من چنه صغار چان والدي دائماً يطلعنه مطاعم بليل لان يرجع متاخر من الشغل فيطلعنه نغير جو ، چنه نشتري اكثر شي لفات برغر اذكر سعر اللفة بمطعم ستي سنتر و بمطعم علي اللامي تقريباً ٢٥٠٠ د ، طبعاً بوقت صدام چانت هاي رفاهيه عالية ، احياناً چنه ماناكل لفاتنه نقرر اني واخويه ناخذهن ثاني يوم للمدرسة وناكلهن بالفرصة ، ابويه مرة سمعنه و رزلنه گال بعد ما اشتريلكم اكل الا تاكلوه بالمطعم ، وراها بفترة اخذت ويايه موزة كلت اكلها بالفرصة شافني ابويه الصبح واخذها مني وفهمني گلي انت رايح بين ناس احتمال ماعدهم فلوس يشترون لفة لو موزة ولازم تقدر وضعهم مو لان اني اكدر اشتريلك فتاخذها كدامهم وتاكل وهمه ايجوز عشه ما متعشين عيش مثلهم حتى لحد يكرهك
جبناها ع مسؤولين هسه كل واحد گاعد بقصر و عنده موكب فد عشر سيارات ويطلع بالتلفزيون يستجدي عطف الناس يكلك اني شعندي بطرك الراتب والناس تحسدني اصلا هاي مسؤولية واني اتمنى الكل يضوكون العذاب الي احنه بي ، يريد الناس تصدگه ! و المشكلة نفس هذا الجذاب الناس بكل انتخابات تنتخبة و وره ما يفوز يطلعون عليه مظاهرات يصيحون حرامي ......
المشاركة الأصلية كتبت بواسطة *نفس♡
