هنا

[رمـْـْْـْــــــــآڊ]

السلام عليكم




بيناتنا
موضوع يخص اللهجة العراقية
بما تشمل العبارات السهلة والصعبة والمعروفة والمندثرة جزء مما نتداوله في حياتنا اليومية وكذلك الامثال الواقعية

الموضوع فية قنابل تفجيرية وعبارات عراقية بحتة تميل للطرافة اكثر من الجدية


من لديه مشاركة ليتفضل
لتعرف اصل الموضوع تابع الردود

[رمـْـْْـْــــــــآڊ]

هل تعلم

طگ وأخواتها كم معنئ بيها


١- طگني: بمعنى ضربني.

٢- طگ التاير او الچوب: بمعنى انفجر.. وكذلك طگت النفاخة.

٣- يطگطك بالسوگ: بمعنى (یشتغل) اعمال حرة متفرقة.. او يطگطگ عصريات بسيارته: اي يشتغل تكسي بعد الدوام بسيارته الخصوصي!

٤- الطگّاگية: ما يُحتذى، كالمداس اجلكم الله.. وهي في الأصل قندرة لكنها تُلبس دون إدخال الكعب (الچاز) فيها للسرعة.. بل إن لابسها يطگها على عجل فيثني لتصبح مثل الگيوة.

٥- بالطگّاگ: بمعني ما يهمني، يطبّك مرض.

٦- طگت براسه: بمعنى قرر على استعجال وبدون مشاورة.

٧- طگ راسك بالحايط: اضرب رأسك بالحايط، هاي الشغلة متصير.

٨- طگها نومه: نام بعمق مثل نومة اهل الكهف.

٩- أطگها ركضة: يعني اركض بسرعة.

١٠- طگني الجوع: بمعني ميت من الجوع.

١١- طگتني الشمس: بمعنى اصابتني ضربة شمس.

١٢- ‌يطگ اصبع: يعني فرحان ويفرقع بإصبعيه السبابتين على غرار ما يُفعل عند الغناء والطرب.

١٣- طگطگت اصابيعي: إصدار صوت عند فرقعة مفاصل الاصابع.

١٤- طگ چبدي او طك گلبي من سوالفه: بمعنى أزعجني كثيرا.

١٥- العرس چان بيه طگ: يعني كان فيه غناء وطرب.

١٦- طگلي صورة: بمعنى التقط لي صورة.

١٧- طگلك بيضة: اي قلي البيض بالزيت.

١٨- طگوه بالدهن: من المصطلحات العراقية ما بعد الاحتلال، بمعنى كتلوه وراح الكم فدوة.

١٩- فجاةً طگله بيت وسيارة: ومعناها اشترى بيت وسيارة (على نحو غير متوقع)!.

٢٠- طگ طگه مو طبيعية او طگت وياه او أموره طاگة: ومعناها انفتحت وياه او صار من اصحاب الاموال والاملاك بسرعة.

٢١- طگه چيله : رماه باطلاقة.

٢٢- طگ الشجر: بمعنى أورق الشجر في الربيع.

٢٣- اسمع طگطگة: بمعنى اسمع اصواتاً غريبة!

٢٤- طگ الچفن: يعني انفتحت بيده واموره صارت زينه

٢٥- الطگّاگة وجمعها طگاگات: عند أهل الخليج، هي المرأة التي تغني في الاعراس بأجرة.. كما هو تاريخ المطربة أحلام.- :
26- طك طكاكة : العاب نارية
27- طكت : بمعنى ثارت او اشتعلت
28- طكطكها بعجل : بمعنى انتهي منها بسرعة
واخيرا (ييمة طگطگ الجدر كشفته البزونه) اهزوجة جيل الستينات والسبعينات

اذا عدكم مشتقات لطگ
اكتبوها، واذا ماكو طگونه بتقييم ههههه

ولاتنسون طگه الكويت
ولاطگه بوش
عفيه بلد كله طگات...

نسيت اطگطگلكم حرمل!!

[رمـْـْْـْــــــــآڊ]

ْ
ادعلب
انكلع
ولي
اشطح
ادهرب
فر ويلك وتوكل

بمعنى ابتعد عن هنا ... او ابتعد عني لقد ازعجتني

[(ملاك الروح)]

افتتاح موفق
موضوع حلو واجه بوقته
بس اريد اعرف شنو معنى صجيجه

[الغريب ي]

هّـهّـهّـ شُـکْرأّ لَلَمًوٌضًـوٌعٌ رمًأّدٍ لَيِّ عٌوٌدٍةّ صّـدٍيِّقُيِّ

[الغريب ي]

نسيت التقييم رجعت حتى انطيك تقييم اعذرني

[رمـْـْْـْــــــــآڊ]

افتتاح موفق
موضوع حلو واجه بوقته
بس اريد اعرف شنو معنى صجيجه

صجيجة تعني مدى الانزعاج من هذا الشخص
ليس لها مفهوم ثابت فهي تستخدم عندما ينزعج احدهم من الاخر ...لها القدرة على الفهم مما يريد الاخر دون الحاجة لمعرفة معناها

صجيجة كل الهلا بيج

[رمـْـْْـْــــــــآڊ]

هّـهّـهّـ شُـکْرأّ لَلَمًوٌضًـوٌعٌ رمًأّدٍ لَيِّ عٌوٌدٍةّ صّـدٍيِّقُيِّ

نسيت التقييم رجعت حتى انطيك تقييم اعذرني

حياك الله صديقي انرت الموضوع بحضورك
شكرا لانك طكيتني بتقييم هههههه

[احمد العثمانيے]

طگني بـــ استكين چاي
أي أسكب لي شاي


طكَيتك بـــ تقييم ( يعني أجاك تقييم )

[سمراء من قوم عيسى]

موضوع حلو