درر العراق

زفير · 30/April/2018

قصة حلوة موت
بس لا تكولين هاي الخاتمة

ملكةه · 30/April/2018

ج 2 بارت 9
ظليت احوم مثل الي عندها ولادة
خلصت اليومين وابني ماكو
: لج عذراء شلون دبريني ليش ابني حسن لليوم ما رجعوه
: هاي شبيج سهى ترة والله صرعتيني من الصبح لحد هسة بس تونين كتلج لتخافين يرجعونة

:اي همة مو كالو يومين ونرجعة اشو اليوم ثالث
وابني ماكو
: اشبيج ميكدرون يسوون شي ما دام ناصر والولد موجودين همة يرجعونة
وداعتج ترة مو عدالج ساكتين
والله كلها حادة سنونها على بيت جاسم وهمة يردون بس حجة حتى يهدون (يهدمون) بيت جاسم على راسة فلا تستعجلين وانتظري شوية

ظليت اروح وارجع ما اعرف شسوي
اخر شي ظليت ابجي اختنكت صار الليل وابني ماكو
: عذراء بعد ما بية صبر اريد ابني
: دكولي يالله هاي شبيج
بالله شو كومي وياي خلي نتمشى
شوية نروح نتعلل يم رواء كالت تعالن يمي اليوم مسوية كليجة ام التمر وجاي
: والله ما اشتهي العسل
روحي انتي واخذي امي وياج خطية
حيل مختنكة هنا لان ماتطلع دائماً
: براحتج ما راح الح وياج ادري بيج من تقفلين

راحو البنات وعمتي وامي لبيت جدهم الا اني بقيت لوحدي نزلت ودخلت للمطبخ
اشغل نفسي بشي
طبعا اخواني وناصر كاضيها كلة عزايم من الاقارب بيهم طبيعة هنا اذا
نزل عندهم ضيف يصير الاقارب كل يومية واحد يعزمة على غدة لو عشا المهم يكومون بالضيافة
لو مرات يطلعون سفرات للصيد
طلعت مواد للكيكة وصرت اسوي كيك
سودة علية حسن يحب الكيك اخلط بمواد الكيكة
وايدية ترجف ودموعي خانتني نزلت على خدي
اتمنى اصرخ واصيح رجعولي ابني ياناس
ما اعرف كل ساعة يجيني تخيل
ان ابني ديعاني
ويضربونة ويأذونة مثل قبل من كان يجيني
واثار الضرب واضحة على جسمة
يالله يعني اذا هو صغير لاحول ولاوقوة كانو يضربونة بالله هسة شراح يسوون بي
داشتغل بدون وعقلي فاصل والله حتى ما اعرف شنو حطيت بالكيكة حتى ما ادري حطيت الشكر (السكر ) لولا
سمعت اصوات زلم
رحت على شالي معلكتة على باب المطبخ
لبستة رحت اشوف منو اجة

دخلت للصالة وشفت عموقاسم وانصدمت من شفت ثائر موجود وياه

احس گلبي صار طبل
بس ما ادري ليش من شفت ثائر وصارت عيوني بعيونة
دموعي كامن تجري من وحدها وشهكت شهكة المهضومة
عبالك بنية شافت ابوها وتريد تشكيلة حتى ياخذلها حقها
ثائر نهض بخوف
اويلي الله انخمط گلبي من شهكت سهوة وعيونها كلها دموع نسيت عمها وماحسيت على نفسي من حجيت
: شمالج يسهوة منو الي اتجريء
ينزل دموعج
قاسم: شبيج يابعد عمج منو وياج
ليش مارحتي وية البنات لبيت جدهم
سهى تحجي بانفاس متقطعة من اثر البجي
: اني .. مكدرت اروح وياهم....
عيونها على ثائر وتخاطب عمها
: عمو فدوة ... اروحلك اريد ابني صار ...اليوم ثالث
وهمة ما رجعولي حسن
نهض ثائر بفزعة : مسحي دموعج لا تبجين من احتركت عشيرة جاسم والخلفوه اذا ما اليوم اكلب عاليها واطيها ما اتسمى ثائر
طلع من يمنا مثل الاعصار
وعمي راح وراه
كعدت بضعف احس بجسمي كلة يرجف
وصفنت بيني وبين نفسي
اني شسويت معقولة اني حجيت وية ثائر وطلبت منة يرجعلي ابني
يمة بس لاتصير مشاكل ما عرفت وين انطي وجهي
اخذت نقالي واتصلت على سارة صديقتي
: وحجيتلها كلشي وظلت تهدي بية
وسألتها عن اخبار عساف كالت عساف زعلان
عليها وعلية وهي كانت بذيج الايام زعلانة عند اهلها
حسيت بالذنب وكعدت اتعذر منها
بس هي كالت
:لاحبي اني زعلانة مو بس علمود ثائر
سهى احس بعساف متغير وياي
من صرت حامل لليوم
وصارت طلعاتة كلش هواي
وسالفة ثائر زادت الطين بلة
كعدت اصبرها وتصبرني
: اي بس تطلعين تزعلين عند اهلج هذا مو حل ياعيني
: لا سهى كلت ابتعد عنة فترة حتى هو يكعد لحالة ويراجع حساباتة من جديد
اني ما اتحمل واحد غير مسؤل
يعني من جنت اني صالحة لتوفير طلباتة بداخل الغرفة
كنت بس اني وبس
ليش من صرت حامل واتعرضت على كم مرة للمرض
هو ابتعد عني
: لج انتي هسة مو سارة الي دتحجي هاي هرمونات الحمل دتأثر على قراراتج صدگيني المرية بهيج فترة
تصير بسرعة تتأثر و كلش حساسة بين قوسين مخبلة
ظليت احجي وياهة لحد ما خلص الرصيد
وانتهى الاتصال
بس كدرت ارتاح شوية من الضغط الي جنت اعاني منة
ظليت احوم ورحت دخلت عالمطبخ طلعت الكيكة من الفرن
اريد بس اشغل روحي باي شي لان الافكار هجمت علية فرد هجمة راح تخبلني
بعدين سمعت صوت الباب انفتح
رحت ركض اريد اشوف منو اجة
شفت ثائر وعمي وبيدهم حسن ابني
يمة شفت حسن واني عيطت (صرخت) من الفرحة وركضت وما اهتميت للموجودين ما مصدكة ابني يرجع لحضني اخذتة لحضني وصرت اوزع البوسات مثل المجنونة
على وجهة ولزمت وجهة بين ادية وصرت اباوع عليه بتفحص خاف احد مسويلة شي لو خاف ضاربي
: حبيبي حسن يوم اذوك ضربوك
حسن بتململ: لا ماما مسولي شي بس كافي بوس
: اووي حبيبي فديت الي يخجلون
ورجعت لمتة بحضني وكعدت اشمة
انتب

هت على صوت يحمحم يعلن عن وجوده وكأنه متضايق من الي ديشوفة
ثائر والغيرة مشتعلة : احم احم عوفي الولد اكلتي اكل
انطي مجال يتنفس راح تخنكي بحضنج
قاسم: ههه عوفها حقها ابنها موشوية
سهى وهي ترفع عينها بعين ثائر: شنو كالو عمامة من رحتو عليه تاخذونة
ثائر: محد يتجرئ يحجي ويفك حلكة
انطونة حسن وهمة الممنونين
: اي والله يابعد عمج لتخافين ما دامني اشم الهوى
ما تنضامين وتخافين
: ربي يطول بعمرك الي
: سهوة صبيلنا جاي يابعد عمج
سهى والحياة رجعت تلمع بعيونها
نهضت من مكانها : صار عمو من عيوني
ثائر مر من يمها يريد يروح ورة عمها لداخل الاستقبال همس الها
: تسلم عيونج
رحت دخلت للمطبخ واني كلبي يدك مية بالدقيقة
عبالك جنت بسباق
يمة يمة منك يثائر شكلك راح تموتني
قطعت الكيكة وصبيت جاي وخليتة بالصينية
ورحت دكيت الباب وطلع عمي واخذ الصينية مني
ودخل ظليت واكفة يم الباب
اريد اسمع نبرت صوته الي جننتني
يعني اذا اكول اذوب على هسمتة وخامة صوتة
راح تكولون مخبلة بس اكو انواع للشغف وهذا واحد منهم
كانت واقفة وغافلة عن صورتها المعكوسة بالمرايا الي الي بالاستقبال
كانت مقابيل ثائر وكعد يراقب كل حركاتها الغافلة وهو يبتسم عليها
سمعتة يحجي وية عمو قاسم ويكلة
: عاشت ايدكم عالكيكة شكد طيبة
: ايدك العايشة وليدي الف عافية
ورجع عمو قاسم يسولف بالشغل لان الظاهر بينة وبين ثائر مصلحة عمل
لكن ثائر مو يم قاسم عقلة بالي واكفة بالباب وعيونها فاضحتها وحاطة ايدها على صدرها وتتنفس بسرعة
والله لو ماعيب وزحمة وكاعد ببيتهم جان فتت عليها جوة واخذتا واشرد بيها لمكان بس انا وهي بي
بساعتها ما راح احجي شراح اسوي اخلي الافعال هي الي تحجي
: اكل واباوع عليها وهي سرحانة وصافنة والبسمة مرسومة على شفايفها
: عمي لو هيج كيكة لوماكو
عاشت ايدين الي سوتها
اباوعلها شلون زادت ابتسامتها والعيون لمعت اااااااخ بوية شيصبرني على بعادك والروح ماظل بيها صبر
احس بطعم الصبر مر وماينجرع (لا يطاق)
نهضت : يالله عمي انا اترخص ومثلما كلتلك انت
شوف الحساب شكد عندك وانا من يمي هم راح ادكة بالحاسبة حتى نطابق القوائم الي عندك وعندي
وبعدين نجرد
شفتها ركضت ابتعدت عن الباب
: هذا هو وانا اتصل عليك باجر واكلك شكد صار الحساب يمي
كام قاسم يريد يوصل ثائر للباب البيت
ثائر بعتراض: لا والله عمي ما تگوم
خلك كاعد بمكانك كمل شرب الجاي ( الشاي)
شنو السالفة قابل انا غريب وتزتني (توصلني) للباب
: لا يابوي مابيهة كلفة رحمة الله والديك
طلعت وانا عيوني تدور عليها بلكي اصادفها
بس ما كدرت اشوفها
لو بيدي اروح ادور عليها
بس عيب زحمة وين كاعدين
رحت وصلت لباب الشارع واجاني صوتها
: ثائر ثائر بس لحظة
التفتت بكل لهفة وباعت عليها شايلة بيدها صحن
: اتفضل هذا حصن كيك اعتبرة عربون شكر
لانك رجعتلي ابني حسن والله ما عرف شلون اشكرك
ثائر الي داخ واتخربطت احوالة
: هااا اي لا اا العفو على شنو
تشكريني هذا واجبي
واذا تردين تشكريني اريدج تسويلي كيكة من ايدج الحلوة واريد اكلها كلها
طبعا اني احجي وعيوني على شفايفها
وكان المقصود مو اكل الكيكة لا
كان القصد اكل شفتها
مديت ايدي اخذ الصحن ولمست ايدها متعمد
بس ياااابوية
حسيت بيها رجفة جوة ايدي
غير ردت ابتلي واسوي سواية
هنا ويم الباب اخمطلي منها بوسة
: روحي يسهوة فوتي جوة وستري على روحج ترة ماضل عقل بالراس
اتسعت عيونها وشهكت وراحت دخلت للبيت تركض
هههه الظاهر خرعتها
رحت منهم وانا اسعد انسان يمكن ما مصدك ان اجتني
ساعة الرحمة وسهى ضحكتلي
واليوم اتأكدت بعدها تحبني
وانا بعدني موجود بگلبها
رغم عملة ابوي وياها جنت خايف لا اخسرها وتروح من ادية
مثل ما راحت ذيج السنين وانهدرت من عمرنا واحنا ابعاد عن بعضنا
وهي ما قصرت بصدي عنها وحرمت عني شوفتها
هسة ما اعرف اكره جاسم على سوايتة لو احبة
لان هو صار السبب الي خلاني اشوفها واحجي وياها
دخلت عالبيت وفرحتي مبينة على وجهي
وشفت الكل موجود عماتي ويمكن هم بناتهم موجودين بس ما شفت اي وحدة من بناتهم بس عماتي وجدتي وام سهى كاعدات سلمت عليهن
وجان جدي وابوي هم كاعدين رحت سلمت وبوست راس الشيخ وجدتي وكعدت يمهم وتركت ابوي بس سلام ما بست راسة مثلما جنت متعود
حسيت بي ضاج من حركتي بس بعدني ما ناسي الي سواه بية
واخذت استكان جاي وكعدت اشرب وصحن الكيك انطيتة لرواء كلتلها صعديه فوك لحجرتي (الغرفة)

ابو ثائر: شوف ثاير ترة اليوم بالديوان حددنا مشية الزلم على بنت الشيخ راجح
وان شاء الله باجر نروح كلنا نخطبها الك
وانت جهز حالك
وشوفهم شمحتاجين عالمهر لان فد نوب راح تعقدون
بنفس اليوم
حسيت من الصدمة اجة يطلع الجاي من خشمي
لاااا يالله لاااا معقولة الي جاي يصير وياي
: اكول بوية منو كلك تروح تستعجل
جا انا مو كلت ما اريد اتزوج
: جا احنا مو كلنا انطينا حجاية للرجال وعيب وزحمة ومايصير شنو هو قابل لعب جهال
انا اريد

اشوف اولادك يابوي
وانت ما طاري على بالك الزواج

كورت ايدي بقبضة من القهر ماكدرت احجي شي لان جانت ام سهى وعماتي كلهم موجودين وصرت اعاتبة

: عفو عليك بوية جا انت مو عرفت بحبي الها
ومن سعيت بالخراب بيني وبينها
جنت عاذرك
واكول جان ما يعرف منوهي ومنو اهلها
بس هسة انت عرفت هي منو وبنت منو الي هاويهة كلبي
ليش بعدما عرفت رحت استعجلت بالزواج من بنت الشيخ راجح هسة شنهو عذرك وياي
الجدة: يايمة موش انت كلت استعجلو بزواجي من البنية
وانا رحت خبرت ابوك وهو انطاهم خبر
من احتركت عشيرتي ضربت ايدي على كصتي (الجبهة)
وكمت من يمهم وانا اعض بيدي من الندم
انا شسويت بحالي والله
عميت على نفسي وشكلي
راح اموووت من القهر
كلما اكول هانت تطلعلي سالفة عوجة تخرب الي بنيتة
..........................

فرحانة رجعلي ابني حسوني لحضني
ومن فرحتي كمت سويتلة كيك وشكو اكلة يحبها
وفرحتي زادت من تبادلنا الكلام اني وثائر
ومو بس هيج وبعد تبادلنا الوعد بالعيون
اخر لقاء الي وية ثائر كانت نظراتة تنطق بالوعود
انا الة وهو الي

وبيوم الي رجع حسن
رجعو اخوتي والولد من الصيد وحجالهم عمو قاسم
شنو سوو واحمد وامجد ظلو يتشكرون من عمي
ويحمدون بثائر

عذراء : اهوو شكل الاخت راح تدللنا اليوم
لخاطر عيون حسوني
عمي لو ندري هيج تسوين جان كل يوم اودي حسن لبيت عمة
: يمة فالة الله ولا فالج بيمن طالبتني ما اصدك ابني رجع لحضني تردين كل يوم اخلي يروح غير اتخبل عابتلج ام بطن
: ھٍَھٍُھَھٍ اي علمود نشبع حلويات
منتهى : جا خو اتعلمي منها بدال ما جنج عجوز عرب
تدعين صارلج ساعة

: اي يمة بس كادرة علية تحجين هسة انا شبية اشوطبخي ينضرب بي المثل بس الحلويات ما عرفلها
وهسة اني شحلاتني جاي اطبخ الباجة عالنار
لو شايفة خطية جدي شلون يحب الباجة من ايدي
ما صدك من كلتلة اريد اسوي باجة
الا يوم ثاني وصة على ذبيحة حتى اخذ كراعينها والراس
واسوي منها الباجة
على عنادج يمة ابوج ما يحب الباجة الا من ايدي
: يمة يمة منج اكلتيني بكشوري الله يساعد الياخذج
: لا يمة كولي امة داعيتلة الياخذني
التفتت علية وكملت
تدرين اني اسوي باجة تاكلين اصابيعج وراها
نور: يبووووووو باجة عابتلج يعذراء
.................................

: ولج روية جا انا موش اخوج
احلفج بالخوة البينة اريدج تسويلي طريق
لحتى اشوف عذراء
والله شتريدين اسويلج بس كون تجيبها
رواء : ما ما ماعلية اني طلعوني من هاي السالفة انت واخوك تخوفون
: ليش ولج ثاير شمسوي
: هَـا لا ما سوة شي بس هم يحوم يريد يصيد سهوة
ومايعرف شلون
عدي بغضب : اكلج هي كلمة وحدة ترتبين شوفت عذراء لو لا
رواء : لا ماعلية شنو هي بالكوة لازم انضم لعصابتكم
: جا بسيطة انا الج
: شنو تهددني والله اشتكيك لجدي واخلي يلعب بيك
طوبة
: انا ما انزل روحي من تالي عمري واكعد اهدد الزعاطيط الي مثلج
لا عندي غير وسيلة اخليج تجين برجلج تتوسلين
رواء تراجع حساباتها وشافت المصلحة تقتضي تنفذ
لان هو ابو الفيكات وكلشي التريدة هو يجيبة الها من المدينة
: هااا اوكف لحظة عندي الك فكرة
عدي وهو يضحك بخباثة
: اي ناس متجي الا بالعين الحمرة يالله هاتي ما عندك
نورينا
: اة اليوم عذراء طابخة لجدي باجة
روح انت بدال الحارس وجيب جدر الباجة مهنم وانا راح اتصل عليها
واخبرها تطلع بالباب حتى تسلمك الجدر
هااا شلوني
عدي : الله ياخذج على هذا العقل ولج انتي مكانج مو هنا مكانج يم العجايز
خاب سويتني خادم توصيل شنو هاي والله ذلة
: محد ضاربك على ايدك انت بكيفك ياتقبل يا ترفض الموضوع راجع الك مو انت الي ردت تشوفها
ماكو غير حل الاهذا
: يالله امرنا لله احسن من ماكو
: بس كليلي شوكت اروح اجيب الباجة
باوعت للساعة : اوكف خلي اتصل عليها اشوفها خلصت لو بعدها
عدي بنفاذ صبر: هَـا بشري شكالت
: يالله روح تنتظرك بالباب
بس الله يعيني على ما بلاني
شوف شكلي راح اكل طن كتل من عذيرة لان قشمرتها وكلتلها الحارس جاي
: خايبة امداني تقبل تطلع للحارس وما تطلعلي شنو من حظ اغبر حتى الحارس اخير مني
...........................
عذراء وهي تحط اخر لمسات على جدر الباجة وتحطة
بالعلاكة وجهزتة حتى يجي الحارس ياخذة
لبست شالي وسمعت صوت الباب لزمت قطعة القماش وشلت الجدر ووصلتة للباب
عذراء: اوكف زيدون بس لحظة خلي احط الجدر بالكاع وافتحلك الباب وتفوت تاخذة فتحت الباب ودرت وجهي اريد افوت جوة
بعدني مداخلة للبيت وحست واحد كبل فتح الباب وسحبني وسد حلكي واخذني ورة البيت بالبترك (ممر خلفي)
لطشني على الحايط واني لو تذبحوني من الخوف قطرة دم مبقت بية
عزة بعينك ياعدي ظل گلبي يظرب من طبول الحرب
دنك راسة وهمسلي
: ولج عذير اي مو سلكتي عشيرتي سلك
وشليتي حالي وحال الخلفوني جا شوكت اكسر خاطرج وتحنين
دفعت ايدة مني واني كلي ارجف احس الساني انبلع
وخانتني الكلمات
: ولك عدي الله يسود وجهك شلون تتجرئ تسوي وياي
هيج
: اتجرئ و

موبس اسوي هيج ولا وبعد
قطع كلامة وخمط منها بوسة خلة النجوم بعيون عذراء تلالي
من حركة گلبة وشغفة بيها عضها من شفايفها
يمة يمة راح اوكع من طولي وانفضح
صرت مثل الماي بين ايديه ذبت مثل الحلاوة
كمت كلني ارجف بين ايديه
عزة اني منو يبوووو عذير اصحي ولج عذير
بس وين عذير راحت وتبخرت من ورة عدي وحركاتة
عبالك مثل الغزو فر راسها فر وضيع كل كلمة جانت محضرتها تحجيها الة اذا شافتة كانت تتوعد وتكول والله اذا اشوفة العب بي طوبة
بس الظاهر الادوار انقلب وصار عدي هو اللاعب
ضغطني على الحايط وصارت الانفاس تلهث
وهو عيونة غركت بعيوني
وعيت على نفسي ودفعتة
:لا يابوي مو هيج الحجي بعد عني ترة انت هواي زودتها
اني احجي وكلبي يرد يطك من النبض
عدي وهو دايخ بيها جنة سكران : ولج. عذير انا اريدج
لاتشلعين گلبي
عذراء بغرور: وانا ما اريدك ولا تسببلي ازعاج
لزم ايدها ولواها وحطها ورة ظهرها وصار صدرها ملامس لصدره والعيون التقت تجدح نار
: خايبة عذير من شوكت انا صرت مزعج جا نسيتي
شلون جنتي تحبيني من الصغر وانا لابسج وما مهتم
صارت تتلاوة وياه تريد تحرر ايدها منة لان كلامة طعنها
: اي صحيح مثل ما كلت جنت احبك يعني جنت
بس هسة لا اعذرني بدة گلبي يحن لغيرك
ورجاءاً ابعد عني لا يجي احد ويشوفني واكفة وياك
هَـا ونسيت اكلك انت معزوم على خطوبتي من احمد ابن عمي
عدى ويزيد من مسكة ايدها وقربها منة
: خايبة عذير لو تموتين ماخليج تتزوجين غيري
لو اعرف اكتلة واكتلج وادفنكم سوة
ما تحلين على غيري فاهمة ولج
ودفعها ودار وجهة وراح وهو ميت من القهر
شال الجدر وراد يطلع وحجة بصوت هامس
: شوفي يعذراء ترجية علگيها بأذنج زواج من غيري تحلمين فاهمة ولج
طلع وراح وتركني خاوية مسلوبة الروح رجلية گامت ترجف من ورة عدي وسوايتة وياي
كعدت بمكاني بالكاع وظل جسمي كلة يرجف
خايبة عذير شجاج ونسيتي نفسج وياه
جان حالي مثل العطشان وسكوه (سقوه) الماي
رفعت ايدي وكعدت اتلمس بشفايفي معقولة ما جاي اصدك ابتسمت ابتسامة غبية معقولة عدي جان هنا قبل لحظات وبادلني الحضن
بس ااااخ منك يا عدي ومن غرورك
جنة بعدة شايف حالة علية
گعد يعيرني بحبي الة من الصغر اشو هذا لازمها علي لزمة
لا ما حزرت يعدي بعدك ما تعرف منو عذراء
..............

سهى
جنت كاعدة البس حسن ملابسة
اجتي عذراء تلهث من الركض
: ولج سهى لحكي سمعت بثائر اليوم راح يخطب

طبعاً عذراء صارت تعرف عني كلشي وعرفت بموضوع ثائر وكلشي يخصنا حتى اخر لقاء بيني وبينة تعرف بي
اجيت اتخبل من سمعت بالخبر
: لااااا عذراء منين جبتي هذا الخبر والله اموت
: ولج والله اليوم المهر مالتة وخالتي سناء اتصلت على امي وكلتلها جيبي البنات وياج وتعالن ساعدني البيت
مخبوص خبص شلون شنسوي
سهى
حسيت بالبرود احتلت جسمي وصرت ارجف
لدرجة وصلت البرودة لگلبي يعني معقولة
الي شفتة ذاك اليوم بعيون ثائر كان كلة وهم
معقولة اني لهل الدرجة غبية
جاوبتها بكل برود : عادي حٍٍِْــًبٌٍـــِٓېٍٓ خل يخطب ويعقد ويتزوج هذا من حقة
كان برودي وردة فعلي ناتج عن خلاذن ثائر الي
سلب مني المشاعر وتركني خاوية باردة

عذراء الي جانت متوقعة كلشي من سهى الا هذا البرود
بس مرات نشعر اخطر انواع ردود الافعال تصدرعن البشر هي التعامل ببرود اعصاب هذا النوع احذر منه
وكانت كل هاي الصفات تنطبق على حالة سهى حالياً
ما تفاجئت من طلبت مني اشوفلها صالون
واني ما راح اقصر راح اساعدها لحتى تنتقم منة ومن الخلفوه
ما اعرف منو انطاهم الحق
بان يتعاملون ويانة بكل حقارة واستهانة ؟؟
تركت عذراء تتصل على صالون تحجز عندها
وصعدت فوك لغرفتي
وبطريقي شفت بيت عمو قاسم بانت عليه
اثار الاحتفال من خلال عمة منتهى والاتصالات عليها الي مابطلت وكل ساعة اسمعها تهلهل شكلها
خطية فرحانة تشوف ابن اخوها راح يخطب عبالك ممصدكة
رحت دخلت لغرفتي وتوجهت لكنتوري وطلعت جنطت الجهاز الي امي تارستها غراض وملابس
جانت دائما من تحجي بجهاز عرسي
وتجهزة تحسسني عبالك جندي
ورايح للحرب ولازم يحضر جهازة وعتادة استعداداً لمواجهة الظروف
ابتسمت بستهزاء
ما اعرف امي على شنو هيج متحمسة هو اني سهى واعرف حظي فكر
بس شكل جنطة الجهاز راح تفيدني لحتى اخوض الحرب الخاصة بية
فتحت الجنطة وكعدت اكلب بالغراض واتذكرت عندي فستان قصير طلعتة منها ورفعتة كدام عيوني
وصارت الافكار تتوالى براسي
شيصير لو اتهور شوية واخرج عن مبدأي
اشو عشت طول عمري انسانة مثالية حبابة مطيعة
ملتزمة مع مبادئي
اشو محصلت شي غير بس الالم والقهر
خليني شوية اجرب من اكون انانية واتصرف بطيش
شراح يصير على الاقل من اتهور
ما راح اتفاجيء من تجيني المصايب بالعكس
راح اكون مستعدة الها ومحضرة نفسي للمواجهة
هيج احسن من اكون انسانة مسالمة ومحافظة
وبعدين توكع براسي المشاكل مدري منين وتجيني كل مفاجئة وصدمة اقوى من الي قبلها
واكون بساعتها ما عندي اي استعداد واروح بالرجلين
كلة من ورة

سذاجتي وطيبتي ونزاهتي بتعاملي مع الناس
دخلت عذراء : يالله كومي حبيبة خلينا نروح حجزت صالون الي والج ولنور ناصر راح ياخذنا
وكال انا جاي بالطريق لان شكل المهر الساعة بالاربعة وهم يالله نلحك نروح ونرجع لان خالة سناء اتصلت على امي وكالت جيبي البنات وياج حتى يساعدوني
: يالله حٍٍِْــًبٌٍـــِٓېٍٓ اني ما عندي شي جاهزة
اخذت جنطة الملابس واني عازمة النية على تحطيم ثائر بَـــأي طريقة اليوم لو اني لو هوة
نزلت لعند امي ووصيتها تدير بالها على حسن ولا تغفل عنة

.............................

