حبيت انقل هذا الموضوع
كثير مواقف ممكن نواجهه بالحياة او ممكن نكون واجهناها ..
منها المواقف الحرجة و الصعبه ..
موضوعي اليوم عــــن " الاسعافات الاوليه " او بما يسمى بالــ First Aid
ممكن نكون واجهنااا موقف يتطلب من عدنا التدخل باسرع وقت للحفاظ على حياة المصاب..
البعض الاخر يقوم بالواجب و يتدخل بـ نية حسنه وطيبه ولمساعده المصاب ولكن بدل ما ينفعه يضره لان ميعرف الطرق والخطوات الصحيحة ..
و البعض الاخر يهرب ويكول " اني شعليه " او " خلي اروح بعدين توكع براسي "
و القله القليله الي يعرفون يتصرفون بهل اوقات .. و ينطون المساعده المطلوبه ..
موضوعي اليوم ..
ليش احنا منعرف او ماعدنا معلومات عن الاسعافات الاوليه ...!
هل يعتبر نقص في الثقافه ام جهل ..!
خاصه وان بلدنا " العراق " و شعبنااا من اكثر الناس حاجة لتعلم هل اشياء
بسبب الاوضاع الراهنه من انفجارات او عبوات ناسفة او شظيه او صاروخ او او او الخ ..
ممكن نشوف شخص مصاب بآي لحظه ..
الاسعافات الاوليه ليست حكر فقط على الانفجارات .. بل على اشياء بسيطه ممكن تحصل لنا بآي وقت معنا او مع اطفالنا او مع اهالينا ..
مثل الاختناق ، صعوبه التنفس ، جروح ، حروق و الحديث يطول ..
بهل حالات هل هناك شخص يعرف شلون يتدارك هالامور .. او يحاول بقدر الامكان ان يحفظ حياة هالشخص المصاب الى ان الطاقم الطبي يصل اقصد بيها " الاسعاف، الصليب الاحمر " ..!!!!
اني عن نفسي صار ويايه قبل شهرين موقف ما انساه بحياتي ،،
كنا بـ عزاء بعيد عنكم .. المتوفي شاب بـ حادث سيارة
بعد التعزيه كان هناك اكل و كلنا كاعدين و ماكو شي..
اني و بعض الصديقات طلعنا لخارج القاعة لان صرت اتضايق على حاله اصحاب العزاء
المهمم .. ماشوف الا صياااح و صوت عالي يجي ..
اجت والدتي عليه كلتلي تعالي بسرعه .. ام الولد " المتوفي " اختنقت من كانت تاكل تبوله ..
اختنقت بالبقدونس ..
رحت اشوف المرة وجهه صار ينطي الوان ،، عموما الكل يبكي و يصيح
اول شي سويته طلبت منهم يتصلون بالاسعاف ..
و بعدها اني ساعدتها لان ماخذة كورس كامل لـ 6 اشهر بكل شي يخص الاسعافات الاوليه ..
والحمدلله قبل ما توصل الاسعاف طلعت البقدونس الي كانت مختنقه بيه ..
بعدها المرآة طبعا شكرتني الف مره هي وعائلتها ،، و كل ما تشوفني تشكرني ..
هدفي من هالمثال .. بالعزاء كان اكثر من 200-300 شخص ..
الكل واكف يباوع عليها و يصيحون .. بدون ما يسون اي شي..!
بعدها اني حمدت ربي لان اخذت هالدروس و فعلا مثل ما كان يكول استاذي ..متعرفون بآي لحظه ممكن تنقذون بيها حياة شخص..
شعور رائع من تنقذ حياة شخص .. صح بوقت المشكله تكون مرتبك شويه وخايف بس بعدها تحس بشعور غريب ..
- ليش ما دولتنا الحكيمة ،، توفـــر دروس او دورات بالمدارس لتوعيه الناس
و لان الاسعافات الاوليه يعلمنا شلون نتصرف بالاوقات الحرجه و شلون لازم نفكر ..
لان عند الاختنقاق كآبسط مثال ،، عدنـــا فقط 4-6 دقائق ..!!! اذا بعدهااا ما تنفس الشخص فــ ممكن نفقده ..
- ليش بسياراتنا ما نخلي علبة الاسعافات الاوليه ..
وهالصوره توضح لكم شنو هي اهم الاشياء المفروض تكون موجوده بعلبه الاسعافات الاوليه
موضوع طويل .. واعذروني على الاطاله..
ولكن برايي جدا مهــــم ،،
الله يبعد عنا وعنكم كل هالمواقف الصعبة .. ولكن الاحتياط دائم واجب ..
بانتظار ارائكم .
Reply With Quote
