هنا

[احمد العثمانيے]

يبني خنكَوا كل ضواي وذبحوا بصينيتي شمعة
ونجمك اليلمع ييمه مغندب ومابيه لمعة
والكَمر شد نكَله جاي ايشيل ضل بلا ضوه چا شنهي نفعة
يبني والبستان ذاك مصوفر ومسلول زرعة
ودم ضحايانه ينزف بكل مضيف ومابقت للزلم ربعة
والخبز مديوف بالدم
كَلي خبز اليابس الينداف بالدم من يجرعة
يبني جاعت الأمهات وديسهه كَامت ترضعة
والسلف ياكل لحم موتاه يبني مالكَه الخبزة التشبعة
وذني حلوات السلف باكَوا كحلهن والرمد طش وترس كل عين وسعة
والعجارب ينكَط بكل درب سمهه عدنه محسود التلسعة فرد لسعة
والسهم نام اعله جبد الكَاع يبني وحشمت وين الينزعة
والمراجيح التغني بعيدنه صارت مشانق والحبل محد يكَطعة
والمزابل حولوهه النه مكَابر يبني يوميه الفجر توصلنه دفعة
ويه كل صوط اليشك ضهرك سواجي ايشك مهجتي
وتنشلع روحي ويi كل اضفر نذل منهم يشلعة
حدو بضلعك خناجروانته كَبلك چم شهيد العبر الثورة اعله ضلعة
يبني جلاد السجن ساطوره جايع كَصله من زندك وشبعة
كون اشوفك كون اجيك ابنار كَلبي چا حديدك كله اموعة
يمه ششكيلك ضلمهم من اجينه انواجهك مصباح جمعة
جينه واحدنه ايتطوه الريح لوهبت تدفعة
ويم سجنهم صارت علينه البنادق يبني فزعة
واحد بعيني يحط يايمه اصبعة
واحد يجر شيلت اختك راسهه بشارع يفرعة
وتهل ادموعي وتصب رايه على خدي دمعه تبجي الحال دمعة
يبني ماخلوني اجيك وعز علي منشوركم بعلاكَه ارجعة
يبني صبرك خله بسمار الدرب نابت بجدمك لاتشلعة
يبني ضل لابس حديدك لاتمل منه وتنزعة
نارك الحمره التوجهه الناس بأول ليل هيه الي تكَطعة
وخلي عكَربهم بداري وكل وكت تلسعني لسعة
ما اكولن آخ منهم لا وحك الكَضه ومادله عدوانه اعله ربعة
لما صوت الدنيه يدوي والعشيرة اتصير فزعة
اهناك راسي وبيرغي المصبوغ بالدم عالي ارفعة
اهناك وحش الغابه مايحميه شرعة
اهناك اردن للعرس حنته وشمعة
وين المچرع نمر .. مرين اچرعة

[ღ عِشق ღ]

يسلمو..ع النقل

[† ذلفاء †]

رائع انتقائك

[أمجد الاسدي]

شكرا جزيلا احمد