ثائر وهو يلبس بقميصة التعبان ولاف الشماغ على راسه لفة عمانية يريد يشرد من اجواء البيت
المخبوص خبص
يحجي وهو طافرة روحة
: عدي عوفني رحمة على والديك
والله مختنك
عدي : بس اوكف وحش شمالك تهدة شوية
بس خليني افتهم شبيك
: شتفتهم خايب راح يسون مشية زلم على بنت الشيخ راجح حتى يخطبوها الي
شفت شلون تصخمت

: انا اخوك احلف
: والله الخطوبة اليوم شفت الحظ الاغبر
شلون ما جاي يكعد وياي
: وانا اشوف ابوي البارحة يكول حضرو الديوان
وجهزو حالكم بس ما فطنت عليمن الله يساعدك يثاير على هالموقف الي انت بي
والله ما اتمنى اصير بمكانك
والله انا احس بيك شكد جاي تعاني وادري كلش زين شكد توجع من تشوف روحك
تصير انت السجين ( السكين ) الي راح تذبح بيها
محبوبك بساعتها تشوف
السجين والحبيب يعانون من نفس الالم
وموبعيد تشوف حتى
السجين تون (تبكي) من الالم قبل لا يون الحبيب
هاي لحضة عجيبة تكون قصة حب بين الذابح والمذبوح

طلعت من البيت والدنيا ضايكة بعيني
شغلت السيارة وطلعت
وصارت بوجهي سيارة ناصر وشفت بنات عمتي منتهى طالعات وانتبهت على سهى لابسة نفس جبة الاسلامية الي جبتها الها
والله اجة گلبي يطلع من مكانة من شفتها
نزلت بدون ما احس على روحي اتوجهت عليها
لكن على فجاءة وعيت على ناصر صار گبالي وسلم علية
الله ستر ولحك ناصر علية جان اتهورت وتصرفت
بدون وعي
رفعت نظري وصارت عيوني بعيونها
انطتني نظرة غرور
رفعت خشمها وهزت كتفها ودارت وجها وراحت ركبت بسيارة ناصر
احس كلبي يريد يطك
على الاساس انا ناقص ضيم وتجي سهى تجملني قهر
ثائر: وين رايحين
: هيج رايح اوصل البنات للحلاقة قريب على المدينة وارجع كول مامحتاج شي
: لا سلامتك بس مو تتأخر احتاجك عندي هواي شغل
احجي وعيني على سهى الي تلعب بأظافيرها
بتكبر اجيت اتخبل هاي منو ما جاي اعرفها
هاي مو سهوة
انتبهت على ناصر اترخص وراح ركب بالسيارة وشغلها ومشة من كدامي وصارت عينها بعيني
وكعدت تتأفف بضجر وگلبت بعيونها ودارت وجها عني
بس ااااااااااااخ يالله شلون شلون نار اشتعلت بصدر
ضربت السيارة بقبضة ايدي وخسفتها بدون ما احس والله من قهري اتمنى الزمها اكطم رگبتها على هاي
حركتها
صرت بين نارين نار صد سهى ونار خطوبتي الي تورطت بيها
............................
منتهى تصيح عالبنات حتى تعجلهم علمود يرحون
: يالله بنات استعجلن شوي ترة هم يالله نروح
احترك النقال علية حرك بالاتصالات كلها تصيح وين صرتي
عذراء وهي تنزل بعجل وتلبس بترجيتها
: يالله يالله خلصنا ماظل شي
نزلت وراها اني والبنات وجنت لابسة شال شامرتة
على راسي ولبست جبة فوك الفستان القصير
شافتني عمة منتهى : صلوات على النبي ما شاء الله سهوة طالعة كمر( قمر)
يارب اشوفج عروس
: اشكرج عمة
اباوع لناصر شلون عيونة تريد تطلع من شاف نور
ظل يحوم ما يعرف وين يضمها من عيون الناس
ضحكنا من كللها اذا تحبيني كعدي بالبيت ولا تروحين للمهر
عذراء:شبيك ناصر كول يالله شلون يعني تحبس البنية
لان حظرتك ما تقبل
نور ضربتها بخاصرتها : على كيفج وياه اكلتي اكل
بالسانج اصلاً نصور حبيبي
راح يقبل اروح
للحفلة حتى ما ازعل عليه
التفتت عليه تسألة بكل دلع
موصحيح نصوري؟؟؟
ناصر وهي دايخ : اي صحيح كلامج يابعد طوايف نصوري
عذراء فاتحة حلكها على اخوها وتقلد كلام جدتها
تضرب كف بكف
: يع يع خايب نويصر عاباك الله على عالدكة
شوفو الولد شلون زحف
طلعنا واحنا نضحك
احياناً نشعر بالسعادة من نشوف الناس الي نحبهم
سعداء وابتسامتهم مالية وجهم
يارب ديمها عليهم
وصلنا لبيت جدهم وكانت الاجواء كلها افراح
انتبهت على مجموعة ولد ينصبون كراسي برة بالحديقة
وناس تعلك نشرة ضوئية دخلنا لبيتهم وعلكت الهلاهل
والهوسات بين عمة منتهى وبقية خواتها
والجدة كاعدة تصفك
وكلمن عبايتها فوك راسها
وتهوس بيها جان شكلهم كلش جميل
بس ما اعرف ليش كل هوسة (اهازيج الاعراس)
تطلع من النسوان اني احس بيها مثل
النعي على روحي
احس بروحي اريد اطك من الغيض
رحت بصف عذراء واني ببالي تخطيط لازم اسوي

: عذراء عفية شوفيلنا غرفة حتى نعدل نفسنا بيها
منتهى : لا ظلو بملابسكم ترة راح نطلع لبيت العروس
هسة السيارات على وصول ما بقى شي
عذراء فهمت علية وغمزتلي بطرف عينها واشرتلي
رحت وراها وراها
عذراء : صعدي انتي واني راح ابقى جوة هنا خاف يحتاجوني

واغطي على اختفائج
رحت صعدت فوك
والله اليوم ما اطلع من البيت الا واني حاجية وية ثائر
كون احرك گلبة مثل ما حرك گلبي

ملكةه · 30/April/2018

ج 2 بارت 10
((عليك ادعي بمسيت غروب ظالمني وانا بنية
صبرت وياك صبر ايوب تاليهة غدرت بية))

رحت صعدت فوك وعذراء بقت واكفة قرب الدرج
حتى تراقب الطريق خاف احد يشوفني صاعدة

والله اليوم ما اطلع من البيت الا واني حاجية وية ثائر
كون احرك گلبة مثل ما حرك گلبي
الا اخلي يتندم على السواه وياي وبعدها اطلع من حياتة
وما اشوفة وجهي
مشيت على كيف حتى محد يحس علية
جنت اندل غرفة ثائر
فتحت باب الغرفة وشغلت الضوة جانت كلش نظيفة
وباردة ومعطرة عبالك غرفة عريس
اي شبيج سهى هو صدك عريس
يمة والله توجع هاي الكلمة احس بيها مثل الخنجر
يطعن بالگلب
توغلت لداخل الغرفة
ونزعت عباتي والشال وعلكتهم
وصرت اباوع لروحي بالمرايا
كنت لابسة فستان كلش قصير لاول مرة بحياتي هيج
اتجرأ والبس هيج فستان قصير حتى بوقتها بالصالون استحيت ابدل كدام البنات خاف يشوفوني ويظلون يحجون
اني حتى امي ما خليتها تشوفني
ومن طلعت گبل لبست عباتي لان الفستان كلش فاضح
كان موديلة قصير اسود حفر نازل من الصدر
والظهر ايضاً حفر شكل سبعة
وكان طوله يوصل لنصف الفخذ
والسيقان كلها مبينة ولو امي تشوفني احتمال تدفني
اهووووو بدة ظميري يأنبني لا مستحيل اتراجع
كنت جايبة بالعلاكة حذاء كعب كلش مرتفع
بحيث من لبستة برز قوامي وصرت ملفتة للانتباه
عدلت شعري الي طولة لنصف ظهري
طلعت ريحة من جنطتي ورشيت شوية
كعدت انتظرة شوكت يجي والتوتر بلغ مني الخوف
لدرجة كعدت اكل باظافري
القيت نظرة اخيرة على نفسي بالمرايا
ورحت اتفحص غرفة ثائر
وصل بية الفضول
وصرت اكلب بالعطور وكل ساعة ارش على روحي
من عطر من عطوره صحيح كانت رجالية بس ما اعرف ليش
اني استخدمتة يمكن حتى اشم عطرة واحس روحي بحضنة
ما اعرف شنو معنى تفسير
تصرفي هذا يعني جاية ولابسة ملابس فاضحة
وداخلة بغرفة رجال غريب عني
وضاربة مبادئي والتزامي بعرض الحايط
وكاعدة اتفحص بملابسه وعطوره وارش منهم
مالة ماكو غير تفسير واحد
اني دا امر بحالة من الهوس او الجنون
متقبل غلط معقولة اليأس من حبة وصلني الى هاي المرحلة وخلاني اغامر
باوعت لصورتة بالبرواز (ايطار صور)
رفعتها وكعدت اتلمسها
وصرت احجي وياه بعتاب
: ليش ثائر هيج سويت بية
ليش دمرتني واتخليت عني
وبخذلانك الي فقدت كل طعم بحياتي
ليش عيشتني بوهم وخليتني ابني
امالي عليك
صرت مثل الي يبني قصر بالرمال
وبأبسط ريح هابة تجي تجرفة ويصير هباء منثور
هذا حال حٍٍِْــًبٌٍـــِٓېٍٓ وياك يثائر
حيست بغصة ارتفعت لحنجرتي وتكسرت

وصلت للبيت وروحي واصلة لخشمي
والجو مخبوص خبص ناس طالعة وناس داخلة وتعديلات وزلم برة سلمت عليهم
ودخلت للمطبخ وتلكني عماتي ونسوان عمامي وجدتي بالهوسات والهلاهل وطش الجكليت
ومن القهرحتى ما كلفت نفسي ابتسم واجاملهم
اليوم صدك احس بروحي صاير وحش واريد
بس حجة اصادفلي واحد ينرفزني حتى افترسة
واطلع حرگة گلبي كلها بي

سلمت عليهن واستأذنت منهم حتى اروح اغير ملابسي
دخلت عالصالة اريد اصعد لاگيت ابوي
ما سلمت عليه والله ما راح انسى موقفة وياي
خلي يعاني جفاي مثلما انا جاي اعاني
شفت جدي يريد يدخل للديوان
: يالله يابعد جدك عجل عجل ترة الوادم (الناس)
كلها منتظرة زحمة اتأخرنا.
: تامر ما راح اتاخر
صعدت فوك لغرفتي
فتحت الباب وجمدت بمكاني من المفاجئة
ووكعت عيني على احلى قوام
واحلى حورية شافتها نظرة عيوني
غمضت وفتحت عيوني مرتين اريد اتأكد هاي منو
الي جاي اشوفها گدامي
معقولة
همست بصوت مبهوت
: سهوة
سهى بمكر تسوي روحها اتفاجئت بدخول ثائر
ركضت تريد تاخذ عبايتها الي معلكتها خلف ثائر
يعني بأختصار ما راح تكدر تستر نفسها الا تمر من
امام عيون ثائر وتغيضة بخطواتها
يالله توصل للعباية
ثائر وهو يضيك عيونة
: سهوة شعندج جاية هنا لبيتنا
سهى بدلع : شنو حبيبي نسيت
انت مو عزمتني ذاك اليوم على خطوبتك
هاي شبيك اشو صاير بسرعة تنسى ولو ما استغرب الي مثلك عادي عندة بسرعة ينسى
كان يعرف ان كل كلمة تطلع من سهى
تدك مسمار بالنعش
: ااهااا يعني هسة انتي جاية وكاشخة وفرحانة
كلة علمودي
معقولة لهل درجة فرحانة بخبر خطوبتي
: ليش حٍٍِْــًبٌٍـــِٓېٍٓ هو انت قابل شوية
حقك متعرف معزتك بگلبي
انت انسان فضلت علية ورجعتلي حسن ابني
كلت اقوم وياك بالواجب واردلك الجميل
: اهااا هيج الحجي صار

يحجي وهو يأشر عليها
: زين وهذني ملابسج وشعرج وجهج
هاي كلها علمود تكومين بالواجب
يحجي وعيونة سافرت على طول جسمها
اجة گلبة يوكف ما شاف سيقانها
الله ياخذج يسهوة شلابسة
هاي بكل عقلها تريد تروح للخطوبة هيج بهذني ملابسها
ولا وحيل واثقة من نفسها
بان راح اخليها تطلع منا ويانة للمهر
والله لو تموت
عاينت عالساعة ما ظل

وكت
رحت درت وجهي عالباب وقفلت الباب بالمفتاح
وحطيتة بجيبي ورحت اقتربت منها

سهى بغرور مثل الطاووس
غمضت عيونها بصورة تغيض المقابل
: على شنو قفلت الباب فتحة ترة اني اريد اطلع
مايصير ابقى هنا يمك لوحدنا
: هَـا يسهو هستوج عرفتي ما يصير
وين جنتي من لبستي ملابسج هاي وتكشختي وتعطرتي
: شنو يعني لازم استأذن من حضرتك يالله
ابدل واعدل
اقتربت منها
كانت نظراتها تعاين بكل مكان بالغرفة الا علية شكلها
كانت تتصنع الشجاعة المزيفة
: هاي اذا كانت البدلة الي لابستها يسموها ملابس

رجعت للخلف واطمدمت بالطبلة وتوقفت بمكانها
قربت راسي من رگبتها وشميت عطرها كان مجموعة
عطور رجالي ونسائي
رغم قوة العطر لكن صار على جلدها الة نكهة خاصة
لدرجة عجبني امد الساني على طول ركبها
همست بأذنها : اااااااااخ يسهوة بختج بالوقت
جان ما اتحرك منا لو تنكلب الدنيا بس
مثلما تعرفين وراي خطوبة ولازم احضر نفسي
والله من حجة هيج اتمنيت اوكع بالكاع وابجي مثل الطفلة الي تريد حاجة ملكها
شفتة تركني واكفة بنص الغرفة
جسمي كلة يرجف من الغيض

راح للكنتور وكعد يحضرلة ملابس
جان يتحرك بأرجاء الغرفة ويدن دن
مديت ايدي الة
: شنو لحظة وين رايح انطيني الفتاح بلا لعب جهال
اريد اطلع
التفت علية ورفع تك حاجب
وظل يتحرك بداخل الغرفة وهو يصوفر ولا عبرني
ما اعرف ليش برودة
اربكني ما اتوقعت ردت فعلة هشكل تكون
يعني اتوقعت راح يركع كدامي ويتوسل
لحتى ابقى جنبة او يطللب السماح مني متندم
بس هاي كلها مصارت
رحت بكل خذلان اخذت عباتي وشالي ولبستهم
شهكت من شفتة نزع قميصة كمدامي
عزززة بعينك يفتح بدكم القميص ويباوع علية
بس على منو لا هالمرة كلة بالعناد
كعدت اباوع عليه بكل صلافة
صحيح حسيت كل جسمي عرك من الاحراج بس حاولت قدر الامكان ما ابين
شفتة تركني واكفة وراح دخل للحمام
: شنو شنو لحظة وين رايح
سد باب الحمام بوجهي
وصرت ادك بالباب
: ثائر بلا جنان افتح الباب وانطيني المفتاح
سمعت صوت الدوش انفتح (الشاور)
وصار يدن دن شكلة الاخ هواي متونس ضربت الباب بقبضة ايدي حيل قوي من القهر
ضليت اكمز والله حقدت عليه
ما اعرف على يا موقف انقهر على عدم مبالاتة بوجودي
وما اهتم بية لو انقهر ان كل هذا الي سويتة راح
على خالي بلاش لو انقهر على مبادئي الي ضربتهم بعرض الحايط لحتى انتقم منة
وتالي كلشي ما حصلت
احس طلعت من المواجهة فارغة اليدين
سمعت ورة فترة انفتح باب الحمام
التفتت
يبوووو عزة بعينك يثائر لاف المنشفة على خصرة وجسمة كلة ينقط ماي
لا لا هذا صدك زودها
درت وجهي عنة واني احجي وهو يتحرك حولي بالغرفة
: ثائر انطيني المفتاح اريد اطلع
: شنو خايفة ياحلوة خاف واحد يشوفج هنا ترة
عادي
: لا مو خايفة بالعكس المفروض انت الي تخاف
خاف ابليك واخرب خطوبتك من يعرفون بية هنا
شراح تتوقع رد جدك شي اكيد راح يزوجك الي غصب عنك لان جدك بساعتها راح يستحي من عمي ويدور الستر
: والله ياريت الله وايدج تسوين علية فضل
حتى اليوم اتزوج اثنين بدال ما وحدة
اتزوجج وارتاح بدال ما متصخم وميت قهر وهاي انتي
بيدج انطيتني الحل الف رحمة على والديج
طبعاً هو يحجي ويبدل ويدكم القميص
وشعرة مبلل من الماي
كلام ثائر خلاني احس مثل الي وكع بالفخ
: نجوم السما اقربلك مني
لتحاول تجرب حظك وياي
: خايبة يسهوة لا تتحديني ترة انتي مو بكدي
ولاتخليني اخليج براسي
ولو جنت اريدج بهاي الطريقة جان اتزوجتج من زمان وفضيت السالفة بس انا اريدلج الا حترام
وما اريد الناس تحجي بيج بالشينة
شفتة يلبس بساعة ايدة
وكعد يمشط بشعرة
وحط العطر واخذ سترتة
ومر من يمي وصل يم الباب
وفتحة بالمفتاح وقبل لا يطلع
ثائر بخبث: بكل عقلج اخليج تطلعين هيج
لا وبعد بحفلة المهر مالتي
ولج هذا عشم ابليس بالجنة يسهوة دخول الحمام مو مثل خروجه
شفتة طلع وسد الباب وراه
عززززززززززززززززة هذا شديسوي سمعت صوت المفتاح بالباب
قفل الباب شنو لااااا
دكيت عالباب
: لك ثائر عفية بلا جنان افتح الباب
حطيت اذني عالباب وسمعت خطواتة ابتعدت عن باب الغرفة
بيوي عزة بعيني هذا بشنو يفكر
طبعاً ثائر الشخص الوحيد الي ما اكدر احزر ردود افعالة
وين يريد يوصل من قفل الباب

ركضت بسرعة على جنطتي
وطلعت نقالي اتصلت گبل على عذراء
يدك ومترد شلووون بالحظ المصخم
اني شسويت بروحي
رجعت اتصل مرة ثانية هم ماكو رد
الله ياخذج يعذراء شلون تنسيني
ظليت احوم ما اعرف شنو اسوي
................................
نزلت واني ابتسم ما اعرف ليش
يمكن من شفت سهى بغرفتي وعطرها مالي الغرفة
حسيت بشي داعب احساسي
لوهلة اتخيلتها مرتي حلالي
وهي الي تضوي غرفتي
لكن ارتديت من شفت نفسي جاي اجهز نفسي
حتى اروح اخطب غيرها
شفتها مثل الي انسحب البساط من تحت رجليها
بس صبرلي شوي وانا اعلمج
شلون تلعبين وية الوحش
نزلت ايدي ووحطيتها بجيبي وتلمست مفتاح الغرفة
احس بيها هي صارت المفتاح
وصرت كلما المسة احس

بالفرح
المفتاح صار بطاقة ضمان لوجودها قريبة مني

عذراء ظليت احوم اريد اعرف سهى
ليش لحد الان منزلت
شهكت وضربت على صدرها
عززززة هذا ثائر نزل وهو يبتسم
شكو جا سهى وين
والله اخاف اروح اسألة خاف يگب بوجهي
ويمسح بية الگاع
اشو هو صعد لغرفتة وهو نار كبرة وجنة واحد يريد يرتكب جريمة من الغضب
اشو هسة نزل وهو يبتسم
معقولة كتل (قتل) سهوة وارتاح منها يبووو
شنو هاي الافكار الجهنمية يعذراء
بدال ما كاعدة تسوين افلام روحي شوفي المكرودة وين صفة بيها الدهر
اتذكرت نقالي
رحت ركض على المطبخ كانت جنطتي هناك
دخلت وصار عدي بوجهي
الي وكف بمكانة متعجب جنة شايف شبح
عذراء وهي ترفع حاجبها بتسائل
: خير ياطير شبيك تبحلك بوجهي جنك شايف جني كدامك ومخترع
سد حلكك لا تدخل بي ذبانة
عدي وهو يبتسم على السانها الحاد
: ياستار استر السان لو رشاشة
راح اتقدم منها
سمعت صوت نقالي جاي يرن بجنطتي بس ما اكدر اوصلة لان عدي ساد الطريق
ونظرات عيونة علية متبشر بخير صارت نظرات عيوني تنتقل
بين عدي وجنطتي هو شافني مرتبكة وعاين بأتجاه جنطتي
راح لجنطتي
عدي بتسائل: هاي جنطتج
: اي
: اذن النقال الي جاي يدك نقالج
: لا مال جدتي
ابتسم على استهزائها
وراح فتح الجنطة وطلع النقال
رحت وراه: انت بأي حق تفتح جنطتي وتطلع النقال
انتبهت عليه انفتحت عيونة اعلى وسعهن من شاف
اسم المتصل صار النار تلعب بعيون
رفع النقال كدام عيوني وسألني
: منو حبيب الروح
اني حايرة وافكر بالمكرود شلون ما نزلت من فوك لحد هسة
وهذا البطران كاعد يسألني منو المتصل
مديت ايدي عليه
: انطيني النقال انت شلك غرض ترة حلوة هاي انت مو من حقك تدخل بخصوصياتي
يالله انطيني النقال
عدي بقهر من جسارتها
: اه انا تكليلي مالي دخل
جا بسيطة رد على حبيب الروح
صاح بغضب
: الو الو احجي ولك عااار اليوم الا اسمط الخلفوك
شوفي ولج هذا الظاهر سمع صوتي
وما رد بسيطة حسابي وياج بعدين هسة
بختج بالخطوبة والناس موجودة عدنا
عذراء بتحدي : عدي رجع النقال لا والله اشتكيك لجدي واخلي يلعب بيك جولة

عدي بتوعد
: اذا انتي مرة روحي لجدي
يابة بالعباس اذا ما اشوي على اذانج بصل
ما اطلع عدي
قفل النقال وحطة بجيبة وطلع
ظليت اعاين عليه
هذا شبي والله مخبل مو صاحي

سمعت صوت امي صاحتني وكالت
: عذراء يمة جهزن انتي وبنات عمج راح تطلع السيارات
عذراء بارتباك
: ان شاء الله يمة رايحة اصيحهن
يبوووي صخام رحت ركض اريد اصعد واخاف احد يسألني شعندج صاعدة فوك
اشو هنة الله يحفظهن كلهن التمن (اجتمعت)
بالصالة يم الدرج
شفتهن گامن ولبسن عبيهن على روسهن
حتى يروحن لبيت العروس
وسهوة مابينت
عزة العزاني شلون ورطة هاي
رحت اصيح لرواء بعد ما بيها مجال لازم استعين بيها اخذتها قريب عالدرج حتى محد يسمعنا وحجيتلها
رواء : عزة بعينج يعذراء شورطج وية الوحش وخليتي سهى تدخل لجهنم برجليها
ولج غير تحجين توكولين
سمعنا صوت خشن من خلفنا
واحنا جمدنا بمكانة من الخوف التلفتنا على كيف
مثل المجرمين الي تم القاء القبض عليهم بالجرم المشهود

ثائر: شوفن انتو الثنين هسة كدامي تمشن وتطلعن تركبن بالسيارات واياني وياجن اسمعكم ناطقات بحرف
عذراء: شنو تقصد اة اة ناطقات بحرف مفتهمت عليك
ثائر بخزرة : لا تسون نفسجن غشيمات
انتن تعرفن كلش زين انا عليمن اقصد
بصوت عالي
: فااااهمات لو اعيد
عزة والله اثنينا طفرنا من مكانة من الكمزة
صفيت يم رواء وصرنا نهز بروسنا مثل الهنود
عايز بس نكلة
: صاار معلوم بابا كلو تٌـٌـمــام انتى روه اني يجي وراك
اعاين على رواء الي حاطة ايديها على حلكها
ذكرتني بالقرد الي حاط ايدة على حلكة بالسمايلات
شكلها صار تحفة من الخوف
الله يرحمج يسهوة جنتي خوش بنية

..................
كعدت اتصل عليها بلكي ترد
يمة اجة يوگف گلبي من سمعت صوت رجال
ظل يغلط ويسب
احس جسمي من الخوف صار كلة يرعش
سديت النقال بوجهة وباوعت عالشاشة
اريد اتأكد هذا رقم عذراء لو غلطانة
اي هو رقمها لعد هذا منو
معقلة يصيرالخط شمر وصار التباس
رجعت اتصلت عليها مرة لخ طلعلي الجهاز مغلق
يبوووو على هالحظ
هسة شلون وين انطي وجهي عليمن اتصل
ظليت افرك بيدي وافكر
ما ادري من القلق و الموقف الي اني واكعة بي
لو افكر بالي راح يخطب وتركني هنا
صرت احترك بنارين نار الخوف ونار الغيض

..............................
رحنا لبيت الشيخ وصلنا لديوانهم
وجان الديوان خبصة متروس ترس زلم
وكعد جدي يحجي ويحمد بطيب اصلهم والشيخ راجح
يقابلة بالمديح وظلو يحجون
وانا بالي مو يمهم بالي يم الي تركتها بغرفتي واجيت
بعدما ظلو سالفة تجر سالفة
جابو السيد وكعد بعقدلنا
وحصيت على ضربة كوع بخاصرتي التفتت شفتة عدي
: خايب ثاير فضحتنا السيد صارلة ساعة يگول ردد وراي وجدي يخزر بيك وانت ولايمك
كلمنا العقد
وسمعنا صوت الهلاهل وانا احس بروحي اختنكت
ما ادري ليش
كمت على حيلي
جدي: هَـا ثاير على وين رايح
: ه

َـا جدي طلعتلي شغلة كلش مهمة ولازم ارح ضروري
: جا ما يصير يا بعد جدج
وكل المهمة لعدي يروح ببدالك
: لا شيخنا الشغلة ما تنفع عدي يروح عني الا انا
اروح اشرف عليها
ابوه : بوية ثاير عيب من الوادم شتكول علينا عقد على بتنا وطفر
: لا تخاف من الوادم انتو سدو مكاني البركة بيكم تكفون وتوفون
نهضت من مكاني ورفعت ايدي بالديوان وبصوت خشن
: ياجماعة الخير انا اترخص عن اذنكم
عندي شغل طارئ ولازم اروح
عدي كام وياي
التفتت عليه : خير شعندك كايم وياي
: جا انت مو كلت شغل طارئ معناها عركة
ابتسمت بخباثة: اي والله هي صدك عركة
بس من نوع اخر
ما احتاجك بيها
عدي: وحش ضحكتك وراها شي
: خايب دكعد اقنعك انت لو اقنع جدي
يالله انا رايح مع السلامة
............................
الله ياخذج يسهوة ماضل عقل بالراس من وراج
تركت وراي ديوان عامر بالشيوخ
لاجل ارجع واكحل عيني بشوفتج
اريد اشبع منج سوالف ماينشبع منها
وتخلص بساع
رحت اشتريت عشا الي والها
ورحت كبل عالبيت اتمنى اخلي السيارة تطير واوصل لعندها
ما اعرف شجاي اسوي بحالي
انا عاقد وگلبي يم سهوة ثاير
ورايح الها مثل الي رايح برجله يواجه الموت
بس لازم احجي وياهة
واخيرها بالي نويت عليه
وصلت للبيت وجان محد بي بس الحارس
دخلت وكبل صعدت فوك لغرفتي وفتحت الباب
شفتها لابسة جبتها ومدنجة راسها
رفعت راسها وعيونها ذبلانة شكلها جانت تبجي
دخلت وقفلت الباب واتقدمت منها
نهضت من مكانها ورجعت للخلف وحجت بصوت واهن
: احلفك بالله يثائر لتكول عقدت
: اي يسهوة خطبت
انا رجال منطي كلمة للناس من زمان وما اكدراكسر بخت بنتهم
جانت كلمات عدي الي مثل الي قرب البانزين عالنار
هديت عليه بكل قهر وصرت اضرب على صدره واغلط ومعرفت شنو بعد حجيت خرمشت وجهة
ثبت ادية اثنينهم خلف ظهري
: اهدي يسهوة اهدي
بيمن ترديني احلفلج حتى تصدكيني
البنية عقدت عليها لاشايفها ولا اعرفها
جانو اهلي خاطبيها قبل لاالتقي بيج بالصدفة
ببغداد بمدرسة سرى
كعدت اتلاوة وياه
: عوفني اتركني
روح الله لا يوفقك
لك تخاف على بنت العالم
لا تروح هيبتها وسمعتها
لعد واني شنو مو بنت ناس ليش مفكرت بية من علكتني بيك وخليتني اتنفس هواك
: ولج سهوة بس اسمعيني خليني احجي
: شتحجي بعد ماكو كلام ينكال بعد الصار
انت صرت ملك غيري
: لج سهوة اني راح اتزوجج
والله متزوج مية اخذج اخذج لو يبقى اخر نفس بالروح
ظليت اكمز من القهر والحرة الي بگلبي
: والله عشم ابليس بالجنة تحلم اخليك تتزوجني
انت طلعت من گلبي وطابت نفسي منك
بعد ما اريدك لو يصوغونك ذهب
: خايبة يسهوة لا تمتحنين صبري
لا تجبريني اسحب منج الاختيار واخليج امام الامر الواقع
وتدرين بيا اعزج شكد لكن من توصل الشغلة للعناد
لا استخدم كل الوسائل حتى اكدر اضمنج تصيرين حلالي لاتوصليني استخدم هذا الاسلوب وياج
خفت من تهديدة الي
سهى بعدم تصديق
: يعني شنو توصل بيك تاخذني غصب
: اي وهنا وعلى فراشي بعد اذا اقتضى الامر
صار گلبي يريد يطلع من صدري من ورة كلامه
يعني شنو يريد يتقدملي ويتزوجني
وهو هستوة راجع من خطوبتة
يعني بكل عقلة يريدني اوافق عليه
لا يمكن مستحيل بس شلون انفذ بجلدي منا واطلع
من غرفتة واني منتصرة
ماكو غير اسايسة واجاريه
واحجي وياه باللين حتى يطمأن
لان الظاهر العناد وياه ما يولد عندة غير التحدي
والتحدي يوصلني للطرف المعاكس
: عفية انت بس هد ايدي
ترة والله كامت توجعني
حس على وضعهم حابسها بين اديه
ما اتركج الا تنطيني الوعد بالموافقة عالزواج
بلعت ريگي
وفكرت وية نفسي
خليني انطيه وعد كاذب شنو يعني
شيريد يصير
بس كون انقذ نفسي من هذا الوضع
الي ورطت نفسي بي بلعت ريكي بخوف وهمست بصوت يرجف
: وعد مني الك موافقة على كل الي تكولة بس اترك ايدي
هدني واطلق صراح ايدية
: حلو شكلج بديتي تتعلمين هسة اول شي
نزعي العباية والشال ان شاء الله انتي بعد راح تصيرين حلالي
: يعني شنو ما راح ترجعني على بيتنا
لا عفية خاف يرجعون اهلك ويشوفوني هنا
: ارجعج على بيتكم بس بالاول خلي نتعشا سوية
واريدج بيدج توكليني
مد ايدة على عباتي ونزعني وسحب مني الشال وعيونة
سافرت على طول جسمي انتبهت علية عض شفتة
وهمسلي: امشي كدامي خلي اشوف
جمالج بهاي البدلة
: اة اة شتشوف ما ما ما اتحرك من مكاني
: حلو خلينا هيج للصبح شعدنا اصلاً انا الربحان
: عفية ثائر جاي تصعب علية الامور على كيفك وياي وحدة وحدة شوية خليني اتعود عليك بالاول
: يالله بس هالمرة راح اهدج اخذي راحتج
ابتعدت عنة وجسمي كلة يرجف
رحت وكفت يم الباب مثل الطلفة المعاقبة
ما اعرف ليش روحي صارت يم الباب
عبالك حبل النجاة
شفتة حط صينية الاكل بالكاع
جانت متروسة مقبلات وكباب وتكة ومعلاك
كعد يفتح بالخبز كدامي وفتح قواطي البيبسي
ما اعرف يمكن سمعت صوت بطني كامت تغرغر
اتذكرت نفسي جواعانة لان من سمعت بخبر خطوبتة لحد هسة واني ما داخل شي بحلكي جنت ناسية نفسي
اشرلي بصفة : يالله تعاي كعدي

