هنا

[ملكةه]

حقيقة القصة جداً مشوقة
عشت احداثها بشغف وحزن
اثر بي موت زيدون المفاجئ الذي غير مسار الامل الذي كانت ودق ترجوه
وقساوة الاخ الجاحد لنعمة الاخوة وطبقية الاب المتعنصرة
وآهات جواد الذي عانا من عدم الانصاف في قصته مع ودق
وما سيزيد الطين بلة ذلك الـ بلبل الذي خرج لهم في ورقة يانصيب

سيدتي
ارجو ان لا تكون هذه نهاية القصة
فانا متشوق للقادم
تحياتي مع الود

وعلي بعد بيه كومه بس والله مادا لحك واليوم كهرباء حتـى صورهم عندي بس احاول اكملها انشالله

[ملكةه]

صدك تبچّي... نزلت دموعي على زيدون...

زيدون اكثر واحد حبيته اويلي

[ملكةه]

بارت 17
قفلت لباب ودكيت الرقم
دك التلفون
ورة دقايق ردت بنية شابة
الو مرحبة
مراحب عيني تفضلي المن رايدة
انتي رقية مو
اي بلي منو حضرتج
اني ودق
ودق حبيبة جواد ؟
اي
انتي؟
يووووو شكد خابصنة بيج جواد ماعدة سالفة غيرج ويومية جاينة مكتول من وراج

ههههههه حبيبي سودة علية ادري هاذة اخوي جلب حشاج هيج سوة بي

اي ودوقة والله واجة ليوم وسمعت صوتج وتعرفت عليج

حبيبتي اتشرف بيج اني هم جنت اتمنة اتعرف عليج

بلله وصفيلي شكلج

انتي شايفتني بس متدرين واني هم شايفتج

شلون شوكت

بحنة زهراء

وصفتلهة شكلي وتذكرتني كالتلي يوووو شكد جنتي محط اﻻنضار خو امي ماشالة عينهة عنج غير لو تدري انتي هاي هسة تكوم تهلهل ضلينة نسولف حبيتهة كلش اجتماعية وتشبه جواد وسوالفة

بعدين كلتلي راح اصيحلج جواد راحت ورة شوية حجة جواد

جواد:ولج وينج موهبطتي كلبي ام احمد تكلي طلعو همة وكرايبهم واخذو جنط كووومة عبالي شووين سافرتو

يمعود دسلم بﻻول

حبيبتي اعتذر بس والله كلبي نار عليج

سﻻمة كلبك احنة ببيت خالة ماما بلعمارة رحنة نخطب الحسام

ها وشوكت تجون

لو باجر لو عكبة

خوش اريد اشوفج من تجين

موذاك ليوم شفتني

اي بس ماشبعت منج والله مشتاقلج

ماشي خل ارجع والله كريم هسة اروح ﻻاحد يصيحني

خليج شوية بعد والله مشتاق اسمع صوتج

حبيبي خاف ينتبهون وتصيرلي مشكلة اني بعدين اخابرك بس ردت اطمأن عليك
ماشي روحي بس انتضر منج اتصال
خوش
احبج ودوقة
واني هم والله اموت عليك

سديتة من جواد وكمت ردت افتح الباب باوعت بلكاع اكو
خيال مال ثوب من جوة لباب مبين بس فريت المفتاح بلباب حسيت احد ركض من يم الباب سمعت خطواتة فتحت الباب ماكو احد معقولة وحدة من خواتي لو يجوز فتون ﻻن بس هية تدري فكرت اروح اسألهة رحت لكيتهة مطلعة صدرهة و جاي ترضع ابنهة كعدت يم ندى اختي كتلهة ندى فتون من شوكت ترضع بأبنهة كلتلي صارلهة تقريبن عشر دقايق يعني مو فتون الي جانت واكفة رجعت سألت ندى كتلهة اني من طلعت هم اكو احد طلع وراي
ندى :اي البنات كلسا يرحن للمطبخ ويجن
يعني منو من لبنات
رباب وزينب وخوات فتون
يعني بس ذني كامن زين من الكرايب هم اكو احد كام زين سكينة هم كامت
شبيج ودق بس تسألين شمدريني اني هية صايرة هوسة شو وبعدين وين رحتي مساع بلبل سأل عليج
شنووو
شيريد هاذ يسأل علية
شمدريني طببو يطك صور وية اختة عشتو هوة وابوهة باوعلي كال لعد وينهة ودق شو ماكو كتلة مادري يجوز برة لو بلمطبخ
خلصت الحفلة وكلمن راح لبيتة بقو بس كرايب ماما خاﻻتهة ثنين وبناتهن ومرت اخوهة باتو يمنة
بليل كمنة كلنة البنات للمطبخ نسوي عشة اني وخواتي وخوات فتون وبنات خاﻻت ماما لتمينة كل وحدة تسوي شغلة ﻻن ماشاء الله لبيت مليان اجة بلبل جاب مسواك كووومة السنك صاير يم باب المطبخ الخارجي اني واكفة اخسل المواعين الي يستخدموهة اثناء الطبخ ﻻن موهلكد اعرف اطبخ
اجة بلبل جايب مسواك وشغﻻت وصو عليهة كلي ودق تعالي خذيهن غسلت ايدي ورحت يمة مديت ايدي جاي اخذهن هوة بعدة ﻻزمهن رفعت راسي كتلة هدهن شلون اخذهن وانتة مجلب بيهن لكيتة صافن علية عصبت حييل من تصرفة لعب روحي كتلة بلبل شبييييك متسمع بصياح وتنتر كلي ها لعفو هدهن بيدي وراح
كملنة العشة كووومة وبدن البنات يصبن اني رأسن رحت كعدت ﻻن ادري بلبل راح يجي ياخذ اﻻكل مال الزلم ويضل يتبصبص وﻻيستحي
تعشينة وكملنة رحنة نحضر بمﻻبسنة ونصفط جنطنة ﻻن باجر من الفجر نطلع لكربﻻء فرشتلنة فتون ومددنة بفراشاتنة لهناك اجتني فتون كلتلي ودق تعالي اريد احجي وياج رحت وياهة للمطبخ لكيت بلبل واكف بعدني اريد احجي اكللهة شكو كالت بلبل عندة حجاية وياج اني راح اوكف بباب المطبخ علما تكملون
واني ماعندي اي حجي ويا تصبحون علة خير
بلبل :ودق اكفي هنة كلمتين والله
تفضل
اني احبج
شكرا
عرفتة راح يحجي هيج عبالة ميتة عليه ميدري اني بنضري ماكو رجال بهلدنية غير جواد
عفتة وجاي امشي ركض علباب سدة وصار كدامي
بلبل :شبيج اني شكلت ليش عصبتي اني حبيتج حب طاهر يشهد الله مع انو انتي مو من ثوبنة بس كلبي ختارج شسوي واريد اخطبج ﻻعبالج العب عليج انتي عرضي واني مادنس عرضي بيدي
بس اني ماحبك وماريد اتزوج
واني ماكايلج حبيني قابل كل ثنين حبو وتزوجو
وليش متردين تتزوجين الي عرفتة من ابوج انتي مبطلة
اي واذا مبطلة
فتحت لباب فتون كالت اكو صوت جوة امشي ودق ﻻيطلع احد من اهلج رحت وياهة واني افكر بحجي صخام بلبل
شلون ياربي امي بس يوصلهة خبر رأسن تحط الشغلة براس بابا
طبيت بلفراش علكيفي كلهة نامت و مددت يم ندى ضليت صافنة علسكف محتارة بضيمي
ورة شوية طبت فتون خلت شي علميز اشرتلي بمعنا هاذ الج وراحت
كمت شلتة هاي رسالة
جبتهة حاولت اقراهة ضلمة مااكدر واخاف افتح الضوة ويكعدون خليتهة جوة لمخدة وكلت لصبح اقراهة
الفجر كعدتنة امي اول ماشلت راسي من لمخدة تذكرت لرسالة طلعتهة وضميتهة بلجنطة مال اﻻيد بدل

