موقف ايهد الرواسي ... مر عليه
حيرتي من فوگ مهري ... ابلا ايديه
مدري اطيح اعله الوجه مدري اعله ظهري
وانه كل هذا وفكر شنهو عذري
سامحيني سامحيني
خويه من گطعوا يميني عاتبتها
ظلت املزمه ابقميصي اوسامحتها
من أخدت السيف منها وگعتها
وانزلت من مهري مسرع گابلتها
ها يا ايدي بيچ زينب صافحتها
بيچ انه دگيت صدري من جبتها
چن تكلي اوداعة الله ... امشي قاتل
بالعطاشى هالله هالله ... ياأبو فاضل
واحملت سيفي ابيساري اودمي يجري
وانه كل هذا وفكر شنهو عذري سامحيني
*** *** ***
گمت أشوف الجيش غيمة ويمي يگرب
حاصروني وانه ضامي اوگلبي يلهب
ابهل وضع واني ذكرتچ خويه زينب
إتذكرت مره سألتي اوچنه نلعب
گلتي لو واحد ضربني خويه تغضب
وابوگتها إزعلت منچ والدمع صب
إتذكرت هسه سوألچ ... يالحبيبه
أسود ايخلون متنچ ... يالغريبه
لو طفت نار الخيام اشيطفي جمري
وانه كل هذا وفكر شنهو عذري سامحيني
*** *** ***
يختي من طاحت يساري استظعفوني
سدوا اعليه طريقي اوحيروني
اسهام ورماح اوبواتر گطعوني
نمت فوک الجود واپچي شاهدوني
گالوا اعليمن دموعك ناشدوني
من گلت اپچي اعله زينب عذبوني
صوبوا جودي اوتبده ... اوباوعتلچ
واني بس ابعين وحده ... اتعذرتلچ
عاينت وشچم سهم نام اعله صدري
وانه كل هذا وفكر شنهو عذري سامحيني
**** *** ***
أشعر ابفارس اجاني ابهذا حالي
گلي انت تگول اني الما أبالي
يالله أدعوك النزالي والقتالي
گتله لا يمناي عندي ولا شمالي
گلي شنهو الغالي عندك رد سوألي
گتله خدر الفاطميه اهوايه غالي
گلي مايسلم خدر ها ... بنت ابوها
ابوگعتك نكسر ظهرها ... وظهر اخوها
وابتسم لمن تحشمك خويه خدري
وانه كل هذا وفكر شنهو عذري سامحيني
*** *** ***
بالعمد لمن ضربني راسي انطر
يختي چن الگاع گامت بيه تفتر
اهنا صحت يحسين خويه احضر احضر
راح أروح او الك الله يا أبو الاكبر
وگعتي خويه اعله وجهي ا تآلم أكثر
ابعيني سهم العين أسمعه من تكسر
يامهر خبر عضيدي ... واپچي حرگه
گبل لا ينگص وريدي ... أرد اشبگه
أخر انفاسي يضع ثغره اعله ثغري
وانه كل هذا وفكر شنهو عذري سامحيني
*** *** ***
بن سعد بالجيش ناده وانه أسمعه
هسه ظل الحسين وحده خل نگطعه
حاولت انهض وگلهم بيه فزعه
بس يزينب هيه گومه وهيه وگعه
ابلايه شوفي اولا ايديه بيش انفعه
ياإلهي رد لي سيفي اوشوفي رجعه
هايملچ الموت سارع ... بالمنيه
خاف أشوف احسين واگع ... عالوطيه
خويه زينب من يطيح احسين إحذري
وانه كل هذا وفكر شنهو عذري سامحيني
*** *** ***
احسين ناداني يخويه وينك انته
ورگضت لا جن يزينب من وصلته
الشمر چاثي اعله صدره ابعيني شفته
گتله ياملعون أذبحك لو لمسته
خويه چنه ماسمعني اوحز رگبته
واشعر اتجاهل ضربتي من ضربته
خويه ثاري آني ميت ... من اجيته
والمهم بسته ابوريده ... وبلحيته
ميت وابأمرج بقه مشغول فكري
وانه كل هذا وفكر شنهو عذري سامحيني
*** *** ***
نار المخيم شفتها اوشفتچ انتي
واني اجيت أركض ونادي وما سمعتي
خايف الوادم تشوفچ لو طلعتي
من گربلچ شمر گتله اترك اختي
شفتچ امن السوط طحتي بس وگفتي
والشمر من شتم أمچ انهضمتي
يذبح اعتابچ يخويه ... اوداعة أمچ
واني جسمي اعله الشريعة ... اوروحي يمچ والله ياخويه الدموعچ أفدي عمري
وانه كل هذا وفكر شنهو عذري سامحيني
**** *** ***
الشمر من صاح بسمچ وانتي اجيتي
باوعي السيفي يگلچ ياسبيتي
هذا دم احسين هذا مادريتي
شفتچ اتقبلين سيفه وانحنيتي
هوه قصده ايشوف دمعچ وما رضيتي
عفيه اختي درتي وجهچ من پچيتي
گطع السوط اعله متنچ ... واني انحب
ابلا جلد متنچ لگيته ... اه يزينب
متنج اشسوه ابدليلي الله يدري
وانه كل هذا وفكر شنهو عذري سامحيني
رد مع اقتباس
