- اذا هية ظلت عايشة طول هاي الدعش سنة، فإذن هي چانت موجودة ابهاي الدنيا اثناء ما مرت علية كل ذيچ الظروف
- التشرد والعوز، والهجولة مالتي بين المحافظات ادور على شغل
- اشكم مرة انتة بتت على الرصيف، وانتة مشغول عنهة، وهي مشغولة عنك بحياتهة
- اي، وشكم مرة فكرت بيك مثلا او اتذكرتك، وانتة ابنفس اللحظة اتعيش بظرف صعب او حالة تعيسة
- فكرة المزامنة بهذا المجال كلش تشغلني، چانت وما تزال، في كل لحظة انت وهية عايشين ابهاي الدنية، بس واحد ما مطّلع على حال الثاني
- المزامنة قاتلة، اشگد مؤلمة من تسأل نفسك واتكول هية ابهاي اللحظة اشجاي اتسوي.
- اليوم الصبح مثلا، من گعدت، گلت بيني وبين نفسي، هية هسة هم گعدت من النوم، وجاي تتحضر للدوام، مثلما اني جاي اتحضر
- هذا شلعان گلب وحرگان دم واعصاب، اني ما راح اكون سخيف واطلب منك تنساهة، بس اشوية خفف، ترة تدخينك وصل اربع باكيتات بس من العصر لحد ما تنام، وعندك خفقان، يعني لا اتلود على نفسك
- مو بيدي
- اعرف، كلشي ابهذا الموضوع مو بيدك، حبك الهة، افراگك عنهة، استذكارك المفاجئ، اعرف ما بيدك اي شي من هذا الموضوع.
- الغريب بالموضوع، بعد دعش سنة من افراگهة جاي اعيش بعاطفة تجاههة چني توني حابهة، اني چنت اعتقد حبهة مات ابگلبي، چنت اعتقد طلعت من حياتي نهائيا.
- هية مو بالاعتقاد والظنون، البنية شاغلة جزء جبير من كيانك وذاتك، القضية ابمقدار ما هية تشغل من نفسك، مو بالاعتقادات
- نوبات افكر، اگول انقطاعنة عن بعضنة ايجوز بيه فائدة، ايجوز هسة لو ارجع اشوفهة واحچي وياهة تطلع متغيرة بطباعهة ونفسيتهة وكلامهة، ايجوز صايرة سيئة، وانفر منهة واتأذة اكثر.
- إي، الزمن ايغير، والنفسيات تتغير، اعتقد اذا هية فقدت ذيچ الطيبة والاخلاق والكلام المهذب، فمو من مصلحتك ان تتواصل وياهة هسة
- ههه ، رجعنة لـنظرية الحكمة المجهولة
- اي، اشذكرك بيهة، نظرية دينية، تفترض انهو الانسان اشما واجه ظرف صعب فأكيد الله اختارله هذا الظرف لاجل مصلحة هو يعرفهة
- اي، هذا البنج القديم، من ايام ما چنت تتوضة
- تدري ؟ انتة مو مشكلتك وياهة، مشكلتك الزمان والمكان، لو انت ما رايح للمكان الي هية چانت موجودة بيه، ولا بالزمان نفسه، چان انتة هذا شلعان الگلب كلة ما صار بيك
- يعني هسة شسوي ؟ اسافر عبر الزمن وارجع للماضي واختار غير مكان وزمان ؟ ترة النسبية بعدهة حچي وما امطبقة
- انتة سألتني هذا السؤال ابسخرية، بس لعلمك، هوة هذا الحل الهاي المشكلة وهواي مشاكل
- هذا موضوع اتناولته سينما هوليوود اهواي، واحد من الافلام كال انهو حتة لو گدر الانسان ايسافر عبر الزمن ويرجع للماضي، هم ما راح يگدر ايصلح الخطأ
- ليش حبك ألهة چان خطأ ؟
- كلمة خطا كلمة منطقية، تنتمي للمنطق ومفاهيم الخطأ والصواب، الحب ما يخضع للتفسيرات المنطقية، الحب عاطفة، وجدان، وهذني كلش بعيدات عن العلم والقياسات
- تدري هسة اتذكرت بيت للمتنبي
- شيگول
- ايگول : واحر قلباه ممن قلباه شبمُ
- يعني ؟
- يعني، يا لوعتي ولوعة گلبي المحترگ على واحد گلبة بارد
- شنو رأيك اذا اگلك هية گلبهة مو بارد، مية بالمية اتندمت من قررت اتفارگك، ومية بالمية بچت على هاي اللحظة، واتمنت مثلك لو ترجع للماضي واتصحح الخطأ
- اشمدريك ؟
- لأن البنية الي بعدهة هيچ گالتلك ورة ما عافتك
- ذيچ ما الهة اعتبار عندي
- ليش
- ما چانت علاقتي بيهة حب، مجرد اعجاب
- والاولى
- هم نفس الشي، هذني چانت علاقتي بيهن علاقة اعجاب سطحي وكلام لطيف، لا اكثر ولا اقل، اني مقتلي بالوسطانية، ابهاي المتميزة، چانت متميزة ابكلشي، حتة من توگف وتحچي، تطبگ اچفوفهة على ازنودهة، اتذكرني بالتماثيل السومرية
- هية الحب الحقيقي ابحياتك، وما راح يتكرر بالمطلق، حبيت اثنين قبلهة، ووحدة بعدهة، ووحدة بالكلية صارحتك ومن شفتهة ما طبت الگلبك انسحبت، وكلهن مجرد اعجاب
- اعجاب، حب على طريقة العذريين، مشاعر عابرة، المهم اثنينهن گالن الك نفس الجملة ( اني اتندمت )
- واويلاه
- ويلك على شنو
- ويلي اذا صدگ متندمة
- تزهگ اكثر مو ؟
- اي والله
- مو اگلك، انقطاعك عنهة اروح الك، ترة تطّلع على امور اتشيب الگلب
- سد الموضوع
رد مع اقتباس
المشاركة الأصلية كتبت بواسطة كاجومي