اكلي
ارتبكت احس حتى العشا صار شي حميمي جو خطير
: ما خليني هنا واكفة انت سويلي لفة وانطيني
قوطية هنا اكل بمكاني
ثائر وهو ميت عليها من الضحك على شكلها الي يشوفها اليوم العصر ما يكول هاي نفسها البزونة
الخايفة : خلاص لعد ظلي واكفة بمكانج لحد ما برجعون اهلي كلهم ويلكوج هنا
أرسل إلى صديق
ظليت افرك بيدي بتفكير هاي شلون ورطة
الله ياخذني كلة من جوة راسي
استاهل الي جرالي هاي نتيجة التهور
صفنت شوية اي بس صدك تعاي
اني ليش ما العب بأعصابة
واراويه شنو خسر من نعمة قبل لا اطفر بجلدي
ليش ما اني الي العب باعصابة والوعة
مشيت بتردد بتجاهة
رحت كعدت يمة بدلع
وهو مد ايدة على الاكل وصار
يسويلي لكمات صغار ويخلي بحلكي واني اكل وعيوني مسبلتها بعيونة
هو داخ بيا وظل يراقب شفايفي من اكل واني صرت اتعمد اطخ اشفايفي بأصابع ايديه حسيت على ايدة رجفت ونفسةصار ساخن
لان كان قريب مني
سويت نفسي ممنتبهة عليه
مديت ايدي على الاكل وسويتلة لكمة
وقربتها منة
وحجيت بدلع
: امانة اخذ هاي مني
انتبهت عليه ضاعت علومة وياي
واتخربطت كل مشاعرة مثل الي قلب عليه الطاولة احسن خلة ينكوي بالنار
اكو هواي انواع للقوة صحيح اني ما املك
القوة العضلية لحتى اخذ حقي منة
لكن هناك قوة تملكها حواء
وهي اللعب بالاعصاب هذا النوع
قادر على دفع ادم الى الجنون
تبادلنا النظرت
ما انكر واكول اني مامهتمة
لا بالعكس صرت اعاني مثلة
من الي جاي يصير بيني وبينة
لكن علية وعلى اعدائي خلي يحترك وياي
بناري مو بس اني الي احترك
سحبت نفس عميق وياريتني ما سحبت اختلط عطرة مع انفاسي ودخل وتوغل
داخل الروح
رجفت وشهكت من عض اصابعي
ولزم ايدي من ردت اسحبها
وصار يبوس كل اصبع على حدى
حسيت بلحظتها انقلب السحر على الساحر
لكن كان بداخلي شعور يحثني على ان اخرج من هاي المعركة منتصرة
سبلت بعيوني الة
وكعدت ادلع عليه
: ثااااائر اني شبعت خلاص
ونزلت ايدي ومسحتها على طول خصري حتى
الفت انتباهة لجسمي
اني مسوية رجيم
يباوع لجسمي وعيونة فاضحتة
: انا مقتنع بجسمج ما يحتاج تجوعين روحج كملي اكل
: لا عيني ما احب اخرب جسمي
بالله اذا ما صارت قسمة وتزوجتني خو ما اخرب جسمي علمودك

لا حبيبي ابقى احافظ على جسمي
حتى اصيدلي الزوج المناسب واجننة بجسمي وبلبسي
يمة بعدني مامخلصة كلامي ما
حسيت الا اني وياه اثنينا بالكاع
وهو فوكي مثل الصياد
: ولج يسهو مو انا الي ينحجي هذا الحجي يمي
ترة بايعتة امة الي يتجراء وياخذج مني
نزل راسه وخمط مني بوسة
وصار يتفنن بتعذيبي
والظاهر كان ل ادم رأي اخر باللعب بالاعصاب
حسيت بروحي دخت وذبت بين ايديه
انصهرت من اثر المشاعر
وصرت ارجف كلي بين اديه
كانت استجابتي وية بوسة ثائر وحركاتة مثل الي يزيد النار حطب
بس من سافرت لمسات ثائر على انحاء جسمي خفت لا اضعف كدامه وتالي يكسرني بأمتلاكه
وياخذني كلي وما تبقالي بعدها عزت نفس وبعدها راح اني الي انكسر واطلع من المعركة خسرانة
لا مستحيل صارت لمساتة الي اكثر جرئة
وحسيت بي فقد السيطرة وصرنا اثنينا
قريب ان نكون جسد واحد
لكن مستحيل اخلي يوصل للي يريدة
دفعتة بكل قوتي من صدرة العاري الي ما اعرف شوكت نزع قميصة
حسيت بي اتفاجيء من ردت فعلي
وسحبت نفسي بسرعة وبكل خفة من جواه
وصرت اعدل بملاسي الي كانو بحالة مزرية
واتفاجئت شلون وصل بية الحال
السحاب مفتوح والتعلاكة مالت الفستان
مقطوعة
انخبصت من سمعت صوت قريب
شفتة مد ايدة علية وبصوت هامس
: من احتركو وين رايحة دتعاي اليوم احرك عشيرتج
كمزت من يمة بسرعة
: شنو ثائر جنك نسيت نفسك ووضعك
ركضت على عباتي شلتها اريد البسها
شفتة سحبها من ايدي
: شنو سهوة منو كلج تثيرين الوحش الي بداخلي
دفعني على الحايط وصار مثل المجنون
يبوسني بكل مكان وجنتي ركبتي شفايفي
كانت شفايفة علية مثل النار
سمعت حركة قريبة على غرفة ثائر واني هنا رجعت لوعيي لا يسهى شكلج لعبتي بالنار
وراح تحركين نفسج ومحد راح ينقذج
لهنا وخلاص ردتي تثبتين لثائر هو شنو راح يخسر اذا
اتزوج غيرج
هذا هو وصلت الرسالة
وثائر انجن وراح يحس بقيمتج
ابتعدت عنة
: لا عفية ثائر ميصير الي دتسوي وياي اكبر غلط انت جبير مو مراهق حتى متكدر تسيطر على نفسك عفية خليني اروح
سمعنا صوت الباب واني هنا
انخطف لوني

ملكةه · 30/April/2018

ج 2 بارت 11
تجي احيانا للشخص لحظة غرور وتهور وتسرع
بأتخاذ القرار بلحظة غضب
تضيعة وتضيع كل مبادئة
اي نعم اني هاي اللحظة عشتها وظليت اعض ايدي من الندم
من صرت اعاند غرور الروح
لاجل اعاقب ثائر على حساب احترامي لنفسي
اي ردت اعاقبة على تركه الي
بس بنفس الوقت كنت اعاقب حالي
اني صحيح غريت ثائر وتكدرون تكولون اني لعب بالنار بس حقي
لان ثائر حب عمري الي ما لحكت اتهنى بي
هو بالنسبة الي الشي الوحيد الجميل بحياتي
ما كدرت اشوفة يروح لغيري وما اسوي شي
جنت اشوف ان حٍٍِْــًبٌٍـــِٓنا يملك الحق علية حتى احاول
جنت خايفة يضيع من بين ايدية للمرة الثانية
ما اريد استسلم مثلما استسلمت بسالفة التهديد
اتصرفت بأنانية ومكدرت اخلي يروح
بدون ما اقاتل

حالي حال الي يريد يروض اسد
لحتى يخلي يتعايش مع الناس
وهذا الشي من سابع المستحيلات ونسيت
ان الاسد قادر على الافتراس بَـــأي لحظة جوع
هذا حالي كان مع ثائر
...........................

سمعنا صوت الباب واني هنا
انخطف لوني
كان الباب يندك بصورة قوية
مثل الي دخلو عليه مداهمة شكلة الي يدك بالباب يعرف منو خلفه
ابتعد ثائر عني وكعد يدكم بقميصه
بستعجال وشمر علية عباتي
: هاج لزمي لبسي العباية
شفتة اتجه للباب حتى يفتحة
وهناااا كانت الصدمة الي
اتمنيت الموت ولا يشوفني هذا الشخص
سناء عمة ثائر وهي تدفع الباب على وسعه
وتصيح: ايا سااااا.....ة ايا منحطة على هالعملة
ولج والله عرفت بيج مو راحة من اول ما شفتج
كرصني گلبي منج

مدت ايدها واجتي تخمطني (تضربني)
لكن صار كدامها
ثائر المتفاجيء من دخول عمتة الي ما جان مسوي حسابها وهذا اخر شي جان يطرء على باله
: عمة شرجعج عالبيت
انتي مو جنتي بالمهر
: يثاير جابتني حركة گلبي بيوم اتفگدت سهوة
ما هي بالمهر وية بنات عمها
جا شعبالك تعبر علية حركاتها وسوالفها

دخول عمتة المفاجئ كان بالنسبة الي صدمة
مثل الي يصحونة من النوم بسطل ماي بارد قارص
لدرجة صحيت على نفسي
وكعدت اباوع لوضعي اني شسويت
معقولة اني انجنيت

ثاير: عمة رحمة على والديج لا تصيحين
ترة انا راح افتح مو ضوع زواجي من سهوة
وية جدي نيتي واضحة ترة ما يحتاج تسوين كل هاي الهوسة فسكتي احسنلج

يحجي وية نفسة
ااااخ الله شجاني واستعجلت
صار ثائر وعمتة يحجون واصواتهم علت
واني عقلي قفل وكفت محتارة بمصيبتي
اريد كون الله ياخذ عمري
يعني شلون بية اضل غبية طول عمري
حسيت ببطني كامت توجعني من الخوف
شلون هاي شراح يفضها وية عمتة
وهي بالاصل جانت حاطتني ببالها
صحيت على ثائر يحجي وياي
: سهوة لبسي شالج وامشي خل اوصلج لبيت عمج
قبل لايجون
سناء: ايه يالله الحك استر عليها
ترة ما ناقصين فضيحة ثانية
فضيحة وحدة كافية عليها
لا نوب تشتهر بالسلف
الله ياخذج جايتنا لهنا وجايبة بلاج وياج
وتردين تسودنين الولد
ثائر بغضب وبصوت عالي
: عمة سدي الموضوع واتكفي الشر وتالي وياج انا مو كلت كافي شوفي عمة من هسة اكلج
قسماً بذات الله اذا اسمع حجاية طالعة
برة الغرفة لاسوي سواية يعمة اخليج تتمنين ماحجيتي

وطيت راسي ومشيت وراه
واحس برجلية طابوك
مرات الانسان من يتصرف تصرف ارعن يفقد احترامة
بساعتها لا يكعد يلوم الناس
بردة فعلهم وياه
احسنله يدفن راسة بالطين مثل النعامة
وخلي يكعد يلوم نفسة بالاول
وصلت لبيت عمي ودكيت الباب طلعت امي فتحت الباب واجة وراها حسن
محجيت شي دخلت جوة
ام سهى: هَـا يمة بشري خلص المهر لو بعدة
وين نور ليش ما اجتي وياج ليش لوحدج راجعة
نزلت امي علية بالاسئلة مثل المطر
واني راسي يريد يطك
جنت امشي اريد بس اصعد فوك
ام سهى بتسائل: سهى موجاي احجي وياج ليش متردين
سهى وكوة تطلع الكلمة منها
: هَـا يوم راسي كام يوجعني من الهوسة ورجعت
يمكن صار عندي هبوط
: همزين ما رحت وياكم
لان ادري بروحي ما اتحمل هيج اجواء وهمة الله يحفظهم هوسة وخبصة
كلشي متفهمين منهم
اي بالله سولفيلي شسوو ومنو اجة بالمهر وشنو لبسو العروسة
وشنطوها حك (مهر)
اني بيا حال وامي تريد الي عندة گلب ويحجي
لزمت راسي : يمة اروح اسبح ومن اخلص
انزل احجيلج شنو صار
كوة فكت مني ياخة رحت صعدت فوك لغرفتي وغلقت الباب ونزعت العباية ووكفت كدام المراية
وباوعت لنفسي
منو انتي هاي الي جاي اشوفها كدامي بالمرايا
وحدة غريبة مو سهى
احجي كولي وين اخذتي سهى شسويتي بيها
جنت دا اعيش بصراع مع نفسي
نزلت دموع الانهيار
شلون هانت علية نفسي ورخصتها بهذا الفعل
وشلون انطيت فرصة لوحدة مثل سناء تعيرني وتهين بية وتذلني
والله استاهل كل الي جرالي والي راح يصير بية
لان حضرتي بلحضة غرور وطيش
قررت
انسى نفسي واخذ بحقي وارجعلي حب ثائر
الي كان بالاصل ملكي

بس لحظة ثائر ما حبني ولا اتعلق بية الا لأج

ل حشمتي واخلاقي
شحصلت من اتهورت اشو ما جنيت غير احساس الالم والضياع
صرت بحرب اعصاب اني والضمير
وشكلة الضمير كعد يضرب على الاوتار الصحيحة
منو كلج يسهوة الي يغامر يعيش متهني لا شكلج فاهمة
الموضوع غلط
عمر الطيش ما ريح صاحبة
بالعكس من كنت محافظة على نفسي كنت
اعيش بسلام صحيح كنت احس بشعور الظلم بس
احساس الظلم اهون علية
بمليون مرة من الي جاي احسة حالياً
ليش خليت الغضب يعميني عن اخلاقي
واصلي واهلي وناسي ليش اتغاضيت واستعجلت
بموقفي شنو وين جان عقلي
بس اااااااخ شيفد الندم بعد وقع الخطأ
دخلت للحمام بروح هايمة
ونزعت ملابسي وحطيتهم بعلاگة سودة
وذبيتة بسلة الزبل
ما اريد اشوفهم بعد
لان راح يبقون يذكروني بالانحطاط الي وصلتله
سبحت وخلصت
وتركت شعري مبلل بدون تمشيط ولبست دشداشة
ورحت للسرير اتمددت وغطيت روحي
كان تصرفي هذا مثل الهرب من المواجهة
القادمة والله يعلم شنو منتظرني من مصيبة
بعدما درت عمتهم سناء بالسالفة
جيب الي يسكتها ويسد حلكها
ماحسيت على روحي من نمت

............
كلشي متوقع بس مال حظي المصخم يجيب عمتي سناء
للبيت هذا الي ما جنت مسوي حسابه
اتصايحت وياها واخذتها بالساني والصوت العالي
لكن اني اعرف كلش زين
استعجلت بتصرفي وية
سهى لكن معذور
ما جنت مصدك روحي من شفتها بغرفتي
وكنت مثل الي كاطع الامل بعد ما اكدر احصلها
من شفتها صارت كل تصرفاتي
ناتجة من تفكيري المحرض ان سهوة راح تضيع من ايدي وراح اخسرها للابد
جنت متصور اذا احفظها الي واحجي وياها
راح اكدر اقنعها توافق بالزواج مني
حتى لو تدخل على مرية ثانية
لكن لحظة تهور مني انغريت ترة يا ناس انا بشر مو ملاك
قررت افتح الموضوع وية جدي باقرب وكت ما عاد بية صبر
لازم استعجل حتى احفظ ماي وجها قبل لاعمتي
سناء تروح تحجي بسيرتها كدام النسوان
ما استبعدها عن عمتي
لان اعرف كلش زين عمتي داهية ومو هينة
وما لزمت بيت شيخ مزاحم ودارت امورة لوما جانت تملك الدهاء والفطنة وهذا الشي الي مخوفني منها
....................

فزيت من نومي مخروعة على دخول نور اختي للغرفة
كعدت من نومة جانت كلها كوابيس
نور وكل اسئلة العالم تدور براسها
: كومي كومي شعندج نايمة
كعدت مرعوبة مثل الحرامي الي يحسب كل صيحة عليه
: شنو شبيج نور اكو واحد يكعد واحد نايم هشكل
شبيج تخبلتي
نور : لا ما اتخبلت انتي الي تخبلتي
اكو وحدة تسوي سوايتج
لزمت كلبي بيدي
عزة معقولة وصللهم الخبر وعرفو بالي صار
دخلت بحالة غباء
: شنو شسويت
: يعني ترحين صالون وتكلبين دقلة بالمكياج والترتيب وتالي تنطين خبر لعذراء وراء ان راسج كام يوجعج ورجعتي لبيت عمو ليش هشكل سويتي مو حرام عليج ضيعتي
على روحج كاركاتير يموت ضحك
لج فاتتج لو تشوفين الي شفتة
العروس والزعاطيط والالوان الخلابة الزاهية الي جانو
كانو لابسين ملابس مثل الكرنفال
عبالك عندهم مسابقة منو الي اكثر واحد يلبس
الوان فاقعة هو الي راح يفوز
نور تحجي واني تنفست الصعداء براحة

جنت كلي ارجف والله اني الجبتها لنفسي
كملت نور كلامها وهي تكوم من عالسرير
وتروح توكف كدام المرايا وتنزع الماشات
وتمسح الميك اب
سمعت صوت الباب انفتح
ودخل حسن ابني
تدرون شنو حسيت من صارت عيني بعين ابني
حسيت اني ام فاشلة وخذلت ابني بهذا موقفي
وكأنه هو ناقص
ثمار عار واني جاي اضيف بالسلة مالتة المزيد
حسن : ماماتي عمو قاسم وخالو امجد يريدوج يكولون صيح لماما
يمة رجف كلبي رجفة مو طبيعية
كان شعوري من الخوف مشابه لشعور بيوم وقعة الغلطة مع فراس بس على الاقل من وقع المحظور كنت مراهقة هسة شنو عذري
ما اكول غير اجني يسهى ثمار تصرفج بساعة الغلط
لكن هذه المرة ثمار فاسدة
كوة اتمالكت نفسي وحجيت
: حسوني ماما معرفت شنو يردون مني
: لا
كان يحجي ويفتح بنقالي وطلع اللعبة مالتة
وكعد يلعب اصلاً بالة مو يمي
نزلت من السرير
ولبست شالي
نور : شنو صاير اليوم اشو الاجواء كلها مشحونة
جنت متوجهة للباب اريد اطلع لكن جمدت بمكاني
: شششنو يا اجواء
: ما اعرف شنو بس امجد واحمد ضايجين. وعمو قاسم
يكللهم نسألها ونشوف هي شتكول
يبوووو عزة بعيني
طلعت من الغرفة وشعور مثل شعور الي رايح لحبل
المشنقة برجليه
اريد اعرف هذني البنات الي
كل يوم عندهن مغامرة شلون يعيشن حياتهن
اشو اني احس بروحي كل ثانية تعدي علية اريد اموووت والله الي دا احس بي شعورمخيف ما اتمناه
حتى لعدوي
اتمنى ترجع بية الساعات
يمكن اهون علية اطش الجكليت بعرس ثائر ولا هذا الكابوس الي دا اعيشة
حسيت بمعدتي ظلت تلويني
من الالم
سمعت اصواتهم ديحجون بالاستقبال
دكيت الباب واتفاجئت بوجود
جدهم والولد ثائر وعدي وامجد واحمد وناصر
جاي يشربون جاي
والله انخطف لوني وصار وجهي مثل الليمونة
يمكن كرهت نفسي وكرهت حتى ثائر بلحضتها
زراني احساس مخيف
عمو قاسم : فوتي بوية محد غريب هذولي كلهم اخوتج
تعاي يابعد عمج عندي سالفة وياج
رحت دخلت ومشيت بخطوات بطي

ئة
وكعدت ببن احمد اخوية وعمو قاسم وصار كدامي جدهم وعدي وثائر وامجد
قاسم : عندي موضوع بعد اذنك عمي الشيخ
اجوني ناس خطابة طلبو من عندي ايد سهى
شفت ثائر عدل كعدتة ورفع راسة
وصارت نظراتة مثل الذيب
يريد يرصد اي حركة تبدر مني حتى يكدر يفتهم
الي ديصير
الجد: منو نعرفهم احنا
قاسم : اي والله هو مو غريب علينا
يصير حما سهى اخو فراس
شفت ثائر كمز من مكانة مثل المصروع
: لا تكول جاسم ماكو غيرة خريج السجون
نهض احمد الي يريد يزوج اختة كالعادة
: مو خريج سجون طلع افراج يعني جان مسجون ظلم
وهو شاب والله شايل حمالتة وانا اشوفة مناسب لاختي
لم ثائر ايدة بقبضة : انت شتعرف عنة اكلك هذا ابن ديرتي وعاجنة وخابزة بيدي
امجد بغيرة اخو: لاصغرن بيك بس انت مالك دخل
رجاءاً الموضوع عائلي واحنا نقرر
نهض عدي الي فار دمة على اخوه وموقفة اليقهر
: لا شلون مالنا دخل ترة عرض عمي قاسم مثل عرضنا
من نعرف ان وحدة من بناتنا راح تتزوج واحد صايع
ضايع فلتان لا النا مليون حق حتى نعترض
احنا نعتبر نسابة وقرايب
وزواج سهى لجاسم تعتبر شينة علينا
لان اذا انزفت راح تطلع من بيت عمها
وهاي بحد ذاتها جبيرة بحقنا وتدينا
التفتت على عدي

وردت ابوسة من راسة على كلامه
لان ما عرفت شتصرف وماكدرت احجي اي شي
بوقتها ضاع الكلام كلة
امجد : اشكر نصيحتكم وحرصكم على اختي وما انسى
حمايتكم لاهلي بس يبقى الموضوع راجع النا ولاختنا واحنا الي نقرر
احمد : شنو ما يحتاج الها تفكير عم الولد يريد ابن اخوه
لان احنا ورانة سفر واحتمال ناخذ سهى ويانة . تسافر التفت على سهى وحجة وياها
كدامج خيارين يأما تتنازلين عن ابنج وتسافرين ويانة
وتنسين عندج ابن او تقبلين بالزواج من جاسم

ظليت اباوع عليهم كلهم بعيوني
ثائر كانت بعيونه نظرة الخوف
باعت لاخواني شفت بعيونهم نظرة امل مثل الي يتمنون اوافق
على جاسم
رجعت بنظري على ثائر وصرت اباوعلة بعتب
جا وين الوعد يفلان اشو مامنك رجى
ثائر مو انت الكلت وداعتج متصيرين لغيري
اشو جني راح انزف كبال عينك وانت ما منك امل
التفتت لعمو قاسم
كان منتظر مني جواب
.......................................

ملكةه · 30/April/2018

ج 2 بارت 12
التفتت على عمو قاسم وخنكتني العبرة
ونزلت راسي وهمست
: الي تشوفة عمو انتو بكيفكم
وشتكولون اني وياكم
بس اهم شي حسن يبقى بحضني
رفعت راسي واخذت نفس عميق بتوسل
: عفية عمو الا ابني اموت من دونه
عفتهم وطلعت مكدرت اكمل
يمكن لو ابقى بعد شوية احتمال ابجي
تركتهم وصارت عذراء بوجهي
: ولج ليش تبجين
اخذتني من ايدي ودخلتني لغرفتها
جنت محتاجة اتكلم
لان احس بروحي راح اطك
احس هم كاعد على گلبي
عذراء: احجيلي شصار ولج ظل بالي عندج
وكمت احوم وما كدرت اوصلج
ولج مو هنا المصيبة
المشكلة خالة سناء ما ادري منين طلعتلنا وكعدت تسال عنج
ومن درت بيج ما اجيتي للمهر
دزت على رواء واستلمتها تحقيق
وراء كتت الاكو والماكو
ولج هاي خالتي بلوة مو هينة
عزة من شفتها لبست عباتها على راسها وطلعت من بيت العروس والمهر بعدة ما خلص
كلت هاي هي رحتي بالرجلين
: سكتي عذراء راح اموت ومحد يعلم بحالي
صرت اسولف لعذراء كل الي صار وياي ببيت جدهم
وبعد فترة
:والله ما اعرف شكول
تدرين المفروض انا همين امنعج عن تنفيذ قرارج
بس بعد اذا فات الفوت ماينفع الصوت
طبعا انا جنت هواي اسمع مقولة بالحب مجانين
بس مجنت افتهم معناها
لكن من شفت حالتج ادركت معناه
وعرفت ان العاشق من يوكع بالخطا
راح يسأل نفسة وين جان عقله
ما يعرف ان كل تصرف بدر منة
كان نابع من الگلب
ومن يصير القرار بيد الگلب
بلحظتها راح يكون العقل غايب وماخذ اجازة
ويصير الگلب هو الامر الناهي
لذلك اليحب يتهم بالجنون فاقد العقل
وما دامج سلمتي امرج بيد گلبج
اذن استعدي للمصايب ولبسي خوذة الحرب
لان المشاكل راح تتوالى عليج من كل صوب

: اي ياعذراء والله كلامج كلة صحيح
ويجي على الجرح
والله شكلي راح ادخل مصح عقلي من ورة حب ثائر
: زين وهذا جاسم منين طلعلنا شنو قررتي
: ما قررت شي هو كلشي بيد عمو قاسم واخواني
القرار الاول والاخير راجعلهم
اني اهم شي عندي حسن ابني يبقى بحضني
ما اكدر اتخيل نفسي
اترك حسن وادور وجهي عنة
واخليه تحت رحمة جاسم صعبة
وابني لاحول ولاقوة ومتأكدة راح يضيعة ويدمر مستقبلة ومو بعيد يصير مثل عمة
راح اتحمل حتى لو اعرف اتجرع المر
اوافق على جاسم
على الاقل ابقى عيني على ابني ولا اخذلة واتركة
بنص الطريق
تدرين حسن هو الامل الوحيد الباقيلي
بالحياة
: لا حبيبة على بختج شنو توافقين على هذا
خايبة انتي ما تعرفين هذا شنو من بشر
انا مجرد هيج
بس اسمع حجي عابر عن سوالفه
من ابوي والولد جسمي يكش من الخوف
مو انتي الفاهية تردين تتزوجيه وتعيشين وياه
جا غير يسود عيشتج
: والله محتارة
اي صدك تعاي اتذكرت ليش من اتصل عليج متردين
: ولج سكتي خايبة ماحجيتلج جا غير
الله سلط علية عدي الفايخ ووكع نقالي بيدة
وشافني كاتبتج بالنقال حبيب الروح
ههههههه والزلمة تسودن
: ياااا واني اكول منو هذا الي رد علية وخرعني
على اساس اني جنت ناقصة خوف وهو كملها.
: شفتي شلون ولد مزاحم شالعين گلوبنا ومبهذلين احوالنا
...................................

