خجلانه هواي ....... الشاعر السيد عبد الخاق المحنه
خجلانه هواي ياجاري الماي - والغالي ماوفيته هم اربعه شنطيته
والله اخجل من اسولف عن وفايه - ادري ولدي اربعتهم مو كفاية
منهو اني منهو يذكرني بحكايه - من خدمته الله رافع مستوايه
لوكل الناس صاروا عباس - فدوه لوقار لحيته همه اربعه شنطيته
خجلانه هواي ياجاري الماي - والغالي ماوفيته هم اربعه شنطيته
اني ولدي صح اخوته بس عبيده - كل شرفنه من نحصل بوسة ايده
والمصايب الي راحت والجديده - ما تساوي قطره وحده بدم وريده
ولدي الاكبار خدام صغار - ومقصره ما جازيته همه اربعه شنطيته
خجلانه هواي ياجاري الماي - والغالي ماوفيته هم اربعه شنطيته
شما تضحي حتى نحرك من تكطعه -مايعادل شوغه وحده بكطع اصبعه
ولايساوي النظرة اخته من تودعه - لا تقارن بحر هايج ويه دمعه
شما تغله الروح لجدامة تروح - والمستحه خاويته همه اربع شنطيته
خجلانه هواي ياجاري الماي -والغالي ماوفيته هم اربعه شنطيته
اني اشعر هو ابني وماكلته - من عرفته مات ضامي سولفته
هي كلمه الأبو فاضل وصلته - هذا امامك تاج راسك أكدته
لاجل الاسياد فدوه الأولاد - بس يقبل تمنيته همه اربع شنطيته
خجلانه هواي ياجاري الماي - والغالي ماوفيته هم اربعه شنطيته
مانجازي نضره وحده الطفله تشرد - مانجازي وعلى صدره الشمر يكعد
ينظر اخته مره تسكت مره تنشد - كله ردي وهي ضلت تمشي وترد
مانسوه انبوس صدره المرفوس - اخجل اذا حاجيته همه اربعه شنطيته
خجلانه هواي ياجاري الماي - والغالي ماوفيته هم اربعه شنطيته
لاتسولف عن عطائك والخدامه - مايساوي سهم واحد من سهامه
شنو دمك شنو راسك شنهو قامه - مايعادل ونه وحده عل اليتامه
صدره الينداس يسوه اشجم راس - والضامي مارويته همه اربعه شنطيته
خجلانه هواي ياجاري الماي - والغالي ماوفيته هم اربعه شنطيته
كل مشيكم باربعينه لوتقيم - يساوي خطوه من الشريعه للمخيم
والماتم هاذي كله تساوي ماتم - تقيمه سكنه ويه رقيه بالوجه دم
ماتم ايتام يم نار خيام - بضلوعي ماداوته همه أربعة شنطيته
خجلانه هواي ياجاري الماي - والغالي ماوفيته هم اربعه شنطيته
الامة كلها كل عمله من تعده - مايساوي بيوم عاشر سجده وحده
خده مصحف بيه جلالة نور جده - وسفه تالي خيل اميه تدوس خده
تسلبنه اكلوب ثوبه المسلوب- بارموشي ما غطيته همه اربعه شنطيته
خجلانه هواي ياجاري الماي - والغالي ماوفيته هم اربعه شنطيته
لاسبحتك لاصلاتك لاصيامك - لاحضرتك لاجنابك لامقامك
لاعلومك واجتهادك واحترامك - مايساوي رفسه وحده بصدر امامك
وين احنه وين نوصل لحسين - هذا العلي وتريبته همه اربع شنطيته
خجلانه هواي ياجاري الماي - والغالي ماوفيته هم اربعه شنطيته
مانجازي تضحياته شمانطينه - موكفايه لالطمنه ولابجينه
اله نعرف شنو النه والعلينه - لوصفينه رايه وحده يرضه بينه
رايد تغيير يد وحده نصير - افهم عمق تضحيته همه اربعه شنطيته
خجلانه هواي ياجاري الماي - والغالي ماوفيته هم اربعه شنطيته
رد مع اقتباس
المشاركة الأصلية كتبت بواسطة Salam Salman
