بديار النزف والذيب
غبشة الليل يكَعد والشموس تغيب
شمس طفلة بمهدها تفز
تفك رموشها حزمة ضوه وتغيب
شمس بكَماطها وتغيب
يطفيها الرمد وتغيب
جحيل وليل
وجناح البلابل قيد
والشجرة سجن تعذيب
وين يروح بلبل مال أله غير الأشجار أحباب
وين يروح بالظلمة ويدك يا باب
وره كل باب واكَفله قفص تعذيب
غبشة الليل يكَعد والشموس تغيب
جحيل أزركَ
ينث فوك الجرح الأزركَ مخايط
والزراكَ يسيل دم أزركَ من التعذيب
يهذا الما أشوفك بس أعرفك زين
يهذا النبي الما أدريه طايح وين
أدفن بالرمل دمك عَدوّك ذيب
شد جرحك يعمي لا يجيك الذيب
يا هذا النبي المثلي يتضوه بضي
هاي الديرة طينه يفوح منها الدين
عَجبْ غربان سود تفكَس بهالطين
طالت كَامت الليل وعوه الواوي وتحنه الذيب
ونزل ماي العمى بالعين
طفت ، طفت والجيلة عيب تصيب
يبس جرف العشب والكَاع عيب تجيب
شملذك يا أمـس يَميّة البرميل
شحلاتج يا شمس يا مهرة الطيبين
كَبل جان اعله جف المي
كَبل جان بسَمار الفي
عشب يتشلبه ع الحيطان
وهوى روزاين أهلنا يطيب
جان الماي غطوة تشجر الكَيعان
جان البيت حضرة امشرعه البيبان
جان الليل مامونه وغطه البردان
كَبل جان المشي بترتيب
أسف مهرة الديرة يكض رسنها الذيب
يهذا النبي الما أدريه طايح وين
لا توكَف يجيك الذيب
لمن باجر يجي ونشوف
لمن تطلع شمس ونشوف
لمن بخيوطها نروف الجرح ويطيب
لمن تلحكَ الرطبة وربعك يفرعون
أدفن بالرمل دمك عَدوّك ذيب
شد جرحك يعمي لا يجيك الذيب
عبد الكريم القصاب - ميسان
رد مع اقتباس
