أهم 10 مهارات للشخص الناجح

في الوقت الحالي، أصبح في بعض المهارات اللي لازم تكون متوفرة فيك، و المتحكم الوحيد اللي بيحدد إية هي المهارات اللازمة هو سوق العمل، سوق العمل هو عالم مليان بالشركات و المشاريع و المكسب و الخسارة و الخطط و الاهداف اللي بتحتاج مهارات معينه عشان تتحقق ..
و الحقيقي إن المهارات دي مش مستحيل إنها تكون متوفرة فيك، لأن كلها مُكتسبة، بمعني إنها بتطلب دراسة و تجارب و عمل عشان تكون متوفرة فيك، من المهارات دي ..
1-Motivation التحفيز
في الوقت الحالي و الظروف الحالية أصبح التحفيز شئ أساسي و مهم جداً، بقي من الضروري إنك تعرف إزاي تحفز نفسك و الناس اللي معاك، كتير بنعدي علي ظروف بتكون السبب في إحباط كبير، إحباط قادر إنة يخلينا نوقف شغل و طموح ، و الحل الوحيد للإحباط دة هو التحفيز، و التحفيز ليه وسائل كتير جداً و صور كتير، في أشخاص لما بتقرأ قصة نجاح بتنجح في إنها تحفز نفسها، و ناس تانية لو إتفرجت علي شغلها القديم بيديها جرعة حماس و تحفيز إنها تكمل،
مهارة التحفيز هي إنك تنجح في إنك تحفز نفسك و تحفز الناس اللي معاك، و تكون السبب في إن الشغل يبقي أحسن و النتائج تبقي أكبر و العائد يزيد..
2- Communication التواصل
و اللي من أهم المهارات اللي لازم تكون عندك، طبيعي جداً إنك تتعامل مع شخصيات مختلفة و ثقافات مختلفة و وجهات نظر مختلفة، و من هنا لازم يبقي عندك مهارة التواصل مع الإختلاف دة، بتعرف إزاي تتعامل صح مع وجهات النظر المختلفة عن وجهات نظرك، إزاي تبني علاقات ناجحة و فعالة مع الناس، إزاي تلاقي الرد المناسب و ما الى ذلك،
لو إنت إنسان معندكش مهارة التواصل، في الأغلب هتقابل مشاكل كتير في التعامل مع الناس، و بالتالي مشاكل في شغلك و دراستك و حياتك، و من هنا لازم تطور و تعرف إية أحسن الوسائل اللي ممكن تدعم مهارات التواصل عندك .
3- Trust Building تكوين الثقة
زي ما قولنا إن طبيعي إنك تتعامل و تتواصل مع الناس، من الضروري برضوا إنك تعرف إزاي تكسب ثقة الناس دي فيك و في مهاراتك و قدراتك عموماً، و في الأغلب دة اللي بيتحقق عن طريق السلوك بتاعك Behavior .. سواء كنت شخص مسؤول، طموح، يُعتمد عليه، شغال على أهداف .. أو إنك شخص عادي، معندوش معرفه كافية و مش متعطش لتزويد معرفته دي و هكذا ..
4- Decision Making إتخاذ القرار
مهارة إتخاذ القرار من أهم المهارات، و دة لأن القرار من أهم المسؤليات اللي علينا كلنا، و أوقات كتير عواقب قرار خاطئ بتكون كبيرة جداً، و اللي لازم تعرفة إن مهارة إتخاذ القرار من أكتر الحاجات اللي بيتاخد فيها دورات تدريبية لأهميتها .. و فكرة إتخاذ القرار في حد ذاتها بتقوم علي مراحل، زي إنك تحدد المشكلة، و الحلول و البدائل ، و النتيجة المتوقعة من كل حل، و الموارد اللي عندك المتوفرة لكل حل، و أكتر الحلول اللي ليها إحتمالية حدوث كبيرة و هكذا ..

