هنا

[ملكةه]

مساء الورد
ثمار العار بالحلال


((اقترفت غلطتي بالحلال ولم اكن اعصي الله في ذلك
لكن تعتبر فعلتي في مجتمعي عار يسقط له الرقاب
وتسود به الاوجه فخطأئي في نظرهم
اصبحت مساوية لمنزلة الزانية ))

قصة تتكلم عن تخلف بعض العوائل العراقيه

واقع احد الفتيات العراقيه

[وحيدة كالقمر]

لحظه قبل م تنشري ههه
اترجاك تكون النهاية سعيده
القصه السابقه كانت حزينه جداً ،
قطعت قلبي ،
يومين وانا حزنانه عليها '(

ما ناقصنا احزان ومئآسي ،
خلي نهايتا سعاده لو سمحت ^_^

اكلنا كفوف من الدنيا كثير ، لا تخليها تعطينا كف زياده يرجع لنا المواجع والذكريات اللي يا دوب نسينا شوي منهاا >_<

،،

[ملكةه]

البارت الاول
رجعت من المدرسة شايلة جنطتي بيدي
وميتة من الحر والعطش
دخلت للبيت وشفت الوجوه مگلبة كانت اختي نورالصغيرة تباوع لامي
دخلت للمطبخ واني اباوع من نور لامي
-شكو شبيهة امي
همست نور
-سهى مو هسة بعدين احجيلج
سمعت بابا يحجي ويتوعد بصوت عالي
ابو سهى -الي اكولة يتنفذ وانتي مالج اي كلمة بالموضوع
شفت امي شمرت الخاشوكة بغضب على السنك وراحت لبابا ووكفت بباب المطبخ
ام سهى -هو انت دومك هيج يعني
ما كفاك زوجت ريم وهي صغير وجنيت على مستقبلها وطيحت حضها
وجاي هسة على سهى تريد تزوجها وتفين حظها هي اللاخ ميصير هيج حرام عليك
ابو سهى -شوفي لج انتي تسكتين ومتفتحين حلكج
بنتي وبكيفي ازوجها شوكت ميعجبني

لطمت على صدري عزة هاي عليمن يقصدون يزوجون منو لا عفية شنو يا زواج والله بعدني صغيرة
حسيت بگلبي گام يدك حيل وصار المصايح بين ماما وبابا
والله امووت من القهر اذا صدك هذا الحجي
لعد ومدرستي ودراستي ومستقبلي لا ياربي فدوة رحتلك كلشي ولا دراستي

طبعاً على الرغم بابا قاضي
بس مع الاسف جداً متشدد وماعندة اي تفاهم وية اهل بيتة يعني الي يشوفة يگول اشكد مثقف وواعي
بس لتحكم عالكتاب من عنوانة
مرات تكسر خاطري امي اكول شلون
متحملتة يعني ابد ممحسسها ان هي ام بيتة
ولايوم شفناه يعاملها بحنية وعطف
ولا يشاركها بَـــأي رأي خصوصاً بالقرارات الحاسمة الي تخص البيت ومستقبلنا
يعني عندة المرة انخلقت بس للخلفة والطبخ والتنظيف ومالهة حق بالتعبير عن قهرها او تعترض على كلامه اووغيرها من الامور
بأختصار بابا رجل متسلط وعنيد ورجعي
مع الاسف اخوتي احمد وقتيبة طلعو عليه بس
شوية اخوية الجبير امجد احسن منهم
متفهم هو اكثر واحد امي تعتمد عليه وتلجاء له بهواي امور
حتى مرات يتوسطلنا عند بابا بس مع الاسف
هو هسة حاليا مسافر
طبعاً اني اسمي سهى وعمري ١٨سنة بالسادس علمي وكلش شاطرة وعندي خوات اثنين نور الصغيرة وعمرها ١٢سنة واختي ريم اكبر مني
خطية اتزوجت صارلها سنتين عندها بنية وهسة هي حامل وحيل مشلوع گلبها عيال وحمل بالغلط يعني العيشة زفت ورجلها شالع گلبها شكوكي
طبعاً بابا زوجها وهي بعمر ال١٨سنة وهم خلصت سادس علمي وجابت معدل كلش عالي يخولها تدخل كلية طب بس بابا ميعترف ببنية تدخل كلية عندة هذا مضيعة وقت
البنية مستقبلها بيتها ورجلها
فوك ما بابا متشدد علينا
فوكاها اخواني هم مقيدين حريتنا
حصرة علينا الطلعة بباب البيت
يمة مرة اتذكر اختي ريم كانت مادة راسها بباب الشارع تسلم على صديقتها كانت صادف عدنا جاية خطار ورادت تطلع
ولجحها احمد اخوي
يمة بوقتها جنزها تجنز
طبعاً امجد متزوج وجاي يدرس بالخارج
وقتيبة متزوج واحمد ممرتبط بس عودك شنو نقالة متروس ارقام بنات مكبل وشوكت ما تجي اشوفة بالاستقبال
يحجي وياهن بصوت ناصي طبعاً اني مو غبية اعرف ان هو شنو سبب عزلتة حتى يحجي وية
حبيبتة بحرية
والله العالم هاي يارقم بيهن لان الاخ
كل وحدة مسميها حبيبي ١وحبيبي ٢وحبيبي ٣
يعني الاخ مسوي قائمة
طبعا هناك بالمدرسة هواي اسمع من البنات شلون يحجون بالحب والرومانسية والعلاقات
وشون يحجن بمغامراتهن وية الشباب
واني وسارة صديقتي فقط نستمع بس
عبالك عايشين وياهن اللحظة ومرات نشوفهم شلون يتواعدون يجي عليها حبيبها لباب المدرسة وينطيها هدية عيد ميلادها
مرات اتحسدلها اكول هنيالهة اكو من يحبها ويتمناها
ويهتم الهة طبعاً كان تفكيري تفكير مراهقة
وجنت كل يوم بالليل عندي دفتر مذكرات اكتب بي
كلمات وخًواطر وجنت اتمنى ان يجي اليوم واحب شخص ويبادلني الحب ودائماً اتخيلة شخصية وهيبة
وجذاب
بس مع الاسف الظاهر ما راح الحك التقي مع الحبيب الي كنت اتمناه لان بابا ناوي يزوجني والله العالم المن
راح يزوجني
اباوع على امي دخلت للمطبخ واخذت من البراد كلاص مي وصكت عليه خطية طبعاً من حركت گلبها علينا
اي ام تريد لبنتها ان تكمل دراستها وتاخذ شهادة تفتخر بيها
لان امي من عائلة كلها متخرجين يعني واصلين واثنين من خوالي دكاترة وهي مدرسة رياضيات بس خطية بابا
بطلها من المدرسة كالعادة بيتج وجهالج اولى بيج
اني ما اريد اصير مثل امي ولا اريد اتزوج واحد مثل بابا
عندي هواي طموح واحلام اريد احققهم احس ممستعدة
للزواج وتكوين عائلة
اريد بالاول اكمل دراستي وتحصل شهادتي