[ملكةه]

نة وطلعنة سلمو علينة وفتون ضلت تبجي خطية وبلبل منين مااندار الكا يباوعلي ساعة يبتسم ساعة يخزر شبي ماأدري صعدنة لسيارات وحركنة بلطريق حاولت اقرة لرسالة ماكدرت ﻻن خواتي بصفي وكميل كدامي بطﻻع الروح وصلنة للبيت اول مانزلنة ركضت لغرفتي اريد اقرة الرسالة حتة جنطتي مال مﻻبسي مانزلتهة من العجلة فتحتهة وبديت اقرة كاتبلي

ودق ترة ادري بيج تحبين واحد وحتة اسمة هم اعرفة اني حبيتج ومن كل كلبي وماراح اخلي واحد يلمسج لو علة جثتي ماراح اجبرج علة شي راح اخليج علة راحتج شوكت متحبين نتزوج رفعي التلفون واتصلي واني بنفس اليوم راح اسوي عرسنة محد ياخذج غيري هاي حطيهة ترجية بأذنج ولو اعرف اموتج بيدي وﻻخلي غيري ياخذج
يبوووو
تذكرت هاذ بلبل الي جان واكف ورة الباب ويتسنط علية من حجيت وية جواد
هاذ منين طلعلي شلون يربي اياد مامكفي هدور يطلعلي هاذ
رفعت راسي احاجي ربي كتلة
الهي رحمتك وسعت كلشي ليش ماوسعتني الهي اذا جاي تختبر صبري فصبري خلص من يوم مات زيدون ومن يوم صارت شوفت جواد حصرة علية واذا جاي تعاقبني فياالهي اني تعبت عقابك شوكت يخلص ياربي حتة الزانية مو هيج عقابهة نزلت راسي ابجي فرفحت من لقهر
طبت ندى هاي شبيج شو كبل ركضتي للغرفة
شوباعيني شبيج تبجين شصاير ولج احجي وكعتي كلبي
ماكدرت احجي
نطيتهة الرسالة قرتهة كلتلي هاي منين
كتلهة من بلبل
كالت خل يولي يمضرط وحدة انتي لجواد ومتصيرين لغيرة عود يهدد ابو عيون الزرك هم بي بلة
ضلت تحجي وياي وتهدء بية كلتلي اصﻻ بابا مينطي لكرايب ماما لتخافين

مسحت دموعي وسكتت روحي بلكوة ماريد احد ينتبه ضليت كاعدة بغرفتي مالي خلك كلشي تانيت اليل يجي كلت لندى اريد اخابر جواد كلتلي خوش راح اجيب لتلفون لهنا حتة اذا احد حجة اكلهم جنت احجي وية محمد جابتة ندى واجت دكيت علة جواد مرتين تﻻثة اربعة ماكو مارد رجعنة التلفون ودور طلعلي هم جديد ليش محد شال التلفون خاف جواد بي شي خاف اهلة بيهم شي طلع لفجر واني مانايمة كمت اريد اتوضة جاي انزل بلدرج سمعت التلفون دك ركضت علي رفعتة طلعت اخت جواد سلمت وكلتلي هاج هاذ جواد كعد حلمان بيج وخبصني تعاي دكي عليهة خاف يطلع احد من اهلهة

جواد :الو هاحبيبتي شلونج ليش ماتصلتي مووعدتيني تخابرين والله نمت يم التلفون للصبح ليش هيج تسوين ولج ميت بدونج وحتة صوتج ماسمعة

هلو جواد شلونك اني موزينة ليش ماجاوبت لبارحة كوومة دكيت عليك ماكدرت احاجيك هناك ﻻن لبيت جان يروش خفت ﻻ انلكف
شكو شبي صوتج باجية
اي
ليش يماي عيني منو نزل دموعج ولكعبة هسة اكلب عاليهة واطيهة بس كليلي منو وياج اياد النذل مو
ﻻ مصيبة جديدة
شنية احجي ماضل بية حيل
حجيتلة كلشي واني اشهك كوة فتهم علية

جواد :ولج كافي بجي فرفحتي كلبي واني مورجال اذا ماخليتة يندم علة ذني حجاياتة

خل اشوف يازلمة وطالع من ضهر ابو يفكر يخطبج لو يتدنالج والله ارجعة ببطن امة
كافي يروحي والله اذيتيني بهلبجي

خايفة جواد خايفة ﻻصدك ينفذ حجية
ولج تخافين واني وياج ماريد اسمع هاي الكلمة بعد هاذ جبان موزلمة الزلمة الحقيقي مايفرض روحة علة مرة وهية مارايدتة وﻻيهدد مرة

اخذتني لسوالف وية جواد كلبي مفرفح ولكيت اﻻمان بصوتة
جاي احجي ويا وحسيت باب اﻻستقبال نقفلت من برة يمة كلبي ماحس بي رجعت التلفون بمكانة وكمت اريد اطلع من لباب الثانية صار بوجهي اياد وبابا
اياد :ولج صااااا..... ولج متوبين الة اذبحج
اني جمدت بمكاني
رفع ايدة كفخني راشي لطشني بلحايط اباولع الحايط نترس دم وشعري يخر دم هم علية رفسني يكليتي برجلة حسيت روحي نشلعت مني اجة بابا لزمة دفع بابا بأيدة حييل
بدت عيوني تغوش وسواد كام ينزل عليهة وبابا وكع بلكاع ولزم كلبة اياد ركض علي ويصيح اجت ماما وحسام ركضو علة بابا اني فايضة بدمي محد تدنالي راسي ثكل غمضت عيوني وبعد ماحسيت بشي
فزيت اني بلمستشفى ويمي ندى راسي ملفوف اباوع لندى تقرة قران وعيونهة دم
كتلهة ندى
اجتني تركض

ها ودق كعدتي ولج فرفحتي كلبي عليج الف لحمد لله والشكر ربي ماقصرت

ندى اني وين شبية

انتي بلمستشفى حبيبتي صارلج 15 يوم فاقدة الوعي

وين ماما بابا وين

دنكت وسكتت

لج ندى احجي بابا وين شفتة وكع اياد الكلب دفعة بلكاع
هسة رتاحي حبيبتي وبعدين احجيلج كلشي

ﻻ ندى اريد اعرف كلشي وهسسسة

ماشي ماشي بس لتعصبين موزين عليج

بابا نشل ودق نشل

شنووووو

اي من سمعج تحجين وية جواد اياد صاحة وخﻻ يسمع
كلشي ومن دفعة اياد وكع علة حافة لباب وصار الي صار
وهسة وينة اريد اشوفة
ودق بابا ميريد يشوفج ومنع كل واحد يجيج وكال اتبرة منة الي يروحلهة واني طلعت عن طوع بابا وخليت محمد يجيبني صارلي 15 يوم وياج عبالي راح تموتين فقدت اﻻمل ويأست من كومتج محد اجة لهنا ولبيت كلشي ماادري عنة وﻻاعرف اخبارهم
جاي تحجي ندى طب علينة

[ملكةه]

بارت 17
جاي نحجي اني وندى وطب علينة حسام

حسام :ها صحت هاي الصكط

اي صحت مساع
انتي شلون تجين يمهة ولج ابوي شكال ولجن شكد صلفات زلم ونحترم ابوي ومانكسر كلمتة واتن تلعبن شاطي باطي محد بعينجن

