المشاركة الأصلية كتبت بواسطة سارا~
من أيّ أبواب الثناء سندخل وبأيّ أبيات القصيد نعبر، وفي كلّ لمسة من جودكم وأكفكم للمكرمات أسطر
من أيّ أبواب الثناء سندخل وبأيّ أبيات القصيد نعبر، وفي كلّ لمسة من جودكم وأكفكم للمكرمات أسطر
السلام عليكم
اشلونكم ان شاء الله الكل بخير وصحه وعافيه
ورمضان كريم عليكم وينعاد على العراق بالصحه والامان ان شاء الله
اليوم راح احجيلكم على اسوا 9 ايام عشتها بحياتي
طبعا بالبدايه احب اشكر صاحبة الموضوع على الاموضوع الجميل وعلى الاستضافه
الموضوع بين رمضانين اني راح احجي قبل هذاك الرمضان ابـ 25 يوم
رمضان صادف يوم السبت 27 مايو 2017
اني راح احجيلكم من يوم 2/5/2017 كانت بدايه الحرب على الجانب الايمن من الموصل واكانت اول منطقه تتحرر من جانب الايمن من الموصل
طبعا راح تتسائلون ليش ماطلعنه من الموصل اول شى بقانون داعش الي يخرج من ارض الاسلام هو كافر ومرتد ويحل قتله
ويتصادر كل الاملاك والصراحه المحلات الي عدنه يقدر قيمت الغراض الي بيها بي مليار ونص دينار عراقي
يعني مكاين معامل مواد بلاستيكيه والي يشتغل بهذا المجال هو يعرف قيمت الغراض والبيت يقدر ب 200 مليون دينار عراقي
اذا نطلع وننهزم من الموصل كل هاي الاملاك تتصادر من قبل داعش وتتحول الى سوريه وتنباع
فضظرينه انو نبقه بالموصل من اجل سلامه المحلات والمعامل والبيت
يوم 2/5 بدت الحرب في تحرير داعش الانجاس من قبل القوات العسكريه البطله ربي يحفظ جميع القطعات العسكريه العراقيه
راح ابدي احجيلك يوم بيومه ان شاء الله ماطولها عليكم
ملاحظة
اني اسف على الكلمات المتصله مع بعض او غلط بل املاء لان راح اكتب عل سريع
اليوم الاول
بسم الله نبدي
كل الجانب الايمن ميتين من الجوع ماكو اكل ماكو ماي كهرباء ماكو الناس تتمنا الموت الاكبار تتحمل بس الاطفال ماتتحمل
الكل متحمس على يوم التحرير بس صراحه كان يوم جحيم مو تحرير بدت القطعات العسكريه نحوه المنطقه لتحريرها من داعش
القوات العراقيه جايبين صواريخ من ضمن الصواريخ اكو صاروخ اسمه نمر النمر هذا الصاروخ كارثه بحق الجميع
صاروخ ييخلو على قاعده ويطلقو الله واعلم طول الصاروخ 3 امتار اذا وكع بفرع احتمال يطير 4 بيوت من قوه الصاروخ
طلقو اول صاروخ على المنطقه الي احنى بيها وكع الصاروخ بعيد على البيت حوالي 700 متر او اكثر طبعا بهاي الحاله
الكل نايمين من وكع الصاروخ طارت الابواب انكسرت الجامات الشباك صار نصين الباب ضل بس الملبن
العصف والتراب داخل البيت مااعرف احمي زوجتي وبنتي وامي لو اركض لو الطم لو شسوي
صفه الجوه ماكو ابواب الشباك صاير نصين شى يطير حتى العقل من الراس كمت جبت بطانيات وخليتها بمكان الباب والشباك
في سبيل الحمايه من الشظايه وبده اطلاق النار من جميع الجهات وبدت تنزل علينه صواريخ الهاون عيار 180 م لان الجيش
كان بمسافه بعيده مايفيدهم الا هذا الهاون المهم صارت الدنيا ظهر الطلقات شغاله ودبابه البرامز تضرب من بعيد
والله طلعنه اني واخويا وابن خالتي فوك السطح
شوف الجنون الي بينه جبنه مواد الاكل وكمنه نطبخ فوك السطح
هاي الصور الطبخه
صور
يكون للعلم كيلو البصل بـ25 الف بس اني جبتهم من بيت جيرانه ربي يحفظهم ساعدوني كالو يالله كلنه راح انموت اخذ اكل قبل لا تموت ههههه
احنى نطبخ الحرب شغاله وهذا التسجيل سجلته ودبابه البرامز تقصف بينه ياريت من الكل الاستماع للتسجيل حتى تكونون في ارض الواقع
التسجيل طوله 13 ثانيه
كملنه الاكل ونزلنه الاكل ودا نتغده
صوره الغداء
وبنفس الوقت الحرب شغاله طلقات صواريخ وطيران عراقي وطيران امريكي
بالمناسبه الطيران الامريكي كانت طائره
B 52 أقوي وأضخم وأفتك طائرة حربية يمتلكها الجيش الامريكي - ...
