انا ماشوف زينب وين ياليل !!
اذا عدك خبر خليني اعرفه
..
سولفلي اعله المعادلهه بالروح
بيرغ هيبتي لصفنتهه عفه
..
مر اعله الخيم طمني يا ليل
لكن ها اذا مابيهه كلفه
..
رحت !
بشرني اذا ماصادفك موت
طمني اليشيع خالي چتفه
..
زينب باچيه !
جاوبني ياليل
على ظلهه لكيت عيون صلفه !
..
يم خيمتهه مارايح مشي الماي !
يم باب المخيم ماكو ضفه !
..
طفل عطشان عدهم بعده
وشلون تلاوة ويلعطش وچفوفه ترفه !
..
شفت ضل مايشور يم الخيام
الأمان العايفه اعله خيامي كفه !
..
أشفت شو طولت بالسكته ياليل !
رحت تحچي ورجعت بدون شفه
..
إذا ماتحچي بس جر السهم عاد
لو تحچيلي كل الما اعرفه
..
شحچيلك !!
واعرف همومك هواي
يامشهد اگوله وياهو احذفه !
...
اگلك زينب اعله خيامهه النار
صعدت والنهر ماعده رأفه
..
اگلك وگفت تعاين بالوجوه
غربة ومالگت واحد تعرفه
..
اگلك شرب عبدالله الطفل موت
عطشان وخذه من القوس رشفه
..
اگلك مشنقة خيل اعله الخيام
نصبوا والضوه بفيهه تشفه
..
أكلك من حچة السجاد شافوا
صاحوا للحرس گالوله چتفه
..
شگلك عطر ضل من صدر الحسين
اعله حافر خيلهم منطيهه نزفه
..
وگفت گبال زينب چني موليل
ادور بليل روحي لـ ليلي منفه
..
گلتلهه ترة مكلفني عباس
گالت حيرتي لوحدهه گلفه
..
گالت ردت اسألك عنه يا ليل
گبال چبده مانزل. الله صدفه
..
تخيلته ويوادم عدهم چفوف
تنخوا ثاري محد ينطي چفه
..
سكتت وانا ألم بشوغتي حروف
گوة الگه الحرف بس يلگه حتفه
..
گالت من ترد چفوف عباس
دمعك بالنجم ياليل نشفه
..
عن لا ينجرح تدري انته ينراد
يصفگ چفه من ايگول وسفه
..
گتلهه انا احاول جهد الإمكان
ما اگله الهموم العنه تخفه
..
بس مولاتي يمته جروحچ اطيب
گالت من جرح عباس يشفه
...
كلمات الشاعر المبدع : إيهاب المالكي
تدوين : Zahraa Al obaidi
11 محرم 1439 ه
رد مع اقتباس
المشاركة الأصلية كتبت بواسطة Salam Salman
