دارميات جديده حسين الساعدي-ظكاني ظكه العوز
ظكاني ظكه العوز خسفلي العيون
بعت الجهال الناس خاطر يشبعون!
,
ظكاني ظكه العوز ذبني ابمكاني
حته الاليه ايكول ماعرفك اني!
,
ظكاني ظكه العوز سوه اليريده
خلاني امد الايد للمدلي ايده!
,
ظكاني ظكه العوز ما اعرف اشلون؟
مديت اديه الناس جانو يجدون!
,
ظكاني ظكه العوز ضيع غلاتي
شيخ وصرت لناس راهن عباتي!
,
ظكاني ظكه العوز يم اليكرهون
خلاني ادور اكطوف من اليدخنون!
,
ظكاني ظكه العوز دكاها وياي
خلاني ابوس اجفوف لاويهن اهواي!
,
ظكاني ظكه العوز خلاني هايم
افتر والم اعظام بعد العزايم!
,
ظكاني ظكه العوز بس الله ساتر
خلاني ادور الموت بين المقابر!
,
ظكاني ظكه العوز ما تدري بيه
كمت اشتغل طبال عد كاوليه!
,
ظكاني ظكه العوز ظكت يتيمه
تستنظر افضالات بعد العزيمه-
,
ظكاني ظكه العوز كلش قويه
للرايح وللجاي مديت اديه!
,
ظكاني ظكه العوز شوف الهضايم
راح وجزه رمضان والهسه صايم!
,
ظكاني ظكه العوز ومعاند اعناد
يمكن سبع تيام ماضايك الزاد!
حسين الساعدي
رد مع اقتباس
المشاركة الأصلية كتبت بواسطة أتنفس هواكم