ندى :حسام علكيفك خطية ستوهة صحت وحالتهة مامستقرة

خل تولي عسنهة ماتت كون هوة اني متانيهة تصحة حتة اعلمهة شلون تستغفلنة عبالهة احنة مكرنين وراح نسكتلهة لو عبالهة تلعب من ورانة والله مايكشفهة حبل الجذب كصير

باوعت علي شلون يحجي دمعت عيوني وتذكرت زيدون من كلي اني اقنع بابا مالج شغل
كتلة حسام اني مااجرمت انتة مو حبيت سكينة وختاريتهة وخطبتهة اني هم حبيت مثلك والولد خطبني علة سنة الله ورسولة ماسويت شي غلط وﻻ نزلت روسكم والله خوية

حسام :سدي حلكج يانكسة وﻻتكولين خوية اني ماعدي
اخت والج عين وتحجين شكد عينج كوية و صلفة تكوليهة بوجهي حبيتي ولج انتي عار واني بيدي اطمة خاف اياد ماموتج اني اموتج بيدي
يلله كومن حضري غراضهة بسرعة

ندى :وين نروح

للكبور التلفجن وتخلصني من عارجن

حسام وين تريد تاخذنة احجي

كووومي ولتحجين لغوة زايدة يلله

راح حسام يحجي وية الدكتور اجت النيرس شلعت الكانوﻻ من ايدي ووخرت المغذي
وندى حضرت غراضي وكومتني بﻻول ماكدرت امشي ووكعت مرتين بعدين مشيت بس جسمي مااحس بي من النوم متبنج
اجة حسام ودانة للسيارة يزمخ ويدفع بينة لشارع يصيح علينة بلمستشفى ولعالم تباوع سوانة فرجة ﻻمت محمد وﻻعبالك خواتة
صعدنة بلسيارة وحرك اني حاطة راسي علة جتف ندى احسة ثكيل وعيوني كوة اباوع بيهن مغمضة بس مانايمة
دارت ندى علية علكيف تحجي كلتلي هاذ طريق بيتنة ولج راح نروح للبيت لتخافين
فرحت وبنفس الوكت خفت ﻻيكون اياد وحسام متفقين يسوولي شي بلبيت
باوعتلهة كلتلهة مامطمئنة ابد نحجي علكيف كلش حتة ﻻيسمع حسام
كلتلي لتخافين اي شي يصير اني اخابر محمد اصﻻ هوة كلي خل تصحة واخليهة تسوي بﻻغ علة اياد واطيح حضة حتة يتوب منهة
طمئنيت شوية لحجيهة بس ماانكر كلبي يدك 100 دكة بلدقيقة رايحة لمصير مجهول ماادري شمنتضرني بلبيت
وصلنة للبيت نزلتني ندى وحسام نزل جنطتي شمرهة من ورة لباب قبل ميفتحة
طبيت وجسمي كلة يرجف رجلية مايرضن يمشن وكلبي احسة يريد يطلع من مكانة ندى نفس حالتي خايفة من ردة فعل بابا وموقفة منهة
طبينة من باب المطبخ دخلنة للصالة شفت بابا وياريتني نعميت وﻻشفتة كاعد علة كرسي متحرك وحلكة معووج ركضت شمرت روحي جوة رجلي ابجي بصوت عالي رج البيت رج واشهك وماما وخواتي يبجن وياي كتلة
سودة علية بابا عساني ميتة وﻻشفتك هيج
بعدني اشهك جان رفسني برجلة ودار وحهة وكعت علة ضهري تدنيت رجعت يمة بست رجلي ودموعي شﻻل كتلة بابا والله مانزلت راسك والله ماسويت شي غلط بابا ﻻتعاملني هيج اني ودق حبيبتك بابا هنا جنت تنيمني هنا تتذكر وااشر علة صدرة وابوس برجلي رفع ايدة الصاحية ضربني راشدي جريت ايدة الي ضربني بيهة بوستهة كتلة بابا ضربني موتني احركني بس ﻻتعاملني هيج بابا والله ماتحمل تزعل علية انتة قطعة من روحي
اشر لحسام بمعنى يوخرني عنة اجة حسام راد يجرني صاحت علي ماما كلتلة عوفهة
باوعت ﻻبوي كتلة بابا انتة هم حبيت وتعرف الحب شنو ليش تحرمون شي الله حللة اني ماطلع مني العيب وﻻ راح يطلع اني تربات ايدك موجنت من يضربوني الولد وابجي تكللهم شواربكم تروح فدوة لعيون دوق الحلوات شوهسة رخصت دموعي بابا ليش ترضالي انضرب ليش ترضة دموعي ينزلن موتكول دموعح ينزلن تيزاب علة كلبي شنو الي سويتة اني عقابكم الي اكبر من ذنبي والله بابا اكبر من ذنبي اباوعلة مايبينلي اي ردة فعل ويدير وجهة عني اجت ندى كومتني طببتني للغرفة وراحت شوية ورجعت كلتلي حسام يكول تبقة بغرفتهة ومتطلع ابد كتلهة بقت علة هاي هية روحي وجاي نطلع مني خلي يحبسني
بليل اجت ندى تلطم كلتلي اياد وحسام خابرو علة جواد كلولة ماعدنة مرة الك وبعد لتدك بابنة و يردون يزوجوج لواحد صديق حسام
شنوووو
اي هسة طبو لﻻستقبال ورحت وديتلهم جاي وسمعتهم يحجون ضليت اتصنط عليهم وهاذ الي فتهمتة
شلون هسة ندى دبريني
مادري شكلج ياودق بابا بعد ميوكف وياج انصحج تقبلين وتفضيهة ﻻن اياد يكل لحسام اذا عاندت احط طلقة براسهة واخلص من عارهة

ولج ندى شتحجين خل يموتوني وﻻيزوجوني لغير جواد ولج تعب لعمر هاذ شلون ارضة بغيرة تحملت كلشي علمودة ماضل مكان بجسمي سالم وتالي اتخلة عنة بهلبساطة شتحجين انتي الموت اهون علية
وعبالج جواد يعوفني اتزوج غيرة

زين خابري وكليلة بلكي عندة حل

ماشي خل ينامون واخابرة
اكيد هسة ضال بالة علية صارلي هواي مامحاجيتة

يا ماكتلج غير هوة يومية يجيج للمستشفى بليل

صدك

اي خطية يجي يكعد يمج يحاجيج يكعد بيج يبوس بأديج يكلج بس كعدي والله مستعد ادفع عمري كلة حتة ارجع اشوف ضحكتج يبجي يفرفح يمج يكسر لخاطر شحالة

سودة علية

لبارحة هوة بليل نام يم جربايتج بلكاع علة روحة ضل ﻻزم ايدج ويبجي اخر شي نا

[ملكةه]

م كعدتة كتلة روح لبيتكم وراح كلي باجر اجي هسة يجوز راح للمستشغى ومالكاج ﻻزم تخابري اكيد ضل بالة خطية شكد مؤدب وحباب مايرفع عينة ابد من يحاجيني ويموت عليج ولج يكعد يبجي يم راسج لحد مايغفة علة روحة من لتعب
اوووف وتكليلي عوفي وتزوجي ولج اتزوج الكبر وﻻ اتزوج غير جواد

ب2 تقريبن راحت ندى تفقدت لبيت كلة وتأكدت الكل نايم جابت التلفون واجت دكيت علة جواد رفع التلفون

الو هاجواد شلونك حبيبي

ودق هاي انتي الهي احمدك واشكرك
يابعد جواد وعشيرتة اروح فدوة لهلصوت ولج ليش هيج فرفحتي كلبي عليج ليلي مانامة اﻻكل كاطعة ولج حتة لحيتي شيبت

