هنا

[ارجع يازمان]

مدري اشورطاني وللوطن رديت!!
حسين الساعدي
:::::
ياغربه الكضتني ا بكلمة الياريت
ولحضن الوطن حنيت!!
وشتاكيت
وشتاكيت
أشم ريحة محنه ابدربي لو مريت!
وتمنيت
شتمنيت!
ألكه أطباعنه الحلوه ابهذاك البيت!!
وتعنيت
وتعنيت
وكلبي ايسابك الخطوات
وِشكَد حَضرت بسمات
ماظنيت
ماظنيت
أنه ابحاجة الدمعات!!!
شفت اشكثر دجاله يحورولك فتاوي بسرعه لو ضخيت!
شفت اشكثر لوكيه! الهوسه امحضره وهستوهه بالباكيت!
ناطور وحرمي اوياهم اتلاكيت!
جَنها اذيابه بعض الناس بس ارسومها الجنها حمامة بيت!!
غريب ابديرتي وضليت!!
ورجعت الكلمة
الياريت!!
.
شفت طيبين
لكن حيل محرومين
بس بالدمعه متكفين!
ويامرخص دموع العين
وشفت التاجروا بحسين
الجانوا
بره
ويجدون
هسه ومنعوا الماعون
واحدهم مثل قارون!
هاكد كاموا ايبوكون!
واسمع
نغمة
المجروح
من اينوح
كوه امجلب ابهل روح
سئلته الحال؟ كتله اشلون؟
كال الله كريم اتهون!
شفت مبخوت ميشور!!
أثاري الحوبه هَم بالصيت!!
وشفت
فقره وعله الماكو
فاضوا مستحه وبغايتي اتكَفيت
وتماسيح
التلف اشكال!
مامره
البحرهه
الفجته وترويت!
وِتمنيت
شتمنيت!
يم هذا البحر
ماجيت!!
‘
شفت اجروح ملجومه
حيل ابحاجة الرحمه

وشفت بغداد مهمومه
ابناس الداسو النعمه!
وتلَكَتني
من ابعيد
محرومه وتريد العيد!
وانه ابدمعة الياريت!!
!!!!
شفت أشكال
ما تنكال!
شفت الفاكدين الراي!
شفت اهواي!
شفت الراعي غاد ايحوم والذيب العزف بالناي!
‘
شفت حالات ما تنكال!!
شفت عبادت التمثال!

شفت مؤمن كعد بالبيت
وانطه الرايه لدجال!
شفت الأعمه يرسملي حال الدنيا وتأذيت
والأخرس يسولفلي بهمومه ودمع هليت!
!!!!
شفت الما تشوفه العين!
شفت اهوايه مجروحيين
شفت مجرم يصدر احكام وشفت احرار مسجونيين!
شفت اشكثر دجاله اجونه وتاجروا بالدين!
شفت أهل النفاق اشلون كلبوا صورة الطيبيين!
وشفت الخوف هو ايحَرك الميتين!
ولدموع الوطن صديت!
وأنه ابدمعتي اتوازيت
وصاير بالوطن ممنوع فرحه وطشت الجكليت!!
.
الوطن مسكين بس الناس باعوه بلمزاد ابذلة الياريت!
وعرفت السعر وتاذيت
يافشلة الفشله الدمعتي احتازيت
يامهموم
ينطي
ادموعه للمحتاز!
مدري اشورطاني وللوطن رديت!
وتمنيت شتمنيت!
يطلعلي حلم وبصحوتي وفزيت!
لكن والحقيقه ابهاي
طبت للوطن وياي من طبيت!!
وعاتب روحي وتمنيت!
يهلال
التمني
اشبيك ماهليت!
!!!
ديرتنه وتجافيني
ماجَني ابحظنها ابزغري وتربيت!
والغربه وتناديني
تعال الجيتك إشتاكيت!!
وتوازيت
أعوفك يل الك رديت!
ولميت
اشكثر لميت!
اهموم
وحسرة
الياريت!!
ول الله كريم اتهون من عدها اشكثر ظميت!
وخَذت دمعات
محرومين
أضمها ابغربتي بعدين!
إومثل ماجيت
بابك ياوطن رديت
وتعنيت
لجروح الدمع مريت
ودموع الندم لاكن عليه اهواي
وشايل صفنتي وياي
وِشَرَديت!!
مخنوك ابهوه الياريت!!
وجبت كل العراق ابصفنتي ورديت
جبت كل العراق ابصفنتي ورديت!!
!!!!!
حسين االساعدي

[أحمد الناصري]

الله رائع جدا ما اخترته صديقي شكرا جزيلا

[ارجع يازمان]

الله رائع جدا ما اخترته صديقي شكرا جزيلا

حضورك اجمل دمت بخير