براسي طف اسود
ترس راسي بياض
وعين تبچي
وعين تضحك عالسهم
عطش شفة
ابتسمت وخضّر فرات
عطش ما مفهوم
والماي افتهم
راية خضرة
ترست الدنيا خضار
وجربة حمرة من الخجل
ما بيها دم .. محبس ايدوّر على اصبع ما لگاه
البايگ الترچية
من شافه انهزم
طفل يرضع
لكن بكاروكه شيب
الشگگتله گماطه
مشكولة الذمم
ناس نامت ليلها
بلايه طموح
يحققون النوم
بس محد حلم
راس يابس
ما منگع بالضمير
السيف صاحي
بس اكو لسان انثلم
واجه موسم دم
كسر سوگ السيوف
واثنعش قرآن بالطف انختم
بين ( لاء ) حسين والذل
دم وريد
بين رب وماكو رب
كلمة ( نعم )
نار چانت گاصدة
عمامة رسول
و ألله طفه النار
بقماش الخيّم
حسين وزّع عالبساتين الطيور
زمن ما بي حب
زمن ما محترم
وطفلة علمتني
اعله حب حسين اموت
الدمعة بفراگ الأبو
تحتاج ( عم ) .. دمعة العزة
ابتسامة انتصار
وضحكة المامنتصر
دمعة ندم
الواعية عيونه
ايعرف معنى السواد
فرق لون الكعبة
عن لون الفحم
الطف الاسود
للذي بچف ايده سوط
الطف الابيض للذي بيده قلم
متن شايل حلم
ما شايلته گاع
متن بي رتبة نبي وهدّ عالصنم
وجدم ينگل عافية
وهو عليل
اليمشي لله بجرحه
ميحس بالألم
اختصار الواقعة بطف كربلاء
چفوف سمرة مخاوية
ملوحة علم
( الشاعر محمد الفاطمي )
رد مع اقتباس
