ماينعرف راح
الشاعر حسام الحمزاوي
ماينعرف راح وجهه من الكَمر
بس من عطش صار احله من النهر
*******
مو لون الهدوم بسيفه كشخته
من دون الاولاد مدلل عمته
من ودعه حسين نزلت دمعته
شم هيل الاخيام كله بركَبته
صح طوله شلال بعيون البشر
بس من عطش صار احله من النهر
********
كَد ماحلو انشاف بالركَبه النفس
من عطر الحسين حنيه انترس
صاح انه الاكبر عمه عيون الحرس
شافو ضوه وجاي صاعد عالفرس
الرايه طاووس شدهه عالظهر
بس من عطش صار احله من النهر
*******
ابزحمة الخيل راسه شايله
رغم العطش راح يمطر مرجله
من غيرته الماي عافه لعاذله
من كَصة الاكبر عركَت كربله
ماشالته الكَاع يمشي اعلى النظر
بس من عطش صار احله من النهر
********
من شافته الخيل رجعت لي وره
من ضربة السيف ضاكَو حيدره
مايشتهي الماي شفته مفطره
من دون السيوف ضربته مبخره
حتى الهوه الهاب شمه من النحر
بس من عطش صار احله من النهر
********
واكَف على الماي ضامي من خطب
المايشربه حسين منه ماشرب
ويطشر الجيش ويلمهم حطب
من يرفع السيف تنزله الركَب
من كل كتر راح سد باب المفر
بس من عطش صار احله من النهر
*******
يسحكَ عالجروف وكَلبه بيه ضمه
من يلزم الماي يشمره اعله السمه
مايضرب الروس مثل حامي الحمه
يضرب على الضلوع ثار لفاطمه
وهلاله من غاب ظل طافي الشهر
بس من عطش صار احله من النهر
*******
امه وتعرفه جماله بالفزع
مثل الهوى يروح لركَاب الشمع
ماخايفه عليه بديهم ينصرع
من اليحسدون خلت له الدرع
من طب الاكبر بعينه الطف زغر
بس من عطش صار احله من النهر
*******
حدره الفرس كَام يلهب حافره
والحومه تنشاف مثل الاخره
سبعين الف ليل لكَاهم بالسره
سواها الاكبر سبحه مطشره
من خزرته الطير فوكَه ماعبر
بس من عطش صار احله من النهر
*******
موسهله الاعيال لمن تنثلم
كل مايكَع حيد زينب تنلجم
وزعهم حسين ظل بلا حزم
والعاشر يريد للخيمه زلم
زينب عل اكبر سومرهه السهر
بس من عطش صار احله من النهر
رد مع اقتباس
المشاركة الأصلية كتبت بواسطة كرارالحسيني