وبعدين اتزوج رجال بحبني ويعشقني ويدللني وادلع عليه ويحترمني ويسمعني الكلام الجميل ويشاركني بكلشي ويسمعني اذا حجيت
ونتشارك اني وياه بتخاذ القرارات الي تخص حياتنا
بس هسة اذا راح اتزوج ما اتوقع راح يخليني اكمل دراستي
صعدت فوك لغرفتي اني وخواتي وباوعت لكتبي
وملابسي مالت المدرسة
متت قهر احس اكو كسرة وغصه بحنجرتي
يعني اني اشطر وحدة بالصف مجاي اگدر اتخيل صديقاتي كلهم يكملون دراستهم وياخذون شهاداتهم
واني اتزوج واخلف واكعد بالبيت والتهي بيهم وابد مراح افرغ لطموحي والله اموت قهر
بدلت ملابسي وغسلت وجهي ونزلت
وجو البيت متكهرب وامي ضاربة البوز على بابا
هي خطية مبيدهة شي تسويه
بس راح تظل تحرك بدمها
اعرف ابوي وراسة اليابس مراح يتنازل عن كلمتة
الي براسة يسوي
بس ما اكدر استسلم بدون ما ادافع عن حقي واحاول
رحت دخلت على بابا بالغرفة
-الله يساعدك يابة
ابو سهى وهو يتنفس بغضب من اثر العركة
-هلة بيج بابا
-عفية بابا اريد احجي وياك بس اريدك تسمعني ومتعصب
-احجي گولي هو انتو وامكم شنو يطلع منكم غير وجع الراس
بلعت كلماته وكملت كلاميً
-يابة اروحلك فدوة اني مامستعدة هسة حالياً للزواج على الاقل خليني اخذ شهادة السادس وادخل كلية وبعدين الحك عالزواج
انتبهت على بابا وية كل كلمة وجهة يصير نار من الغضب
-لج عااار هاي من شوكت عندنا بنات تحجي وتنطي رأيها لج انتي صدك تربات امج علمتج شلون تمدين اللسان وتوكفين بوجهي بس انة اعلمج
حسيت بي سحبني من زندي وجرني للهول الي جانت امي گاعدة بي
وامي گامت مفزوعة من غضب ابوي وهو گايدني وراه ودفعني بكل قوة يم رجلين امي
-هاج اخذي بنتج وربيها عدل لا ارتكب بيها جريمة
هاي تالي الدراسة تعلمها توكف بوجهي وتمد اللسان
والله الا اكسر راسها وراسج
شوفي لج مدرسة بعد ماكو واكسر رجلج اذا عتبتي
بباب البيت ادري بيج سوالف المدارس اثرت على عقلج وسكطت تربيتج واني اعرف شلون اربيج من جديد
اجيت اتخبل من عرفت راح يبطلني من المدرسة
رحت ركضت عليه ولزمت ايدة ونزلت عليها ابوسها
ودموعي احس بيهم يطلعون من كل گلبي
-يابة اروحلك فدوة الا مدرستي يابة والله اموت
جنت اتذكر كلام المدرسة مالتي من تحجي عن
مستقبلنا والشهادة
كانت تگول
((الشهادة بالنسبة للبنية مثل الي يمشي بنفق مظلم ويكون بنهاية النفق بصيص من النور الي يخليج تتبعينة لحد ما توصلين لنهاية النفق وهناك تكمن الحياة والاحترام الذاتي للشخص والنور يعبر عن الامل ))
يعني شنو اني اندفن بالحياة واباوع بعيوني صديقاتي شلون
كلهم يكملون ويتخرجون ويصيرون احسن مني
والله كفر اني اشطر وحدة بيهم ومتفوقة والله ظلم اموووت ولا اخضع لقرارهم
لكن مع الاسف مقاومتي ورفضي لقرار بابا
كان يرجع على امي بوقتها
اتبعت سياسة تجويع النفس
وظليت ما اكل ولا اشرب وصرت مثل الشبح
صرت اگوم واوگع من الدوخة
بابا من سمع بية دخل علية بغرفتي
وشافني حاطة كتبي ونايمة بصفهم مثل الي يواسي روحة
لكن بكل غضب
شفتة جمع كتبي واخذهم ونزلهم واني صرت اقاومة بالرغم ما عندي حيل وقوة نزلت وراه
-يابة وين ماخذ كتبي الله يخليك اروحلك فدوة عوفهم الي
-لج مو انتي الي تلوين ذراعي وتمشين حجايتج
علمود الدراسة
باوع على الكتب
هنة هذني الي راح تموتين نفسج عليهن خلاص راح اخلصج منهم
شفتة دار نفط على كتبي وحركهن
اباوع عالنار شلون صارت تلهب بيهم عبالك تلهب بروحي وصرت مثل المخبلة وركضت عليهن
وبدون ما احس صرت اطلع بيهم من النار واطفيهم وابجي محسيت على روحي
بس بابا كان له رأي اخر
جرني وبعدني عن النار ودخلني للبيت
كان عندة حزام دخلني للغرفة
وصار يضربني على ظهري بالحزام والله لو اگلكم محسيت بالالم من گد ما جنت مقهورة على كتبي
ومدرستي صرت من الضرب خدر جسمي وهذا كلة
صار
گدام عيون امي الي فرت روحها من البجي على حالي
وظلت تحجي وتصيح على بابا
-الله اكبر عليك يالظالم لك البنية راح تموت
والله بعد مالي گعدة وياك بالبيت
شفت امي هجت من البيت مثل الفقدت ولبست عبايتها وطلعت اخذها احمد اخوية لبيت خالو
وعرفت بلحظتها ان المشكلة مو بس تخصني وانما
تخص الييت كلة واثرت على امي الي طلعت زعلانة
من ورة ابوي
دخل علية احمد وقتيبة وظلو يغلطون ويسبون
قتيبة
-كلة من ورة راسج اليابس امي طلعت زعلانة
شوفي لج تاكلين تبن وتوافقين ومتفتحين حلگج بكلمة
احمد -اكلج لايكون سبب رفضج عندج واحد منتظرتة
يجي يخطبج
عزة بعينك يا احمد منين طلعتلي
-لا والله ماعندي شي غير اريد اكمل دراستي
شنو هي قابل جريمة
الكل ظل يلوم بية
ادري اني مردت شي غير بس اعيش حالي حال البنات
ارة ياناس مو جريمة
ظلت امي عند خوالي اسبوع
وبابا ودة ناس عليها ومقبلت ترجع الا بشرط
اني اخلص امتحانات السادس
يالله اتزوج على الاقل ماخذة شهادة السادس
وابوية وافق على طلبها رغم كان عصبي
بس امي من طلعت من البيت ابوية من وراهة اتبهذل
لان امي معودتة على عنايتهة الة وترتيبها للبيت والطبخ وكانت كلش دايرة بالهة عليه ومهتمة بي
بحيث اباوع عليه اشكد قاسي وطاغي لكن
من راحت امي زعلانة رغم مكابرتة حسيت بي ضايع بدونها وميعرف يدبر امور البيت
صحيح هو دائما محسس امي ان هي لاشيء ومالهة دور بحياته او اي فايدة
لكن امي كدرت تثبتلة ان هو بدونها لاشي وان المرة
النصف الاخر الي يكمل

