاو ..
رديتله السلام بيدي ..
خو متعبانه ؟
هزيت راسي لا ..
اليوم خميس .. خلي نطلع ماروح للمكتب اليوم ..
عقدت حاجبي كتبتله .. وين نروح ؟
گالي ..نروح اي مطعم نتعشه برة ..
بسرعه رديت عليه كتابه ..
لاماريد اروح ..
واني صدوك من بعد ما فقدت النطق صرت ارفض اطلع لاي مكان ..
ماريد تصير بيه مواقف محرجه كدام الناس ..
كافيني احراج الولد والبنات بالجامعه ..
الطلعات الوحيده الي جنت انجبر اروحلهه هي روحة الطبيب وهنه لو 3مرات رحنه لو مرتين ..
ومرة رحت لبيت اختي هاله عزمتنه ع غده ..
من جاوبته هيج ضحك ..
خله اديه بجيوبه گالي ..
امممم ..جيد .. الظاهر مشتاقتلي ..
عقدت حواجبي بعدم فهم ..للحظه لحظه وبس مافهمت معنى كلامه بس من طخت براسي شهكت فتحت عيوني ع وسعهن ..
وهو كمل وحاصرته الضحكه ..
اي وين تريدين البوسه ؟
اجت ع بالي العقوبه .. من اعانده يبوسني ..!!!
ظليت صافنه بوجهه وهو مبتسم منتصر ..ابتسامه جانبيه مستفزة الي ..
كتبتله ..
دقايق بس ابدل ..
عفت دفتري وطفرت من الكرسي ..
ضحك بعلو صوته ..
هههههههههه ..غيرت رايهه ..
اخذت ملابسي ورحت للحمام ابدل بعدني استحي ومابدل كدامه ابد ..
سمعته يدردم ..
هسه اني شحجاني ..مو جنت حستفاد ..خرب بعقلك الا تحجي ..

ضحكت ع عقله وتفكيره ..
طبيت بدلت وهو هم بدل ..طلعنه ..بالطريق فتح اغاني هادئه حلووة ..
بالي يم كلمات الاغاني حلوات ومسامعتهن قبل ..
وداني لمطعم هادئ ع الكورنيش ..حسيت هدوء بداخلي ..بصفاء ..من اباوع للمي وهو يجري شعور حلو .. مريح نوع من الاسترخاء ..
صدوك غيرت جو وجنت محتاجه هيج شي ..ماضايقني ابد ..عيونه ع المكانات الي تجذبني واباوعلهه مو يراقبني بس مثل الي يحاول يفهمني ..
تعودت ع وجوده بحياتي ..
طلبنه اكل ..مشويات ..وقبلهه وصلت المقبلات ..اني اكلت بنهم وبس من المقبلات شبعت عبالك واحد جان حابسني وفك سجني هيج انفتحت شهيتي للاكل ..
خلصنه دفع علي الحساب وكالي ..امشي نفتر ..واذا بنفسج شي او محتاجه شي ناخذه ..
جاوبته كتابه .. ممحتاجه شي ..
جان يجبرني الزم ايده ويخزرني من اوخر ايدي من ايده ..
يضايقني صراحه من يجبرني ..
متعوده كولشي ع هوايه بس ويه علي لا ..
والطامة الكبرى ميضربني يبوسني ..
يمكن لو جنت احبه وعقوبة عناده بوسه يمكن كل شويه اعانده حته احصل بوسه بس هو خبيث مشيطن هو المستفاد ويمكن عباله من يسوي هيج وياي اكوم احبه ..
ميدري اني اكرهه ..اي اكرهه ..
حرمني من اهلي ..شصار لو متزوج اختي وساكت ..وهي تحبه ..
كولشي وياه يمشي بالغصب والاجبار ..
واحنه دنمشي دگ تلفون علي .. منو .. امي ..
جرني وكفنه ع الرصيف ع صفحه ..
فتح خط .. فتح سبيكر ..سمعت صوت امي ..من شهر مسامعه صوتهه ..سلم عليهه وسلمت ..
حنيه بصوتهه ..تحاجيه مثل متحاجي محمد لو حسام لو بسام ..
دموعي نزلت لا اراديا مشتاقتلهه ..
عزمتنه ع الغده باجر ..اني وعلي وعيالي هم ..وكالت مخابرة خالتي ومبلغتهه من العصر ..
ختمه وياهه ..مسحت دموعي ماخليته يشوفني ابجي ..كافي ذله وانكسار ..
ظلينه نفتر .. مادري ليش ضجت بس احس ضوجتي الهه تبرير منطقي ..
حقدت ع علي ..هي امي آني .. ليش تتصل عليه واني لاء ..مو كافي ..جفاءهم وتجاهلهم الي كان اكبر عقاب اليه ع الي سويته ..
يمكن امي لو مرزلتني وضاربتني اهون من شعور الهجر والحکران والاهمال الي دا احس بس هسه ..
كلامه يدوگ براسي ..صدوك تمنيت بذيج الليله اروح ويه ابويه ومابقه ويه علي ..هلگد مشتاقتلهم وميته ع شوفتهم ..
كتبتله ..علي رجعني للبيت ..
ليش ؟
تعبت ..
ماحجه شي ..رحنه للسيارة ورجعنه للبيت ..دخلنه ..البيت هدوء ..
عمي وحمزة دائما مسافرين وخالتي وآيه ع طول يم بيت خالتهم ..
طبيت غرفتي ..بدلت ملابسي وتمددت ع السرير ..
علي بدل وتمدد يمي .. رأسا صديت طيته ظهري ..شايله هم باجر ..
افكر شلون راح اتواجه ويه ابويه وامي ..خايفه ..ومتضايقه من علي وحاقده عليه مو شون مجان ..
ظليت اتگلب ..
شبيج متنامين ؟
التفتتله ..يعني كاعد مانايم ..
كتبتله ..ماكو شي ..
لعد شبيج تتكلبين ؟ اهلج وباجر حتشوفيهم شنو الشاغلج بعد ؟
ظليت صافنه ع وجهه ..
شبح ابتسامة صارت ع وجهي طردهه وگلي ..
صافنه عليه ..معجبه لو مضيعه شي ..
حسيت ع نفسي صديت وجهي عنه ..تقرب يريد يحضني ..دفعته ..گام گعد ع حيله ..
ها رجعنه للصد ؟انتي ماتوبين ؟
كتبتله ..تعبانه واريد انام ..
صارلج ساعتين تتكلبين مانمتي ..
كتبتله ..الله واكبر حته وقت النوم تحاسبني عليه ..
عدلي اسلوبج وياي جلنار ..ماشتغل عدج اني ..
شبي اسلوبي ؟
ماعندج احترام ..وسبق وكتلج الميحترمني ادوسه برجلي ..
كتبتله ..كلامك مالة داعي اني ممقلله احترامك ..
اوك اذا هيج حقوقي الزوجيه اريدهه ..
انتفضت ردت اگوم لزم ايدي وجرني ..
صارت عيني بعينه ..هزيت راسي ..ماكدر ..
تعرفين بيه من تعانديني شسويلج ..
كتبتله ..اضربني ولا تتقرب مني ..
قرااهه بقه صافن عليه مثل المصدوم ..
لزمني من جتفي بقوة ويهز بجسمي قوي ويحجي ..
هلگد كارهتني ؟
حاقدة عليك مو شون مجان ..من وراك صرت خرسه ..امي اني تحاجيك وتتصل بيك واني صارلي شهر لاتقبل اشوفهه ولا احجي وياهه كوله من وراك ..
اتمنيت اكدر احجي جان كل هذا الكلام گلته اله بس خرسه ومن الله ظليت مخرسه ماكدرت ارد وانطق بشي ..
ماستحملت وماردت ابجي كدامه گمت عفته مالحگني ولا منعني اكوم ..
طلعت برة الغرفه ظليت بالممر اشهگ بقوة ماريد ابجي خاف احد يسمعني ..
من كثر ماكتمت البجي الشهگه كامت تخنكني .. اريد نفس .. اريد هوا ..احس مختنكه ..
شهگاتي علت ..فتح باب الغرفه وطلعلي ..مديت ايدي قصدي يبتعد عني بس هو اخذ ايدي وجرني دخلني للغرفه ..
ماعرف شيريد يسوي ولا ع شنو ناوي .. كعدني ع الجربايه وجابلي گلاص مي ..شربت شويه .. وشوي شوي راحت الشهگه ..
شلون صرتي ؟
هزيت راسي ..زينه ..
نامي ارتاحي ..
اخذ الكلاص مني خلاه ع الميز ..طفه الضوة وطب بفراشه واطاني ظهرة .. ظليت كاعده اباوع لظل ظهرة بعدين اني هم تمددت وماحسيت بنفسي من نمت .. ..

[ملكةه]

البارت 14همس ..انتي مو اختي وماريد بعد لساني يطخ لسانج ..
خاف عبالج اجيتج لبيت عيالج لسواد عيونج .. خاف عبالج نسيت الي سويتيه بيه ..
ترة اجيت مجبورة .. هاله جابتني غصب ..وماردت اكسر كلمتهه لان كاعده ببيتهه وماكله من خيرهه ومن وراج ..
اكلت طن كتل من ابويه من وراج ..
وهسه من عرفوا اخواني هم اني الي انضربت وانتي عندج الي توكفين بظهرة ويحميج ..ظهر علي زوجج ..
علي الوهمتيني متريديه .. علي الخليتيني احبه ..
جلنار .. هي تحجي بعلي واني ماتحملت كلامهه عن علي ماعرف شنو الي دا احسه بالضبط بس علي الي مالتي وماسمح لاي احد يجيبه بالطاري ..
صرخت عليهه ..
اشششش كافي اسكتي ..
ماسكت ..ماسكت ..مو بكيفج تسكتيني ..
كولشي حطيت عيني عليه اخذتيه مني .. شنو من بشر انتي ..شنو من طينه ..
ظليت صافنه مصدومه انعقد لساني ماعرف شحجي وماعرف شجاوب ..
عبالك هاي مو همس نفسهه الي اعرفهه ..
وحته زواجي ..هم راح يصير غصب عني .. يعني مراح ارتاح ..الله لاينطيج دمرتي حياتي ..ولي اطلعي برة ماريد اشوف وجهج ..
ظليت صافنه ساكته مشدوهه ..گامت عليه دفعتني فتحت الباب وطلعتني وسدتهه بوجهي ..
ظليت واكفه بالباب صافنه .. سمعت صوت جوة الظاهر عيالي وصلوا ..
رحت للغرفه الثانيه نزعت شالي چان مسحول سحل من راسي ومبهذل وشعري همين ..
رتبت شعري ومشطته ورجعت لبست شالي لفيته لفه مرتبه .
عدلت ملابسي ووجهي عدلتله المكياج خدودي حمر اثار ضرب واصابع ..
طلعت من الغرفه نزلت جوة سلمت ..كولهم كاعدين بالاستقبال ..
علي وعمي ابو علي وحمزة وآيه وخالتي وهاله وضرغام واخواني تلاثتهم ووجوهم مايكصهه الطبر يخزرون بيه خاصه حسام بس ابويه وجهه بشوش يمكن لان فرحان بكلام علي خاصه من طلب منه الاذن علمود يخطبون همس لحمزة ..
ماعرف شلون خطر ع بال علي هيج يسوي وهو يدري امه متقبل وتريد تزوج حمزة لبنت اختهه .. احس روحي بمتاهه .. خبطت كولش وماعرف شنو تاليهه
..
ظليت انتقل بين الوجوه .. امي گدامهم تحجي وياي واسلوبهه عادي بس من نكون وحيدنه لا تكلب عليه ترجع زعلانه مني ..
گعدت يم آيه وهاله نسولف ..
كولهه تحمدتلي بالسلامه علمود صوتي وخالتي ذبت حجايه بما معناه انو اني جنت اتصنع المرض حجه علمود ماشتغل وادلل ويداروني ومن شفت اهلي بعد ماكدرت اكمل ..
ظلوا صافنين اهلي عليهه خاصة امي يمكن متوقعتني مرتاحه ممتوقعه هيج اسلوب ام علي وياي ..
شفت عمي خزرهه وعلي كسر حجايتهه وكال .. هي جلنار بمرض وبدونه تدللل ..
اني ابتسمت مجامله لكلامه ..
احس بعد الي صار وبعد ماعرفوا اخواني الگعده كولهه مجامله وعبارة عن تمثيليه ..
بس مهم نستمر بهالتمثيليه حته عيالي ميعرفون لان اذا عرفوا يطيح حظي حرفيا .. 17
شويه وانسحبنه للمطبخ نكمل طبخ الغده ..
ظلت كلما تنفتح باب الاستقبال يصير گبالي علي مرات اشوفه يباوعلي منتبه عليه ومرات لاء ..
اني صرت اركز بي شلون من يسولف يأشر .. اله حضور وكاريزما حلوة تخلي المقابل غصبن ماعليه ينصت اله ويسمعله بانتباه ..
نزلت همس من غرفتهه ومالهه علاقه بيه ..
آيه تضحك تگولي الله يساعده لعلاوي شلون يفرق بيناتجن ..
هي حجت هالكلام ببراءة واني وهمس وحده باوعت للثانيه وبعيونه الف كلمه ممگيوله والف عتب من غير نظرات همس الحاقده عليه ..
لو اگوللهه الف مرة آسفه ماتقبل مني اعتذار ..
صبينه الغده .. صارت گعدتي يم علي ..لازم هيج .. كدام اهلي واهله خاصة .. داريته من باب الذوق ..
جنه ناكل ويطخ عكس ايده ويه عكس ايدي ومن اناوشه شي خبز لبن او مي تتلامس اصابيعي ويه اصابيعه عنده يمكن عادي بس اول مرة احس بهيج احساس .. بلمسته جلدي يكزبر انتفض يهتزن جتوفي وابرد لحظات ويروح الشعور وكأنه كهرباء تسري بجسمي لحظات ويروح الشعور ..
همس طول الوقت منصيه تاكل مارفعت عينهه رغم علي چان گبالهه ..شي بداخلي ماعرف فضول غيرة ندم ..هالشي بداخلي .. شعور بالتملك يمكن .. احاول اعرف همس لسه تكن مشاعر لعلي لو لا ؟؟
ماوصلت لجواب .. گلبي يسأل ويجاوب بكيفه عبالك يتخبط ..
حمزة جان موجود گاعد وايده بعدهي موتمام مجبرة من يوم الحادث لحد هسه ..
جنت اشوف عيونه ع همس ..
يباوعليهه وينصي وهي ابد مو يمه حته من بعد ماعرفت هو الي راح يصير خطيبهه .
كلام علي ببالي ..الاسبوع الجاي يخطبون همس لحمزة ونظرات حمزة والاهتمام بهمس ..
يمكن كلام علي ماطلع بشكل عفوي او متسرع يمكن جانوا متفقين عليه هو وعلي ..
بس وخالتي شلون راح يقنعوهه ..
ظليت اكل وافكر بحسبات تود

