كلمات قصيدة يافاقد امك (مكتوبة) باسم الكربلائي
يافاقد امك لاتظن .. يتلاكه جفنك ع الجفن
من شمعة امك تنطفي .. ماتنطفي شموع الحزن
________________________________
من غير امك لاتظن ... تحله الحياة وتنسعد
وشلون تدخل بيت إذا ... مابي تشم ريحة ورد
امك برد وكت الدفو ... امك دفو ابوكت البرد
مادامها كبالك تحس ... لدنيه توك منولد
لوماتت ايموت الوفه ... وتموت كل العاطفه
تخسر القلب العاطفي ... ماتنطفي شموع الحزن
_______________________________
مثل امك الجرحك ابد .... محد يداويلك جرح
وجناحك امك من زمن ... تنوكل ي المالك جنح
شمسك وإذا غابت بعد .... ماتلمح عيونك صبح
ملحة حياتك والعمر ... ماصخ يضل ابلا ملح
لوشيب راسك مشتعل ... بعيونها اتشوفك طفل
كل ماتشوفك تحتفي ... ماتنطفي شموع الحزن
_______________________________
شنهي الشعور البي تمر ... لوشاهدت موقف صعب
وتشوف بابك يحترك ... وامك اكبالك تنضرب
وتشوفها تون والضلع ... مكسور والمدمع يصب
وبكل صلافه ولاخجل ... ينوخذ حكها وينغصب
ينسب ابوها وينشتم ... وتسبه اشباه الزلم
والثاني بأهلك مشتفي ... ماتنطفي شموع الحزن
_______________________________
شيصير كلي ابحالتك! ... بالمكبرة لمن تمر!
بس انته من دون البشر ... ماتلكه عد امك كبر
والادهى من هاي واشد ... وشلون تتحمل صبر
من ترجع لبيتك تره ... ماتلكه امك تنتظر
شتسوي وانته بهالوضع! ... باب اعله امك يندفع
وتعوفك ام قلب الوفي .... ماتنطفي شموع الحزن
_______________________________
شيصير بيك ولوشفت .... باب اعله امك ينطبع
وتشوف أثر نار الحطب ... بطراف جفها المحترك
وشلون عينك ماتهل .... والقلب خايف من يدك
وتشوف كل جرة نفس ... امك اكبالك تختنك
ياناس هذا الي جره .... ويه امي لبوة حيدره
والباري بيهم يصطفي ... ماتنطفي شموع الحزن
_______________________________
بعد امي شفت المايمر .... بعيونكم ي اهل البصر
ظهري بعمر خامس سنه ... وي كسر ضلع امي انكسر
كل دمعه تنزل ع الوجن ... مثل الجرح تترك أثر
لجل العليه ساهرت ... ذبل ضوه عيوني السهر
بعد امي نزلت دمعتي ... طفله وصرت ام لخوتي
وبأثر فاطم اقتفي ... ماتنطفي شموع الحزن
_______________________________
للأم مكانه ومنزلة .... يخسر تره المايتعض
ربك الاول بالسمه .... والثاني هيه اعله الأرض
من تعترضها بـ أي أمر ... يعني لإلهك تعترض
خمسة الفروض الواجبة ... طاعتها إذن سادس فرض
كل حب هواءٍ في شبك ... بس حبها ضل دايم الك
ولهل سبب من تختفي .... ماتنطفي شموع الحزن
_______________________________
يرجف جسمها ابلا برد .... لومستك نسمة هوه
يعطش قلبها من البجي ... ومن الدمع خدها ارتوه
ياضوه البيت ولومشت ... مايرجع لبيتك ضوه
سبحان رب الي جعل ... طاعته وطاعتها سوه
امك إذا ماشافتك ... تركض تروح الصورتك
منك ابد ماتكتفي ... ماتنطفي شموع الحزن
_______________________________
ڪلمـات الشاعر الرائع : ناظـم الحـاشـي
___________________________
كتابةة ~` : زهـراء العبيـدي
رد مع اقتباس
المشاركة الأصلية كتبت بواسطة صفاء العامري