[زفير]

ليبدا التشويق

[ملكةه]

شفتة جمع كتبي واخذهم ونزلهم واني صرت اقاومة بالرغم ما عندي حيل وقوة نزلت وراه
-يابة وين ماخذ كتبي الله يخليك اروحلك فدوة عوفهم الي
-لج مو انتي الي تلوين ذراعي وتمشين حجايتج
علمود الدراسة
باوع على الكتب
هنة هذني الي راح تموتين نفسج عليهن خلاص راح اخلصج منهم
شفتة دار نفط على كتبي وحركهن
اباوع عالنار شلون صارت تلهب بيهم عبالك تلهب بروحي


مثل ماصاربيه ب2016 جنت بثالث متوسط اوف ذكرتني بهالموقف

[ملكةه]

يكمل بي الرجل وبدونها يصبح رجل غير كامل لو مهما كان الرجل قوي تبقى هناك امرأة خلفه تكون هي سبب قوته وهذا الشي لاحظتة عند بابا
من يومها واني قررت ان استسلم لمصيري مثل الي يحكمون عليه بالاعدام وهو مابيدة شي يقدمة لحتى ينقذ نفسه
رجعت امي لبيتنا
بيومها اجتي ريم اختي لبيت اهلي
وظلت تحجي وياي حتى اتكيف وية الوضع
ريم -سهى حبيبتي هذا هو قبلي بقسمتج ولتضوجين
ترة شوفت عينج شفتي رفضج ومقاومتج شنو سوت بالبيت وبأمي بالذات ترة احنا اول وتالي نتزوج
استسلمت وبديت اتقبل الوضع لخاطر امي
ورحت نزلت وسلمت على امي وبستها من راسها
-يوم الله يخليج لتنقهرين ترة احنا اول وتالي مصيرنا الزواج
طبعاً اني احجي وگلبي يتمزق من القهر
ام سهى-ادري بيكم اول وتالي مصيركم الزواج بس على الاقل اخذو شهادتكم لان الوكت مينعرف شضاملكم وتكدرون بشهادتكم تتعينون وتعيلون نفسكم

اتدخلت
ريم -يابعد عمري هسة انتي مو اخذتي الشهادة شنو استفاديتي
-لا ماما حبيبتي اني اخذت الشهادة بس على الاقل كدرت افيدكم بيها وكدرت ادرسكم
يعني لو ماعندي شهادتي ومتخرجة
جان اانتو واخوانكم متفوقتو بمدارسكم
طبعاً اعرف بكلام امي كلة صحيح بس العين بصيرة والايد قصيرة وهذا امر الله
وعدت فترة وصرت ادرس امتحاناتي
بس صرت كلش سطحية ولا ابالية
ورجع بابا فتح موضوع اهل الولد
الي يردون يجون علية خطابة وحددو موعد وية ابوي يسون مشية الزلم اول ما اخلص امتحانات السادس

دخل اخوي احمد ستوة كان راجع من الكلية هو كلية قانون
راح باس راس امي
التفتت علية
-عفية سهى صبيلي غدة ميت من الجوع
-صار راح اصبلي واصبلك سوية
دخلت عالمطبخ شفت نور تمسح بالطباخ لان اليوم عليها مواعين الغدة واني علية وجبة العشا
مقسمين الشغل
-نور بالله فهميني شنو صاير منو هوذلي الي جايين يخطبوني وين شافوني حتى اجو علية
-لج سكتي هذولي ناس من اقارب جارنا صديق بابا بيت ابو منذر صادف الولد كان عندهم معزوم وشافج تمشين بالطريق وسائل عنج وداز ابو منذر لبابا حتى يريد يتقدملج
-امدة حظي من ساعتة السود الي شافني بيها
شنو جان لابد ومنتظرني اطلع
استغفر الله صدق شغلة تقهر فوك هذا الضيم كلة
لاطلعة ولامشية ولا ونسة وحصرة علينا يصير عند واحد من اقاربنا عرس الا بالشافعات يالله بابا يوافق نطلع للعرس
بعد ما تطيح وصلة من السانة
وبعد كل هذا الحرمان الي عشناه يزوجنا
نور-بلكت يطلع زوجج خوش ولد ويسفرج ويونسج
ويعضوج الحرمان
-عمي ماتسكتين رحمة على والديج هو على گولت
ريم هو اذا البنية عند اهلها وهي وصلة من گلبهم مطيحين حظها ومامسويلها احترام واحساب

تردين الغريب يقدرها ويحن عليها الله وكيلج دتشفين بعينج ريم خطية من ورة مشاكلها وية زوجها
صايرة عبالك مرية عجوز لاتلبس ولاتعدل
والله شنو لان رجلها يشك ويغار عليها
وميخليها تعدل وتلبس والله يالله

-والله صدك كلامج
تدرين سهى مرات اسمع صديقاتي
يسولفون عن العطلة وشراح يسوون بيها وحدة تكول راح نسافر لتركيا والثانية تكول راح نسافررللشمال
وكلهن يحجن بالسفرات والونسة بالعطلة
-اي بالعافية عليهن مو مثلنا
هسة هو بابا واخواني عادي همة يسافرون ويطلعون الا احنا عودك ليش طالعين من زرف الحايط
احمد -اكول بلا لغوة شكد تحجن بس بيكم سوالف
صبيتي الغدة
-اي هياتة كدامك على ميز الطعام
تلفتت على نور -من تخلصين شغلج اكوي قميصي
نور وهي تنفض من ايدها الجلافة
-اوووف كلة نور نور نور والله مليت
-شوف هاي الفصمة گاعدة تأفأف بوجهي
شفتة راد يگوم عليها لزمت ايدة وكعدتة عالكرسي
-دعوفها اعوفها جاهلة
غمزتلها حتى تطلع