توديني وتجيبني ..
خلصنه اكل وشلنه السفرة وابتلينه بالمواعين اني وهمس بس ماكو اي كلام بيناتنه ..
هالة سوت جاي واطته للولد قدموه ..
كولهه تشكرت من امي ع هذا الغده والطبخ الطيب وامي فرحت حييل ..
خالتي عدا ذاك كلامهه سلمت من لسانهه باقي اليوم .. اشوفهه تضحك وتسولف ويه امي وزوجات اخواني ..
بس نرجس ظلت طول اليوم معتكفه بغرفتهه 8
تكمله بارت 14
جحيمي وناري
معتكفه بغرفتهه بعد الي سوته ..
علي .. آيه اجتماعيه ومرحه حييل واشوفهه صادقت الخوات تلاثتهن همس وهاله وجلنار وحاطتهن وتكص وتفصل بالعالم ..
انتبهت ع حمزة عينه من همس ..
بس هي ابد مارفعت عينهه ولاانتبهت ع احد ..
همس وجلنار ثنينهم گبالي ..
عيوني وعقلي لااراديا گام يسوي فروقات بين الاختين التوأم ..
عدا الشامات .. اي الشامات ..
شامه بباطن الايد وشامه ببدايه الصدر ثنينهن عد جلنار .. همس اضعف من جلنار ويمكن هالشهر ضعفت ..
عيوني تحاول تركز بعد اكثر شنو الفروقات ..عبالك ادور لنفسي سبب وعذر ليش وشلون هيج انخدعت اني بهذني المخلوقتين ..
ماكو غير الشامات ومو اي واحد يكدر يلاحظهن ..
حته اللبس والحفافه وصبغ الشعر نفس اللون ونفس البشرة بس ارجع واكول وجه همس تعبان اكثر رغم مخليه مكياج بس مبين عليهه التعب ..
لحظات حقدت عليهن .. ماكو فرق بيناتهن .. عذرت نفسي ..تخطيطهن كارثه .. مو غباء الي صار ..لا استهتار وصلافه وجحيمي وناري هي العقل الشيطاني المدبر ..
للحكايه بقيه ..
البارت 15
#جحيمي_وناري
علي .. عيون حمزة راح تفضحه ..بداخلي فرحت ..يمكن مراح يتعبني انو اقنعه نخطبله همس .. تبقه امي هاي المعضله شيقنعهه هو اني گوة طفرت من بنت خالتي، حمزة شلون بي ..
طخت براسي فكرة لسه دا مخمخهه بعقلي بس الافندي فد مرة فاضح روحه ابو ايد مكسورة ..
هو بعيد عني ومو گبالي ..
كنكت ودزيتله مسج ..
علي ..ولك عيونك فضحتنه ..
الظاهر هو هم مكنك ..
حمزة ..هاي منو عليه ؟
علي .. لا ع امي ..
حمزة .. ولك شلت حالي شل ..هسه غير تباوع ..
علي .. ولك شتباوع اخوانهه تلاثتهم كاعدين ..
حمزة .. اي ميخالف هسه بس خلي ترفع عينهه مرة وحده ..
علي .. يا اخي المن تباوع .. اشو اجكم املح حارگتك الشمس ..
حمزة .. انجب عساس انت شلونك .. مو زين جلنار باوعتلك وقبلت بيك .. بوس ايدك وجه وگفه لان گلبتك جلنار .
صدوك ضحكني كلامه ..شلت عيني .. صارت عيني بعين جلنار ..
جانت تباوعلي باهتمام وفضول رافعه حاجبهه عبالك تريد تعرف ع شنو دا اضحك وويامن ومنو ديحجي وياي ..
غلست ..قررت اتجاهلهه اني هم ..
بس عجبني الشعور انه ممكن تغار عليه ..
حمزة .. هسه شلون ياربي اريد اشوف العيون .. باع البياض ياالله ..والخشم مرسوم رسم .. ياويلي الاصابع تنكرط گرط ..
علي ..يول كأنك دتتغزل بمرتي ..
حمزة .. ولك انت سگط شلون تحجي هيج ..
علي .. اي غير هنه توم .
حمزة .. اي ..
علي .. نخطبهه الك ؟
دزلي هذا السمايل الفاتح عيونه وراهه كتبلي ..
حمزة .. الله ويدك .. ياريت .. عود تقبل بيه ؟
علي .. حير بأمك اول ياله تحير بالبنيه تقبل بيك لو لا ..
حمزة .. اي والله دبرني .. شلون بأمي وهي قافله ع بنت خالتي ..
علي .. دا مخمخهه الك براسي هسه .. اليوم مانطلع من بيتهم الا وحاجزيلك البنيه ..
حمزة .. الله عليك علاوي ؟ ولك تحجي صدوك ؟
علي .. متشاقي وياك قبل ..؟ بس اثگل شبيك مشايف بنات ..
حمزة .والنبي شايف وكولهن يزحفن ويلزگن .. بس هاي ولك ماترفع عينهه بعيني ..
علي .. يا اخي مو بحالك هي گوة اجلح املح شتباوع منك جهرة شكل مندله ..
حمزة .. اي والنبي مو بحالي ..
حمزة .. شلون والحل ..دبرني ..
علي .. الحل والربط كوله يم الوالد ..
حمزة .. فهمني شلون شنو الوجبه ؟
علي ..دشوفهم شلون فاتحين مواضيع سياسيه ومتوالمين وواحد يكبس وواحد يرفع .. عبالك توم صايرين ..
ابوك يحب هالسوالف وعمي همين .. يعني لو حاجينه ابوك هسه نطلب بتهم حتلو بس يطونه حجايه وبعدين تجي الزلم تتفق راح يگوملك يرکص بالجفيه لان حيناسب التوم مالته ومنا وهيج شدوا روسكم ياکرعان .. كل جمعه كل مناسبه كل عزيمه يصير برنامج الاتجاه المعاكس بس هنا شنو ثنينهم نفس الراي ونفس الاتجاه ..
صفن حمزة ..ضرب دالغه يباوعلي ..
حمزة ..چنك جبتهه ..
علي ..لعد شعبالك ..قابل مثل مخك المجيم ..
علي .. بس هاا كولشي بسعرة ..
حمزة .. خادم اني ورگبتي سدا

بس خلصني من بت خالتك .. تأمرني انت وتدلل عليه بعد ..
علي .. سيارتك الاوباما ..
حمزة .. شبيهه ؟
علي ..ارييدهه .. اتكشخ بيهه ..اخيك ..استاذ وجامعه وبنات لازم يعني لزوم الكشخه ..
حمزة .. بنات هااا .. مو ترة افتن .. اگول لجلنار ..
علي ..ياريت بلكي تغار العينتين .
حمزة .. البنيه فقيرة لاتلعب بذيلك .
علي .. انجب لك مالاعب بذيلي .. اريد اضوجهه بس .. اريد اشعل نار الغيرة جواهه .. مو تزوجتني يعني هاهيه طمغتني بالشمع الاحمر .. لا. لازم تحس البنات داير مدايري واني رجال مرغوب من النسوان ولازم تداريني ..
حمزة .. ياااا يااابه كل هذا كاتمه بكلبك .. عندك جفاف عاطفي بعد اخيك .. ههههههههه ..
علي .. تضحك عليه ولك .. مو شغلتك لسه يمي ..
حمزة .. لايمعود دخيلك .. سكتت سكتت بعد ما احجي ولا اضحك .. تووووبه .
ورة شويه حجيت ويه والدي بصوت ناصي انو يفتح الموضوع ويه ابو جلنار انو ناوين نتقدم لبنتهم همس نخطبهه لحمزة ع سنة الله ورسوله .. حته اذا صار قبول رأسا الاسبوع الجاي تجي مشيه الزلم وماكو داعي لجيه النسوان .
ابويه ماجذب خبر بس گتله فرح ورحب بالفكرة .. اعرف تجاوزت امي وشورهه وميصيرهيجي وراح تسوي علينه عززة مو بس مشكله من تعرف بس بنفس الوقت هذا احسن حل خاصة امي راغبه لبنت خالتي وحمزة مارايدهه والي فادني ابويه هم ميحب ازواج خالاتي اربعتهن شلع ولايحب يناسبهم يحسهم عدهم رس طمع بينه ..
يعني اذا مو ناديه تاخذ علي لعد رفل تاخذ حمزة (ناديه ورفل بنات خالاتي الي طيرناهن من ادينه علامة امي )
ماعرف هي مشاعر لو مخططات واتفاقات بين الامهات المهم حلالنه ميروح لغيرنه ..
المهم .. سولفت لابويه وابويه ماصدگ بعدني گاعد يمه وفتح الموضوع ويه عمي وعمي بحكم الي صار قبل شويه كلامي وياه وبحكم مطينه مرة يعني مناسبينه وسائلين علينه ويعرفون اخلاقنه شنو وسمعتنه شنو فرأسا رد ع ابويه گله .. گبع واخذ حجي والنعم منكم ومن نسبكم ..
آني ابتسمت براحه ودنگت ..
سمعتهم يتفقون ع المشيه وگالوا اسبوع
تكمله بارت 15
#جحيمي_وناري 9
الجاي مشيه الزلم ..
حمزة جان بعيد ..
دزيتله مسج .. البشارة ..
ردلي ..
الاوباما الك حلالا بلالا وفوگاهن بوسه .
كتبتله .. اييييع ماريد البوسه .
حمزة .. احجي ولك شنو البشارة فضني ..
علي .. خطبنالك المحروسه واسبوع الجاي مشيه الزلم ..
گمز حمزة من التخم ..
كولهه انتبهت عليه .. راد يتلافه الموقف ..
كولهه صاحت ..
الله الله شكو شصار ..
حمزة وجهه كام يطي الوان عمي واخوان المرة گاعدين .. كام يمتمت ويتلعثم ويباوعلي واني گوة كاتم الضحكه حاصرتني ..
اخير شي نطق حمزة ..
ماكو شي بس حسيت شي گرصني يمكن زنبور ..
آني خربت من الضحك بعد ماتحمل شنو من عذر هذا ..
گتله .. وشجاب الزنبور يمك ..
خزرني .. حته اسكت بس اني ظليت اضحك ..
وردت اطمطمهه اله کدامهم ..
هاا خاف لان كاعد يم الشباك بجوز اكو شباك مفتوح ودخل الزنبور من الحديقه ..
يايابه صار وجهي احمر اختنكت من الضحك ..
اي يمكن هيج .. جاوبني ..
دزلي مسج .. احلف ..
رديتله .. وداعتك .. سمعتهم اتفقوا ابويه وعمي وعمي گاله گبع واخذ .. اني لو منك هسه اجيب سيد واعقد عليهه .
حمزة .. بشرفي خوووش فكرة .. اگوم اجيب سيد هسه ؟
علي .. ولك خبل اکعود راحه واثگل هو احنه بس حجزناهه الك هيجي گمزت من التخم وتصيح زنبور گرصني اذا تعقد شلون شسوي ..
حمزة .. ههههههههه اجيب ساجده عبيد ونردح للصبح .
علي .. ترة البنيه ثگيله مو مثلك ..
حمزة .. توالمني معليك انت .
علي .. عمي مبروك ماحجينه شي .
ورة هالاخبار الحلوة شربنه چاي مهيل من ايد خالتي ام جلنار وترخصنه منهم ..
اخواني الكبار جايين ويه زوجاتهم كلمن بسيارته وتوادعنه بباب بيت عمي وراحوا رأسا كلمن لبيته وابويه اخذ امي وآيه وحمزة للبيت ..
اما اني وجلنار صعدنه السيارة واخذتهه مشوار .. للكورنيش ..بمعنى اصح شردتهه وشردت وياهه من البيت ..
امي لسه متعرف خطبنه همس لحمزة واهلهه وافقوا .. بس تعرف فشلت مخططاتهه انوتزوج وحده من بنات خواتهه لواحد من ولدهه بين قوسين لاخر ولدهه العزابيه راح تصير مشكله الهه اول ماالهه تالي واكيد اني وجلنار راح ناخذ نصيبنه من هالموال كوله ..
لذلك اخذت جلنار وابتعدت عن جو البيت .

[ملكةه]

بارت 15 ويا بارت 14

[ملكةه]

البارت 16
علي .. وگفت السيارة يم الكورنيش .. طفيتهه .. دقايق ساكتين .. نباوع ليكدام ع المي شلون يجري برهاوة .. هدوء حلو ..
التفتت عليه جلنار شكم مرة .. حسيتهه تريد تحجي شي ..
اختصرت عليهه الطريق وسألتهه ..
گولي شنو عندج ؟
جاوبتني بابتسامه ..
ماعندي شي ..
اعرفج ترة مو تايه عنج اني .
بس .. بس ردت اكولك شكرا .
ابتسمت .. التفتت .. باوعتلهه ..
ع شنو ؟
ع موقفك اليوم .
مسويت شي .. انتي زوجتي .
تنهدت .. تهربت من جوابي بسؤال لاخ ..
ليش اجينه لهنا ..؟
زادت ابتسامتي ممزوجه بضحكه من سؤالهه .. شجاوبهه ..
ههههههه شاردين من امي ..
ابتسمت هي .. وجهه تعبان ومورم .. مبين البجي ويمكن ضرب اخوهه لايح خدودهه .. بس بعدهي بعيوني حلوة .. الورم وحمار الضرب مخلي خدودهه متفحه ..
شلون خاف من تعرف تخرب السالفه .
هي اول وتالي لازم تعرف .. بس مال تخرب السالفه لامتکدر .. اكيد ابويه مراح يسمح بهذا الشي لان الي صار كلام زلم وومعقوله راح يقبل ابويه يتراجع عن كلمته ويه عمي علمود امي .
بس الاكيد انو هسه امي عرفت بالموضوع وصارت مشكله لذلك بعدتچ عن المكان الى حين انتهاء ذروة البركان ..
ابتسمت هي ع كلامي ..
واتمنه من نرجع حتلو امي وجهتلج كلام قاسي لاتردين عليهه .
هزت راسهه .. اي .. بدون متباوعلي ..
منو خبرهم اخوانج ؟
هاله جانت تحجي بالغرفه دتصالحني ويه همس ونرجس زوجة اخويه سمعتهه ونقلت الكلام اله بنفس الساعه ..
لا يا ملعونه ..
تعودنه عليهه .. صح بنت عمنه بس تدور گالات ومشاكل .. صحيح الگرايب عگارب ..
جاوبتهه ..
مو سوة .. الشي الوحيد الي استفاديناه من هاي المشكله كولهه انو رجعلج صوتج .
دنگت تعدل بقميصهه او تتظاهر بهذا الشي .. هي بالاصل غازلتهه يمكن خجلت وع الاكثر تهربت مني ..
تهربت من عيوني ونظراتي ..
جريت ايدهه برقه رفعت راسهه رأسا التقت نظرات عيونهه بنظرات عيوني ..
اشتاقيت اسمع صوتج ..
حاولت تسحب ايدهه مني .. هم تحاول تتهرب ..
قويت لزمتي لايدهه ماخليتهه تفلت من ايدي .. سألتهه .. وعيوني تحجي بهمس قبل لساني ..
ليش تتهربين مني ؟
ردت وشفت رجفه خفيفه بشفافهه ..
ماتهرب .. بس يله نرجع تأخر الوقت ..
وهاي شنو ؟
مو دا اتهرب بس تعبانه وعندي دراسه ..
اهااا دراسه .
سكتت بس مانفذت طلبهه انو نرجع ..
ظليت اباوع ليكدام ..
يمكن ظلينه ربع ساعه ساكتين وصافنين ع المي ..
اتعجب ع اصرارهه شگد عنوديه .. مشايف بحياتي احد مثل عنادهه ..
هاي لان كتلج مشتاق لصوتج لهيج ظليتي ساكته ؟
لا .. بس ماعندي كلام احجيه وياك ولسه ممتعوده .
شفتهه ابتسمت وكملت كلامهه ..
اني هم ممصدگه رجعت احجي ..
كل شويه وادور ع دفتري وقلمي اريد اكتب ولهناك واتذكر اني رجعت احجي ..
ههههههه يومين وتتعودين ونرجع نسمع العد والصف مالتج والحجي الصلي والمرادد هاي من غير العناد ..خو مانسيت شي ..
هاي اني جنت هيج ؟
هزيت راسي .. اي ..مبتسم وكملت كلامي ..
اذا احجي كلمه ترديني بعشرة .
رفعتلي حاجب وركزت نظرهه عليه وانمحت الابتسامه من وجهه ..
اممممم دنشاقه يمعوده .. عوفي هالوجه العبوس ماصدگنه ضحكتي شويه لاترجعين تقفلين فكيهه عاد .
شنو بنفسج ؟نشرب شي .. عصير او تريدين موطا ؟