هاي تقصف عده مكانات
دا ناكل الاكل الشهي الي سوينه ليش مو الطيار العراقي يضرب البيتونه بصاروخ
الطيار العراقي يقصف من بعد 2000 كيلو يعني ميشوف منو الي يركض منو واكف يضرب طلقات وصواريخ ويروح ياخذله فره
نكول طلع الاكل من خشمنه
العصر انطلق صاروخ نمر النمر الثاني الله واكبر مااعرف وين اروح اركض بالبيت بالغرف لو الطم لو اتشاهد
الصاروخ ينطلق من القاعده المده مالته 30 ثانيه وينزل على الارض الصاروخ هم وكع بعيد عن البيت
هم طارت البطانيات وفات الاتراب وخربت الدنيا
طبعا من احجيلكم على صاروخ نمر النمر شى خيالي يعني من يعبر من فوك البيت الاستكاين مال الجاي تتحرك من قوه الصاروخ
الحمد لله وكع بعيد عن البيت
الساعه 6 المغرب وكف اطلاق النار الجهتين استراحو لان الحرب تبدي من 6 الصبح الى 6 المغرب
طبعا ماكللكم مانمنه بس نومه الخوف كانت .وكانو الدوعش يفترون بليل يحضرون روحهم لليوم الثاني
انتهى اليوم الاول
اليوم الثاني
اصبحنا واصبح الملك لله
ساعه 6 الصبح اشتغلت الحرب طارت الطائرات العراقيه استلمنه الصاروخ الثالث الي هو نمر النمر الله واكبر
وكع اشويه اقرب من الي قبله هم نفس الحاله احنى الي علينه بس نتشاهد ونصيح الله واكبر هم دخل الاتراب والصوت يبووووو
طبعا الصاروخ من ينطلق من القاعده بي صوت يخوووف من ينطلق بي شخيط فالناس سمت هذ الصاروخ ابو شخطه من قوه الصوت
يعني من ينطلق الكل تعرف هذا صروخ نمر النمر بيك خير واختل جوه الدرايج جوه القنفه جوه زوليه جوه اي شى وتشاهد لان راح تموت
ساعه 9 الصبح اجو كرايبنه دكو الباب بكل قوه فتح الباب اخويا الجبير ودخلو كرايبنه تشوف الوجوه صفر والخوف والرعب بقلوبهم
خير اشصاير كالو وكع صاروخ مال هاون بكراج البيت طبو طبو يا هلا ومرحبا الرجال يا شنو هلا ومرحبا جاي تعزمني بالمطعم
كلته يالله كلنه راح يشوونه بيوم القيامه ادخل
ابهاي الحاله احنى 7 اشخاص العائله وكرايبنه 4 صرنه 11 نفر يالله ع اقل اكو ناس تسلينه على هاي الحرب وهذا الصاروخ
تريكنه وخلصنه طبعا المطبخ انتقل لى جهه الحمام يعني الحمام صار مطبخ شنسوي المطبخ مستهدف بس الحمام امان
انطلق الصاروخ الرابع نمر النمر ساعه تقريب 12 الظهر واحنى الشباب واحد فات بحضن الاخر مشكلتك هاي تحضن رجل اخوك
تحضن راس كرايبك هاي انت وحضك والنسوان تصرخ والكل تتشاهد وكع الصاروخ اقرب من الي قبله
الدبابات تطلق صواريخ والطياره تضرب وطلقات من سلاح خفيف وسلاح ثقيل
خلاص تفكير ماضل عقل توقف الايد ترجف الرجل ترجف القلب صار الدكات 300 خلاص ماكو مفر غير الموت
التحرير صارت معجزه محد يصدك انو يطلع من هاي الحرب
ابو الطياره يضرب طلقات وصواريخ وانت وحضك توكع بالشارع توكع ببيتك انت وحضك
دامت الحرب الى المغرب وساعه 6 كل عاده انتهى اطلاق النار من الطرفين والكل راح يستراح
