بارت26
ماحجة ولا كلمة ندار علصفحة لثانية ونام شكد كرهتة بهاي الحضة وشكد كرهت روحي لأن حبيتة
مشيت نضربت بشي برجلي دنكت لزمتة بطل كزاز ركزت بي بطل شرب
واني اكول شبي مسطور ونايم
اتاري يشرب لنذل شيفرق عن وليد اوووف ياربي صدمتي بي ماتنوصف
نزلت علة كيفي
كعدت بلحديقة جنطتي عفتهة بلمطبخ ساعة ب12 ضليت كاعدة وابجي بلحديقة لنوم مامر عيني لحضة ولانعست
تانيت لفجر طلع طبيت للمطبخ
فتحت لضوة علة كيفي توضيت وصليت وندعيت الله يوكف وياي
لبست جبتي ولشال صعدت علكرسي ونزلت لمفاتيح مال باب لشارع لحجية تعلكهن ببسمار فوك باب المطبخ
اخذتهن فتحت لباب ورجعتهن لمكانهن لبست جنطتي وطلعت وصلت للشارع اجرت تكسي
وين
للكراج
ليش رايحة لهناك وين رايحة ماادري اريد اطلع من بغداد وهاذهو
وصلت للكراج نطيتة فلوسة ونزلت
طبيت للمكان هووسة وعالم كوومة وسيارات لسواق يصيحون بصرة سماوة عمارة كربلاء
نجف مجف نجف
اي نجف
اريد اروح للنجق اريد اروح الأمير المؤمنين اريد اروح لابو لأيتام لابو لحسن الي مايرد احد
صعدت لسيارة وكعدت يم مرية لابسة عباية
ضلت تسأل بية انتي منين وين رايحة وليش لوحدج واني كوة احجي واجاوبهة
لهناك نامت وخلصت منهة
اباوع علطريق واتذكر لمن اجيت للنجف اول مرة وجنت متخيلتهة اخر مرة بحياتي وية امي الله يرحمهة وخالتي جنت صف ثالث ابتدائي جنت طفلة وهستوني استكشف الدنية جانت لطلعة عبارة عن لفة فلافل وحلاوة دهينة واضل اتوسل بامي تشتريلي لعابة وابجي واخبصهة لحد ماتحطهة بيدي يلله ارتاح واسكت
تمنيت ارجع لذاك ليوم تمنيت امي ترجع وكل هاذ ميصير
كل الي شفتة بحياتي كلهة بكوم والي شفتة لبارحة بكوم ثاني
سيف موبس اول حب بحياتي
سيف اول ايد تطبطب علية وتكلي شبيج اول انسان وكف وياي وساندني
اول شخص من اباوع بعينة ماشوف نضرة لأشمئزاز الي جنت اشوفهة بعيون فاطمة وكرايبهة
حبيتة حيييل تمسكت بي ونزعت ثوب لخوف علمودة وجازفت لان ماردت اخسرة تحديت حتى فاطمة الي بحياتي ماتجرئت احط عيني بعينهة واكللهة كلمة لا
بس علمودة سويتهة
نصدمت بي صدمة عمري
الي عشتى وشفة عد فاطمة ارحم بهواي من الوجع الي جاي احسة هسة
لطريق كلة بس ابجي كلبي نغزة موطبيعة بي
حبيتة اي ومن كل كلبي
طفلة محرومة ولكيت بحضنة ابو وام وحبيب وزوج جان الي كلشي وفجأة مات كلشي بعيني الي بداخلي شعور شبيه بشعور لأم لمن تفقد ضناهة
بس الفرق اني موفاقدة ضناي اني فاقدة دنيتي فاقدة روحي سندي ضهري كلشي ممكن تحتاجة البنية وفوك هاذ كلة شعور لصدمة شي صعب ينوصف كل انواع لوجع ضايكتهة وجربتهة
وجع لحرمان
وجع لخوف وعدم لشعور بلامان
وجع لضرب الي لسة اثارة بجسمي
وجع لذل ولتهم لباطلة وجع لفقد
بس الوجع البية يختلف عنهن كلهن اقوة من اي وجع حسيتة بحياتي
يصعب علية اوصفة بكلمات
مرت لدقايق طويلة كلش دقايق متوجهة بيهة لأبو لأيتام ازورة وبعدهة وين اروح ماادري
