كون اتعرف ناسك كبل شرب الماي
وكَبل الماي ميّز معدن الطاسه
لاتنشد المنجل ليش مات العود
مات العود جيفن ماعرف ناسه
شجرة شلون شجرة تصادك الحطاب
واتأمن متنها بركبة الفاسه
شلون انطيت كَلبك وانت كلبك جام
اشمالك ماشفت بجفوفهم ماسه
اليمشي بكيف غيره ايعيش مثل الفاس
التنور ياكل والدوي ابراسه
وادمنه بشر لكن بشر من جام
ياهو تمدله ايدك لازم يكصها
عينك لاتحطه ابإيد ياهو الجان
المايذبح حلمهه إيبسط بفصها
كبلك جنت اظن الناس عدها كَلوب
يشعبها الهجر والشوكَ يكرصها
لكن بيّنت من باكني التمساح
عركَت فولها وماعَركت اكَصصها
يمحمد الوادم سمل وصلة كاع
جاب ابليس وخيّم ابنصها
ناس السلمتهه اسنيين عمري الجاي
خذت من حصّتي وماجاست احصصها
امس نفس الاحلوك الهسه بيه اتلوج
غصصت العظم من شفته غصصها
مهي نشفت الكَصه وبورحت يحمود
وكَطرات الحية ماعادت اتخصها
على سوكَ الضماير صعد سوك السوم
غلاها الخجل والحسد رخصها
انا ابربعي حمامه وعد طفل ممذور
بعدد ريش السترهه الطفل نغّصها
وبعض الناس خشبه وطفّحت بالماي
صفنت بس ملط الروج ركّصها
مجبورة اليمامة ابدنية البرصان
تنكر شوفها واتصدك ابرصها
وسمجه الما تحاذر سطوة الصايود
تتبع جوعهه وتتعلكَ ابشصها
عباس العبادي سوق الشيوخ
رد مع اقتباس
المشاركة الأصلية كتبت بواسطة مصطفى العراب