سودة علية حبيبي

اسم الله عليج والله لو صايرلج شي ماعيش بعدج ودق ورب الكعبة ماعيش
وين انتي رحتلج للمستشفى كلولي طلعت خوما احد اذاج

حسام اجة علينة وطلعت بابا نشل جواد

ادري ام احمد حجتلي كلشي

حجيتلة علة سالفة حسام واياد تخبل كلي سدي خل افكر بحل وباجر ب10 الصبح اخابرج خلي ندى اختج تكعد يم التلفون ومن يدك تكللهم هاذ خطيبهة

كتلة خوش سديتة ورجعت التلفون ندى لمكانة ونمنة
لصبح كعدت ب8 تريكنة اني وندى بلغرفة ونزلت هية جوة واني بقيت بغرفتي راسي حيييل يأذيني اخذت عﻻجي ورة شوية نعست الدوة بي نسبة منوم بس حطيت راسي علمخدة نمت ورة شوية اجت ندى كعدتني
ندى :كعدي ودق جواد خابر وحاجيتة

صدك وشكلج

يكول باجر راح يجيب مشية زلم ويجي

كتلة موجبت ذيج المرة ومافاد

كلي ﻻهلمرة راح اجيب حتة شيوخ معممين واخلي ودق تحلف كدام الكل انه اذا مات ابوج اسم الله علي راح تتنازل عن كل حقوقهة من الميراث خاف يكولون داخل علة طمع حتة متبقة عدهم حجة

اووووف ياربي والله خايفة ندى

حبيبتي الله يساعدج والله اني هم خايفة عليج هلمرة حسام واياد ناويلج علة شر وحادين سنونهم عليج بس محمد طمني كلي لتخافون اني بضهركم اي شي يصير حطوني بلصورة واني اتصرف

الله كريم بلكي هلمرة الله يلتفتلنة ويرحم بحالنة

علما اجة ثاني يوم اني منتهية

لعصر اجتنة زينب تركض للغرفة كالت اجو زلم كوومة وياهم واحد ﻻبس عمامة وتﻻثة شيوخ معكلين
راحت ندى تتسنط شايفهة اياد من طالع ياخذ
الجاي ضاربهة راشدي وطاردهة خطية اجت اثر اصابعة طابعات بخدهة

ضلينة بلغرفة ماندري شصار جوة واني ميتة من لخوف وافتر بلغرفة ندى ركضت عباب قفلتة كالت خاف اياد يضربج مثل كل مرة

جواد جبت عالم واجيت علة اهل ودق طببونة وحجو الزلم وية خوانهة ابوهة ساكت ميكدر يحجي وكعو عليهم وكللولهم الولد رايدهة ومستعد لكلشي ويكول اخليهة تتنازل عن حصتهة بلورث خاف تكولون داخل علة طمع ضلو اخوتهة يلوصون بلحجي ميعرفون يسولفون

اياد :احنة ماعدنة بنات للزواج كلهن مخطوبات ولزغيرة عمرهة 14 سنة مومال زواج
جواد :اياد كلي هيج اني نتهيت كتلة
خوية كريمتكم ودق مامخطوبة
اياد :ﻻتجيب اسم اختي علة لسانك وانتة شمدريك مامخطوبة عايش ويانة حضرتك شنو

ﻻخوية موهيج بس مرت اخوي صديقتهة وهية تحجيلهة كلشي وتدري بيهة وحجتلي

ﻻ موصحيح لبارحة قرينة الفاتحة وية خطيبهة

هوة كلي هيج واني مابقة بية حيل اريد اكوم اكطعة بسنوني كتلة

خوية لعد اني شبية موطلبتهة مرتين ليش ماتنطونياهة شعايبني الي تأمرون بي اني حاضر ولمهر الي يدفعة ذاك ادفع اضعافة اني

موشغلة مهر هية قسمة ونصيب والبنية مونصيبك افهم وﻻتضل تلح

ﻻ البنية رايدتني الي ليش تغصبوهة الله مايرضالكم

حسام :لك شنو نغصبهة ﻻتضل تخربط بلحجي مالك دخل انتة نزوجهة نحركهة نذبحهة اختنة واحنة مسؤلين عنهة

ﻻموبكيفكم هية بشر موحيوان وبالغة وتعرف تختار الي يناسبهة وتعرف مصلحتهة

سد حلكك لك وكوم اخذ العالم الجايبهم واطلع برة وبعد ﻻتدك بابنة ابد ماعدنة بنات للزواج وميشرفنة نناسبك فتهمت لو ﻻء

لعالم الجايبهم ضلو يهزون بديهم متفاجئين من حجي حسام وخلو وطلعو كلهم بقة بس اخوي زامل واني

صار صياح بيناتنة وتﻻزمنة اني واياد وابوهة كاعد علكرسي يباوع بعيونة فاككنة كميل وطلع اياد برة سحلة هوة وحسام وطلعو بلكوة ابوهة اشرلي بأن اكعد و طلع قلم من جيبة واشر لكميل جابلة ورقة كتب بيهة كلكم طلعو برة بس جواد يبقة
طلعو كلهم حتة زامل اخوي طلع بلشارع وكف وضليت بس اني ويا لزم الورقة كتبلي بيهة

وليدي بنتي ماتريدك ونقرت فاتحتهة لبارحة وهية موافقة ومحد جابرهة علة شي كافي مشاكل و عوفهة تشوف قسمتهة وانتة هم شوف حالك

قريت الورقة ضليت اضحك كتلة عمو انتة شتحجي ودق هاي مو بتك بتي اني
اني اعرفهة اكثر منك ماتعوفني وﻻتقبل بغيري لو تذبحوهة خﻻص

رجع كتبلي ﻻهية قبلت وخلص الحديث وياك تفضل اطلع وبعد اذا وصلت لبيتي يصير حجي ميعجبك

باوعت علي كتلة عمو ماشي اعوفهة وبعد ما اوصل لبيتكم بس عندي شرط واذا مانفذتة ماراح اعوف ودق لو ﻻخر نفس بية

كتبلي شنوة الشرط

كتلة تطلع هية هسة بنفسهة وتكلي ماريدك عوفني واني اعوفهة

باوعلي صفن علية بعدين كتبلي ماشي هسة اجيبهة تكلك بنفسة ماريدك

ودق :اباوع من شباك لغرفة لعالم طلعو كلهم بس جواد

[ملكةه]

بارت 18 نطاني بابا الورقة وبديت اقراهة كاتبلي
باباتي ودق انتي اعز بناتي ومن زغرج فرقتج عن خواتج بلمعاملة جنتي المفضلة عندي بكلشي وماحرمتج من شي ابد حتة من غلطتي ماقسيت عليج طول عمرج تطلبين واني انفذ كلشي تردي مجاب بدون حتة نقاش ربيتج مثل تربية الولد خليتلج مكانة اكبر من حجمج اليوم اني اريد حك رباي وتعبي منج اريد جزاتي علة كل تعبي وياج اني ابو وتعبت اريد اليوم تجازين تعبي باباتي

باوعتلة كتلة شنو تريد بابا تشلع عيوني وتاخذهن بس كلبي يرجف وادري ورة هاي المقدمات طلب صعب

اخذ ورقة وكتبلي واني اباوع علة ادي وارجف واكلة ربي عونك وياي حيل مابقة بية

نطاني الورقة اخذتهة وادية يرجفن بديت اقراهة كاتبلي
بابا جواد برة خطبج ليوم واخوتج مارضو واياد يكول ادفنهة وﻻ انطيهة الة وحسام هم متحلفلج بابا لخاطري طلعي برة وكليلة ماريدك وفضي هاي الشغلة ﻻن الموضوع كبر كلش واخذ اكبر من حجمة انتي بنية وامرج بدينة واحنة قررنة بس جواد مخبل يكول ماعوفهة الة هية بنفسهة تكلي ماريدك

