هنا

[أنثى حائرة]

مسائكم عافيه

قضيتي يحكمها العقل واعرف الجواب لكن احب اشارككم قصتي عسى ولعل الله يجديني ع طريق صواب
قبل شهر تعرفت ع شاب ع احد البرامج من خلال تعليق وبقينا نحجي خذت الموضوع ك تسليه او هيج شي مجرد صداقه طلب مني نبقه نحجي واخذ برنامج أخر ضلينا نحجي يومين تقربنا لبعض جدا نفس العمر نفس التفكير نفس الذوق ..شفته وشافني بالصور ثاني يوم نحجي صوت وفجاه كلي احبج بالبرتغالي...اني اعرفها بس غلست هوة دكتور مرحلة اخيرة واني ايضا جامعيه بس جديات تعلقنا في بعض وصارحني وتقبلته صار خلاف بينا وفترقنا يومين رجع صالحني وحسيت انو احبه وكتله حبيتك كال خلص بعد شهر نلتقي وبالعطله نتزوج عرفني ع امه .بس المشكله هوة بغداد واني بصرة لكن هوة يكولي معندي مانع حتى لو اسكن يمكم اهم شي نتزوج
ميضم شي عليه...ماضيه سيء بنات وهيج لكن يكول تغيرت ومجرد نزوة هسه خلص حبيت..مهتم بيه وميضم شي عليه
لكن طلب صور مني بلا حجاب ومقبلت ف كال خلص نتعاوف ..زعل يوم ورجع كال محال اتركج بس الموت يفرقنا ..ورجع مرة اللخ وراد صورة بلا حجاب وتعاركنا اكثر من مرة لمن مليت خذت استخاره ودزيتلهيحلف بكل الائئمة وباامة انو خلص اني زوجتة ولازم اوثق بي وماافكر لشيء نهائيا
اني مصدكته لان دااشوف صدوك يحبني
بس ياترى هل ممكن يحبني بسرعه هيج وهيج يقرر نرتبط
ماادري هوة شي مينعقل بس اني مرتاحتله حيل ومصدكته ...يخاف من الائمة ويحب امة وكل حلفانة بيهم..العباس هوة كفيلي يمة



هذا كولشي صار
احب اسمع نصائحكم

[ابوعلي/]

والله ياعمو , ماكو حب هيج ولو نفترض انه يحبج ليش يطلب صورك بدون حجاب لوكان غرضه شريف , بس اعتقد اريد ياخذ الصور حتى يبتزك بها , فلاتتبعي قلبك فقط ولكن فكري بعقلك وانت حسب ماتقولين جامعية , يعني المفروض ماتمشي عليك . فكري مليا واستشيري اقرب الناس اليك قبل اتخاذ قرارتك .

[M̲u̲S̲h̲T̲a̲Q̲ツ]

لا انصحك بان تعطي ولو صوره لشعرك فقط
هاي كنصيحه اخويه اما اذا متتقبليها فبراحتك ولكن لا ارى نية حسنه بطلب صور بدون حجاب

[نـارڤـين]

مثل ماكالو عمو ابو علي ومشتاق
لا ترسلين صورتج لو شيسوي ولو يزعل
وماكو حب عن طريق النت ولو تبتعدين عنة يكون افضل

[Scrap]

والله ياخيتي البلوك حلو ومريح
ممرتاحله ابد ابـــد

[غرور]

ههههههه والله ي الله
باباتي حبيبتي اصحي ماكو حب ع لنت تره كلها لعب
ولنفرض حبج مراح يطلب صورتج صدكي
اما نصيحتي ومساعدتي الج انه خلي الج رأيي وكلمه عنده انه كوليله بعد بس تجيب سيره الصور بعد ازعل ومحجي وياك ومن هالسوالف و(خليج كد كلمتج اذا جاب سيره الصور وزعلتي يعني روحي وهو اذا يحبج يرجع يصالحج وميطلب بعد )
هذا كل لعندي
تحياتي

[سجى فاضل]

نصيحه حبيبتي خلي يتقدملج وكليله تعال اخطبني واتحججي باي شي واصري عليه انو يجي واذا اتحجج وتعارك وياج اعرفي انو هاذ جذاب ويريد يلعب باعراض العالم وانتي حره

[Ali Ibrahim]

من الاخير اكلج ، حب عن طريق النت فاشل اضافةً الى انو طلب صورج بدون حجاب يعني هذا ما يحبج صدك ، مجرد معجب بيج ك شكل او شخصيه .. الي يحب جد ما يطلب صوره بدون حجاب وشغلات هو ما يقبلها ع اخته
اسألي بله كليله تقبلها ع اختك تنطي صورها لواحد تعرفت عليه عن طريق النت ، وشوفي جوابه ..
اذا كلج اقبل معناه هذا ما عنده غيره ع عرضه ( اسف ع كلامي بس حتى اوضح لا اكثر ) واذا كال لا ما اقبل معناه ما يحبج

واسف اذا كلامي يجرح بس هايه حقيقه


واتمنالج الموفقيه ان شاء الله

[سَـبتـمـــر]

هههههههههههه ولو يحب الائمة جان مرضئ على بنات الناس !!!!!...هو لو اخته يرضئ اكيد وبدون تفكير مراح يرضئ لعد ليش يرضئ على بنات الناس ..نيحتي ماكو شي اسمه حب نت وبعد فترة نتزوج!:...الي يريد يدگ الباب ويكول يابه اريد بتكم ....هذا رئيي:

[fairy touch]

السلام عليكم ...
قريت اللي كتبتيه ..و الردود ...
كل اللي ردوا كانت وجهة نظرهم وحدة ...
و اكيد انت قريتي الكلام ..بس يا ترى اقتنعتي ؟!
مرات ، الانسان هو يخدع نفسه بنفسه ...يمشي ورا الچذبة لأن هو يتمنى انه تطلع صدگ ...
انت يا عزيزتي دتغمضين عيونچ بأيديچ ...و لهذا شگد ما رح نحچي ، ما رح تتغير نظرتچ للأمور ..
و الا ترا هي السالفة مبينة و ما ينرادلها روحة للقاضي ..واحد يريد صورة وحدة بدون حجاب و من ما تقبل يگوللها نترك بعض ..تدرين هذا شنو ؟ هذا واحد متمرس باستدراج البنات اللي يوقعهم بشباكه ...يعرف شلون يضغط و يرخي ...يهدد و يرجع يبيع ناعم ...
انتظري كم يوم و هسة تشوفين شراح يبدي يطلب ...هو من هسة ذبلچ حچاية( انت زوجتي) ...خل اگولچ حچاية اختي الصغيرة انت ..ترا ماكو شي اسمه عهد و وعد و على اساسه احنا بحكم متزوجين ..لأن دا اتوقع الخطوة الجاية شنو ...و اعتقد انت فاهمتني ..فديري بالچ زين ...
انت بنية جامعية و المستقبل كله گدامچ ...ترا من تبيعين حياتچ و سمعتچ بثمن بخس اسمه وعد و عهد ...ترا محد بعدين يشتريچ بفلس ..حتى اهلچ .
الخلاصة انت ماسكة حية ناعمة و مأمنة بيها .
و عقلچ براسچ ..اعرفي خلاصچ .