بسم الله الرحمن الرحيم
اللهم صل على محمد وآل محمد وعجل فرجهم

المـُحسن جنينـي ( فائزي )
************
ما أنصفونـي === بويـه ولوني
يسمـع حنيني === مـُحسن جنيني
*********
محسن جنيني ما سلم من دفعة الباب == فارﮔني وإبهمـّه وﮔﻊ وأعلن للغياب
واني دليلي إنجرح والمنظــــــــره ذاب == أحلم ﭽنت يكبر حبيبي إو يصبح الشاب
لكـن ﻓﮔدته === لحظـة نظرته
وإتشوفه عيني === مـُحسن جنيني
****
أول شهيد إبعترتي عيني تشوفــــــــه == مدمي وﮔﻊ فوﮒ الأرض رافع ﭽفوفه
جـُرحي كـُبر من محنته ياهو اليروفه == كوكب مشه عنـّي إبتعد يزهي إبكسوفه
فارﮔني دامــي === واني إبهيامي
من يومه بيني === مـُحسن جنيني
****
داري صـُفت حومه إو ﺳﮔط محسن عليها == حيرانه تنظر حيدره الوالي عليها
صابر تنظره+ إو منهضم هذا وليها == والدار زينـّها الوحي وأحمد نبيها
لكن ولوها === ما أنصفوهـــــــا
بيها بنيني === مـُحسن جنيني
****
يا يـُمـّه يامحسن عفتني إو مظلم البيت == وَيْ جدّك الهادي رحت آني تمنـّيت
عمري إنتهه إو لاشوف يومك يـُمّه ياريت == يبني صبتني إبمهجتي لحظة تعاليت
تنزف دموعي === تطفــي شموعي
إسمع ونينـــي === مـُحسن جنيني
****
يايـُمـّه يا أول طفل بالحومه مذبوح == مثلك أبو الأحرار طفله إيشيله وإينوح
وأطفال من بعدك تهج بالحومه وإتروح == تـُصفه العقيله إبكربله إختك بلا روح
ياريت يـَمـْها === أحضــر وضـُمها
ظلمه سنيني === مـُحسن جنيني
**********
مع تحيات شاعر أهل البيت / جابر النجفي