باوعتلة ماردت اضعف وابجي ﻻن من ابجي اضل اشهك وماكدر احجي بس ماكدرت دموعي نزلن رغم عن ارادتي حطيت عيوني بعيونة اريد احجي شفتي ترجف كوة نطقت كتلة بابا ماكدر والله ماكدر بابا اموت والله اذا اعوفة اموت ابوس اديك بابا ﻻتحرمني منة والله خوش انسان وشريف ويصوني

كتبلي :باباتي والله متموتين والله تكبرين وتنسين وتعيشين حياتج وتصير سوالف واني اوعدج اخليج تدخلين جامعة وتكملين دراستج الحياة مو بس حب اﻻنسان ﻻزم يضحي علمود عائلتة شفتي خوانج يومية متذابحين كدام عيني من ورة سالفتح طول عمرنة عائلتنة متماسكة وعﻻقتكم ببعض حلوة من دخل جواد حياتنة دخلت المشاكل اصﻻ عﻻقتكم غلط يابابا والبيت الي اساسة غلط يوكع اول وتالي ها بابا شكلتي

باوعتلة مفرفحة واشهك وكلبي يرجف قبل لساني وجسمي كلة يختض كتلة بابا والله ماكدر ابوس ايدك ارحمني اذبحني وﻻتطلب مني هلطلب بابا اﻻمر مو بيدي والله بابا موبيدي ربي زرع حبة بكلبي ماكدر اني اشيلة من كلبي والله بابا ماكدر اترجاك ارحم بحالي

باوعلي كام يبجي اول مرة بحياتي من نخلقت لليوم اشوف بابا يبجي حتة بموتت زيدون مابجة كدامي جرني لحضنة شبكني بتك ايد وخلة راسي علة صدرة وضل جسمة يختض واني اختض ويا النفس كوة اجرة نتهيت اخر شي وخرني ورجع كتبلي

بابا والله تنسينة محد مات علمود احد الحياة كدامج
و ماراح توكف عد جواد شيباتي ذني مالهن قيمة يمج بابا اني اترجاج ﻻتكسرين بية ونفذي طلبي الوحيد ﻻتنزلين راسي يبعد ابوج والله تخزيت كدام الجوارين ترضيهة بابا لعالم تكول علية بتة مرافكة واحد ويجي يتهجم عليهم للبيت ترضيهة اني السيد هيج ينكال عني حتة الكهوة تركتهة من كد ماسمعت حجي من ورة ضهري ترضيهة خوانج يتذابحون يومية من وراج بابا انتي ارحمي بحال ابوج الي ماضل بي كل حيل ولج بابا والله تعبت من المشاكل اريد لبيت يهدء ويرجع مثل ماجان اذا جواد اعز مني فاني طالع وخﻻص انسي عدج ابو واذا ابوج عزيز علة كلبج كومي وياي وﻻ تنزلين راسي

باوعت علي وعلة شكلة الي تغير كلش وشعرة نترس شيب تذكرتة شلون جان مداريني مثل المي بلصينية شريط حياتي ويا كلة مر كدام عيني عمري خمس سنين ومن نطلع يشيلني مايقبل امشي يخاف اتعب محد بلبيت يتجرء يلمسني عﻻكة الحلويات يومية علة ميز المراية من دون خواتي مصرفي ضعف مصرف خواتي ومن اتمرض يكعد يم راسي للصبح يقرة. ايات انام وافز وهوة بعدة بابا الي مارفضلي طلب بابا الي حتة علغلط يوكف وياي ليوم يريدني اجازي تعبة باوعتلة وعيوني مابقة بيهن دمع الدمعة توكع من عيني كبل للكاع وجهة ينتضر مني اجابة تفرح. كلبة وتنهي معانات هاي العائلة الي فرقت شملهة وخربت لمتهة اني اي اني

داخلي تناقض موطبيعي جواد تعب العمر الي تحملت علمودة كتل اشكال وانواع ولسة جروحي ماطابن جواد الي يكلب الدنية اذا نزلت دمعة من عيني الي سوة المستحيل حتة احبة
وبابا بابا الي خسر صحتة بسببي الي خسر كلمتة علة ولدة وهيبتة بسببي اني
قطعت الصمت الي دام اكثر من عشر دقايق ولزمت ايد بابا بستهة كتلة
بابا ماعاش وﻻكان الي ينزل راسك اسوي الي تريدة وكلبي ادوس علي ويطبني مرض
باوعلي فرح وبجة كمت ويا وداني لﻻستقبال طبيت ارجف احس كل ذرة بجسمي ترجف وجاي تنهار الهوة احسة يحشر ببلعومي ماينزل النفس الي اجرة ماطلعة باوعت لجواد وكف كدامي وعيونة يتفقدن وجهي وينتضر مني اجابة تفرحة وتثبتبلة اني بعدني ويا علوعد
بابا صاير وراي
كلي جواد ها ودوقة يكلولي حتعوفيني احجي جاوبي يلله ردي وكليلهم حبنة اقوة منكم ومن حقدكم

باوعتلة اصعب موقف بحياتي مااتمنا لعدوي بابا نور
عيني وجواد تعب العمر وتالي صبري كلة جواد اول حب بحياتي احلة ذكريات الية احلة ايام بعمري عشتهة بشوفتة وسماع صوتة جواد الي سكن المستشفى لمن تمرضت وشيبت حتة لحيتة الي ماحصل من وراي بس الضرب والمشاكل من ورة اخواني جواد عشك صباي وفرحة كلبي
قو

[ملكةه]

يت روحي وكلت ﻻزم انهي الي بديتةودق :جواد اني ماريدك عوفني اشوف حياتي وكلشي بيناتنة نتهة انساني
طلعت الكلمة منن بلعومي مثل الموس جرحت بلعومي وحلكي وروحي طلعة وياهة كلتهة ومات كل احساس بية نص حيلي نهد والنص الثاني واكف علة شعرة

جواد :مترديني ودق مترديني ؟

سكتت ونزلت راسي ﻻن بس اباوع بوجهة راح اكلة ﻻ اريدك واركض علي واحضنة ادري بروحي

جاوبيييي ولج ردي علية احجيييي
ولج مترديني ليييش ﻻن فقير ﻻن فقير ودق ولج احجييي ﻻتسكتين
كتلج لوتطلبين الشمس احطهة بديج ولج اعيشج بجنة ليش هيج تسوين بية ليش

بابا دفع كرسية بلكوة وطلع وسد لباب ورا وعافني لعذابي عافني انهي حياتي بأدية واحكم علة نفسي وعلة جواد بلموت
جواد كام يصيح ويرجف اعصابة كلهن نطن ووجهة غدة احمر فرفحت روحي ويا وجمدت بمكاني جسمي نشل وتبنج
باوعتلة منتهي الدموع شﻻل والوجه دم وعيونة يجدحن ويصرخ
ولج بشنو قصرت وياج احجي ولج حبيتج اكثر من روحي اخوتج شبعوني كتل وﻻشتكيت وﻻكاومتهم نزلت راسي علمودج لليسوة ولمايسوة ولج اتوسل بلعالم حتة يجون يخطبوج الي وكلهة تكلي منروح اهلهة مايحترمونة
ليش ولج ليش كلبي مادك بس وياج ولج بيوم اسمع مأذينج احارب روحي واضل اضرب علة صدري حتة اتألم مثلج اريد اقاسمج لوجع مالتج اريد احس بي واتأذة مثلج
العالم تعير بية تكلي زعطوطة منزلة راسك وتتوسل علمودهة وتبجي واهلهة يذلون بيك واكول ﻻ العشك مابي مذلة يكولي عوفهة شنو خلصت النسوان اكلهم ماعوفهة بس هية بعيني مرة كلولي كافي ﻻتلزك عوفهة وشوف غيرهة الف وحدة تتمناك اكلهم ﻻ ماعوفهة هاي تربات ايدي ماتحمل فراكي تموت اذا اعوفهة ولج شومامتييييي تردين تعوفيني ولج شومامتي احجييي ولج جاوبيني وين راح لسانج

