هنا

[حسين الرواني]

شنو مشكلة العراقيين وية تزويج بناتهم
اتغيرت احوال العائلة العراقية، وصارت تستلم رواتب وعدهم هواتف ذكية بالبيوت
وبعدهم فاشلين في تزويج بنتهم
حصلوا شهادات جامعية واتوظفوا بالدولة
وبعدهم فاشلين في تزويج بنتهم
راح عنهم النظام الديكتاتوري وسووا اربع حكومات وثلاثة برلمانات
وبعدهم فاشلين في تزويج بنتهم
مراقدهم المقدسة في تزايد ويومية يطلع ولي جديد
وبعدهم فاشلين في تزويج بنتهم
نسبة التدين فول والسوگ متروس ما حبت عينك واشتهت
وبعدهم فاشلين في تزويج بنتهم
اتغيرت المناهج الدراسية وصارت عدهم 100 فضائية
وبعدهم فاشلين في تزويج بنتهم
10 ملايين منهم عندة احساب في فيسبوك وتويتر ويوتيوب
وبعدهم فاشلين في تزويج بنتهم
الكتب تارسة المكتبات وبدون منع لأي كتاب
وبعدهم فاشلين في تزويج بنتهم
الصالونات الثقافية ومقاهي المثقفين صارت ابكد اسليمة
وبعدهم فاشلين في تزويج بنتهم
العشائرية فول وحتى الجريذي اذا ينكتل، عشيرة البيت الرابي بيه الجريذي ايكاومون وياخذون حكه (هاي قصة حقيقية بالثورة)
والعكل اتروج بالكعدات والمضايف، والحظ والبخت على اساس ياكل ويشب عدهم
وبعدهم فاشلين في تزويج بنتهم
الشيوعيين تارسين بغداد والمحافظات والناشطات اكلن راسنا بفعالية البايسكل على ابو نؤاس
وبعدهم فاشلين في تزويج بنتهم
***********************
شنو هالمشكلة الاجتماعية الكلش سخيفة ابصراحة
عائلة من اب وام وابناء وبنات وعشيرة
ما يعرفون يختارون شريك مناسب لبنتهم ؟
هواي مشاكل اجتماعية الهة مبر عقلاني، وبعدهة موجودة حتة في اوروبا واميركا
ممكن نتقبل مشكلة زوج ايخون زوجته مثلا، او مشكلة عقوق الوالدين، او مشكلة اخ يقتل اخوه علمود الفلوس، وغيرها مئات المشاكل الاجتماعية
كلهة ممكن نتعامل وياهة بشكل طبيعي، يعني نكدر انكول مشاكل اجتماعية محترمة اشوية
بس ترة هاي المشكلة كلش سخيفة وبايخة فدنوب
ومن اتشوف الام والاب يسولفون يطلعولك بس همة وبس بالمعرفة والوعي والخرط الزين بالفصول العشائرية والمناسبات الاجتماعية
احب اعرف ارائكم بالموضوع ترة اني كلش دايخ بيه

[أبو فاطمه]

يعني قصدك ما يختارون لبناتهم الشخص الزين ؟

[الذئب الأزرق]

استغرب موضوع بهذه القوة والطرح
والأعضاء في سكوووون
وكأن الأمر لا يعنيهم
والكثير في مواضيع
لا تقدم ولا تؤخر
لو كنت امتلك منتدى
لأمرت بتثبيت هذا الموضوع
وسلامتكم

وعن نفسي استحي اطرح رأي الذئب في هذه القضية
ولم ارى عراقيا قد اتحفنا فيه ...

اشكرك وبعنف

[كاجومي]

للاسف اكوو هيج بعض العوائل فاشلين احترامي بأختيار الزوجه او الزوج الغير مناسب وهاذ الشي غلط وراح يخلق مشاكل واخيرا الطلاق المبكر

[جنـات]

استغرب موضوع بهذه القوة والطرح
والأعضاء في سكوووون
وكأن الأمر لا يعنيهم
والكثير في مواضيع
لا تقدم ولا تؤخر
لو كنت امتلك منتدى
لأمرت بتثبيت هذا الموضوع
وسلامتكم

وعن نفسي استحي اطرح رأي الذئب في هذه القضية
ولم ارى عراقيا قد اتحفنا فيه ...