هههههههه والله مبين عليك شارد من البيت .
هههههه والله اذا هسه اهلج عزمونه ع عشه اروحلهم ركض حتى لو تصير مكافش هم اروح اهم شي اشرد من بيتنه .
جنت اتشاقع واحاول اضحكهه .. صدوك ضحكت ع كلامي ..
اول وتالي ناكل رزاله ..
آني بله العقل المدبر للسالفه انتي شكو وتترزلين .
اني اخت العروس .. اكيد راح اطلع اني الي مقنعتك تاخذ اختي لاخوك علمود نكوش ع امبراطوريتكم ..
رفعتلهه تك حاجب ..
اهاا هيجي الحجي يعني .. بس تدرين خوش خطه .
ياخطه قصدك ؟
انو انتي واختج تكوشون ع كولشي .. علامتج امبراطوريتنه ..
هم صدوك .. بس انتو املاكم لاشي بالنسبه لعمي الراس الجبير ..
صح دنتشاقه بس للحظات استغربت من اسلوب شقاهه وياي ..
اي صح هم مفكر بيهه هاي .. ابوج عطل نطلگ امج منه
ضحكت كالت يمه اسم الله ..
دسمعي .. ونزوج امج لابويه هم حلوة وهمبعدهي صغيرة
ضربتني جلنار ع ايدي عود اسكت واني مستمر بكلامي ..
ونخلي ام حيدر تنجلط ..
ههههههه شلون سوالف عليك .. كون تسمعك خالتي لو ادري مسجله الك الكلام ..
ههههههههه .. يايابه شكد حاقده تسجلين كلامي وتوديه لامي ..
هزت راسهه بضحكه .. اي اسويهه ..
خاينه غدارة مو بيدج ..
عادي اني هم اكوللهه چنتج قرت براسي وقنعتني وهي ابد متصدكني وكلنا في الهوا سوا يحلوة ..
شكد خبيييث .
ظلينه نسولف سوة ونضحك شقه وسوالف تافهه .. حسيت ورة هذا العناد قلب طفله ..
شكد حلوة روحهه بس طبعهه ولسانهه هو العام عليهه ..
صار المغرب طلبنه عشه لفات اخذناهه وگعدنه بالسيارة ناكل ع راحتنه .. المكان ازدحم بالناس يمرون ويمشون وبيهم مثلنه كاعدين نراقب وناكل الهدوء غالب ع الجو داخل السيارة فاتح لايت خف 28
تكمله البارت 16
جحيمي وناري
خفيف واشوفهه شلون تاكل بنزاكه وكل شويه تلتفتلي تعرفني دا اباوع عليهه ..
اليوم شنو ناوي تخلينه نبات بالشارع ؟
لا هسه نكمل ونرجع ..
اوك ..
كملتي انتي ؟
اي شبعت الحمدلله .
ماشي لعد ننطلق ..؟
ننطلق .
شغلت السيارة واتجاهنه هو البيت .. مو اكثر من ربع ساعة وصلنه ..
الوقت متأخر البيت هدوء .. دخلنه ع اطراف اصابيعنه .. كتلهه ..
عدل گبل صعدي لغرفتج ..
تمام .
بس مافاد ويه امي ..
هستوني دا اقفل باب المدخل وجلنار بعدهي ببدايه الدرج وفتحت علينه امي الضوة ..
ها علي .. جاي بنص الليل انت ومرتك تتسحبون چنكم حراميه ..
زفرت بضيق مراح نخلص اليوم رديت عليهه ..
يا امي حراميه شنو .. غير چنه طالعين وتونه اجينه .
اي حظ المسعده .. والمسعده الثانيه الي گوة گوة لطشوهه لابني ..
منو تقصدين يوم ؟
عقجت حواجبي سويت نفسي كولشي مادري ..
انجب انت لاتسوي نفسك ماتدري وراس البله انت ومرتك ..
حصرتني الضحكه بس سكتت .. يعني امي درت بموضوع حمزة وهمس .. گلت هي رزاله واتحملهه ..
انوبينه اندارت ع جلنار الي جانت واگفه ببدايه الدرج منتظرة شوكت يجيهه سرة الرزاله ماعرف ليش ماستغلت انشغال امي برزالتي وصعدت ..
وجهتلهه الكلام ..
وانتي ام وجه الفلس الخرسه .. سووج براسي مرة انتي واختج ..
يمه شنو هالحجي وشناقصهه جلنار وهيج تحجين .
يمه انت وين وهي وين .. هالمبهذله توصل يمك ياعيني ..
باوعت لجلنار من فوگ ليجوة .. بگلبي كلت شبيهه مبهذله البنيه اشو ورده مفتحه ..
جلنار ابد ماحجت ولاردت بس عيونهه كومه حجي بيهه تباوعلي بعتب وحقد ..
اصعدي جلنار ..
ردت امي ..
بعدني ماخلصت كلامي ...
رديت عليهه ..
يمه تعبان واريد انام ماخلص الموشح مالتج ؟
اي طبعا تعبان من التفرفر اكيد ماخلت مكان ماودتك اله ..
سكتت لو اظل ع كل حجايه ارد امي منا للصبح مانخلص مو لسان عد امي الله يسلمهه رشاشه كلاشنكوف ..
صعدت لغرفتي وجلنار سبقتني ..
وصلنه لباب غرفتنه المفتاح عندي مقفوله الغرفه ..
وكفت افتح الباب وهي مدنکه مبين ضايجه من كلام امي ..
حاجيتهه ..
جلنار لاتضوجين من كلام امي ..
وليش اضوج .. تعودت ..
دارت وجهه لهناك وكتفت اديهه وظهرهه ع الحايط .. كملت اني فتحت الباب وسمحتلهه تدخل قبلي ..
هي قبل لاتدخل رفعت راسهه وخلت عيونهه بعيوني .. كالتلي ..
بس الى متى اظل اتحمل ؟
طولت بنظرتهه اليه واني سكتت ماعندي جواب الهه . . بيتي بعده ماكامل ومال اطلعهه بيت ايجار من سابع المستحيلات ماسويهه فلوسي اخليهن ع البناء لاريد مساعده احد ولاامد ايدي لاحد حتلو دين شسويلهه يعني لازم تتحمل هالشكم شهر ..
دخلت ودخلت وراهه .. هي گبل فتحت الكنتور اخذت ملابس ودخلت الحمام اعرفهه تريد تبدل لان ابد ابد متبدل كدامي من تزوجنه لليوم ويمكن تريد تسبح ..
دقايق وطلعت شعرهه مبلل لابسه دشداشه فانيله للركبه وهي جسمهه حلو. لاسمينه ولا ضعيفه والفانيله قماشهه يلزگ ويبرز تقاسيم الجسم بالتفصيل .. بلعت ريگ .. كلت استغفر الله رأسا رفعت راسهه باوعتلي الظاهر گلت كلامي بصوت عالي ومادري بنفسي ..
ضايقتك بشي ؟
لا .

..
ضايقتك بشي ؟
لا .
گعدت تمشط ع الطابوريه .. جنت ابدل وعيني منهه تتفحص جسمهه ع المرايه وجهه رگبتهه .. تشوف اكو آثار ضرب بجسمهه لو لا .. يمكن يأذيهه جسمهه او مكانات منه ..
تقربت منهه .. صارت تباوعلي بالمرايه واني هم تواصلت وياهه بالمرايه ..
يوجعج شي ؟
لا بس شويه تعبانه ..
نامي ..
جانت اضاءة الغرفه خفيفه عندي هذا الضوة ع الريمونت منحتاج نشغل تيبم لامب للنوم بس انصي الاضاءة شويه ..
اي هسه بس اكمل ..
رجعت تمشط .. خلصت اني كاعد ع الجربايه اراقب حركاتهه .. مشيتهه بمهل وغناجه بتعب انحناءات جسمهه الناعم من تنحني تلتقط شي .. تفاصيلهه اجذب ع نفسي لو کلت ما اعشگهه ..
اريد انام ..
وخرت عنهه جنت كاعد بمكان نومتهه ..
جلنار .. خليت راسي ع المخده .. حيل ضجت من كلام خالتي ..
ماعرف احس كل فرحه تصيرلي هي لازم تخربهه بتصرف او كلام يغثني وعلي ساكت ع طول ويكتلني بسكوته وكأنه ممهتم. وكأنه مستمتع امه تعذب بيه .
بالي مشغول .. هواي امور شاغلته .. هواي اشياء صارت اليوم ..
شفت اهلي رغم كولشي صار بس صدوگ اوفيييش ياريحة اهلي وماعرف ليش احس نوعا ما مرتاحه لان عرفوا .. يعني ماعاد مجبورة اضم شي صاروا كولشي يعرفون وتحاسبت ع غلطي ..
او هيج اظن وماعرف شمكتوبلي بالمستقبل ..
تذكرت من اخويه ضربني وسحبني علي گومني وصرت بظهرة وضرب اخويه لان مد ايده عليه ..
شلون حلو من دافعلي ..
حسيت صدوك بظهري رجال ..
حسيت اني صدوك عندي قيمع يم احد ومو اي احد .. يم علي .. وشكد فرحت من رجعلي صوتي ..
وفرحت لهمس من اتفقوا يخطبوهه لحمزة ..
حمزة خوش ولد وخوش نصيب ولا اخيرة ع علي ويمكن احسن منه .. فرحتلهه راح تنتهي معاناتهه ودعيت ربي يوفقهه ..
اخر شي فكرت بي هي خطوبه انمار .. بالاحرى صدفه تذكرت هالموضوع ..
رغم صدمتي من

من سمعته بس هسه واني ع فراشي اخر شي اجه ع بالي .. مااعرف احس مثل ماحبه انزرع بكلبي فجأة انشال منه ..
ماعرف شلون وشنو هالسرعه ومنو الي تربع بكلبي مكانه ..
علي .. جلنار ؟
انتشلني من تفكيراتي صوت علي وهو يصيحني بأسمي ..
همممم ؟
بشنو سرحانه ؟
ماكو شي مهم ..
سألني .. ارتاحيتي من شفتي اهلج ؟
ابتسمت لا أراديا ..شوفة اهلي ووياهه كتله معدله .. هو فهم قصدي رأسا .. كالي .. يعني ماعدا الكتله ..
زادت ابتسامتي .. والابتسامه تحولت الى ضحك ومن بعد ماچنت نايمه ع صفحتي مقابله لعلي الي هم چان نايم ع صفحته ..
انگلبت ع ظهري وآني بعدني اضحك مااحس الاّ وعلي ساحبني عليه ..
جفلت ..
علي !!
مانطق بشي بس حوطني بأيده وقربني عليه ..
عفيه تعبانه علي ..
واني هم .. ماسويلج شي .
هدأت بين ايديه .. خليت راسي ع صدرة براحه ..
ظل ساكت واني هم ساكته ..
رموشج ..
شبيهن ..؟
احس بحركتهن .. شوفي هسه كمتي ترمشين بعينج هواي .. يدغدغن صدري ..
يمه گلبي .. جلدي كزبر من گالي هيج .. كتله ..
اوخر يعني ؟
اعلگج بالبنكه غير ..
هههههه
ضَمني لصدرة حيل اله .. غمضت عيوني .. نمت بعد محسيت بشي وهو هم ماعرف عنه شي بعد ..
17
للحكايه بقيه ..

[ملكةه]

..
البارت 17
جحيمي وناري 7
همس .. من يوم عزيمه جلنار وعيالهه واني حالي من تعيس الى اتعس من بعد ماعرفوا اخواني بالي صار كاموا يوميه يجون لبيت هالة يتهددون عليه يريدوني ارجع لبيت اهلي ماعرف شيريدون يسوون بيه اكثر من الي صار وتحملته ..
كالعاده جلنار طلعت منهه مثل الشعرة من العجين واني وگعت بيهه ..
علي جان هو الفارس المنقذ والحامي الهه .. شكد كرهته وكرهتهه بذاك اليوم ..
شفته حضنهه ويحجي وياهه خايف عليهه .. يعني يحبهه .. اي ليش اوهم روحي بشي مموجود .. اتذكر من جنت وياه چان يدورهه بعيوني ..عبالك يعرف شي او حاس بشي ..
بعده يحبهه الهه بالذات .. يعني سامحهه وعايشين حياتهم بسعاده واني حال الضيم ياحالي ..
مو غيرة ولا بعدني احبه لعلي بالعكس كرهته ع الي سواه بيه .. بس حقد .. كل الي بداخلي حقد الهم ثنينهم اذوني ..
بعد اسبوع من العزيمه اجتي مشيه الزلم لبيت اهلي ..
خطبوني لحمزة ..
تمت الموافقه .. محد سألني لا ابويه ولا اخواني ..
هالة وضرغام ع طول يحاولون يحموني من اهلي حته محد يضايقني ..
خلال الاسبوع ابد ماوصلت لبيت اهلي بس بيوم المشيه هاله جابتني لبيت اهلي من الصبح ..
سلمت ع ابويه وامي سلامهم عادي وياي ..
اخوتي ميباوعولي .. نسوان اخوتي قايمات بالواجب تتظيف ومحضرات الضيافه واللاستقبال جاهز وحته الحديقه مرتبين بيهه كراسي خاف المشيه بيهه هواي زلم والاستقبال ميكفيهم ..
الي عرفته خلال هالاسبوع ام حمزة ابد متواصلت ويه امي لابتلفون ولاغيرة ..
عرفتهه مرايدتني بس ليش ..
اختي هم جانت مرايدتهه لعلي علمود تريده ياخذ بنت اختهه زين واني نفس العذر لو من الله متحب بنات هالعائله .. ماعرف ..
وجودي بيوم المشيه مچان ضروري بس علمود الناس اقاربنه الي اجوو عماتي وخالاتي اجن ويه ازواجهن يشوفن العريس وهنه وبناتهن يحسدني ع حضي ..
حمزة جمال واخلاق وعائله وشهاده وزنگنه ..
جلنار هم اجتي شويه ويه زوجهه وكولهه باركتلهه ويتلوكن الهه ع ابو هي الي جابت عريس وخوش صيده لاختهه الي هي اني ..
جنت بموضع مراقبه للي يصير وينحجي حواليه .. كرهت هذوله العالم وكرهت تفكيراتهم ..
امي كالت بس يطلعون سوي حرمل راح يطكوج بعين انتي واختج .. ضحكت كالتلي انتي ظلي بس تتمضحكين بشنو فالحه ووصت هاله من نرجع للبيت تسويلي حرمل ..
خلصت المشيه طلعت الزلم واني رجعت ويه هاله لبيتهم ..
باركلي ضرغام وكالي ربي يسعدج .. ضرغام انسان بمعنى الكلمه صارلي اخ جبير واعي وفاهم ومعطاء بدون مقابل فضله عليه ماانساه فتحلي بيته رغم الي سويته بس يمكن هو واختي هاله شافوني الوحيده المظلومه والوحيده الي تأذيت وقرروا يصيرون بجانبي ..
جلنار .. اسبوع مر هدوء ماكو اي مظاهر فرح ببيتنه خالتي ابد مو راضيه بس كلمة عمي مشت وصارت مشيه الزلم وخطبوا همس لحمزة ..
حمزة طاااير من الفرح واخوانه فرحانين اله ..
يومين احنه مخبوصين لان حمويني وزوجاتهم واطفالهم يمنه فرحانين باخوهم ..
حبيت هوسة البيت وهوسة الاطفال ..
مجنت اشوف علي هواي بين دوام وبين تحضيرات ويه اخوه لان هو اقرب واحد لحمزة .
من رجعنه من المشيه لان رحت وياهم اني استقبلوا حمزة بزفه ومزايق بباب البيت زفوا اصدقاءه وكولهم شباب ويركصون وفرحانين بي وهو حمزة كولش ضحوك واجتماعي ..
كولهه فرحانتله يستاهل هو ..
خلص اليوم ع خير بفرح وتعب وخالتي فكت شويه شفتهه تضحك وتهلهل وطشت جكليت ع ابنهه وبخرته مابيدهه شي بالنهايه هي ام وتفرح من تشوف ابنهه سعيد باختيارة شتريد اكثر بعد ..
لليل كولش راحوا اخوانهم كلمن لبيته ويه زوجته واطفاله واني وايه نظفنه ع السريع وهي دخلت غرفته واني صعدت لغرفتي هلكانه من التعب ..
اول مفتت للغرفه شفت علي نايم حاولت مااطلع صوت ..