شفتها دنكت راسها وطلعت من يمنا
ردت اكوم من مكاني اريد اعترض على كلامهم
ونويت العزم حتى اطلب ايد سهى من اخوانها
بعد ما اكدر اسكت واظل اعاين عليهم يزوجونها
كبال عيني والله اموووت
اجيت افتح حلكي حسيت على ايد لزمت زندي
التفتت شفتة جدي همس لي بصوت ناصي
: اصبر يالوحش وتهدة لا تستعجل خل نسمعهم بالاول
شيحجون
رجعت كعدت بس عبالك كاعد على نار
ظليت اعاين على الحلوك وارقبهم بقلة صبر شراح يقررون
التفت عمها على جدي
قاسم : شيخنا انت شتنصحنا شنردلهم خبر؟؟؟
احمد: ما يحتاج نصيحة طبعاً موافقين
امجد : شنو انت بكيفك قابل هي جيس طحين وتريد بس تخلص منة
الشيخ بتأني وحكمة : شوف يابوي من بعد اذنكم
امجد: تفضل شيخنا نسمعك
:ترة عرضكم هو عرضنا
وسهوة مثل بتنا ما اقبل عليها الشينة
واشوفها تاخذ واحد وطي مثل جاسم
احمد: اي بس منو كال هو مو خوش ولد
اشو ممبين عليه
امجد: اصبر انت ولتحجي خلي الشيخ يكمل كلامه
: عفية عليك وليدي
ابن اصول وتعرف بالاصول
شوفو بوية انا راح انطيكم اياها من الاخير
بدون لف ودوران
ترة جويسم دمة مهدور
واكو جماعة قذرة تشتغل بالوصخ والسم
وساندة ظهرة وبعض العشاير عندهم وياه ثار
والي عرفتة جاي يترصدون له واذا درو بي طالع من السجن اعتبروه انكتل
اما عن سال

فت ابن اختكم
ضرب على ركبتة
اخذوها جلمة (كلمة) مني ابنكم يبقى بخضن امة
وركبتي الكم سداد
وفنة الي يتعداه وانا مسؤل عن كلمتي
امجد: والنعم بيك شيخنا بدون ما توعد افعالكم سابقتكم
وتشهدلكم
: اي يابعد ابوك لا تستعجلون وتظلمون بخت المكرودة وتنطونها لارذل الزلم
امجد بامتنان : اشكرك على نصيحتك شيخنا

همة يحجون وانا ظليت احوم اريد اعرف جدي ليش ما
يخطبها الي ما دام الحديدة حارة واخوتها
موجودين وشكلهم يردون يزوجونها
نهضت من مكاني وردت
احجي وياهم واخطبها من اخوتها انتبهت على جدي عاين علي
: جدي ج.....
سبقني جدي بالكلام ونهض من مكانه
: يالله ياجماعة الخير انا والولد نترخص منكم
خزرني
اشرلنا انا وعدي بالعصا حتى نكوم نروح وياه
ردت انفجر من سوايتة وياي عفتة
وطلعت گبله وتركتهم يسلمون عالولد
انتظرت جدي يم باب الشارع
صرت اروح وارجع مثل بندول الساعة
انتظر جدي يطلع
شفتة طلع ورحت عليه
: جدي ليش ما خليتني اخطبها من اخوانها

الجد بحكمة : ولك يثاير شمالك تصخمت اشو جنك نسيت حتى الاصول
جا هي عدالك سهلة
من تنتفض جدام اخوانها وتريد تخطبها وية ما سمعت خطبها غيرك
بساعتها اخوتها راح يعرفون انت حاط عينك على اختهم وتعشكها
مو بعيد عليهم يشكون بيك انت وياها بينكم شي
وتتواصلون من وراهم
: ماضن لهلدرجة توصل بيهم يشكون بأختهم
:ما يحتاجلها شك من فزعتك واعتراضك
واضحة ومبينة ذيج هي انتو بينكم علاقة
واذا حجيت هسة وفتحت موضوع الزواج من اختهم
راح تعم عالفرخة
والمگرودة ما ناقصة مصايب وانت تجي تفتح عليها باب
اصبر يا بعد جدك كلشي بوكتة حلو
ولا تنسى انت توك عاقد على مرة شلون تريدهم ينطونك اختهم بالله كلي بيا قانون هاذ
جنك يابعد جدك ما عندك عرفة شلون تتصرف
من يوصل الموضوع لسهوة گلبك
تصبح رجيج وارعن وتتصرف كلة بگلبك
اخذها مني نصيحة خلك لازم العصا من النص
ولا تكون يابس وتنكسر ولا تلين وتنعصر
خلك وحش بكلشي مو بس وحش
بميدان الزلم يشهدلك
بس اياني وياك تخلي الگلب يتحكم بيك
تراه يذل اكبر الرجال ويخربط احواله
تحبها على عيني وراسي
بس كون تتريث وتتصرف بعقل وتحسبها صح
واذا جنت هيج شاريها اصبر يابعد جدك
ما يصير بخاطرك الاطيب
: اي شصبر بعد مو ماظل عقل بالراس
مو خاف تالي تروح من ايدي
اليوم جاسم والباجر الله العالم منو
: ولك خايب ثاير عاباك الله جا ويامن
جنت احجي صارلي ساعة
والله شكلك تسودنت وما تصيرلك جارة (حل)
والله يستر منك
يالله امشينا خل نولي لبيتنا
حتى اوصيك على جم شغلة تجيبها وياك من تروح
لبغداد
...................
جنت كاعدة ادرس بحسن ابني الي كملت اوراق النقل
وصار يداوم بمدرسة قريبة علينا
بس شفت هواي فايتة دروس وصرت كل يوم ادرسة حتى الحك امشي وية منهجهم
وهو كلساعة يتضجور
و كل يوم واحد من اخوتي لو ناصر يوصلون
حسن للمدرسة بيدهم ويرجعونة بيدهم
لان يشوفوني شلون اظل الوب وافرك بيدي من الخوف
من يطلع للمدرسة لحد ما يرجعلي
جنت كلش خايفة من ردة فعل جاسم بعدما
رجعولة الجواب بالرفض
بس ماكو اشو صارت سكتة هدوء
ما بدر منة اي شي
بس من خلال كلامهم هو مو هين
واتوقع ما راح يعدي الموضوع سلامات
لذلك كان خوفي اكثر شي على حسن ابني
ومن عندها خطية الولد اتكفلو بتوصيل حسن للمدرسة
واخوتي ما بقة على سفرهم شي
وجاي يحضرون بنفسهم البارحة سمعتهم يحجون وية امي كملو معاملة احمد وراح يسافر للخارج
اماااا عن هوى الروح ثائر.
ما شفتة بعد من يوم الي خطبني بي جاسم
جنت هواي شايلة عليه بگلبي
وجنت اتسائل هل يا ترى ثائر كان صادق الوعد وياي من وعدني بالزواج لو كذب بوعده اخاف صدر منة بلحظة ضعف
ولحتى يقتربلي صار ينطيني وعود
كنت كل يوم قبل لا انام على نفس المنوال اظل بس
اتسائل
رغم الي صار بية بس بعدة كلبي يحن عليه
ويظل يبحث عن اخباره
سمعت بي نقل بنتة سرى بالصدفة من طلبت من امجد وعمو قاسم ينقلون مدرسة حسن
سمعت عمو قاسم اتصل على ثائر واستفسر منة على
النقل وثائر كلة خليها علية انا انقلة وية سرى سوية وظل امجد وعمو يتشكرون منة
جنت مرات اشوف سرى تجي وية عمتها رواء
لبيت عمو قاسم
ما اعرف ليش من احضنها وابوسها
احس گلبي يصيبه نبض خافق
مرات تحجي بالصدفة عن ابوها
مثل الفرحانة بي
تكول ماجنت متوقعة ان بابا يكون هيج متفهم
واحس بروحي هنا حياتي احلى من بيت جدو اهل ماما
لان هنا بابا كلشي وفرلي
صحيح ميقبل يخليني اطلع هنا
عكس ماما جانت عادي تخليني اطلع لبيت صديقتي
لو سفرة مدرسية
بس رغم ذلك مجانت تهتم. بية
كانت هواي تخوفني من بابا وتحجي عليه وعلى اهلة
لدرجة صرت اتخيلهم مثل هذولي بغابات الامازون
من اشوف الافلام
ضحكت على عقلها شلون تحلل
: يا رب يحفظة الج
شوفي حٍٍِْــًبٌٍـــِٓېٍٓ اذا تحتاجين مساعدة بالدروس
كولي واني اساعدج
: اشكرج ست
عذارء: عمي ياست كولي عمة مثل ما تصيحيلي
رواء: سرواي حٍٍِْــًبٌٍـــِٓېٍٓ روحي لعبي وية البنات سلمى ورشا
كامت

وطلعت عرفت ورة تصريف رواء لسرى
اكو موضوع
: شوفي عذراء قبل شوية اجاني عدي وكلي هسة تجيبين عذراء وتجين ضروري
: لا والله خاف يزعل
خب دتطيري انتي واخوج شنو اشتغل عند الخلفوكم
شوكت ما يعجبة يدز علية وين كاعدين
: لج شبيج ثولة اني شلي غرض كمتي علية واكلتيني بكشوري
هو كلي اذا تريد نقالها تجي هي تاخذة
: خلي نقالي عندة ما اريدة اصلا راح اشتري نقال ثاني
على عنادة
سمعنا صوت نقال رواء رن
وردت عليه وراهة مدت ايدها بالنقال وانطتة لعذراء
عذراء وهي تاخذة منها بتسائل
: رواء منو هذا
: احجي وشوفي
: الو
عدي يتوعد بصوت عالي
: شوفي يعذراء قسماً بذات الله اذا هسة ما اجيتي لبيتنا وحق الحق الا اجي هنا لبيتكم واسويلج مصيبة
بارتباك من صوتة العالي بس اتصنعت القوة
: لتاخذني بصوتك العالي كلي على شنو اجي لبيت جدي صاير شي
: اكلج ما راح اعيد كلامي هي كلمة وحدة هسة تجين
وسد الخط بوجها وظلت لازمة النقال وتباوع عليه باستغراب
: هذا شبي اخوج شكلة شارب شي
بالله شو كومي تعاي وياي اريد اشوف هذا المسودن شيريد
سهى بخوف : لا لتروحين خاف يسويلج شي
لو يأذيج
: لا والله حٍٍِْــًبٌٍـــِٓېٍٓ انا ماعندي شي اخاف منة
حرامي لا تصير من حاكم لتخاف
راح اروح اريد اشوف شبي جنة مسعور مو خوفن منة لا بس مالي خلك مشاكل وادري بي مخبل ويسويها ويجي على بيت اهلي
كامت ولبست عبايتها
واخذت رواء وراحت
........................
عدي وهو يروح ويرجع النار كايدة بگلبه من الي عرفة توة
اتصلت على رواء وحجيت وية هاي ام راس اليابس
اليوم الا اكسر راسها
شفتها ورة عشر دقايق اجت لبيتنا هي وراء
اشرتلهم بعيوني جدام جدتي وعمتي سناء
يفوتون جوة على غرفة رواء
كعدن شوية سلمن على جدتي وسناء وظلو شوية
يسولفن ورة شوية انسحبن وحدة ورة الثانية
بدون متحس عليهم عمتي سناء وراحو دخلو بالغرفة
انا كمت ورحت وراهن وفتحت الباب
ودخلت
: رواء طلعي برة عندي كلام اريد احجيه وية عذراء
اجت رواء تطلع لزمتها عذراء من ايدها
: ما تطلعين منا اذا عند كلام وياي خلي يحجي وانتي
هنا سامعة ما كو اطلع وياج اذا طلعتي
شفتة ظل يلعن ويسب ويغلط من الغضب
اتجه علية وطلع نقالي من جيبة
: عذراء جاوبيني منو حبيب الروح
ما حبيت اريحة وردت العب باعصابة
: وانت شكو تسأل منو انطاك الحق
:شوفي تاكلين تبن وتجاوبين بدون لف ودوران
لا اجي اكسر النقال فوك راسج
عذراء بتمرد: صديقتي يالله هسة ارتاحيت
ما حسيت الا على راشدي طبع على خدها
لزمت خدها متفاجئة من رده وباوعتلة
: منو انت حتى تمد ايدك علي انا ابوي ما يضربني
: اضربج واكسر راسج بعد
: لهنا وحدك الظاهر انا انطيتك اكثر من حجمك
لزمها من ايدها ولواها خلف ظهرها
رواء :عفية عدي اتهدة واكسر الشر
البنية كالت صديقتها معناها صديقتها

: انتي تسكتين وتنجبين
ادري بيج تعرفين عنها كلشي وتتسترين
عذراء تتلاوة وية عدي: عوف ايدي لا والله الم عليك البيت واشتكيك لجدي
: يالله صيحي حتى اكلة منو حبيب الروح
: بالله شلون عرفت منو حبيب الروح
: احمد ابن عمج
: جمدت بمكاني
: اترك ايدي وكلي شنو تقصد باحمد ابن عمي
دفعني عنة واجيت اوكع بالكاع
وباوعلي بقهر
: ماكو شي يخفى عني اكدر اعرف صاحب الرقم واعرف اطلعة لو جان بسابع ارض
وتبين صاحب الرقم احمد ابن عمج يا العار
هيج ما كدرتي تنتظري يخطبج كبل سويتي وياه
علاقة الله ياخذج
والله وكعتي من عيني
بعد ما جنتي نجمة بسماي
بس من عرفت
بيج رخيصة طابت النفس منج
: شوف يعدي ما مجبورة ابررلك موقفي
بس يكون بعلومك صحيح الرقم باسم احمد ابن عمي
لكن هو راجع لبنت عمي سهى

: ليش ما حجيتي من اول لو من شفتي نفسج اتحاصرتي
بحثتي عن عذروذبيتي براس
بنت عمج حتى تبرئين نفسج
مدت ايدها بغضب وخمطت منة النقال
وداست اتصال على الرقم وفتحت السماعة الخارجية
ورة لحظات اجاها رد بصوت سهى
: الو هلو عذور هَـا بشري رجعلج النقال
: اي حٍٍِْــًبٌٍـــِٓېٍٓ رجعلي النقال اني هسة راح انهي الاتصال واجي
نهت الاتصال وباوعت على عدي
الي ظل يباوع عليها باستغراب
: انت لو بس مكلف نفسك ومكلب النقال ورايح على البرامج راح تشوف الرسايل
: رحت وما لكيت بينج وبين الرقم غير اغاني.
ومقاطع مضحكة وكم صور صباح الخير
مكدرت اخمن منو المرسل
: مشكلتك هاي مو مشكلتي
بعد ميهمني بشنو تفكر بتجاهي
انت بعدك مغرور ومتهور وهذا الشي جاي المسة بيك يوم عن يوم وراح يجي اليوم تخسرني بي للابد
يالله رواء اني رايحة
طلعت من غرفة رواء وسمعت صوت تكسير شي زجاجي بالغرفة وعيطة رواء
وكفت بمكاني وحسيت بكلبي خفق خفت لا يأذي نفسة
وردت ارجع اشوف شصار
بس عاندت الروح ودست على كلبي
وكملت طريقي
اجتني خالتي سناء تركض
: شنو يا ستار شصار
: والله ما اعرف خالة روحي انتي شوفي بنفسج
تركتهم ورحت لبيتنا واني كلبي نار من الم وصد الحبيب كبريائي انجرح وهو كلبة انفضح بس عيبة ميعرف يتصرف بس احسن خلي هيج
.........

..............................

: كللللوووووووووشششش صلوات على النبي
يايمة توة نور البيت الف الحمدلله على سلامتك
تعال يايمة خل اشمك
جنت اقلي بيذنجان
وعذراء تصفط بالخبز جانت ستوها خابزة
وسمعنا صوت الهلاهل مال عمتي
ركضنا وشفت عمو قاسم والبنات ملتمين
ودخل ناصر وجان حامل جنطة سفرجبيرة ودخلها للبيت انتبهت على عمة منتهى
تحضن وتبوس بشاب وسمعت عذراء صرخت بفرحة
: حااااااارث
وركضت عليه وحضنتة
عذراء وهي تمسح دموع الفرح
: يمة راح تخلصي من البوس بقلينا شوية
حارث بضحكة : سافرت ورجعت والسانج مثل ماهو
بعدة على حطتة ما اتغير
كلت راح ارجع والكاج كبرتي بس الظاهر بس الغلاف
متغير
: هههههه وانت بعدك حاط عقلك وية عقلي
وصار يتبادل السلام والاحضان مع خواته
وعذراء كل ساعة تذبلة حجاية وتخلي يضحك
منتهى : يالله ما اوصيج اتعاركي وية اخوج وهو توة راد من السفر

اني ابد ما حاجية وية حارث ابن عمي وشايفتة بس بالصور لكن الصور هواي ظالمتة الله يستر عليه جان
حلو ومن اتكلم بعد صار احلى
منتهى: تعاي يمة سهوة سلمي على ابن عمج
حارث بمفاجئة : سهى بنت عمي ؟؟
هههه ما اصدك هاي شنو كبرانة اتذكر عليج انتي وريم من جنتو صغار
سهى : الحمد لله على سلامتك
ناصر وهو يحط ايدة على اكتاف اخوه
: تعال سلم على مرت اخوك وبنت عمك
وصاح لنور : تعاي شبيج واكفة ليغاد
نور بخجل: الحمد لله على سلامتك حارث
حارث : الله يسلمج خوية والف مبروك ويوم ان شاء الله ازفكم بالعرس بسيارتي
وظل الكل بحالة فرحة
وبيومها عمو قاسم
ذبح ذبيحة على سلامة ابنة
وعزم القرايب كلهم ودز على الشيخ مزاحم والولد
وانخبص البيت خبص من الناس
وكل واحد يجي جايب وياه سيت بيبيسي لو
علب ما كنتوش جكليت وعذراء ظلت تصنف
عليهم
: راح افتح بسطية بالسوك وابيعهم واخذ فلوسهم
شفتي ويكلج الاخو شنو فائدتة
يابة هناك مصالح متبادلة
...........................

((مساااافر يعود الى احضان اهله والوطن
ومساااافر يترك احضان اهله ويهاجر الوطن
نعم انه قانون الحياة ))

ام سهى تودع بأولادها وتمسح بدموعها
: في امان الله ييمة توصلون بالسلامة
اباوع على احمد اخوي باسها من راسها وايدها لان
راح يسافر للخارج لعند قتيبة انتبهت على احمد
واقترب مني وباسني من راسي
: جنت اتمنى اشوفج عروس قبل لا اسافر
وازفج ببيدي لزوجج بس شكلي ما مقسوم لي
افرح بيج مو تزعلين مني
من تشوفيني اثور وانقهر عليج واريد ازوجج
ترة اي اخو حريص على اختة يهمة يشوف اختة
متزوجة ومستورة ببيت رجلها
مسحت دمعتي : لتشيل همي روح انت اتوكل
وان شاء الله توصل بالسلامة وطمنا عنك من توصل
: خاف تحتاجين شي او فلوس انتي والا امي لو نور اتصلو علينا
ترة اكو هناك مكاتب تحويل صيرفة
واحنا نشوف شلون نرتبها
ما اوصيج بأمي وبنور يابعد اخوج
قاسم : شكلك صرت تحجي مثلنا
امجد: بعد من عاشر قوماً
: يالله احنا نتوكل مع السلامة
ركبو سيارتهم وامي شمرت وراهم طاسة الماي
وكعدت تمسح بدموعها بطرف شالها
خطية امي صعبة عليها تشوف عائلتها تتفكك واحد واحد بعد ما جانو كلهم كبال عينها وتحت ظلها ويجمعهم بيت واحد
بقيت اني وامي معاملتنا مالت السفر ما انتهت
جان وقت صبح وستوها طالعة الشمس الجو جان بي خيط برودة ووالزلم تبدي بهيج وكت
يستعدون يطلعون من الغبشة على باب الله
ويتوجهون لشغلهم ورزقهم
كنا واكفين يم البوابة الرئيسية سبقنا عمو قاسم وناصر ورجعو للبيت وظلينا اني وامي
نتمشى على كيف ونشم الهوى بمزرعتهم جانت
ريحة الهوى ممزوجة بريحة التراب الرطب
بالماي صرت انصت لصوت العصافير
مع صوت خرير الماي الي يجري بالساكية
(مجرة مائي)
شكلو ثنينهم باصواتهم لحن حلو على الاذن له
الاثر الطيب على النفس
جان الجدول يجري بين البساتين اخذت نفس عميق وطرحته
ام سهى : لتجرين حسرة ترة الله فكج من هذا الي اسمة جاسم اني كل مرة من اسمع بطاري خطابة افرح واكيف
الا من سمعت بجاسم يريد يخطبج
انقبض كلبي وابد ما فرحت بي
الف الحمدلله من رفضة عمج
: بس تدرين يوم اني لحد هسة خايفة منة
سمعنا صوت سيارة عدت من يمنا رفعت راسي
واجتي عيني بعين ثائر من يوم الي صار واني بعد ما شفتة كنت حيل شايلة بگلبي عليه
بعدت نظري عنة وسويت روحي منتبهت عليه
بس شكلة هو ما عجبة الوضع انتبهت
عليه ركن السيارة ونزل منها وسلم على امي
وامي ما قصرت بالسلام
: شنو الشباب سافرو؟؟
: اي والله سافرو بعد شنسوي هذا امر الله
: والنعم بالله يالله يوصلون بالسلامة
امانة حجية اذا تحتاجون شي كولو ترة انا بالخدمة
: اريدك سالم وليدي ربي يحفظك لشبابك متقصر
ظل واكف ورفع ايدة ورجع شعره للخلف برتباك
: شفتكم وحبيت اسلم عليكم واسمع اخباركم

جان يحجي وعينة على سهى وجان الكلام موجه الها
بس هي ما انطتة نشدة وخلتة
معلك يريد بس يسمع صوتها
يريد بس فرصة يحجي وياها ويفهمها
موقفة استسلم بعد ما ايس جر حسرة
: يالله انا اترخص منكم مع السلامة
: الله وياك

يوم
صعد بسيارتة وراح
كملنا مشي وقريب ما نوصل لباب بيت عمو
سمعت صوت عالي سيارة لزمت بريك قوي
يم البوابة الرئيسية
التفتنا اني امي اجيت اوكع من طولي من شفت
سيارة جاسم واكفة كبال سيارة ثائر
انتبهت على جاسم طفى السيارة ونزل منها بسرعة
واتوجه علينا اني وامي والنية باينة على وجهة
ما اهتم لوجود ثائر
سمعت صوت ناصر وعمي من وراي شكلهم سمعو صوت السيارة
وكف جاسم قريب علية
: هَـا يسهوة هم الج عين وترفضين شنهو مو بعينج انا
رجال شكدني وشكبرني ترفضيني
ولج انا من تالي عمري انهان وانرفض
من خلك مرية لا راحت ولا اجت
سهى بخوف : اة اة
رفع ايدة باشارة وسكتني
: لا تظلين تمتمتين انا ما جاي علمودج ماكاتل روحي عليج
اجيت حتى اخذ ابن اخوي
يعيش عندي واليوم ما اطلع منا والا وابن اخوي وياي
لو اعرف اليوم تصير دموم
سمعت صوت باب سيارة انسد حيل قوي وصوت خطوات سريعة رفعت راسي واشوف ثائر
لزم جاسم من كتفة ودارة عليه
: ولك انت موش رجال وجاي تفرض رجولتك على مرة
خايب تعال احجي وياي يا اشباه الزم
التفت جاسم ونتر ايد ثائر بقوة عن كتفة ودفعة: وانت ياهو مالتك وجاي حاشر روحك
: سهوة عرضي وراجعتلي الي يمسها يمسني
: لاتكون انت زوجها وانا ما ادري
: اي راح تصير حرمتي واكسر راسك لو جبت طاريها على السانك
انتبهت على ناصر صار نار كبرة
من سمع كلامهم
طفر هد على جاسم وخمطة من ايد ثائر
ومددة بالكاع وصارو اثنينهم يتعاركم
احس گلبي كام يوجعني وصرت كلني ارجف اتخبل من عركة الزلم والصياح اموت بدمي
شفت جاسم اعتلى ناصر وراد يضربة
بس ثائر لحكة ودفعة عنه ووطرحة بالكاع
اجة عمي والحارس زيدون
وكامو يفكونهم وبعدوهم عن بعض بالكوة

جاسم بحقد : اي هنا الحجي اكول ليش ما وافقت
طلعت مستكعدها يمك ومتونس بيها
يمة شفت ثائر سحب مسدس من حزامه
ونار بعيونة
اني غمضت عيوني وحطيت ايدية على اذاناتي
سمعت صوت طلقة بالهوى
وما حسيت من بعدها على اي شي
غير لوني انخطف ونفسي ثگل ووكعت من طولي
بعدها ما دريت شنو شصار

ملكةه · 30/April/2018

ج 2 بارت 13
بديت افتح عيوني شوية شوية
وشميت ريحة عطر قوي قريب من خشمي
عقدت حواجبي من اثر الريحة ركزت شفت عذراء
لازمة بيدها عطر وترش بيدها وتقربة علي
دفعت ايدها بضعف واني اون من راسي
ما اعرف ليش
سمعت صوت امي اقتربت مني وحطت ايدها على راسي
: هَـا يوم سهاوي صحيتي والله وكعتي گلبي عليج

من سمعت كلام امي اتذكرت الموقف المرعب الي صار كدامي
وفزعت من مكاني بخوف وضعف
: لج يوم كليلي منو الي تصوب
عذراء بحزن: ثائر صوب جاسم بكتفة
ضربت على صدري بخوف
: عزة العزاني هاي وين جانتلي
وهسة ثائر شلونة
: موجود بالمركز لان عشيرة جاسم هدت علينا
بالسلاح
وعشيرتنا اتحزمت وجدي امر يطوقون السلف
ودز على باقي العشيرة الي عايشين بالمحافظات
راح يجيبون زلمهم ويجون
حتى الشرطة اتدخلت
والضابط كال لازم يروح ثائر وياهم للمركز
حتى ياخذون اقوالة لان تعتبر السالفة
قضية دفاع عن النفس لان جاسم المتعني لبيتنا مو احنا
صرت اضرب على وجهي
: يبووو على حظي يبوووو
حتى الولد اتورط وياي
: لا تخافين ثائر راح وياهم اجراء روتيني
مراح يوقفونة بالسجن
ام سهى : هاج اخذي كلاص اللبن شربي بلكي
يتوازن الضغط مالتج
حترث قاس الضغط طلع مصفر
التفتت بخوف
: ماما ابني حسن وين عفية جيبي يمي
: شبيج يوم استهدي بالرحمن الولد مابي شي ديلعب وية البنات لتخافين ونور درستة كل الدروس
: لا لا بعد ماكو مدرسة ما اترك ابني يعتب خطوة وحدة بباب البيت
صرت التلفت مثل المخبلة
جابولي حسن كمزت من مكاني اخذتة لحظني
وصرت ابوس بي واحضنة بخوف
: ربي لا تفجعني بابني والله اموت اذا صار عليه شي
اخذتة امي من عندي بالكوة
: هاي شبيج ماما سهى راح تخوفين الولد بهاي تصرفاتج ميصير هيج ادري انتي خايفة عليه
بس المسكين شنو ذنبة
وهوطفل تعيشينة بخوف
عذراء: صيحيح كلام عمتي كولي يالله وكومي
اكليلج لكمة ترة صار العصر وانتي على لحم بطنج

اجيت اكوم ورجعت وكعت مكدرت
لان رجلية من الهبطة مابيهم قوة تعيني حتى امشي
مثل المگرمة امي شافتني
وهي ظلت تلطم وتصيح
: يمة بنتي انشلت
اجو اولاد عمي وعمي دخلو على عياط امي
: شكو ياستار
: بنتي متكدر تكوم
اتقدم حارث بما انه دكتور مد ايدة الية
: بالله شو انطيني ايدج لزمها
وكلي كومي كمت ورجعت كعدت على السرير بضعف
دار على امي
: لتخافين مبيها شي هاي ردة فعل طبيعية من اثر الصدمة هسة بس تستريح وتبدي تستوعب وضعها راح
ترجع ترة الشغلة متستغرف عدة دقايق
التفت علية وضحك : يالله كومي كافي بلا دلع
امج اليوم اكلت خوش هبطة من وراج
: ان شاء الله اكوم اشرت لعذراء تجي حتى تكومني
وابتعد عني
واجتي سندتني من ايدي ومشيت للحمام على كيف بخطوات ضعيفة
..................