-احمد تعال اسولفلك شنو صاير
ردت ابدل السالفة حتى ينسى وما يخلي دوبة وية نور
لان هو مثل بابا بس يزمخ ويصيح صحيح مرات يصير ويانة حباب ويشتري النا جبس حلويات بس
قساوتة تعم على طيبتة في بعض الاحيان
بعد مرور فترة الامتحانات اخر السنة امتحنت وخلصت
بس بدون حماس مالي نفس لان اعرف مصيري
الزواج المن متعبة حالي
باخر يوم الي بالمدرسة كنت اباوع للبنات ولهفتهم
ونشاطهم وشلون يخططون لمستقبلهم اني من يمي
امووت قهر لان اني مو مثلهم
بس والله ابوي راح يتحاسب من وراية اني وخواتي
على اهمالة النا
يهتم بأخوتي ومستقبلهم اكثر من عدنا
وبعد هاي الفترة عطلنا وكعدنا بالبيت
واجوي الناس يخطبوني
لان اتفق وياهم بابا تتم الخطوبة بعد الامتحانات
وصادف بيوم استلام النتائج صارت مشية الزلم
مراح اوصفلكم شعوري بيوم اتصلت علية سارة صديقتي على نقال امي وشلون باركتلي على نجاحي اني صحيح
ماعندي حماس لكن كدرت انجح وكان معدلي وسط
واني متأكدة لوما سالفة الزواج الي كسرت واهسي بالامتحانات جان جبت معدل اعلى من هذا بس يالله
انعم الله على الاقل عندي شهادة سادس
تركت عني التفكير بمستقبلي وشهادتي
والتفتت الى جانب حياتي الثاني الي هو الزواج
وصرت اتأمل عسى ولعل ان الشخص الي جاي متقدملي يكون انسان زين ويعوضني عن خسارة شهادتي
وبي

ومها اخذتني عمتي اخت بابا للصالون
وخطية ماما وبابا بعدهم على خصام من ورة سالفتي
رجعت من الحلاقة بعد ما حفيت ومكيجت ولبست البدلة
دخلت شفت اهل العريس جايين كنت بوقتها كلش ناعمة
وخجلانة والله حتى سلام ما اعرف اسلم
لان احنا والفضل لبابا معدنا اختلاط وية الناس وبيتنا نادراً ما يجونا خطار يعني
على الرغم امي تحب الناس والاقارب وترحب بيهم ببيتهة
لكن ابوي على العكس يكره سالفة خطار ما خطار ويقوم بالواجب بأختصار ميواصل الرحم

دخلت على اهل الولد وشفت مرة جبيرة
من سلمت عليها ظلت تصلي على محمد وال محمد بصوت عالي فززتني
اتعرفت على ام الولد همة من اهل الجنوب وهمة جايين هسة من السفر بوجهم لبيتنا
وجانت مرية حبابة جبيرة بالعمر
وخواتة تلاثة وحدة اصغر مني واثنين كبار
طبعاً لحد الان مشايفة الولد
يعني والله بابا جرم بحالي
رفض الرؤية الشرعية گال هو شايفها ومقتنع بيها خلاص ميحتاج يجون ويتشاوفون
ادري شنو حجي بايعلك خروف واني ما ادري استغفر الله
طبعاً اجو عماتي وبناتهم وخالاتي وبناتهم
وامي كعدت تقدم الكيك والعصاير هي وريم اختي
وبعدين صاحلي بابا حتى يعقدولنا
وتم العقد وخلص ومكدرت اشوف الولد لان بابا فوك راسي واحمد وقتيبة وين اكدر ارفع راسي
بعدها دخلت عالنسوان وصارت الهلاهل وشغلو الديجي ورة شوية دخل الولد الي اسمة فراس حتى يلبسني الحلقة والذهب
كعد بصفي وباسني من راسي وصارت عيني بعينة
عزة هذا شنو كلش سمين
والله اجيت ابجي هاي ليش هيج عودك

[ملكةه]

البارت 2سهى من صارت عيني بعينة
عزة هذا شنو كلش سمين
والله اجيت ابجي هاي ليش هيج عودك
بس بوقتها شفت بعيونة حنية ودفو
وگعد يضحكني
وفعلاً كدر يكسر حاجز التردد والنفور الي امتلكني بلحضتها
صحيح هو كان شكلة عادي وغير جذاب مو مثل
شكل ((فارس الاحلام الي جنت اتمنى التقي بي ))
لكن هو كان صاحب السان جداً لبق وكدر يسحب مني استجابة
وابتسامة وصرت اقنع بنفسي ان الرجال مو بالشكل
اهم شي اسلوبة وتعاملة وياي
يرجع تقبلي لهذا الشخص لان گلبي فارغ محد شاغلة
حتى اكعد اقارنة بي
وبوقتها ضل يهمسلي انواع الكلمات الي خلتني ابتسم
فراس-لج شنوانتي گيمر
والله امي داعيتلي حتى اوكعلي بهيج بنية
بنت حلال وحلوة لج غير تطيرين العقل وهسة راح تكسرين على الكل وتخربين على بنات العشيرة كلهن
هو يحجي واني ابتسم مسامعة واحد يگلي هيج كلام انتي حلوة اول مرة اسمعها
-لج لاتضحكين رحمي بحالي
وبيومها جان جايب وياه نقال الي حتى نتواصل مع بعض وكلش فرحت بوقتها بالنقال
لان هاي احد علامات الرجل المتفهم
على الاقل مو مثل رجل ريم حارمها حتى من النقال

ومرت الايام وجان كل فترة يجيني من السفر گبل بوجهة لبيتنا حتى يزورني وصرنا نكعد سوية بالاستقبال مثل اي مخطوبين لازم نگعد لوحدنا

ومثل ما علمتني ريم وباقي صديقاتي
شلون اتعامل وية خطيبي ولازم اعدلة والبسلة فساتين كلما يجي يزورني
لازم يلكاني على حباية ونص اذكر اول مرة باسني بيها ظليت ابجي لان كان احساس غريب وموحلو ما اعرف ليش يمكن بوقتها كانت البوسة شوية عميقة بحيث اخذ شفايفي داخل شفايفه بحيث قطعت النفس واجيت اتقيء بوقتها مجنت اعرف ان البوسة تكون هيج مقززة
اشو صديقاتي مگالو هيج اشو مدا احس بالشعور الي وصفوه البنات ان البنية اذا تتبادل الاحضان وية حبيبها
تذوب بين ايديه ومن يبوسها حبيبها تحس روحها تسافر بغير عالم وتذوب بين ايديه وتنسى نفسها
اشو هذا كلة الاحساس مامر علية
الجائز الصوج بية
واني باردة ومدااتجاوب وياه
بس هو وين رايح وذايب وضاعت علومة
خطية احس علامات الاثارة الي وصفوها صديقاتي بينت على فراس
بس اني ابد محسيت بشي بتجاهة
لازم اسأل ريم اشوف شنو السالفة معقولة
اني باردة بالمشاعر عزة بس لا مثل عمتي سليمة
الي اتزوج عليها رجلها لان كان يكول هي باردة وياي
ومتنطيني حقي
لا عزة ما اريد اصير مثلها ويتزوج علية
لان جامدة وتصير سيرتي على كل السان

