تَوَّك راجع من الشغل تعبان لو مكروب من شغل البيتوكاعد تتغدى لو تتعشى، يجيك واحد حبّاب يدُك الباب .. تغلس عليه يدُك الجرس .. تطفي الجرس يكسر الباب .. رحت فتحت له وخلصت حَجي ورجعت حتى تاكُل يجيك واحد ثاني وثالث و......، بحيث متفتهم شي من الأكل #انقرضو_لخاطر_الله.
تريد تنام الظهر وترتاح فَد ساعة،يجون يكعدوك بطريقة مرعبة يفلشون باب الغرفة بحيث تتصور صار زلزال لو عصابة اقتحمو البيت، تفِز من النوم تصيح (ها ها شكوووو؟؟)
يكولولك روح اترس المُبرِّدة مَي والمصيبة هُمَّ يكدرون يترسوها، #اللهُ_أكبر_عليكم
.
تريد تباوِع لعبة لو تتفرج على فيلم، أهل الكهرباء الوطنية يصيرون خوش ناس ويطفّوها عليك، أبو المُولِّدة يصير خوش آدمي أكثر منهم يتأخر بالتشغيل، وإذا صعدت عنده الإنسانية فول كل شويَّة يطفي عليك الجوزة بحجة ساحبين زايد مع أن الجوزة إلكترونية اذا توصل للحد الأقصى تفصل من وحدها وانت ساحب 10 أمبيرات ومستخدم بس 7،تخلص اللعبة لو الفيلم وانت كل شي ما مفتهم #سحقاً_لك_أيها_الخمّاط.
كاعد تقرأ كتاب لو تلعب لعبة صعبة، كل شويَّة صايحيك بشغلة، (روح جيب صمّون، تعال اترس المبرِّدة، كوم جيب طُرشي .....) لحد ما تمل وتترك الكتاب أو اللعبة، #حرام_عليكم_نَفَسي_انكطع.
دتخابر صديقك أو خطيبتك أو أياً كان، البيت كله يحاجيك، (الحجية: يُمَّة عود جيب خبز ولِبَن من تكَمِّل، الحجّي: وين الجاكوج والبسامير الكونكريت والدريل؟، أخوك: أريد الشاحنة مالتك لأن شاحنتي احتركت هسة وموبايلي هابط، أختك: تعال نزِّل هدومك حتى أغسلهن وبدربك جيب البردة مال الغرفة،)، تخلص المكالمة وانت ملعوب بيك جولة ، هم اللي يخابرك مزاعالك خصوصاً اذا جانت خطيبتك، والأتعس تجي تلكاهم مسوين كلشي طلبوه منَّك ومن تسألهم (لعد ليش صار ساعة تحاجوني) يستلموك مقاولة (طبعاً اذا انت سنة تلغي تريد ننتظرك، لا خلف الله عليك ......) وأنت المسكين استغرقت أقل من ربع ساعة بالاتصال #ليش_هيج_يا_مجرمين؟_والله_آن ي_خطيَّة.
يدِزّوك على شغلة ويكولولك بكيفك وساعة السودة من هالكلمة، مثلاً يدِزّوك على معجون تسألهم (شتريدون توسان لو أميد؟) يجاوبوك بكيفك، تجيب توسان تترزل ليش ما جبت أميد .. تجيب أميد يستلموك ليش ما جبت توسان، يدزوك على صمّون يكلولك اشتري لو ب1000 ونص لو ب2000، تشتري ب1500 يكولولك هذا قليل لو جايب ب2000 .. تشتري بألفين يعيطون عليك شدعوة لو مشتري بألف ونُص، #تحيّرون_الما_يحتار.
يدزوك على خبز تشتريه وترجع، يدزوك على لبن (وطبعاً أبو اللبن بصف الخبّاز)، تجيبه وترجع يوصوك على طرشي هم أبو الطرشي كبال أبو اللبن والخبّاز و.... لمّن ينكطع نَفَسك وتتكسر رجليك، كل هذا ويكولولك مهمل ليش ما جبت كذا وكذا؟ #والله_حرام_تكسرت_رجلي_من_ال ركض.
ممنوع النقل والنشر بدون استئذان، أَقيم عليكم دعوى لأن تعبت بكتابتهن.
رد مع اقتباس
المشاركة الأصلية كتبت بواسطة Giant
