فطمنه أطفالنه بحبك يبو حسين
وگبل نگل الجدم اسمك ينطقونه
بالفطره علي وچنهم يعرفوك
بدو بيك الحچي وبيك يتناغون
نذرناهم نذر ونگص شعرهم بيك
احبابك علي وباچر يكبرون
قدوتنه علي ونبراس الدروب
وعلى نهجك مشه ونمشي ويتبعون
من الله المحبه وبيك حب الناس
الينهض علي وليگعد يگولون
تهل عيونه من نگبل عليك
ومن فيض المشاعر فيض العيون
نگصد حضرتك چن انته موجود
ويمك تنجلي هموم اليگصدون
علي حبك وراثه وجيل يورث جيل
وعلى هذا الدرب الكل يسيرون
حرز ولايتك منجه من الذنوب
هنياله اليحبك وليود خيعون
ابو الكلفات انته وتحضر الينخاك
ولهذا بشدايد بيك يتنخون
سر انته علي ولليوم ما معروف
بس الله ورسوله البيك ايعرفون
صح نحچي ونگول ونوصف هواي
بس هذا قليل وبيك سر مدفون
علي شنهو النريده وبيك ما نلگاه
چثيرات وصعب عدها اليعدون
نسكت عن بعض غض الطرف موجود
وخطوط الحمر يمك يحظرون
خاسر ما ربح كلمن يعاديك
ولزرعو حقد لا بد يحصدون
اهي دنيه گصيره وباچر مودعين
وغير ولايتك ماعدنه مضمون
رد مع اقتباس
المشاركة الأصلية كتبت بواسطة ♡ Zahraa Al obaidi ♡