جنت اسمع بابا يحجي لامي على عمتي سليمة
بيوم الي اتزوج عليها رجلها
ابو سهى -اي هي صوجها خلت الرجال يروح من ايديها ويتزوج غيرها
اختي واعرفها
اكبر فاهية وباردة وما عرفت تجني زوجها وتحتويه
وهو رجال يريد المرة الحارة الي تعرف شلون تداري الرجال وتلبي طلباتة وتسويلة جو
وانتي شوفت عينج اختي وجهة سجن وكفاهة مستشفى طبعاً يتزوج عليها مو زين ما شرد منها

مع الاسف بمرور الايام بنيت افكار خاطئة بعقلي
وخلقت مخاوف وهمية بتجاه خوفي من رجلي يتزوج علية
حقي جاهلة وماعندي اي مفهوم من هاي الناحية
وامي ممعودتنا ان نحجيلها مشاكلنا
لذلك ظليت ساكتة ومنتظرة اختي ريم تجينا خطار حتى
احجيلها ومع الاسف ريم اجازتها بعيدة يعني كل شهر مرة تجي لبيت اهلي
دك فراس على نقالي
-الو هلو شلونك فراس
-هلة بيج سهاوي
اكول اليوم حضري نفسج انة جاي بالطريق
اليوم نعقد بالمحكمة واتصلت على ابوج البارحة
وكال ميخالف تعال حتى ارتبلك الاجراءات مالت المحكمة
-صدك اشو بابا محجة مكلي حتى اجهز نفسي
-هو ابوج من شوكت ياخذ رأيكم هسة بقت على هاي
انتهى الاتصال
ام سهى -هذا منو
-ماما هذا فراس راح يجي علية حتى ياخذني للمحكمة ونعقد
ام سهى -لعد خوش حتى اسوي حساب فراس عالغدة
رحت صعدت فوك حتى ابدل
استغفر الله حتى فراس انتبه على اسلوب بابا بالرغم اني حاولت ان ما ابين تهاون بابا بتجاهنا
حتى ما اقلل من قيمتي كدامة
لازم ما ابين حتى يحترمني ويسويلي احساب
بس مع الاسف شكل الولد عرف اسلوب بابا
بس كون ما يستهان بية
كملت تبديل ملابسي وخلصت وكعدت انتظرة
واجة من الباب دك هورن منزل
وطلع اخوية قتيبة وبعدها صاحلي
كلي فراس ينظرج بالسيارة مستعجل
رحت ركبت بصفة وسلمت كنت لابسة بنطرون جينز وقميص مقفل وشال اباوع لنظرات فراس علية
اكلني اكل
-لج طالعة تموتين
شيصبرني علما تدور سنوية جدتج
ما اعرف ليش ابوج مصر الا تدور السنة يالله نگدر نتزوج
-ميصير غير بيبي مصارلها ٤اشهر من توفت متشوف بابا مقبل نسوي حفلة مهر
وصلنا للمحكمة وكان بابا موصي موضف عندة بالمحكمة ان ياخذنا ويخلص الاجراءات ونوب بعدين اجة بابا واخذنا للقاضي يصير صديقة
حتى يعقدلنا
وخلص العقد واني بوقتها حسيت وقعت على انتهاء
مستقبلي واعدام شبابي
رجعنا اني وبابا وفراس للبيت وبيومها بابا مقبل يخلي فراس يرجع لاهلة بنفس اليوم
ابوسهى -لا شنو يمعود اليوم اجيت من السفر وتريد ترجع بنفس اليوم ميصير هيج اليوم بات والفجر

اتوكل لان الطريق طويل وخطر عليك
المهم بقى فراس ببيت اهلي وبيومها اتعشا عدنا هو واخوتي وبابا والتهينا اني وامي ونور نجهز الهم العشا
طبعاً واستاذ فراس استغلها فرصة كلساعة يطلع حجة حتى يكرص بية بالاستقبال وياخذ المقسوم
بس شلون قهر احس بمشاعري مثل الطابوكة ابد ما احس بأي شي ولوما اخاف والله انطي ضربة على حلكة
يعني ما عندة اسلوب بدون مقدمات يظل يتلمس ويبوس بشكل مقزز حتى كلام حلو ما اسمع منة احس بي يقترب مني حتى يشبع غريزتة
بوقتها دفعتة حيل وابتعدت عنة احس اختنگت من كد ما جنت حابسة انفاسي داخل صدري وشفتة صار يتمادة باللمسات الظاهر عقد المحكمة انطاه دافع
حتى يصير ياخذ راحتة بمعاملتة وياي
بس ما اعرف ليش هاي حركاتة احس بيها تدنس برائتي وتقلل من كرامتي وقيمتي
احس بعدة داخلي روح طفلة لم تكبر الى الان
دفعتة وركضت طلعت برة الاستقبال
سمعت صوت ماما تصيحني
-هَـا ماما صحتيني
-اي يمة هاي سارة اتصلت عليج
رحت اخذت النقال منها من سمعت صوت سارة حسيت
اكو فد امل ان بعدني بريئة واكدر انسى نفسي من احجي وية سارة باركتلي على العقد وظلينا نسولف ونحجي لحد ما اجتي نور
-سهى ماما تكول خلي تجي تساعدني حتى نصب العشا
سهى -يالله سارة بَـــاي مع السلامة اني راح اروح
اليوم زوجي التحفة موجود بالبيت وراح يبات عدنا
سارة -اهوو مبين من خلال كلامج ان انتي ممرتاحة وياه
سهى -اشش خليهة سكتة ما اكدر احجي هسة بعدين من افرغ احجيلج
نهيت الاتصال ورحت لامي
وبهاي الاثناء كعدت المح لأمي عن تصرف فراس
وياي
سهى -اة اة احم اكلج يوم المرية شلون لازم تتعامل وية زوجها مثلا اذا حاول يقترب منها عادي تصدة يعني
هم الهة الحق بالرفض اذا كانت ميعجبها يقترب منها
ام سهى -لا يوم عيب ميصير المرة تصد رجلها وتبعدة عنها شتردين يكولون عنها الناس طفشت رجلها
كنت اسوي زلاطة واحجي وياهة
طبعاً اغلب تصرفاتنا العيب وحجي الناس
يعني عبالك عايشين حياتنا علمود ارضاء الناس
والله تفكيرهم تعبان
لكن مع الاسف مجنت اعرف ان هذا تفكيرهم
راح يعم على حياتي
بيومها خلصنا العشا طبعاً الولد لوحدهم اتعشو لان بابا
ميصرفلة ان كلنا ناكل سوية ما اعرف هذا التفكير التعبان مستند على ياقانون
بعد ما خلصو وشوية شربو جاي والتهيت اغسل بمواعين العشا سمعت امي صاحتلي
-يمة سهاوي روحي فرشلي لرجلج خلي ينام الباجر وراه سفر من الفجر
-صار يوم بس خلي اخلص الي ببيدي واروح افرشلة
والله خلصت شغلي ورحت جبتلهة فراش وطلعتلة بطانية جديدة من الجيس ومخدة وبين ما كنت افرش بالاستقبال سمعت صوت باب الاستقبال انقفل التفتت شفتة فراس منتجي على الباب ويباوعلي بنظرات شرهة وكصني كص
گلبي ابد ما ارتاح لنظراتة الي
ردت اطلع سحبني
من ايدي وبصوت ناصي
-وين وين طالعة اوكفي الله عليج نوميني وروحي
-شنو انت طفل انومك
-اهووو هسة هاي شيفهمها والله عقلج محجر
يعني بابا اريد اجرب انام بحضنج
اتسعت عيوني متفاجئة
-لا عيني شنو عيب وين كاعدين
-جرني وقربني عليه حيل
شنو وين كاعدين بابا انتي صرتي حلالي وزوجتي ومحد الة حق يحجي ويفك حلكة عسى ما اخذج هسة محد راح يحجي
دفعتة خايفة منة
-لا لا عفية فراس عوفني اروح والله بابا ميقبل
شنو اصلا احنا ممتزوجين شلون تحجي هذا الكلام
-ابوية انتي اليوم عقدنا محكمة وعاقدين سيد بعد شتردين بس انتو الا هوسة وبدلة عرس وطبلة يالله تعترفون بالزواج
-لا مو قصدي هيج بس الاصول تكول اصير ببيتك يالله يحقلك تاخذني
طبعاً اني احجي وهو يسحبني ويقربني ويبوس
بحيث اريد بس افك نفسي منة ماكو
بس بوقتها صرت اقاوم بي بس بدون ما اطلع صوت اخاف يسمعوني اهلي بحلظتها امتلكني
الخوف منة والموقف غريب عني يعني لمساتة صارت اكثر جرئة وصار كلش قريب علية احس بي مو عبالك ديبادلني الحب لا عبالك دينهش بلحمي شلون الفريسة
حسيت عليه دفعني وصار يرفع بملابسي واني كعدت اتلاوة وياه وانزل بيهم وادفعة عني