مرت يومين على الحادثة
بس مو يومين احس بيهم سنتين على كد ما اتلوعت
بيهم واني اترقب شراح يصير
وصارت الكعدة بديوان الشيخ راجح
بين عشرة الشيخ مزاحم وعشير جاسم
وقرايب عمة منتهى واهلها ترسو البيت ترس
كل ساعة وحدة جاية من النسوان
يستفسرون عن الصار بحكم ان العركة اساسها ابني
وعم ابني متجاوز على رجال منهم
ومنو تجي تكعد تسأل شجاب ثائر على سهى شدخلة
وكل ساعة عمة منتهى تكعد تشرحلهم
عن الصار وتكول
: هوبالصدفة جان مار من يمهم وشاف العركة و
وفزع لناصر
وظلت منو يجي خطية هيج تحجي
والا من اجت جدت ثائر حتى تتحمدلي السلامة
وجابت وياها سناء
من ساعة السودة الي عرفت بيها سناء
من سمعت كلام عمة منتهى
هزت بيدها
: اشبيج منتهى ترة احنا مو ناس غربة حتى تجذبين علينا
جا انتي جذبتي الجذبة وصدكتيها
خايبة موش ثاير اتعارك وية جاسم من وراها
وخلت الزلم تتكاتل علمودها ام الرياجيل

حمدت الله الف مرة امي مكانت
موجودة وتسمع كلام عمتهم
اني مكدرت اسكت
: خالة كلامج ابد مو مقبول
ترة ثائر فزعلي لان هو يعرف بجاسم موخوش رجال
وصخ وكلشي يطلع منة
مو علمودي
بس هو شهامتة فرضت عليه ان يسوي هيج
وثائر سواء اني او وحدة غيري هم راح يفزعلها
اذا يشوفها تحتاج الفزعة

الجدة: لا عاب حلكج حبيبة مالج غرض بيها
هاي شتعرف
بشرينا انتي شلون صرتي
ظل بالي يمج من سمعت بيج وكعتي بالفراش
كلت بس لا تگرمت الفرخة
سناء: شبيج يمة هاي عيارة نسوان
شدعوة عليج حبيبة ندري بيج ترفة وما تتحملين
هبطات

: خايبة انتي ياهو مالتج
تسكتين دهر وتنطقين كفر
حقج يسنوة منين تعرفين حركة گلب الوالدة على ابنها
هوالجرح ما يوجع الا صاحبة
جا هي عدالج هينة
: بيبي شلون صار ابو سرى ظل بالي عندة
والله ما انسى معروفة
اباوع لسناء شلون لمت حلكها وصارت تحرك
شفايفها للجانبين
كانت حركتها استفزازية عرفت بيها تستهزء
: يا يمة بخير وعافية هو الي جابنة الكم ويسلم عليكم
ويكول امانة اذا محتاجين شي انا حاضر
: والنعم منة ما يقصر
.............
واستمرت الطلا

بة ٣ ايام وفضت
وعشيرت الشيخ مزاحم هم الي يحكون عشيرة جاسم
لان جاسم يعتبر هاد ومتجاوز على عرضهم
ومن خلصت الكعدة
وظل جاسم يكمز وودة تهديد بيد جماعة لجدي
يكول بسيطة بس خل يصبرلي انا الة
والشيخ مزاحم ودة جماعة هددت عشيرة جاسم وكللهم
شوفو قسماً بذات الله اذا ابنا طاحت عليه حجارة
ابتلي بيكم وتصيرون انتو حصتي
فتلزمون ابنكم وتعقلونةلا والله
هالمرة عدت سلامات المرة الجاية ما نضمن ابنا احتمال يموتة
جان موقف عشيرة جاسم ضعيف لان
هواي عشاير عندهم طلابة وية جاسم
وهسة جاسم بالمستشفى والله يفكني منة
ويخلصني من ظلمة
عدة شهر على السالفة
وبديت شوية شوية ارجع لوضعي الطبيعي
وكلمن رجع لبيتة
وعمو قاسم كال

: لازم حسن يرجع يداوم شنو قابل
ننهي مستقبل الولد والله علمود عندة عم مجرم
: اي بس عمو اخاف يغدرنا ويخطف حسن
ناصر :شنو السالفة لا تظلميها ترة الشغلة ما ينرادلها
شي
لاتخليني اخذ سلاحي واهد عليه احط بي جيلتين (طلقتين)براسة وافكج منة
: لا لا عفية لاتوصل بيك تقتل من وراي والله اموت
نفسي عفية ما بية حيل مشاكل
: لعد خلي الولد يرجع يداوم بمدرستة
: اي يابعد عمج ترة المدرسة قريبة
هَـا اي اتذكرت انتي مو ذاك اليوم كلتي اريد
اقدم خدمة تدرسين بيها البنات المحتاجات مساعدة
: اي نعم واني بعدني عند وعدي
: شوفي بوية مدير مدرسة حسن ابنج محتاج معلمة
مؤقتا تدرس قراءة لصف الاول
لان معلمتهم جابت واخذت اجازة امومة
فهو قدم طلب للتربية بس منا على ما يدزولة معلمة
جديدة يكون فات على الطلاب هواي دروس
هَـا شكلتي بوية
وفد نوب منها عينج على ابنج حسن
ومنها تدرسين وتقدمين خدمة
والمدرسة كلش قريبة علينا

: والله عمو فكرتك حلوة
هذا هو لعد من باجر ابدي
اداوم ماعندي شي
حارث : وانا وعد مني الج اوصلكم مشي للمدرسة وارجعكم حتى لتخافين

من اشوف عمو قاسم واولاده
وتعاملهم ويانة احس الدنيا بعدها بخير
ما يوم حسسونا ان احنا ضيف ثقيل ولا يوم سمعتهم يتشكون من مسؤليتنا
ما اعرف شلون اجازيهم على وكفتهم
راح تكولون عمج وما غصبن عليه
يداريج لان انتي لحمهم
لكن بهذا الزمن صار نادر ما تشوف الاخو يدير باله على اخو او يسأل عليه
دخلت امي علينا
اباوع عليها صحتها بدت تضعف
لان ضربتين عالراس توجع
مو شوية عليها منا فراق اخواني ومنا الهبطة الي اكلتها من ورة جاسم
بس حارث الله يرضى عليه ما تركها ظل
يراقب وضعها ودائما يفحصها
ويجيك ضغطها هم يشوف ضغطي
عذراء: ادري شنو ما مصدك
انت دكتور وكل ساعة مطلع جهاز الضغط والسكر وكاعد تطلع خبرتك براسنا
حارث: لا ولج مو هنا السالفة
تعاي شوفي بيبيتج شسوت البارحة
تكلي جدة كراعيني يوجعني ما تبدلهم الي
وتخليني امشي مثل الغزال
كلتلها جدة ترة انا دكتور اطفال
مو مصباح علاء الدين وجاي تتمنين
: خايب شني جا انت موش دكتور
: اي بس خاص للاطفال بس ولا يهمج
اخذج تراجعين
دكتور مختص بالعظام هذا مو اختصاصي
: خايب انت شتخرط علي كلشي ما افتهمت
وفريت راسي الله يلعن بليسك
جنت موجوعة من رجلية وهسة زيدت الوجع
وخويت راسي
: الظاهر الحجية فاهمة السالفة غلط
..............................
طبعاً حارث كلش سبورت وسهل المعشر
ودائما يتشاقة ويانا اني والبنات
وابد ما حسسنا بتقيد وصار ويانة مثل الاخو هو اصغر مني بسنتين
يرجع اختلاف طبعة عن ناصر
اعتقد لان كان يدرس بالخارج
فتعود على التعامل مع زملاء وزميلات
مو مثل صر الي دائماً يتجنب يكعد ويانا
وجاةن دائما يكول خليهن ياخذن راحتهن

طبعاً من خلال
كعداتنا سوية عرفت عنة هواي شغلات
وصارت يوم عن يوم صداقتنا تكبر
وشكلنا اني وياه وعذراء ثلاثي تحفة
بالبيت يسمونة الثلاثي المرح بس نصنف
واعترفلنا اني وعذراء
عن قصة حبة وية اخت صديقة الي جان مسافر وياه للخارج يصير بيتهم بالكوت
وكال بس افرغ واكمل اوراقي واتعين
اروح اخطبها من اهلها
والله فرحتلة لان هو يستاهل وردة مال الله

كلش اتونس من اشوفة يداهر بعذراء ويشاقيها وتالي تنتهي بعركة مثل الديج والدجاجة
بس بعدين يضل يراضيها
بتقديم خدمات مجانية
مثلا مرات يشيل غطة التنور لعذراء
من تريد تخبز يبقى
واكف يمها ويسولف وياها ولازم الغطة
ما عندة شي اسمة عيب وما يصير الرجال يسوي شغل المرة لا بالعكس يحب يساعد خواتة بهواي اشياء
........
عذراء: اي صدك سهى سمعت
راح تدرسين بمدرسة حسن خدمة مجانية بدون راتب
انتي ليش ما تنقلين مدرستج هنا
: اقترحت هذا الاقتراح على امجد كلي متسوى انتي بس تكمل اوراقج مالت السفر كبل تسافرين
بعد على شنو منتقلة
لذلك اقترحت على عمو يشوفلي بنات اذا يحتاجن مساعدة بالتدريس اني مستعدة
على الاقل خلي افيد غيري

دخل علينا حارث
وبيدة جهاز فحص الضغط والسكر ومشى للاستقبال وصاحني
: سهى جيبي امج خلي اجيك ضغطها
ووياج بطريقج استكان جاي
: من عيني هسة اسويلك جاي
رحت اخذت امي وودخلتها بالاستقبال
جان مشغل الTV
وكاعد يتابع اللعبة (

كرة قدم)
وحيل مركز دخلنا عليه وعدل
كعدتة وبعد عينة عن الشاشة التفتت
شفت لعبة بين الاندية الاسبانية
ريال وبرشلونة
واتذكرت اخواني شلون يصيرون من الروس
لان واحد ريالي والثاني برشلوني
والتنافس بينهم قائم
ما اعرف ليش حنيت لذيج ايامنا
وجمعت اهلي
كعد يجيك ضغط امي وعين عالجهاز وعين عالشاشة
دخل ناصر : هَـا بشر شكد النتيجة
: خاب تعال شوف شسوو بعد
يا نتيجة جا غير على حظي المصخم كسروالمهاجم
: اي حل يا رب اشوف الفريق كلة مكسر ونضحك عليكم

ردت اطلع اصب جاي وسالت ناصر
: تريد اصبلك جاي
: اي والله ياريت بين ما اروح ابدل
وياج سوي قوري جبير مال نومي لان الولد
راح يجون يشوفون اللعبة عدنا
: صار ٺــڊٍلََُلََُؖ
دخلت للمطبخ وشفت رواء
وسرى والبنات كلهن كاعدات بالمطبخ
وما اسمع بس اصوات لان كلها
تحجي سوية بوقت واحد ماعرف شلون يفتهمن على بعض
بس شكلهن متونسات عالوضع
اقتربت مني عذراء وهمست بصوت ناصي
: لج سكتي جا غير حبيب الكلب ثاير
يكلج من سمع بيج اتكرمتي
شهكت : عزة بعينج فال الله ولا فالج
لج هي كم ساعة مكدرت امشي سويتيني مكرمة الله ياخذج
: ايه خليني اكمل يكلج ظال الزلمة يحوم يم باب بيتنا
وشوكت ما تجين تسمعين ثاير بالباب
ولج موتتنا ضحك رواء من تقلد شكلة
وتكول جنة بزونة مضيعة جهالها
كل ساعة يكلي امشي كومي خلي اوديج لبيت عمة منتهى يم البنات خاف يحتاجن شي
وراء الخبيثة تكلة : يا بنات ليش شبيهن
يكللها مالهن خلك دمشي لا اخذج سحل
خطية عبالة محد يدري بي علمين هاي اللهفة
ما يدري فضح روحة

بس اي صدك سهى اتذكرت
شنو صاير بين ناصر وثائر
بحيث مخلي ناصر ما يطيق سيرت ثائر
احس بينهم شي لان كلش ماخذ من خاطرة منة
جنت اصب الجاي وفجاءة رجفت ايدي
وتذكرت كلام ثائر وية جاسم بذاك اليوم
حقة ناصر من يزعل
جنت اعرف ان ثائر حجة هاي الكلمات
دفاعاً عني حتى يسكت جاسم
يعني ما كان يقصد يتزوجني
لذلك ما اهتميت لكلامه
حقة ناصر يزعل
لان اي واحد بمكانة كان راح يثور من يسمع سيرت بنت عمة على السان الرياجيل
هذا الشي استفزة
لان ثائر مالة حق
يتجرئ ويحجي بهيج موضوع كدامة مو من حقة يكول
سهى حرمتي وهو اصلاً ما فاتح موضوع خطبة وية اهلي ميدري بروحة فضح نفسة وفضحني
الله يلعن بليسك يثائر
شلت الصينة ورحت للاستقبال
ودخلت شفت امي ماكو وناصر بعدة ما خلص تبديل
حطيت الصينية يم حارث الي بعدة مندمج باللعبة
: حارث اخذ الجاي لا يبرد
: هَـا اي رحمة الله والديج
اجيت اطلع وصاحني
: اوكفي سهى لحضة خلي اجيك ضغطج ما دام الجهاز موجود
رحت يمة
: اي والله رحمة الله والديك اشو بعدني احس بدوخة
وكعدت ومديت ايدي وهو فتح الجهاز ولبسة لذراعي
: ترة مو شرط الدوخة من ورة الضغط
فقر الدم هم يخليج تحسين بدوخة
وجانت عينة متنقلة مابين الجهاز واللعبة
: دكتورنا ممكن تركز شوية وتشوف الجهاز شكد يقرة
انا ما اعرف شلون سموك دكتور
ضحك
: ادري شنو الدكتور مو من حقة يباوع طوبة
بالله شو خل اشوف
اهاا ضغطج شوية نازل بس سهلة
شربيلج شوية لبن مالح
اي صدك انتي يا فريق تشجعين ريال لو برشا
: والله انا اشجع العراق
: ههههه والله انتي تحفة ودمج خفيف
جنا نضحك وسمعنا اندك الباب
كمزت من مكاني حتى اطلع هاي يمكن الولد اجوعلمود الطوبة
بين ما اجيت اكوم
سمعت صوت حارث صاح اتفضل
نسيت جهاز الضغط بعدة مشكل بيدي
كمت وهو وكع على صينية الجاي وانكلب الجاي على بنطرون حارث طفر من مكانة
حارث : اشتعلو عشيرتج اخ بوية
اني من ربكتي انخبصت جريت الكلينس
وكعدت على ركبتي بالكاع
وكعدت امسح بالبنطرون يم فخذة وهو مدنك يمسح وياي
حارث بتوعد: والله اذا صار اثر حرك
شيخلصج مني
: عمي اني احطلك المرهم بس انزع خلي اشوف
طلبي كان من باب الاخوة
بس جنا اثنينا غافلين عن الاشخاص الي ديباوعون
الموقف فزيت على صوت خشن
: احم احم السلام عليكم
عززززة هذا ثائر شجابة
ادري هذا ما يجي الا من اكون مصخمة
شفتة خزرني والغضب باين على عيونة
وظل يباوع على حارث
والله خفت عبالك راح ياكل حارث
انتقلت نظرتة الي
حسيت بي صار نار جمرة ورفع تك حاجبة
واشرلي بعيونة على باب الاستقبال
عرفت الرسالة
اني كبل طفرت من مكاني ونزعت جهاز الضغط بأدين
ترجف وطلعت من الاستقبال ركض
هو الموقف كان جداً عادي بس ما ادري ليش ثائر ونظراتة حسسني اني كلي غلط
من عهد هذا الموقف
جانت رواء من تجي وتحجي وتسولف ويانة
دائما تسألني انتي شنو علاقتج بحارث
بعدها ادركت وعرفت منو ورة اسئلة رواء الغريبة كان ثائر لان الموقف بعدة ياكل ويشرب وياه
...............................
: شوف انا لو منك استعجل بزواجة قبل لايسويلك مصيبة ثانية
: يعني هذا شورج هيج تشوفين
: اي والله انت وجة وشوف شلون راح يلتهي
ويرتاح راسك من المشاكل ترة ما دام هاي موجودة كبال عينة
ما راح يرتاح ولا يهدالة بال الا من يشوفها تصير من قسمتة
وانت شوفت عينك جرفتها فكر وما ناقصين مشا

كل
...............................
ثائر بقهر
: جدي اريد اعرف ابوي
ليش ناشبلي مثل العظم بالبلعوم
شكو ما عندة ولد غيري ليش ما يروح لعدي
لو اخوتي البقية
: خايب اكعد شبيك ثبرتنا
اريد اعرف انت شبيك تكمز يعني اليوم والا باجر
اول وتالي تتزوج بنت الشيخ راجح
: شيخنا جا والوعد
: خايب انت صدك تحجي
انا مو كلت بس اصبرلي وما يصير بخاطرك الا طيب
: جا وبنت الشيخ هاي شلون راح تخلصني منها
: ولك وحش راح تموتني ناقص عمر
منو كلك انا راح اخلصة من بنت الشيخ
شوف يابعد جدك ترة
الاصول لوحد والوعد لوحد
وانت لازم تسوي الثنين
حطيت ايدي على وجهي وفركتة
شلون ورطة يالله هاي وين جانتلي
ظليت احوم شنو حلها
كمت من عند جدي
ورحت ادور على رواء
....................................
جنت كاعدة وية البنات
بالحديقة مالت البيت
نخطط لعرس نور وناصر
لان قرب موعدة زواجهم
اجاني حسن وبيدة نقالي
ماما نقال يرن رقم غريب
كمت من مكاني واخذت النقال وفتت جوة بالمطبخ حتى اسمع زين لان البنات هوسة وكلهن يحجن بصوت
عالي
رديت : الو
سمعت صوت رجف گلبي الة
وحسيت السنين رجعت بية
للخلف : ثااااائر !!!
ثائر بهمس المحبين : اي ثائر يسهوة
للحظة سهيت ونسيت نفسي بس اتلاحكت لروحي
شنو سهى اصحي لتنسين حالج
: منين جبت رقمي
: انا اتصلت عليج مو علمود تفتحين وياي تحقيق
ولا علمود اغازلج واتبادل وياج الحب
:اني مسألتك ليش اتصلت علية اني سألت منين جبت رقمي
: اكلتني قبل لاتعرفين انا عليمن اتصلت
سهوة
انا تعبت وگلبي انشلع من ورة حبج
وماعاد بالگلب صبر
سهوة انا اريديج مثل ما الرجال يريد حرمتة
تضوي گلبة وبيتة وحضنة
اترجاج تسمعيني و لا تصيرين انتي واهلي
علية كل الي اريدة منج تتفهمين موقفي

والله من سمعت نبرة الحزن بصوت نكسر گلبي عليه
تحجي وية نفسها
والله احس بيك وحبك شلع گلبي وبهذل احوالي
والله اني هم مشتاقتلك بكد رحمة الله
بصوت هامس
: كول اسمعك
: سهوة انا راح اتزوج واريدج بس تفهميني
انا بعدني عالوعد باقي وراح اجي اطلبج من عمج

لااا يالله ليش ليش متت بدمي عبالك واحد طعني بخنجر بگلي وكعد يلوي بيه داخل صدري
: لا ثائر لحظة شدتحجي اوكف
منو كلك اني راح اوافق ادخل زوجة ثانية
واخرب بيت غيري
: سهوة لتنسين انتي وعدتيني توافقين بالزواج

: اي صحيح اني انطيتك وعد بالزواج بس ما وعدتك اكون خرابت بيوت
بذاك اليوم من انطيتك الوعد جنت بحالة خوف منك حتى تتركني ارجع لاهلي
ثائر بغضب: ولج سهوة انتي تلعبين علي
ولج لا تخبليني اذا جان الوعد مغصوب
زين ولهفتنا بحضن بعض وشوگنا المفضوح
بالعيون ورجفت كلبج جوة ايدي
هذا هم جنتي مجبورة عليه
سهى تدوس على الگلب وتعبرة
: اسفة ثائر روح اتزوج وشوف حياتك
ومن هسة اكلك الف مبروك بس انسى شي اسمة سهى لان اني لو اموت ما راح ابني سعادتي على حساب غيري
نهيت الاتصال بدون ما انطي مجال يبرر
لان اخاف اضعف واستسلم لكلامة
وساعتها ما راح تبقى ذرة كرمة واحترام لنفسي
شنو فرقي عن الما يخافن الله
صعدت فوك لغرفتي
ورجلية ترجف سديت الباب واتكأت عليه
وصرت اضرب راسي بالباب بدون وعي
: ليش يالله ليش اني من دون البنات مكتوب اتلوع
واتجرع المر ربي اخذ امانتك اريد اموت وارتاح
سمعت الباب يندك
فتحت الباب وشفت عذراء بعيونها معرفة سبب دموعي
شكل خبر زواج ثائر وصلها
شمرت روحي بحضنها
: لج عذراء جاي امووت وما اعرف شسوي
شدتني لحضنها بقوة
: حقج يسهوة حقج مو هينة عليج
تشوفي يكمل حياتة وية وحدة غيرج
: لج عذراء اتصل علي
ثائر وخيريني بين نارين نار فراگه ونار اعيش وياه
بس على حساب حياة وحدة ثانية واعرف كلش زين
راح اظلمها وياي
اذا وافقت عليه
بساعتها راح اخسر احترامي لنفسي
ترة كلش صعبة
محد تقبلها على نفسها تحطم حياة وحدة ستوها
راح تتزوج وبعدها ما شافت شي من حياتها وياه
كعدت بالكاع
كليلي عذراء شتصرف
: والله ما اعرف شنو اكلج شغلتج مثل
الي يريد يشرد من الطاوة ويشمر روحة بالنار
بالحالتين محروك
...........................................
كعدت من النوم واني احس براسي صاير طبل
اتمنيت ماتطلع علية شمس ولا اصبح
بهذا اليوم
نور : سهى استعجلي هم يالله تكعدين
حارث يكول راح اطلع خلي تستعجل
حتى اوصلها للمدرسة بطريقي

خلصت تبديل حسن واني لبست الجبة الاسلامية مالتي ونزلت
وكعدت اريك حسن
حارث: سهى وجهج اصفر شبي
: ما بية شي بس احس راسي يوجعني
منتهى : يمة حارث اليوم عدنا عرس ابن خالك
جان اجلت شغلك اليوم
: لا يمة والله ما اكدر اجلة ترة هي شغلة ساعة وراجع
كام واخذ مفاتيح السيارة
: هَـا سهى جاهزة
كمت واخذت جنطتي وجنطت حسن
: اي يالله خلصت
طلعت بباب بيت عمو
وبانت علامات الفزع على وجهي
كان الباب مال بيت جدهم مفتوح على وسعه
الطلاكتين
وجانو ديذبحون الذبايح
واكو عمال دتعلك الاضوية والزينة على سياج البيت
وبيتهم مخبوص خبص
ااااه اليوم راح ينزف حلم عمري لغيري

اليوم راح ينصبون فاتحتي
اليوم اتمنيت البس الابيض
مو لاجل يزفوني
لا اريد البس الابيض لحتى يدفنوني ))

خنكتني العبرة وحسيت بعصرة قوية بصدري
دنكت راسي ومشيت وية حارث
جان حارث لازم ايد حسن ويسولف وياه ويبتسم واني بغير عالم وما اباوع بطريقي
انتبهت على ايد لزمتني من زندي وسحبتني
التفتت شفتة لازمني من ايدي
حارث: هاي شبيج سهى ما تشوفين كدامج حفرة
لا شكلج اليوم ما عاجبني
باوعت كدامي يبوي هاي شنو معقولة ما انتبهت
والله ما ضل عقل بالراس
مرت من يمنا سيارة وفجاءة وكفت بمكانها
باوعت شفتة ثائر
نزل من السيارة وعيونة نارر يريد ينفجر بية
انتبهت على نظرت عيونة
تباوع على ايد حارث الي جانت لازمة ايدي
خزرني
حارث يهد ايدي ويروح يسلم على ثائر
الي يسلم عليه وعيونة علية
عبالك يريد يخنكني
ما اهتميت لنظرتة لزمت ايد حسن
وصحت لحارث
: يالله حارث استعجل راح نتأخر
................................

منا اهلي ومنا سهوة وانا بين نارين
اليوم عرسي
بس ما جاي احس بطعم الفرح
جنت راجع بالطريق واشوف حارث وسهوة يمشون ولازمين ايدين بعض
اجيت اتخبل شنو معناها هاي
معقولة حارث عينة على سهوة
والله احركة واحركها ولا اخليه ياخذها
ولو اتزوج عشرة اخذها اخذها
بس هالمرة مو علمود حٍٍِْــًبٌٍـــِٓېٍٓ الها
لا هالمرة علمود اثبتلها
حجايتي ما تصير اثنين
ومن تصير ملكي نذر علية الا اخليها تدفع
ثمن كل لوعة شفتها من وراها
.........................
رجعت للبيت وشفت الحوش مخبوص بالذبايح
والناس والربع كلها متحزمة علمود عرسي
بس اشو صاحب العرس الوحيد الي ما مستعد
لعرسه
صرت احس بالوقت يلعب بعداد عمري
وكلما تعبر ساعة احس يقترب اجلي
ودكت الساعة بالاربعة
وحان موعد الزفة
رحت صعدت فوك لغرفتي القديمة
وكعدت البس بثوبي وعگالي وساعتي
وصرت اعاين على الغرفة واتذكر
سهوة ثاير جانت الها بهاي الغرفة ذكرى
وظليت اتذكر كل كلمة وكل حركة وكل نظرة وكل لهفة
اتبادلناها سوية
غمضت عيوني ونزلت جوة واتلكوني عماتي وجدتي والخطار بالهلاهل والهوسات
الكل اجتمع وحضر لبيتنا
وگعت عيني على ام سهوة
صرت اعاين وادور بعيوني بين البنات
على سهوة اريد اشوفها رغم قهري منها
بس بعدني افكر بحالها
عمري ما سامع ذباح يحن على ذبيحتة
بس وية سهوة كلشي انگلب حتي ال ما معقول
صار معقول وية حبنا
..........................

