ايست عين الموادع
والدموع انجوم طاحت على الگاع
والگلوب البالتراب اجذورهة
لو بديهة تطلع من اصدورهة
والخطاوي الفاركت كافورهة
سوت الهيمة حراثي ووجه كل جاهل شراع
ومن الهدوم الگصار اخذت اطوال الحراثي اشكالهة
واصبحت كل حرثة عين
اگبال عين الله اصبحت كل حرثة عين
وصعد ليفوگ الدعاء ابغير ادين
وانة كلبي بريسم ابيض
انة وين وهاي وين
يالمشيت وجمدت اعيوني اعلة خطواتك مناير
لمة ياخذني الحنين الباب بيتك
الگة مرسومة شبكتك على الباب
واشتعل عالعتبة شمعة
بلجي من بين الخشب يطلع نصيبي
يا حبيبي
يا حبيبي
يالي من شباج الموادع رحت ما خذت اديك
ثلجت كل الشواطي منين امد ايدي عليك
يا حبيبي منين تعبرلي وتجيني منين اجيك
يا حبيبي الروح خظرة وتشتهيك
الشواطي امسيجة بعيون ذيب
والزوارق لا تودي ولا تجيب
وانة كل صفنة التحطني اگبال عينك صبر عباد الشمس
كلشي بالدنيا يذكرني بأمس
وانة يحبيب بشر مو معجزة
مالي خاطر انبياء وتبرد اعلة اكتاري نار
ومالي صبر الانبياء وابقة عايش بأنتظار
وانة كل نجمة تحطني اگبال عينك مشك عباد الشمس
كلشي بالدنيا يذكرني بأمس
امس من طاح الجراد اعلة الگصيل
امس من گادوا مهرتك للرحيل
يبسن افناجين مكة
انگطع حبل المضيف وفارگتني
وانة من بين العيون النامت بجلدي گزاز
شفتك اتعدل وگفتي بعينك الضلت وراك
عينك النيمت لچفوف بگفاك
والعيون البيهة شوگ
تلوي كل ارگاب وي شاطي الوداع
اگبال عين الخايف اتمرجح خيالك سيف ومخازر غريب
غمض اعيونة وصرخ هذا حبيب
واليحب يعني غريب ؟؟
ورحت يا شباچ نذري
وخلى من المرواح طيب ،
،
عبد الكريم القصاب
رد مع اقتباس