والي عنده مجروح يودي ع مستشفى والي عندي مقتول يدفنه بالحديقه
وكل عاده صار الليل ومحد يقبل ينام من الخوف
اليوم الثالث
صار الصبح كال عاده الشباب محد عرف طم النوم كاعدين الليل كوليته نسوالف الي راح يموت صاحبه اشراح يسوي
منو يدفنه منو الي يدور وره على ديانه بالمحلات منو الي راح يدير بالى على اهله منو الي راح يروح يم جماعه
ويكو هذا الشخص جان يحبكم ويريد الطيب الكم
المهم صارت ساعه 6 الصبح وشتغلات الحرب
مقابيل بيتنه اكو مدرسه اسمها الصادق الامين ابتدائيه للبنين هاي المدرسه كانت معقل لداعش كانو يصنعون الصواريخ . العبوات الناسفه
طلقات ي شى تتوقعونه كانو يصنعو وبنفس الوقت كانت الصفوف مليانه اكياس طحين جابو داعش علساس من تصير ازحمه يوزعوها للفقراء
والحقيقه صحيحه من صارت الازمه كامو يتوازعوها بيناتهم بس فمن صارت الحرب انسحبو من المدرسه بقه بس غراضهم
معداتهم صواريخهم عبواتهم والطحين . كانو يوميه يجون بالسيارات ياخذون عبوات وصواريخ ويروحون
اليوم الثالث ساعه بل 8 الصبح دخلو داعش للمدرسه حتى ياخذون العبوات والطياره الامريكيه شافتهم وقصفتهم وماتو 4 من داعش
العالم الفقراء والمساكين والي ميتين من الجوع هجمو ع مدرسه حتى ياخذون طحين لان خلاص مابقه بس الطحين بالموصل
اجه واحد وصارو 2 وصار 10 وصار بل 200 شخص ينقلون طحين من المدرسه على بيوتهم ابو الطياره يجي يشوف هاي الناس على شنو ملتمه
هو ميعرف الناس ملتمه ع الطحين فيكوم يقصف المدرسه والناس تتختل من يورح ابو الطياره الناس تطلع
الناس ماتحسب حساب شى بس انو ينقل الطحين وخلاص صحيح اكو ناس ماتستحي لان نقلت اكثر من 12 كونيه طحين على بيتهم
بس شنسوي كلمن ونفسيته واحنى نباوع عليهم من الطابق الثاني والناس تنقل طحين احنى فضل من رب العالمين وربي
يطول بعمر الحجي ابويا ممخلي قصره بمكان الكونيه عدنه 4 ميحتاج نروح وناخذ من المدرسه المهم انصيح ع عالم يمعودين
هسه يرجع ابو الطياره ويصيلكم شى لالا محد يدير بال رجع ابو الطياره وقصف المدرسه ب 7 صواريخ
الجرحه كانو 4 رجال والقتله طفل بعمر 12 او 13 سنه بهذا الوقت الناس حست وكلمن راح ع بيته
رجع ابو الطياره قصف المدرسه وشعل الطحين في سبيل لا ترجع الناس ع المدرسه واحنى بحالت حرب
وره اشويه انطلقو صاروخين نمر النمر وكل عاده الكل تصرخ وتتشاهد وتصيح الله واكبر الصاروخين
وكعو بالمدرسه والله يا جماعت الخير وبدون مبالغه من وكعو الصاروخين عبالك احنى بجهنم النار دخلت علينه والشضايه والبلوك والحجر
وكلشي طب علينه عل بيت بس الحمد لله الكل بخير بس النسوان تبجي وتصرخ وامي خلاص ماضللها اي قابليه بعد للحياة
تعرفون الام العراقيه سكري ضغط قلب ومن هل سؤالف
والدواعش يفترون ولا يهمهم كلشي بس يحبون يجون علينه ويرزلونه