دخلت للمدرسة وكانت جداً تعبانة
وبناءها قديم
وخدمات مدرسية ماكو اجيت اتخبل من شفت الطلاب
نصهم يكعدون عالارض
بس رغم ذلك مستمرين يدامون
بكل روح مثابرة
اتعرفت على المدير كان رجال جبير بالعمر يصير
بعمر عمو قاسم واخذني وعرفني على المعلمات
وكانو كلهم حبابين
واغلبهم كبار بالعمر بس كم وحدة تعيين جديد صغار
بالعمر
المدير : اليوم اول يوم الج بالمدرسة لذالك ما راح انطيج صف ودروس
من باجر نبدي
اليوم خلي بس للتعارف على المعلمات والطلاب
: اشكرك استاذ
: لا بابا احنا الي نشكرج لان انطيتينا من وقتج
لان مساعدتج اعتبرها خدمة واني ممنون منها
: لا بالعكس انتو ناس طيبة وتستحقون الاحترام
يشرفني اكون معلمة عندكم ولو اني اختصاصي مدرسة احياء بس راح ابذل ما بوسعي لحتى اكدر اسد مكان المعلمة المجازة
خلص اليوم المدرسي واني التهيت
بس هذا ما كدر ينسيني ثائر وحركة گلبي

اتصلت علية امي وكالت راح ادز عليج ناصر ابن عمج حتى يرجعج من وكت من المدرسة
حتى الحك اجهز روحي للعرس. واروح وياهم
بس اني دبرت حجة وكلتلها
: يوم ما بية حيل اروح راسي يوجعني واحتمال ضغطي هابط انتو روحو واني راح ابقى بالبيت
صار وقت الحلة وانتظرت حارث
حتى يجي علية ياخذني
بس شكلة اتأخر احتمال ملتهي وية عرس ابن خالة
حتى اسمة ما يهون علية اذكرة على الساني
حسن : يالله ماما كلها حلت بس احنا بقينا
: اصبر ماما لحظة خلي اشوف عمو حارث وين صار
: ماما عادي اندل البيت اني اوصلج ترة هذا هو قريب
انتظرت شوية وحسن ظل يتململ
: ماما يالله متت من الجوع
استسلمت لمحة حسن وطلعت من باب المدرسة وزلمت ايدة ومشينا
وهناااااااك بنص الطريق ويصادفني
رتل مال سيارت واصوات هورنات
وطبل جاية بتجاهنا
وبلحضتها عرفت هذا موكب عرس ثائر
مرت من يمي سيارة ثائر العالية مزينة وجان علي اخوه يسوق وهو كاعد بصفة ويحجي وياه مكان
ما انتبه علية وما شافني
كان لابس ملابس العرس وشكلة بنطق بالهيبة
انتبهت على روحي
شفت نفسي واكفة بنص الطريق
وانظر ورة سيارة ثائر عبالك جاي
ازفة بنظرات عيوني
جريت حسرة قوية ورجفت ايدي وگلبي رجف
( هي قسمة وانت ما مقسوملي
قابل ذيج دامت حتى هاي تدوملي )
..............................
وصلنا لبيت العروس
واحس صارت الدنا بعيوني ظلمة
دخلت انا وجدي لبيت الشيخ مزاحم
وفتت عالنسوان وحتى اخذ العروس
الجد: فوت بوية ثاير خطي برجلك اليمين وسمي
خطيت اول خطوة ودخلت من الاستقبال
رفعت راسي. وعاينت
وهنااااااا جمدت بدمي وانصدمت صدمة عمر

ي
لا ياالله معقولة

ملكةه · 30/April/2018

ج 2 بارت 14
علي اخوي يسوق بسيارة العرس
وانا كاعد بالخلف والصدمة كاعدة بصفي
ما اعرف ابجي لو اضحك لو اضرب روحي بطلقة
والله راح انجن من الي شفتة
رجعت التفتت عليها
والله انمرد گلبي عليها
جانت مدنكة وبس تبجي والكحلة ساحت من العين والخشم يصب
وكل ساعة تمسح دموعها وخشمها بجف ايدها
من شفتها عبالك شفت بنتي سرى
من الله لايوفقج يعمة على هالدكة الناقصة
شلون انطاج كلبج تورطين هيج طفلة بالزواج
ادري وين كاعدين احنا بيا زمن
رجعت اعاين عليها وكل ساعة استغفر الله
حتى ينطيني الصبر
والله شكلي اليوم راح ارتكب جريمة
ادري بيها كلش زين
هي ليش خطبت هاي البنية بالذات
بس والله ثم والله ما اراح اعدي السالفة على خير بس خل اوصل
الا اكلب العرس على راسها
علي: ثاير كول يالله ترة خرعت الفرخة
بصياحك
سمعت الصغيرة شلون تناشغ من البجي شكلها مغصوبة
عالزواج اااااخ الله يمكن حتى اصغر من سرى بنتي
ما اعرف شنو اكلها بابا مدري عمو سألتها
: انتي شكد عمرج
رفعت راسها
الله ينتقم منج يعمة جرمتي بالبنية
: عمي الشيخ انا عمري ١٣سنة
ورجعت تكمل بجي
: استغفر الله يا الله
نفخت بغضب احس النار صارت تطلع من وجهي
علي: اتعوذ من بليس يثاير وارحم بحالها

: يابة شرحم بيها وهي اهلها بالاصل ما رحموها
من زوجوها بالغصب لواحد بكد ابوها
هاك استلم شوفها شلون خايفة وترجف
احلفك بالله مقتنع بالجاي يصير بية
علي: لا والله اصلا اتفاجئت مثلك حيل صغيرة
بس هاي سوالف عمتك وانت تعرفها ما تجوز من طبعها
: لا والله لهنا وحدها الا احطلها حد واخليها تكول يا ريت الجرة ماصار
مو انا الي تندك بيا مرة حتى لو جانت عمتي
كلشي والة حد
انا من تالي عمري انحط بهيج موقف
عض ايدة من القهر
ادري بيها تنتقم لان عاندت وما اخذت بتها
ايست من عندي وجدي زوج بتها لواحد
غصب عليها
لان جانت تريد تزوجها الي
علي : بس انت هم صوجك ما كلفت نفسك تشوف العروس
شلونها ما لونها سلمت كل امرك بيد عمتك وهي هم ما قصرت اشتغلت كلة سكتاوي
: ااااخ الله شلون فاتتني هاي وما درت بال لكلام رواء اختي من كالت
حفلة المهر جانت كلها زعاطيط من العروس وشيل ايدك
بس جدتي وعمتي سناء سكتنها
وكالو: العروس كلما جانت صغيرة احسن
حتى تتربى عدنا وتاخذ ذبتنا وتتعلم على طبعنا
بالله جدتي بهاي معذورة وعدها عادي
لكن عمتي ااااااخ منج يمعة من عمة بعينج يعمة
جانت الافكار تاخذني وتجيبني وهاي الي بصفي بس تلعي (تبكي)وما حسيت الا على سيارتنا لزمت بريك قوي ووكفت
سمعت صيااح زلم عالي
علي اخوي فتح الباب ونزل من السيارة
التفتت اعاين شنو صاير
انتبهت على سيارة كوستر المعازيم كلها نازلة منها
والزلم ملتمة (مجتمعة) و صار مدافع بين الربع
شفت ولد شاب صغير هستوة خاطة شواربه
انتبهت عليه يتدافع وية ناصر وعدي يريد يوصل لسيارتي ويصيح بعالي صوتة
: هاي بنت عمي الي ما تصير لغيري وانا ناهي عليها
واليوم ماكو زواج الا على جثتي اليوم اكتل وانكتل
(اقتل وانقتل)
ادري هذا وين جان عن بنت عمة من خطبوها
ما كدرت اصبر واظل كاعد
اجيت انزل من السيارة
سمعت صوت الي كاعدة بصفي
لطمت علًى وجها وصاحت : يمة حميّد يمة
: منو هذا حميّد
: عمي الشيخ انا بركبتك لاتسوي بي شي
ترة هذا ابن عمي وناهي علية
التفتت على علي اخوي
: خايب من امداني حتى هذا الجاهل
اخير مني جاي يطالب بمهرتة
ما اعرف احسدة على شجاعتة
مدري اكول خطية
علي بادراك : بس لا تنسى ياخوي
الناس راح تكول على عملتة
هذا بعدة جاهل و كلشي ما يفتهم وراح يعذرونة
بس اذا انت طلعت هيج طلعة
راح يكولون الوحش تسودن وخذت عقلة حرمة
وبوكتها مالك عذر
ترة ياخوي ما بيها اي وجه مقارنة
رفعت عيني اعاين على الولد وصارت عيني بعينة
شفتة غافل الزلم وسحب سلاح واحد من الربع
وبسرعة نزلت من السيارة خفت يتهور
اجة يركض لصوبي (لناحيتي) يتعنالي (اتجه لي)
رفع سلاحة ووجهة علية وجان على بعد عشر امتار تقريباً
وشفت واحد من اولادنا راد يغافل الشاب
ويسحب السلاح من ايدة
ما حسسبنا الا على الرشاشة غدرت
وطاح واحد من اولادنا بالكاع وفاض دمة
: لاااااا يالله ناااااااصر ولك هذا ناااااصر
صارت عجاج (ترابة)
واصبح اركاض الزلم مثل العراضة
وصريخ النسوان مثل السباية
وانا اريد واحد يضربني على راسي حتى اصحى من هذا الكابوس الي انا بي
.................................

حسيت على روحي واكفة بنص الطريق اباوع خلف
موكب عرس ثائر سحبت نفس عميق وكملت طريقي
للبيت واني اجر برجلية جر
اكتافي انحنت من الالم الي كاعد احس بي
ودموعي من وحدها توكع وكل دمعة بيها الف حسرة
حسن يباوع علية و لزم جف ايدي ويحثني عالمشي
حسن: ماما شبيج تبجين ما احب اشوفج تبجين
قبضت على كف ايدة بقوة وكأني استمد منة الصبر والقوة

دخلنا للبيت وجان فارغ
نزعت عباتي و شمرت شالي من الحرة الي احس بيها
راح تخنكني
كعدت بالكاع ولميت رجلية لصدري وصرت اعاتب الروح على الي جرالي
ربي شوكت اتحرر من حب ثائر اي مو راح يخنكني
حبة اصبح مثل المرض يمشي بدمي
صرت من وراه مثل المقيد باغلال
وماعندي مهرب وين ما اروح ابقى مقيدة بي
ما اعرف هذا حب لو لعنة مكتوبة على جبيني
تلحكني وين ما اروح
ظل حسن يتحرك يمي راح بدل ملابسة ورجع وشافني كاعد على ارضية المطبخ
اقترب مني حط ايدة على كتفي
: ماما منو زعلج كولي والله اروح اشتكيه للشيخ
مساحم
ابتسمت واني ابجي
: منو علمك هذا الكلام
: الجهال من العب وياهم طوبة وواحد يتعارك وية اللاخ يكولون الا اشتكي عليك عند الشيخ مساحم
اخذت نفس عميق وباوعت لابني
اذا اكول اتمنيت
ارجع صغيرة بعمر حسن
واصبح خالية البال ويكون اكبر همي لعبتي وشرايطي
تكون بلون حذائي
سمعت ورة فترة صوت هورنات السيارات مرت من باب بيت عمو قاسم وسمعت صوت الرمي علك
بالجو وهاي علامة وصول العرسان
احس بروحي راح انجن
كان احساسي من كد الالم مثل الي يستأصلون من جسمة عضو من اعضائه بعملية جراحية لكن بدون بنج هذا حالي
من سمعتهم وصلو
اي هسة ثائر وية عروستة الجديدة
شي اكيد حلوة
اي ويمكن هسة هو جاي يهمس بأذنها
وانفاسة الحارة تلفح خدها اي وبعد يسهوة
اي ويمكن حس على رجفتها من لزم جف ايدها
صح اي صح
صرخت بصوووت عالي مثل الفاقدة
ولزمت حسن
: ماما حسن احضني حيل صارت روحي بحسن
مثل الغركان الي يتعلك بكشاية
خطية انتبهت عليه فتح ذراعه الصغيرة
ولمني واخذني لحضنة الصغيرون
وسمعت دكات گلبة عبالك دكات گلب
فرخ الدجاجة (الكتكوت)
وبأيدة الصغيرة صار يمسح على راسي
فجاءة انتبهت على الادوار انقلبت بين الام وابنها
صار هو الجبير الي يهدء من خوفي ويعاملني بحنان
وصرت اني الطفل الخايف الي يحس بالضياع
............................................
صار الركض والصياح بين الزلم ناس تدفع بناس
واني بالي مو يمهم
وانشغلت بناصر الي حملتة على صدري وركضت بي انا والشباب للمستشفى
وما دريت وراي شصار بس تركت علي وابوي وجدي همة الي اتكفلو بالعرس
واما البقية كلها تحزمت على بيت الولد
استغفر الله احس بصواب ناصر صار عبالك نافورة
من النزيف
دخيلك يالله لا تفجعني بي
جانت المستشفى كلش بعيدة
علينا احس بناصر بدت انفاسه تتقطع
وتحول لون وجه واحنا بالطريق حارث شك قميص اخوه
وصار يسويلة الاسعافات الاولية ويحاول بسيطر على النزيف وعاط بعدي
:عدي استعجل لخاطر الله بسرعة ترة اخوي راح يروح من ادينا
ووصلنا للمستشفى ودخلنا نركض وحارث استلمً المهمة
وصار يركض ورة الدكاترة الي ما اعرف وين يختفون
من يجيهم مصاب مدري هو حظي الفكر الي طيرهم

حطو ناصر بسدية واخذوه من عدنا
ودخلوه كبل لصالة العمليات
كعدت الوب اروح وارجع واضرب كف بكف
ورة شوية اجة جدي والشيوخ دخلو بالمستشفى وترسوها
وسمعنا عياط عمتي منتهى وام سهىً وياها تهدي بيها
وسهى وراهم ونور وعذراء كلهم التمو والوجوه صفرة
وانخبصت المستشفى بالناس
وكلها معارفنا بحيث مدير المستشفى طلب من جدي ياخذهم وينتظرون برة المستشفى لان جاي
يعيقون حركة المراجعين والمرضة
والله جدي ما كال باطل طلع برة ونصب الكراسي
وكعد الشيوخ عبالك فاتح مضيف
ماخذ راحتة عوزة بس يكللهم نزلو جايات
والكل اتجمهر بحديقة المستشفى
وبعد اربع ساعات من الانتظار والترقب طلع الدكتور
وركضنا عليه انا حارث وعمي قاسم
: هَـا بشر دكتور
:الحمدلله على سلامة ابنكم الله قدر ولطف بي
لان الاصابة على بعد شعرة عن القلب
وخسر هواي دم
صرنا كلنا نتفس الصعداء براحة
ومنة الي كعد يسجد ومنا الي صار يتحمد عالسلامة ومنا الي وكع مغمي عليه من الهبطة (نور)
انتبهت على سهوة شلون سندتها
وحارث ركض عليهن
وصار يهمس لسهوة بكلام ما اعرف شنهو
بس انا احس بركان جان خامد هاج وثار بصدري
من ورة همسة حارث لسهوة
حجيت بصوت ناصي وعيني عليهم
:ادري احنا بيا حال وهذا كاعد يحوم على سهوة
بالله هسة هذا شيريد منها
عدي : اندري اسأل روحك انت بيا حال وكاعد تحرك بروحك من ورة الغيرة
جا انت شنهي ما يلزمك مكان زمان
شفت حارث سلم على دكتور الظاهر يعرفة
وجانت سهوة وعذراء ونور كاعدات وبعدين اشر على البنات ما اعرف شنو
حجة وية الدكتور بس شكلة سمعتة يكلة الاهل
والدكتور ابتسم وسلم عليهن وهنة ردن السلام بوقار
بس ما حسيت الا على واحد طفر كام من مكانه التفت اعاين عليه عدي واكف بنص الدكتور وحارث
هههههههه خرب بلسيك عدي شوصلك يمهم بهالسرعة هاي
جا ياهو الي جان يحجي وياي قبل شوي
عن الغيرة والمكان والزمان والحال
عاينت عليه بستهزاء ورفعت حاجبي الة
وعاين علية ودار وجهة وسوة روحة ما شافني
وين تروح مني انا الك
ااااخ
اجة جدي وكال
: يالله بوية امشينا عيب من الوادم لازم نعشيهم
يالله ثاير كوم ترة اليوم عرسك وانت لازم تكون اول واحد يرجع

للبيت عيب من الشيوخ
كلها منتظرة هناك ترة نصهم ما اجو ويانا ظلو هناك
نهضت من مكاني
وشفت سهوة رفعت راسها وعاينت علية
بس اتمنيت الموت ولا شايف هاي النظرة بعيونها
كلة منها هي صدتني وخانت الوعد
وتركتني معلك وياها لا طايل سما ولا طايل ارض
اشو هي والزمن تعاونو على كسري
تركتهم ورحت ورة جدي امشي
...........................

اجاني حسن يركض
وصوت عياط عمتي منتهى مالي البيت
حسن: ماما لحكي قتلو عمو ناصر
انخطف لوني وركضت على صوت عمتي
شفت عذراء تدك وتلطم وعمتي منتهى ملخت روحها
من البجي ونور اختي تبجي مثل الطير المذبوح
احد بيكم يفهمني شصار
شفت امي الوحيدة بيهم عاقلة
: شكو يوم ناصر شبي
طبعاً اني احجي والكلمة كوة تطلع من حلكي من الخوف
: يمة ناصر تصوب بالعرس

دخل علينا واحد من اولاد خالهم
وحجة وية عمة منتهى
: يالله عمة جبت السيارة للباب تعاي اوصلج للمستشفى
ما اتذكر شلون لبست عباية وصعدت وية البنات بالسيارة بس بكلبي ظليت ادعي واهدي بعمتي ونور
الي بس تبجي كسرت خاطري
صرت اتذكر مواقف ناصر وياي وابجي
اسم الله على اسمك خوية
اي ناصر مثل الاخو بالنسبة الي ومواقفة تشهدلة
خطية ما يستاهل
وصلنا للمستشفى والي صايرة لخة من الزلم
وكعدنا اني والبنات على صفحة
ووكعت عيني على ثائر كاعد منتظر ناصر يم باب صالة العمليات
نازع عگاله والجفية شامرها باهمال على كتف واحد
وشعرة مخربط وبانت عليه معالم الحزن والجزع
ما انتبه علينا من دخلنا بعدما طلع الدكتور من صالة العمليات وطمنا على صحت ناصر
اغمى على نور وسندتها
وكعدتها على الكرسي البصفي
واجاني حارث يركض
: خير شبيها والله لو باقية بالبيت احسنلها
خطية هنا راح تعيش بحرب اعصاب
اجة دكتور سلم على حارث
وحارث عرفة عيلنا وكلة اعرفك على الاهل
هذني خواتي
وسلم علينا الدكتور ووكعت عيونة على عذراء الي جانت بغير عالم من الحزن على اخوها
وما منتبهة على نظرات الدكتور الي اكلها اكل
شكلة انعجب بيها
حسيت على واحد وكف بين الدكتور وحارث
واقترب من عذراء وهمس بصوت ناصي بس حاول يسمعة للدكتور
: عذراء بيج شي اشو وجهج ماعجبني
تعاي كومي ارجعج للبيت حتى ترتاحين
وانطة نظرة للدكتور
وكأنه يكلة شيل عينك عنها هاي الي
عذراء بذبول: لا لا خليني هنا ابقى اريد اشوف ناصر
وصارت تبجي بالم على اخوها
انتبهت على حارث راح هو والدكتور
وظل بس عدي واكف يمنا
واتفاجئت بحركتة من مد ايدة على خد عذراء
ومسح دمعتها وجر حسرة
: كافي لا تبجين اي مو كطعتي گلبي
انتبهت لعذراء رفعت راسها وصاور واحد يباوع للثاني
كانت نظراتهم بيها هواي كلام
وزادت بجي وكأنها
تتمنى ياخذها لحضنة ويطمنها
سمعت صوت جدهم مزاحم يحجي وية ثائر
يكلة : يالله امشينا نرجع نكمل العرس وعيب من الشيوخ ولازم نعشيهم
وعدي تركنا وراح يمهم
وصارت عيني بعين ثائر الي
ونظراتي الة جانت كلها ضياع
بوسط الظلام ونظراتة الي جانت كلها عتاب
شفتة غمض عيونها وجر حسرة وراح مشى ورة جده
...........................................

خلص العرس وصارت الزفة ودخلت لغرفتي
وشفت البنية المكرودة انمرد گلبي على شكلها
من دخلت كامت بخوف ومشت لعند باب الحمام
خطية جانت بدلت العرس جبيرة عليها
وتمشي وتتعثر بيها
بخطواتها انتبهت على حذائها جان جبير ويطلع من رجلها
وحاطين كلينس بي نزعتة
وهي عينها تاعين علية وبيهن الخوف
ما عرفت وين انطي وجهي وهي ترجف مثل العصفور كدامي

مرات جنت اسمع بالدواوين من اروح وية جدي
بقصة رجال جبير يتزوج بنية صغيرة بالعمر
والناس تظل تلعن بي وتحجي عليه
وينكسر خاطرهم على عمر الطفلة
وانا جنت من ضمن الناس الي يلعنون هيج اشخاص
وينكسر خاطري على مصير البنات الصغار
ومن اسمع بقضاياً. تزويج البنت القاصر
تشمئز نفسي من هذا الموضوع
لكن مال انا اصير هذا الرجل الي الناس كلها
تلعنه وانا جنت العنه
هاي الي ما جنت متوقعها
لا يمكن اجرم بحق طفلة مستحيل اقبلها على نفسي
صدك الدنيا عجيبة غريبة
حرت بيمن استنجد والكل ملتهي ببيت عمتي منتهى
وما اعرف شلون اتعامل وياها وهي بس تبجي
بس اجتني فكرة
رحت طلعت من الغرفة
وصحت على سرى بنتي واجتني تركض
: نعم بابا
جانت تحجي وياي وعينها تسرق النظرات الفضولية على العروسة
افتهمت معنى نظرتها للعروسة مثل الي اخذو مكانها بكلبي اعاين على سرى متريد وحدة
تاخذ مكانها بكلبي ونست ان الشخص قادر ان يحب اكثر من وحدة بوقت واحد
بعدها ما تعرف ان حب الاب لبنتة يختلف
عن حب الرجال لحبيبتة وهناك انواع للحب
: تعاي بابا فوتي دخلي جوة
اريد احجي وياج واوصيج تديرين بالج عليها
واشرت على العروسة
شفتها راحت وكعدت بصفها وسألتها بفضول
: شنو اسمج
جاوبتها بصوت يرجف
: اسمي فاطمة
: اسمج كلش حلو اني اسمي سرى
انتي بأي صف
: انا نجحت هاي هاي السنة من السادس ابتدائي
ورحت للاول متوسط واهلي بطلوني وزوجوني
رفعت سرى عيونها مفتوحة على وسعهن من الصدمة ووجهتلي نظرت

اتهام
همست بنتي سرى بخذلان
: طلع كلام ماما كلة صحيح عنكم انتو وحوش
و تظلمون البنات
ليش بابا سويت هيج اني جنت اكول عنك انت غير
حسيت روحي واكف امام محاكمة ولازم ادافع عن نفسي واثبت موقفي مريت بشعور جداً كريه
جنت جاي اتحاكم امام زوج من العيون المتهمة
بنتي سرى القاضي والفتاة الصغيرة المجني عليها
الضحية
واني الجاني السفاح الي جرمت بحق هاي الصغيرة
لكن يوجد هناك ثغرة لكل قانون بالحياة
نكدر نخترقها ونجد الحل المناسب للمشاكل
جليت صوتي ووجهت كلامي لفاطمة وقررت احدد موقفي منها من خلال الكلام
: شوفي عمو اعتبريني مثل عمج او ابوج انتي بكيفج
لتخافين ما راح اسويلج شي او ااذيج
شفتها رفعت راسها وصارت تنظرلي بامل
: صدك صدك عمي الشيخ يعني ما راح تكتلني
اذا ما سويت التريدة مني
لاااااا يالله هذولي شنو معلمينها
استغفر يالله
: منو كلج انا راح اضربج
: عماتي كالو سمعي كلام الشيخ وشنو يكلج
انتي كولي اي
واذا ما تسمعين كلامة راح يموتج كتل بالعكال
سرى بدفاع عن ابوها : بابا مو متوحش حتى يضرب البنات الصغار
التفتت علية حتى تأكد كلامها
: موصحيح بابا كلامي ؟؟
: اي نعم صحيح كلام سرى
لتخافين انا ما راح اسويلج شي انتي حالج من حال بنتي سرى ومالج غرض بكلام عماتج
ليش امج وين عنهم
: امي متوفية واني يتيمة
غمضت عيوني واخذت نفس عميق حتى لا انزل ارتكب جريمة بعمتي سناء من كون الله ياخذها على هالدكة
صرت اطمن بيها لحتى تبدي تتأقلم عالوضع وبعدين اشوفلي جارة حل لهذا الوضع
: يالله هسة تكدرين تاخذين غراضج من الغرفة وتطلعين
وبعد منا ورايح كلة تنامين يم سرى
شفت سرى فرحت
: اي عفية بابا يعني فاطمة راح تصير صديقتي
شفت روحي كاعد بين ثنين عصافير صغار يبحثون
عن الامان والامل المسروق من عمرهن
ااااااخ يالله
سمعوني زين انا راح انزل جوة
اريد كون من ارجع اصعد اشوفكم حولتو غراض فاطمة كلها لغرفتج سامعة بابا

: اي بابا من عيوني
: تسلم عيونج
حسيت بفرحة سرى كدرت اثبلتها انا
مو مثل ما جانت تتصور سفاح
على الاقل لحكت احافظ
على صورتي بنظرها وما خذلتها

نزلت جوة وانا الشياطين كلها راكبة راسي
ونيتي سودة واليوم عمتي سناء حصتي
شفتها كاعدة بين النسوان الي بقو من بعد ما خلص العرس
: عمة تعاي اريد احجي وياج كلمة
: اوكف عمة ثاير فد لحظة بس اخلص الي بيدي واجيك
صحت بغضت: شوفي عمة لا تختبرين صبري
جمدت بمكانها
ومسحت اديها بالمنشفة وركضت لعندي
: هَـا عمة ثاير كول شبيك ليش هيج تصيح علية كدام النسوان
: اصيح واكلب الدنيا على راسج بعد
شهكت ولطمت على صدرها من المفاجئة
مجانت متوقعة اصيح بوجها
: للليش يابعد عمتك تنزل من مقدراي كدام النسوان
: محد نزل مقدارج انتي بيدج نزلتي قدرج وهنتي نفسج بهذا تصرفج الارعن وياي
ما انتظرت نصير بمكان اكثر خصوصية ونحجي
لا بالعكس انا ردت افشلها امام الكل واخليها تعاني واسويها عبرة لمن لا يعتبر
اريد اعاقبها على سوايتها وياي
: عمة انا اعرف كلش زين
شنو غايتج من هذا الزواج
وادري بيج ليش اختاريتي هاي الطفلة بالذات
حتى تسهل عليج وتكدرين تخليها تحت جناحج وتبقين انتي الامرة الناهية
ويبقى كلشي بهذا البيت تحت سيطرتج
سويتي هذا كلة
علمود ما تجي وحدة فاهمة تنافسج على ادارة البيت ويبقى كلشي على ماهو عليه
انخطف لونها
: عفو عليك عمة هي هاي جزاتي انا ما ردت غير مصلحتك بس صدك لو كالو سوي خير وذب بالشط
: رحمة على والديج هذا ياخير
جاية تحجين عنة
اسألج بالله شلون انطاج گلبج تشوفين هيج بنية صغيرة ويتيمة وتزوجينها لواحد بكد ابوها
وهي كلشي ما تفتهم من الدنيا
بس ما اكول غير خطيتها بركبتج الى يوم الدين لان كسرتي بختها

من هسة احذرج راجعي حساباتج
ولا تتخذني الج عدو واتقي شري
وانا لو منج ما اجازف ومنا ورايح
بذلي ما بوسعج لحتى ارضى عنج
وصاح بصوت خشن هز اركان البيت
لان اناااا هنا الامر الناهي من بعد جدي
وكلامي يمشي علىً الجبير قبل الصغير
سمعتيني لو اعيد
صارت بس تهز براسها بنعم : هذا هو عمة ثاير
الي تشوفة وانا مثل امك لا تعابيني (تعاقبني)
وانا حرمة مريضة
سمعت صوت جدي من وراي
: خير يثاير شجاك تصيح بنص الحوش
: جدي اسألها لعمتي وهي تحجيلك شصار
تركتهم وطلعت من البيت وانا عقلي يريد يفصل
ما جاي يستوعب كل الصدمات الي دارت عليه
بيوم واحد
.........................