وصلنة للكراج نزلت لناس كلهة تباوعلي لأن لابسة جبة توجهت للأمام ومن اقرب محل عبي شتريت عباية ولبستهة
وصلت للمقام اول ماطبيت هلن دموعي بعدني باول تفتيش
وصلت للقبر كعدت بلكاع يم لقبر وضليت انحب ولازمة لشباك بدية ماهديتة ابد مثل لغركان ولكالة كشاية وتمسك بيهة
ها يابو لأيتام اني بحضرتك يامولاي محد رحم بحالي ياامير المؤمنين
اجيت استنجد بيك لأن كل الي ستنجدت بيهم خذلوني
ربي موت كل يتيم
الدنية مابيهة علي
وانتة معروف ماترد الي يدخل حضرتك
احلفك بسبي زينب ودموعهة احلفك بجفوف ابو فاضل وعطش اطفال الحسين
احلفك بصدر الحسين الي داستة الخيل
اريد ارتاح تعبت وحق رب الأكوان تعبت
انتة مو كافل لأيتام اكفلني بعطفك محتاجة دعائك مولاي دعيلي يم ربك اريد ارتاح
ماشفت شي من حياتي بس لضلم ولجوع ولذل ولحرمان وانتة ماترضة بلضلم ها
يا اسد الله ها يابو تراب
تردني واني بحضرتك ترد دموعي الي حتة عرش الله يهتزلهن
تتذكر شكد ستنجدت بيك بيوم اعتدة علية وليد مولاي وليد مارحم بحالي ابد ولا احد نقذني منة
شحجيلك يابو الحسن وانتة اعلم بحالي مني
من طفولتي ماعرفت غيركم سند ولساني مالهج غير اسمائكم كلهة عافتني امي وابوي لاتعوفني مولاي مالي غيركم احسبني وحدة من اطفال لحسين واني ماعاصية ربي والله وحدة يشهد علية
ضليت مجلبة بلشباك وابجي واشهك ولعبرة خانكتني بجيت بجي مال سنين الدمعة من تنزل تغرك وجهي دمعة ضلم وتطلب لأنصاف من امام عادل مايرضة بلضلم
عباتي وكعت وحجابي تخربط لنسوان كلسا وحدة تدوسني برجليهة بس ماهديت لشباك احجي وية لأمام بصوت عالي وحسيت بشعور كلش غريب رهبة تملكت جسمي كلة عركت وكمت ارجف جسمي تبنج اريد احرك لساني مااكدر وكعت بلكاع وغمضت عيني اسمع اصوات كومي ماما شبيج
جيبو ماي
كامت ترجف خاف بيهة صرع
يا امير المؤمنين ساعدهة
محد وياهة وين اهلهة
نسوان يحجن وهوسة وضجة كلشي ماافتهم بس ماكدر افتح عيوني ولا اكدر انطق
دقايق
يق ونفصلت عن كلشي كأنه نمت او رحت لغير عالم
مكان ابيض كلة نور فارغ ومحد بي واني علة نفس حالي متمددة بلكاع ومااكدر اتحرك اجتني مرية لابسة ملابس سود بس كانه ملابس وحدة بدوية ماطالع بس عيونهة تقربت يمي مسحت علة راسي جان تكولي هاج فتحت اديهة بيهن ماي
تدنت علية ذبتة علة وجهي
بعدهة تمسح بوجهي جان اجة رجال ماشفت منة كلشي بس اسمع صوتة
كللها ام لبنين وصلتي امانة حيدر يلله كومي اني كمت ارجف من سمعت اسم ام البنين يعني ابو الحسن سمع ندائي يعني مولاي لتفتلي وراح يخلصني
راحت المرية وية لرجال واني من راحت يلله كدرت احرك جسمي فتحت عيني نسوان وزلم داير مدايري وخدام العتبة
كلهة تصيح الهم صلي على محمد وال محمد ونسوان يمسحن بملابسي يتبركن بية
اجاني رجال معمم كلي بنيتي شنو شفتي احجي
ليش عمو انتو شفتو شي
كوة انطق وحلكي يرجف وعيوني يصبن دموع وادية كوة احركهن عبالك جامدات
