باوت 10
وصلنة للحلة وكت غدة بعد مومال نروحلهم هيج وكت رحنة لمطعم نتغدة بي والمطعم طلع نفسة الي ابوي لاكف بي عماد هوة وصاحبتة وكعد يسولفلنة شلون كتلة ويضحك
نفسيتة جانت نوعا ما مرتاحة بس ابد ماباوع بوجه رائد ويوجه الحجي بس الية
تغدينة وشربنة جاي ورحنة مرينة ببيت خالتي سلمنة عليهم وكعدنة شوية يمهم وخالتي جانت خاطبة لأبنهة قبل شكم يوم وعزمتنة علعرس بعد اسبوعين
صارت لساعة بل4 ترخصنة منهم وتوكلنة لبيت اهل البنية ابوهة من فتحلنة لباب وشافنة نكلب وجهة
دخلنة ليجوة وصاح علة ابنة جابلنة لجاي
ابوي من شاف ابنة سألة
هاذ وليدك شكد عمرة
28 سنة
وشمخلص الله يخلي
مخلص اعدادية صناعة وصارلة عشر سنين متاني لتعين وكلشي ماكو
يا صدك جذب جنكم علة تعين
طلع تلفونة ودك على خالي
اخو امي يشتغل رائد بلداخلية
بعد لسلام طلب من عدة يعين الولد وكلة ابن صاحبي وعزيز علية ولرجال فتح عيونة وشوية راحت عقجة حواجبة وملامحة الي توحيلنة انو هوة متضايق من جيتنة ومامرحب بينة
لوالد بدة يعزف علوتر الحساس واخذ منهم مستمسكات الولد وكلة باجر اوديهن الة وانشاء الله بضرف سبوع ابنك يداوم بلشرطة المحلية
لرجال ضل يتشكر من عدة وصاح لبقية ولدة سلمو علينة وكعدو يسولفون ويتعرفون علينة
بعدين ابوي فتح الموضوع باسلوب حلو وستغل ضعف حالهم وصار يغريهم بلفلوس
ابو امجد احنة اليوم جايكم من لعمارة وطالبين لقرب منكم والي تامرون بي احنة حاضرين من المليون للعشرين
واحنة سألنة عليكم بلمنطقة وكلهة حمدت بيكم وببنيتكم ووليدي شاريهة ورايدهة
وشتفصلون احنة نلبس واهم شي رضاك ورضة البنية
بس البنية ممشين عليهة
عادي ياخوي البنية سجة ويومية تنداس وهية تختار القسمة لأحسن
والي رايدة ربك يصير
وانشاء الله اذاصارت القسمة الهة يمي قطعة ارض وهايشة من غير نيشانهة الي راح يكون
ماعلة لسانهة هية بس خل تامر وتشوف حجي صلال شلون يكرم جناينة
وانة اهم شي عدي راحة وليداتي وسعادتهم
ابو البنية شوية شوية كام يلين والحجي ماقصر غسل دماغة غسل
طلعنة من بيتهم ولجمعة يرجعولنة لخبر مع انو اني على يقين همة وافقو بس بقت هاي الشكليات لازم نسويهة
رجعنة للبيت ورائد طاير من لفرح وكلسا يتدنة علة ابوي يبوس راسة هوة كاعد بلكشن الورا
وابوي كاعد يمي بلصدر
وصلنة للبيت ساعة ب11 بليل امي جانت كاعدة بلمطبخ وخالة ايدهة على خدهة
اول ماطبينة كامت علة حيلهة وبدون ماتسلم ولااتتحمدلنة علسلامة
كلت لأبوي صلال اريدك تعال
ابوي ملامح وجهة تغيرت ورأسن راح وياهة بس اني حسيت اكو شي
دقايق وطلعت امي بيدهة علاكة هدوم ودموعهة بعينهة
صاحت علية مبين
ها يمة
امش وصلني لبيت خالك
خير يمة شكو
ماكو يمة اريد اروح اشوفهم عنيت عليهم