اشلون جانو يرزلونه
يالله اطلعو من البيوت اشتنتظرون من هذوله الروافض تنتضرون يحرروكم والله ليسبون نسائكم ويقتلون اطفالكم وياخذون شبابكم
المهم احنى نكللهم اي مو مشكله اليوم نطلع شنسوي مانكدر نحجي (حكم القوي على الضعيف )المهم
الي عنده سياره عاليه وحديثه مثل كيه او سورينتو ياخذوها كوه مايعجبك طبك مرض ياخذوها ويفخخوها
وتقدم الجيش يكون بطيئ لان هاي حرب مو لعبويه مال جهال
والدبابات تضرب والسلاح الخفيف والثقيل والطيارات تضرب لي المغرب
وكل عاده صفر الحكم ساعه 6 المغرب والفريقين يستراحون على ضربات الجزاء
وهاي اشويه راح انصفي راسنه وناكل اشويه ونريح اعصابنه من هذا اليوم الي كان اشبه بالحجيم
هاي صور المدرسه
صوررر
اليوم الرابع
كل عاده صفر الحكم بدايه المباره ساعه 6 الصبح ماادري اشعنده الحكم اني الي اعرفه استراحه ربع ساعه شو العنينتين انطيها 12 ساعه استراحه
المهم اول ما صارت ساعه 6 الصبح طار صاروخ نمر النمر هذا ريوك ههههههه
ووكق وره المدرسه طبعا وره لمدرسه اكو بيوت لناس فقراء المهم وكع الصارون وفلش 3 بيوت وماتو كل العوائل
احتمال 16 نفر او اقل الجوارين تصرخ وتصيح والي بطن البيوت كلها ماتت
..............
شنو ذنب الفقير اذا حاب يعيش
حتى العيشه صارت علي حسره
ندعي من الله يرحم موتانه وندعي بحسره
الماله لكمه ابهاي الدنيا
يجي الصاروخ ومن دنيتا تخلصه
.......
فرحة الميت لاتصدق عندما يصله دعاء من أهل الدنيا اللهم ارحم موتانا وموتى المسلمين،اللهم طيب مضاجعهم وآنس وحشتهم وأجعل قبورهم رطبة بماء الجنة
رحم الله من لم يحضروا معنا هذا العيد وأبدلهم داراً خيراً من دارهم
وكسر ايد كل ظالم وحقود على هذا البلد
........
الناس تصرخ والاطفال تبجي والنساء تلطم والرجال يبجون على هاي الفاجعه
بعد ميفيد تروح وتشيل الانقاذ الكل ماتت والطلعه من البيت تعتبر موته بحقك وبحق الجميع
والقوات العسكريه تتقدم وداعش ادز سيارات مفخخه
طبعا بيتنه ركن فالسياره يجي من مقابيل بيتنه ويطب للفرع والله من تعبر السياره الله واكبر وهيه محصنه بالحديد
ومعباة بالعبوات والصواريخ من ثكل السياره الحديد يشخط بالشارع والله من يشخط الحديد عبالك بقلوبنه انريدها بس تروح
تولي ينفجر وان شاء الله ع جهنم يارب يروح وينفجر وونشوف الكاع اشلون تنهز تكولون زلزال
صار الظهر واحنى واحدنه مايعجبه ياكل ولا يشرب ماي
على فكره ماي ماكو مشاريع انقصفت ندعي من الله انو تمطر الدنيا في سبيل نجمع الماي بالسطح ونخلي بالتانكيات في سبيل
نشرب او نتوضه او اي شى
والحمد لله رب العالمين ماينسى عبده وجانت الدنيا تمطر بشهر الخامس في سبيل هل فقراء والمساكين الف الحمد والشكر لك يارب
لي ساعه 6 المغرب دايمه الحرب فوك روسنه واحنى خاتلين الي جوه الدرايج والي جوه البطانيات والي والي الخ...