باوعتلة اريد انطق ماكدر وشحجي وشكول اكلة خنت لوعد اكلة ضحيت بسعادتنة علمود اهلي وسمعة بابا اكلة تخليت عنك وعن روحي وعن حبنة ضليت ساكتة أو بﻵحرى الحجي رفض يطلع من حلكي وعرف انو موكتة يطلع السكوةت افضل من اي كلمة ممكن انطقهة مهما كانت مناسبة لهيج موقف

باوعلي بنضرة عمري ماانساهة نضرة بيهة عتب ولوم وتسائوﻻت هواي رفع راسة ليفوك وكال
ربييييي ربي تشوف بعينك
ربي كلبي مابي حوبة
ربي دموع عيني مابيهن حوبة
ربي سهر ليلي سهر ليلي مابي حوبة اريدك تطلع حوبتي بيهة الهي
راح اعوفج والله اني ماشتري الي يبيعني بس ماتتهنين هاي حجايتي تذكريهة ماراح تتهنين بحياتج وحوبتي ماتتعداج وانشاء الله كل دمعة نزلت من عيوني تنزل من عيونج دم وخصيمج ربي يوم القيامة وﻻمحاللة وﻻموهوبة

عافني وطلع مشيت اسحل بروحي سحل مصدومة من روحي شلون هيج سويت هاذ جواد ودق هاذ تعب العمر ضيعتي بديج ودق راح جواد راح
طلعت من لﻻستقبال بابا صاير ورة الباب اضاهر سمع كلشي بوعلي كام يبجي فتحلي حضنة بتك ايد يريدني احضنة بعديش بابا بعديش تموت كلبي وتريد تحضني
عفتة واخذت الدرج ركض صعدت للغرفة قفلت لباب وضليت اصرخ اصرخ

احاجي ربي كتلة الهي تعببببت تعببببت اخذ امانتك وريحني ربي كافي ماكتفيت بعذابي شنو جريمتي ربي شنو سويت حبيت الهي مازنيت وحق الكائنات مازنيت اصرخ وابجي واملخ بشعري ووجهي واضرب علة كلبي وارجع اضرب علة راسي مادري شسوي نار تحرك بصدري اريد اطلعهة تهسترت شسوي ضيعت جواد بدية اي ضيعت تعب لعمر ضيعت صبر السنين ضيعت حب عمري ضيعتة بدية اني
ماما ولبنات فلشو الباب وحتة بابا هم وياهم اسمعة يحجي بس ممفهوم حجية عبالك طفل وهستوة ينطق
3 ساعات اني مستمرة اصرخ والطم دخلت بحالة هستيرية موطبيعية ربي ضاع جواد مني ضاع اضرب علة وجهي وازلغ بي باوعت ﻻضافري نترسن دم وشعري صاير بين اصابيعي نصة اجة بأدية بكد ماملختة كعدت بلكاع ضليت اضرب براسي بلحايط كل قوتي بحيث الصوت يرج من يطلع احس لباب ضلت تنضرب حييل واني مستمرة اضرب براسي كل قوتي ماحس بلوجعع فقدت اﻻحساس تمامن ورة شوية اجتني حالة موطبيعية جسمي كام ينخض بقوة عبالي بردانة حاولت اتحرك حتة اجيب شي ادفي روحي بي ماكدرت وكعت بلكاع ضليت انخض وجسمي احسة ينشال وينركع بلكاع ماقاومت وﻻ صيحت حسيت هاي نهايتي اي هاي روحي جاي تطلع من جسمي اي هاذ ملك الموت اجة يقبض روحي وينهي قصة عذابي واخيرا هاي سكرات الموت خل يجي جواد يشوفني موكلي متموتين ﻻ جواد اني جاي اموت تعال شوفني جاي اموت بعدك احجي وية روحي بداخلي ولخضة ﻻزمة جسمي وراسي ينركع بلكاع نكسرت لباب ودخلت ماما وخواتي البنات وحسام وكميل واياد امي كامت تصرخ وتلطم علة وجهة وتصيح صار بيهة صرع من وراكم حسبي الله عليك اياد وتولت اياد راشديات حسام وكميل يحاولون يشيلوني مايكدرولي جسمي يرجف بين اديهم واوكع منهم ندى ركضت لجوارينة سستر هية وزينب وبابا كاعد علكرسي ويباوعلي ويبجي بحركة كأنو يكلي اني لسبب
اباوع عليهم واحس هاي لحضاتي اﻻخيرة كأنو اريد اشبع منهم صارت عيوني بعين بابا يبجي ماحصل مني بس الدموع والقهر والمرض وحتة لمن حاولت اعوضة عن الي سويتة بي اذيتة واذيت روحي غمضت عيوني وبعد ماحسيت بلي حوالية صحيت واني


بلمستشفى وبابا وماما وخواتي واخواني كلهم يمي ماعدا اياد شافوني كعدت كامو كلهم علة حيلهم يبوسون بية ويتحمدولي علسﻻمة وماما تبجي وتبوس بدية وبابا اووووف يا بابا دموعة مانشفت وماتقرب يمي احسة مستحي ويحس بذنب تجاهي ميريد يجي يمي يخاف اكون زعﻻنة منة باوعتلة كتلة بابا ماراح تحضني دفعتة زينب الية حطيت راسي علة حضنة وبجيت بحركة بس بدون صوت وﻻحتة شهكة كافي فرفحت كلوبهم علية ماحصلو مني بس التعب والمشاكل وخرت راسي عنة ﻻن حاط عطر نفس عطر جواد ماكدرت اتحمل احسة يجرح بلعومي باوع علة مﻻبسة مبلﻻت من دموعي جرني باسني من راسي

سأراك
سأراك في وهمي حبيبا فرقتنا اﻻمنيات
واﻻن ياكل الهزائم في القصائد دلني
من اين لي وطن بديل
من اين لي حين استفاقت صرختي
صدرا يخفف عن شحوبي الذكريات
انا من حنيني متعبة والجرح تفتكه الجهات
وخديعة اﻻمل الذي فيني تزيد
حيرى افتش فيك عن زمن المجيئ
ﻻكنما ماكنت يوما في سوى وهمي حبيبي
ماكان يمكن ان تراني مااراك
ﻻكنني حصنت نفسي بلتجاهل كي احبك دونما اخشى افتراقا انما
ياكل الوان التعب

دوروني بغيابك وشلكو بية
لكو حضناتك مسويات اثر بعضاي
لكو عافيتي بعدك صايرة شوية
لكو شفتي معطبة وبيهة اثر دخان
منقول (يصف مشاعر جواد )

يتبع
اسفة ادري لبارت يبجي عود جاي احاول ماالح بوصف المشاعر بس ودق قصتهة كلش مؤلمة وﻻزم تاخذ حقهة مني ومن القارء اسفة اذا نزلت دموعكم والله اني هم بجيت هاي ﻻنسانة عانت وتستحق نبجي عليهة دم مو بس دموع

[ملكةه]

