مساء الخير أصدقائي الاعزاء
شلون تعيش حياتك.؟
نسمع ونشوف وحتى الكثير ممكن من البشر مو مقتنع اساسا بالحياة الي هو عايشها..
بعضهم يمر يومه بطريقة روتينية مملة يكَعد و ياكل ونت و ينام)
وتمر ايامة بسرعة البرق وحاط رجل على رجل ويكَول والله هالحياة مملة..
بعضهم متوظف يكَعد وياكل ويبدل ودوام واكل ونوم وهم يكَول الحياة مملة..
بعضهم يسافر ويطلع ويجي ويشوف وهم يكَول والله هالحياة مملة..
طيب انت حاول قبل ماتكَول ان الحياة مملة فكر شنو سبب هالملل الي انت عايش بي..
الانسان الناجح الي يطمح دائما للتغير ، التغير هو الي يخليك تشعر بأن الحياة نوعا ما جميلة..
أحمد ربك ..ممكن انت عايش بنعيم غيرك مو عايشة ورغم هالشي قناعة هالشخص الي عايش حياته افضل من قناعاتك وعايش براحة لأنه مقتنع..
لا تكَول أني احسن من غيري ولا تقلد نفسك بقلادة الامتياز وكأنما رب العالمين ما خلق غيرك بهالوجود..
من تغلط كَول أني غلطت وخليك شجاع لأن اساسا الصح ما ممكن أن ينخلق لولا وجود خطأ يسبقه..
خليك واثق بنفسك ولا تكون شخص "إتكالي" حتى كَلاص الماي الي تشربة تعجز على أن تكَوم بنفسك وتشربه..
حاول تغير من طريقة حياتك حاول تحب الاشياء الي كرهتها بدون سبب وماتدري ممكن هالاشياء راح تقودك بيوم ما نحو النور..
لا تستهزأ بغيرك ..لاتكَول شوف هذا شلابس..شوف هذا شيعبد..شوف هذا شياكل..شوف هذا شلون يكتب..إنت ما تعرف حياة كل شخص ولا ممكن الك الحق ان تكون دخيل بحياة أي شخص حسب مزاجك..
إنت مو قليل..وإنت مو عاجز..لاتلبس دائما ثوب الحزن والإنكسار والوجع..لاتبين نفسك إنك محتاج لأيد تطبطب عليك..عيش حياتك بمنتهى البساطة..
لاتباوع على غيرك..لاتبحث عن شي فقط لملئ فراغك بفراغ لايدوم ..لاتحب شخص بس لأنك تريد تحب ..خليك مهيئ دائما ومقتنع بكل خطوة ..عيش حياتك وفق ماتقول المقولة وكأنك ستموت غداً..
ولأن أني مو من النوع الي أحب أطول بكلامي لأن أتصور فكرتي واضحة..
وهسة..
إحجيلنا شلون عايش حياتك.؟
مقتنع بحياتك.؟
شنو الشئ الي تحسه ينقصك.؟
حققت هدفك.؟
انطيني رأيك بالموضوع والمساحة حرة إلك.؟
بأنتظاركم أصدقائي
الموضوع كتبه الأن
رد مع اقتباس
المشاركة الأصلية كتبت بواسطة محمد صبيح
