الماي يلچمني
ويروّي المايعرفك
وضاگت بوجهي
وشفت وجهك شريعة
وعاتبتها بلايه غيرة
الگنطرة التكره ضواك
ورية خيامك حنينة
وياهوه ايعوّض هواك
سوالف العطشان
ماتخله من اديك
واليضيع راسك اعله الرمح
عينك اتدلي عليك
يامضيف الغيرة
چم شيخ اعله بابك مشتهيك
وحتى ماهليت
اجيت من الله گمرة
وكبرت صيت الگمر
شبّهته بيك
وديرة الوادم عمه
وطحت بيهم
وعلمتهم ..
شنهو عود الغيمة
لطخة حنة بخدود السمه
ما رضيت اعله النهر
ماينطي مايه
وما رضيت عيونهم
تتفگد اخيال النثايا
ومن لگيت سهامهم عوز بسترهن
حشمت صدرك عبايه
وهيبة جروحك جزتهم
لچمة .. لچمة
وحنة القاسم تطلبك
جربة ماي
ومبري ذمة
ورايتك شگفت طعنهم
من ولوك
وهدّت مهندمة جروح
وچفك النيشن خصرها
بلا جرح .. ورايتك هدّت خضار
وعينهم غفوة فلح
ولا يلوحك مستحه من الخوله
اخوي .. ولاتهون
الگاع تستاهل لون خانت
غريب ايدوسها
وموش دوم الخلفة زينة
الشجرة منها وبيها
تطلع فوسها
ياهوه الطف
موسم چفوفك رقية
ومتني يتراواله سوط
تكزبر الدنيا من اگولن
ذاك اخوي
العلّگ بصدره أبوي
الجربة نوط
وتدري باختك
مايطگ عود بخدرها
بلا أخو
وياهو يدري
بظهر شمس الله شكو ؟
( الشاعر حسين الحبتري )
رد مع اقتباس