5- Negotiation التفاوض
يعني إية تفاوض؟
شوفت قبل كدة في أي إعلان شغل، لما يوصلوا للجزء الخاص بالـSalary “المرتب” يكتبوا Negotiable يعني قابل للتفاوض ..
بمعني إن لو إنت شايف إن سعرك يساوي XYZ لكن الـEmployer شايف إن سعرك مش أكتر من XY ! هيحصل إية؟
هنا هتظهر مهارات التفاوض، و هي إنك توصل لحل يرضيك و يرضي الآخرين عن طريق التفاوض و تكون نهاية عملية التفاوض دي هي الإقناع، و بالتالي المهارة دي مهمة جداً في الحياة العملية و الإجتماعية،

6- Leadership القيادة
إنك تكون قائد، بمعني إنك تحفز الفريق اللي معاك، تقوم بتوجيه للمكان الصح، تحدد الهدف الصح، و تقوم بتقويم و تدعيم الفريق دة، لو عملت كل دة هتكون قائد، بمعني إنك مش هتوصل للنجاح لوحدك، إنت هتوصل مع كل شخص مسؤول منك، و دة لأنك كنت قائد ناجح ..
و عشان تكون قائد ناجح لازم تتوفر فيك صفات كتير مهمة، من تنظيم الوقت و التخطيط و تحديد الأهداف، و بالتالي الـLeadership صفة مهمة جداً، و أصبح الإحتياج ليها عالي جداً في الوقت الحالي.
7- Conflict Management إدارة المشاكل
و طبعاً المشاكل جزء أساسي في حياتنا، و بالتالي إدارتها لازم تكون جزء أساسي في حياتنا، و هي دي المهارة، إزاي تتعامل مع المشاكل بحيث تطلع منها بأقل الخسائر و أحسن الفرص،
و المهارة دي بتطلب صفات كتير زي إنك تكون بتعرف تحلل الموقف صح و المشكلة و أسبابها و أحسن الحلول و لو في أي مشاكل سابقة شبيهه بالحالية و نتيجة حل المشكلة السابقة و غيره..

8- Self Learning التعليم الذاتي،
التعليم الذاتي هو قدرتك علي تعليم ذاتك و هو مهارة مفيدة جدا و مهمة جداً، و زي ماهو معروف جداً إن التعليم ملوش نهاية، و إن رغبتنا في تعليم مجال جديد بتزيد يومياً، مهارة القدرة علي التعليم الذاتي بتكون السبب في إنها تخليك الشخص اللي عنده معرفة مش قليلة بمجالات مش قليلة، المهارة دي بتطلب حاجات كتير من تنظيم وقت و تحقيق هدف و وضع خطة و رغبة حقيقة في التعليم..
و المهارة دي بيتم إكتسابها بالإلتزام، الإلتزام علي مواعيد معينة مخصصة للتعليم في اليوم، تعليم نفسك بنفسك، و التطبيق و إختبار نفسك، لو إلتزمت بإنك تقوم بكل الحاجات دي، هتكتسب صفة التعليم الذاتي بسهولة ..
9- Flexibility المرونة
في سوق العمل المرونة من أهم الصفات، و المرونة هي قدرتك علي التكيف مع الظرف الحالي، ولأن سوق العمل متغير جداً، و أحوال الشركات و المؤسسات متغيرة، بيكون مطلوب إن الناس اللي شغالة فيها تقدر تتعامل مع التغير دة، و هي دي المرونة،
لو إنت شخص معندكش مرونه، هتواجه صعوبات كتير مع كل تغير هيحصل،
10- Knowledge المعرفة
إنك تكون دائماً متعطش للمعرفة، سواء معرفة في مجالك أو اي مجالات أخري ده هيحسن و يعلي من مستوي ثقافتك و علمك، و بالتالي هيتسبب في توسيع مداركك،
دول في الأغلب الصفات الـ10 اللي بتوفرهم في أي شخص بتكون النتيجة هي نجاح في سوق العمل، قولولنا بقي شايف إن في صفات تانية ممكن تضاف؟؟