فدوه اقروه كله والله تفيدكم اخوكم فاعله خير
نصيحة ذهبية للمقبلين على الزواج
اذا اردت ان تتزوج فأختر ابنة الجيران للاسباب التالية :
١- حق الجار ع الجار والنبي وصى بسابع جار ..
٢- بالخطبة ويوم العرس ، ما تحتاج سيارات ،
ممكن تخلص الخطبة مشي والزفه ركض .. بكيفك ..
٣- من تريد مرتك تزور أهلها ،
لا محافظات ولا غير منطقة وسيطرات وصرف بانزين ،
تطلع من بابك تطب اباب اهلها ،
وحتى تگدر تفلش الحايط بينك وبين اهلها ،
لأن راح تصيرون عائلة وحده الا ما حرّم الله .
٤- اذا زوجتك موظفة تخلي الجهال يم اهلها وتروح للدوام ،
لا حضانة ولا مصاريف شهرية زايدة .
٥- مرات ما تعجبك مرگة الشجر ،
تروح مرتك لأمها تجيبلك ماعون ( شيخ محشي)
بنفس اللحظة ،
حتى لو مو طيب اكل واسكت تره تصير كعدة عشاير .
٦- من تزعل مرتك ، تروح بالنهار لاهلها زعلانه
وبالليل تجي يمك تنام وبالنهار تبدل ملابسها
وترجع لاهلها .. عادي .
٧-اذا زعلت مرتك زعله قوية ، ما عليك ،
الجيران همه يرضوها .
٨- بما ان زوجتك هي بنت الجيران ،
فأكيد انت شايفها بالدشداشة وبدون مكياج
ترش مي او تكنس الشارع طول عرض
وتتلفت يمنه ويسره ،
يعني ما تنجلط صباح العرس بشكلها الحقيقي .
٩- من تريد تسافر او تفكر تالمياله ثانية بغير منطقة ،
زوجتك قريبة من اهلها ،
يعني مطمئن وبالك مرتاح .
١٠ - وبما ان بنت الجيران موجودة من صغرها
تلعب بالشارع من چانت وتركض حافية
ومخلينها بالفريق حارس مرمى وشابعه كفخات ،
ما تبيع عليك فيكات وتگول :
(كنت اميرة في بيت ابي )،
لان انت تعرف البير وغطاه
١١- وبما ان بنت الجيران امك تعرفها زين،
يعني هيه لو تضوج منها لو راضية عنها ،
وذب فكرة الزواج براس امك ،
حتى من تصير مشاكل بالمستقبل ،
گول لامك : هاي اختيارج يمه واني سمعت كلامج
١٢-اذا تم الطلاق بينكم ،
ورادت غراضها تكدر تعبّر غرفة النوم الصينية الكبس مالتها من الحايط ،
ماكو داعي تفك البراغي ويضعضع الكنتور .
١٣-ومن تطلگون ماراح تشتاق لجهالك لأن راح تشوفهم دايحين يلعبون بالشارع
حفاي ليل نهار، يطبون بهذا البيت ويطلعون من هذا البيت ولا محكمة ولا حضانة
ومصاريف محامية تهلسك تهلس .
١٤- واذا تم الطلاق ، ماكو داعي تخلي النفقة بالمحكمة او كاتب عدل ،
ممكن تخلي المبلغ بظرف وتشمره من وره الحايط ،
بس لا تماطل بدفع النفقة ،
تره اخوتها خوال الجهال قريبين يجوك يطبطبوك ويحمسوك حمس ..
ادفع بالتي هي احسن،
وكفى الله المؤمنين شر القتال ...!!
رد مع اقتباس
المشاركة الأصلية كتبت بواسطة مصطفى العراب
