درر العراق

^-^بطيخة^-^ · 2/April/2018

سلام ،،
طبعا تعرفون يوم كل سنه بهيج يوم الطلاب البكلوريا من السادس كلها تعطل وتبدي تراجع ^_^

حلمهم الكبير يكون بإنتظارهم وانتظار جهدهم حتى يتحقق و يعوضهم عن كل تعب تعبوه بيوم

اني احسد الطلاب هواي لانو يكدرون يراجعون واني لا ^_^

طبعا اني هم طالبه سادس مثل ما تعرفون ،، و جنت اتمنى احقق حلمي هالسنه ،، مثل كل الطلاب ،،
بس للاسف القدر شاء غير امنيتي

صراع بين صحتي ودراستي ،،
عن نفسي ،، اختاريت دراستي ع حساب صحتي :)
بس جان الخيار مو بايدي تماما ف انقلب اختياري انو اختار صحتي اولاً

اني دائما اشكي من الم بالمعده ودائما اتقيأ " اتذكر العام ايه ادم كالت كلمه جان معناها انو هي نفسها تعبت ولعبت نفسها كد ما اني نفسي لعبانه ومعدتي وصداع وهيج هههه"
المهم ،، قبل فترة رحنا للطبيب و سوينا فحوصات وكذا ،، بس جانت التجربه مخيفه لابعد درجه ما اتمناها لاحد ،،

وكال تعالو السبت القادم ننطيكم النتائج ،،

جنت متفائله خير كلللش ، بس للاسف بلحظه استلمنا الفحوصات وكال النا الدكتور عليا انقلب كل شي بالنسبه الي

كال انو اكو مؤشر سلبي هيج شي" طبعا هذا اللي سمعته من ورا الباب لانو مقبل ادخل ويا اهلي واسمعه شيكول"

و اهلي گالو انو لازم نروح سفره شهرين للبنان للعلاج
اني اكيد رفضت لانو عندي مراجعه :/ ،، بس حالتي دتسوء يوم عن يوم ،،

خيروني بين حياتي وبين دراستي ،،
قنعوني انو الحياة اهم واكبر من هم الدراسه اللي اني شايلته ،،

وخسرت سنه ثانيه من عمري ما اعرف حكدر اكمل واوصل لحلمي
السنه الاولى جانت لمستقبلي ،، والثانيه لحياتي وصحتي ،، احسني بكابوس ما اكدر اصحى منه شكد ما ابجي وادعي واون واتمنئ وادعي واتوسل ،،
خسرانه اغلى 2 بحياه البشر ،، المستقبل والحلم ،، و الصحه

والاقهر انخطبت ، بشكل سريع كلش ،وجانت خطوبه شي مجرد هامش لا يُذكر .. فقط
مو مثل اي خطوبه .. وبلا احتفال ولا صور مقدم او مؤخر "اني هيج ردت" ..ولا اي شي .. وابويا هو اللي عقد النا ..
مجرد بس حتئ الولد يطلع وياي للعلاج لانو صعبه اهلي ياخذوني .. صعب انو يعوفون البيت واخواني علئ مود علاجي ف جان الحل انو احد يخطبني وهو يسافر وياي ف تبرع بهالشي احد الاقارب .. و اتفقت انو يكون مجرد صديق وزميل بالسفر .. لانو هو شخص لطيف و اعتبره اخويا وجنت دائما العب وياه ههه ، بس شاء القدر همين انو ننخطب ..

اني مدا احس حالياً انو عايشه حياة طبيعيه مثل الناس او "البنات" .. و هالشي يخليني ما اكدر احجي ويا الناس احس انو اني مختلفه عنهم مكدر اتعايش وياهم والسبب مو بيهم .. لا بيا اني .. هالشي،بسبب عدم الاستقرار بيا دا احس هيج ..

بس رغم هذا .. اني مستقبله فكرة الخلاص بكل سعاده .. وحاسه بيها حتجي عن قريب ..
لذلك راح ابقئ مبتسمه وهادئه الئ تجيني هاللحظه بدل ما ابقئ اعبر عن حزني وقهري كدام اهلي واقهرهم قبل ما اروح وبعدها .. اقلها يكون حزنهم بس بالدفعه الاخيرة ..

المهم .. اني راح اروح لدوله ما اعرفها ولا اعرف احد بيها ،، ح انقطع عن العالم لشهرين والاغلب اكثر ،،
راح اقاوم لاجل حياه ما اعرف نهايتها شنو بس الاحتمال الاكبر يكون ذبول و اختفاء ابدي ،،

اتمنى ما اكون زعجتكم واتمنى تسامحوني اذا بدر مني شي ،، الحياة اكبر من انو نشيل بيها ضغائن وحقد ووزعل ع بعض ، م ندري الموت شوكت ياخذنا ويخلي الباقين مصدومين بينا ،،

يمكن يكون وداع اخير ، ويمكن اكدر ارجعلكم ،، بس الاحتمال الاول وارد اكثر بنسبه هائله ،،

اتمنالكم الخير والسعاده جميعا ،، ادعولي بالخير ، واذا طولت الغيبه ادعوا لي بالرحمه ،،

أحبكم في الله اخواني

اني دا اودعكم صح ، بس كلبي منكسر كلش عليكم و ع هالمكان اللي عندي بيه هواي ذكريات واشياء ومواقف ،، مقهورة يمكن مثل شخص ديودع اهله " واني دا اودع اهلي ،،اللي بالحقيقه واللي بالنت "

استودعكم