مر على اصابة ناصر شهر
وخلال هذا الشهر بدة ناصر يشفى جرحه
والبيت ابد ما فرغ واذا جان من رجع حارث
من السفر والبيت انترس سيتات بيبسي وعلب جكليت
فهسة على سلامة ناصر
البيت انترس خرفان ههه
عذراء
: اكلكم بنات ما ادري ليش من اطلع اخبز
بالتنور واشوف القطيع مالت الخرفان يلتم حولي واني اخبز احس بروحي
راعي غنم عوزني بس اكعد اعزف على الناي واغني اغنية داخل حسن
(( لو رايد عشرتي وياك حجي الجذب لاتطريه
ادور اعله الصدك يا ناس راح وبعد وين الكاه))
ضحكت على جنانها بعز الازمة
وهي تحش

ش
.......................
اتذكر بيوم خروج ناصر من المستشفى
استقبلناه يم البوابة الرئيسية وعمو حضر الذبايح
على سلامته
جنا اني والبنات نباوع من ورة الباب وكل ساعة يهد علينا عدي ويخزر بعذراء ويصيح
فوتو دخلو جوة منا الزلم
جنا ندخل للبيت ومن نشوفة يروح
نرجع جنة دجاجات نروح نتدافع عالباب حتى نشوف
ناصر من راح يجي والذبايح شلون راح تنذبح
وهم يرجع عدي علينا مرة ثانية
جنة ديج هراتي ويهد على الدجاجات
كان منظرنا جدا مضحك لان من نشوفة جاي علينا من بعيد يصير طشارنا مالة والي ونصير وحدة تدعم بالثانية
وبهذا اليوم جان جداً جميل وكان محمل بالمفاجئات
اجتي عذراء وكالت
: سهى سهى لحكي فنج منو اجة
: منو
: جدتي وسناء ورواء وسرى اما المفااااجئة الكبرى
زوجة ثائر وياهم جاية
ما ادري ليش انخمط گلبي من سمعت كلام عذراء
صرت كلي ارجف اريد اشوف منو الي اخذت ثائر مني
منو الي نامت بحضنة وتوسدت على ايدة
انتبهت على روحي لازمة بيدي وصلة المطبخ وصرت
ابرم والف بيها بحرگة زائد توتر
: يالله تعاي سلمي عليهم وشوفي بعينج
سحبت نفس عميق وعدلت شالي وقويت نفسي
حتى اكدر ادخل اسلم عليهم بدون ما تخوني شجاعتي
وانهار كدامهم وافضح روحي
دخلت وشفت
جدتهم وسناء وراء وسرى
وبنية صغيرة وياهم مشايفتها قبل
وظلت عيوني تدور عليها بالصالة والفضول راح يكتلني حتى اشوف زوجة ثائر
اشو ماكو شنو معقولة كامت وية البنات وصعدت فوك
اتقدمت وسلمت على جدتهم ورواء وسرى والبنية الصغيرة
وسناء خليتها اخر وحدة لان اتخبل منها
بس استغربت منها وفاجئتني
سحبتني واخذتني بالاحضان
سناء تضحك بتوتر : ياهلة بسهوة شلونج عمة
ظليت فاتحة حلگلي وعيوني على وسعهن
وجانت تحوم على راسي الف علامة تعجب!!!!
منو هاي الي جاي تسلم علية !!
لا هاي المرية ابد مو طبيعية
الظاهر شاربة شي او مضروبة على راسها

اما الصدمة الجبيرة من حجت عمة منتهى وكالت
: سهوة عمة تعاي سلمي على مرت ثائر
التفتت على المكان الي تباوع عليه
ما شفت شي
ظليت واكفة بمكاني وعلامة استغراب
شنو وينها
لكن اجيت اوكع من طولي من شفت البنية الصغيرة كامت من مكانها واتقدمت علية ومدت ايدها تريد تسلم
منتهى : فاطمة هاي تصير بنت حماي
تحجيً وتأشر علية
سهى بحلك مفتووح : هااااااااه ااانتي زوجتة ثائر
فاطمة: اي خالة انا زوجة عمي الشيخ
: لااا يالله هاي شنو معقولة
الي جاي تشوفة عيوني
لك ثائر الله يلعن بليسك على هالسواية
...........................
مرت الايام
اتعودت كل يوم اروح للمدرسة اني وحسن وحارث يوصلنا
وصرت كل يوم مثل هيج وقت لازم اشوف ثائر يعدي
من يمنا بسيارتة ودائماً ينزل ويسلم على حارث
وابد ما يفوت يوم
وماتخلو محاولاتة لسرقة النظر بتجاهي
ولا فاتتني نظرات الحقد الي يوجها لحارث
وصلت للمدرسة
وحسن اخذ جنطتة مني
حارث قبل لا يروح: سهى اليوم احتمال اتاخر عليكم شوية بس انتطروني انا اجي عليكم
: صار تعبتك وياي
: شالسالفة تعبكم راحة هو انا كم سهوة عندي
هي بس وحدة وملكت الگلب
ضحكت وحطيت ايدي على صدري
: ما تـُـــوب من سوالفك
كمزت على صوت ثائر من حجة
ولزم حارث من قميصة من ورة
عبالك دخل علينا مثل المداهمة
: ترة عيب هاي السوالف بالشارع انتو مو مراهقين
جا انت ما عندك حشمة ولاغيرة على عرضك كاعد تغازل بيها يم باب المدرسة
حارث وهو ينفض ايد ثائر من قميصة
: شنو خير ابو الشباب شبيك
انا وبنت عمي نتسامر انت ياهو مالتك
شفت ثائر صار نار وزنك حارث من ياختة ولطشة على حايط المدرسة
سمعنا صوت الشيخ مزاحم اجة من خلف ثائر
: كواكم الله شباب شلونكم شعندكم متجمعين
يم باب المدرسة جان يحجي ويمشي بتجاهنا والعصا بيدة والحارس زيدون يمشي يمة
حسيت الله رسلة علينا لحتى ما يتخبل ثائر
شفت ثائر
رخة ايدة عن القميص وبدل الحركة وصار يعدل بياخة حارث
وهو يهمسلة
: صير عاقل منا ورايح حباب ولا تلعب وياي
ترة انت مو بكدي خلك فاهم وراكز
اقترب جدهم : يالله عجلو جا اليوم مو كلتو نروح للصيد
بالبر
: اي جدي احنا بعدنا على نفس اتفاقنا
بس اريد سيارة الجيب حتى تنفعنا بالصيد
تركتهم يتفقون ودخلت للمدرسة

اني لازم احط حد لثائر وتدخلاتة بحياتي
ما يصير هيج يعني كلما يشوف احد يقترب مني
يروح متعارك وياه ميصير اليوم لازم اسويلة حل
يعني ذاك اليوم اتقدملي اخو معلمة
هم سوة موقف بايخ واتعارك وية الولد وما اعرف منين درة جايين علية خطابة هم طلع طلعة غريبة
بيوم اجة الولد يشوفني
ودعم سيارة الولد جانت واكفة بباب بيت عمو قاسم
وطلع الولد من البيت يدك على راسة علمود سيارتة وثائر هم على الاساس
سوة روحة هو المتضرر
وكعد يتعارك وية الولد لحد ما طفشةً وشرد
لزمت نقالي وكعدت اكتب رسالة لثائر

.......
ثائر رحمة على والديك اعتقني لوجه الله
ترة ميصير الي دتسوي وياي
جاي يأثر على سمعتي
ثق بالله اذا اتكررت هاي مواقفك وياي بعد
والله اعوفلك السلف واخذ امي وارجع لبغداد
وبسا

عتها بعد تحلم تشوف وجهي
دست ارسال ورحت ادرس صفي
ومرت الساعات وخلص اليوم المدرسي
وحضرت جنطة حسن
وصارت الحلة وكفت انتظر حارث
اتأخر علينا واتصلت عليه
: الو هَـا حارث وين صرت اشو هواي اتأخرت
علينا
: جاي جاي بالطريق تعرفين طريق البر والصيد بعيد
ما راح اتأخر عليكم
ظليت انتظر وحسن صكعتة الشمس وظل يتململ
: يالله ماما ترة كلش تعبت وجعت خلي نرجع للبيت

باوعت لساعة النقال وانتبهت على رسالة واصلتني من اربع ساعات كانت من ثائر
جانت رد على رسالتي
(شوفي يسهوة والله لو ترحين لسابع ارض
وراج وراج لان انتي الي ملك حصري
ما اعرف ابتسم على رده لو انقهر لان ما يردعه
شي عني وكأنه يملك الحق بالتصرف
باستبداد وياي
: يالله ماما ترة هذا هو بيتنا خلي نرجع مشي
: خلاص يالله شكلة حارث سالفتة تطول
لزمت ايد حسن ومشينا اني وياه
هو يحجي يومه بالمدرسة واني اسمعله
جنت على بعد مسافك قليلة عن البوابة الرئسية
لبيت الشيخ مزاحم
فجاءة صوت سيارتين سريعات مرو من يمي اني وحسن
وستدارت السيارتين ووكفن مقابيلنا
وسدو الطريق علينا ووكفت بصدمة
سمعت حسن شهك شهكة خووووف
وهناااااااااا
حصل ما لم يكن بالحسبان

ملكةه · 30/April/2018

ج 2 بارت 15
عدي : فنك تكدر تصيد هيج طير
هاك شوفه شلون خضيري (طيور ماء)
رفعت البندقية وكعدت انيشن (قناص)على الطير
صدتها ووكعت بالهوربين الكصب
ثائر: حارث هاي عليك انت تروح تجيب الطيرة من بين الكصب
عدي بهمس وهو كاتم ضحكتة
: اي مو سمطت ابو ابوه خطية ارحم بحالة
شمالك نشبت وية الولد كل ساعة مكلفة بشغلة
تهد الحيل
ولك خطية هذا بزر دلال مو مال تمسح بي الكاع
التفتت على عدي ورفعت حاجبي
: جا ما كلت لروحك هيج بيوم استلمت صاحب حارث
وغطيتة بالطين وتسوي نفسك ما تدري
ولك انت اخوي عاجنك وخابزك بيدي
انت نشبت وية الولد من اول يوم شفتة بالمستشفى سلم على البنات انت حطيتة براسك
بعد شكو جاي علية تسوي روحك حنين
انطاه البندقية
:هاك الزم هاي واجمع بقية البنادق
وخل نرجع شكل الشيخ مزاحم تعب
ويريدنا نرجع ترة هم يالله
تصيح لربعنا ولحارث وصاحبة الدكتور
بس خطية من وراك صار فراش كلة طين
خلي يجهزون نفسهم انا راح اشغل السيارة واصعد
الشيخ عدلت لفة شماغي وصعدت بالسيارة
حارث: كم مرة اطلب منك تعلمني شلون اسوي اللفة العمانية مثلك
: شنو هي مودة وانت تريد تقلدها
بس انت شكلك خفيف
وكلشي عندك طربة عرس
تركة وصعد بالسيارة
كان حارث غافل عن عدوانية ثائر معه
الشيخ : بوية ثاير
: كول جدي اسمعك
: شنو بينك وبين حارث
: ماكو شي ليش تسأل
: ما اعرف بس اشوفك دائما تتهجم عليه
عدالك عدوك موش اخوك
عدي همس : شفت يالوحش طلع حت جدي
منتبه عليك خايب دكعد واستكين لا تصير سالفتك
عبرة بحلك اليحبون

بين ما حملو عدة الصيد واحطو الطيور بصندوك السيارة
ركبو جماعتي وعدي بسيارة وجدي وانا وحارث وصديقة بسيارة
حركت السيارة وبطريق الرجعة سمعت صوت نقال
حارث
جاوب وكان المتصل سهى
لان كلها انتضريني انا جاي لتطلعين من المدرسة لوحدج مبقة شي اوصل
وانهى الاتصال وكال
: عفية ثائر استعجل شوية خطية سهى وابنها منتظريني
بالمدرسة ارجعهم للبيت
هو يحجي وياي ببرود وانا اتمنى انطي رفسة واشمرة
من السيارة اااااخ الله شكل
الوضع بينهم متطور التفتت على جدي
: شيخنا انا اريد اتزوج
: اي عالخير وعالبركة
حارث: جا انت مو تزوجت ما صارلك شهرين
: وانت ياهو مالتك رحمة على والديك اكرمنا بسكوتك
: شمالك اكلتة بكشورة
كوة لازم نفسي وساكت
حارث: منو الي ترضى تترضى تدخل شريجة
على عروس ما صارلها شهرين من اتزوجت
اخذ نفس عميق وغمض عيونة
: اللهم صبرج يا روح ولك انت تاليها وياك شنشبت
شوف اذا ما سديت حلكك
والله احطك جوة تاير السيارة واسكتك للابد
: عمي على كيفك يالوحش احنا شحجينا
وانت كمت علينا
رجع كمل كلامة وية جدة
: شيخنا شوكت ان شاء الله تحن علينا وتفتح الموضوع
: ان شاء الله بس اشوف عمها احجي وياه
........................................

انتبهت على سيارتين كطعو الطريق علينا
وجمدت بمكاني وحسن شهك بخوف
وهمس: ماما هذولي منو
جاوبتة بخوف: والله ماما اني مثلك ما اعرفهم منو

لزمت ايد حسن بحذر وقربتة علية
شفتهم نزلو من السيارة ثلاث رياجيل
وركضو بتجاهنا كانت النية وباينة على وجهم
يردون بينا الشر
اني گبل ارتديت للخلف وبيدي حسن اريد اشرد
انطيتهم ظهري واجيت اركض وبعدني مراكضة
واحد مهنم بحركة خفيفة جنة فهد
خمط حسن من بين ادية واني ظليت لازمة ايد
ما تركتها
وعطت بخوف : لا يمة حسن
وكمت اعيط بصوت عالي وكلي امل الناس يسمعون صوتي ويجون يلحكوني (ينقذوني)
بقيت لازمة بيد ابني كلش قوي
وهو رفعة من خصرة من الكاع
و حسن من خوفتة جلب بشالي وسحبني وياه حسيت راح اختنك
وهو يصرخ
: ماما ماما لاتعوفيني
يمة حسن شلون اعوفك مستحيل
بس جانو رياجيل واقوة مني ومن ابني
واحد منهم
انطاني دفعة وكعتني بالكاع
وحسن شاف الموقف صرخ مفجوع : حيوان لا تضرب امي
وكدرو يفرقونا وهو سودة علية من حلات روحة ظل
مجلب بالشال لحد ما سحبوه مني هو وشالي
وصعدوه بسرعة بالسيارة وهو يعيط
واني كوة كمت من الكاع من ورة الوكعة
حركو سيارتهم وانطلقو بسرعة
واخذو مني ابني
وصرت اركض وراهم مثل المخبلة حسيت بروحي راح اتخبل لك حسسسسسسن
ولك يمة حسن
رجعولي ابني الله لا يوفقكم
ومن القهر والخوف على ابني ماانتبهت على نفسي
بلا حجاب
صرت اعيط واخذت الطريق كلة اركض بس كانت السيارة شوية شوية تختفي عن الانظار
جان وقت ظهر وحارة وصرت امشي واترنح
بالطريق بوقتها حتى الدمع شاط وهجرني
وصوتي اتجرح وطبك من اثر الصياح وراهم
وصرت احجي همس ابني
هنااااك واشوف سيارة جيب جاية بتجاهي
وكفت فجاءة انفتح باب السيارة
ونزل منها رجال يركض بتجاهي ركزت عليه
جان ثائر يركض واوبن عمي حارث يركض وراه
وسمعت اصوات زلم بس ما انتبهت عليهم جان
كل همي اوصل الهم واكللهم لحكو على ابني خطفوه
........................
راجعين بالطريق وبأول دخلتنا على منطقتنا
واشوفلك مرية مفرعة ماعلى راسها

حجاب
تركض وتأشر بيدها مثل الي واكعة بشدة
وتحتاج احد يفزعلها
ردت اموت بدمي من اقتربت سيارتنا عليها
وعرفتها اي هاي سهوة
لا يالله تركض جنها وحدة مسلبيها
وكفت السيارة وصحت بصوت عالي
: لاااااا يالله. الا سهوووة والله اموت
اذا احد معترضلها
نزلت من السيارة اركض بتجاهة
واسمع من وراي ربعي واولاد عمي فزعو
وياي
اقتربت منها ونزعت شماغي وخليتة على راسها وسترتها
وانا احجي وياها
: احجي يسهوة منهو اتعدة عليج واتجرأ
ينتهك سترج
: همست بتعب وخوف وهي اتأشر عالطريق
مثل المجنون : ثائر خطفو مني ابني حسن الحك عليهم
لا يسوون بي شي
وكملت بتوسل : ثائر نخيتك انا بشاربك رجعلي ابني
شفتها گعدت بالكاع عالتراب
مسلوبة القوة
صحت على ربعي وعدي حتى يرجعون
يتبعون اثر السيارة بلكي يلحكون عليهم
التفتت عليها واجيت اشيلها من الكاع وحسيت على ايد لزمت اكتافي
حارث: من بعد اذنك يثائر ترة انا اولى بستر بنت عمي تنحى شوي وغض بصرك عنها
شفتة شلون لمها لصدرة وكومها من الكاع وكعد يسندها
اجيت انطيه لطمة على حلكة من ورة حجايتة وياي
اخذت نفس حتى اتمالك نفسي لان الوضع مو مال
اتعارك وياه
باوعت عليها شلون ترجف بضعف
: سهوة منو هذولي الي اخذو ابنج تعرفينهم ؟؟؟
:لا ما اعرفهم مشايفتهم من قبل ؟؟
جانت تحجي بصوت خاوي
وصلنا لبيت عمها وجدي اجة ورانا ودخلنا
كلنا بالاستقبال
وكعدها حارث وصاح للبنات
اجتي امها تعيط وتلطم على خدها
وعذراء دخلت وبيدها كلاص ماي وشربتها
وهذا كلة وسهى مو واعية ولا حاسة بالي جاي يدور
حولها
رجعو الشباب وعدي
: ماكو مالهم اثر ما كدرنا نوكع على شي يوصلنا الهم
شكلهم فص ملح وذاب
ناصر وهو يضغط على ايدة بعدة الجرح ما مبري(يشفى) كال
: ماكو غيرة هو جاسم الي يتجراء وياخذ الولد
محد عندة مصلحة بخطف حسن غير جاسم لان هو هددنا بذاك اليوم الا ياخذة
اسمع بكلام ناصروعيوني على سهوة وحارث اتمنيت
ارتكب جريمة بجاسم وحارث واخلص منهم اثنينهم
واريح كلبي من هذا العذاب
طلعت برة من بيت عمي واولاد عمي وعدي وناصر وحارث طلعو وراي
عدي: كول وحش على شنو ناوي
طلعت النقال واجريت اتصال على جماعتنا وامرتهم
: اريدكم تجيبولي جاسم من جوة الكاع
اريد كون ما تغرب شمس الا وجاسم جوة رجلي
نهيت المكالمة
: ما راح اكدر اسوي اي شي الا اوكع على جاسم
صرت احوم واتگلب وسمعت عذراء صاحت لحارث
من ورة باب البيت
: حارث الحك سهى اتخربطت واغمى عليها
انتبهت عليه طفر من مكانه بخوف ودخل جوة البيت
وانا
احوم ما اعرف اوصللها واطمنها على ابنها
وهذا يسرح ويمرح براحتة
عظيت ايدي من القهر
صار حالي مثل العطشان
والماي كدامة وايديه مربطة
ما يكدر يساعد روحة ويروي عطشة
ورة ساعة اجاني اتصال من جماعتنا
كدرو يلزمون جاسم
رحنا كلنا على المكان الي حابسين بي جاسم
وصلنا وانا اعاين على هذا حارث كل ساعة يتصل ويتطمن على سهوة ويعلم بعذراء شنو تسويلها اذا كعدت
كلما يطري اسمها على السانة انا اقبض على المقود
بقوة صرت اتخيل المقود رگبة حارث
من القهر
وصلنا للموقع
ودخلت على جاسم ولزمتة وخنكتة (الخنق )
من ثوبه
: ولك يالناقص يالعار شلون تتجاسر وتسوي هيج سواية
جا شعدالك تخطف الولد واخليك تنفذ بجلدك
خايب اوصلك لوجنت بسابع ارض
نفض ايدي من ثوبة ودفعني
: خايب شني ثاير تسودنت انت عن ياولد جاي
تحجي
: لا تسوي نفسك ماتعرف على شنو جاي احجي
: شوف ولك تحجي عدل وبدون الغاز هسة تكلي
على شنو داز علية جلابك و جابوني مربط هنا
اكدر اعرف منو سمحلك تتجرء تسوي هيج وياي
هديت عليه
: شوف جاسم ترة احنا كلنا ندري انت ورة خطف حسن ابن اخوك من امة
شفتة جمد بمكانة وانخطف لونة مصدوم
: شلون ولك ثائر شكاعد تخربط ابن اخوي انخطف
هد علية يريد يخمطني ولزموه الحرس
وصار يتدافع وياهم بغضب
: ولك ثاير احجي منهو الخاطف ابن اخوي اليوم احرك عشيرتكم اليوم شيخلصكم مني
ولك انا اعوف ابن اخوي امانة عندكم
اجي الكاه مخطوف اليوم اخليها دم للرجاب
جمدت واكف بمكاني مصدوم من حجي جاسم
وصرنا انا وناصر والشباب واحد يباوع بوجه الثاني
وعلى وجوهنا علامة الاستفهام؟؟؟؟

: يعني اذا مو انت خاطف ابن اخوك
جا ياهو
جاسم بغضب وهو مجتف :
: ولك خايب ليش اخطف ابن اخوي
وانا الي الحق اخذة شوكت ما يطري على بالي
شني قابل اخاف منكم واتصرف مثل الحرامي
واهطف ابن اخوي وهو لحمي شمالني قابل تسودنت
: جا منو غيرك الة مصلحة

: ولك انا لو جانت عندي هيج نية جان من اول يوم
اخطفة واخليكم تحلمون تشوفونة
موش انا الي يسوي سوايا
الخنيث انا من اريد الشي اجي اخذه
جدام الكل وغصب عالكل
لان انا اولى واحد بتربية ابن اخوي
بس مو بهاي الطريقة
اريد اخذة وهو راضي
ترة انت موش احرص مني على ابن اخوي
هذا لحمي ودمي وهذا الابن الي ما رزقني الله بي
يحجي بحركة گلب
ناصر: ولك راح اتخبل شلون اجت سيارتين متقصدين
ياخذون الولد من امة

:خايب انا ما اخذتة بذاك اليوم من حضن امة

لا ما گدرت اشوفة متلوع على امة
وقبلت يبقى عندها
وانت هسة جاي تتهمني
حتى تغطي على خيبتكم
لان ماكدرتو تحافظون عاالامانة
والله ثم والله اذا ابن اخوي صار عليه شي
لو اعرف اخر نفس بحياتي كون افنيكم فني

انطيت اشارة للحرس يهدونة
وكعدنا كلنا سوية ومسحت وجهي بجف ايدي
: شوف جاسم احنا لازم نترك خلافاتنا على صفحة
ونتعاون سوية حتى نكدر نوصل للي
خطفو ابن اخوك ترة هو هم بحسبة ابنا
ناصر: جاسم بالله اتذكر ما عندك عداوة ؟؟؟
جاسم : عندي هواي عداوة وطلايب وهاي وحدة من الاسباب
الي خلتني اوافق على ابن اخوي يبقى عندكم
بس ما اضن لان محد بالسلف يكدر يتجريء يسوي
هيج وياي
لان يدرون كلش زين انا ما راح اتردد
بذبحهم واشرب من دمهم
اباوع لجاسم شلون يحجي بحركة گلب
على ابن اخوه
وعرفت انه صادق بكلامه
و ماله يد بخطفه
قررنا نبحث بكل مكان ونسأل
واتقسمنا لمجموعات
وحرصت ان نكون انا وجاسم بنفس المجموعة
حتى يبقى جوة عيني واكدر اراقبه
لان بعدني ما مطمن من ناحيتة
واخاف هذا كلة يطلع تمثيل ويغدر بينا
ورة ست ساعات من البحث المتواصل
بالمراكز المستشفيات وحتى بالاماكن المشبوهة والمشكوك بامرها هم بحثنا
بس ما وكعنا على اثره
وما بقى مكان ما بحثنا بي
وجاسم جان مرابط وياي ونتواصل وية البقية
اول باول
بعدين كلنا التقينا بالمزرعة حتى نفتهم شراح نسوي
وبهاي الاثناء اجة اتصال لجاسم
گلب كل الموازين وخطف لونه
جنت اراقب وجهة وحركاته لان ما زلت
مامرتاحلة
ومن انتهى الاتصال
باوعتلة كعد عالكرسي ودنك راسه
وحجة بصوت ناصي مهدود الحيل
: لكيت حسن ابن اخوي
؛ شنو وين لكيتة احجي منو اتصل عليك
: طلعو الخاطفين من عشيرة ال .......
وهذولي يطلبوني بثار
اتصلو علية بعد ما امنو على حسن وتاكدو انو
ما راح نكدر نوصله لا انا ولا انتو

: والمطلوب شنو يردون منك فدية انا حاضر
: لا مو فدية المطلوب انا اسلم نفسي الهم مقابل يرجعون حسن
ثائر انخمط گلبي ودب اليأس لداخل گلبي
لان اعرف كلش زين لايمكن جاسم يسلم نفسة للعشيرة

نهضت من مكاني وهديت عليه ولزمتة من ياختة
: ولك جاسم اربطك واحطك بالصندوك وانا اسلمك
بيدي الهم
نتر ايدي من ثوبه
: خايب وحش ما يحتاج تربطني انا رايحلهم برجلي
شنو قابل اخاف منهم عندي عمام وعشيرة تطم عين الشمس
اباوع عليه عض على ايدة بقهر
ااااخ الله شكلهم كدرو يلزموني من ايدي التوجعني
من درو بية اعز شي على گلبي ولد الغالي
وشي اكيد وصلتهم اخباري بيوم كعدت اهددكم
واطالبكم بي حتى يعيش عندي

انتبهت عليه نهض من مكانه
واحنا كلنا كمنا وياه
اشر النا
: لا انتو ظلو هنا لاتجون وياي
هاي مشكلتي وياهم لوحدي وانا راح اواجهم
التفت على اخوه وكمل كلامه
: شوف خوية انا رايح انت اتصل على جماعتنا
خلهم يجون
ناصر نهض : صحيح مشكلتك وياهم بس لا تنسى ابن اختنا عندهم ولايمكن اخليك تروح ليغاد
بدوني
ثائر وعدي وحارث :اخذنا وياك رجلنا على رجلك
.............
الدنيا شكد غريبة عجيبة
جاسم مجرم ويتعامل كلة
بالحرام وما يهاب احد والناس كلها تصيح منة الغوث من ورة عمايله وما عندة واحد يردعه عن طغيانه
بس بيوم وصلت السالفة لدمه ولحمه
صار انسان بلا حول ولاقوة
جداً ضعيف وخايف عليهم
وهاي النظرة اول مرة بحياتي اشوفها بعيونة
ثبتتلي مصيبة جاسم
ان لكل شخص عندة نقطعة ضعف
تخلي مثل المقيد يقف امامها باستسلام
..........................

