اقرواها تستاهل !!!!!!!
طالب في الاقسام الداخليه نزل الجميع الا هو؟
لان اهله محاصرون تحت رحمة من لا رحمة لهم..
............................................
اريد انزل واگل لهلي التخرج مابقاله ايام…
عندي ام وخمس خوان ماشايفهم من العام…
كبروا !!؟ مدري زغروا حيل؟
انا البخلافهم خلصان وكبر بعيوني بس الحزام…
يهلي الغربه ماتنراد، حضنها
يلمنه بس باايجار
والماعنده شابع ضيم وبحضن
الرصيف ينام....
رضينا شما يسوء الحال، ورضينا انعيش جوه اقسام...
بس لا انتو يهلي بيوم احس(ن) صرتوا جوه اقسام...
مرات من احس بالشوگ اگول المات مايلام...
واگول الحجر مو غلطان داس ابطنه حظن الجام...
يهلي اهواي مشتاگين، لا هيه شهر وانعود، ولا انتوا بسجن وارتاح، ولا حسبة نهر تا نسأل البلام...
يهلي شلونكم مشتاگ
ماشايفكم من العام...
طالب بس اطالب بيش؟
اريدن خبر من اهلي يهد حيلي چذب الاعلام...
ابن ريف وخذاني الشوگ من رجليه حد الهام...
مثل ثگله وغريبة دار وبرگبتها عشر ايتام...
دخيل الله اريد اهلي ابن شيخ وجريمه انضام...
اريد امي اتلگه الضيف حيهم گد نگلة اجدام...
واريد انگابهم ينشال،
الشيخه اللي تعزب الضيف مايرهم عليهه لثام...
واريدن ديرة الطيبين اهلي اكرام ولد اكرام...
يهلي بشوگ ادزلكم ثگيله شما تمر الايام...
انا طير بجنح مكسور لا لمني وخذاني الليل
ولا ادري النهار شضام...
هو المنكسر بالروح شيفيده حلو الهندام...
واريدن كون احصل امي واگلهه بشوگ ها يمه؟
ها يم الگضاهه اوهام...
الوووؤ..يمه تسمعيني؟
ابويه شلونه نفس الحيل؟
لو محني الظهر من گام؟..
احلفج بيه لا تبچين
ترى عمر الظلم مادام...
وصدگ تا اسمعچ شچم بيت،
يمن عفتوني بره البيت؟
......
يمه شلون ديرتنا وابوي وكل اخوتي الزغار،،
يمه هنانه بالغربه فلا احسن طعم للجار...
وين الله واغمض كون والگه اوسادتج يمي...
يمه وداعتچ ملچوم صديقي يصيحني ابن امي...
وانادي وما يرد الصوت فدوه ارجوچ حاچيني...
اريد اسمعهه منچ ذيچ ها يبني ويمي عيني...
وخبزهم والمخابز هاي يمه بعيني مو حلوين...
وحگ تنورچ المسجور مشتاگ اعلى خبز الطين...
#لرائعها
#ماجد_العرابي
رد مع اقتباس