اخذتهة بلسيارة بس مامقتنع بحجيهة حاولت اعرف منهة شكو مارضت تحجي وتبين مهمومة كلش عفتهة علة راحتهة
نزلت يم بيت خالي ردت اطب وياهة كلتلي لابمة امش رد للبيت
لحكتهة طبت كدامي وطبكت لباب حييل
عرفت ضربة لباب معناهة روح ولتدكة
رجعت بلسيارة واول ماطبيت للبيت عيوني تدور ابوي اريد اعرف شمسويلهة وهيج طلعت مقهورة وهية عمرهة ماطلعت من لبيت زعلانة لوهسة شمايصير
لكيت ابوي رايح يم بيت عمي صبار
طبيت لغرفتي حضرت هدومي بجنطة ونمت لأن وراي كعدة من لصبح
كعدت ساعة بل6 صليت وشربتلي كلاص جاي وبدلت نزلت ردت ادك لباب علة ابوي احجي ويا بس شفت الموضوع مومال هسة نحجي بي واني اريد اروح وارجع بنفس اليوم فماردت اتأخر دزيتلة رسالة علة تلفونة كتبلتلة بيهة انة رايح لبغداد اشوف صديقي مريض
ولعصر ارجع
ركبت سيارتي وتوجهت لبيت يزن وصلت لساعة ب12 ونص جان وكت غدة
اكلتلي لفتين من مطعم براس الشارع مالتهم تانيتهة عبرت ال2 ورحت دكيت علي مارد دكيت لباب طلعتلي العاملة مالتهم طببتني وصاحت يزن
كاعد بلصالة ورجعت بية الذكريات ليوم لحادث الي غير حياتي
اباوع علدرج واتذكر صهيب شلون سحلهة وسحل روحي وياهة صفنت علمطبخ واني اتذكر كل شعور حسيتة بيومهة
قطع سلسلة افكاري صوت علدرج
تانيتة لاف لان درجهم مغتر بلصالة شفتة
صهيب
من شفتة كمت علة حيلي لاأراديا
تدنة يمي مدلي ايدة سلمت علية وكعد بصفي
تقريب ربع ساعة احنة كاعدين وماكو اي حوار بينة وهوة بس يدخن خنكني
شوية ونزل يزن ركض من لدرج
واني هم من شفتة ركضتلة من بداية لصالة وحضنتة
شلونك بذات لاتسأل لاتكول
والله حبيبي مشغول وية الوالدة وعلاجهة
لحمد لله على سلامتهة
الله يسلمك
باركلي
مبروك بس علة شنو
اخوك راح يصير ابو
يا الله يعني راح اصير عم
ولو انتة عار وميشرفني ابني يصيحلك عمو بس شسوي ماحسبت حساب من صادقتك
ديلله شبي سبع البرمبة عساس انتة مكطع السمجة وذيلهة
ندار علة صهيب جان يكلة اوووف هاذ ابني صدك مضلوم صهيب ومبين عمامة
دكوم لك موزين معترفين بيك انتة وابنك
هههههه
راح يزن ترخص مني زوجتة دكت علي
ضلينة اني وصهيب هوة غير
مكانة صار كبالي يباوعلي بس ميحجي احسة يريد يسألني عن ليان بس يخاف لا اوصللهة واكللهة سال عنج وهوة ميريد يحسسهة بأهتمامة وانو هوة حاسب الهة فد وجود
دقايق ورجع يزن طب للمطبخ وصاحني رحت ورا لكيت لميز مليان اكل
والله متغدي الله شاهد اكلت بهاذ المطعم الي براس شارعكم
يانذل تاكل بلشارع وبيت اخوك موجود
موكلت خاف الكاكم نايمين وافلس من لغدة تغديت واجيت
هههههه
يزن نفسيتة متحسنة لسفر عدل مزاجة لأن هوة من عشاق لسفر
وفرحان كلش بحمل زوجتة
ضليت يمهم للعصر سوالف وضحك الكعدة ويا ماتنمل بعدين اجن امة وزوجتة سلمن علية وهم صارت لمة حلوة همة حاسبيني واحد من العائلة ويعاملوني حالي حال يزن وصهيب