بس مع الاسف هو مثل الحايط ابد ما يهتز والمشكلة هو
اضخم مني و بعد هذه المعركة الخاسرة
الي دارت بيني وبينه
حسيت بألم وصرخت وهو التقف صرخاتي
وسد حلكي بأيدة حتى محد يسمعني دفعتة وبعدتة عني بوقتها وظليت ابجي والطم واحجي عليه بصوت ناصي حتى محد يسمعني عبالك سويت مكسورة
-لك فراس شسويت
حسيت بي كام من علية وهو مفزوع
احتمال مكان يحس على روحة شنو سوة
ومسح على وجهة بيدة
-لتخافين اني اخذتج وانتي هسة صرتي مرتي وحلالي

[ملكةه]

بارت 3
لتخافين اني اخذتج وانتي هسة صرتي مرتي وحلالي
لطمت على وجهي
-غزة بعيني وسودة بوجهي
شلون شنو اكول لاهلي
-مالة داعي تحجين لاهلج على الي صار
ترة احنا ممسوين شي حرام مرتي واخذتها شكو بيها
محد راح يكدر يحجي
بس افضل ان متحجين لأي واحد
لان احتمال نتزوج وهمة ميدرون بالي صار فخلي الموضوع سر بيني وبينج

وفعلاً طلعت من الاستقبال واني جسمي كلة يرجف من الخوف والالم الي حسيت بي
بداخلي ورحت بوجهي للحمام وكشفت على نفسي وشفت
دم
حسيت بمعدتي گامت تگلب رحت دخلت جوة الدوش بملابسي بدون وعي ما اعرف شتصرف
حسيت بالبرد والخوف مع مغص اتخربطت احوالي
صعدت بسرعة لغرفتي مردت احد يشوفني لان بس مجرد النظر لشكلي راح يعرفون ان اكو شي صاير وياي
لان مشكلتي ما اعرف اخبي بگلبي الخوف يبين على وجهي
طلعت من الحمام واني اتلفت خاف احد يشوفني
رحت دخلت جوة البطانية وظليت ابجي حسيت اكو شي
ثمين خسرتة
وماعدت اني ذيج البنية النظيفة البريئة
طبعاً اصعب شي على الشخص من يكون لوحدة يعاني
والمشكلة الظروف كلها ضدي
وتزيد من تراكم الخوف
والحذر ممايؤدي الى البؤس
يعني لا عندي عائلة واعية مثقفة تكعد تعلمني وتفهمني
شنو لازم البنية تتصرف وية خطيبها بهيج مرحلة كل المعلومات الي حصلت عليها
كانت من مصادر غير مؤهلة بأن تعطي النصيحة
صديقاتي المراهقات
ومن اجيت اسأل امي
كان جوابهة الي على ضوء
ان اني اذا اتزوجتة وصرت عندة بالبيت

اوووف اذا هيج يكون الزواج بين المرة والرجال
فمن خلال تجربتي الفاشلة كرهت سيرة الزواج والرجال

