لا تلبس ولك ثوب الكبر ميلوك
جبير اعليك هوه وبيه تتعثر
مو كبلك ترى لبسته ناس اهواي
بس شوف النهايه وداعتك تقهر
على دجة المغسل نزعوه الثوب
وبتراب اللحد وجناته تتعفر
وين الكبرياء الجنت بيه اطير
وعلى اخوانك يخايب جنت تتبختر
نسيت اصلك ولك من ماي انت امهين
وعودك يبقى خاوي بسرعه يتكسر
لا تغتر ولك بالدنيه هيه اتدور
اذا ضحكت الك بعدين تتكدر
جميل اهواي صدك من تحب الناس
وباخوانك تفوز وابد ما تخسر
مثل صفصافه يبقى الما يعرف الناس
طويله على الشجر بس هيه ما تثمر
وشوف الكمكم شكد هيبه بالجانون
ويه دلاله كاعد عمره م اتكبر
وباوع عل السنابل دنكت للكاع
شالت هيه حب اتريد تتشكر
وشوف الفارغه رفعت عليها الهام
لان بيها نقص وتريد تتستر
انصحنك ولك عاشر اخوتك دوم
وتدري الجاي مر ويحله بالسكر
وخل وجهك بشر يضحك ترى م ادوم
حلو ثوب التواضع زاهي ومشجر
مثل وردة اريدك تبقى بين الناس
وبعبير الورد هيه الناس تتعطر
اذا انت تزاعل هالخلك خسران
تظل انت صفر ما قدم وأخر
رد مع اقتباس
المشاركة الأصلية كتبت بواسطة مصطفى العراب
