ليش تزعل من أگولن ياعلي
ولو جبت طاريه واذكر سيرته
واضح التغيير وعيونك تگول
وعندك الميزان تختل كفته
گلي بسباب الزعل فهمني ليش
وعقدة الموروث بيك وغلطته
انت من ذاك السلف والهم سليل
ومثلك اهواي النواصب ربته
البغض ميفيد والعله تطول
واليعرف دواه هانت علته
حدر جفنك عين غطاها الظلام
وبالظلام اشلون تبصر صورته
الشمس رمحين والدنيه نهار
واليريد ايشوف يترك ظلمته
لاتظل محتار والمثلك يحير
من يشوف بعين غيره السبگته
علي عين الشمس والمثلك الغربيل
وعلي سر الله اليعرفه بحكمته
أسال التاريخ وسنينه تجيب
ياهو العاداه ودامت فرحته
هو بالاصلاب والذر والوجود
نوره من نور الرسول وطينته
لا ولد گبله ولا بعده يصير
كرامه الرحمن صار بكعبته
شاهد ومشهود الشق والجدار
وامه بأشرف بيت واقدس وضعته
لانكر سنه ولا جانه بجديد
وهو للمختار عاكس صورته
تندب النسوان من تطلگ علي
وامه ندبت بيه يوم الجابته
سيد لميدان ساحات القتال
والنصر معگود دوم برايته
تشهد الخندق اله وبدر وحنين
واحد وخيبر تشهد صولته
لاتبع مدبر ولايكتل ضعيف
وانطه حگ السيف قيمه لضربته
سفر كله افعال ولشخصه تلوگ
والبلاغه تفيض شهد بكلمته
لقبه المختار ابو تراب بدليل
وامه بالألقاب حيدر سمته
هو من أخاه من أخى الرسول
وبالمباهل چان نفسه وحجته
كافل الأيتام وابسط من بسيط
ودرة الأيمان تاجه وحلته
هو بالمحراب اضعف مايكون
وحالة التخشيب تردف سجدته
لهذا ابن ملجم سهل فعله اللعين
وبيها اشقى الناس نفذ غدرته
بلسم المهموم والصعبه تهون
لوتعنه وراد يگصد حضرته
شمس بينه ايصير لو هدنه الظلام
وصبر عالصعبات ناخذ سكتته
حگ واجب علينه وعنه ما انحيد
وذخر مضمون عدنه ولايته
من نشهد علي مو احنه الله ايگول
وبكمال الدين تمم نعمته
فرقد بيه علي وبمرقده ايشع نور
ويلوذ الكون كله بگبته
واخر المشوار يعذرني الأمير
تعجز الأوصاف توصف حالته
رد مع اقتباس
المشاركة الأصلية كتبت بواسطة ♡ Zahraa Al obaidi ♡
شكرا