صارت لساعة بل5 ترخصت منهم لان وراي طريق طويل سلمت على يزن شبكتة وودعتة لانن ماراح اشوفة منا لمن يبدي الدوام
وهوة هم مثل حالي فاتتة لأمتحانات علمود علاج امة
وراح نعيد السنة سوة
ركبت سيارتي وتوجهت للعمارة لطريق جان حييل متعب لان دنية اليل واني كاعد من وكت كوة وصلت كلسا اغفة علة روحي
ساعة بل1 وصلت لبيت جان اضلم وسنطة الباب مالتنة سلايد فتحتة ودخلت
بوجهي لغرفتي لفيت راسي ونمت
كعدت علة صوت فاطمة وبنين يسولفن ويضحكن بصوت عالي
يبووو بعد شيخلصنة خاف قبل ماعدهة حجة تجينة علمودهة هسة اختهة صارت يمنة وشوكت ميعجبهة تجي
نزلت للمطبخ لكيتهن كاعدات علميز شميت ريحة بانية واني جوعان حييل من لبارحة نمت بدون عشة
صبحت عليهن وكلت لفاطمة حطيلي بانية اريد اكل
جان تنب بنين من يمهة اني احطلك
خوش لعد راح ابدل وانزل
صعدت ركض بدلت وبعدني علدرج اريد انزل لاكتني
ها بنين وين
اريد احجي وياك مبين
تعاي جوة نحجي
لاماريد كدام فاطمة
جريت كرسي من غرفتي وكعدت علي
وهية كعدت علدرج وندارت علية
تفضلي بنين شعدج
مبين اني احبك انتة ليش ماتحس بية .
شلون احس بيج يعني شسوي
بعني لاتسمعني كلمة حلوة لاتكلي احبج
اوووف يربي تريدني اكللهة احبج واني مااحبهة تريدني امثل مثل عماد واجذب عليهة
بنين احنة بعدنة لاعاقدين ولامتزوجين شنو هلخرابيط تدرين بية مااحب هلسوالف
وعفتهة ونزلت بعدني علدرج سمعتهة تبجي بصوت عالي كسرت خاطري حييل رجعتلهة
كعدت بصفهة بنين ليش تبجين
رأسن خلت راسهة بحصني
مبين اني احبك لاتسوي بية مثل رائد الله يخليك
جريت راسهة من حضني واني متفاجأ بحجيهة
شنو رائد شدخلة بلنص
اني ادري برائد متزوج
شنوووو يازواج انتي شتحجين
مبين لاتغشم روحك اني اعرف كلشي
شمدريج منو كلج هاي لسالفة حتة عماد مايدري بيهة
مرة جنت طالعة للبستان اذب اكل للدجاج و سمعت رائد عصبي ويحجي بصوت عالي تدنيت علي وفتهمت كلشي من حجية وياهة
هاي من شوكت انتي تدرين
السالفة هاي من زمان بس اني ماحجيت حتة لاخسرك لأن ادري بأبوي اذا درة راح يتخارب وية عمي واحتمال حتة فاطمة يطلكهة تدري بي شلون عصبي وميعرف يتفاهم
وبذات اذا شي يخصنة احنة البنات
مبين اني علمودك ساكتة لان ماريد اخسرك اريدك انتة قسمتي
الله كريم بنين
نزلت من فوك واني منصدم بحجيهة
سالفة كلش خطرة ووكعت بحلك مرة بعد شيخلصنة يربي
ركبت سيارتي وتوجهت لبيت خالي اريد اشوف امي وافهم منهة شصاير
وصلت لبيت خالي دكيت لباب طلعلي مهيمن ابن خالي
ها هيمو شلونك
هلة والله كل لهلى بيك مبين وين هلغيبة
سد لباب ورا ووكف يمي بلشارع يسولف ستغربت من سوة هيج
بعد السلام والسؤال كتلة مهيمن من رخصتك اريد اشوف الوالدة
