ماريدك تعودني على بعادك
ماريدك تصبرني لميعادك
ارجعلي اوج روحي لميلادك
يامهدي يامهدي
عودتني اعله انتظارك بلكت اتعودني اشوفك
مرة واجهني حقيقة ماردت لمحة طيوفك
اعترفلك ماعفتني واني خادم مااعوفك
ردتك ولو لحظة تمر
واحسبهه الك جية عمر
ازعل وادورلك عذر
واني مااعرف ضروفك
موكافي تعلمني على غيابك
موكافي يهل دمعي على بابك
موطبعك تبجيني على اعيادك
يامهدي يامهدي
ماتجيني اليوم لكن انتظر باجر وباجر
وشكثر ناس التكلي مايرد ليك اليسافر
اطوي صحراء انتظارك والتفت يم المنابر
بلكت اثر بلكي ضوه
بلكت تمر نسمة هوه
ها بلكت يرف اللوه
كاعد احسبلك واناطر
موطبعك تفززلي جراحاتي
موطبعك تضيعني ابمتاهاتي
ماريدك ترخصني لحسادك
يامهدي يامهدي
يابوصالح انته وينك وينه عنوانك دخيلك
موفرق عندي المسافة مو مشي اركض واجيلك
المهم عندي يغالي يلتقن ناري ويه ليلك
من اشوفك يابوصالح
انا اعرفك بالملامح
الهاشمي من دمه واضح
امبين من اعجاج خيلك
ياساعة تخلصهه معاناتي!!
ياساعة ترجعهه ابتساماتي
والباري يقدرني على اسعادك
يامهدي يامهدي
الحلم طول يمهدي وانته شو طول رجوعك
من ارش بابي ابدموعي ماشفت جمرة دموعك
هاي اصابع إيدي تشهد تنجوي من اشعل شموعك
يضوي شمع درب السفر
بالوداي وبوسط النهر
مو ذبل اعيوني السهر
وانشد الغيم الطلوعك
ماتنظر يمهدينه محبينك
يالغالي يلقبونه مجانينك
ماجاوب بعد قلبي إذا رادك
يامهدي يامهدي
ينتهي ليل المدامع يبتدي ليل انتظاري
والعمر ضحكة شماته وجيتك رد اعتباري
لهفة العطشان بيه كاعد ابشمس الضهاري
ومتاني جيتك ياورد
طفيني يالجفك برد
كل اليسافر شو يرد
وانته تاركني اعله ناري
ارجعلي دخيل الله يمهدينه
ارجعلي يبس وردي وبساتينه
ارجعلي سأل جرحي على ضمادك
يامهدي يامهدي
كالوا لجيتك علامة وهوست ها خوتي وينه
هوستي تسمعهه زينب حته ماتبقه حزينه
سمعي يازينب الهوسه ويستمع حامي الضعينه
"" بين مهدينه وسل سيفه "" "" بين مهدينه وسل سيفه ""
"" راعي الدنيه وكولشي بكيفه "" "" راعي الدنيه وكولشي بكيفه ""
هوسنه والهوسه انتهت
ياوسفه خيلك مااجت
ماكول زينب أيست
كالت المهدي يجينه
ياصبرك ولانصبر على فراكك
ياصبرك ولاتحضر لعشاكك
ياساعة ترد حارس على بلادك
يامهدي يامهدي
كلمات الشاعر المتألق : السيد عبدالخالق المحنة
تدوين : ZAHRAA
رد مع اقتباس
المشاركة الأصلية كتبت بواسطة Zoza Zoza
