شدّه ياورد اتذكر من زمان
وجنه أطفال وذكر من لعبناهه
وجانت أحله شده وبيهه ورود
محبه وصحبه وي الطيب تلكاهه
ومن هيه الورد مومهم كلهه ورود
لعبناهه سوه وعلفطره كلناهه
شدّه ياورد جانت تشع أحلام
أحلام شكثر ماندري معناهه
أحلام ابراءه وتفتر ويه الصوت
تكبر وي عمرنه وتكبر وياهه
ورسمناهه سوه بعين الشمس تذكار
اذا ننسه الشمس فد يوم ننساهه
وأحلام شكثر طشينه ويه الريح
زرعناهه نعم بس ماحصدناهه
ماندري الزمن ظملهه جف الموت
وشدّه ياورد طشار خلاهه
شدّه ياورد بشفايف الحلوات
خوف تحولت والموت غطاهه
منهن حلوه جانت تحلم بعريس
فارس بابلي عله حصان خلاهه
وتحقق حلمهه بعرس ويه الموت
وحزام المفخخ هوه زفاهه
وحده بجامعه جانت تريد أتصير
دكتوره املهه وحلم مبغاها
قبلتهه المقابر بأمتياز أهناك
بدمهه توقعت والموت خطاهه
وشدّه ياورد من عدهه خض الشاب
اجته الطائفيه وسكتت صوته
سوتله جفن بثياب عرسه البيض
وباخشاب العرس صنعت تابوته
وشدّه ياورد نلزم سره عله الموت
بس وين شوكت ماندري بالموته
وشدّه ياورد صوت الشعب ماصاح
لسان الشعب يمكن بلعته الحوته
وشدّه ياورد هذا الشعب مسكين
باكو خيره كله وفرهدو قوته
وشدّه ياورد مثله ابد ماصار
يسبح بالنفط ومهدمه بيوته
وشدّه ياورد خلينه حزمه نصير
نهد صرح المنايه من نرد حزمه
ومثل ماجنه نلعب خل نرد اردود
وعلى جناح الحمام نطير للنجمه
وخل نزرع موكافي نزرع خوف
وخل نطش ضحك ونوزع البسمه
وخل نبني وطن
الله واكبر صاح
موكافي وطنه وبيدنه نهدمه
هذا الوطن ذمه بشارب الطيبين وزحمه الشارب
المايحمل الذمه
الشاعر
(شاكر الشمري)
رد مع اقتباس