بطريق المدرسة
: ماما حسوني على كيفك لاتركض سريع لا توكع
حارث : عوفي خلي براحتة
اباوع عليه قلل من سرعتة وصار يمشي بصفي
بخطوات توازي خطواتي
مامصدكة انا من قبل شهرين عدت علية
بنفس هذا المكان من الطريق اسوء لحظات بحياتي انخطف ابني
وما انسى لحظة الفرحة بيوم دخلو علية ناصر وحارث
و بيدهم حسن
وصرت اكمز مثل المجنون ممصدكة الي تشوفة عيوني
بيومها عرفت ان مو جاسم الي خطف ابني
طلعو عشيرة عندهم ثاروطلايب وياه همة الي خطفوه
وهددوه ان يسلم نفسة الهم مقابل يرجعون حسن
وحسب كلام ناصر
يكول احنا استلمنا حسن ورحنا
وعلكت ورانا بالسلاح وصارت جبهة بين العشيرتين واتصوب جاسم
بعدين سمعنا ورة ثلاث ايام جاسم مات
قشعر جسمي من عرفت بالخبر
الثار والعشاير حالة صعبة
وقف امامه القانون عاجز عن
فرض السلطة عليهم
الى يومنا هذا مجتمعي يعاني من هذا الوضع
كان قانونهم اشبه بقانون الغابة
بس ما اعرف ليش ما استغربت ان جاسم انقتل
لان الي يمشي بمثل طريقه راح تكون نهايتة
مؤكدة القتل لا محال
(((((((((((((()))))))))))))
حارث: انطيني جنطتك عنك خاف ثكيلة
ابتسم بوجه : اخذها وخلصني منها متروسة كومة كتب
كسرت ظهري
ابتسمت على كلامه
وسمعنا صوت عدي وثائر جانو يمشون بتجاهنا
واقتربو من عندنا وسلمو على حارث
وعلية
رفعت راسي واجتي عيوني بعيون ثائر
كانت كلها غضب وغل
حتى ما سلم علية
احس بي يريد بس حجة حتى يتعارك وية حارث
ثائر بغضب: اكول انت شنو ثور لو دكتور
حارث باستغرا

ب : هَـا ليش هذا الكلام يثائر
ترة ازعل والله
: خايب وزعلتهم عاد هسة عليك الوسفة
شلون اكلك بنتي صفحتها توجعها
وتبجي منها الليل كلة
تكلي مابيها شي هذا شوية نغزة غازات
وبعدين اخذتها لدكتور بالمدينة
وسوة سونار طلع عندها التهاب بالكلة
حارث اتضايق كلش من ثائر وحركاتة الي وصل حدها
: ثائر اريد اسألك سؤال
انت ليش كلة تحجي هيج وياي
عدالك كاطع ليلة عرسك
بس فهمني انا متعدي عليك ؟؟؟
اشودائماً اعاملك بأحترام مثل اخوي ناصر ولا فد يوم
قللت من قدرك ليش انت دائما تحاول تحط من قدري
ترة تصرفاتك مالها مبرر
: لا ماكو هيج حجي جاي تتخيل
اخاف انت عندك هواجس حتى لا انافسك على شي عزيز عليك
عدي يهمس بأذن ثائر- خايب وحش
اكصف الشر وخلينا نمشي
ترة عيب وكفتنا بالطريق
خطية البنية ماعت من الحر
خزرت عدي
: وانت شكو تعاين عليها
وشدعوة عليك هيج مركز وياهة
وعرفتها ماعت من الحر
سحبني عدي من زندي بالكوة
وكملنا طريقنا وتركنا حارث وسهوة ورانا يمشون
عدي: لا انت صاير ابد مو طبيعي
وما تتحاجة شبيك ياخوي
لا تخلي عصبيتك وتصرفاتك تخونك
عفتة وفتت للبيت والنار كايدة بصدري منها
((((((((((()))))))
كملت اوراق السفر مالتي اني وامي
بس حسن مقبلو اهل ابوه يسافر
وصار الخوف يوم عن يوم يكبر بصدري
وصارت الافكار تاخذني وتجيبني
اتصلت على سارة صديقتي
حتى اتحمدلها السلامة على ولادة ابنها
وكعدنا نحجي ونسولف وبأثناء الكلام
فتحت موضوع حسن والسفر ومخاوفي
سارة: طبعاً الحل الوحيد لمشكلتج ان تتزوجين
حتى تضمنين عدم سفرج للخارج بعيد عن ابنج
: زين شلون اكتب اعلان اريد اعرس
لو اطلع اجدي واصيح يا ناس ياعالم اريد عريس
ساعدوني رحمة الله والديكم
سارة: تدرين شكلج يصلح تصيرين مجدي
: لا والله يعني شنو برأيج اسوي
اشو امي كضت عمرها كلة تدور على عريس مناسب الي وماحصلت
: والله يا اختي ما اعرف شنو اكول مشكلتج حلها بس
يم الله هو الي يحن عليج
............................
فعلاً وكأن الله استجاب لدعائي
اليوم سمعت عمة منتهى تحجي وية عمي وكالت
اكو ناس يردون يخطبون لابنهم وانا كلتلهم عدنا مرة
قاسم : شوكت ومنو هذولي الناس
: بالفاتحة مال جارنا من رحت ازورهم
امهم كالت عندي ابني مرتة توفتً
اريد ازوجة لان جهالة شلو حالي
وانا حجيتلها عن سهى وهي كالت والله ياريت
نتشرف بيهم وبنسبكم
وكلت انطيك خبر انت وسهى حتى اشوفكم شنو تكولون
حتى اذا توافقون انا اتصل عليهم
ويجي هو وامة واختة يشوفونها
انا گبل مثل الي مدلي حبل النجاة
كلتلها موافقة
عمو قاسم كال : همة خوش ناس والولد حباب
يالله بالله اتصلي عليهم خلي يجون

(((((((((()))))))))))
جنت محضرة نفسي علمود راح يجون الناس
يشوفوني واشوف الولد
وعذراء ونور ساعدوني
وكعدنا ننتظر وعدت الساعات والناس ما اجو
بعدين اجة اتصال لعمة
منتهى من اهل الولد يعتذرون ما يكدرون يجون
وانلغت السالفة على الاساس ابوه خاطبلة بنت خالة
عذراء: اي وين جانو حضرتهم يعني ستوهم اتذكرو بنت خالهم من الله ياخذهم
حضنتني من كتفي وكالت
: ولا يهمج لا تزعلين همة الخسرانين
: اني اصلا ما ميتة عليهم ولج اني اريد بس اجلب بَــأي واحد حتى اضمن بقائي يم ابني
ليش ربي هي هيج صعبة اتزوج وانستر
صعدت فوك
وسمعت نقالي وصلت له رسالة
تركتة وبدلت ملابسي ومسحت وجهي من الميك اب
وغسلة وصعدت يمي عذراء حتى تغير علية جو
وبهاي الاثناء رفعت نقالي وكعدت اكلب بي وشفت الرسايل واصلتني
عدلت كعدتي وركزت نظري عالشاشة هذا رقم ثائر
فتحت الرسايل
وكان المضمون
(( شوفي يسهوة انسي تاخذين واحد غيري
نجوم السما اقربلج
كدامج وحدة من الثنين لو توافقين عالزواج مني
لو تبقين هاي ظلتج يم امج وهسة هذا عريس
التحفة زحلكتة وطفشتة منج
بالله راويني شراح تسوين ))

كمزت من مكاني وانا ما شوف من الغضب
عذراء يتسائل
: اسم الله الرحمن شبيج كمزتي شكو
: لا بعد ما راح اسكت لان حيل مصخها وياي
واليوم لو اني لو هو
رحت فتحت الكنتور وطلعت العباية ولبستها
: عذراء لبسي عباتج وتعاي وياي لبيت جدج الشيخ مزاحم

عذراء وهي تلبس عبايتها
: اوكفي ولج انتظريني شتسوين رايحة هناك
: ما عليج انتي اليوم راح احط النقط عالحروف

ملكةه · 30/April/2018

ج 2 بارت 16
عذراء: ولج سهى صبري هسة هي غير
تفهمني شنو السالفة
عفتها تحجي واني عقلي قفل
رحت وفتحت الباب ودخلنا على بيت جدهم
دخلت عليهم شفت ثائر وجدة ورواء اجتي ورانا
واتقدمت من عندة
وانتبهت على زوجتة فاطمة
كاعدة تدرس وية سرى
ثائر نهض من مكانه متفاجيء
: سهوة!!!!
: شوف ثائر هاي كدام جدك هاي اخر مرة اكلك
ابعد عن حياتي وجوز مني
ترة والله مصختها
التفتت لجدة
شيخنا تقبلها كلما تجيني قسمة
يكوم ثائر يعرقلها بوجهي ويشرد الخطابة من الباب
ليش هيج يكسر بختي
التفتت عليه
ترة لا اني بنت عمك ولا اعرفك ولا تعرفني
ترة انت ما تملك اي حق علية
حتى تسوي هيج وياي
: لوتموتين وماجوز منج

انتبهت على عذراء حطت ايدها على حلكها متفاجئة
بكلام ثائر
: مو بكيفك
ولو تبقى انت اخر شخص عالارض ما راح اتزوجك
وان كان قبل عندي اقتناع بيك واحد بالمية
هسة من شفت زوجتك
صار مستحيل اقبل بيك
افهمها من الاخير انا مو الك
استسلم للامر الواقع وارضى
بالقسمة والنصيب

ظل يباوع بوجهي مصدوم من كلامي
ولم قبضة ايدة وشفت وجها صار احمر من الغضب وعض شفتة وكوة لازم روحة كدامً
جده ما يسوي شي
ثائر : شوفي يسهوة انا جنت متمسك بيج لحد اخر لحضة لاجل الوعد وردتج تصيرين حلالي لكن بعدما سمعت هذا الكلام منج
احب اكلج روحي يبنت الناس
النفس طابت منج واخذيها مني كلمة
بعد ما راح اتعرضلج
ولو تبقين بس انتي مرية على وجه الارض ما اتزوجج
كلشي ارضاه منج الا الذل والهوان
هذا الي صعبة اقبلها على نفسي
كرامتي فوق كلشي
شفتة كام بغضب من وطلع من يمنا
الجد: هذا هو بنيتي الج التردينة
بس انتي ما تمنعينا من المحاولة
عقدت حاجبي بتسائل شنو يقصد

التفت لعذراء : عذير اخذي بنت عمج ورجعي لبيت ابوج
وكلي لابوج الباجر جدي الشيخ جايب
شيوخهم وجاي
ماافتهمت شنو يحجي
معقولة اني اتجاوزت بكلامي
وراح يشتكيني لعمو قاسم
حسيت على عذراء سحبتي من ايدي
وطلعتني برة
: ولج من عزة العزاج شلون تتجرئين وتحجين وية جدي هيج
ماكو حرمة تعلي صوتها على الشيخ مزاحم وانتي سويتي شين بهاي سوايتج
ما اكول استلمي الي راح يجيج
: والله ابد ما متندمة على الشي الي سويتة كان لازم احط حد من زمان لتدخلات ثائر بحياتي
..................................................

سجلت فاطمة بمدرسة سرى بنتي وخليتها تكمل دراسة
شفتها صارت مثل العصفور الي جان مكسور الجناح
ومن يبدي يشفى جرحه يبدي
شوية شوية يفرد جناحه حتى يطير حيييل بيها شبه من بنتي بالتصرفات
يعني شيصير لو الواحد ينطي شوية امل وفرصة
لهيج انسان ضعيف
الشيخ يباوع عليهن : ثاير صدك ماكلت وين وصلت بسالفة ابن عمها بيوم طلعتة من السجن

: شيخنا فضيت السالفة وياه وصارت كلها مسألة. وقت
: كفو منك يالذيب ترباتي واعرفك زين
ما ترضى عالعوجة

اتذكر من جابولي الولد الشاب ابن عم فاطمة مجتفينا
كسر خاطري لان محد يحس بناره غيري
طلبت منهم ان يطلعون ويتركونا لوحدنا
وصرت اباوع عليه وهو بنفس الوقت
بادلني النظرات كان جسر
وواضح عليه عنفوان الشباب
: انت وين جنت عن بنت عمك
من خطبناها
: جنت منتظرها تكبر واتزوجها لكن ابوك
حرج عمي بالديوان واستحى يردة
مثلما تعرف انتو ناس الواحد يتمنى بس بناسبكم
: زين ليش انتظرت يصير العرس يالله
اعترضت

: جنت ملتحق طول هاي المدة
ومن نزلت صادف عرسها واني اجيت اتخبل
هو يحجي وبدة ياكلني
احلفنك بالله خوما اقتربت منها
: واذا جنت مقترب شراح تسوي
: انا اعرف فاطمة بنت عمي من هي وصغيرة
ربت كبال عيني
ما راح تقبل بيك شوف حالك انت حتى اكبر من ابوها
سكتت
: زين شنو حلها
: طلكها وانا اتزوجها ما ينرادلها كلام
: زين وعشيرتك وعشيرتي والناس
والمجتمع شراح تجاوبهم
: انا ما مسوي حرام ترة لاني اول واحد
يتزوج مرة مطلكة ولا اخر واحد
: هَـا يعني انت تشوف هيج
عادي عندك تضرب بالعادات وحجي الناس بعرض الحايط وتتزوجها
: ليش هو من شوكت الستر صاير حرام
واذا جان عن كلام الناس وداعتك عمي
ارضائهم اخر همي
مالي غرض بكلامهم شيردون يحجون خل يحجون همة شوكت سكتو حتى يبدون يحجون

جنت متعمد استفزة بكلامي والاسئلة
ردت اجس مايه من ناحية بنت عمة شنو
هو صدك يحبها لو نزوة مراهق وتعدي
اريد اضمن مستقبل البنية اذا عتقتها لوجه
الله تعالى وطلكتها
اتأكد منة انه راح صدك يتزوجها ويستر عليها
وما ينكسر بختها و لاتبقى معلكة ومركونة بسبب
الاعراف والقوانين السادية بالمجتمع
: شوف يااا... شنو كتلي اسمك
: اسمي محمد
وينادوني حميد
: شوف حميد الك التريدة
بس بشرط ما اكدر هسة اطلكها
لان مثلما تعرف اذا طلكتها
هسة راح الناس تاكل
وجها وجه ابوها بالكلام وانت تعرف العالم الماتخاف الله ما ترحم
فكل الي اريدة منك تصبر علية
سنة تبقى عندي
منها تن

تظرها شوية تكبر ومنها هاي مهلة اكدر
اخليها تكمل دراستها وية بنتي
والك وعد مني ابقى محافظ عليها لحد ما
تصير من قسمتك ها شكلت
شفت الولد كام طفر من مكانه وحضني من الفرحة والله انكسر كلبي عليه
انا اكثر واحد يعرف شلون تكون لوعة المحبوب من يتخيل حبيبة بحضن غيرة
يمكن ينطعن باليوم الف طعنة سببها الحسرة والالم

(()))

حارث : عذراء سهى تعالن
عذراء : شكو ليش تصيح
سهى: هلو حارث الله يساعدك
حارث: باركولي اتعينت
عذراء: كللللوووشش
سهى: واخيرا اتعينت يعني اكدر من هسة اكلك الف مبروك على الزواج
حارث بفرحة: اي والله ان شاء الله باقرب فرصة افاتح ابوي بالزواج واخلي يخطبها الي لان متنا من الانتظار
((((()))))
نور: عفية سهى اليوم لا تتاخرين حتى نروح
للسوك نكمل شغلات الجهاز مبقة شي على عرسي

: ان شاء الله حٍٍِْــًبٌٍـــِٓېٍٓ اذا قبل المدير اليوم ينطيني اجازة
اجي بس اذا ما كدرت اخذي امي وروحي
رحت للدوام واني افكر بموقفي مع ثائر وجدة
وكلام عذراء اقلقني
يعني شنو يريدني ابقى متكتفة وعاجزة امام تصرفات ثائر والوقت ديروح من بين ايدي واخاف افقد ابني
دخلت للمدرسة وانطيت حسن مصرفة وجنطتة وانطلقت بيومي المدرسي
...........................
الشيخ: شوف بوية ثاير اليوم راح اخذ الشيوخ
لبيت قاسم واطلب بنت اخوه منة
ثاير انتفض: لا جدي ما يحتاج
انسى الموضوع بعد ماعاد بيني وبين سهوة قسمة
ونصيب
: خايب جا انا بكيفك
كل يوم طالعلي بسالفة يا زوجوني ولاتزوجوني
ولك مو عدالك كبرت وما اكدر عليك
ترة اعلكك فلقة وانطيك بالعصا على رجليك
واخليك شهر مگرم
: جدي ترة انا الي راح اتزوج ترة هي مو بالكوة شوفت عينك البنية هم ما تريدني ولا انا اريدها كلمن يروح
بطريقة
: خايب روح كوم من جدامي لا حلت بركة بيك انا اعرف شسويت بدينيتي حتى الله يبلاني بيك
شوف ولك هي كلمة وما تصير ثنين
انا انطيت خبر لقاسم وكتلة يستعد اح جايين انا والشيوخ
وعودك خلي زلمة يكسر كلمتي
شفتة لبس البشت وعدل عگاله وطلع
طلعت من بيتنا
واتوجهت على مدرسة سهى حتى انتظرها يم الباب
اريد احجي وياها
.......................

سهى واني بالدوام اجاني اتصال من عذراء وهي تعيط بفرحة
ولج سهى واخيرا اجوج ناس يخطبوج
: شنو منو
: ولج الوحش بذات نفسة طلبج من ابوي
هسة وهسة الشيخ موجود وطلبج من ابوي
عقدت حواجبي واني اكول وحش اني سامعة بهذا الاسم
بس منو سمعت صوت الجرس دك
: شوفي عذور اني هسة عندي درس فد ساعة ويخلص الدوام اريدج تفرغين نفسج وتكعدين تحجليً
بالتفصيل الممل عن الوحش وكلشي عنة وشكلة وطولة
عذراء باستغراب: ولج سهوة شبيج شنو السالفة
جا شحال لو ما تعرفينة حق المعرفة
: ست سهى الصف مالتج هوسة روحي سكتيهم لان شعبة أ عندهم امتحان وصفج جاي يأثرون عليهم
: يالله عذراء اني رايحة بعدين نحجي يالله مع السلامة ا

خلص الدوام
واني افكر بكلام عذراء معقولة الله استجاب دعائي
راح اتزوج
بس لحظة الوحش
اي صدك هذا مو نفسة الي ذاك اليوم البنات جانو يحجون بي اي بس صدك هو شنو اسمة
شي اكيد عندة اسم مامعقولة
جده مسميه الوحش
اهووو ونوب البنات كلها تخاف منة ومرعوبات
الي اعرفة ان هو الايد اليمنى لجده
والامر الناهي بعد جده
وكلهم يسولة الف حساب
زين اني شعجب ما صادفتة ولا سامعة بي
الا من حجو بي البنات
شكلة ما عايش هنا بالمنطقة لان حسب كلامهن
هو هواي يسافر حتى يدير شغلهم
بس خلي اوصل للبيت حتى اكرص بعذراء واخليها تحجيلي عنة
ابتسمت بخباثة وحقد زائد قلب خافق
اريد اوافق عالوحشش وما اريد اوافق
شي اكيد هو من قرابة
ثائر يعني راح اظل اعاني واشوف ثائر كبالي
واريد اتزوج الوحش لان راح تنحل كل اموري بزواجي منة
وخلي نشوف استاذ ثائر شراح يكدر يسوي وية هذا الي
اسمة وحش
هم يطفشة لو يزحلكة ھٍَھٍُھَ
حتى ما يودي ورة الشمس
: يالله حسن خلي نروح
طلعت بالباب وانتبهت على ثائر نزل من سيارتة واجة بتجاهي
معقولة سمع بالخبر وجاي يحذرني حتى ارفض
جان حسن يلعب قريب مني وية الاولاد
شفتة اقترب وكف كدامي
خزرتة : ثائر !!!شتسوي منتظرني بباب المدرسة

: سهوة عندي كلام وياج اريدج تسمعينة
بخصوص موضوع الخطوبة جدي راح هو والشيوخ
لعند عمج حتى يطلب ايدج
: ها يعني وصلك خبر خطوبتي
لاتكول جاي تباركلي
: اي عرفت من جدي وهو كال غصبن عليك
اروح اخطبها شوفي وانا من هسة اكلج
احسنلج رفضي ترة ما يحصلج طيب
: لا ما حزرت
اني من هسة اكلك راح اوافق
على طلب جدك
: شوفي ولج قسما بذات الله اذا وافقتي
على الزواج الا اسود عيشتج
شعجب شغير رايج
: غيرت رائي لان مبقى شي عن سفري وحسن راح يضيع من ايدي
وانت ما راح تكدر تجبرني عالرفض
وهالمرة اتحداك تكدر تزحلكة
لان هذا الوحش مو اي واحد
ععقد حواجبه بتسائل شتقصد هاي
: شبيج سهوة شتحسين
انتي تعرفين منو الوحش حتى جاي تحجين بي
: طبعا شلون ما اعرفة والكل تحجي بي
اني ما يهمني الشكل اهم شي عندي الاخلاق ويك

ون رجال يكدر يحميني
: خايبة سهوة تحجين الصدك لو تجذبين
لا تخبليني
انتبهت على حارث اجانا من بعيد
وهو يبتسم
التفتت عليه حتى اختم كلامي
: عفية ثائر لا تسويلي مشاكل
هو كلشي بالقسمة والنصيب
وصل يمنا حارث وانتهى الحديث
مختوم بكلام ثائر: والله ثم والله اذا وافقتي
عالزواج راح اسعي اسودكل يوم بحياتج وياي
لان سويتيني مثل اللعبة بيدج
يا اريدك يا ما اريدك والله حيرتيني وياج
...............................
وصلت للبيت
ورحت صعدت فوك وبدلت ملابس حسن وغيرت ملابسي واني افكر بكلام ثائر
ما اعرف انقهر منة مدري عليه كضة عمرة وياي كلة تهديد
نزلت حتى نتغدة
واجاني عمو قاسم
: هلة بوية سهوة شلونج
عرفت بي يريد يفاتحني بالموضوع
: اليوم اجاني عمي الشيخ هنا عدنا حتى يطلب ايدج
وانا كلت اسألج
ما اعرف ليش من صارت صدك ووصلت للعظم
بديت اخاف
اي خايفة اذا وافقت عالزواج
راح انهي اي امل بحٍٍِْــًبٌٍـــِٓېٍٓ وية ثائر
بس على الاقل راح اضمن حسن ابني
وما اسافر هو لازم اختار بين ثائر وحسن
واني كأم راح اختار ابني
: عمو اني موافقة
: الله يبارك بيج بوية وتستاهلين كل الخير وثائر رجال معدل وراح يصونج وسعدج
لحظة لحظة اني يمكن سمعت غلط
: عمو شنو لحظة شنو كلت
: الف مبروك عليج
: لا قصدي شنو اسم العريس
عذراء : يالفاهية اسمة ثاير ويصيحونة الوحش جا انتي شمالج الله مخسبك حالج من دون الوادم
بالمكلوب
احجي وياج بالنقال اريد افهمج وانتي تكمزين
: اوكف عمو ثائر مو اتزوج مصارلة هواي وبنية صغيرة شلون ترضاها ادخل زوجة ثانية على بنية
صغيرة مصارلها هواي من عرست
عمو اسألك بالله مسألت نفسك هاي الطفلة المكرودة وين تروح
: ترة يابعد عمج ما بيها شي وشكل الولد شاريج وانتي شوفت عينج ما عندج غير خيار حتى تضمنين ابنج يبقى بحضنج
تركتهم وصعدت فوك ما اتغديت
يعني معقولة الي جاي يصير وياي
احس بروحي عايشة بدوامة شكاعد يصير وياي
يعني ثائر هو نفسة الوحش
من الله ياخذج يسهى على هالدكة
يعني هو جان منتظرني حتى يحذرني من الموافقة عليه واني مديت اللسان عبالك ميتة عليه
مستحيل ابني سعادتي براس طفلة صغيرة كلشي ما شافت من الدنيا واكسر بختها
حرت شنو اختار ابني لو مستقبل البنية

دخلت علية
امي وما اداراك ما امي هي من غير كلشي جانت ناشبة وياي حتى تزوجني مو نوب اجاني شخص
هي جانت بسرها تتمناه يكون من نصيبي
وكعدت تقنع بية واني معندة لان كلما اريد احاول تجي صورة البنية الصغيرة فاطمة كبال عيني
...........
جنت اني وعذراء كاعدات العصر وهي تحجي وياي
تريد تقنعني على الموافقة
واني خايفة ما اعرف شنو اقرر وعمو بعدة ما ردلهم الخبر وامي حجت وية اخوتي وفرحو خصوصاً من عرفو بثائر هو العريس
:دخلت علينا رواء واتفاجئت من دخلت وراها زوجة ثائر سلمنا على بعض وهي بعينها كلام
فاطمة: عمة سهى عن اذنج اريد احجي وياج بسالفة
بيني وبينج تكدرين تاخذيني لغرفتج
اتعجبت على كلامها مو عبالك طفلة صغيرة
بس شكل بناتهم هنا يكبرون قبل اعمارهم بحكم اهلهم والعادات
اخذتها وصعدنا فوك واني ميت الف سالفة براسي
سديت الباب
وكعدنا سوية
فاطمة: شوفي عمة من بعد اذنج اريد احجي وياج
وتسمعيني ترة هذا الكلام الي راح احجي محد يعرف بي غيري انا وعمي ثاير وجدي
: اتفضلي اسمعج
: والله اني اجيت من وحدي محد دازني عليج
بس ما كدرت اشوف عمي الشيخ يتعذب بحبج
من وراي
: ليش انتي شنو دخلج
: لا شلون شنو دخلي وانتي ذاك اليوم دخلتي علينا
وظليتي تحجين عليه وتكولين ما اتزوجك علمود ما اكسر بخت هاي البنية
جا شعدالج ما اعرف الحجي
: المطلوب شنو
: شوفي عمة اني وعمي الشيخ ما بينا اي شي لا عدالج
انا اريدة لو هو يريدني بس حبيت اكلج
اذا تردين ترفضين لا تخليني سبب رفضج لان انا ما باقية عند الشيج هي كلها كم شهر واتطلك وبعدها اتزوج ابن عمي مثل ما وعدنا عمي ثاير انا وحميد
ظليت فاتحة حلكي على كلامها
:شنو قصدج
: عمة اني من جنت صغير ابن عمي ناهي علية
بس الظروف ما جرت ويانة وصار الي صار وعمي ثاير فهم السالفة من ابن عمي حميد واتفق وياه ان ابقى سنة عندهم وبعدين يطلكني حتى يتزوجني ابن عمي
وهسة انا بحسبة بنتة وخلاني اكمل مدرستي
وية سرى
وحتى انام وياها بنفس الغرفة
يعني شوفة عينج بيج بلاياج انا ما ظالة
فلا تقهرين عمي ثاير ترة هو خطية ما يستاهل
والله من طلعتي بذاك اليوم من عدنا
شفتة كاعد بالحديقة يدخن واسمعة يحجي وية عدي يكلة
انشلع گلبي وماعاد بالطيب تصيب
ظليت فاتحة حلكي على كلامها
ما اعرف يمكن الله رسلها الي حتى
تخليني اتخذ القرار الصحيح بعدما كنت مترددة وكان الحاجز الوحيد الي بيني وبين ثائر هو زوجتة
وهذا الحاجز انزال من طريقي
بعدما طلعو البنات من بيت عمو وصار الليل
صاحني عمو قاسم اني وامي
للاستقبال وجان كاعد لوحدة
قاسم: شوفي سهوة هسة الشيخ مزاحم منتظر مني اتصال حتى اردلة الجواب
هَـا بوية شنو ردج صارلج ثلاث ايام تفكرين

ام سهى بلهفة: خوية ما يحتاجلها سؤال انا اكلك
موافقة
باوعت لامي منفاجئة هاي امي مو طبيعية يعني صدك تحجي
قاسم: لا خليني اسمعها منها هي الي تقرر
غمضت عيوني وسحبت نفس عميق وطرحته
وزادت دكات كلبي
صار حالي اشبه الطالب الي يكون بالامتحان
وعندة خيارات وما يعرف اي واحد يختار يظل يغمض بعيونة ويمد صبعة على الورقة
وراح يختار الاجابة الي ووكع عليها الاصبع
هذا حالي صار من بعد سؤال عمي
غمضت العيون وقطعت النفس
: موافقة

سمعت صوت امي هلهلت وعمي يباركلي
والكل اجة يحضني نور عذراء وعمتي منتهى واني مصدومة
شنو معقولة اني وافقت
صرت مثل الي عايش بدوامة
وكلبي يدك حيل
سمعت صوت عمو قاسم اتصل على الشيخ ووانطاه الموافقة
والكل انخبص وفرحان واولاد عمي يحمودن بأخلاقه
وحارث: ولو انا ما احبة لان هو متوحش
بس والله فرحت لان بعد راح تظلين يمنا بديرتنا وما راح تفارگينا بس ان شاء الله على ايدج تروضين الوحش الي بداخله
بعدين اتصل الشيخ على عمو قاسم وحددو مشية الزلم
واني صرت اتگلب بين شعور الفرحة
وبين الخوف لان لحد الان ماناسية
تهديد ثائر الي
لكن وعدة نفسي ان اتحمل
لاجل ثائر وحسن وهذا الشي بحد ذاته راح ينطيني القوة
حتى اقاتل واحظي بحبة من جديد
.........................

ابو ثائر : بوية شلون تخطي هيج خطوة بدون ما تستشيرني انا وين رحت لو ما الي كلمة بالموضوع
: شني بوية جاي تعلمني من تالي عمري الصح من الغلط
: لا بوية حشاك بس بنت اخو قاسم ما تصلح مرة لثائر
لان هي مو كفو وتبقى بنت المدينة مو عدالك
كعدت هنا بالسلف كم يوم صارت مثلنا
لا بوية ترة الله وكليك هاي بس تتزوج ثاير تفر عقلة
وتغسل دماغه وتاخذة وياها هناك ببغداد وتعيش
ويصير ثاير محبس بيدها

ملكةه · 30/April/2018

للحكاية بقيه

درر العراق

قصه بنكهه عراقيه من واقعنا (( ثمار العار بالحلال) ) - الصفحة 5