سافر فراس يوم ثاني الفجر
وصار كل يوم يتصل علية
فراس-هَـا بشري خو ماحجيتي لأحد عن الي صار
سهى بصوت هامس
-لا محجيت شي اخاف
فراس- اي عفية
كعد يطمني حتى لا اخاف وانهة المكالمة وراح
ورة اسبوع اجتي اختي ريم زعلانة لبيت اهلي رجلها ضاربها
وبوقتها قتيبة راح اتضارب وياه لان مدميهة خطية كسرت خاطري
حضنتها واخذت بنتها من ايدها
-الله يكسر ايده شنو شبي اتخبل هذا
طبعاً بابا مسافر للشمال عندة شغل
وقتيبة من شاف شكل ريم اتخبل وراح هد على
زوجها
اباوع على امي وهي تضرب على رجلها
-عزة العزاني يمة احمد روح اتصل على قتيبة شوف شسوة يكلك متعارك وية عماد رجل ريم وضاربة
احمد -يطبة طوب زين يسوي بي هالعار شفتي شلون ممثل بخلقتها والله لو الزمة انهي
-لك يمة الشيطان شاطر وخاف يموت الولد
-لتخافين يوم هذا عار ميصير بي شي
اتصلت على قتيبة گال جاي بالطريق
دخل قتيبة للبيت
وعيونة حمر من الغضب
-شوفي ريم هذا السكط كسرت رجليه وايديه اتكسر وبعد مترجعيلة الا يحفي ويجي يبوس الايدين
خطية ريم مجاوبت اي شي بس تبجي
رحت كومتها واخذتها ودخلتها للحمام وغسلت
ورحت للمطبخ حضرتلها اكل لان وقت عشا وسئلتها وگالت لا ممتعشين
حضرت الصينية ودخلت مرت اخوي قتيبة اسمها لمياء
طبعاً هاي هنا مثل الخطار بس تاكل وتمسح بيدها ولا عبالك هذا بيت عيالها وعليها واجبات
عندها اهم شي هي وزوجها وهسة الست حامل
امي متحب تصخرها تكول مادام گايمة بواجب رجلها وراضيتة خلاص هذا هو خليها براحتها
واحنا ممحتاجينها ولا محتاجين مساعدتها انتي واختج موجودات وتساعدوني
دخلت لمياء علية واني دااحضر بصينية العشا لريم
-اوووف هم اجت ريم زعلانة ترة والله ميصير هيج
يعني اختج لازم تحس وتكع ببيتها ترة مشاكلها زادت
وداتأثر على اخوها
-شنو عيني ترديها تنضرب وتنهان وتسكت والله علمود حضرتج انتي تتنرفزين وتضوجين
-لا حبيبتي من حقي اضوج لان الموضوع يخص ابو بيتي الي هد على رجلها واتعارك وياه
يعني اذا صار على قتيبة شي اني من يفيدني
اختج لو رجلها
-حبيبتي انتي الشغلة متخصج لتتدخلين بيها
اخو ويدافع عن اختة ليكون حضرتج حتى هاي تعترضين عليها
عفتها لوحدها بالمطبخ وطلعت كلامها يسم البدن
رحت ومريت من يم امي واخوي قتيبة
وصعدت الصينية فوك ودخلت عليها شفتها دتمشط شعرها المهلس خطية مبين جارها من شعرها الله لايرضى عليه
شافتني جبت الصينية
وكعدت بنتها جانت نايمة
وكعدت تاكل واني اخذت بنتها منها وصرت اوكلها
واحجي وياهة
-شنو شبي عماد هالمرة شنو سبب الضربة
من كون كسر بلية جبر الحيوان
-سكتي غير غسلت هدوم وعمتي اصرت الا اشرهم فوك بالسطح
اني كلتلها عمة عماد مانع علية اصعد للسطح
والله هي دكت راسها والف سيف الا اصعد
هي مو تريد المشاكل لا بس مرت حماي
اتعاركت وظلت تحجي شمعنا ريم متصعد تشر الملابس ليش كلة اني لو تخافون من عماد وتسولة حساب
عمتي ظلت تحجي عليها
-يمة ريم دكسري الشر وصعدي شري الملابس ترة هاي كعدت تتعاين وياج وتدور المشاكل
ريم -عمة بس عماد ميقبل
-هسة هو عماد شمدري تصعدي صعدي ومعليج اني احجي وياه اكلة اني كلتلها
رحت بعد مكدرت اطوخها شريت الملابس
عزة واني

بالسطح وجان يجيني عماد بس انگلب شلون الشيطان علية
سحلني سحل من شعري
سهى-زين عمتج وين ليش محجت وياه
-شبيج انتي ياعمتي يابطيخ اكلج اخوانة يردون يفكوني منة ماكو ميتفاهم امة ظلت تغلط عليه وطيحت حظة بس هو فاقد مخبل نزل بية كلة بوكسات عبالك جاي يضرب برجال
والله سهى احس بروحي ميتة
واني والميت سوية هسة اني شنو عيشتي
اباوع على نسوان حمويني شلون يطلعونهن وياخذونهن
للزيارة لو للمتنزهات همة وجهالهم واني اباوع بعيوني
والله مرات اشوف هنودة بنتي تظل تبجي وراهم
خطية طفلة وتريد تطلع
والاستاذ ولا يمة ابد
باوعت على وجه ريم والاثار مالية وجها كسرت خاطري مسوي وجها خريطة ابن اللذين
هسة هاي شنو شافت من حياتها
زين واني هم راح اعيش مثلها لو مثل امي الي من سافر بابا حسيت بيها شي
ووكعت مريضة بالفراش
ومتت قهر عليها حسيت اكو شي بينها وبين ابوية
ريم وهي تتلفت وتحجي بصوت هامس
-اكول سهاوي امي شبيها
-والله علمي علمج يعني من سافر بابا لحد هسة
امي مو على بعضها
ريم -والله خطية امي اشوف حياتها وية ابوي احمد الله واشكرة على عماد على الاقل عماد اكدر اناقشة ومرات يسمعلي حجاية
ريم-اي صدك انتي شلونج نسيت اسئلج عن خطيبج وباركلج على العقد
من جابت ريم طاري فراس حسيت بگلبي انقبض
وعرگت ومحطيت عيني بعينها
-هاا الله يبارك بيج خية
فراس زين الحمدلله
ظليت ابلعم وكلامي ممترابط
ريم بشك -شنو شبيج سهى اشو مو على بعضج
احجيلي اسمعج
ريم اختي وتعرفني كلش زين
وتعرف من يكون عندي فد شي
فسلمت امري لله وحجيت لريم عن كل الي صار بيني وبين فراس
ريم بخوف وهي تضرب خدودها
-عزة بعينج يسهى شلون تسلمينة نفسج شنو انتي غبية
-لج والله انگلب علية مثل الوحش معرفت افك روحي
تصدگين لحد هذا يومج اني انزف ما اعرف شنو وليش انزف
ريم والله انقهرت على اختي سهى من سمعت كلامها وتخوفها الله يحفظها مطفية
ولو كلنا محد علمنا شي يصير بين المرة والرجال الا بليلة الدخلة يالله نكدر
نعرف هذا السر العظيم
لكن مجتمعنا واهلنا مجاي يكدرون يفرقون بين التوعية والانحراف يعني عندهم عيب البنية تسمع مثل هيج كلام لذلك نشوف البنية الي تكون قليلة المعرفة والاطلاع اكثر وحدة معرضة للوقوع بالخطاء بدون ادراك
-لج سهى هذا اخذج يعني انتي هسة مو بنية
هو شنو كلج من وقع المحضور
-كال لتخافين ولتگولين لأي واحد اني اخذتج
وان شاء الله نتزوج واهلج ميعرفون

