كلمات قصيدة " روج الادرينالين " مكتوبة
الشاعر إيهاب المالكي
جيش آل أمية ع النهر من وگف
مترهي چان ومستقر منظره
مستبعيدين ايمر عليهم خطر
جيش المقابل ما إله المقدره
ثلة عطاشه وروحهم يبست
ذبلوا ورد والمشرعه محوصره
لكن أظن مافاهمين الذكر
وبسورة الأنعام محد قره
"حتى إذا فرحوا بما أوتوا أخذناهم بغتة"
البغتة معناهه ابوفاضل تره
من شافوا العباس لابس درع
روج الأدرينالين بيهم جره
ركزوا لتأكيد شافوا صدگ
ظهر المطهم شايل الآخره
ساعتهه مو بس بقوا أو مابقوا
الخطوة صارت ع النهر تنشره
من تراجعوا غيروا لون النهر
بالعلگمي تشوف انچفت محبره
سيف أبوفاضل چان من يرتفع
لحظة صعدته الشمس ترجع وره
يهجمون بس يرجع عددهم خبر
بي شاهد موثوق من مصدره
يرحوله جيش أطول من الحقد
يرجعون ينقاسون بالمسطره
قائدهم اعله القاده اوعز
بإن كل قائد يحط قوته ابمعسكره
لكن لإن خايف غلط بالأمر
كل قائد يحط قوته ابمگبره
عباس مو حي الله فارس برز
ولا بس ضربته اعله الخصم موجره
عباس أمر الله بختام الصبر
والحل إذا مارهمت المغفره
عباس إله بآيات هيبة علي
آية چفوفه وآية الگنطره
عباس إليه ويا زياره دمع
كلما احس بعبرتي مكسره
عباس يلما بيك نقطه ضعف
إلا جرح گلبك عل المخدره
الگاع بلگوه اطتك للسمه
والموت منك يطلب المغفره
حتى من أريد انساك ماتنسي
يلـ وحدك خليتلك ذاكره
أذكرك كلما يمر أسم اخو
هذا الإسم يمر غيرك استكثره
يارقم مخزون الوفه اعله الأرض
من آدم لآخر بشر بالسره
گلي گبل گطع الچفوف اشچنت!!
خضت النصر وچفوفك امبتره
كلمات الشاعر : إيهاب المالكي
تدوين: Zahraa Al obaidi
26/محرم/1439 ه
رد مع اقتباس
المشاركة الأصلية كتبت بواسطة كرارالحسيني
