يكول الساعدي ابأبيات الاشعار_حسين الساعدي
يكول الساعدي ابأبيات الاشعار
نصيحه وتستَفاد إبهل نصيحه!
لتغرك الصوره الجنها جُمار
يمكن بالعمق هيه القبيحه!!
تصح ورده جميله اتسر الانظار
بس من العطر مابيها ريحه!
الفخر مو لليواعد ياخذ الثار!
الفخر للياخذه ابسكته الوكيحه!
غربلهم عدل وبكيفك اختار
مو كلمن حجه وانته التصيحه!
يصح مثل الجبل وتظنه مغوار!
وبيوم الحرب مثل الذبيحه!
بالك لا تطفي النار بالنار!
وبالك تهمل احجايه الصريحه
يعني الليل هو ايجيب الانوار
ويضوي الكمر كل الفسيحه!
لا تنسى النصيحه وخلها تذكار
مابين القوافي ابهل قريحه
لو صارت غَدر لتصير غَدار
واختار الوفي الصارت شَحيحه!
سرك لا تبيحه ابين الاسرار
وسر الأمنك ! بالك تبيحه!
لا تخذل دخيل اتعنه مشوار
اجاك البابك ابروحه الجريحه!
تراه البيت بخته إبعتبت الدار
معناها البخت بالك تزيحه!
إذا بأيام ما جِهبوك خطار
عتبت بابكم ! ما مستريحه!!
أريدنك تكون اشلون ماصار
تاج الراس وَأفعالك ! مُريحه
اذا كلها تتباهه وعدها دولار!
أنته إتباهه بالغيره الصَحيحه
جَم تافه إبتافه عنده مليار!
ساركهن! إويضحَك ! للفِضيحه!
ساركهن إويضحَك للفِضيحه!
حسين االساعدي
رد مع اقتباس
المشاركة الأصلية كتبت بواسطة غرور