طبيت سبحت لان جنت كولش عرگانه طلعتلي ملابس خفيفه من الكنتور وطبيت سبحت ..
طبيت جوة الدوش وغمضت عيوني وسمحت للمي ينساب لكل اجزاء جسمي ..
غمضت وبراسي توالت احداث اليوم بالتتالي حدث ورة الثاني موقف ورة الثاني محسيت بالوقت ..
فتحت عيوني وخرت من جوة الدوش مديت ايدي اريد اسد الكاك مال الدوش افترت بيه الدنيه دخت ..
ايدي بعدهي ع مدتهه لزمت بوري الدوش شويه توازنت .. بس بقت الدوخه بيه وبقيت احس الحمام ديتحرك ..
اني اصلا عندي مشكله بالضغط دائما ضغطي ينزل ..
فكالعاده قرفصت اني هيج اسوي دائما واصير زينه لو اتمدد واخلي مخده عاليه جوة رجليه واصير زينه ..
انتظرت شويه صرت زينه لبست وطلعت ..
تمددت بدون تمشيط ..
حس عليه علي ..
فتح عيونه .. ظل يباوعلي ..
وين جنتي ؟
سبحت .. عركانه ومحترة ..
اخذني بحضنه ..
وهسه ..
هسه شنو ؟
ماناويه تفكين الحصار عليه ..
تعبانه والله .. وهسه من جنت بالحمام دخت ..
ليش ؟
عقد حاجبه باهتمام ..
هو لان تعبانه ..ضغطي نزل ..
وشلون صرتي هسه ؟
احسن ..
ضمني لصدرة اكثر ..
تريدين نروح للطبيب ؟
لا ماكو داعي هو دائما هيج يصير بيه من اتعب ..
سلامتج ..
ابت

ابتسمت ..
تلمس شعري ..
شعرج رطب ..
اي مانشفته ..
مفتوح التكييف مو تتمرضين ..
لاا محترة ..
احساس حلو واني بحضنه .. مو اتهرب منه بس صدوك تعبانه .. من يحضني يغمرني بحنانه احب هالاحساس ..
طول الاسبوع الفات صح متباعدين مشغولين بالتحضيرات لخطوبة حمزة بس بالي مشغول بعلي ..
اوتماتيكيا من يصير بالغرفه عيوني تراقبه .. تصرفاته .. تفاصيله ..
بديت احب وجودي بقربه اهتمامه بيه عيونه من اتحرك دوم تتبعني ..
اعرف بي يحبني .. بس هالمشاعر وياه اني اول مرة دا اختبرهه ..
يمكن اني دا احبه يمكن هذا تعويد ..
عافني ضايعه بحضنه ونام واني هم نمت .. 6
همس .. بيوم المشيه شفت حمزة واكف ويستقبل التهاني من اصدقائه ..
من شفته واكف بطوله بهيبته بضحكته التارسه وجهه ..
كشكل اوتماتيكيا بدون وعي واراده واني اعترف ضعيفه تجاه هالشي .. عقلي يقارن بين علي وحمزة بالشكل والشخصيه والطبع والتصرفات وحته ملامح الوجه ..
عبالك هالمقارنه الديسويهه عقلي بكل مرة اشوف بيهه حمزة رساله لگلبي حته يقتنع يشيل علي من مكانه..
اني قلعته من كلبي بس جذورة .. لا مو جذور .. كل موقف سواه علي وياي وكل انانيته خلتني اقتلعه قلع من روحي واذا كلت جذور باقيه معناتهه اكو امل لحبه يرجع ينمو بگلبي من جديد بس اني ماهيج افكر ..
الكره والحقد هو ملخص شعوري لعلي بس مدا اعرف ليش دائما اقارن ..
باول يوم بعد مشيه الزلم اتصل بيه رقم غريب ..
متعوده اجاوب واسمع الصوت اذا صوت ولد اطبكه واذا بنيه اسألهه منو حضرتج ..
سمعت المتصل صوت ولد ..
هلو همسه ..
عرفته حمزة ..
اهلا بيك ..
شعجب رديتي رقمي ممسجل عندج ..
مو من كلت الو عرفتك من صوتك .. ومحد يكولي همسه غيرك .. اسمي همس موهمسه ..
اهااا اسف ..
ولايهمك ..
وشعجب مسألتيني منين حصلت رقمج ..
اكيد من اختي .. متقبل غلط ..
هههههه لا والله تقبل .. اخذته من عمي ابوج واستأذنت منه اخابرج علمود نتفق شوكت نطلع نشتري الذهب والحلقات وهالتفاصيل هاي ..
سكتت .. صفنت ع كلامه شكد جرئ محاجي ابويه حته يخابرني وماخذرقمي منه بعد ..
اهااا ..
اي شكلتي شوكت نطلع نشتري الحلقات ؟
عندي دوام .
ميخالف بيوم عطلتج .. يايوم عندج عطله ؟
هو جمعه وسبت .
تمام الجمعه نطلع هايهيه ؟
ان شاء الله ..
وبلغي الوالده وامي هم راح تخابرهه يروحن ويانه لو تريدين وحدنه نروح ؟
لالا امي ويانه ..
هههههه ترة مراح اكلج يول ..
لا اعرف موهيج قصدي .. بس يعني ذوق تعامل ماعندي خبرة بهيج شغلات اني ..
وشبي ذوقج يابه .. يخبل ع صاحبته .. انتي عليج تختارين الي يعجبج واني اتعامل ..
بعدنه بسم الله غازلني .. شلون اخذني بلسانة وشلون يغازل ..
لالا تجي امي ويانه احسن.
يله ماشي ع راحتج ..
يله باي عندي شغل ..
الله وياج عيوني ..
بنفس اليوم صدوك ام حمزة اتصلت ع امي واتفقن الجمعه الجايه نطلع نشتري النيشان والحلقات وجهازبسيط للعقد لان حمزة يريدنه بعد اسبوع نعقد ..
وصدوك الاسبوع البعدة طلعنه اني وامي وهالة وهو حمزة ووالدته واخته الصغيرة آيه ..
جهزوني من كل شي افضله واحسنه ..
حلقتي ونيشاني اختياري وذوقي عجب حمزة وراد حلقته هم ع ذوقي اشتريتله حلقتين فضيه وذهبيه ..
وباقي الجهاز امه اختارتلي وسيت النوم الابيض الي المفروض اعقد بي حمزة اختارة .. والله كولش جرئ هالحمزة .. بدلات العقد هو اختارهن اشترالي 2 كتله هواي وحده كافي كالي مو هواي ع عيونج بس اطلبي وأمري .. يخجلني باسلوبه وغزله ودلاله اليه ..
ميكدر گلبي ميدكله خاصه وهو نصيبي وراح يصير حلالي ..
اخذلي بدله ماروني قصيرة كولش وفاضحه كولش من فوك تنلف ع الركبه وطباگه من ورة ومن الركبه للخصر ماكو بس قماش يغطي الصدر گوة والخصر مقسم ومن تنزل البدله هم مقسمه ع الجسم لحد الافخاذ وتنتهي يعني كولش قصيرة ..
كالي هاي الي بعدين تلبسيلياهه وغمزلي كدام امه .. متت خجل بدمي ..
والبدله الثانيه مستورة نوعا ما لونهه بصلي عبارة عن قطعتين الاولى شغل بالصدر وتعلاكات ومقسمه ع الصدر والخصر ومن ورة سحابه والقطعه الثانيه ضخمه وطويله كلووشه بس كلوشه بيهه فيكه مو عدله لا مخرمه وع كل خط خياط شغل نمنم وپلك فد شي كولش مرتب ..
بدون مستحى ملابس النوم حمزة اختارهن ولاتدخلت اني .. لان من صدوك خجلت ومابقيت بالمحل ظل هو جوة يختار وامه وامي وياه ..
دزلي اخته ايه طلعت يمي صاحتني ادخل ماقبلت ..
جنت مطنكرة حيل محرجه من افعاله الجريئه وامه كلما تصير عينهه بعيني تخزرني عبالك شو شمسويه غير هو ابنهه طالعه عينه اني شدخلني ..
كلت لايه ما ادخل خلي يخلصون حته نرجع للبيت كافي تعبت وجعت وبعد مابيه حيل افتر ..
جنت مدلغمه حيل متضايقه وصدوك محترة شمس صيف وكتلني الحر ..
ايه .. وج انتي شبيج هو ديختارلج اشياء ع ذوقه غير عاجبه هيج تلبسيله هاي من الزينات ترة ..
يمعوده يازينات .. طبيت بهدومي من الخجل هاي من غير امي وخالتي يخزرن بي

يخزرن بيه اي ادري قابل اني موصيته يسوي هيج ..
سمعت صوت من ورايه ..
احم احم ..
صوت رجولي .. صوته .. حمزة ..
التفتت بسرعه لكيته واكف ورايه .. مدنك ايديه بجيوبه وع وجهه شبح ابتسامه ..
يبوووو يحظي .. من شفته ابتسم عرفته سمعني شحجيت ..
حاجى ايه ..
ايه فوتي جوة امي تصيحج ..
ردت اشرد افوت جوة ويه ايه جرني بخفه من عكس ايدي كالي .. انتي ابقي .. بكلام اقرب للهمس ..
تبسمرت وكفت كدامه .. خطفت نظرة باوعت لوجه وعيونه ودنكت بعدهي الابتسامه بوجهه ..
سالني .. شبيج طنكرتي .. ضوجتج بشي اني ؟
رفعت راسي كتله لا كلتهه بلعثمه وارتباك اول مرة يصير بهالقرب مني ..
لعد ليش هنا واكفه وتدردمين ويه ايه شعدكم ..
ماعدنه شي ..
اكيد ؟
اي اكيد ..
لعد يله ادخلي نكمل جهازج ..
جان يحجي ويحاول يستفزني علمود اكوله شبيه ومن كال نكمل جهازج يعني بعد يريد يشتريلي وبعد يريد يحرجني ..
كتله لا كافي .. تعبت واحتريت وجعت ..
ههههههههه جوعانه دكولي هيج كلبتي الدنيا ..
لااا مو هيج ..
لعد شنو .. سولفي اسمع ..
....
دتطلعيهه للدرة ..
اذا مو جوعانه امشي نفوت نكمل جهازنه ع السريع حته اغديكم ..
راد يجرني يدخلني من نفس عكس ايدي بس كتله اوكف ..
اذا افوت جوة اكمل جهازي انت معليك تطلع منهه اني اختار الي اخذه ..
عقد حاجبه .. ليش بله ..
هو غير جهازي ..
اي صح بس راح تلبسيه اليه ..
يبووو شكد فشلني .. شكد جرئ ..
زفرت بقوة وهو عيونه ع وجههي يراقب حركاتي ..
حمزة ..
ياعيوونه ..
نسيت الحجي ..يبوو ..
ههههههههه .. ولج شبيج ..
حمزة تصرفاتك دتخجلني ..
عقد حاجبه .. ياتصرفات ..
انو انت تختارلي ملابس النوم .. ميصير هيج .. دتخجلني والله ..
بذيج اللحظه من حجيت له شبيه تمنيت اختفي من گدامه ..
ههههههههه يويل حالي .. فديت الخجول اني .. يله بعد مااختار اني اخليج انتي تختارين راح اوكف ع صفحه بس هاا الي تختاريه شوفينياه ومن عيوني تعرفينه يعجبني تاخذينه ميعجبني ترجعينه ..
عقدت حواجبي ..
وشلون راح اعرف عيني ؟
هيه نطب جوة وتتعلمين ..
عوجت حلكي .. خلصت من شغله دخلت حالي بشغله ثانيه لو باقيه هو يختارلي احسلي ..
ديله عيني شمس قويه هنا امشي نفوت ونشوف شلونه ذوقج ..
لزم ايدي واخذهه بايده وفوتني وياه للمحل الي دنشتري منه ..
صدوك هو وگف ع صفحه يم ايه وعافني اني اختاروكلما اختار شي التفت عليه ويسويلي حركات بعيونه لو بايده معناتهه عاجبه لو مو عاجبه وهيج صرت افتهم عليه ..
من التفت صرت احسه يراقبني يحجي ويه ايه بس باله يمي ..
حبيت انو اكون محط اهتمامه وتركيزة ..
خلصنه جهازي واخذنه حمزة لمطعم دخلنه نتغده ..
صار مكان گعدتي كدامه مارتاحيت ابد لان كلما اشيل راسي اشوفه يباوعلي واني من غير اي شي احس عيونه عليه طول الوكت احسه يراقبني واني من النوع الكولش خجوله ..
الغريب بالموضوع رغم اكره انحط بموضع احراج بس حبيت اهتمامه والاغرب من هذا كوله علي والمقارنه الي عقلي يوميه يحطني بدوامتهه ابد ما خطرت ع بالي ..
مرتاحه نوعا ماا ..
خلصنه غده واني ماكله شي قليل رغم جوعانه ..
صعدنه بسيارة حمزة ..
امه صعدت بالمقدمه يمه واني صعدت ليورة هو فتحلي الباب وكالي منا اصعدي عرفت ليش ..
طول الطريق يسوق ويباوعلي من المرايه واني ابتسم بخجل وادنك وهو يغمز ويعض شفه ويتمادى ويدري بيه اخجل وماكدر اسويله شي ..
وصل امي للبيت وهاله مانزلت كلتله اني وصلني لبيتي ماكدر ابقه يم اهلي بي هو استغرب اني ليش مانزلت ويه امي لبيت اهلي ..
هالة حست عليه كالتله همس يمي دتساعدني محتاجتهه بشغلات تعزيل للبيت وماكدر وحدي ..
شفته ضاج بس سكت .. اني اعرف هالسؤال وراي وراي .. اكيد راح يسألني اذا تكررت هالحاله ليش عايشه ويه اختي مو ويه اهلي ..
ماجنت اعرف شراح اجاوبه بوكتهه ومثل كولشي خليته ع رب العالمين هاي السالفه رغم نكدت عليه بس هم خليتهه وره رب رحيم هو يقدملي البيه الخير ارحم من بني ادم عليه ..
صديت وجهي للجامه مال السيارة ..
وصل امه للبيت لان بيت اهله قريب ع اهلي بينما بيت هاله شويه ابعد ..
اول ماطلعنه فرع اهله وگف السيارة ونزل ..
اني هنا جنت بغير عالم ووعيت ع نفسي ليش وگفنه ..
فتح بابي اني متفاجئه ..
شكو شبيك ؟
ضحك .. ماكو شي شبيج اخترعتي .. بس نزلي بدلي مكانج ..

