قبرك جمعنه .. وللطف رجعنه
نمشي اعله جمرة نار
ياخويه صِحنه .. زوارك إحنه
يالتكرم الزوار
لوعِندك اچفوفك
تستقبل اضيوفك
لو عِندك اچفوفك
تستقبل اضيوفك
-
رجعنة والنهر ياخوية من شفنا
كل ماجرة اعليك ابكربلة اذكرنا
وذكرنه اليمين الطاح من لوا
وسهم العين يا اباالفضل ماننسى
والتنگطع منه يسرته ويمنا
بيا مسند يگوم لضيفة يتلگا ..!
ياخوية بامرك ... واجب نعذرك
يافاچد الجفين
طحت اعلة گبرك ... انحب واخبرك
يلي ارخصتلي العين
خلي اختك اتشوفك
تستقبل ضيوفك
***************
مو گصدي اهيج بالعتب نارك
واجددلك گطع يمناك ويسارك
احنه وبليسر وصلنتة اخبار
دفنونك وطفت بالگبر انوارك
لاچن جينة هذا اليوم خطارك
وچنة عيلتك واصبحنة زوارك
ياخوية وينك ...! نتمنى عينك
ترجع الك وتشوف
بلوعة جمرنة ... لطف حضرنة
نزور الگبر ونطوف
كعبة ومن نطوفك
تستقبل ضيوفك
************
چنت اسمع گبل تحچي وتكول الناس
لفراگ الاخو يشيب الگلب والراس
ولمن جربتهه عرفت ياعباس
حزن فگد الاخو بكل حزن ماينقاس
يمن عايش بدمي وروحي والانفاس
بس مارحت راح الخدر والنوماس
نشدوني عنة ... ماچنت اظنة
فگد الأخو چتال
لمن عرفتة .. وبعيني شفتة
توضح الي هلحال
ونكتبت حروفك
تستقبل ضيوفك
************
بعيني شفت دمك عنهر يجري
جرت ويا دمعاتي بحجر صبري
مو بس انا حسيت بألم جمري
ومو بس انا وياك انفگد عمري
ومو بس انا حسيت بهضم كسري
حتة حسين ... ناداك انكسر ظهري
لشدة ردتك .. لاچن فگدتك
وكت الشدد ياحيف
لتظن نسيتك ... واليوم اجيتك
واحسبني عندك ضيف
ياروح التعوفك !
تستقبل ضيوفك
*************
كل ميت يحس ويشعر بگبرة
منهو الي يزورة ومنهو اليحضرة
اجت رملة وية ليلة تسچب العبرة
وسكنة ويلـ رباب لگبرك تنظرة
وانا ياگمر عدنان منتظرة
تجي لگبرك ويانة تحضر الزهرة
والزهرة أمي ... أتمنة يمي
تشاركني بالعبرات
ولطف تجيني ... وتسمع ونيني
بالوعة والآهات
متهمك حتوفك
تستقبل ضيوفك
*************
يامن چنت اغلى واعز من عيناي
اخبرك ياضمد گلبي ذخر دنياي
هلـ أطفال يم گبرك اجت وياي
تگلك گوم ياعمنة شربنة الماي
وانا الي هضمني وسلب مني الراي
لطفالك اخذت الماي من اعداي
ناس الأجنتة ... بالطف ولتنة
سفكو لهلنة دموم
منهم أخذنة ... الماي وشربنة
ونشعر شربنة هموم
شماتصعب ضروفك
تستقبل ضيوفك
*************
اردود اتفرقت عالنحر اطفالك
ومنهو الي يردنة ويجمع عيالك
انچان النوم ياعباس يهنالك
انا الي ارد العايلة بدالك
ولو اهل المدينة انشدو عن حالك
شجاوب يلغفيت بحجر اجالك
يظهر جوابي .. بلوعة مصابي
لوناشدوني الناس ..!
بشهگة مصايب .. الهم اجاوب
راح الگمر عباس....
....راح الگمر عباس
[ من أداء: الرادودين المبدعين
جليل الكربلائي - باسم الكربلائي ]
تدوين: Zahraa Al obaidi
7 صفر 1439 ه
رد مع اقتباس
المشاركة الأصلية كتبت بواسطة Salam Salman
