يا هيه
ياطور الحزن
موالك يفزز حنين الروح ويبجيني
يا هيه
ذبوني طفو وهفتو جمر سنيني
ريشه وتهت بالريح
هاي سنين
انا الوي الهوى ويلويني
امزوهر طفح بيه الدمع
لا شبجه لا فالة رحم تخطيني
وما فادن اسدود الصبر
فاضن سواجي ونيني
يا هيه مر اعله الجرف
وأطلع واجيك بطيني
وأفرش حمل شوكَي أبشليلك
حته أطلعلك سوالف كفرني بديني
عيدين مرن عالعشكَـ
وآنه الحزن جاسيني
صوف ابحلك مغزل صرت
وشما فرغ يطويني
يا هيه
لو نام الجفن
وتوسد الدمعات
سالوفة هوى توعيني
واكَعد واجر يا هيه
ذبوني طفو هفتو جمر سنيني
بس جمرة التذكار ظلت واجه وتجويني
مطار يا غيم الجفن
ليليه افيض واسبح بمي عيني
خشبة ويزتني السيل
والحسرة بحزن تحديني
عود وشرب مايه الصبر
واتغربلت بالظيم
يرياح الهجر نسفيني
طشيني ويه الريح
بلجي انزل ولم اسنيني
يا هيه
ياهيه دينت العمر
وشلون اردن ديني
ومرخوص غني بلا حرج
اطرب على الحسرات اضن تدريني
لا تحتركَـ وياي
خليني احترك خليني
ريشه وتهت بالريح
هاي سنين
وانه الوي الهوه ويلويني
ما فادن اسدود الصبر
فاضن سواجي ونيني
رد مع اقتباس
المشاركة الأصلية كتبت بواسطة جنة الروح
