هنا

[ملكةه]

امي يا نجمة عشگ وسط السمهوامي منهه اجيال حب متعلمه

امي نهر المنه نتروه النعيم
او منهه عطر الجنه دايم نشتمه

خبزة امي امطرزه ابحب او حنان
جرحي بس عطر امي يصبح بلسمه

شيلة امي امن ارد اشمهه اتردلي روح
وامي نعمه امن الله عندي او غانمه

[Abdolbari Asakere]

الأم مـــدرســـة إذا أعــددتــهــا
أعـددت شـعباً طـيب الأعـراق
(الشاعر حافظ ابراهيم)


اُمِّي دور الأنبياء اتمَثِّله
ربت اشعوب و اُمَم متْرادفه
اُمي ما تنعد رقم طَرْف اللسان
تنعد ابشعْب اليضَحّي ابموقفه
ربت اجيال العلم وامي الدروس
اُمّي چم طبعه و كِتاب اتألِّفه
كلنه طلاب العلم و اهيه العلوم
والدِرَسهه اشگد سنين اتكلِّفه

... هاذي امي ...

امي هبيه وامي دار وامي سور
جسمي بالبَرْد ابحضنهه اشگد دِفه
امي دمعه و امي شمعه وامي نور
من اشم ريحتهه جسمي ابوِد شِفه
امي عفّه و كبرياء و امي ذوق
امي رحمه وامي رأفه وعاطفه
امي صرخة كل فقير ابلايه عون
امي جود و امي زود و معرفه

... هاذي امي ...

امي كرَّمْهه الإلٰه اعله الوجود
تَحِت رجليهه العَدَن كله اختفى
تحمل آلآم الدهر كل العصور
امي منبع للصبر امي الوفه
امي شرَّفهه العليم ابهالحجاب
اُمّي مثْل الكعبه اُمّي امشرفه
ماكو مثل امي الجِمَع كل الصفات
اشلون اوَصُّف اُمّي حرْت ابياصِفه

... هاذي امي...


امي مثل الامبِراطور ابصعاب
اتهاجم الشِّدّه ابحرب چالعاصفه
امي مثْل القاضي توگف للامور
امي كل سر بالمشاكل تِكْشِفه
امي رَوْضه و بيهه اشجار و ورود
مُجْتَمَع بيديهه امي اتثقُّفه
من فِتَحْت اعيوني وانطق بالكلام
چلمت الماما اللسان ايلفلفه

هاذي امي

يا وصُفْهه الحَيَّر اصحاب الكلام
تاهت اباُمي فنون الفلسفه
كل شعور اهل الارض و اهل السماء
لو تُوصُّف امي لا لا ما كِفَى
هاذي امي بس اله العالمين
اهوه وصَّفهه ابوصُف واجمل صِفه
گَلْنه لو ما آنه رب الكائنات
چا عبدتو الوالدين ابمعرفه


ك: عبدالباري عساكره