مرت الايام وبابا لازال بالشمال وريم بقت عدنا هي وبنتها
واجة عمها واخوان زوجها يعتذرون من اهلي عالصار
وقتيبة كللهم جيتكم على العين والراس بس منكدر نفتي بالموضوع الا يرجع الوالد من السفر واني لو بيدي ما اخليها ترجعلة لان ابنكم مصخها شنو يمد ايدة عليها ويضربها شنو هلكد مستهان بينا وعبالة ما وراهة زلم
تطلع عليه وتاخذ بحقها
هذا الحجي همة يحجون واني وريم لاطشات الاذانات
على باب الاستقبال نريد نسمع شنو يحجون بس والله برد گلبي قتيبة من ردهم وفعلاً طلعو ومكدرو يرجعون ريم وياهم
وورة ساعتين سمعنا هوسة بالباب وسمعت صياح احمد اخوي وضربة الباب صوت عالي
ركضت ريم وهي ترجف
ريم -عزة هذا عماد ديتعارك بالباب
شفت امي طلعت وهي دتلبس بعبايتها على راسها
ام سهى -من ساعة السودة الي انطيناك بيها مرة
طلعت برة بباب البيت وسمعت صوتها تحجي على عماد
وسمعنا صوت عماد يگول اريد مرتي وبنتي
احمد-لك عار سگط ما عندك مرة يمنا سامع ولك نجوم السما اقربلك يالله انكسح منا
عماد -ما اتحرك منا الا تنطوني بنتي
سهى
اهووو راح يلزم ريم من ايدها التوجعها
و هاي مخبلة كلشي ولا بنتها بس
لا تضعف وتستلم الة وترجع وياه علمود بنتها
ورة ربع ساعة من الهوسة سمعنا صوت سيارة
وبعدين دخلت امي واحمد من باب المطبخ واحنة عيونة تدور وراهم
سهى..هَـا يوم شنو شصار شسويتو وية عماد
ام سهى-مسوينا شي اجو اخوتة وسحبوه من الباب الظاهر احد مخبرهم على جية اخوهم لعندنا وخافو تصير عركة
احمد -والله لو مطول شوية جان سحلتة سحل بس الله حابة اجو اخوتة واتلاحگولة
اباوع على ريم بس تلوب متعرف شتسوي
من صعدت وياهة بالليل وفرشتلها ولبنتها بالگاع فاجئتني بكلامها
ريم - تدرين سهى احس بروحي استعجلت وتركت البيت وطلعت زعلانة
سهى-لا حبيبتي بالعكس يعني لو باقية جان عبالة انتي
متگدرين ترحين لاهلج ومحد راح يكدر ياخذ حقج
بالعكس احتمال هاي الخطوة الي خطيتيها
راح تسويلج حل وبعد من يريد يمد ايدة عليج راح يسوي الف حساب ويفكر الف مرة قبل لا يضرب
ريم -والله ياريت
مرت الايام وانشغلت وية ريم
وصرت يوم عن يوم جسمي ينحل
ام سهى -يمة سهاوي شبي وجهج اصفر اشو ما عاجبني شكلج
شفت ريم جانت تنظف الخضرة اتوقفت وظلت فاتحة عيونها على وسعهن مثل الي انصدمت
سهى -والله يا امي ما اعرف شنو بية
حتى معدتي گامت توجعني هالايام
ريم -مبيج شي بس تتدلعين
شفت ريم گامت وخلت سلة الخضرة على السنك وطلعت
ريم -سهى اريدج بشغلة بس تعاي شوية
شفتها صعدت

فوگ
رحت صعدت وراها
سهى -شنو ريم كولي شنو تردين
ريم بصوت هامس
-اكلج سهى شوكت اخر دورة الج
مجرد ريم سئلت السؤال اني صكيت بمكاني
وعرفت على شنو تلمح
-هاا اةةة فاتتني صارلها اسبوعين
ريم -انتي دورتج منتضمة لو لا
-اني دورتي كلش منتضمة
بس ما اعرف ليش هالمرة اتأخرت
طبعاً احجي وعبالك اريد اغالط نفسي
ريم وهي تضرب على وجهة
-صخام ولج سهى بس لا حامل انتي
-لا لا عفية لتكولين هيج لا شنو حامل منين احبل
-ولج يالمعزاية نسيتي لو اذكرج لتسوين نفسج غبية
-لا لا والله عقلي مدايستوعب كلامج
-شوفي خية خلي انطيج اياهة من الاخير انتي احتمال قوي حامل
بس خلي نتأكد بالاول
طبعاً هي تحجي واني بطني انمغصت
بس خلي اشوف شلون ادبرها واجيبلج شريط اختبار حمل من الصيدلية
وبعد فترة كدرت ريم تدبرلي شريط اختبار حمل
وحللت وطلعت النتيجة ايجابية يعني اني حامل
وبوقتها انتكست حالتي واحتارت ريم شلون تداري على
السالفة
ريم -شوفي هسة تگومين تتصلين على فراس وتحجيلة
على المصيبة الي راح توكع فوك راسنا اذا ما اتصرف
وكليلة خلي يجي ويجيب اهلة
ويحجي وية بابا واخواني
حتى يستعجل بالزواج
والله وسويت الي كالت عليه ريم
بوقتها فراس انصدم من الخبر وانخبص خبص
ووعدني انه راح يجيب ابوه ويجي ويحجون وية بابا يگلولة ان همة مستعجلين وعندهم عمهم ديجالع ويخافون يموت وتطول السالفة
وجان يرجع بابا من السفر
والتهة بسالفة ريم واجو عيالها وزوجها وكعدو وية بابا
حتى يعتذرون عالصار
وبوقتها بابا لعب بعماد طوبة
وخلاه ميندل حلكة وهو بس مدنك ومحجة اي شي
ودخلت لعندهم ريم وشرطت عليه
ان يحطلها نقال
وقبل بشرطها
وخلصت السالفة برجوع ريم وبنتها لبيت اعيالها وظليت اني لوحدي محتارة بالورطة والوگعت فوك راسي
واتصلت على فراس بالليل وكلي الباجر احنا جايين اني وابوي بس عدنا سالفة تخلص واجيكم
والله وجان يصير يوم ثاني وانتظرت جيت فراس
على احر من الجمر
اني ما اريد اي شي بس كون الله يسترني
يعني والله ميتة من الخوف من اهلي واخواني
والله بس يدرون بسالفتي يذبحوني
ومايرفلهم جفن
ظليت احوم
لمياء -شبيج سهى بس تفترين والله دوختيني
سهى استغفر الله ياربي اجتني هاي الثانية على الاساس اني ناقصة
سهى -مبية شي هسة انتي شدعوة عليج مركزة وياي
جنت احجي وية لمياء وبهاي الاثناء سمعت عياط امي
ركضنا اني ولمياء
سهى -خير يمة شبيج
اباوع عليها تلطم و تضرب على وجهة
حسيت بجسمي باد
ابو سهى وهو مدنك راسة
-بابا سهاوي فراس انطاج عمرة مات
......

[ملكةه]

اسفه اذا القصه محلوه لان اني مثلكم دا اقرا وانشرها

[ملكةه]

لحظه قبل م تنشري ههه
اترجاك تكون النهاية سعيده
القصه السابقه كانت حزينه جداً ،
قطعت قلبي ،
يومين وانا حزنانه عليها '(

ما ناقصنا احزان ومئآسي ،
خلي نهايتا سعاده لو سمحت ^_^

اكلنا كفوف من الدنيا كثير ، لا تخليها تعطينا كف زياده يرجع لنا المواجع والذكريات اللي يا دوب نسينا شوي منهاا >_<

،،

بعيده عنك الاحزان انشالله
نورت