ساعه 6 صفر الحكم والفريقين رايحين الى الاستراحه والكل تعبانين 12 ساعه حرب طلقات صواريخ طيارات نمر النمر
كتلكم ماضل عقل بس القلب يشتغل صار الليل وطلعت العالم وراحت ع 3 البيوت الي انقصفت وطلعو الميتين ودفنوهم بالحديقه
لان ماكو طريق على المقابر ماكو طريق ع المستشفيات هذ الطريق يوديك ع موت فظطرينه انو ندفن الميتين بالحدايق
منظر مبشع الله واكبر
ورجعنه على بيوتنا والحزن ياكل بينه اكل والصفنات تودينه الى البعيد البعيد والكل ضايجه ومتنرفزه والعيون تبجي على المنظر الي شفنه بالنيتين
الله واكبر
المهم خلص اليوم وكل عاده محد عرف طعم النوم بس ضلينه اشلون نموت وشلون راح يحققون ويانه الملائكه
اليوم الخامس
صفر الحكم على بدايه الشوط الخامس والله الي يستر
طارت الطياره وتشغلت بينه مثل الي يهف الجمر حتى يستوي الكباب
وشتغلت علينه ضرب الهاونات الصواريخ صارت علينه مثل المطر الاحمر الجيش صار قريب وصوت الطلقات صارت اقوه
وصوت الدبابه ينسمع وصوت الاغاني تنسمع وشتغلت علينه السبحه الطلقات من جميع الجهات بالسطح بالحايط ابيت جيرانك
كتلكم الواحد هو وحضى الي امسوي زين وطيب ويا رب العالمين انحفظ والي ممسوي زين راح انقتل
والله واعلم احتمال حتى الي امسوي زين مات لان اهواي ناس ماتت
سمعنا صوت شخيط الحديد عرفنه سياره مفخخه اجتي والكل تتراكض مانعرف احتمال يضربها الطياره يم البيت الله واعلم
الكل تتراكض وتختل والله اجت السياره من يم البيت وعده ع خير وراحت وطكت ونهزت الكاع
وحنى نسؤلف ويا بعضنه نكول اذا طكت يمنا اشراح يصير بينه
وصار الظهر واحد من كرايبي رجال جبير كال اني اروح اشوف البيت اشاصير بي وارجع يمعود ابو فراس كول يالله
الدنيا خربانه بره وانت البطران تريد تروح لك انت اكو براسك عقل كال اني ايست مابقى شى واصير مجنون اني رايح
اشكد جلبنه بي ميفيد راس يابس المهم راح للبيت واحنى ندعي يارب يرجع يارب احفظه يارب مايصير شى
المهم اجه كال والله ماكو شى بالبيت الحمد لله مصاير شى بس اكو ناس جاين ع بيت وماخذين المواد
عمي بالعافيه عليهم المهم انت رجعت بالسلامه
صار العصر ونطلق صاروخ نمر النمر وكع بالفرع مالتنه من قوه الصاروخ بيت جوارينه انشلعت البيتونه مالته
وحترك الطابق الثاني وسياره بيت جوارينه الاخر احتركت
ابهاي الحاله صارت لميه بين العالم جيرانك يجي يمك انت تروح يمهم لان خلاص نص البيوت احتركت وتفلشت
المهم صار المغرب وكل عاده صفر الحكم ع انتهاء الشوط الخامس يالله دي ع استراحه
صار الليل طلعنه نشوف منو المجروح منو الميت منو بيته خربان منو انهجم بيته
بس الحمد لله مصاير شى كل 3 او 4 بيوت صايرين ببيت واحد الكل تجيب غراضها وموادها ويلتمون
الاكبار ماتعجبها تاكل بس الاطفال خطيه ماتت من الجوع والعطش
وكل عاده ماكو نوم ننتظر يوم جحيم السادس
اليوم السادس
بسم الله
كل عاده صفحر الحكم ساعه 6 الصبح على بدايه الشوط السادس
طارت طائرات العراقيه والحربيه الامريكيه وطائرات التجسس الامريكيه
وبدت الحرب طبعا مراح نكول حرب راح نكول يوم الجحيم لان قريتو بالايام الماضيه
الجيش العراقي يتقدم بس اشويه اشويه سلامة على الجنود
اشتغلت الطلقات والمدافع والهاونات كامت توكع علينه الصواريخ مثل المطر
مره بالشارع مره بالحديقه مره بالسطح صارت ساعه بل 10 الصبح اجو الدواعش على بيت جيرانه
بيت جيرانه بي شايب والعجوز متختخين ع اخير يعني ضللهم كم يوم ويودعون