ماصار شكد تسألين ..
هاله افتهمت عليه واني لسه مثل الاطرش بالزفه شلون وليش ..
تعال كعدي يمي بالصدر ..
باوعت لهاله بعدهي تضحك وهزتلي براسهه يعني طتني الاوكي ..
صعدت يمه بالصدر ..
سد الباب ورايه وراح صعد بمكان السايق ..
هاله كالت ..
اثكل شويه يمعود .. ترة مراح تطير منك ..
ههههههه ..
هو ضحك وخجل ..
کالتله .. الله يسعدكم .. اختي فقيرة وحبابه وتستاهل ..
هو غمزلي وباوعلهه .. كاللهه ..
ام رند (هاله بنتهه الجبيرة اسمهه رند ) واني هم فقير وحباب واستاهل ..
دسوق ياعيني سوق هسه الكه جهالي لسه
تكمله بارت 17
جحيمي وناري 3
لسه بدون غده والامه العربيه مگلوبه گلاب ..
ههههههههه اي هموسه وياج تساعدج ..
اي معدله هموسه ..
اي بس امانه ام رند لاتعبيلي هموستي ..
لالا اطمئن ..
همه يحجون واني صافنه .. هذا حمزة منين طلعلي بالحظ يانصيب ..
وصلنه للبيت ..
هاله نزلت ركض قبلي بعد ماودعته لحمزة وهو حاجاني ..
هموسه ترة اسبوع الجاي نعقد جهزي روحج مو تكولين ماكال ..
شنو هاي شبسرعه .. غير تتفق ويه اهلي شلون هيج .
اي نتفق اكيد اخبرهم شلون لعد بس اني دا اخذ رايج الج ..
موافقه ؟؟
شو احسك مستعجل حمزة ..
وليش ماستعجل .. كولشي جاهز ..
شافني سكتت ..
كلي ..زين اذا ردت ااخر العقد شويه لشوكت يعني احنه نيشان وجهاز وحلقات واشترينه لويش التاخير بعد ..
فد اسبوعين ..
يعني تفرق عندج اسبوع ولا اسبوعين ..؟
سكتت ..
شكلتي ؟
هاهيه باللي يعجبك ..
راضيه يعني ..؟
هزيت راسي اي ..
ماشي حبيبي .. صرتي حمرة من الشمس فوتي طبي هسه لتصير بيج ضربة شمس وابتلي ومن اتصل عليج عود جاوبي ..
كتله ماشي واني مسطورة بكلمه حبيبي .. گلي ماشي حبيبي ..
حلوة بحلگه .. احساس حلو .. اهتمامه حلو ..
اخذ ايدي باسهه ونزلت سحبت ايدي من ايده لان كولش خجلت ماعرفت شلون اتصرف .. سويتله بايدي باي وسديت باب السيارة ..
دخلت للبيت وايدي ع كلبي .. وهو راح .. 6
تلكتني هاله نازعه ملابسهه ومبدله ملابس بيت ..
هاولج شو تاخرتي ..
وعتني من صفتني ..
ماكو شي حبي بس كلي الاسبوع الجاي نعقد ..
اي الحمدلله ربي يسعدكم .. ترة مبين عليه يحبج ..
عقدت حواجبي .. وهو شوكت شافني شوكت عرفني حته يحبني .. شبساع يمعوده ..
من جنتي تدارينه بالمستشفى .. والله حسيته عينه منج من تدخلين للغرفه تبدليله الضماد لو الكانوله عيونه تظل تفتر وراج ..
شو مملاحظته اني ..
دمشي انطب الشمس حركتنه لاتخليني اسولف ع ثولج لو احجي منا لباجر ماكمل ..
عرفتهه تقصد ع موضوعي ويه علي وجلنار ..
سكتت وماضجت لان هاله الوحيده الي اتقبل منهه كولشي الوحيده المعافتني ووگفتلي وماعتبرت كلامهه دتعيرني ولاشي بس من فترة للثانيه اي احتاج احد يذكرني باغلاطي حته لا اكررهن ..
دخلنه جوة للبيت ضرغام. جان موجود ..
سلمت عليه .. رد السلام .. كال يله استلموا امانتكم يقصد ع الجهال ..
اني تعبت واريد انام ..
راح الرجال لغرفته ينام والبيت مكلوب كلاب بعد اطفال ورجال وببيت شتتوقع ..
هاله راحت تدردم وراه ..
والله راحت رجليه من المشي اني هم تعبانه .. يعني البارحه نظفت البيت يصير هيجي شبيكم انتو عبثين شوكت تكبرون ..
عاد غديتهم لو هم ينتظروني ..
صاح ضرغام من الغرفه ..
تغدينه تغدينه .. بس نيميهم حبابه سطروا راسي بهوستهم ..
شكد حلوة حياتهم هيج .. صح هاله عصبيه بس ضرغام هادئ ومسالم ويساعدهه ويحتويهه ..
من المرة بظهرهه هيج رجال التعب يهون والمسؤوليات والهموم كولشي يهون ..
كلت لهاله ..
انتي تعبانه روحي نامي اني انظف وادير بالي عليهم ..
اي حبيبه فدوة لعينج اناملي ساعه واكعود اعاونج ..
طبت للغرفه واسمعهه تضحك ويه ضرغام .. ضحكت.. اي عيني من دبش راح تنامين ساعه وتطلعين تعاونيني ..

[ملكةه]

البارت 18جحيمي وناري
همس .. مرت ايامي عاديه مشغوله اجهز للمهر مالتي حته نعقد سيد الاسبوع الجاي وهاله وياي تساعدني ..
اضطريت اروح لبيت اهلي هواي مرات لان العقد مالتي حيصير هناك وجنت اخاف اروح وحدي رغم اخواني ثنين طالعين بس حسام الي هو راس البله واكثر واحد اخاف منه من اخوتي وموجود بالبيت مطالع مثل بقيه اخوتي وزوجته همين لامعتبرتهه موجوده ولا احجي وياهه فدائما جنت اخلي هاله تجي ويايه وامي هم شويه لانت من ناحيتي ..
حمزة يتصل للضروريات فقط لان ضرغام ضبّه شويه وكله ممنوع تخابر بدون سبب لان احنه لسه معاقدين واني لو جنت ببيت اهلي جان هاي الشغله ابدا ممقبوله ..
واني ارتاحيت نوعا ما من هاي السالفه لان هو جرئ واني استحي ودائما اتفشل لان ماعرف شأرد عليه من يتغزل .. دائما اگوله شكرا وهو يضحك ..
جلنار من يوم العزيمه عد اهلي بعد ابد ماشفتهه ولاسمعت عنه خبر بالاحرى اني ماردت اسمع شي عنهه لغيت وجودهه من حياتي رغم هي يوميه تتصل بهالة .. 15
جلنار .. مر اسبوع بعد مشيه حمزة بيت عيالي بي حركه .. آيه دائما تطلع وياهم ومن ترجع تسولفلي شنو جابوا وشنو اشتروا لهمس .. رغم متحجي وياي بس فرحانتلهه ربي يسعدهه ويه حمزة ودائما ايه تطلب مني اروح وياهم وهي وخالتي مستغربين ليش ماروح وياهم خاصه وهمه ديجهزون لاختي ودائما علي يتصدالهم بحجه هو ميقبل وعندي دراسه او مريضه ..
واني صدوك هالفترة كوولش معدتي مأذيتني بس اتقيأ ومرات ادوخ مغلسه ع نفسي لان عندي امتحانات وخالتي هم شويه مشغوله عني مو كولش تسمعني كلام واني قايمه بللبيت وبواجبي تجاهه والوضع بيني وبين علي هادئ هو هم مشغول بين دوام ودرجات طلابه وامتحاناتهم ماشوفه لان اني هم ادرس ومرات انتظرة بالليل من يجي يشرحلي مواد ماافهمهه ..
فد يوم عصريه مثل عادتي اروح للحديقه اكعود ع المرجوحه اقرة ..
صار المغرب واني هناك ولان مطروحه واتمرجح لعبت نفسي وحسيت الدنيا تفتر بيه بس قاومت الشعورظليت بمكاني ووكفت المرجوحه ظلت تتحرك بهداوة ..
غمضت عيوني بعد محسيت بشي ..
كعدت مفزوعه ع احد يندهلي .. علي ..
جلنار ..جلنار ..
همممم.. هااا ..
اسم الله ..هاي شبيج اخترعتي
مو محسيت بروحي من نمت ..
ماخذتج النومه هنا ..
اي اي ..
بيش الساعه انت شوكت اجيت ..
باوع لساعته گالي .. ساعه ب 8وعشرة .. توني اجيت ..
شعجب شو من وكت ..
مو امي اتصلت بيه .. كالت رايحين لبيت خالتي معزومين ع عشه وحته ايه ماخذيهه وياهم .. مرتك وحيدهه بالبيت واجيت ..
هاا هلابيك ..
دكيت عليج مجاوبتي ..
جهازي عايفته بالغرفه مو يمي واني من الظهر هنا .
كعد يمي ع المرجوحه وحضني من خصري .. كالي ..
يعني البيت النه ..
ضحكت ع كلامه افتهمت قصده..
ضمني اكثر اله ..
ايييييييي ..
صار راسي ع صدرة ..
شميت ريحه جگاير ..
لعبت نفسي منهه راسا نفرت ووخرت راسي عن صدرة باوعتله لعيونه ..
شبيج حبيبي ؟
علي انت تدخن ؟
لا والله .
لعد بملابسك ريحه جكاير ..
جماعه بالمكتب كعدوا يمي ويدخنون لذلك تشمين بيه ريحه جكاير ..
عفيه كوم بدل ملابسك ترة لعبت نفسي من الريحه ..
انتي بدليلي ملابسي ..
بلاسخافه علي ..كوم اسبح وغير ملابسك ..
انتي انتي .. هاي مو سخافه هذا دلال للرجال ..
دللي رجالج يامرة لتروح وحده تلف عليه وتاخذه منج ..
رفعتله تك حاجب معاجبني كلامه ..
اييي لعد شعبالج .. الى متى اظل اعلم بيج ..
خزرته ..
بطل هالكلام علي لتضوجني ..
گام يغنيلي اغنيه محمود التركي ..
يدوخه راسي انت واحلا دوخه راس
يالمبهذل احوالي واني ميت بيك
مو رومانسي ومابيك ذرة احساس
وابو الاحساس اني دوم اسميك

كمت اضحك اني شلون يغني ويأشر بايديه ..عبالك صدوك الاغنيه عليه ..
شالع كلبي انت وانه اكولن زين
علي تتدلل .....بعد مادري
هههههههههه بعد محافظ ..
ههههههههههه بس حلو صوتك من تغني ..
عيونج الحلوة حياتي ..
گمت ردت اجرة من ايده واكومه شو ماكدرت دخت من حلاة روحي ظليت مادة ايدي اله وايدي الثانيه ع راسي هو حس بيه ولزمني جرني وكعت بحضنه ..
شبيج حبيبي ؟
ماعرف شو دخت ..
هم ضغطج ..
اي والله وهمين مماكله شي من الظهر ..
اويلي .. اي ليش هيج ..
والله ماشتهي ممتعمده اجوع روحي ..
لازم نشوف جارة لضغطج ..
هو من زمان هيجي ..
ميخالف خلينه نروح لطبيب ونشوف شبيج ..
خلي اخلص امتحاناتي ..
لا خوب الجمعه ..
لاااا الجمعه المهر مال اختي وحمزة ..
لعد السبت ..
لا علي عندي امتحانات اني اصلا راح اضيع يوم كامل الجمعه ع التحضيرات والشغل والحفله يم اهلي انوبينه السبت همين .. السبت عوفني اقرة ..
هي عصريه شبيج كبرتيهه ..
ماكبرتهه بس هالعصريه تفيدني بقرايتي ..
ماشي عيني ماشي ام قرايتي ..
هسه تكدرين تكومين نفوت جوة .. اكلني البگ ..
هههههه اي بيه .. راحت الدوخه ..
گومني استندت عليه فجاة ماحس الا وشايلني ..
هاي شنو علي .. نزلني عفيه ..
شنزلج ..مو كتلج البيت النه اليوم ..
ههههههههه ولك جوعانه خلي اسوي عشه بالاول ..
وحته عشه جبت .. هاي وحليناهه شنو عذرج بعد ..
اسبح وذب هاي الهدوم عنك ..
هو انتي هسه راح تسبحيني ..
كل عقلك علي ..
لا والله نص عقلي .. طخت براسي اليوم الا تسبحيني ..
هههههه والنبي مو عاقل ..
شالني واخذني للغرفه ..
نزلني احضرلك ملابسك ..
باوعلي نظرة بيهه معنى ..
مو عبالج اخليج تشردين ترة ماكو شرده ..
ابتسمتله بخبث واني ناويه انتظرة يفوت للحمام واسوي روحي ملتهيه احضر ملابسي حته الحكه وبس يدخل ينزع اطيه ملابسه واعوفه .. قابل يركض ورايه بدون ملابس ..
لا عيني اشرد شنو ..
وهاي حته ملابسي دا حضرهن ..
اي خوش عبالي ..
هو نزع القميص والبنطرون بالغرفه رحت شلتهن بسله الملابس الوصخه ودخل للحمام ..
صاحني اجيبله ملابسه ..
دا اطيهياه من الباب جرني داخل الحمام ماحسيت الا واني مسحوبه .. ايد سحبتني للداخل .. وراسآ خلاني جوة الدوش ..
تنكعت بهدومي ..
وهو حاضني ..
صح فزيت من سرعته وحركته وشهكت من المي بس هدأت من حضني جوة المي ..
رفع راسي من حنجي وباسني بحنيه تبادلت البوسه وياه ..
احساسهه حلو .. حنيته ورومانسيته حلوة .. يمكن گمت احبه .. مو تعويد لا حب .. ضعت بلمساته الجريئه لملامح جسمي .. ضعت بعيونه وحركاته ونظرات عيونه ..
عيشني اوقات من عمري .. اول مرة اتواصل واتفاعل وياه بارادتي بدون غصب .. هواي وقت تر كني براحتي لان شاف الاجبار مجاب وياي نتيجه ومن حاول هسه ماصديته ..
يهمسلي احبج باذني واني من كد ماذايبه بين ايديه اريد اسيح واوكع بالكاع لوما لازمني هو لان من صدوك رجليه مشالتني هو شالني ..
سبحني ونشفني ولبسني وهو هم تنشف وطلعنه ..
رأسا تمددت ع الجربايه ولفلفت روحي بالبطانيه ..
برد ع راحه ع نعسانه ع جوعانه ..
اباوعله يتمشى بمهل بالغرفه ويمشط بشعرة وملابس بس شورت وفان
تكمله بارت 18
جحيمي وناري