والله يامبين مادري شكلك ابوي محرص علية محد منكم يطب للبيت وخالتي هم متريد اشوف اي واحد
ياستار شنو لسالفة مهيمن ترة احنة كلشي ماندري امي طلعت وكلشي ماحجت وابوي تدري بي ميحب نتدخل بخصوصياتة
والله مبين ماادري بس خالتي كلش ضايجة وحابسة روحهة
وكوة تاكل
خوية صيحهة الي اريد احجي وياهة افهم منهة لسالفة شني
مااكدر مبين موكتلك متريد تشوف اي واحد بيكم
هسة دروح كللهة مبين يريدج وعود اذا ماقبلت اني اروح
طب دقايق وطلعت امي بعدني اريد اسلم عليهة حطت بيدي ورقة
وطبت جوة
فتحت الورقة جان تطلع
سمعت صوت قريب
نداريت جان اشوف شيماء واكفة وتعاين علية
انتي شتسوين هنا ولي يلله برة متستحين
هاي شنو عيني ليان كل هاذ الجسم الحلو وضامتة علينة
نجبي واحترمي نفسج
بعدني احجي واحاول اغطي جسمي بأدية تقربت علية جان تدفعني حييل زلكت ووكعت بلكاع علة ايدي حسيت نار وطلعت منهة نتهيت
كمت علة حيلي ضربتهة راشدي ودفعتهة
هية شوية ضخمة واطول مني
دفعتني وصارت فوكاي وكامت تتلمس بصدري وتسوي حركات مقرفة
واني اجر بشعرهة واملخ بي وزلغت وجههة وهية مستمرة ولا تتحرك
اكو طابوكة يمي خاليهة بلحمام نكعد عليهة من نريد نسبح جريتهة وضربتهة براسهة
نزل دم علة وجههة حاولت تجرهة مني مانطيتهة مجال ورجعت ضربتهة بيهة حييل
رأسن وكع راسهة علية ولدم ترسني
دفعتهة وكمت علة حيلي بساع لببست دشداشتي كوة لأن ايدي ليسرة موكادرة احركهة عبالك نار تطلع منهة باوعت عليهة منضرهة يخوف ولدم غرك الكاع
يمة بسلا ماتت
لبست
ثوبي وركضت لكيت لباب مقفولة
لعد هاي الكلبة شلون طبت
ضليت اضرب علباب حييل واصيح تعالو لحكونة
لان ليوم زيارة لمسؤالات يلتهن شي تفتش الناس الزائرين
وشي تطلع السجينات وشي تستلم لامانات وهكذا كل مجموعة يوزعوهة علة فد شغلة
ضليت اكثر من ربع ساعة اصيح يلله اجتني وحدة
كتلهة فدوة لحكينة هاي شيماء الشاذة دخلت علية للحمام وحاولت تأذيني واني ضربتهة وهسة فايضة بدمهة طبي شوفيهة خاف ماتت
ركضت جابت وياهة ثنين بنات وطبن ليجوة وحدة كلبشت ادية ولحكتهن للحمام شالنهة طلعنهة ليبرة واخذني وياهة واني عيني عليهة وادعي كون ماميتة ياربي هسة منين اجتني هاي السالفة اني ماعاول يخلصن ل6 اشهر
بسلا تطلع ميتة ويزيدون محكوميتي دخيلك يربي
وصلنة لغرفت المدير رأسن من شافهة خابر علأسعاف دقايق واجو نقلونة للمستشفى اني وياهة هية طببوهة للأنعاش رأسن
واني سوولي اشعة طلع عندي فطر بلعضم جبسولي ايدي ونطوني علاجات وللعصر طلعت اني وهية ضلت بلمستشفى بس مادريت شصار وياهة
رجعوني للسجن والضابط مال لقسم
كعد يحقق وياي حجيتلة كلشي واني ابجي واحلف
من خلصت كل للشرطية اخذيهة رجعتني للغرفة واني ماادري اذا صدكني لو لاء