طبعا الشايب امام جامع وشيخ المفتيين بالموصل الدواعش خلال 3 سنوات جانو يلحون علي انو يبايعهم بس هو يرفض
هذا الشى لان يعرفهم مو على حق غلط في غلط المهم اجو الدواعش دكو الباب ع الشايب
طلع الشايب كلوله حجي انت ممسوي شى لله ولا قبلت تبايعنه على السمع والطاعه وعلى هاي الحاله راح ناخذ سيارتك
اكيد راح تكسب بيها حسنات يوم القيامه لان راح ننقل بيها اسلحه وننقل بيها الاخوه كلمه الاخوه يطلقوها على انفسهم
اخذو السياره من الرجال السياره من نوع افيو موديل 2012 اخذو السياره وراحو وضل الشايب مقهور وحزين ويدعي عليهم
شيسوي (حكم القوي على الضعيف) المهم صار الظهر زكتلكم طلقات وصواريخ طبعا احنى تعودنه على الطلقات والصواريخ
وصواريخ الدبابات هاي كلها صارت عدنه مو شى بس لا يطلقون صاروخ نمر النمر هذا الشى الي يخوفنه
ويا الجيش العراقي اكو جماعه سموهم الشبكات المتحركه هذوله عدهم سياره جبيره مثل اللوري بيها برج شبكات هواتف
في سبيل الجيش يخابرون بين بعضهم وفي سبيل العالم الي توصلها الشبكات حتى تنطي معلومات للجيش فاناي بليل كتبت
اخر ابوذيات 2 كلت خلاص راح نموت فكتبت الابوذيات ودزيتها الابن خالتي الي متحرر بالجانب الايمين الابوذيه تكول
طبعا اني وابن خالتي من الولاده وهو اككبر مني بشهر واحد يعني نحب بعض بشكل جنوني دزيتله المسج واني بخوف ومرعوب
لان من يشوفوني الدواعش يقتلوني بمكاني مابيها مجال راح يكولون ها جاي ترسل رساله للجيش وتنطيهم معلومات
يقتلوني مثل ميشربون زقنبوت الله ينعلهم
الابوذيات
ياصاحبي اني وياك انروح والشوك يردنه
والمحبه البيناتنه همات تردنه
بحدايق اهلنه متروس وردنه
اهديلك ورده وبوسى وياها حضنه
يا صاحبي عليك اشلون قلب شايل منا مامل
وحبك لو صخره علي مامل
امل البشر كلها ومن حبك مامل
وعلي لا تبعد اترجاك
طبعا رد عليه برساله
ويكولي لك كافي ابنل .............
والله طكت الدمعه من عيني ولك كافي ان شاء الله تتحررون
وماكو شى وترجعون على بيوتكم وتعمروها
واشوفك بخير وسلامه واعزمك على احلى مطعم
المهم صارت الدنيا عصر والجحيم مشتغل بره وناس تكتل بناس الدواعش كل اشويه جايبين واحد مجروح والجيش كذالك
الجيش انضرو بالمفخخات الله ينتقم من الدواعش ولا كحرب شوارع الافضليه للجيش البطل
المهم صار المغرب وصفر الحكم والكل راحت تسراح وحنى هم نستراح لان اليوم كان بعدال سنه بالنسبه النه
صارت ساعه بل 10 بليل اجو الدواعش على بيت يرانه الشايب الي اخذو من عنده السياره دكو الباب كلوله حجي
راح نجيب سياره مفخخه ونطببها ببيتك وبكيفك تريد تضل تريد تطلع هاي مشكلتك ليش لان الحجي عنده سقيفه بالكراج
حتى الدواعش من يجيبون السياره ويحطوها بالكراج الطياره ماتشوفها
الحجي يتوسل بيهم يمعودين وين نروح كولو يا الله وهمه يصيحون ع حجي هاي مشكلتك تذكر من كنالك تعال بايع وانت رفضت
مشكلتك هاي احنى رايحين وهسه راح تجي السياره المفخخه والله الحجي اخذ الحجيه وطلعو من البيت راحو ببيت جوارينه
لي فوك اشويه والله الدواعش جابو السياره وحطوها بالكراج وراحو البيت الطبك ويا بيت الحجي طلعو من البيت اجو عدنه
ساعه بل 10 بليل والناس تصرخ وتبجي استقبلناهم همه 11 نفر واحنى 11 صرنه 22 شخص فريق كره قدم كامل
صرنه 12 شاب مع ابويا وابو كرايبنا وطفل صغيرون و10 بنات مع الاكبار
انتهى يوم السادس مو على خير لان المصايب توها بدت
لقاءات رائعه وي اشخاص رائعين استمعت بقراءه نص من حياتهم شاكره لهيج مواضيع راقيه كصاحبة هالموضوع تحياتي الج رحيل