وفانيله تعلاكات ..
اباوعله بحب .. احب كل تفصيل بي .. ليش معجبني من قبل ليييش ..
تقرب مني ..
اظل اتمشى وتباوعيلي لو هاهيه شبعتي ؟
ضحكت وغطيت وجهي استحيت كولش يعني جان يدري بيه اباوعله ..
كعد يمي ع الجربايه ..
وخر الغطا عن وجهي كالي ..
كولي لاتستحين .. هسه انزع حته تتفرجين براحتج..
هههههههه ولك لاااا ..
هاي شبيج تضحكين .. ترة احجي جديات .. اني جسر للطيبين ..
روح منا ..
وين اروح ..
هجم عليه صار فوگايه ..
حضنته من رگبته ..
فتح عيونه ع وسعهن مصدوم من حركتي ..
ترة اني ماتحمل هالدلال كوله ..
احبك ..
زادت ابتسامته .. ظل يباوع بعيوني .. وغيره ؟
جنت عميه عنك .. وثوله ..ردت اضيعك من ايدي ..
لاتحجين شي بعد .. بس شوفيني شكد تحبيني ..
رفعت راسي وبسته من شفايفه .. بادلني البوسه وضعت بي وضاع بيه وصرنه جسدين بروح وحده وعيشته ليله من الجنه ..
احلا شي بالدنيا الحب واالاحلى منه شخص يبادلك هالحب وهالكم من المشاعر الي تصول وتجول بيك بلحظه نشوة واشتياق ..
.......
بعدهه تعشينه بغرفتنه مانزلنه .. ساعات مرت كولهه حب وغزل ودلال وعشق وحضنات وبوسات فتحلي اغاني وكالي رگصيلي واني توني جنت بحضنه بس من كال ركصيلي استحيت كومني من مكاني نتمايل سوة ..
وسمعني هاي الاغنيه الخبصني بيهه ..
شالع گلبي انت وانه اگولن زين ..
علي تدلل بكيفك مخليك ..
عادي فوگ گلبي دوس فدوة روحي الك دوسه
تريد تعيل عادي عيل كولهه توگع ببوسه
من كال المغني كو لهه توگع ببوسه صاح علي اي والله اي والله بس انت تفتهم ..
ههههههههه احلف عليك مو عاقل ..
بعدين فتحنه موضوع زواج حمزة من همس وطلبت منه يوديني لاهلي يوم الجمعه الصبح لان هو المهر راح يصير يوم الجمعه العصر ماردت اروح يوم الخميس رغم هو ماعنده مانع يوديني قبلهه بيوم بس اني ماريد احتك بهمس ولا اتواجه مرة ثانيه ويه اخواني خاصه حسام وعلي مموجود وياي .. بس فكرة وجودي ويه اخواني ببيت واحد بعد ماعرفوا بالي سويته فد شعور يرعبني ..
سألني علي عندج شي تلبسينه بالعقد ..
اي بدله من جهاز زواجي ملابستهه بس مرة .
كون مستورة ..
هي حفله بنات .
بس اخويه اكيد يدخل ..
اهووو علي .. لاتحط روحك ..
كلت مستور ..
عود البس شال ع جتفي من يفوت اخوك ..
اي والباقي شنو مينستر ..
يعني شنو ..
يعني لبس طويل ومستور ..
بس هي حفله ..
والحفله بس للملابس المشلحه ..
شكد مزعج ..
ادري ..
زين البس عبايه اسلاميه ع بدلتي من يفوت ..
صفن عليه ديکلب كلامي بعقله ..
عبايه اسلاميه مسدوده ..
اي والله مسدوده ..
واني اشوف اول اللبس ياله تلبسينه بالحفله ..
شلون يعني ؟
تقرب مني حضني .. گلي يعني باليله الخميس تلبسيلي البدله وتسويلي ليله حلوة مثل هالشفايف الحلوة ..
حوط وجهي خدودي بين ايديه ..
كتله ..مو تدلل .. انت اول متفقين ..
ظل محوط خدودي بايديه عين بعيوني وعين ع شفايفي .. اخير شي استسلم وباسني ..
ابتسمتله .. بوساته برقه .. مثل نسمه هوة بارده تمر عليه بليله صيف تموز ..
.......
ثاني يوم الصبح خميس وصلني علي لدوامي وهو راح لمحاضراته ..
ومر اليوم عادي بين دوام وبين امتحان ورجعه للبيت والروتين اليومي من الشغل ورزايل خالتي الماتخلص ع اتفه الاشياء بس ساكته ومغلسه ..
گول خلص اليوم ع خير بالقدرة الالهيه ..
ثاني يوم الجمعه كعدنه من الصبح بس سويت الريوك صعدت بدلت واخذت شمحتاجه غراض ملابس بيت خاف عدهم شغل وملابس الحفله ووصلني علي لبيت اهلي ..
صح وصلت من وقت بس لكيت الامه العربيه كولهه موجوده ..
اخواني تلاثتهم همه ونسوانهم واطفالهم هاله وزوجهه والاطفال وهمس موجوده اكيد ابويه وامي هم موجودين وخالاتي وعماتي وبناتهم ..
دخل علي وياي سلم ع اهلي .. كولهه كامتله سلام حار .. علي اله هيبه وشعبيه ببيت اهلي خاصة ابويه وامي حيييل يحبونه ..
بقه شويه وترخص عدهم شغل بالبيت ..
رغم اني بنص اهلي بس حسيت بغربه وخوف من راح علي ظلت عيوني وراه ..
كل شويه اتخيل واحد من اخواني هاد عليه يريد يضربني ولسان حالي يكول وين علي عني ليش عافني وراح احس تفكيري مثل طفل وتركته امه بنص ناس ميعرفهم ومستغرب هيج تعلقت بعلي .. صارلي امان ..
جانوا يتريكون شويه وشالوا الاكل ..
رحت بدلت ملابس اكدر اشتغل بيهه وساعدتهم بغسل المواعين ..
استمرينه نشتغل هم تنظيف للبيت وترتيب للمكان وهم طبخ غده للخطار الموجودين ..
من غير تحضيرات صينيه المهر الي امي. كلفتني اجهزهه ..
كلامي قليل ويه الكل ..اخواني ابد ماحجوا وياي غير السلام الصبح اول ماجيت كدام علي ..
قريب الظهر هاله رادت تاخذ همس للصالون متفقين وياهه ع موعد امي كالت محتاجه هاله خلي تبقه واني اروح ويه همس ..
وهذا الي صار .. محمد اخويه الجبير .. وصلنه بسيارته للصالون ..
وبلشت شغل ام الصالون .. همس نازكه وكولشي يلوگلهه لذلك كولشي صار ع ذوق ام الصالون والبنيه محترفه وتعرف شغلهه فابد 9

ابدعت بتجهيز همس لحفله المهر مالتهه ..
واني سويت مكياج هادئ مو قوي خفت خاف علي ميقبل لان من اتصلت عليه كتله صار تغيير واني اخذت همس للصالون كتله راح اسوي مكياجي بالصالون كالي كولشي بالمعقول ماريد شي يجذب فطلبت منهه تسويلي مكياج هادئ لا انعلس وشسورتلي شعري وبقيته ع راحته مسترسل ..
بدلة همس بالبيت تلبسهه واني همين ملابسي هناك فخلصنه تسريحه ومكياج واني هم كملتني اتصلت ع اخويه محمد لان تأخرنه بعد نص ساعه وتبدي الحفله
اجتي هاله ويه محمد كالت اني كولشي مسويت امج كربت عليه وكولشي ملحكت اسوي فعلى السريع اشتغلتلهه ام الصالون شسوار ومكياج وتأخرنه اكثر ..
خلصنه طلعنه وصلنه للبيت اول مادخلت همس كولهه هلهلت ..
كولهه متعجبه بشكل همس جمالهه هادئ بنزاكه ..
كولهه فرحانه لهمس ..
اهل العريس لكيناهم واصلين لان احنه تأخرنه ..
اني وهالة احتارينه بهمس عيالهه وصلوا والزلم هم والسيد الي راح يعقدلهم ..
دخلناهه للغرفه ولبسناهه بدلتهه زادت جمال ..
نسيت هي متحجي وياي وهي هم نست لان ظلت تطلب مني اعدللهه شغلات لو اجيبلهه شغلات وتدليني وين ..
ظليت اصلي ع محمد وال محمد .. خفت عليهه تنحسد ..كتلهه راح نطلع الج دقيقتين اقري المعوذات لان مليون بالميه حيضربوج عين ..
نزعت كلادتي بيهه شذر ازرگ عن العين ولبستهه الهه
هاله قرتلهه المعوذات ونفخت بوجهه ..
احنه خوات محد يفرقنه هيج حسيت .. شعور حلو ..
بدلت هاله ع السريع وطلعت همس للصاله وكعدتهه بمكانهه ..
اني ظليت بالغرفه لبست ملابسي للحفله ..
الفستان الي لبسته لونه رماني هو بالظاهر طويل بس من تركز بي صاير مثل الروب ينشد بحزام من الصفحه مقسم ع الصدر والورك والفتحه مالته صايرة ع شكل مثلث وتبدي من الافخاذ يعني واني واكفه مستور بس من امشي بي فضيحه وطويل بي ذيل من ورة يسحل ورايه مع انه لابسه كعب ..
باوعت لنفسي بالمرايه راضيه عن شكلي النهائي عدلت نفسي ولمسات اخيرة وطلعت ..
من اول مااجيت من الصالون اجاني ابن اخويه كالي عمو رجلج يريدج ..
كلت البس واخلص واروح اشوفه .. بعدهه من طلعت نسيت هالسالفه والتهيت اسلم ع كرايبنه وكولهه تكولي حليانه وتسألني ماصار عندج شي عندهم نونو واني اكولهم لسه بعد وكت الله ماقاسم ..
شويه واشرتلي همس استغربت بس رحتلهه ..
كالتلي الكلاده الي لبستينياهه وكعت شذرتهه الزرگه بايدي ضحكت گتلهه ميخالف ضربوج عين بس انفگست ..الضربه صارت بشذرتج ووگعت الشذرة برد حيلهن وطار شرهن گتلهه تبقه بگلبهه تردد المعوذنتين والله الحافظ ..
(طبعا هالموقف حقيقي صار بيه شخصيا بالعقد مالتي وهم وكعت الشذرة .. الحسد مرض وآفه واحساس بالنقص الله يبعدنه عنه ..روسكان )
ابتعدت عنهه وبدينه نستعد لعقد السيد حطينه ع راس همس شال ابيض لان ماقبلت تغير البدله لسيت نوم لحينه عليهه مافاد كالت تستحي ..
كعدناهه يم باب مشترك بين الصاله والاستقبال وعقدلهم السيد وانترس المكان هلاهل ومباركات ..
همس صارت حلال حمزة ..
رحت للمطبخ بديت اقدم الضيافه للناس ونسوان اخواني وياي نتساعد بيناتنه ..
گالوا راح يفوت حمزة ع عروسته اني هنا لازم البس شي استر نفسي بي .. اني صح كدام حمزة بدون حجاب عادي بس لبسي مستور ..
رحت لبست عبايتي الاسلاميه ولفيت شالي برهاوة
وظليت افوت واطلع للمطبخ علمود الضيافه وكل شويه جايني طفل يگولي عمو يريدج واني مشغوله ..
كل شويه اروح للشباك مال المطبخ اريد اشوف علي بلكي واكف بالحديقه او بالباب حته احاجيه اشوفه شيريد ومبايلي مو يمي بغرفتي فوك بالجنطه ..
همس .. اليوم المهر مالتي ودوني للصالون وسووني ايقونه جمال بس اني مو حاسه بشي .. كولشي عادي عندي .. جهازي الذهب البدله الصالون حمزة عيالي التحضيرات الاهتمام كولشي من احسنه وافضله ..
صرت حلاله .. عقدنه سيد .. صرت لحمزة ماعرف شنو الي دا احسه وشنو الي بداخلي .. مشاعري مخربطه .. احس نفسي استعجلت .. اي استعجلت بس مجان بيدي شي ابويه واخواني قرروا مصيري مجان الي ايد ولا رأيي بموضوع زواجي .. المضحك بالموضوع انو هو زواجيي اني .. انترست عيوني دموع .. تذكرت جلنار من عقدت .. اني ماحضرت عقدهه لان جنت مسويه عمليه زائده دوديه ونايمه بالفراش ماتحرك .. هيج جان شعورهه ؟؟ من عقد عليهه علي ؟؟اني ماحب احد بس هي جانت تحب ابن عمي .. يعني شعورهه اضعاف شعوري هسه ..
رسمت ع وجهي ابتسامه مزيفه ورفعت راسي استمع للهلاهل والناس الي تباركلي من بعد ماكلت نعم وانت وكيلي ..
حمزة مدللني مانكر بس بداخلي شي مكسور .. بداخلي شعور بالذنب تجاه حمزة ..
بداخلي جبل هم مدا اكدر اتحمله لازم اصارح حمزة بالحقيقه ..
القاط رصاصي القميص بنفسجي فاتح اليلگ الداخلي بلون القاط الحذاء اسود والحزام والرباط همين .. بساطه بأناقه وعطر فواح سابق ..
بهالهيئه دخل عليه حمزة .. ابتسمتله من رفعت راسي وعيني صارت بعينه ..
ابتسامتي جان

