مثل اليموت وليدها وراحت تدفنه بـ مغربيه
هيجي روحي تلوب بيه
هيجي كَلبي يموت بيه
هيجي عيني تطيح كَطره اعله الجفاف بين اديه
من أشوفك من وره حجابك تبين طرف ترجية
أنا أجيت بطركَـ كَلبي وأنتَ وعيونك عليه
حسبالي اليحب مثل الندى يســــــــافر
وحسبالي الدمع مثل الوكت صايـــــــــر
شمدريني الدمع يومية يرجع شـــــــــاب
شمدريني العشكَـ مايحترم شــــــــاعر
أنا كل يوم أودع عـالخدود عيــــــــون
مثل ذاك اليودع صاحبه بساتر
يبو جفوف التحط بالبال راحة بال
ويبو عيون الجبيرة التجبر الخاطر
أريد بعينك أختل ختلة العرسان
وأريد وياك أسوي الكلشي ماصاير
نفس الحيرة بس الفرق بيه ظنون
وهذاك أنتَ اعله نسمه ويه الشَعر حاير
يبو طول اليداين للنخل بستان
ويبو خدود التكَول غروب اليسافر
وانا لوما كَذلتك ماتهمني الريح
ولا تاخذني صفنة ولا صرت شاعر
ضميتك كَمر بي يحلم المسجون
وشلتك سمه بروحي ومن طحت نجمة
وهذاك أنتَ العزيز العنده كل الناس
وهذا آنا وطن بس ولده مو يمه
طحت مثل تراجي الذهب من تطيح
أذا شافت أبنها معرس بدمه
يبو ضحكة التهاجر بالظلام أشراع
من تضحك شفافك ماتظل ظلمة
وأنا جبت العمر وركَه بغصن مكسور
ماحس بالندى ولاشوفه لاشمه
شمدريني الكحل يفتح عليه الباب
وانا معاند جنت مافتحه للنسمه
عرفت انا أحب من بدت روحي تخاف
من أكتب قصيدة وترجف الكلمة
من صار النجم يحجي ويه كَلبي عيون
وبيه السمه الزركَه أندفنت مغيمه
سهلة الدمع من يتطشر اعله الكَاع
بس مشكلتي كَلبي الطاح شيلمه
لاتحضني خاف يجفلك العطاب
بعدك ماتعرفه المحتركَـ دمه
ظنيتك جرح تفهمني اذا طعنوك
وطلع هوَ الجرح بس دمه يفتهمه
وأنا صافن مثل شجرة اعله باب البيت
ولو هو اليحب صفناته متهمه
أخط أسمك على الحيطان من أشتاكَ
ومرات من أحن بالليل اشتمه
رد مع اقتباس