لا بنيتي ماشفنة شي بس انتي عركتي كللش وترجفين ووجهج كام ينور شكلج كلة نكلب عبالك ملاك صرتي موبشر شنو صار وياج شفتي شي
اي شفت ام البنين وغسلت وجهي
اني كلت هيج وكلهة كامت تمسح علة راسي وملابسي ويصلون علنبي
بعدين كوموني لخادمات مال لأمام نطني ماي واخذني بمكان فارغ بلصحن سألوني جاية لوجدج كلتلهم اي
انتي مريضة
لا مابية شي
لعد عندج مشكلة
ردت احجيلهم بس خفت اني بديرة غريبة ومحد وياي خاف يستطمعون بية لو عرفو عني شي عافني وراحن كمت جبت قران قريت بي وضليت اتشكر من ام لبنين ومن امير المؤمنين بس لرهبة بعدهة بية ودموعي مابطلن ابد
لهناك حسيت روحي نعست حييل خليت جنطتي جوة راسي ونمت
مادري شكد نمت بس كعدت لكيت لدنية ليل عاينت علساعة بل9
طلعت برة شتريتلي لفة اكلتهة ورجعت طبيت ضليت كاعدة بلحضرة ناس تروح وناس تجي لمكان كلش جبير بس كعدت قريب علقبر وضليت اصلي واندعي ابد ماتركت لدعاء
صارت ب12 نعست خليت جنطتي جوة راسي رأسن غفيت ماصحيت الة علة اذان لفجر طلعت برة توضيت ورجعت
مر شهر واني بلامام تلفوني ماجبتة وياي ولا ادري عنهم شي
هواي اشوف عالم بس ابد ماحتكيت باحد اخاف كلش من لناس اذا همة دمي ولحمي مارحمو بية لان مالي ضهر مو هدور لغربة
ضليت هيج يومية اطلع اكلي لكمة واسبح بلحمامات واتوضة واطب اكضي لنهار صلا ودعاء وابد مااحتك بأحد وكت لنومة بليل اشوفلي مكان زوية فارغ والف روحي واخلي فلوسي بصدري وجنطتي جوة راسي وانام مرات يخلونة للصبح نايمين مرات يكعدونة مايرضون
اذكر سيف مرات واكعد ابجي اشتاقلة هواي بس من اذكر الصار اكول كافي طيبة كلب واقشمر روحي واكول نسيتة والهي روحي بلصلا ولزيارة لو اطلع برة اكل
احاول شكد مااكدر مااصرف هواي صح هواي فلوس عندي بس بليوم مااصرف اكثر من 2000
دينار ومع ذلك بداخلي خوف موطبيعي اكول لو خلصن فلوسي وين اروح
مر علية 3 اشهر واني بعدني بلأمام مااعرف اي شي لاعن سيف ولا عن خالتي ولا مرة فكرت اتصل بأحد هنا راحتي يم ابو لأيتام
هنا محد يأذيني ولا احد يكدر يطردني
لخادمات مال لضريح تقريبا كلهن كامن يعرفني ويسألني شعدج هنا ليل ونهار نشوفج شنو ماعدج اهل
مرات اضعف واريد احجيلهن اريد اشكي هم جبال مكوم علة صدري بس اكول لا مهما يكون اني بنية وغريبة اكيد يطمعون بية
ضليت كل وحدة اكلهة شي
مرات اكللهن اني جاية حملة وماعدي فلوس انام بفندق ومرات اكللهن ناذرة بس محد منهن اذتني ابد ولو حتة بحجاية
واني لكيت روحي وراحتي يم لأمير كلما اختنك بلعبرة وتمرني لذكريات اروح يم لقبر الزمة وابقة بلساعات ابجي وانخة بي لحد مااخوة من لبجي يلله اهدة
مااذكر مر علية يوم اذا مالزمت لشباك وفرفحت ولنسوان كلهة تضل تبجي علة بجيي
ولخادمات يكتلهن لفضول يضلن يتسألن بية ويستفسرن مني بس اني كلعادة خوفي يمنعني احجيلهن