جانت من گلبي .. حنيته عليه طاغيه .. اعرفه يحبني من عيونه ..
يدللني حته بالكلام والتصرفات بادقهه هاي غير افعاله ..
باس راسي وكعد يمي لزم ايدي باسهه قشعر جسمي ..
بعدهي ايدي تحت شفايفه رفع عيوني كالي شطالعه كيكه گمر شسويتي بيه ..
ابتسمت بخجل ..
ترة مااكدر ع هيج جمال والله .. هذا كوله اليه ولعيوني ..
كافي حمزة دتخجلني ..
يااابه فديت الخجول اني ..
مبروك عليه انتي حبيبتي ..
هههههه الله يبارك بيك ..
تقربت خالته منعدنه كالتله يله لبسهه الذهب لاتلزك يم البنيه ..
خاله صارت حلالي ..
گلتله وامك تحطك وتعلكگ بالتيل ..
ليش شمسوي ؟
لبس عروستك بعدين نحجي ..
صح جانوا يتهامسون بس اني سمعتهم .. دورت ع ام حمزة بعيوني شفتهه كاعده ع صفحه ..مبينه ضايجه وماتقربت تباركلنه وخالته هي الي ساعدت حمزة يلبسني الذهب ..
من جان ديلبسني الگلاده دنگت راسي بيّن صدري .. الصدر مال البدله واسع مال وحده صاحبه جسم وصدر فاني خليت بالحمالات كلينكس حته شويه يصير حجم فمن دنگت بينن اني انتبهت ع نفسي وعدلتهن ضميتهن جوة بس من رفعت راسي شفت خالته تباوع مبتسمه وهو هم وجهه مبتسم ..
اويلي يابه اتمنيت اختفي من الوجود بذيج اللحظه ..
شكد انحرجت واتفشلت ..
كملنه وكعدنه .. ظل يتغزل ويسولف وابد ماشال عينه عني ..
كالي من اليوم بعد نسهر ع التلفون للصبح محد بعد يمنعني عنج ولا احد يحجي صرتي حلالي ..
ضحكت ع كلامه .. كل همه يسهر وياي للصبح ويتغزل ويعيش الحب ويه الانسانه الي اختارهه گلبه ..
احب عفويته وبساطته واريحيته وفوگ هذا كوله جرئ وحلوو .. عيونه تسحرني رغم لونهه قهوائي غامق بس الرموش طاخه الحواجب ومعقوفه شويه ..
مرات اصفن عليه اكول هذني رموشه طبيعيات من الله هيج لو حاط مسكارا .. اضحك ع نفسي واحسد نفسي ..
شويه وكام رجع يم الزلم ..
احنه عدنه عادة بالعقد اهل البنيه يجون زلم من عمامي واولاد عمومتي حته يصير مثل الاشهار لهل عقد لذلك عمامي جانوا موجودين وولد عمي همين .. 28
جلنار .. دخلت للمطبخ دا ارجع مواعين الكيك الفارغه واجيب بعد للناس الي لسه ماقدمتلهه او اجوي توهم دخل انمار من باب المطبخ الثاني الي ع الطارمه ..
رفعت راسي شفته .. انصدمت بوجوده ..
هو هم فتح عيونه ع وسعهن ظل يباوعلي ..
عدلت شالي لان لافته برهاوة وشعري طالع ..
هلو جلنار شلونج ؟
بخير الحمدلله ..
شخبارج مرتاحه ؟
بهاللحظه طب علي ..
بلعت ريك .. يعني صارلي ساعه افوت واطلع للمطبخ وبلكي اشوف علي ماعرف ليش ديصيحني يعني من يفوت انمار يجي علي .. ياربي شنو هالحظ ..
خزرني لان جنت اعدل بشالي .. وانمار واكف شاف عيوني مو عليه ع احد وراه التفت ..
هاا اهلا رايد جلنار ؟
علي صارت عيونه بگصته ..
يله خيتي اشوفج بخير ..
عافنه وطلع من المطبخ ..
بلعت ريگي بصعوبه ..
هذا انمار مو ؟؟
دمعت عيوني مارديت .. صاح بيه وهو يكز ع سنونه .. احجي !!
اي انمار .
بسييييطه جلنار ..
مصار شي ..
نرجع بيتنه ويصير خير .
عافني وطلع واحس النار تطلع من وجهه واني ارجف خوف وعصبيه ..
التفتت لكيت نرجس وواكفه بباب المطبخ الي تربط الكليدور بالمطبخ تباوع بنظرة حقد وع وجهه ابتسامه جانبيه خبيثه ..

[ملكةه]

البارت 19جحيمي وناري 3
جلنار .. صرت ارجف من الخوف والعصبيه جسمي كوله يختض عفت الناس وضيافتهم والمطبخ ورحت للغرفه حبست نفسي .. مسويت شي اني .. بس مع هذا خايفه ..
يعني الطفل الي كل شويه جايني عمو يريدج يقصد عمو ع انمار مو علي واكيد نرجس هي دزته .. شنو شتريد مني شمسويتلهه اني .. جنت اعرف لاهي ولا امهه رايدتني وسوت زعله ومشكله جبيرة وراحت لاهلهه وقنعت اخوهه بهالتوقيت هذا بالذات يخطبني علمود ينرفض من قبل اهلي وتتأزم المشكله .. يعني تخطيط ع مستوى ..
اعرف ميريدني لاخوهن وماصرت الله ماقسم شيريدن بعد مني عفتلهن اخوهن وخطبله بنت خاله واني رحت بدربي وتزوجت ..
جنت ارجف واحجي ويه نفسي .. شيريدن مني بعد تعبت تعببببت ..
مابجيت ممتعوده ابجي .. بس مخنوكه وغصه بصدري والدمعه بطرف عيني بس داخلي يرفض تنزل هالدمعه ..
ظليت حابسه نفسي الى ان فضت العالم ..
اهل حمزة عيالي كولهم راحوا ..
اجتني هاله للغرفه لكتني مدلغمه اعصابي نار كبرا بس واحد يطخني انفجر ..
كالتلي شبيج ليش كاعده هنا ..
كتلهه تعبت اجيت ارتاح مابيه شي ..
من زمان انتي هنا صاير شي ؟احد اذاج احد غثج بكلام ؟
لا مصار شي .. جاوبتهه ..
كومي لعد حضري غراضج رجلج يكول يله خلي تتحضر دنروح ..
اهاا اي هسه ..
كمت ع حيلي ..
منو برة منو بقه من كرايبنه ؟
محد كولهه راحت بس رجلج ورجلي وحمزة معزوم يمنه ع العشه ..
حته عيالي ؟
اي خيه كتلج كولهم راحوا بس رجلج دينتظرج استعجلي مبين عليه ضايج ..
اني هنا بلعت ريگي بصعوبه ..
اي هسه دقايق ..
لميت غراضي وملابسي وعبايتي الاسلاميه سديت دگمهه للاخير ، مسحت مكياجي بكلينس مبلل ولفيت شالي عدل ..
طلعت من الغرفه صار بوجهي حمزة كاعد يم همس .. باركتلهم وسلمت عليهم وع بقيه اهلي وطلعت لكيت علي منتظرني بالطارمه ..
جان واكف وايديه بجيوبه .. شتميت ريحه جكاير عرفته د يدخن .. يمكن مرات من العصبيه الواحد يدخنله جكارة ..
من شافني رفع راسه وذب الجكارة بالكاع وسحكهه بحذائه ..
جان هادئ بس ماعرف هذا الهدوء الي يسبق العاصفه .. مااتمنى هالشي ..
كتله .. خلصت ..
كالي يله ..
مشيت وراه فتحلي قفل الباب صعدت .
صعدنه السيارة تحركنه ..
جان هادئ بضوجه .. اديه ثنينهن ع الستيرن وضاغط عليه حيل لدرجه شرايين ايده بارزات عرفته بعده عصبي بس كاتم ..
وهو ديسوق غير طريقه .. مااخذنه للبيت ..
وكفنه بمكان مابي احد ..
ليش جنتي واكفه وياه ؟
مجنت واكفه وياه ..
والمنظر الي شفته ؟
اني جنت اخذ ضيافه من المطبخ للعالم الجايه وهو دخل شسوي اني بهاي الحاله ..
صاح بيه جفلت ..
جان المفروض تطلعين .. متبقين وياه بمكان واحد ..
اي هو ردت اطلع بس هو حجه وياي ..
شحجيتو ؟
ماكو بس سلم عليه .. رديت السلام ..
واصلا والله الموضوع كوله مفبرك نرجس سوته ..
اي انتي عندج كل الناس تسويلج كمائن وبس يريدوج توكعين بس انتي وين عقلج ليش متفكرين ..
ليش متفكرين بيه اني بشنو احس وشنو الي يأذيني ..
هاي شبيك علي .. موهيج .. والله مسويت شي .. هو بس سلم عليه كلت ارد السلام واطلع ماسمحله يحجي حجي زايد عن السلام وياي ..
تعرفين يعني شنو اغار .. اغلي من اشوفه يباوعلج .. في يوم من الايام هذا فضلتيه عليه ..
غمضت عيوني تفكيره ليوين رايح ..
علي بس اني احبك الك .. وصرت زوجتك ورغم كولشي انت ماعفتني ولافرطت بيه .. يعني اجي اباوع ع انمار ...
ضرب ع الستيرن بقوة خرعني ..
لاتجيبين طاري اسمه ع لسانج ..
صار .. اسفه ..
احذري .. جلنار احذري مني .. صح احبج بس صبري وطاقتي الهن حدود ..
غرغرت عيوني احسه يهددني ومان عليه بحبه اليه ..
نزلت دمعه مسحتهه بسرعه ماريد اضعف ولا اريد يشوفني ابجي ..
رفعت راسي اله ..
گتله .. شنو المطلوب مني هسه ؟
المكان الهو بي تختفين منه .. كلام سلام ممقبول .. ممنوع ..
ع امرك .. تدلل ..
زفر بقوة ..
ممكن ترجعني للبيت تعبانه وعندي دراسه ..
شغل السيارة وشخطهه .. يسوق سريع يريد يخوفني او بعده عصبي يترجم او يفرغ هالعصبيه بالسياقه ..
كول وصلنه للبيت دخل السيارة للكراج فتحت الباب اريد انزل دخت لزمت الباب ورجعت كعدت ..
عرفت رجعتلي الدوخه ..
هو ظل كاعد عيونه تباوعلي بقلق .. بس مانطق كلمه وياي ..
اخذت نفس وع كيفي نزلت ..
طريق الطارمه للمطبخ كملته واني مستنده ع الحايط الى ان طبيت ..
بعدهه سلمت وصعدت غرفتي ..
سبحت وبدلت .. علي تأخر ماصعد ..
العشا جايبين توزيعه زياده من الضيافه وراح نتعشه بيهه لذلك خلصت من هالفقرة ..
جبت ملازمي وحطيتهن كبالي .. حاولت اقرة مكدرت .. كلما اتوجه ع محاضرة اريد اقراهه اتذكر كلامنه بالسيارة .. امووت قهر .. حيل اختنكت .. حته دموعي الماطلعت خنكتني .. اخيير شي استسلمت وبجيت بقهر ..
خلص يومي واني مقاريه شي .. لميت ملازمي ونمت تعبانه .. جسديا ونفسيا .. ولحد اللحظه النمت بيهه وعلي ماصاعد .. عرفته زعلان ..
ثاني يوم السبت كعدت جان نايم بصفي .. 7

باوعتله يمكن حس عليه .. دار انطاني ظهرة وغطى راسه ورجع للنوم .. زعلان وميطيقني ..
كمت حيلي .. نفس الروتين اليومي ريوك وشغل ودراسه ..
حاولت ماضايقه المكان الهو بي ما اتواجد بي واضوجه .. بس هو الصبحيه بدل وطلع بدون ميحجي شي توقعت راح يشوف بناء البيت وين وصلوا العمال ..
خلصت وقتي بالدراسه ..
علي مارجع الظهر .. انتظرته حته نتغده مارجع تالي تغديت وصعدت نمت ساعه ورجعت لدراستي ..
وع العشه هم ما اجه .. مااتصلت بي .. شنو المنعني اتصل .. خليته ع راحته ..
والغريب خالتي هم مموجوده بالبيت ..
تعلمت عليهه دائما يم بيت اختهه ..
بس آيه موجوده وصرعت راسي بسوالف حفلة المهر مال حمزة ..
بالي يم علي .. اجه بالليل متأخر ..
من دخل سويت نفسي نايمه ماتجرأت احاجيه او اسأله وين جان ..
جنت اتحرك جوة البطانيه يمكن مبين عليه دامثل النوم ..
اخير شي وخرت البطانيه ماتحملت ..
هو باوعلي ودار وجهه ..
وين جنت من الصبح لسه ؟
مارد عليه .. متجاهلني ..
علي دا احجي وياك ..
ميخصج ..
شلون يعني ميخصني ؟
كام طفه الضوة ورجع لفراشه نام ودار عني انطاني ظهرة ..
تعبان اريد انام .. صوتج ماريد اسمعه ..
صدوك عافني ونام ..
ظليت كاعده مااجاني نوم ..الا قريب الفجر وبطني هم جانت تأذيني يمكن جوعانه ..
ثاني يوم الاحد دوام وهم عندي امتحان اول محاضرة ..
كعدت بوجهي ع الشغل .. طبخ وجبة الغده وبعدين تحضير الريوك ..
خالتي كعدت وماحجت وياي استغربت صبحت عليهه ماردت ..
مو من مستواهه ترد عليه او تباوعلي ..
كملت شغلي نزل علي يتريك اني ماشتهي مااكلت شي اول مافات للمطبخ رحت صعدت لغرفتي ابدل ..
كملت كولشي وطلعنه للجامعه ..
اني ساكته وهو ميشتهي يباوع بوجهي ..وكملنه الطريق هيج الى ان وصلنه للكليه ..
اني رحت لمحاضرتي .. اول محاضرة امتحاني وهو راح للمكتب ..
دورت ع دنيا صديقتي ماهيه مجايه لسه ..
دخلت الامتحان وزعوا الاسئله بديت احل .. القاعه حارة وريحه الجكاير اختنكت واحتريت لعبت نفسي ..
دخت حسيت الدنيا دتفتر بيه هاي العلامات تصير بيه من ضغطي ينزل ..
ظليت اقاوم الشعور وماريد افشل نفسي واتقيأ كدام الطلاب ..
كمت احاول احل بسرعه بس ممركزة بشي ولا اكدر اركز ..
بعد ماكدر اتحمل كلت استأذن من الاستاذ اطلع دقايق بس اغسل وارتاح وارجع بلكي اشرب شي مالح وتروح الدوخه تفك عني شويه ..
بس گمت دا اريد استأذن من الاستاذ افترت بيه الدنيا ووكعت محسيت بشي ..
ورة فترة كعدت لكيت روحي بالوحده الطبيه الي بالجامعه ودنيا يمي ..
دنيا شصار ..
حبيبتي الحمدلله ع سلامتج .. ماعرف والله شو كمتي ووكعتي راسآ مالحكنه عليج وجبناج للوحده الطبيه ..
اي والله هم لزمتني الدوخه .. ماكدرت اسيطر ع روحي وماحسيت بشي بعد ..
دخلت الممرضه كالتلي .. الحمدلله ع سلامتج ..
سألتهه شنو شبيه ؟
كالتلي ضغطي حيل نازل مصفر وعندي فقر دم ع الاكثر ماعدهم بالوحده الطبيه علاجات هواي ولا يكدرون يسوولي تحاليل فهي الممرضه قايسه ضغطي لاكيته مصفر وتلاحكتني بمغذي شادتلي كانوله بايدي وطلبت مني اسوي تحليل دم واشوف الپي أچ مالتي خاف نازل عن ال 12..
اذا نازل يعني عندي فقر دم وسألتني متزوجه لو لا جاوبتهه اي متزوجه ..
سألتني صار شكد فايتتني الشهريه ..
..
صفنت عليهه انصدمت من سؤالهه ابد ماخطر ببالي هالاحتمال .. اني من تزوجت لسه مااجتني يعني اني صارلي شهرين متزوجه ..
طلبت مني احلل دم او ادرار لان كالتلي ع اكثر حامل .. باركتلي واني الصفنه والصدمه مسيطرة ع مشاعري ..ودنيا صافنه عليه ..
سألتهه شوكت اكدر اطلع ؟
كالتلي انتظري شويه خلي يخلص المغذي ياله ..
عافتني وراحت ظليت صافنه بوجه دنيا ..
سمعتي شكالت .. يمكن حامل ..
ابتسمت بوجهي دنيا ..
اي حبي سمعتهه .. الف مبروك ..
وج يامبروك وعلي لسه يحاسبني ع انمار ..
شبي انوبينه انمار مو خلصنه منه شطلعه بوجهج مرة ثانيه ..
بيوم مهر اختي هو جان موجود وحجه وياي وعلي شافه ..
وانتي شعدج واكفه تحجين ويه انمار ..
ماجنت واكفه اني جنت بالمطبخ هو دخل وثنيناتنه تفاجأنه ردت اطلع من المطبخ سلم عليه رديت السلام علي بهالاثناء طب وصار الي صار ..
تعاركتوا يعني ؟
اي تعاركنه وزعل صارله يومين ميحجي وياي ..
والله حقه علي ..
بشنو حقه .. ماعندي شي ويه انمار اني ..
ادري ياعيني شخص عندج ماضي وياه وزوجج ع علم بالموضوع المفروض تتلافين هيج مواقف ..
اي اني جنت بالمطبخ اخذ ضيافه للناس اشتم گفا ايدي انمار راح يجي ..
كافي يله شي صار وخلص لاتغثين نفسج بهالموضوع ..ان شاء الله محلوله ..
ترة اني ماكتله من وگعتي ..
حتلو .. المحاضرة الجايه هو عدنه واكيد راح يسأل عني والطلاب يگلوله ..
مبايلي وين ؟
شتريدين منه ؟
خلي اخابرة لان شوفي الساعه بيش اكيد المحاضرة الثانيه بدت يعني تلكينه حارك التلفون حرك عليه ..
يله جيبي المبايل ..
ماكو مشايله لاجنطه ولامبايل .. 4

