السبت/تنظيف الكاونتر نظفي و رتبي و صدكيني إسبوع ورة إسبوع راح يسهل عليج التنظيف و ما راح ياخذ من وقتج غير ربع ساعة بس لأن اذا نظفتي كل إسبوع راح يصير نظيف و يمكن يظل نظيف من إسبوع لأسبوع اذا حاولتي يومية ترجعين الاماعين و البهارات لمكانها و ما تخربطيها
الأحد/تنظيف الثلاجة و تلميع أرضية المطبخ .. طبعا الثلاجة ضروري تتنظف كل إسبوع لأن الأكل بيها و لازم تكون نظيفة ... ما عدا الفريزر طبعا يتنظف كل شهر .. و أرضية المطبخ هماتين لازم تتنظف كل أسبوع تنظيف جيد لأن يصير بيها دهن و بقع ..
الإثنين/ترتيب خزانة الملابس و الجرارات اللي بالبيت اي جرارة و أي كنتور أول ترتيبة راح تكون صعبة بس اللي بعدها راح تصير أسهل و إسبوع بعد إسبوع إذا إلتزمتي راح تبقى مرتبة صدكيني..
الثلاثاء/ تنظيف نقاط الكهرباء حاولي نقاط الكهرباء دائما لازم تكون نظيفة تنظيف نقاط البيت كله ما راح ياخذ إلا 10 دقائق أو ربع ساعة + تلميع الأجهزة الكهربائية مثل الفرن و الخلاط و المايكروويف و الغسالة ........ألخ .
الأربعاء/ ماكو تنظيف إسبوعي لأن راح يجينا الجدول الشهري و راح يكون الجدول الشهري أول أربعاء من كل شهر يعني الأربعاء مرة وحدة بالشهر راح يكون عندج شغل و باقي أيام الأربعاء راح تكون شاغرة .. الجدول الشهري هو // تنظيف فريزر الثلاجة و تنظيف المجمدة و إذا تشوفيهن ما يتوسخن خلال شهر خلي تنظيفهن كل شهرين أو 3..
الخميس/ راح يكون تنظيف جزئي للبيت مثلا هذا الخميس أسوي تنظيف شامل لغرفة النوم .. الخميس اللي بعدة تنظيف شامل للمطبخ .. الخميس البعدة تنظيف شامل للصالة ...... و هكذا و كلما تخلصين عيدي من اول خميس شسويتي بي .. بهاي الحالة إذا كل خميس نظفتي مكان من البيت تنظيف شامل راح تتخلصين من التعزيلات مال العيد و ما شابه ذلك لأن بيتج راح يكون تلقائيا نظيف و انتي راح ترتاحين.. عندج هواية ساعات فراغ اذا طبقتي الجدول اليومي اللي نزلته إلج سابقاً اخذيلج منهن ساعة ساعة و نص و استغليها للتنظيف الجزئي..
ملاحظات مهمة :
بنات كلما تغسلين ملابس إكوي الملابس اللي تحتاج كوي مباشرة بعد ما تنشف حتى ما يتراكم عليج الكوي و تستغرقين ساعات و انتي تكوين خصصي يومية فد عشر دقايق اكوي بيها الملابس اللي غسلتيها اليوم اللي تحتاج للكوي.
سوي دائما تجهيز مسبق للأكل مثلا إذا جان عندج باجر دولمة للغدا حاولي بالليل تسوين الحشوة و تخليها بالثلاجة و الصبح لفيها و خليها عالنار أو اذا كدرتي لفيها من الليل و انتي تشوفين النلفزيون و خليها بالثلاجة و الصبخ فورا خليها عالنار بهيج راح تستغلين الوقت و تضربين عصفورين بحجر هم تشوفين التلفزيون و هم حظرتي غدا باجر.
رد مع اقتباس
المشاركة الأصلية كتبت بواسطة فقد الاحبه