ضليت يومين بس ابجي وشيماء ماادري عنهة عايشة ميتة وزهور خطية ابد ماعافتني
وتواسي بية وتجبرني اكل
بعدين من ايسنة من رجعتهة وشافتني شلون تدمرت نطت فلوس لشرطية وجابتلنة اخبارهة تكول كلشي مابيهة ومخيطين راسهة وليوم تطلع
وفعلا طلعت وخلوهة بلحبس الأنفرادي لمدة سبوعين شوية رتاحينة منهة خلال هلأسبوعين
وورة ماخلصن الأسبوعين جابوهة يمنة بس ضلت منعزلة عنة حييل حتة عن سحر
ومن ناكل تتانينة نحلص ونبقيلهة اكل وتاكل ورانة
لحبس لأنفرادي حييل ادبهة وزهور سولفتلي علي تكول غرفة حيييل زغيرة شبهتلي حجمهة ازغر من نص الحمام مالتنة بحيث اذا رادت تنام لازم تنام وهية واكفة
مرت فترة تقريب شهر ونص لوضع مثل ماهوة ماكو شي جديد
يعني صارلي 4 اشهر ونص وماباقيلي غير شهر ونص واطلع
علاقتي بزهور حييل قوت وصرنة مثل لاخوات وحجتلي عن تهمتهة
هم مثلي بوك بس هية مامضلومة فعلا بايكة بس جان عدهة ضروف جبرتهة هيج تسوي
بس ماحجتلي شنو لضروف
من سولفتلي جانت تجر حسرات وتبجي من تححجي نقهرت عليهة حييل
لأن هية متزوجة وعدهة ولد واحد وعينهة مو عورة
لامتعورة بيهة رجلهة ضاربهة عليهة وكايمة متشوف بيهة تسولفلي عن ابنهة وتضل تبجي تكلي فراك لام لأطفالهة ماينحمل ضليت اواسيهة واحاول انسيهة شوية
اني وياهة صادقنة بنية شرطية وكامت تجيبلنة شكو خبر جديد يطش بلسجن ونعرف اخبار كل السجينات منهة
وام الحانوت هم صارت صديقتنة ونساعدهة يوم لجمعة نصفط وياهة لبضاعة مالتهة لمن تتسوك وننضف وياهة مرات لان هية تشتغل عاملة هم
تجيبلنة لأخبار من برة لسجن تحجيلنة علشارع ولسواكة ولملابس والموديلات ومرات تنطينة بلدين وتسجلهن علينة وزهور خطية من يجيهة رجلهة لو اخوهة ينطوهة فلوس تدفع ديني ودينهة
صارت الي صديقة واخت تواسيني واواسيهة علدنية وعلة مصايبنة بس لحد لان ماحجيتلهة شي عن حياتي لخاصة ودائما من تسالني اختصر لاجابات
جان يوم زيارة كلعادة ماجنت منتضرة احد ويأست من انو يزورني شخص
اجت المسؤلة صاحت اسمائنة كلنة ماعدا شيماء وسحر طلعت واني كلبي يركض قبل رجلية اريد اشوف منو الي حن علية واجاني مع انو ادري محد يجيني غيرة بس بداخلي تمنيت يكون احد من اهلي جايني
وصلت لغرفة الزيارة
اول ماوكفت صار كبالي واكف بنهاية السيم
رحتلة
وصلت يم لسيم تقرب علي
متغير حييل شكلة حسيتة متعوب ومهموم مومثل كل مرة من يشوفني الأبتسامة تارسة وجهة وعيونة ذبلانات
اوووف ياهلأنسان احسة ملاك موبشر من اشوفة اطمأن حييل واحس اكو الي احد بهلدنية من بعد ماخسرت كل اهلي وبعد مومن حقي ادخل لحياتهم لامن قريب ولا من بعيد
ضل عبالك يتامل ملامح وجهي حسيتة
يباوعلي وساكت
قطعت صفنتة و كتلة شلونك مبين
.....
رد مع اقتباس