بنآدم قيمته حچايه
الّمعلم يصير ابساط
صعبة يصيرلك صايه
فرق بين التراب الـ بالچدم ينداس والفوكَـ المصلايه
الدنيا تغيرت من رافكَت قابيل
من أختلت وي ابليس حبلت وانجبت وأحفادها هوايه
اليصير مرايه الك بالك تأمن بي
لأن أسود ظهرها صارت مرايه
وبعدها الروح عـالزينات تتوازه
شنو نفع الشفايف والضحك معدوم
والواهس كبر يمشي اعله عكازة
الدمع مرات اله عازه
البجي بالليل شايل واهس جنازة
وبدت ساعات من ليلي
وآنه وحسرتي وآخر وشالة آخ
بس الروح تشكيلي
ووي كل ثانية يصعد وياها الميل
تنزل ثانية بحيلي
ويجي جرحك بتالي الليل
عصفور اعله جرف العين يغافلني ويحط سكته
واشوفنك بنص دموعي صورة ماي
مدري الجرح مدري أنت
وكَتلك صاحبي بس ما مأمن بيك
انطيتك ظهر روحي مو ظهر مكَفاي
تطعني ردت بعيوني شفتك جاي
شايل خنجرك وتكَلي شايل ناي
شايل ناي .. المن ؟؟
طاح كآس الكيف
وذبل وچه الشتاء لاحته حرورة صيف
وآنه ويه الفرح شتآن
كلمن راح منه برآي
وأنكشفت أوراق الصدكَـ من الزيّف
وبين زيف
ثوب سوالفك مو مالتك مطلوب
بين زيف
ولمعة ذهب وچهك شبه بس مصبوغ
بين زيف
وطلع نهر الكرامة بكَصتك مرسوم
جريمة أيام عمرك من يصيرن طيف
وصعبة الرايده يمر بيك مرّة ضيف
الصديچ الزين من يموت سرّه وياه
شايف چم صدر ويموت سكتة السيف
ونصحتك .. نصحتك ما أحذت الشور
كَتلك شجرة ظل ولا تظل عصفور
كَتلك شجرة ظل والشمس هي تدور
وماردتك تصير أحلام !!
ويدوسك صبح ويجيب غيرك ليل
وكَاعك تنسحكَـ وتصير كلها كَبور
آنه معاشرك من جنت بعدك خام
يهنياله اعله كَلبه الچامه
كلشي بداخله ماضام ويكَلك إذا مكسور
وأصبرلي بعد ساعة
يخدر مايهه عيوني واشربنك دموع بهيل
اصبرلي بعد ساعة
بعد بس نجمة عوزي ولوني يطلع ليل
ماهمني بعد فركَاك لو ملكَاك
چرف ماصيرن لمجراك
أنه قررت أصيرن نيل
أنه بروحي الجروح كَبور
تنطر نفخة أسرافيل
راح أفرش سوالف جمر فوكَـ الكَاع
وفنك لو كَدرت اتشيل
وأعرف راح يچونك
بيهن ظني أبد ماخاب لاچن خيبن ظنك
وكَضت ساعات من ليلي
كَضيت وياك كل ساعة
أكَلب دفتر جروحي
وداعك چان أهم ساعة
==============================
قصيدة : دفتر جروحي
كلمات : حيدر الموسوي
توثيق : عباس عبدالله الجريح
تدوين : أحمد العثمانـــي
رد مع اقتباس