بارت 19
جاي نحجي جان دخل محمد خطيب ندى وامة سلمو علية وتحمدولي علسﻻمة اجة لدكتور شافني كتبلي عﻻج وعلم ندى اختي عﻻسعافات اﻻولية تسويهة الي اذا تكررت الحالة واجتني نوبة الصرع كتبلي خروج كملنة ﻻجرائات وطلعت طبينة للبيت صعدتني ندى ورباب
لغرفتي دخلت تمددت
صافنة علحيطان وافكر بيني وبين روحي كافي قهر كافي ودق من دخل جواد حياتي لليوم مامر علية يوم ماعشتة بقهر وخوف وكتل وصياح وفضايح وهوة هم ماحصل مني كلشي غير اﻻذية والضرب تذكرت جمعتة علسفرة تذكرت لمتنة من نكعد نسولف من ارجع من لدوام والكة الكل ملتم والمة ماناقصهة غيري وبابا يصيحني اكعد يمة اوووف شكد مشتاقة لذيج اﻻيام جان لبيت هدوء عائلتنة سعيدة ومتماسكة الكل يسمع كﻻم ماما حتة الولد وبابا هم كلمتة ماشية وماتنزل بلكاع من عرفت جواد لليوم مالتمينة علة سفرة من عرفت جواد بابة يومية ينصدم بواحد من لولد ويتجاوزون علي ويكسرون كلمتة ويفشلو كدام العالم كلة بسببي اني فكرت بس بنفسي بابا ماحصل مني غير اﻻذية بابا نشل بسببي ومو كادر يوكف علة حيلة كافي ودق كافي حطي حد لهلشي وانهي هلعذاب هاي العائلة كلهة متعذبة بسببي اني تحملت علمود جواد كلشي تحملت الي محد ممكن يتحملة اي صح اني سويت الي علية واكثر شبعت كتل المطي مايتحملة اشهر اني محبوسة بغرفتي حصرة علية فوتت الحمام اشهر عايشة برعب واياد واكفلي مثل سجينة الخاصرة سنة كاملة مرت من عمري الشارع ماشوفة بس من اروح للمستشفى واخواني مايباوعون بوجهي وحاسيني عار ومنزلة روسهم ومحسسيني انو وجودي غلط بهلحيات خسرت كلشي خسرت ثقة اهلي بية خسرت سمعتي المنطقة كلهة عرفت بسالفتنة اني وجواد وصرت علج بحلك العالم اني ماخنت اني صبرت لحد اخر قطرة صبر بية اي اي اني مابعتك جواد والله مابعتك كلشي وكف ضدنة حبنة صار عكس التيار ثنينة تعذبنة خﻻص بعد كل حيل مابقة بية صار بية صرع واحتمال يرافقني طول عمري ماحصلت من الحب غير اﻻذية والقهر اني ويني ووين الحب الي عدهة ثمن خوان ﻻزم تشيل لحب من قاموس حياتهة ﻻمو ثمانية سبعة اي سبعة اوووووف يازيدون ياحصرة تبقة بكلبي يانار ماتطفة ﻻخر يوم بحياتي
قطع حديث عقلي وية كلبي دخول ندى علية
ها دوقة شلون صرتي
لحمد لله احسن
ولج متت عليج عيوني ماوكفن دمع شفتج بمنضر عمري ماانسا
لحمد لله هية حياتي كلهة مناضر ماشاء الله
كافي حبيبتي كافي انسي كلشي وفكري بليوم الي سويتي احسن قرار ممكن تسوي بحياتج يجوز تستغربين انو ندى الي جاي تحجي هيج بس ثقي بلله اياد ميخليج تاخذين جواد لو الدنية كلهة توكف وياج ضدة سواهة شغلت عناد كافي تعذبين بروحج خﻻص انتي حطيتي حد لهلشي بابا كال ترجعين لمدرستج هاي لسنة وانشاء الله ترجعين دوقة الوردة المفتحة شمعة بيتنة واحلة خواتهة الي كلنة نغار منهة
هههه ياشمعة هاي لج اني ضﻻم ضﻻم دامس والي يدخل حياتي ميحصل غير اﻻذية والقهر لحمد لله علة كل حال اذا قسمتي ابقة متعلعلة فأني راضية بس الي حبيتة شنو ذنبة شنو سوالي وهيج اجازي اووووف ياكلب جواد هسة شلونة اووووف هسة كاعد يضرب علة صدرة ويبجي ويعاتبني بينة وبين روحة ياربي شيل حبي من كلبة وخلي يرتاح يأالهي برد كلبة ونسي حبي بجاه حبيبك محمد
جواد :كلت ﻻبوهة اريد اسمع الرفض منهة كلي ماشي وراح وجابهة الي وسألتهة واني كلي ثقة ومتأكد تماما من اجابتهة دخلت عيونهى حمر دمم عرفت ابوهى طالب منهة شي صعب بس مع ذلك ابدا ماخفت من ردهة وﻻخطر علة بالي لحضة انو راح ترفضني توقعتهة راح تضل تبجي وتسكت ومتكدر تنطقهة وتكلي ماريدك توقعت هلشي كلش
سألتهة واني كلي ثقة ومتاني اﻻجابة حجت وردت علية وياريتهة ماردت ياريتني متت وﻻشفت هليوم بهاي الحضة بلتحديد تمنيت لو الله خالقني اطرش حتة مااسمع هاذ الرد نزلن كلماتهة تيزاب علة كلبي حركت روحي وحركت كل مشاعر بداخلي نهاريت وضليت اصرخ عليهة واعاتب بيهة اريد رد مقنع منهة اريد تكلي شنو السبب وين الخلل شنو الي صار ودق شنوو وين الحب وين المشاعر وين الي جان بينة وينة كلة نمحة من ذاكرتج بسرعة وين الوعد وينة خنتي الوعد ودق خنتي

دخلت للبيت منتهي موذاك جواد الي يمشي بشموخ وهيبة مطأطأراسي واحس بخجل شكل ﻻهلي شحجي اول من يتشمت بية اقرب الناس الي كلهة كلتلي عوفهة متناسبك وكلتلهم ﻻ تموت اذا عوفهة بس طلعت غبي استغفلتني وضحكت علة كلبي ومشاعري طلعت لعبة بديهة واهلهة اهم مني عدهة
دخلت لغرفتي كعدت ابجي اي ابجي عمري ماعرفت الدموع بس من عرفتهة وﻻعرفت الذل بس وياهة زلمة خشن وكلهة تحسبلي الف حساب بس يمهة طفل ابجي اي ابجي واتوسل وانذل وانزل راسي واضحي واتنازل حتة عن كرامتي واكول الحب تنازل وابيع اهلي وعشيرتي لو بس واكفة وياي لو بس مامتخلية عن حبنة والله اشلعهة من عيونهم شلع ومحد يوكف بعيني لو اعرف انهبهة
دلخت علية امي اني مطفي الضوة وخال راسي بين رجلية مثل الجهال هاي لحركة حبهة خﻻني أدمن عليهة اضم دموعي وابجي استحي حتة من اثاث غرفتي استحي من لحي


طان تشوفني ابجي طبت امي تمشي علة كيفهة اي هاي خطوات امي تقربت يمي رأسن خلت ايدهة علة راسي غريزة اﻻمومة كلتلهة اني شدا اسوي
اﻻم :جواد يمة تبجي يبعد امك ؟
سكتت ماحجيت وﻻكلمة طول عمري ابو لهاي العائلة ومصدر قوتهم تعودو يشوفوني قوي ومتهزني ريح

ليش يمة منزل راسك شلي منزل راسك يمة جبتك لهلدنية هامتك مرفوعة ومحد هزك حتة الفقر الي اﻻمام علي يكول علي لوكنت رجﻻ لقتلته هم ماهزك حاجيني وليدي شصار ارفع راسك ليش منزلة انتة رجال

