اِجت
ها ذيچ هيه الشمس ، علْو أذراع
تلگوها بهلاهل تفگه نشميه
بطت
مستحيه عرگانه
نشفوها بشطافيكم
اِجت شگره الضفاير والمتون الكَاع
عفيه أزلام ماي العافية
والدهله والنعناع
ندهتوها وجتكم بالذهب كلّه
اِجتكم بالذهب كلّه تحنّي الگاع
يل دمكم رفيفه شراع
بعدها بأول المركاض
تصهل خيلكم نشطه
وندهتوها ذهب عرگان
وبعد بيكم وهج غيره اليعلّيها
وتوگف عدل فوگ الراس
دمكم موش حالوب أعله صفنه وماع
دمكم مهره حمره تفوج فوگ الفوگ
وتجيب الشمس للگاع
دمكم بالشمس طمّاع
دمكم حار كلّش ، يشلع الزنجار
وبيارغكم بعد شبرين من ألله
بيارغكم هلاهل تنده الغبشه
وتطم العار
يالب الحچي والساس والنوماس
مابيكم سبوس الباع روحه بخرده للوصخين
تعرفون الدرب .. والعثره وين تصير
ووين آيوكّر الهدهد
ومجان الذيب والخنزير
وتْعرفون
ياهو من البيارغ ينشره وينباع
لذيذه أحرورة البيكم
أشكثر من ساسكم بيكم !!
جمر غيره وتتن حار
وعتابه بطور عگار وغنه اجنوبي
وانا لياويل ويلي اليشلع الصرّه
اليحلّي الگهْوَة المرّه
اِيخسون الماعليهم لون حنطتكم
غريب الما أمهفيه بوجهه سعفتكم
غربه الماتبچّيهم نعاويــــكم
المادگت بذنهم رنّة الفنجان
غريب الما اتسكره بحّة دويخل
ولاسوده أشلهاني بحنجرة مسعود
ولانخل السماوة وشاتل العودين
يادخانكم ... ذرّة كحل للعين
هايسباع
اِيخسون الجاسوا أكْذل من حرايركم
اِيخسون الوذّنوا حيله بمنايركم
اِيخسون اللطخوا بالدم
فراشات ومراجيح وخبز فقره
اِيخسه الباك بأسم الله صرايركم
اِتخسه ذيج اللحايا الما تعرْف الله
وذاك التبّت اِيده الفكَس عين العيد
وحمّال الحطب واليضحك من بعيد
اِيخسون أرحامهم نجسه
هايسباع ، غُطّوهم ظهر الآحمر
الحراميه تفكَهم ورك صفصاف
اِيخسون أرحاهم نجسه
التفك من دونكم خرسه
غطّوهم ظهر الآحمر
ذوله أكشاش مَدّه وروجكم يصهل
ها يزلامنا أسم الله أعله صافيكم
ها يزلامنا آسم الله أعله عاليكم
بعدكم للنجم نيشان
اسم الله أعله العراق الخاصره الحره
اسم الله أعله النثايه وعفّة الدره
وعلى اليمّه ودللّول
وعلى أطويراتنا الكَمره
بعد ، وأسم الله عالبرحيّه
ذيج الزاجيه النخله وكَصايبها
وكَصايب كل حبايبها
يا ولْد الشمس والماي
بعدها أخيولكم نشطة
وندهتوها ذهب عركان
اجت
ها ، ذيج هيه الشس علْو آذراع
وبعد تعله وبعد تعله
لمن توكَف عدل عالراس
لمن تصبح سنابلكم ضفاير نور
الجراد أيدوخ بيها وما يجد لزمه
وأعاهدكم الحب يعود
أعاهدكم الراح يعود
أعاهدكم
يرد الله الصدك لمخاوي صفنتنه
ومصيبتنه وصريفتنه
أعاهدكم ، يرد يونس لمحرابه
وصليب الهاجر بروحه وشرف سنجار
ويرد ميمر الجوبي وفر جفافيّه
وهلا وميّة هلا وميّه
وحمس كَهوه أعله نايل حار
وترد بغداد باكر ، ثوبها أسم الله
وتراجيها النجوم وثوبها اللبلاب
بأصابعها تحنّي الباب
وتْمد من عشبها أبساط للغيّاب
وحمس كَهوه ومقام أوشار
وهلا ويا نور عيني ويا هليّه
وترد دجله وفرات العافيه أذراعين
شبكَة ملكه فوك الكَاع
شبكَة ملكَه موش أوداع
ويرد الطير والخير وأمان الله
والهور ومشاحيفه وغراريفه
وزواويفه وسواليفه
ويرد البنّي والكَطان والشبوط
ويرد شط العرب بوسة ثلاث آشطوط
رد مع اقتباس