ثقتي تزعزت بكل لناس من ورة الي شفتة صرت صعب اثق بأحد وكمت اخاف اتعامل وية لبشر وابتعد عنهم والهي روحي بلزيارة
مرت سنة وشهرين علة تواجدي بلضريح لخادمات عرفني وبطلن حتة يسألني بعدني علة وضعي اكلي لكمة يومية واكضيهة صلا وزيارة هواي شفت ناس اعرفهم جوارين وكرايب فاطمة وناس شفتهم بلعرس بس دائما من اشوفهم الف روحي بلعباية وادور وجهي عنهن حتة لايشوفني
وبأخر فترة كمت اصلي لأمي قضا مافي الذمة والهي روحي واحاول شكد مااكدر اقتصد بلفلوس وبأيام الوفيات الم توزيع وثوابات شكد مااكدر فاكهة وعصاير وكيك وببسي اضمهن واضل اسابيع اكل بيهن حتة اوفر فلوس ثيابي بادن وبلشتة صارن مايدفني كمت شتريتلي ثوبين قديفة وملابس داخلية وبجايم
2015 شهر 5 يوم 7
فلوسي خلصن وبعت لتراجي ولمحبس وماباقيلي من فلوسهن غير 60 الف ولخوف تملك كلبي خايفة اذا خلصن شلون بية شاكل وششرب وين انطي وجهي لليوم ماعرفت اي خبر عنهم ولا وصلني شي من بغداد ولا حاولت اتصل بيهم
شردت من همومي من ضيمي من لضلم الي عشتة شردت حتة من نفسي وضعفي وقلة حيلتي وهنا مرتاحة حييل صح لوحدة تأذي بس ارحم من حياتي قبل
جان يوم خميس وكاعدة اصلي اجت يمي مرية تحجي
كويتي جبيرة بلعمر ووياهة 3 جهال بنية و2 ولد كلتلي انتي باقية هنا
اي خالة باقية ههههه مقيمة منذ الأزل
عادي اعوف عيالي عندج ازور وارد اخذهم
اي خالتي عادي خليهم
يدة ضلو هني موتتحركون من مكانكم ارد الكاكم بمكانكم
وصت لجهال وراحت كلسا توصل لباب لقبر وترجع تكلي فدوة ديري بالج عليهم مااكدر ادخلهم ازدحام خاف يضيعون
زارت المرية بسرعة وطلعت وجهة مخطوف عبالهة بكتهم شفتهة من بعيد كلت للجهال ذيج امكم تدور روحو صيحوهة
واحد.من لولد كلي هاذي مو امنة هاذي يدتنة امنة متوفية
كطع كلبي من كلي امهم متوفية اوووف احسن من حالي عاد عدهم جدة حنينة ولامتهم
صاح الولد للمرية واجت كعدت يمي وتتشكر مني كملت صلاتهة واخذتهم وراحت
ثاني يوم بليل هم شفتهة اول ماشافتني اجت كعدت بصفي سلمت علية وهم خلت لجهال يمي زارت ورجعت اخذتهم واحد واحد تزورة من بعيد كعدت يمي صلت وضلت تسالني
انتي شسمج ومنين وليش هنا
جاوبتهة بس ماتعمقت
شفتهة شلون حنينة علة احفادهة وتخاف عليهم ضلت تحجيلي عن امهم شلون ميتة خطية محتركة بلطباخ ومفحمة وهاذ كلة صاير كدامهم وواحد من لولد لزغار صاير بي مرض نفسي من شايفهة
تكلي اني وابوهم نحاول قدر لامكان نعوضهم عن امهم شعور اليتم صعب
اوووف ياخالة انتي تححجيلي عن شعور اليتم
اذا همة امهم ميتة اني يتيمة ام وابو
ضلت تسأل بية واصرت تعرف قصتي
واني فعلا جنت محتاجة احجي هموم كلبي واشكي حجيتلهة كلشي ضلت فاكة حلكهة تخبلت وكلسا تكلي حلفي
اخر شي من حجيتلهة يوم حنتي فرفحت من لبجي جرتني حضنتني وكامت تبجي وتدعي عليهم كلهم
عافت احفادهة يمي وكلتلي هسة اجي
نص ساعة ورجعت وياهة .......
رد مع اقتباس
المشاركة الأصلية كتبت بواسطة يوليوس