اشكرك وبعنف

مقدمة كلامك حسستني انو ح تفجر الموضوع برأيك


متابعة (:

[الذئب الأزرق]

ياغريب كن اديب
لا اتقدم قبل حبايبي العراقيين

[دكتور جميل]

( وبعدهم فاشلين بتزويج بنتهم )!
شنو السالفة؟
أحسّ و كأنه ( بنتهم ) سلعة و يبيعوها لأحسن شرّاي!
ولا كأنها انسانة لها حق الاختيار و حق تقرير مستقبلها.
الزواج هو بالاساس توافق بين اثنين( يعني مو حظ يا نصيب)...
واحد من يروح يخطب بهاي الحالة يكون مثل ذاك اليشتري ركيّة ، وهو و حظه... لو تطلع حمره و حلوه ... لو تطلع.......!
شوكت توخرون سيوفكم من فوك رقاب البنات؟
كافي مو صارت ماصخه

[Ćat]

ممكن يكون رفض الزواج من قبل البنت ، مو فشل الاهل ، بالنهاية الحياة حياتها وهي
حُرة تزوج او لا .. شنو المشكلة المستعصية الي رح يخلفها رفض البنت للزواج صديقي حسين؟
لتنتشر العنوسة ... والعازبات والرافضات للزواج .. ولا تزوج غصباً عنها وتعيش حياة "جحيم" وتخلف ضحايا هم "الأطفال"
......
كلمة"تزويج البنت"
و "اختيار شريك "
أشوفها مو مناسبة ، البنت مو سلعة أو شيء بس ينضج يُعرض للبيع،حاله حال الخُضار والفواكة.. ويبدي الأب يختار للبنت.

[بـشــــار]

استاذ حسين يسعد مساءك عيني إنت
جنابك الكريم اخذ الموضوع من جانب واحد وهو جانب البنية واهلها واهملت جانب الشاب واهله
والي برأي هو ايضا جانب مهم
شخصية الشاب من يختار شريكة حياته لازم يكون على قدر المسؤولية والثقة باختياره وميخضع لتدخلات بإسم نخاف عليك ونريدلك الأحسن فهنا الرجل لازم يعرف شلون يختار ومنو هي الانسانة الي راح يرتبط بيها ويكون رجال ركزلي ع الكلمة يكون رجال من يختار..
مو شرط كل علاقة حب وانسجام صارلها 10 سنوات يؤدي لعلاقة زواج ناجحة..
النجاح والفشل ميرتبط بشي اسمه زواج عن حب او تقليدي
بس يرتبط بالشخصين المهيئين للزواج
هل هم على قدر المسؤولية ان يتزوجون
من مادة من نضج كافي من تلاقي روحي من انسجام بين الاثنين
اهل البنية هم ميعلمون الغيب بس الحالات السخيفة من يكون الزواج غصب على البنية كانما يتاجرون بيها وحتى من تريد تطلك يشجعوها لان هنا ميهمهم الاصلاح بقدر ميهمهم حط فلوس بجيبك واستفاد اني هنا اقصد حالات ونسب معينه..
وهنا هم مو غلط من يريدون الاهل يضمنون مستقبل بنتهم ويشوفولها الأحسن..
صح اهم شي الحب والدين والاخلاق بس هم اكو جوانب مهمة خاصة احنا نعيش بعالم مادي وخلي نترك الفلسفة لان هي هاي الحقيقة واني ايضا اكره سالفة اهم شي تنستر البنية يعني علساس هي ابيت اهلها جانت ممستورة مثلا!!
وحتى مااطول عليك اكثر احنا زمانا اليوم اختلف عن زمان البارحة فاذا منعرف شلون نتكيف وية زمانا ونصحح اخطاءه ع الاقل الي تخصنا احنا فمستحيل نعالج مشكلة بالكلام لان الكلام لايقدم ولايأخر..
وعشت صديقي العزيز..


تعقيب على رد الاخ الذئب الازرق
صديقي الموضوع يخص الجميع وهالمشكلة موجودة باكثر من مكان واكثر من العراق اصلا..
فالساحة اكيد مفتوحة الك واطربنا برأيك..

تحياتي

[أبو فاطمه]

شكد شباب يردون يتزوجون بس المشكلة بالمهر والجهاز ماعدهم مكانيه
يعني بسبب هاي الشغله هم البنيه متعطله عن الزواج وهم الولد متعطل

هذا جانب مهم لازم اهل البنيه يخلوه بالحسبان وهواي شباب معدلين بس امكانيتهم ضعيفه فالغنه والفقر مو قياس الانسان

مشكورين