السلام عليكم
اذا عندك موبايل وتمشي بالشارع .. و شفت مثلا اعلان على ورقة يحجي عن موضوع معين، او بسيناريو اخر واحد انطاك كارت تعريف لشركة او خدمة ..
سواء هيج او هيج .. اكو رابط صفحة فيس بوك .. و شفت فوكاه او جواه مساحة مربعة بيها نقاط ابيض واسود
هسة تريد تحصل الرابط .. تحتاج تنقل الرابط حرف حرف مو وتخلليه بالمتصفح مو ؟
او تسوي بحث عن اسم الصفحة داخل الفيس بوك، او داخل Google وتوصل الها
اكو طريقة اسهل بهواي .. و هي استخدام رمز QR (المسمى خطا باركود) للوصول السريع للصفحة
الطريقة كالآتي:
- افتح تطبيق الفيس بوك عل موبايل (حتى لو ما متصل انترنت)
- ادخل للقائمة الفرعية بالتطبيق (اللي من خلالها تروح عل اعدادات والصفحات والذكريات وغيرها).. تصير قائمة طويلة من الخيارات .. بحالة الاندرويد علامة القائمة .. شوف التأشير ؟
- روح على رمز QR
- اذا ما لكيته .. روح على مشاهدة المزيد او See more
- راح يفتح عندك كاميرا بيها مربع .. خللي الكاميرا عل المساحة المربعة الموجودة بالورقة اللي بيها نقاط سوداء وبيضاء
- راح ينقلك الفيس بوك مباشرة للصفحة او الموقع اللي يشير إليه رمز QR
هذه العملية تتم بدون بحث او تعب .. و هي الاسهل بس للاسف هواي ناس ما تعرفها
هسة اذا تريد تجرب .. وتروح لصفحة درر العراق على الفيس بوك .. طبق العملية على هذا الباركود (اللي كلنا اسمه رمز QR) ادناه
ها تمام ؟ اذا انته فاتح اصلا بالموبايل .. تكدر تستخدم غير موبايل تجرب بيه، .. تر الفكرة منه انه الرمز موجود عل كارت او ورقة (او تيشيرت) و الناس تاخذله سكانر بالموبايل
هسة خللي نجاوب عل اسئلة
1- ليش يسموه باركود بدل ما يستخدمون اسمه الحقيقي رمز QR ؟
السبب هو انه الباركود (رمز Bar) هو اللي يكون موجود عل منتجات على شكل خطوط عمودية .. بالغالب يستخدموه لتضمين (ارقام) بخلاف رمز QR اللي ممكن يستخدم لتضمن اي نص (بضمنه الروابط)
2- شلون اقوم بتوليد رمز QR لصفحتي عل فيس بوك، ملفي الشخصي، او موقعي ؟
هذا موقع مجاني يخبل https://www.qr-code-generator.com/ .. بس اذا كلك سجل ومدري شنو البسه .. خلص شغلتك منه و حصل صورة رمز QR و عوفه
3- اللي ما عنده تطبيق فيس بوك .. يكدر يستخدم رمز QR بالموبايل ؟
نعم ممكن جدا .. الوظيفة هذه ممكن استخدامها عن طريق تطبيق اسمه QR & Barcode Scanner .. اللي يحب ينصبه .. تر بيه اعلانات فتجاوزها باخلاقك.. بس احسن شي بيه ما يحتاج صلاحيات غير الكاميرا
رد مع اقتباس