ليش ولج لعد وينهن خاف ضاعن لو انباگن ..
لاا امنتهن يم زهراء ..
ليش خاف نحتاج نتصل ع احد ..
اگلج هو اني شفت دربي من شفتج وكعتي ..
ابتسمت .. ياحبيبتي شعندي غيرج اني .. حضنتهه .. احبل اجيب ..
هههههه اي والله شكلچ راح تحبلين وتجيبين ..
اسكتي كولهه كوم وهالسالفه كوم ثاني ..
شراح تسوين ؟
ماعرف ..هو لازم اروح احلل واتأكد .
الله يعين ..
يله هذا المغذي خلص صيحي الممرضه خلي توخرة خلي نروح المحاضرة ..
اي هسه اصيحهه ..
اجتي الممرضه وخرتلي المغذي عدلت نفسي وحجابي جان مفتوح لفيته عدل وسندت نفسي ع دنيا وطلعنه من الوحده الطبيه ..
بخشمي ريحه الديتول شويه اهون عليه من ريحه الجكاير والحر ..
تمشينه ع كيفنه خلتني دنيا ع راحتي لحد ماوصلنه كليتنه تمشينه للقسم وبعدين للقاعه جنت خايفه منه .. من علي .. اتخيل عيونه شلون خازرني ..
وصلنه للقاعه .. دگت دنيا الباب ..
دنيا .. من رخصتك استاذ ..
التفت الهه علي .. جنت اني وراهه .. يعرفهه صديقتي .. عرفت عيونه تدور عليه ..
علي .. نعم ؟
دنيا .. جنه بالوحده الطبيه .. جلنار اتخربطت ورحنه .
صرت كدامه اني .. صدوك خزرني بعيونه ..
دنيا .. ندخل استاذ ؟
علي .. تفضلوا ..
ظل خازرني فتت من يمه كعدت بمكاني ..
طول المحاضرة مركزة عيونه عليه بخزرة وضوجه هسه اني شمسويه ترة تخربطت مو تقصدت ولا جنت مخططه لهل شي ..
نص ساعه واني بالي ابد مو يم الشرح ولا المحاضرة اخذ اسماء الحضور بالاخير ومن بعدهه تقرب من الستيج مالتي ..
گالي .. خمس دقايق والگاج بمكتبي ..
هزيت راسي اي ..
عافني وطلع ..
لميت محاضراتي واخذت جنطتي من زهراء فتحت مبايلي لكيت 19مكالمه من علي .. تنهدت بضيق .. كولش خلگي ضيگ ..مو متحمله وكولش الجو والحرارة متوالمني ..
سحلت روحي سحل للمكتب مالته .. شيريد يسويلي يعني ..جنت حيل تعبانه والريحه مال الجكاير هم رجعت لخشمي لذلك عندي شعور بس اريد استفرغ ..
عندي كلينكس معطر طلعته وخليته ع خشمي اريد الريحه مال الجكاير تروح واريد هذا الشعور يروح مني ماريد اتفشل اكثر ..
دكيت باب مكتبه سمعت تفضل دخلت ..
چان وجهي اصفر ..مبين التعب عليه ..
اول مادخلت ماباوعتله رأسآ اتجهت لكرسي يم الميز مالته وكعدت .
ظليت مدنكه وهو ساكت ..
دقايق واحنه ع نفس السكوت .. طكت مرارتي منه ..
محسيت بي من كام ..
رفعت راسي دا احجي لكيته كاعد بالكرسي الكبالي ..
شجابه يمي .. ماهمني لان كولش تعبانه ..
كتله .. رجعني للبيت ..
بلحظه سحب كرسيي عليه صار قريب حيل عليه ..
بلعت ريگي وهو زفر هوا حار بوجهي ..
عيونه صارت بعيوني ..
شصار ؟
دخت ووكعت محسيت بشي بعد ..
ليش ماکتيلي ؟
ليش انت تباوع بوجهي حته اگولك ..
باوعت بوجهج ..
اي واني هسه كتلك ..
اتصلت عليج مرديتي ؟
تعرف شنو واحد داخ ووكع ماحس ع روحه والعالم شالته وراحت بي للوحده الطبيه ؟؟
اشرحلك بعد لو كافي ؟؟
ومن صحيتي ليش ماتصلتي ؟
ماعرف وين تلفوني بعدين سألت دنيا كالتلي جنطتي وجنطتهه بقتهن يم زهراء واجتي وياي ..
وشكال الطبيب ليش هيج ديصير بيج ؟
ماكو طبيب بس ممرضه ..
اي شكالت ؟
فقر دم وضغطي دينزل ورادتني احلل واتأكد .
وشلون صرتي هسه ؟
تعبانه .. رجعني للبيت ..
عندج محاضرة بعد ..
اضربهه .. ماكدر ابقه .. كتلتني ريحه الجكاير ..
ابتسم .. ترة هي بس مرة دخنت ..
ماقصدي عليك .. الطلاب كولهم يدخنون متت من الريحه ..
يعني ارجعج للبيت ؟
اي ..
شلونج بالامتحان ؟
ماكملته .. هو وكعت ..
عفيه احجيلي ويه استاذ سمير وخلي يعيدلي الامتحان ..
نشوف .. سهله ..
يله كومي ..
انت عندك محاضرة بعد ؟
اي اوصلج وارجع ..
ماشي .. 3
اخذ اللفگس مالتي وطلع واني اخذت جنطتي وطلعت وراه ..
جنت اتمشه ع كيفي وهو يمشي كدامي ..
وصلني للبيت ورجع للكليه ..

[ملكةه]

البارت 20
جلنار .. طبيت للبيت فارغ ماكو احد خالتي وايه بعدهن بالدوام ..
دخلت غرفتي سبحت وبدلت ملابسي .. تمددت ..
يمكن نمتلي ساعه او اقل گعدت ع صوت صياح خالتي ..
صوتهه يلعلع جوة ..
طلعت من غرفتي اريد اعرف شبيهه ..
لكيتهه واكفه ببدايه الدرج وتحجي كلام غلط عليه فشار وحجي ميلبس عليه ثوب ..
ام الزلم ام الرجوله .. ادبسز .. فريتي عقل ابني فر مدكليلي ششاف بيج .. الصفرة الخرسه ساقطه ..
آيه تجرجر بيهه وتسكتهه وهي مستمرة بالغلط والفشار عليه ..
خاله هاي عليمن هذا الحجي ؟
عليج انتي ام الزلم ..
نزلتلهه وايه تأشرلي اصعد معليه بيهه وتسكت بامهه وتريد تجرهه للغرفه ..
ليش خاله شسويت اني ؟؟
جنت ادعي الهدوء اريد اعرف شبيه شنو شايفه عليه وهيج تحجي ..
بس شنو جسمي كوله يرجف ..
منو هذا انمار ولج ؟
ولج ساقطه گ... بيش مسكته ابني عن سوالفج ام السحورة ادبسززز ..
انصدمت اني من كلامهه ماعرفت شأرد شنو شبي انمار معقوله علي حجالهه شي زين هو شصار علمود يحجيلهه ..
خاله انمار ابن عمي وخطبني واهلي رفضوا ..
اي ايييييي خطبهه .. خطبج لو جنتي تتمعشكين وياه ..
صدوك هنا صرت خرسه ..
ساقطه ولج ابني يباوع لحلكج ..
خاله والله كولشي مامسويه شدتحجين انتي .. والله حرام عليج ممسويه شي غلط اني ..
ممسويه شي .. ممسويه شي .. شلون صلافة عين .. وتسولفين بالحرام حرمت عليج عيشتج ..
ليش خاله والله ممسويه شي .. الولد خطب بنت خالته وراح بطريقه واني هم شعدي وياه قابل والله حرام عليج هيج تحجين عليه .. 5
ماعرفت شأرد وماعرف هي شنوتعرف وشنو سامعه ومنو كايللهه ..
خلخاله بعينج وعين الخلفج ..
ظلت تفشر وتغلط .. ماكدر ارد اكثر من هيج ولا اكدر ادافع عن نفسي ..
أخير شي گتلهه .. يجي علي وهو يعرف شلون يتصرف وياج ..
صعدت الدرج ..
لحگتني شبخت وصعدت بسرعه خفت لاتوصل للضرب وتضربني ..
تهدديني بعلي .. ايييي طبعا مسكته للرجال بسحورتج انتي واختج وانوبينه هسه التافيتن ع الثاني هي هي ..
اليوم والنبي ماخليج ببيتي ..
سديت باب غرفتي وصوتهه بعده بأذني وتهديداتهه ماتوقفت وجسمي كوله يرجف ..
سمعت العياط اقترب من غرفتي دا اكوم اريد افتح الباب رأسا خالتي فتحت عليه باب غرفتي ..
طبتلي جرتني من ايدي تريد تطلعني من غرفتي ..
آي آي .. خاله دتأذيني .. هاي شكو خاله شتريدين مني ..
اليوم متبقين ببيتي .. اليوم لو اني لو انتي بالبيت ..
جرتني بقوة .. امشششششي ..
وين خاله وين ماخذتني ..
طلعي برة بيتي .. ماستقبل هيج زبايل اني بعد
بررررة بيتي يللللله
طلعتني من غرفتي وهي تجرجر بيه ..
اي اي اطلع بس خلي اخلي شي ع راسي خليني البس شي يسترني ..
عسى لا انسترتي ..
آيه تعبت من امهه .. نزلت جوة ركض مادري شسوي ..
وكت دوام ساعه ب 1وخالتي استفردت بيه لان لاعلي ولاحمزة ولاعمي موجودين يعني محد يوگف بوجهه ..
جرت عبايه راس حطتهه عليه وزتتني برة بيتهه وقفلت الباب الخارجي واسمع صوتهه من ورة الباب بعدهي تغلط وتصيح ..
بلحظات مو دقايق لكيت روحي برة بيت عيالي الي المفروض بيت زوجي .. صفيت بالشارع .. لافلوس لامبايل زين من خلت عبايه ع راسي سترتني بيهه لان دشداشتي فانيله مو كولش طويله وبطرگ نعالي ..
انهاريت ابجي وبعدني بالباب ..
بلكت الله ويجي علي لو واحد من حمويني .. شيجيبهم اقرب واحد يخلص دوام بيهم يجي ب 2ونص ..
ظليت بالربع ساعه انتظر واكفه بلكي احد يجي ..
الشمس سطرتني والحر خله نفسي تلعب اريد اقاوم ماكدر ..
صحيح دنيا الظهر بس وكت حلة المدارس والناس رايحه جايه الي راجع من دوامه والي مرجع او مودي ابنه للمدرسه واني بعباتي متلفلفه ومبين عليه ابجي والرايح والجاي يتفرج عليه استحيت كولش موقف محرج وسخيف ..
طبيت بهدومي من المستحه .. يعرفوني زوجة علي بس شعدي بالظهاري واكفه بالشارع بباب البيت ..
حته اكو زلم كبار جيران عيالي عرضوا يعبرون من السياج يفتحولي الباب عبالهم الباب مقفول ومحد بالبيت ..
تالي اضطريت اروح لاهلي مشي ..
يبعدون 4شوارع عن عيالي او اكثر ..
المهم مشيت والشمس دمرتني والحر ..
يمكن نص ساعه مشي ياله وصلت لبيت اهلي .. احس هلكت من التعب ماعندي طاقه بعد واني لامتريكه ولا متغدايه ..
دگيت الباب طلعتلي امي شافتني باجيه ومبهذله ووجهي احمر ضربت ع صدرهه ..
وج شجابج بهالظهريه هاي ؟
حضنتهه وظليت ابجي ..
شبيج يمه ؟
مستمرة بالبجي ..
تعاركتو ؟علي سوالج شي ؟
لا خالتي .. تعاركت وياي وطردتني ..
ورجلج وين ؟
بدوامه وصلني ورجع ..
ع شنو تعاركت وياج ؟
ماعرف يمه تذب عليه تهايم بشرفي وغلطت اشكال الغلط ..
وج شمسويه بعد يمعزايه ؟
والله ياماما ممسويه شي بس هي جابت طاري انمار كتلهه ابن عمي وخطبني قبل لا انخطب لعلي واهلي رفضوا وماصار شي بيناتنه ..
ماصدكتني ماعرف منو حاجيلهه ولا اعرف شذابين عليه تهم كدامهه ..
عضت اصبعهه .. ااااخ ماكو غير هاي الحيه الحاطتهه ببيتي مرة اخوج ..

وخرت عن حضن امي مسحت دموعي ..
گتلهه ..
نرجس ؟
واكو غيرهه هالادبسز ..
ربطت الموقف الي صار بيني وبين انمار وعلي وحتلو هو هالموقف من ترتيبهه بس مصار شي الا اذا مزوده بالكلام من يمهه ..
شصار يوم شمسويه نرجس ..
شفتهه بيوم عقد همس تبسبس ويه خالتج ومارتاحيتلهم ابد ..
اوووف يمه ..هاي نرجس شتريد مني .. مو عفتلهه اخوهه مو خطبوله بنت خالته مثل مايريدن ..
تغاار يمه تغاار ..
امي عافتني وراحت هدت ع نرجس جانت بغرفتهه وذيج عرمه وصوت عالي عبالك جانت متحضرة النه ..
طلع صوتهه يلعلع واللسان الطويل امي تحجي وتصيح وذيج تردهه بعشرة ..
دقايق ودخل حسام ع صايحهن ..
هنا اني جمدت بدمي .. عرفتهه خابرته واجه ..
باوعلي بغضب ..
ها دايحه شسوين هنا ..
تعاركت وياي خالتي وطردتني من بيتهه ..
هاا شسويتي وشمروج علينه ..
جنت بالمطبخ وهو ولاعبالك يسمع صوت مرته وامه اجه لزمني من شعري ..
امشي *
امشي جايه هنا شسوين ****
يغلط ويفشر عليه واني كمت اصرخ انتخي بامي ..
وصل بيه للطارمه وهو يسحلني من شعري ..
ابويه بهاللحظه دخل وكمش حسام يريد يبعده عني احس شعري تملخ جوة ايده وامي همين تحاول تخلصني من بين ايديه اخير شي ابويه دفعه اني هم وگعت ع بطني ع الصبه مال الطارمه ..
هنا بطني وجعتني الم لايطاق ..
باوعت لروحي دشداشتي انترست دم ..
صرخت يوووم ..
هي جانت لسه دتفك حسام وابويه لان ابويه راد يضربه لحسام وهي صارت حاجز بيناتهم ..
وج يووم لحگيلي ..
بعد محسيت بشي ....