يشوفوك لازم الموبايل حاطه يم اذانك دتحجي .. مع هذا يسألوك (دتخابر؟) لا دا أجرب اذاني تشتغل لو لا؟.
لابس ومتأنق وحاط عطر ، يشوفك الوالد (ها ابني طالع؟) لا يابة دا ألعب ختّيلان بباب الحوش.
نايم دتشوخريجي أخوك يصيح اسمك 10 مرات تفز من النوم (ها شكو شبيك؟) يكلك (نايم؟) لا منايم دا أصور سيلفي وية المخدة.
كاعد تفر بالصحن مال ستلايت وعيونك طالعة تريد تلتقط القمر، يسألك أبوك (دتسوي الستلايت؟) لا يابة دا أضربه أوتي لأن متعقِّج.
فارش كتبك ودفاترك وعينك معمية بالقراءة، تشوفك أختك (ها كاعد تقرأ؟) لا دا أثرم عليهن لحم.
تَوَّك راجع من الشغل لو من الدوام ، تشوفك الوالدة (ها يُمَّة اجيت؟) لا بعدني بالطريق ازدحام.
شايل كتبك ودفاترك ولابس زي موحَّد ، تجي الحجية الله يحفظها (رايح للكُلِّيَّة؟) لا رايح للملعب شوية أتدرب عندي روحة وية المنتخب العراقي لنهائيات كأس العالم.
كاعد تاكُل يجي واحد يكُلَّك (دَتاكُل؟) لا دا أفحص سنوني سويتلهن ضبط مُصَنَّع.
لو يجيك واحد يكُلَّك (ليش تاكُل؟) شسوي أحسن مما ينذب بالزبالة خلّي آكله.
يجيك فد محشش يسألك شِسمك؟ تكول له ..... يكول لك ليش؟ بالله هذا شتسويله؟ حُبي جنت أتمشى بالسوك لكيت ديبيعون أسماء اشتريته. أكو جواب بعد أَضْبَط: جيراني وزَّع أسماء بثواب أبوه وانطاني واحد كلت أسمّي بيه نفسي ليش أشمره بالكنتور ويصير عتيك.
ملاحظة: بعض الأسئلة منقولة بالتصرف وبعضها من عندي، لحد يخمط بلا ما ينطي تقييم.
رد مع اقتباس
المشاركة الأصلية كتبت بواسطة ابوعلي/