اااخ يمة ليش هوة شنزل راسي غيرهة شنو لي خﻻني اتوسل بعمامي الي عمرهم ماسألو علينة غيرهة اضرب علة صدري حييل واحجي ولج يمة تعبان هاذ يوجعني يمة هاذ يمة كلبي موراضي يدك يمة موراضي ولج يمة روحي ماتت ماتت يمج بس جسم يمة خالي مابية روح

اسم الله يمة وليدي سور سليمان عليك ﻻتكول هيج والله من اول ماخطبتهة عرفت مراح ينطوهة النة بس ماكسرت بخاطرك وماحجيت وكلت ميخالف خل نحاول حتة ﻻيكول امي كسرت بية وماوكفت وياي يمة انتة باوعت لبعيد لبعيد حيل البنية مومن ثوبنة يبعد امك احنة وين وهمة وين

ﻻيمة المسألة مو مسألة فلوس هية لوبس واكفة وياي لو كايلتلهم ماعوفة جان مدة وكت ويملون لمن يشوفون اصرارهة بس هية باعت بسرعة يمة باعت وطلعت ماتستحق تعبي هاذ كلبي شكد تعبلهة وماوكف بعينهة دخلت للسجن اخوهة كسر سيارات العالم وخﻻني ادفع الخسارة ولساني مطلوب من غير لضرب وجهي تشوه وياهو ليشوفني يضحك علية يكلي علمود مرة هيج يصير بيك شنو خلصت النسوان
يمة موجوع روحي توجعني يمة روحي مفرفحة ونار بية اريد ابردهة يمة
جرتني امي خلت راسي بحضنهة وضلت تلوليلي دللول الولد يبني دللول عدوك عليل وساكن الجول
اخ يمة عدوي بكلبي كاعد كاعد ومتربع
هدئت شوية وغمضت عيوني هنا هاذ المكان يجبرني احس براحة عجيبة امي خطية تبجي متطلع صوت بس احس برطوبة دموعهة تنزل علة راسي سويت روحي نمت حتة تروح ﻻن ماتمحل تبجي من وراي ورة شوية خلت راسي علمخدة وطلعت تمشي علة كيف طلعي يمة طلعي عوفيني لعذابي ونار كلبي الي ماتبرد لوبعد ميت سنة

ودق كاعدة بلغرفة صافنة مقهورة كلش وكلبي يأذيني وراسي صداع موطبيعي وداخلي موجوعة بس الدموع ماتنزل عبالك عيوني ملن من البجي دخل علية بابا زينب ورباب مصعدي عيونة يلمعن وبيهن دمع كمت علة حيلي خليت راسي بحضنة كتلة بابا صارلك شكد ماحاضني ليش حارمني من حضنك جنت ليش يباوعلي ويبجي يريد يحجي مايكدر اوووف يابابا غلطت بحقك اكبر غلطة بحياتي وصححت غلطي بغلط اكبر منة وبعد فوات اﻻوان شلفايدة خسرت صحتك بسببي علمود ﻻاخسر جواد خسرتك صحتك وتالي خسرت جواد معادلة غلط وحلهة هم غلط كتلة بابا خلص كافي دموع ذني دموعك اغلة من حياتي اني ماضايجة وﻻمقهورة اصﻻ هاذ القرار الصحيح وجان ﻻزم اسوي من زمام بس اني جنت ضعيفة وماتجرئت اسوي بس انتة ساعدتني وقويتني احجي هاذ لحجي مدري اقنع روحي بي مدري اقنع بابا جرني بابا لحضنة باسني وهم بجة مسحت دموعة وكتلة بابا خﻻص كافي بجي والله مابية شي كوة. قتنع وبطل بجي اوووف بابا يانور عيني اذيتك هواي من زغري اتدلل عليك وتالي صرت مقعد من وراية
ثاني يوم اجة محمد وامة وحددو موعد عرس ندى ومحمد يوم لخميس الي بعد هاذ يعني بعد12 يوم ندى بﻻول رفضت علمودي ﻻن شافتني طول الوكت اصفن و حزينة وصحتي موتمام بس اني قنعتهة وكتلهة مابية شي واني اريد عرسج حتة افرح واطلع من هاذ الجو من طلعت من المستشفى لسا انام بغرفة الضيوف ﻻن بليل عندي عتب وية روحي وية كلبي اكلة شلون هيج سويت بجواد شلون عفتة شحال كلبة هسة شسوة بروحة هسة جواد ياتعب العمر ضيعتك من ادية احط كﻻدتة واحاجيهة وابجي اكلة
ولك حبيبي والله موبدية اعذرني رفضتك صح بس ماصير لغيرك والله بعدني علوعد بعدني ماخنتة وسلمت شغلتنة لرب العالمين الي عينة ماتغفل وﻻتنام ﻻن طلعت من ادية وماعاد بيدي شي اسوي كل الي علية سويتة والي اكدر اسوي هسة انتضر الله شوكت يرحم بحالنة ويجمعنة سوة ﻻن شغلتنة صارت شبه مستحيلة احجي وية لكﻻدة وعبالك دااحاجي أو بﻻحرى اتمنة احاجي واكلة لساني جذاب الي نطقتة موصحيح ضرفي جبرني اكول هيج بس كلبي اخ ياكلبي كون تسمعة شيريد يريدك الك وبس
مرت خمس ايام علي صار صرت جسد ويمشي انسانة محطمة وخالية من لمشاعر تماما عﻻقتي بأخواني بدت تتحسن وكامو يدورون رضاي وبس يردون يشوفوني فرحانة بس يافرحة الي تجي وجواد ماعرف عنة شي ننجمع علسفرة يحجون وياي ويسولفون واني بس اباوع بعيوني كأنو مااسمع حسام عبالة صار بية شي من اثر نوبة الصرع لح انو ياخذني للطبيب بس اني رفضت خليني هيج اموت علبطيئ احسنلي ياعمر هاذ الي يسوة اعيشة واستمر بي وجواد ماموجود بي ماتجرأت ارفع تلفون واحاجي وبياعين احجي وشكولة اصﻻ ليش هوة بعد الي صار اكو حجي ممكن ينحجي ماعرف اخبار جواد وكلبي مفرفح علي مثل الي مضيعة ولدهة وكل دكت باب اكول هاي زهراء اجت وجايبتلي خبر عن جواد اجت ام احمد بس ماكدر اطلع واحاجيهة وﻻ الي عين اكعد كدامهة وهية اكيد تعرف بحال جواد وتد

[ملكةه]

ربي شسويت بي ﻻربعاء لعصر كاعدين بلحديقة امي وخواتي يسولفون علة حنة ندى وشراح نسوي وشراح تلبس واني منفصلة عنهم وعايشة
بعالمي عالم الصفنات عالم ذكريات جواد ذكريات حضناتة وشوفتة بلختلة ببيت ام احمد وببستان خالتي وعطرة الي مافارك ريتي دووم اشتمة بروحي وبمﻻبسي اوووف شكد خلة اثر بية من انزع مﻻبسي حتة اثر لضرب يذكرني بي هاي لضربة لمن حاجيتة هاي لضربة لمن لكفونة بلشارع هاي لضربة لمن لكفني ااياد وبابا ويكلي بابا تنسي شنسة منة وهوة بجسمي وبروحي وبكلبي اذا عقلي ينسة فكلبي شينسي قطع تفكيري دكت بابنة وكومة ماما حتة تفتحة كالت منو ورد عليهة صوت ولد فتحت الباب ماما ودخل شخص ابدا مامتوقعينة وجيتة صدمة
يتبع